احسني الظن بالله يعطيك ما تريدين

مرحبا حبيبااتي
وربي إني اول مرة أدخل هالقسم، كنت داخلة بس أشوف وش فيه من مواضيع
وانصدمت من المواضيع والبنات اللي للحين ما تزوجوا ويبون الزواج
بجد مأساة
لكن تظنون المأساة تطول لو أحسنتِ الظن بالله ؟؟
يا بنات أنا عمري 21 سنة الحين .. من لما كنت صغيرة كان عمري 13 سنة وكانوا يتقدمون لي بس أمي ما تزوجني على أني صغيرة ليمن كبرت شوي وصاروا يتقدمون لي نااس ما كنت أبيهم
ما كاان فيهم شي أبد .. غير إني أبي اتزوج احد من العايلة !
أنا وحييدة امي وابوي وما عندهم غيري .. أنا مابي أروح لواحد ماعرف عنه شي وما يحافظ علي
أمي وابوي بعد نفس الشي .. خايفيين يعطوني أي احد ما يعرفونه
رفضت 6 أشخاص تقدموا لي والسبب ؟؟ إني خايفه من أي شخص
آخر واحد إجاني دكتور كان يدرس طب وتقدم لي وأخته تقول لي : اخوي ما عنده مانع يعطيك شقة
لوحدك بس يبي منك تقدير لظروف شغله ..
كنت ما أبيه، بس أمي أصرت علي إنهم يسألون عن الولد يمكن يكون صالح وبلاها نرفض كل مرة واحنا ساكتين
انا وابوي كنا معاندين
تخيلوا يا بنات .. لما وصل الخبر ل ( ولد عمتي ) إن في واحد متقدم لي .. بنفس اليوم كلم امه : يمه تكفين تكلمين بيت خالي تقولين لهم ينتظرون علي بس شهريين أجيب المهر وأتقدم لها بس لا تروح لأحد غيري !!!
عمتي كلمتنا بنفس اليوم وما كنت متوقعة .. ولد عمتي حاطني بباله من قبل 7 سنوات ؟؟
وأنا كنت أنتظر احد من أهل أبوي يتقدم يخطبني ماحد جا تقدم ؟؟
ويوم إني أيست من إنه راح يتقدم لي أحد من اهلي .. طلع فيه واحد ينتظرني من 7 سنوات ؟؟
والحمد لله تمت الملكة من 8 شهوور وحيتنا مثل العسل ..
اللي أبي اوصله لكم يا بنات
جسو النبض
شوفوا يمكن في احد من أهلكم يبي يتزوج بس غافلين عن موضوع الزواج حالياً
شوفوا يمكن في أحد ما جيتوا بباله وبعدين لما توروهم نفسكم تطرون على بالهم بإنكم تصلحون للزواج
( مع إني ما كان هالشي في بالي .. بس ولد عمتي شافني قبل 7 سنوات وحطني في باله وأنا ما كنت أعرف بأي شي عن هالموضوع )
واحسنو الظن بالله يا بنات ثم احسنو الظن بالله
اتيقني إن الله ما راح يخلييك محتارة ولا راح يخليك وحييدة
اتأكدي بإن ربك أرحم عليك حتى من امك وابوك وعدم زواجك للحين ماهو إلا مصلحة لك وإنك بإذنه تعالى
راح تتزوجين عما قريب ..
ولأنك تحبين ربك .. ربك ما راح يخليك وراح يجيك النصيب
اتأكدي من كل هذا
لا تشككين بالموضوع ..
خليك على ثقة
" عبدي اطعني تكن مثلي، أقول للشيء كن فيكون، وتقول للشيء كن فيكون "
اطيعي ربك حبيبتي .. واتأكدي إنه ما راح يخليك
واتأكدي إنك راح تتزوجين عما قريب . . ربك ما راح يخيبك إن شاء الله
أدري إني طولت كلاام وذكرت قصتي بس عشان أبين لكم إن احيانا تكونين في بال أحد بدون ما تدريني أو بمجرد زيارة لناس من اقاربك .. ممكن تكون سبب في زواجك وانتي ما تدرين !!
وعذرا على الإطالة
وربي يوفقكم كلكم يا رب ويزوجكم كلكم يا رب