الغريبه للكاتبه غيوم الشووق

الجزء الثاني
يمه يمه وينك
لبيه يمه سعود وش بغيت
سعود : يمه الملف الازرق الي على درج مكتبي من الي ماخذه مايدخل مكتبي الا انتي او الشغاله اكيد عندك خبر عنه
ام سعود : أي هذا يمك جا ابو محمد وخذاه الصبح وانت نايم وقال محتاجه ضروري وان عنده سفر وقال ان ام محمد عازمتنا اليوم نجي عندها تبي تعرفنا بضيفه جايتها
سعود : اشوى الحمدلله والله يايمه ان في الملف معامله مهمه لزبون لو ضاع كان ضاعت وظيفتي
ام سعود : بسم الله عليك يمه
سعود : وش الضيفة الي عند خالتي يمه
ام سعود : هذي تقول ابنيه مسكينه فاقده اذاكره وماتدري وين اهلها لقوها ناس تمشي على طريق الشرقيه للرياض ماعليها غير ملابسها وماتذكر أي شي وماغير تبكي
سعود : يالله المستعان دايم خالتي قلبها كبير مع ان ربي مارزقها عيال الا انها تحب الجميع وكنهم عيالها هاه يمه تبين شي قبل لا اطلع
ام سعود : لا يمه رووح جعل ربي يستر عليك ويوفقك ويخليك لي يارب
ابتسم سعود دايم هذي دعوات امه تشعره بسعاده ويحس انها وجه خير عليه
ريم : صباح الخير يمه وتجي وتحب راس امها
ام سعود : صباح النور هلا وغلا بالريم ينشرح صدري يابنيتي اذا شفتك
تقوم ريم وتحضن امها : ياعلني ماخلى منك يمه وياعل عيني ماتبكيك قولي امين
قومي يمه عني ههه ذبحتيني
عبدالله جاي مسرع ويسحب ريم من رجلينها وهي تصيح ويقوول ابعدي عن امي يالدبه بتكسرين اضلوعها خليها ترانا نبيها
ريم : وجعن يوجعك يالدب ذبحتني يمه شووفيه كسرني اهي اهي دموع التماسيح
امهم تضحك على خبال عيالها
عبدالله : يجي ويحب راس امه ويقول ياعلني مانحرم من ذا الشوفه يارب ريم قومي جيبي فطووري
ريم وتحط يديها على خصرها: ياسلام شغالتك وانا مدري
يقوم عبدالله ويلف يدها على ورى ها بتروحين ا و لا وريم تصيح يمه تعالي بيذبحني وامها تقول طيعي اخوك وليش ماتجبين له الفطوور
راحت ريم للمطبخ وهي مقهورة وقالت للشغاله تسووي فطور لعبدالله وجابته له في صنيه وقالت اطفح جعلك تغص
عبدالله : خ تعالي افطري معي عشان نغص جميع
ريم : اذلف عن وجهي ترى مالي خلقك
ام سعود : ريم يمه ترى خالتك عندها ضيفه وعزمتنا الليله نجيها
ريم : ومنو الضيفة يمه وين عرفتها خالتي
عبدالله : شوي شووي على امي حشا بالعه راديو انتي
ريم : انت يالدعله من كلمك هاه اعرف الرجال الي يتكلم في كلام حريم يسمونه نسونجي
عبدالله : الظاهر انتي ماراح تسكتين الا اذا قمت عليك
ريم نطت ورى امها: تعال اذا فيك خير
ام سعود : ابد انتو ماتحترموني ماتستحوون كني مانيب جالسه بينكم
عبدالله وريم راحو وحبو راس امهم العذر والسموحه يمه بس بنتك هاذي تطفر بالواحد
ريم : لا والله مو كنك الي تدخل عصك في الي مايخصك
ام سعود : مسكت راسها لاحول الله بلاني بعيال مهابيل
مها : يمه وش رايك التيور الوردي ولا الاورنج البسه الليلة
ام خالد : كلها يايمه زينه البسي الي يريحك
مها : شكلي بتصل على ريم واسئلها
رن رن رن
مها : الو
عبدلله كان جنب التلفون وشاله وهو كان الرجال يغني: سلمولي على الي سل حالي فراقه احم احم هلا والله
مها عرفت صوته ومانطقت وبدى نفسها يضيق وحست بحراره فضيعه :
عبدالله : الو ياحول
مها يالله جمعت نفسها ونطقت : ريم موجوده
عبدالله : بالله تبين ريم أقول يا الأخت ماتعرفين تسلمين قبل
عبدالله : وجع سكرت التلفون في وجهي انا وريها هذي اكيد مها بنت خالتي مايحب ويكلم ريم غيرها اشووف الرقم في الكاشف
ويرجع ويتصل ويقلد صوت مراه يتصل طبعا من جواله الو
مها كانت جنب التلفون ردت : اهلين
عبدالله بصووت ناعم : منو معاي
مها : احلفي ياشيخه مو انتي المتصله المفرووض تسلمين اول شي
عبدالله ونسى نفسه وتكلم بلهجته: علمي نفسك
مها : هاه
عبدالله رجع ينعم صوته : لا ابد فيني زكام وصوتي يجي ويرووح هذا مو بيت ....
مها : لا غلطانه اختي
عبدالله ويرجع صوته زي ما كان : يلا مع السلامه اجل سلمي على خالتي وثاني مره سلمي اذا كلمتي ناس السلام لله
مها : وجها صار طماطه وانقلب اشارة مرور هذا عبدالله ياويل حالي وش هببت وقلت له
راحت لريم واتصلت عليها ريم تسمع جوالها يرن ريم : الو
مها : ريم الحقي علي
ريم : بسم الله عليك مها وش فيك
مها : عبدالله ذبحني ولا سما علي
ريم : مها اقول تقلعي الحين انا قاعده اجهز للعزيمه وانتي تقولين ذبحك وش سوى غضنفر زمانه
مها : حرام عليك ريم لاتقولين عنه شي وربي امووت في هالانسان انا يوم اسمع كلامه ماعاد اقدر اتحرك ولا اتنفس شلوون اذا شفته
ريم : تبيني اقوله انك تحبينه
مها : ياويلك ياريم اذا نطقتي وربي ماعاد تشووفين وجهي في بيتكم ليوم الدين ولا ارضى عليك مستحيل مستحيل ياريم ابين حبي له او اقول له
ريم : اذا قعدتي على هالحاله مراح يدري
مها : راضيه وقعدت تصيح " مها انسانه حساسه والحب لاعب في حسبتها "
ريم : تبكين عشان عبدالله مها حرام عليك اذا الله رايد يجمعكم راح تجتمعون واذا ما اراد والله لو كان يحبك وتحبينه والكل يتمنى جمعاكم مراح تجتمعون
ساره راحت تشوف الأشياء الي شرتها لها أم محمد احتارت تلبس شي رسمي : ياربي محتاره وش اسووي الحين اسئل عمتي اخاف تتضايق مني بروح واسئلها وامري على الله
ساره تتقدم وهي مترددة : عمتي
ام محمد وهي تشرب القهوة العربية الي ما تستغني عنها ولازم في الصباح تأخذ على الأقل اربع فناجيل منها مع التمر طبعا : هلا يمه تعالي وش تبين
ساره وهي مستحيه ومدنقه راسها للأرض : عمتي انا محتاره وش البس اليوم فتحت الدولاب واحترت اكثر
ام محمد وهي تفز واقفه : تعالي معي يمه فتحت ام محمد دولابها واختارت لها تنوره فيروزي بقصه حلوه فيها دقات بالزيتي على القصة وبلوزه زيتي غامق ساده
ام محمد وهي تبتسم لساره : الباقي عاد يابنيتي ماعندي خبره فيه اختاري انتي الكسسوار والمكياج
ساره وهي تضحك : ابشري يا عمتي
خذت حزام زيتي روعه من الجلد عريض شووي ولبست عقد على هيئة أحجار غريبه حبه زيتي غامق وحبه افتح منه شووي وحلق ناعم مره جا دور شعرها طبعا ساره شعرها حرير مايحتاج استشوار مو طوويل مره ولا قصير يجي عند الخصر قالت لازم اسوي فيه حركه ما حبه يكون طايح كذا جابت بنس وصارت تحط جل شوي ومويه وتلفف اطرافه من تحت ببنس جا دور مكياجها وهي بيضاء مره مايحتاج تحط كريم اساس كثير حطت بودرة خفيفة وكحلت عيونها من جوى بخضر وحطت شدوو خفيف زيتي واحمر خدود وروج هاديء جدا يميل للحمي يمكن الي حولها يشوف لمعه بدون لون لبست لبسها وفكت شعرها وانبسطت على ذوق عمتها وكيف طلع شكلها تحفه وارتاحت نفسيتها " طبعا الأنسان اذا كان راضي على لبسه راح يستانس ويرتاح وياخذ راحته بالسوالف هذا عني انا مدري عنكم "
وصلت ام سعود وبنتها والي موصلهم طبعا سعود
" معلومه مهمه السواقين من الأشياء الممنوعه عندهم مو بس سعود كل العائلة تركي وخالد وخالهم سعيد "
ريم وهي تشيل النقاب : يمه منيرة " هذا اسم ام محمد "
ام سعود وهي معصبه على تصرفات بنتها : متى بتعقلين وتنسين حركات البزران
ريم وهي ميته ضحك : مراح انسى لازم يدرون ان الشيخه ريم وصلت
ام محمد وهي ترحب و تهلي : ياهلا والله بشيختنا وبنيتنا ريم
