البنت السعوديه

إن بغيت الطيب فيها طيب ما مثله مثيل
وإن بغيت الحسن ربي صاغها بأروع جمال
وإن بغيت الجود فيها الجود من عرقٍ أصيل
هذي ( بنت المملكه ) بنتٍ تضاها بالرجال
ما تعرف اليأس أو قولة ( بعيد ) أو ( مستحيل )
ما تلاقي عندها تعريف للكلمه ( محال )
الصبوره .. القنوعه .. ترضى بالشي القليل
لوما أخشى من الملامه كنت ألبسها عقال
الرقيقه .. الحنونه .. راعية بالٍ طويل
الكريمه .. العظيمه .. ما تقصّر بالوصال
بنت أبوها تخدمه بعيونها لو هو عليل
وأمها تفخر بها وتدعي لها بولد الحلال
أي وربي للسعوديه انا مارضى بديل
يا بعدهم يالرطب ياللي كسر سوق الخلال
يالجميله .. يالأصيله .. جيت لك مثل الذليل
يطلب القرب بوصالك جننه زود الدلال
يالحشيمه .. يالرحيمه .. يا وفيه بالخليل
زان طبعك من جدودك ثم عمامك والخوال
من يلوم اللي غدى من نظره بعينك قتيل
لو يحاول أو يقاوم ؟! ماله بموته مجال
إن حضرتي تشعلين الحفل بالخصر النحيل
تبهرين الحفل وانتي تصبحين الإحتفال
من يشوفك غصب عنه قلبه المغرم يميل
مو بكيفه وين ما رحتي معاك القلب مال
إنتي نهرٍ ما يجف من العطا يالسلسبيل
وإنتي في دينا الهوى وطبع الوفا أروع مثال
إنتي أختي وإنتي أمي وكل إحساسٍ جميل
وإنتي العشق الحقيقي وزوجتي وأم العيال
لو ألف الكون كله ما ألاقي لك قبيل
إنتي وحدك .. لا يهمك من حكى فيكم وقال
إنتي مثل النجمه اللي تضوي الليل الكحيل
وإن يطال سهيل فانتي النجمه اللي ما تطال
بس الرد لا تنسيه