الطريقه السريه للسعاده الأبديه

السلام عليكم ورحمة الله وبركاته
مرحبا
حيالله خواتي الغاليات
اليوم جايبه لكم الطريقه السريه للسعاده الابديه
وهي كالتالي
تتوظين اذا قرب وقت الآذان واول مايأذن اتركي كل شيء وروحي رددي خلف المؤذن
رددي وانتي تتأملين معاني الكلمات الي يقولها المؤذن
مثلا اذا قال
الله اكبر
قوليها بتأني ومن قلب ,يعني استشعري معانيها بقلبك
الله اكبر من كل المعوقات الي تواجهنا في الحياة
الله اكبرمن كل الناس الي يحقرونا
الله اكبر من الناس الي يقولون
من يبي يتزوجك وانتي بهالعمر
او من يبي يتزوجك وانتي مطلقه ومعك دستة بزارين
او من يبي يتزوجك وانتي ارمله وفقيره ومعك كومة بزارين
الله اكبر من الناس الي يقولون لاتحلمين,كيف تحلمين وانتي بهالعمر
الله اكبر من الي يقولون الحين خريجين الجامعات مالقوا وظايف وانتي مامعك الا شهادة المتوسطه,لا وبعد ماعندك واسطه.
الله اكبر من الناس الي يقولون انتي معاقه وشيفه وشعرك كشه وامك وابوك شيف ويفشلون وبعد تبين تعرسين على واحد على مستوى رفيع
باختصار
الله اكبر من كل شيء
من كل مخاوفنا
الحمدلله بس ان الرزق بيد الله سبحانه مو بيد خلقه ولا كان رحنا وطي خ
المهم
بعدين تكملين الترديد خلف المؤذن
وهكذا كل عباره يقولها المؤذن تقولين خلفه وانتي تستشعرين معانيها
مثال ثاني
كلمة التوحيد
عاد هذي خطيره
اشهد الا اله الا الله
يعني لا معبود بحق الا الله
لاخالق الا الله
لا رازق الا الله
استشعري في قلبك وانتي تقولينها,هذي المعاني
لارازق بالزوج او الوظيفه او الأولاد او المال او أي رزق
لاتستطيع أي قوه في الكون ايجاد هذا الرزق وتحقيقه اذا لم يكتبه لك سبحانه
لااله الا الله
أيضا من معانيها لاقادر الاالله ,استشعري انو لاقادر على تحقيق امنياتك الا الله ولاقادر على تسخير زوجك لك وصلاح اولادك وغيرها من الامور الي تتمنينها الاالله
وهكذا تكملي ترديد خلف المؤذن واستمتعي وانتي تستشعرين معانيها الي ذكرت بعضها
وبعد ماترددين خلف المؤذن
تقولين الدعاء الي بعد الأذان أكيد تعرفونه
بعدين تكبرين وتصلين
واذا سجدتي ادعي بالسجود بكل الي خاطرك فيه لين يقيم وقت الصلاة, يعني طولي السجده لما يقيم الصلاة
بعدين قومي من السجود وكملي الصلاة عادي,واذاسلمتي قولي الاذكار الي بعد الصلاة واقري لك اربع ورقات من المصحف
وصلي الراتبه.
الحين اقول لكم ليش قلت اسجدي واستمري بالدعاء لين يقيم الإمام
السبب انك راح تجمعين وقتين للإجابه في لحظه واحده وهذا ان شاء الله سبب لإجابة الدعاء
الوقت الاول في السجود
الوقت الثاني بين الاذان والاقامه
واذا قريتي بعد كل فريضه اربع ورقات خلصتي جزء في شهر
تنبيه
1_طبعا اذا كان مافيه مشقه عليك فمثلا لو كان ركبك تعورك خلاص مايصلح تطولين بالسجود,لأن الله لا يكلف نفسا الا وسعها
2_اكيد تعرفون انو لازم تحسنين الظن بربك وانو ماراح يخيبك,ومع حسن الظن طبعا اكيد لازم تحسنين العمل وتبعدين عن المعاصي,اسأل الله الهدايه للجميع.
يالله طولت عليكم حبيت أفيدكم بهالطريقه الي افادتني
استودعتكم الله الذي لاتضيع ودائعه
محبتكم
احلام طفولة