اغراض لتجهيز العروس الكل يشارك فيه

اهلين بأحلى فراشات
بنات حابه نفيد بعض في اغراض التجهيز للعروس
ونهتم بأدق التفاصيل
يعني كل وحده تطرح شي غريب او اسم محل للجلابيات او الشنط اوماركة ارواج حلوه وتكتب رقم الروج او المناكير اللي الوانها حلوه
مسكره قويه اواي شي ممكن يفيد العروس
اول شي لاتنسين تروحين لزهور الريف وخذي اي شامبو شعر عندهم مثل التوت او مايا اوغيره وخذي العطر المركز الزيتي من نفس الريحه واخلطيه مع الشامبو
واذا استحميتي بخري شعرك بعود مبثوث من عند الدخيل وعطريه بعطر راما من عند الماجد للعود راح ينجن ابو الشباب من ريحة شعرك
وفيه عندك عطور قويه مثل ستيلا و مس ديوروشانص من شانيل
ورومانس وسينما وفانتازيا
وبالنسبه للمكياج انصحك بماركة فور ايفربصراحه خيال جميع اغراضهم حلوه
ولا تنسين تاخذين لوشن اولاي بالتوت قبل ماتنامين حطيه على وجهك
اذا صحيتي راح تلاحظين بشرتك صافيه وبيضاء بينهبل ابو الشباب
واذا استحميتي حطي منه على صدرك ورقبتك وايديك وسيقانك ورجولك يعني على جسمك راح تلاحظين بياض وصفاء
وخذي من بودي شوب مرطب الشفايف بالفراوله ضروري يكون بالشنطه
يعطي شفايفك لون وردي وريحه حلوه
ولاتنسين تهتمين بأدق التفاصيل مثل تختارين تعليقه لجوالك حلوه وربطات شيفون لشنطتك
وتعليقات ناعمه لساعاتك وشراب ملونه مع قمصان قطنيه قصيره تطلعين بنوته كيوت فيها
وركزي على الجلابيات الفخمه وياليت تعدلين فيها يعني تخلينها مخصره على جسمك وخذي لها اكسسوارات مناسبه وربطات شعر معها ولاتنسين تثقلين المكياج اذا لبستيها
وانصحك تكثرين من الفساتين الناعمه واقترح عليك تاخذين شيفونات وحراير واسترتشات هاديه وتلقينها رخيصه يعني المتر بعشره ريال وراح تلقينها عند الدخيل اوشارع الخزان فيه اقمشه حلوه ورخيصه وروحي لخياط مضبوط وفصليها والموديلات ماليه المنتدى وبيطلع الفستان مايكلف 150
وخذي تنانير قصيره مع ابوات او جزم ناعمه
بناطيل حلوه ماركات مثل زارا او برمود او جينيفر ونسقي حزام ناعم على بلايز ناعمه
وركزي على الساعات الجلد معها
وخذي ايضا معك حبوب جينسو 500
راح تفيدك اول ايام زواجك لانها فيتامين وانتي اول الايام راح تكونين مرتبكه ومرهقه
ولاتنسين الفواحه وعطورها
ونصيحه مهمه لاتنسين تاخذين معك البلسم لانه اذا جيتي تفكين التسريحه راح يطفشك شعرك ولا راح ينغسل وينظف
وايضا ملابسك الداخليه خذي 4 اطقم فخمه من نعومي او لاسنزا والباقي خذيه من الهرم والله عندهم اشياء كأنها ماركات وخذي من عندهم قمصان النوم والبيجامات
كل ماجلستي اسبوع اسبوعين مري عليهم راح تلقينهم جايبين بضاعه جديده
وفيه غسول للمنطقه الحساسه تلقينه في صيدلية الحبيب اسمه جل جينل ريحته قويه وفواحه وغير هذا كله طبي وممتاز للاافرازات
واذا تبين بلايز ناعمه عندك محل بيرشكا وتيرينوفا
ولاتنسين الروائح وسط اغراضك مثل الكور والاكياس والاوراق المعطره تلقينها في سيتي بلازا
هذا اللي يحضرني الان واذا تذكرت شي راح ارجع اكتبه
وياليت كل وحده تدخل تكتب لو حاجه وحده تفيد العروس حتى لوكانت بسيطه
وادعولي ان الله يسهل علي ويسر لي امري ويوفقني فيه
ملاحظه
ادري ان الموضوع حوسه ومو مرتب بس اتذكر واكتب