ريم بسرعه تسبق أمها تبي تضم ام محمد : اموح على احلا خاله بالدنيا
ام سعود: شلونتس ياوخيتي بشريني عنتس
ام محمد وهي تحب راس ام سعود لأنها اكبرهم : بخير بشوفتكم والله ياختي اذا شفتكم كني ملكت العالم كله
ريم وهي تتكلم بشويش : خالتي وين البنية ما شفتها
ام محمد وهي تضحك على بنت اختها وفضولها : ساره بتجي بعد شوي قاعده تتزين يمه
ساره اقبلت عليهم وهي تحس بحرارة وارتجاف اطرافها تحاول تصير طبيعيه بس الحيا ذابحها ويالله انطقت: السلام عليكم
الكل : وعليكم السلام
ساره وتجي لام سعود وتحبها على راسها : شلونك خالتي
ريم تفز واقفة: هلا وغلا هلا ومرحبا بصديقتنا الجديدة يامرحبا بطش والرش والبيض المفقش خ
ساره وهي تضحك وتحس بالراحه : والبقا الله يسلمك ياعمري
ريم وهي تشقق من الضحك : انا الشيخه ريم وهذي امي الجوهره ام سعود
ساره وفعلا حست كنها بين اهلها : والنعم والله
ام سعود واعجبها أدب ساره : تعالي يمه اجلسي ارتاحي لا تأثر عليك الخبله ريم وتصيرين مرجوجه مثلها
الكل مات ضحك على شكل ريم وهي تصتنع البكي
ريم اهي اهي : الله يسامحك يمه انا خبله وش رايك يمه منيره
ام محمد وهي تضحك : انتي احلا خبله في الوجود
ريم وهي تفتح ثمها : حتى انتي يمه ابيك عون صرتي فرعوون
انا اصير لك فرعون وعون امري امر مها وهي تشيل النقاب عن وجهها : مساء الخير على الناس الحلوين
مها تحب راس خالاتها : وش خبار عجزنا
ريم :خ عجز حدك عاد امي احلى صبيه اذا امك عجوز بكيفتس
تجي صيته اخت ام محمد الثانية : أي والله عجزنا شوفيني يالله رقيت ثلاث درجات وراح نفسي قاموا الكل يسلمون على صيته
ريم تجر يد مها : اعرفك على صديقتي الجديدة
ساره الي بتحل مكانك ههه
مها واعجبتها هدوء ساره وجمالها : مرحبتين السوري وش أخبارك بشريني عنك
ساره وهي تشوف كيف عائله على غناهم الا ان نفوسهم طيبه : بخير الله يسلمك
اعجبوا الحريم بساره وكيف انها ما تتكلم كثير وطول الوقت بس تبتسم على خبال ريم ومها
صيته وهي تسأل اختها منيره : اهل سعيد وينهم ماعزمتيهم
ام محمد : الا بس تعذروا يقولون معزومين عند خوالهم
جت نوره وبنتها دانه
مها وريم بنفس الوقت : دانه صرصور انتبهي
دانه تنط فوق الكرسي : يمه تكفين الحقي علي مها وريم ميتات ضحك على شكل دانه
دانه بعد ماستوعبت انه مقلب: لا بارك الله فيكن قولن امين فشلتني عند الضيفة ماعليش اختي تراني بنت عاقله و راكده ماعليك من طفاقتي قبل شووي
ساره وهي تبتسم : ولا يهمك الكتاب واضح من عنوانه
دانه وهي تقلب عيونها : وش تقصدين
ساره بضحكه : قصدي الادب والذرابه واضحه
مها وريم بضحك : أي لان نيتها شينه دانوه شكت انك تسبينها
دانه بفشله واضحه على وجهها : لا والله بس قلت يمكن البنت فهمتني غلط ودرت اني مخفه بنت خالة مخفات
ضحكو الحريم على سوالف البنات الي ماتخلص صرخت ريم : بنات
مها : سمي يابعد من قعد ومن مشى على الأرض
دانه وهي تشرب قهوه : والله من الهلاس يا مها
ساره منبسطه على حركات البنات وضحكهم
ريم : وش رايكم نطلع للبر الخميس الجاي قولوا تم والطلعه على حساب اخوي سعود
ام محمد وهي تضحك : كريم من مال غيره
ريم : تكفين ياخالتي قولي للعيال انتي مراح يرفضون طلبك ولا انا حسرة علي لو يدري عبدالله اني راعي العزيمة علقني في المروحة وشغلها على واحد عشان اتوب
مها: خالتي الجوهره تكفين نبي تسووين لنا جريش من ايديك الحلووه اذا طلعنا للبر " الجوهره معروفه بزين طبخها خاصه في الكلات الشعبيه "
ام سعود : ابشري يا مها من عيوني
ام خالد : وانتو الحين قررتو قبل ماتستشيرون العيال
ريم : ان شاءلله اذا امي منيره قالت لهم يرضون
ساره سرحانه في عالمها وكيف الناس ملتمه وحول بعض بحب تحس نفسها غريبة من بينهم انتبهت لها ريم نطت وجت جنبها
ريم ببتسامة ترد الروح : الحلو سرحان في ايه ممكن ادخل جوات عقلك شوي وشوف شنو تفكرين فيه
ساره ودمعه حايره في عينها : تسلمين يا ريم بس مع ضحكت ألي حولي مقدر أنسى أني تايهه ولا ادري وين أهلي
ريم والدموع في عيونها : ساره اعتبريني أختك و اعتبري أمي أمك وأخواني أخوانك
مها ودانه يتسابقن من يقعد جنبهم قبل : مها هاه اعترفوا وش تقولون بدت الأسرار من دونا
دانه انتبهت لدموع ريم وقرصت مها عشان تسكت
مها تحاول تلطف الجو : هاه بنات وش رأيكم اذا رحنا للبر ناخذ معنا طراطيع
ريم ودانه : أي والله فكره
سعود يضحك بقوه ويكح على شكل تركي
تركي وهو يمسح ثوبه : اضحك اضحك خسك الله
سعود وهو يقعد على الأرض من الضحك : تركي تكفى روح اغسل وجهك
تركي راح للبقاله يشتري مويه يغسل وجهه ويجي مسرع ويكب الموية على سعود وهو يشوف رسايل في جواله
سعود وهو متخيس بالماء : حسبي الله على شيطانك والله إن تشتري لي جوال إذا خرب جوالي
تركي وهو يلعب بدبة المويه بيده : عشان تتوب مره ثانيه ما تضحك علي ذوق ما ذقت
سعود وهو يرجع يضحك على شكل تركي :خ
تركي : أنت ما تتوب
سعود : ياخي شكلك يضحك وش ذنبي انك فتحت علبة البيبسي وهي توها طايحه من يدك خ
تركي وهو يشيل تلفونه له ساعة يدق : هلا وغلا بذا الصوت يا علني ماخلا منه قولي أمين
ام تركي :هلا وغلا يمه خالتكم شرهانه عليكم تقول جاو جنب الباب ولا نزلوا يسلمون
تركي وهو يحط الجوال على السبيكر : حقها على راسي من فوق يمه وان شاءلله جاين الحين نسلم ونجلس عندكم شوي انا وسعود
ام تركي : حياكم الله ننتظركم
ام تركي : دانه قومي سخني القهوة والشاهي وحطيها بدلال بدال الترامس الحين تركي وسعود جاين
ام محمد : يام تركي الله يهداك كان خليتي J العيال على كيفهم يمكن مشغولين مهوب لازم بدني اسلم عليهم
ب دني = بعدين
ام تركي : لا والله ياختي حق واجب ولازم يجونك ويسلمون عليك ويعتذرون منتس انتي بحسبت أمهم
سعود: كله سببك يا تركي قلت تبيني بسرعه وما نزلت اسلم على امي منيره جيتك على طول الحين يمكن شالت في خاطرها علي
تركي : ياخي انت على الأقل عندك عذر تعذر به انا وش اقول اقول اني ابي تركي يجيني وبسرعة عشان نتمشى ونسولف امحق عذر عذر مثل وجهك يا سعود
سعود وهو يفتح عيونه على الأخر : وش دخل وجهي لونه مثل وجهي كان كله ملح وقبله
تركي وهو يضحك : اول مره اشووف انسان يمدح نفسه
سعود وهو يقلب عيونه : هذا حقيقه مايعتبر مدح بسررعه ياشيخ امش نروح نسلم ومنها نتعشى نضرب عصفورين بحجر واحد خ
تركي : ماتعلمني على كثر اكلك ما تسمن ياخي انت وش تسووي
سعود ويفتح جيب ثوبه : تف تف علي من عيونك الحاره انت ولد خاله نعنبو دارك انت عدو ماغير تراقب شكلي واكلي وجسمي
تركي : سعيدان امش لا توطى فيك قدام خلق الله سعود ويسحب تركي لعنده ويحب خشمه : ربي باليني ياخوك في حبك
تركي : سعود جعلك ما تعرس
سعود يفتح عيونه بقوه
تركي يضحك : شوي شوي لا تفقع عيونك عشان ماتحب ام العيال وتتركني وانا وش اسوي من لي يحس فيني بمجرد مايشوف عيوني
سعود يركب السياره ويطلع راسه من الجامه : تركي بدرري على الكلام هذا مراح احد يحل مكانك ارتح الحب خلانه لهله
.................................................. ......................................
دانه تناضر ساره : ياربي ياساره فيك نعومه غير طبيعيه ياليتني مثلك على الاقل ماينصدم خالد مني
مها : خ الله بلا اخوي وطحتي في كبده ولا كان محد قابل يتزوجك ودفاشتك ذي
دانه فتحت فمها بدى صوتها يتغير وشوي بتصيح : صدق
" دانه انسانه صريحه وماتكذب عشان كذا تصدق أي كلمه تنقال لها "
ساره : وربي انه محضوض يادانة جمال واخلاق وخفة نفس وش بعد يبي
دانه ضمت ساره امر استغربته سارة و حست بأحساس غريب كنها اخت كبيره أختها الصغيرة بحاجها لها
مها تمسك دانه من يدها : افهمي يادانه وخلي ثقتك بنفسك قويه لا تخلين أي احد يهز ثقتك بنفسك لا انا ولا اخوي خالد ولا أي احد مو كلمه قلتها تبكيك شوفي نفسك في المراية بشره ناعمه وبيضا عيون صافيه وكبار ولونها اسود ورموشها كثيفه وفم حلو وخشم مشاءلله كامله والكامل وجه الله ماغير انك قصيره شووي بتشكين بعمرك واي كلمه تنقال لك تصدقينها انتبهي على نفسك وبعدين لو ما انتي مزيونه ماخطبتك لخووي
دانه وهي تضرب مها: لا عاد تقولين لي مثل هالكلام
مها وهي توجع : توي اقول ناعمه
البنات : خ
سمعوو صوت الجرس دانه تضرب يدها براسها بقوه : نسيت اسخن القهوة بتذبحني امي
ساره : تعالي دانه خلينا نروح سوا نسخنها
دانه : يابعد عمري يا ساره يا جعل ربي يسعدك
.................................................. ................................................
سعود ببتسامته المعهوده : مساكم الله بالخير قامن خالاته في وجهه وحب روسهن
تركي وراه :مساء الخير نفسي اعرف انا تحبوني كثر سعود ولا الغلا لسعود بس
ام تركي وهي تضحك : مايكفي يمه غلاي كله
تركي : انشهدنه يكفي ويلتفت على البنات ألي تغطوا يوم دخلو العيال مسرع وراحت السنوات
وقامت ريم تتغطى عنا كيف حالك ريوم
" تركي دايم يعتبر ريم بزر "
ريم وهي يالله يطلع صوتها : الحمد لله اخبارك انت
سعود وهو يضحك : ياعل الحياء دايم الدوم ياريم
تركي : دايم اخبر ريم تستحي حتى يوم نقول لها كلمه تدس راسها ورى خالتي
ريم تكلم نفسها ياربي طلعوا فضايحي قدام مها الحين بتنقلها للأخبارية
نوره : الحين ماسكين ريم وتتكلمون عنها وناسين مها ما سلمتو عليها
تركي وسعود بنفس الوقت يلتفتون على مها ومها في خاطرها ياربي ياخالتي وش ذا الاحراج : ماعليه ياخالة اذا سلموا على ريم كنهم مسلمين علي وبعدين انا وريم عمله لوجه واحد
تركي بستغراب : وش معنى ريم ليش وين راحت دانه
مها وحست نفسها بموقف لا تحسد عليه كيف تشرح وهي يالله يالله تطلع منها الكلمة : دانة بعد بنت خالتي وم

نزلت جزئين
و انشالله بكره بكمل اذا عجبتكم القصه

محد رد ..
يمكن ما عجتكم القصه !!
بس انا بنزل اليوم جم بارت ..
انشالله احصل ردود تفاعل
الجزء الثالث
طلال جاي معصب ويصرخ : روان وجع
روان معليه صوت التلفزيون وتاكل بطاطس ليز ولا حد همها حطته على السايلنت وببرودة اعصاب : امر بغيت شي
طلال وداري ان وراها سند قوي : الحين انا مو مار عليك العصر وقايلك عطي شماغي الشغاله وخليها تكويه زين وخاصه المرزام
روان وتوها تتذكر أنها ما قالت للشغاله : اوه يابو الشباب والله اني نسيت
طلال : انا بوريك كيف ماتنسين مره ثانيه
تنط روان وترمي الريموت وتنحاش للحوش لبوها وامها كانوا جالسين هناك
روان : تكفى يايبه الفزعه
ابوها وميت ضحك : ابشري بعزك
ام طلال وهي منقهره من بنتها : اكيد انها مسويتن لها مشكله
طلال ومعه خزرانه : وقسم بالله ماخليك ياروان اخرتيني على الشباب
ابو طلال وهو يضحك : والله ما تلمس شعره من راسها
طلال وهو يجلس على المركى : يعني بتقعدين طول عمرك ورى ظهر ابوي
روان وهي ترفع حواجبها تقهر طلال
طلال : يبه طالبك قول تم
ابو طلال وهو يستقعد : تم
طلال وهو يناظر روان بتحدي : تزوج روان ماجد عشان يطلع الشيب براسها
ام طلال : لا بارك الله في شياطينك يا طلال تخطب لاختك
ابو طلال : خ من حظها اذا ماجد فكر
يخطبها
روان : قسم بالله لا قتله واقتل عمري وراه من زين خشته اوافق عليه
ابو طلال : عيب ياروان هذا ولد عمتك وش انتي شايفه عليه
روان : تصدق يبه رفض ذاك اليوم يطعس بنا
طلال و يرفع يديه للسماء: يالله يارب لك الحمد الله بلانا
بأخت كنها رجال يالله يبه استاذنك بروح لخوياي
ابو طلال الله معك يابوك ولا تاخرون لاخر الليل تعالوا امسوا بدري
طلال : ان شاءلله يبه" طلال على جماله وغروره الا انه بار في ابوه وامه "
ابو طلال وهو يستانس على سوالف روان : كملي وش سويتي طيب
روان وهي تفز وتجلس جنب ابوها وتتمركى جنبه : اسمع ياطويل العمر قمت خذيت مفتاح السياره ورميته في حوض المويه حق الابل عشان يتوب مره ثانيه يطردني
ابو طلال ميت ضحك على سوالف بنته : وش سوى ماجد
روان وهي تتذكر السالفه وشوي بتصيح : ركب البنات كلهم على فكسار ابو محمد وراحوا يطعسون يوم جيت وقلت لطلال عشان يقهره ويوديني قال اقلبي وجهك من قالك توقفين في وجه ماجد شفت يبه اعيالك
ابو طلال وهو يبتسم : وش في عيالي
روان وشوي بتبكي: واحد مغرور ويقهر وراعي أموار شيلي حطي واحد لا تطلعين من البيت الا بقفازات بشراب تغطي زين لا تسمعين اغاني وش تبين في التلفزيون مليت ليت لي اخت قالتها وهي تدمع عيونها
ابو طلال : يابنتي البنت تحترم اخوانها الي اكبر م
نها وفهد اذا امرك بالستر فلأنه يحبك يابنتي البنت المحتشمه المتستره محد يمسها لا بكلمه ولا غيره والكل يحترمها ويقدرها اما الي تبين زينها حتى لونهم ينعجبون بها الا انهم ما يتمنون خواتهم مثلها
روان وبملل : يبه انا ابي اروح لبنات عماتي مليت من الجلسه بروحي
ابو طلال : خلاص تجهزي وانا بنفسي اوديك
روان : تحب خشم ابوها جعلني ما اذوق حزنك يبه
ابو طلال يبتسم لبنته الي مهما كبرت تبقى في عينه بنته الصغيره وكل اوامرها مجابه
" روان قاصه شعرها فراولى يجي لتحت اكتافها بشوي اعيونها فيها بريق مميزها خاصه ان لونها اخضر شي استغربوه العائله لان مافيهم احد لون عيونه بنفس لون عيون روان خشمها صغير لها غمازتين تجنن تظهر اذا عصبت و ضحكت الكل يموت فيها ابتسامتها جذابه بشكل "
البست روان بسرعه دايم تحب تلبس لبس هادي وما تحط مكياج ابد بس تموت في شي اسمه قصات شعر تلاقينها كل يوم قصه جديدة
روان تكلم ريم : الو ريموه اخبارك يالدبه ريم وهي تضحك وتحط الجوال على السبيكر بينها وبين
مها :هلا وغلا بروان ام غمازات
روان : خ وينك فيه انا زهقانه وبجيكم
مها بصوت عالي : تعالي عندنا ضيفه بنعرفك عليها
روان : جايتكم على طول يلا باي و سكرت التلفون بدون ماتسمع كلمة بااي وطيحت وجه مها وريم ميته ضحك عليها
مها : اقول اقلبي وجهك خلينا نكلم امي منيره تخلي ساره تجينا
" ريم دقت على جوال ام محمد وقالت لها ام محمد ترسل لهم ماجد يجيبهم لانهم طبعا مانعين السواقين "
ريم : مها قولي لخوك ماجد يجيب امي منيره وساره
مها : اوكي ثواني بس ماجد كان يتفرج على المبارة ومتحمس : شووت الله ياخذك وياخذ من جابك لنادينا
مها وهي تتقدم شوي شوي وخايفه تكلمه وتقطع عليه : احم ماجد
ماجد وماهو يمها يشووف هجمة لصالح فريقه ويسدد هدف: هدف ايوى
ويوقف ويقعد يرقص ويجي يم مها ويبوسها ويمط شعرها
مها : عمى يعميك شعري حسبي الله عليك قاعده احط عليه من الخلطات ابيه يطوول وانت قطعته
ماجد وهو ميت ضحك على شكل مها و شعرها انتفش : وش تبين لا تقولين جب لنا شاورما لو تحبين كوعك ما جبت لكم
مها وهي تزم فمها وترفع حواجبها : مالت عليك مابي شي منك الله يخلي لي خالد قوم امي منيره تبيك تجيها تجيبها لنا
ماجد : امي منيره تبشر بس بعد الشوط الاول
مها : اهم شي اني قلت لك
ماجد ولا رد عليها مندمج مع المباراة
وروان تدخل وهي تشل وتغني : كان الصدق ياعرب عند العرب واجب طالب عليكم طلب لازم تلبونه
ماجد انتبه لصوت روان فز واقف وجا بسرعه يمها : انتي بتقطعين رزقه اذا انتي بتغنين له ماعاد راح يلقى له جمهور الكل بيترك اغانيه
روان وهي منصدمه ومنفشله بنفس الوقت ناظرته من فوق لتحت واشرت بيدها : روح روح عني
ماجد وتعمد يقهرها وقف قدامها بحيث انها ماتقدر تروح للبنات
روان تصك على اسنانها من القهر وتتلفت يمين وشمال كنها تبي تدور شي تضربه به
ماجد وهو مستانس ويضحك فريقه وفايز وقاهر روان اجتمعت
دخلت روان يدها لشنطه وطلعت عطرها بسرعه وبختها على عيون ماجد
ماجد : اي لا بارك الله فيك وراح بسرعه للمغاسل يغسل عيونه
وروان على الدرج تبي تشوف وش صار عليه انتابها خوف من الي سوته ومتاكده ان ماجد مراح يعديها لها
ماجد رجع يبي ياخذ مفتاح السياره وعيونه صارت حمر شافها على الدرج : روان قسم بالله لا طلعها من عيونك اصبري علي وربي لاخذك واطفرك انا مقدر امسكك الحين انتي مو محرم لي لكن قسم بالله محد يتزوجك غيري
روان وهي معصبه وتحط يدينها على خصرها : دا بعدك اذا لمست النجوم ذيك الساعه تزوجتني ياباشا
ماجد وهو يضحك ويحرك حواجبه درى بنقطة ضعفها : نشووف ياروانوه نشووف وطلع وهو يضحك
روان تكلم نفسها : والله ما اتزوجه لو كان اخر رجال بالعالم خير وش شايفني ماعندي ابو
مها : بو
روان : وتجلس على الارض من الخرعه وبنفس الوقت من الزعل من كلام ماجد وتبكي
مها تضمها : بسم الله عليك اسفه مادريت انك بتخافين ليش تبكين وش فيك قومي قومي غسلي وجهك
روان وهي على نفس جلستها : مها صدق ماجد يبي يتزوجني ويطفر بي
مها : ههه
روان وتناظر مها ببلاهة : وش فيك
مها : قومي مالت عليك وعلى ماجد توكم بزران تكلمون بالعرس انا اكبر منك بسنتين مدري ثلاث ما فكرت
روان وهي تبرر لمها : اسمعي ياخبله اهو من شووي " وقعدت روان تقص لمها كل الي استوى لها من شوي مع ماجد "
مها : يابنت الناس هذا بعلم الغيب وهذا شي بدرري لا تفكرين وتقهرين نفسك اهو يبي يطفرك امشي بس ريم تحترينا
.................................................. .............................................
وصل ماجد لبيت خالته ام محمد و ضرب هرن عليهم
عشان يطلعون عليه
ام محمد بمشيتها الهادية تفتح باب السيارة : السلام عليكم
ماجد يحب خشم خالته: وعليكم السلام هلا خالتي وش حالك بشريني عنك
ام محمد : بخير يمال الخير
" ساره بهدوء ركبت ورى ولا أحد حس فيها " بس ماجد انتبه لها من المرايه الأمامية
قرب ماجد من خالته وهمس لها خاله خلي ضيفتك تعطي روان من أدبها شوي
ام محمد وماقدرت تمسك ضحكتها : ههه ياولدي روان بزر ترد عقلك لها
ماجد وهو يبتسم : لونك ياخالتي شايفه وش سوت فيني قبل شوي ماقلتي بزر
ام محمد وتناظر لماجد بمعنى كمل وش سوت فيك
ماجد : تصدقين ياخالتي انها رشت علي عطر في عيوني
ساره ماقدرت تمسك نفسها فطلعت ضحكتها طالعها ماجد من المرايه وابتسم
ساره تفشلت وتمنت الارض تنشق وتبلعها
ماجد يبي يبعد عن ساره الأحراج : خالتي ماقلتي وش اسم بنتك
" كلمة بنتك هزت ام محمد وحست فعلا كن ساره بنتها الي ما جابتها " : اسمها ساره يمه
ماجد : العذر والسموحه ياساره واعتبريني اخوك الصغير متى ماتبين أي خدمه اطلبي من امي منيره وابشري بالي يسرك
ساره وهي تحاول يطلع صوتها : تسلم ما تقصر
.............................................. ....
.................................................
" البنات مسوين مفاجأة لساره عشان يبعدون منها الإحراج وتكون وحدة منهم ولا تستحي "
ريم : بنات خلونا نفكر في فكره نخلي ساره ما عاد تنحرج منا
روان وهي تقضم اضافرها : انا عندي فكره تهبل
مها وريم بنفس الوقت : وش هي
" وقالت روان لمها وريم فكرتها "
اتفقوا البنات يجلسون بالحديقة وسو لهم جلسه أرضيه افرشوا فرشة في الأرض وجابت مها القهوة والشاهي والحلا إلي مسويته وكان الجو فيه نسمة هواء مع ريحة الثيل و رطوبته عطت جو خيال وخاصة جمعت بنات ما تخلا من الفر فشه والضحك
أقبلت عليهم ساره مشاءلله شكلها كان روعه بسمتها جذآآآبه وبهدوءها المعتاد : السلام عليكم ورحمة الله وبركاته
البنات كلهن :وعليكم السلام
ريم وهي تسلم على ساره: هلا وغلا بسوير
مها : بيتنا اليوم زاد نوره وش اخبارك ساره
ساره : الحمد لله بخير وش اخباركم أنتو
البنات : الحمد لله بشوفتك منيحيين
" أقبلت عليهم عجوز تمشي ومعها عصى وتتكي عليها البنات خافوا "
ريم : من ذي يا مها
مها وهي توقف وتركض : هذي عجوز مخرفة تلحق البزران
البنات صاروا يركضون والعجووز شوي تركض وراهم
ريم وهي تبكي : يمه الحقي علينا
مها : ساره انتي لابسه وردي ترى اهي تموت في ذا اللون
ساره : تكفين يامها وربي مقدر اركض زيادة بموت والعجوز الى الآن تركض
ساره وتعبت وما قدرت تكمل: أمحق عجووز ما أسرعها شوي والعجووز تجي ساره وخلاص ساره جلست وقعدت تشووفها وتصرخ بأعلى صوتها
وتطيح العجووز على الأرض من الضحك وتشيل الغطا عن وجها وطلعت روان
وجلسووا البنات يضحكون على شكل ساره
ريم : سوير وش رايك في المقلب
روان وتمد يدها وتسلم على ساره : معك روان بنت سعيد
ساره وهي تناظرها بقهر وبضحكه شوي : حرام عليك طيحتي قلبي وانتي يا ريموه متفقة مع مها صح
مها : والله انا عبد مأمور تقولي ريم سوي كذا اسويه حتى لو تقول طبي في النار طبيت خ
ريم : وش نسووي ياساره دايم نحس انك تستحين منا وودنا انك تكونين معنا عادي وتصرين مثلنا مثل الأخت
ساره وهي تحس بغصه : والله اني اعتبركم مثل خواتي
ريم وهي تبي تغير الجو : ترى سعود يقول ابشرو ريم بس قالت تبون بر لكم الي تبون
روان وهي توقف : ياسلام متفقين ترحون للبر ولا قلتولي
مها : ياخبله هذا بس تخطيطاتنا يالبنات وانتي اخبر بالعيال نخطط ودايم تطيح وجيهنا ولا يقبلون
ريم : لا يابعد عمري المره هذي وافق سعود وبيودينا ان شاءلله
روان : طيب وش رايكم خلونا نروح للإبل ابوي ونجلس ليوم الجمعة
مها : يووه ابل خالي بعيده يمكن يرفضوون
ريم : ما عليك بقول لسعود و أكيد مراح يرفض
ساره وتشوفهم و حبت تدخل وتكون وحدة منهم : اذا قررتوا وكتب الله أن شاءلله ورحنا راح أسوي انا الحلا كله البنات كلهم : تسلمين ياسوري هذا الي نبيه
..............................................
وصلت ساره للبيت
وراحت للمطبخ تشرب ماء في الوقت الي جا سعود لام محمد
ام حمد : هلا وغلا يمه سعود هاه يمه سويت الي قلت لك
سعود : والله يمه منيره مدري وش ألي حادك تهتمين بها سلمي أمرها للحكومة ما ندري وش اصلها وفصلها ويمكن وراها مشكله
ساره وتحس الدنيا تدور فيها ضاق نفسها بكت بكت عمرها بكت نفسها التايه يارب ياعالم بحالي روف بي من انا يمه يبه وينكم تكفون ارحموني تعالوا اخذوني الناس ماترحم ابيكم مهما كان طيبت الي حولي مالي غنى عنكم ليش تركتوني معقوله اهلي ميتين معقوله مالي ابد احد وهي تمسح دموعها
ليش ياسعود وش ذنبي حسبي الله عليك اكرهك من كل قلبي الله لا يسامحك معقوله فيه ناس ماترحم انا لازم اشوف لي حل المفروض ما اصير عاله على ام محمد
..
...............................
وصف لمكان الإبل لخالهم أبو طلال " عباره عن الوايت طبعا هذا للماء للشرب الإبل منه و الاغتسال وما إلى ذلك و مقطورة تتكون من مجلس كبير وغرفه ثانيه لنوم ومطبخ ودورة مياه الله يكرمكم وخيمه كبيره مجلس ثاني لرجاجيل وخيمه ثانيه للحريم وخيمة العمال وخيمه صغيره فيها المطبخ "
وكان جنب مكان خالهم عروق وهي عبارة عن جبال من تراب << أخس يا التوضيح
" هذا عاد للتطعيس والبنات يقعدون على رأسها بتشوفونها مع باقي الأحداث "
ترقبوا رحلتهم وما يحدث فيها
نهاية الجزء الثالث

الجزء الرابع
كلم سعود خاله سعيد وقاله أنهم راح يروحون لإبله ورحب فيهم خالهم
اتفقوا يمشون الساعة سبع الصباح يوم الأربعاء لان مدت المكان ست ساعات
كل العوائل بسياراتهم ماعدا خالتهم منيره كان إلي يسوق فيهم ماجد
اتفقوا الشباب يجون بيت خالتهم منيره ويمشون من عندها
وصل ماجد وأخذ سيارة عبدالعزيز الفكسار لانها أنسب للبر والتطعيس وركبت ساره وام محمد
وصل تقريبا الكل ماعدا سعود وكان جو عائلي حلو الكل يضحك ويعلق على أشكالهم أغلبهم ما بعد شبع نوم وكانوا البنات هادين بسبب تأثير السهر
أخيرا وصل سعود وابتسامته الي تجذب الواحد نزل : صبااح الخير
الكل الي زعلان على تأخيره والي فرح يوم شافه لكن كان هناك عيون نظرتها له غير كانت نظرات ساره قهر وحقد له من أول ما طاحت عيونها في عيونه وهي تقظم اظافرها.. ليش الكل مخدوع فيك ليش الكل يحبك مو عارفين وش ورى ذا الستار انسان حقير واناني ما يهتم الا في نفسه
سعود من جهته استنكر نظراتها حس بشي غير طبيعي فيها
تركي وهو معصب وفيه نوم : يالله عاد خلونا نتوكل على الله
سعود : اصبر بشوف الكل افطر
رد طلال : يابن الحلال ماله لزوم نمر أي بوفيه ونشتري سندوتش وناكلها على الطريق
مشو مشوارهم للبر وكل سياره وربشتها
نبدا بسيارة ماجد ام محمد تسولف عليهم عن أيام أول.. عن أبل ابوها وكيف طلعاتهم لها وماجد وساره يستمعون لها ويعلقون على كلامها وساره حست ماجد مثل أخوها وارتاحت بالكلام معه لكن تفكيرها يجبرها تفكر في سعود
سيارة سعود كلها ضحك وتعليق على شكل ريم الي نايمه ومالها خلق للسوالف
سيارة تركي العكس صحيح هو الي ماله خلق يسولف ويبي مخده وينوم على طول وامه خايفه وكل شووي تسولف عليه خايفه انه ينام ودانه هات ياتعليق عليه وهو شوي ويكفخها
سيارة خالد يعم فيها الهدوء مها نايمه وام خالد تسبح وتختصر كلامها بكلمه او كلمتين وخالد سارح بأفكاره ويحب يسوق وهو ساكت هاذي عاده متعود عليها عكس خطيبته الي ما تسكت من تروح رحلة وهي تهذر لحد ما يوقفون
سيارة طلال معه ابوه وامه واخته روان واكيد سياره فيها شيبان بتلقون سوالف في قصص الأولين وكيف يختلفون عن عيال الوقت هذا
سيارة عبدالله ومعه فهد سوالف وضحك خاصه ان فهد انسان مرح وملتزم وسوالفه كلها تشرح الصدر كلها تذكير وتأثير بالي حولهم والي يصير وكيف حال شباب ذا الوقت ومن ذا السوالف
وصلوا في تمام الساعة 12 ظهراً
سعود ينادي امة : يمه يمدي نذبح الذبيحة للغداء ولا نخليها بكره
ام سعود : لا يمه حنا جايبين معنا لحم بنسوي عليه الغداء الحين وبكره اذبح يمك ذبيحتك
سعود يحب خشم امه : جعلني ماخلا منك يمه
ام سعود وام تركي ينادون بسرعه يابنات تعالوا ساعدونا
ريم: الحين لو مارين المطعم وجايبين معنا غداء مو أبرك
ام تركي : يابنتي الله يديم النعمة وش ازين من أكلنا أذا توليناه بيدينا يجي له طعم
مها : أنشهد يا خاله خاصه أذا كنتي أنتي ألي طابخته مهوب بنتك دانه الله يعين خلودي اخوي
دانة وهي تحط يدها على خصرها : نعم نعم ياختي طبخي مافيه مثله مهوب مثلك ماتعرفين الا سلق البيض
مها وهي تستفز دانه : طيب ورينا شطارتك
دانه وهي توقف وشوي بتطيح على الأغراض من العجلة : اطلعو برى المطبخ كلكم وأنا الي بطبخ عشان تعرفين أني قدها وقدود
ساره وهي ميته ضحك : اخاف ما نتغدا اليوم
دانه وهي تفتح عيونها وتشووف ساره: حتى انتي ياساره بعد لالا لن أرضى ارجوكم اخرجو برا الخيمه دعوني اعد الغداء
ام سعود وهي تضحك : يمه دانه ترى الشباب واجد وموجبين للغداء لا تهورين يا امك
دانه : لا ياخالتي انا قدها وقدود
الكل طلع من الخيمه وجلست دانه تسوي الغداء بلحالها
مها : ههه
روان , وريم , وساره يشوفونها ومستغربين ليش تضحك
مها وهي توقف ضحك : يا أغبياء انا ماسويت كذا الا عشان نفتك من تقطيع والكرف خليت دانه تسوي الغداء بخطه جهنميه مني ونتفرغ حنا لمشاهدة الطبيعة و نتمشى
ريم وهي تمد يدها لمها : كفتس كفتس كفوا يابنت خالتي
ساره : يالظالمه الحين البنية متبهذلة بالمطبخ وانتي تبين بس تتمشين
روان : بروح اساعد دانه وادفعها معنويا وماديا ً
ضحكوا البنات على روان لأنها اصلن ماتعرف شي بالمطبخ
دانه وهي منهمكة بالغداء وتحاول تسوي غدا ما حصلش الكل يتكلم عليه
دخلت عليها روان وبدت تسولف عليها وتسليها والبنت ركبت الغدا وتقطع السلطة وتتفنن فيها
زهقت روان من الجلسة بالمطبخ واستأذنت من دانه وطلعت
خالد جا يمشي لأمه :يمه عندكم ماء بارد الماء الي عندنا حار وانتي تعرفيني ما احب اشرب الا مويه بارده
ام خالد والله ياولدي في المطبخ ثلج روح ما هناك ألا خالاتك
البنات راحن يتمشن وفعلا ام خالد شافت البنات يتمشن توقعت كلهن رايحات
دانه كانت جالسه على الأرض ورافعه كل شعرها لفوق بطريقة مطلعه شكلها خيال وجالسه تقطع ومنهمكة وما انتبهت لشخص الي كان واقف وهو الصدمه الجمته ماقدر ينطق ولا ينبها بوجوده انبهر بجمالها ونعومتها
بالصدفة رفعت دانه عيونها وشافت خالد قدامها فتحت فمها وهو حس على نفسه قال أسف وطلع بسرعة دانه تدري انه خالد عندها صور له بس هو ما عرفها
دانه تكلم نفسها : ياربي مدري شكلي زين أو لا وش بيقول عني الحين
خالد راح لأمه وكان خالاته عندها
ام خالد : هاه يمه لقيت الثلج
خالد وهو يحس بالإحراج : لقيت في المطبخ وحده من البنات وطلعت
ام تركي وهي تضحك : ما عرفت خطيبتك يمه
خالد وكان هالخبر مثل المويه الباردة ألي نكبت عليه وقال في خاطره : ها الملاك لي أنا
ام سعود : تحدوها البنات وقالوا انها ماتعرف تطبخ وطردتهم من المطبخ وقالت والله ما يسويه الا انا اليوم
خالد بدون ما يحس : بيجي أحلا غدا ذقته في حياتي
ضحكوا خالاته:أكيد من يمدح العروس
وهو أنحرج طلعت الكلمة منه بعفويه وستأذن وراح للشباب ونسى المويه والثلج وخطط أنه لأزم يكلمها في الرحلة هذي
سعود كان يراقب البنات وخايف انهن يبعدن : ماجد
ماجد وهو يقلب جواله : سم
سعود : سم الله عدوك روح جيب البنات ابعدن وهن يتمشن
ماجد وهو يتشقق من الضحك : ابشر
طلال وهو عارف حركات ماجد : عليك بهن فحط فيهن لين يعيفن التمشيه بعيد
ماجد جا مسرع للبنات
ريم : الله يعينا جا ماجد لا تفرقن خليكن ترى الحين بيجي مسرع كأنه بيصدمنا
مها : مقدر ياريم تعرفيني مطيوره بنحاش
ساره وهي ميته ضحك : لالا ماجد حليل مراح يسويها
مها : بلاتس ماتعرفينه زين اصبري وشوفي
ماجد عارف أن ساره معهم مابغى يخوفهن : السلام عليكم
ساره : شفتوا هذاني قلت لكم
ردو البنات وعليكم السلام
مها : غريبه مهيب من عادتك
ماجد وهو يدور بعيونه على روان : وش الي غريبه
ريم : قصد مها غريبه انك ماروعتنا اليوم
ماجد وهو تكدر ما شاف روان : أركبن بسرعه بيحطون الغدا وبيفوتنا
ركبوا البنات معه بس بالصدفه شافوا روان جايه يمهم تمشي
ماجد لمحها وابتسم : تمسكوا يابنات زين
مها وريم : الله يستر
ساره : ميته ضحك على أشكالهن
روان انتبهت للسيارة الي جتها مسرعه : هذا ماجدوه الله ياخذه الحين اكيد بيجيني مسرع يبي يخوفني مراح اتحرك اوريه
وفعلا جا ماجد مسرع والبنات يصارخن وهو يفحط فيهن
مها : عمى يعميك اني اعرفك زين وشوله ركبت معك
ريم وهي تصيح : يمه الحقي علي
وماجد مستمتع وميت ضحك
ساره الخوف مسيطر عليها بس اشكال البنات تجبرها على الضحك
وصل لروان وهي مثل الجبل ماهمها
مها وهي تصارخ : روان ابعدي بيذبحك اخوي ترى مو صاحي
روان وكانها ماتسمع وهو يدور حولها بعدين وقف
ماجد وهو يرفع نظاراته الشمسية ويطالعها : اركبي
روان بتصرف طفولي : مابي
رجعت روان للمخيم تمشي وماجد يمشي بشويش معها اذا وقفت وقف واذا مشت مشى
انحرجت روان والبنات ميتات ضحك على شكلها
ماجد : قلت لك اركبي
فتحت روان الباب ودفت ريم وجلست والصدفه انها ورى ماجد من الضيقه ما نتبهت
و ريم : شوي شوي ترا انا مو ماجد
روان وتصك على اسنانها ولا ردت
عدل ماجد المرايه الاماميه وهي رفعت عيونها للمرايه وشافته وابتسم لها
حست روان بشعور غريب من ابتسامته اول مره تحس بها الإحساس قلبها يدق بسرعه ونفسها يضيق
ماجد كان ناوي يرجع للمخيم بس بما أن روان ركبت معهم قرر يتمشى فيهم
وحط قصيدة لحمد السعيد وطول عليها
" أحب الغرور وخص لجا على المملوح
يجيله طعم ثاني وانا الي مجربها
أنا لي حبيب من غروره شبعت جروح
وعشقت الجروح الي غرورها سبايبها
احبه ولع ويحقله الدلع مسموح "
رفعت عيونها حست كأنها المقصودة بالقصيدة وتلاقت نظارتها معه وغمز لها
وهي صدت على الدريشه وهو ضحك بصوت عالي
مها : بسم الله عليك وش فيك
ساره الوحيدة الي منتبه لماجد وروان
ماجد : ولا شي تذكرت موقف
ريم : تكفى ماجد وشو الموقف
روان وهي صاده للدريشه تتفرج
ماجد وهو يراقب روان مع المرايه : مره كنت بالسوق مع واحد من خوياي يحب يغازل بشكل فضيع المهم تجي ذيك البنت مشيتها وشكلها يعق الطير من السما وصديقي الله باليه بالمغازل وهو الزين في جهة وهو في جهة قال لها ياهووه اروح وطي التفت عليه قالت الظاهر مافي بيتكم مرايات الي مثل وجهك ما يغازل فمت ضحك عليه
ضحكوا كلهم حتى روان
ورجعوا عشان يتغدون من غدا دانه
وبسرعة راحوا البنات يساعدون دانه في تقديم الغدا وفعلا أثبتت دانه أنها طباخه ماهره بشهادة الحريم والشباب كلهم وأولهم خالد
كان الجو العصر روعه بمعنى الكلمة حايط بمخيمهم رمال بكل جهة والعشب بمختلف أنواعه متفرق في الأرض صاير اندماج رهيب بين لون الرمال واللون الأخضر والبنفسج والأصفر و الأبيض أزهار بريه صغيره "خزامى –نوير "
و أنواع من الطيور البرية تحلق في السماء وتعلن عن حريتها المطلقة في الفضا
الحريم فارشين فرشه على الرمل وحاطين القهوه والشاهي والتمر و الأقط
تعجبت ساره منه وعجبها طعمه سئلت سؤال عام للكل كيف يسونه
ام تركي : أسئلي ام طلال عنه يا ساره
ام طلال وهي ترشف من القهوة العربية: يبيله شرح طوويل البنات كلهم تحمسوا وكلهم أنظارهم على ام طلال بمعنى كملي
ام طلال : اذا بقولكم كيف طريقة المضير او الاقط لازم اقولكم كيف نروب اللبن عشان نطبخه ويصير اقط
ساره : قولي يا أم طلال معك
ام طلال ببتسامة :طيب على شرط
روان وهي متحمسه : وشو الشرط
ام طلال : بكره تخضون اللبن وتسوونه
دانه بدهشه : كيف
ام طلال بهدوء : هذا انتو تعلمون كيف تسون كبشتوني وهو من صنع الغرب وما هتميتو كيف تسوون الاقط او اللبن
روان :خ اسمه يمه كابتشينو
ريم : روان وجع خلي خالتي ام طلال تكمل
ام طلال وبدت تشرح طريقة اللبن : في البداية اذا حلبتوا حليب الغنم جيبو المصفاة وصفو البن يعني اشخلوه عشان يروح الي في الحليب من شعر ومن أي شي عالق فيه وبعدين حطوه في قدر وفي مكان لا بارد ولا حار اذا شفتوا الحيب بدى يصير كنه مقطع جيبوا الخضاضه وحطوه فيها لين يطلع الزبده ويصفى اللبن بعدين اخذو الزبده منه اذا تبون تحططون اللبن في الثلاجه يبرد او اذا كنتو تبون تسونه اقط له طريقه بعد
البنات وهم متحمسين مع ام طلال : أي اكيد نبي نعرف طريقة الاقط
ام طلال وهي تاخذ لها تمره وتكمل باقي فنجالها : ان شاءلله يا بناتي
اول شي تجيبون قدر وتحطون فيه اللبن وتخلونه على النار وتقصرون عليها يعني تجي النار وسط لا قصيره ولا طويله ويحترق بسرعه وبعدين ينزل الحليب لاسفل القدر ويجي الماء اعلى القدر جيبو ملعقه وشيلو الماء الي في اعلى القدر لين مايبقى ولا قطرة ماء وحركوه كل شوي لحد ما يصير كثيف وشيلوه من على النار عاد كيفكم تبون تسونه اصابع او مبثوث الي تبون
ام تركي وهي متحمسه مع البنات وتضحك : تدرون وش حلانا يابنات اذا سيرو علينا خوياتنا ولا جيرانا
البنات بفم واحد : وشو
يتبع الجزء الرابع

ام تركي : شفتو الاقط وهو تونا منزلينه من على النار وهو كثيف نجيب يمكن خمس ملاعق كبارو ناخذ بعد من زبدة اللبن تقريبا ثلاث ملاعق ونحطها بقدر صغير ونحركها مع بعض على النار ثم نجيب التمر ونخلطه سوا يطلع حلا نقدمه مع القهوه
دانه : لازم نسويه نجرب حلا الأولين
مها وهي تطنز على دانه : الحين من وين لنا الاقط الي توه مطلع من على النار ومن وين لنا الزبده
دانه وهي تناظرها ببلاهه : من الغنم
روان :خ غنم امي حول الرياض وش يجيبها بكره
قاموا الحريم لأن الشمس بدت تغيب وتعلن عن رحيلها
ام محمد : يلا يا بنات الحين الأبل تبي تجي من المرعى تشرب ماء من الوايت
ابعدن عن طريقها قبل تهبدكن
اقبلت عليهم الابل منها المغاتير والمجاهيم البعير والناقه والحوير اشكالها ترد الروح للبدوي الأصيل تتسابق تبي توصل للما الي انحرمت منه من الصباح للمسا وأشكال الحوير وهو يركض ورى امه يستدعي الضحك والتعجب
البنات جالسين على الدكه الي في المقطوره ويتفرجون على اشكال الابل وهي تشرب من الماء و كل وحده من هن تستحل لها ناقه
ريم : انا الي لونها ابيض
دانه : انا ذيك السودا الي معاها حوير صغير
مها : ههه دانه طماعة تبي الناقة وحويرها
روان وهي تحط يدها على خصرها : ياسلام ياسلام الحين كلكم استحليتوا ابلنا يلا بس هذي كلها لي
ساره ميته ضحك على روان وكأنها صدقت الموضوع
ريم : مالت عليك يالبخيله حتى في احلامنا تخربين علينا
مها وهي اول مره تصير جديه : تصدقون يا بنات ان هذي الحيوانات الي قدامنا أنها تسام بالملايين
ساره : مو معقولة وليش عاد
ريم : صدق وش تتوقعون سبب ارتفاع أسعارها
دانه : طيب منتبهين لها ولا انتبهتوا اذا قالو حصان اصيل ويسام بذاك المبلغ وقدره
مها : يا دانوه الحصان على الأقل اذا ساموه بملغ وقدره يمكن لأنه يسبق في سباقات بس الابل انا الى الآن حايرة ليش كل هالمبالغ تصرف عليها
روان : بنات شوفوا أبوي كيف يحلب الناقة
سعيد ابو طلال رجل خيوط الشيب يتخلل لحيته التي صارت تنعم باللون الأبيض ويكاد ينعدم اللون الأسود فيها ويتحلى وجه بسمارة الرجل العربي وبعقده بين حاجبيه كان مندمج بحلب الناقة وبمهاره عاليه تنم أنها ليست المره الأولى التي يحلب فيها
ابتسم يوم شاف البنات يراقبنه
روان : بنات وش رايكم نشوي اليوم في لليل العجز مايبن غير الغبوق
" حليب الإبل "
مها وهي تنط : ايوى فكره حلوه
دانه : انا مراح اسوي شي كفايه الغدا
ساره : خلاص الشغل يتوزع بينا ودانه ترتاح
ريم : انا الي بوزع الشغل روان تقطع الدجاج هي ومها ويتبلونه وانا وساره نشب علي الفحم اوكي
دانه : ام خلاص انا بسوي سلطه هذا كرم مني
روان : انتشروا كل وحده لشغلها
وبصدفه كان ماجد يمشي وسمع كلامهن .. راح للشباب وهو ناوي على البنات بنيه
ماجد : شباب تكفون طلبتكم لا تردوني خص انت ياسعود تراك بتخرب علينا
عبدالله : ابشر ماطلبت امر انت وسعود خله علي
ماجد : انا مريت بصدفه وسمعت البنات متفقات يبن يشون خلوهن يخلصن ونسوي خطه لين ناخذه تكفون
في البدايه عارض سعود وفهد لين اقنعوهم العيال يبون يستانسون
روان : يم يم الله علي شكل الدجاج وهو متبل يجنن وشلون اذا شويناه
مها : انتي كلتيه بعيونك وحنا مابعد شويناه
ساره : ريم لاتحرقين نفسك اذا ماعرفتي نادي واحد من خوانك يشعلها
ريم : ههه لا تخافين انا قدها وقدود علي قولت دانه
بعد نص ساعه تجمعوا البنات وريم قاعده تقلب الشوي والسلطه كانت جاهزه
العيال متجمعين ويناظرون البنات من بعيد وكلهم متحمسين وحمسوا معهم فهد وسعود
ماجد : ريحت الشوي واصلتني هاه كلكم فهمتو الخطه ولا أنا بس ألي متحمس
ام محمد ماجاها نوم وراحت تتوضآ وتصلي لها ركعتين: ماجد و أنا خالتك وش انت متحمس له عسي منت ناوي تروع روان حبيبي ترا انا مارضى عليها
ارتبك ماجد خاف خالته تخرب خطته
واسعفه طلال يوم قال : ياخالتي شباب ودهم يروحون بالبنات يصيدون بهن جرابيع
ام محمد : الله يهديكم ويصلحكم يارب وراحت وخلتهم
كان الجو مره روعه شكل النجوم في السما خاصه في البر يكون شكلها خيال والقمر وهدوء غير طبيعي معطي شكل حميميه وخاصه بجمعت البنات
دانه : مايحتاج نقعد داخل تعالوا شوفوا الجو فقرروا البنات انهم يجيبون فرشه عشان ي تعشون برا
دانه : ساره تعالي معي المطبخ عشان نجيب الكاتشب والمايونيز
روان : بنات وش ذا الي يتحرك من بعيد انا خايفه مره ساره : تكفين ترا انا خوافه مره لا يكون من مقالبك الله يوفقك
ريم : يمه بنات انحاشو شكله جني مها : ريم تكفون انا ماقدر امشي وترجع ريم وتمسكها وتركض ماجد وهو ميت ضحك : البنات صدقوا ان فيه جني ههه
عبدالله وهو متحمس وطلال : بسررعه شيلوا الصينيه قبل يرجعون البنات
ساره : يابنات يمكن مو جني يمكن ناقه او شي
ريم : لا شكله يرووع وربي جني يمه
روان : ياربي شوينا وش نسووي
مها وهي تفز : برووح اقووم امي او اشوف العيال
ام محمد سمعت أصواتهم وتجي تمشي لمهم : عسى ماشر اصواتكم واصلتني وانا في فراشي
ريم وشوي بتصيح : يمه منيره كنا نشوي وجا يمنا جني
ام محمد كأنها فهمت السالفه : تعالوا معي نشوف وين الجني
ساره : وين نروح مقدر تكفين عمتي لا تخلينا نروح
ام محمد وهي تدري انهم الشباب : تعلوا الجن اضعف مخلوقات الله اذا قريتوا اية الكرسي اختفوا كل وحده من البنات تقرا المعوذات و آية الكرسي راحوا البنات وام محمد لمكانهم ومالقو شويهم
مها بصرخه : الجني اخذ شوينا
ام محمد وهي تضحك : والله الي يمكن اخذ شويكم العيال اشوفهم يراقبونكن
روان بقهر : هين قسم بالله مانعديها لهم وانا بنت ابوي
ريم : الله ياخذهم ولا بقوا لنا شي بتصل على سعود
ساره سمعت طاري سعود خذت ن فسها وراحت للمقطوره عشان تنام
مها : تكفين ريم اتصلي على عبدالله
ريم وتناظر مها بنظرة تقدرون تسمونها نظرة استهزاء : حنا وين وانتي وين
مها وتفشلت وتقصر صوتها لا تسمعها روان : يا أختي أحبه و اشتقت اسمع صوته
ريم : سعود
سعود وشاف رقم ريم ويناظر الشباب: وقفوا لا تأكلون
عبدالله وكأنه درى ان ريم الي اتصلت : عزالله ما ذقنا الشوي اليوم
طلال وبقهر واضح : ياخي ترد رايك لحريم خلها تولي
فهد : أنا وشوله طعت شوركم ولا ترى مايجوز طريقتنا
تركي وهو يضحك : يابن الحلال الحين بنستسمح منهم ومهوب صاير حرام بأذن الله
سعود : هلا وغلا بأحلا ريم بالوجود
ريم : سعود ليش كذا حرام عليكم
سعود وهو يتكلم بهدوء : فديت الزعلان وشو الي حرام
ريم وهي تتنهد : طيب ليش ماقلتو لنا انكم تبون كان قسمنا لكم بس تاخذونه كله يرضيك يروح تعبنا على الفاضي
سعود وكأنه يكلم طفل صغير : ريوومه فديت عيونك الحين حنا بقينا لكم بس يوم خذناه نبي نلعب عليكم ولا انتو ماتهونون علي
ريم وهي تدلع عليه : لا ما ارضى لازم تصيد بنا جرابيع عشان ارضى
ومها فزت وبغت تطيح على النار من الحماس : يالبى والله قلبتس يا ريم أي تكفين خليهم يصيدون بنا
روان وتحس بدقات قلبها تزيد وتكلم نفسها يارب ماجد ما يروح معنا
سعود : ابشري من عيوني انتي تامرين أمر
سعود وهو يكلم عبدالله روح ودي باقي الشوي للبنات
عبدالله وهو منقهر شووي : ابشر ولا يهمك راح عبدالله للبنات
التفت تركي للسعود : كنك بتجربع بلبنات
سعود وهو يضحك : وش اسووي حكم الظالم ماجد لازم تروح معنا عشان تطرد الجرابيع لو نخليها على البنات رجعنا ماصيدنا
ضحكو العيال كلهم
تركي : والله انا بروح معكم مانيب جالس بلحالي طلال والله ودي اخاويكم بس احس بصداع فضيع وبرقد
فهد : والله انا بعد برقد ماتعودت اسهر ويا سعود استسمح لنا من البنات
سعوود :ولا يهمك يا ابو سعيد ان شاءلله ان مايزعلون منك انت بالذات
عبدالله وهو يجي شايبل الصينيه : اس اس اس السلام عليكم
مها شووي بتحفر حفره تحتها وتنخش وتقرص ريم ريم وهي توجع من قرصة مها تصرخ : اي وا وا وا عليكم السلام
عبدالله ويلتفت على البنات : شحالكم يابنات دانه اجرى وحده فيهم : بخير الله يسلمك وشحالك انت
عبدالله وهو يوزع نظره بينهم : الحين ليش مارد الا دانه وين السان الباقيات
روان وهي تحنحن : بخير عبودي شلونك انت
عبدالله وهو يناظر روان وفيه ضحكه : الحين يارواونه طولي 170 ما مليت عينك تقولين لي عبودي
ريم بصوت عالي : ههه
عبدالله وهو يفز ويمسك يدين ريم ويلفها على ورى : يلا الحين اضحكي قوى
ريم : آآآآآآآآآآي مها الفزعه
مها تكلم نفسها الله ياخذك ياريم جعلك العقرب الي تقرصك
عبدالله وهو يناظر مها ومها شوي بيغمى عليها : تعالي مهاوي وجربي وش اسوي بك
كلمة مهاوي بغت تطيرعقل مها تتكلم بشويش : ياربي بموت انا
عبدالله وهو يستفز مها : يالله خويتك تطلب الفزعه افزعي لها
مها تكلم نفسها وتبي تتنفس: انت ناوي تذبحني اليوم حرام عليك ارحمني
ريم : مالت عليتس من صديقه اني داريه ما وراتس فزعه
ويجي سعود ويمسك عبدالله من وراه ويكتفه : تعالي ريم اخذي حقك منه
ريم : فديتك وفديت التراب الي تمشي عليها
مها وهي تكلم ريم بصوت قصير : شوي شوي عليه ترى ما ارضى نسمة الهوا تجيه
ريم وهي تلتفت لمها وتكلمها بصوت واطي : مها فقدتك انتي والحب
مها : يالله يارب جعلتس تذوقينه وتعذبين بعذابه
ريم تكلم مها بشويش : بسم الله علي
ريم تعلي صوتها : انا اصلن رحووم وطبعي دلوعه ولان بعض الناس قالت لا تسوين له شي رحمته فكه ياسعود
عبدالله: اكيد روان الي قالته اعرفها تحبني مها وتحس بقهر وتفرك ارجولها بالارض وتمشي وتخليهم
ريم حست بصديقتها وراحت وراها وما بقى غير روان ودانه وسعود وعبدالله ويجيهم ماجد طاير : من الي يحبك انت ماعنده نظر
عبدالله وهو يضحك : روان
ماجد وحس بصدمه قويه التفت على روان وناظرها يبي يشوف ردة فعلها
روان : من زينك احبك حبتك القراده " ماتدري ليش قالت هل تبرير لماجد خافت يفهم غلط يمكن مع الايام يتضح كل شي "
ماجد وهو شوي ويتشقق من الوناسه : متى نروح نصيد جرابيع
سعود : اصبر شووي ريم ومها راح يجون
ماجد : لا تنسون ساره نادوها بعد ترى صارت منا
سعود التفت على ماجد : من قال انها منا بعد كم يوم اذا رجعنا بنسلمها للشرطه وهم يتكفلون بالأمر
دانه : حرام عليك سعود ليش كذا
سعود وهو يبرر موقفه : يادانه حنا ماندري وش البنت مسويه يمكن البنت خربانه
روان وتبكي : حرام عليكم ساره خوش بنيه ليش تفترضون انها يمكن تكون صايعه
ماجد وانقهر من سعود ولان روان تبكي : ساره بنت محترمه حتى لو افقدت ذاكرتها شوف اخلاقها
مانسمع صوتها ومتستره مو معقوله تكون بنت صايعه وان شاءلله مراح نسلمها للشرطه وانا بنفسي راح ابحث عن اهلها
روان وتناظر ماجد الي كبر في عينها
ساره كل يوم يزيد جرحها كلامهم كله في اذانها حطت ايدينها على فمها وطلعت راحت تمشي تبي تصرخ باعلى صوتها ماتبي احد يسمعها تبي تطلع العبره المخنوقه تبي تبكي وتبكي ولا احد يقولها وقفي آآآآآآآآآآآآآه يارب ارحمني يارب ارحمني يارب لك ابث همي يارب لك اشكو يارب ساعدني
سمعو صياح ريم ركضو الشباب يشوفون وش صاير
نهاية الجزء الرابع

الجزء الخامس
سعود وهو بيتوقف قلبه على اخته : ريم بسم الله عليك وش فيك
ريم وهي مفتشله : خنفسه احسبها عقرب
عبدالله : جعلتس العقرب قولي امين
سعود وهو يضم ريم : بسم الله عليها من الهواء الطاير
ريم وهي تدلع وتقهر عبدالله : ياربي على الغيرانين
عبدالله : اغار منتس انتي لا وبعد على حب سعود لتس لو حب امي بقول ايه بس سعود من زين خشته
سعود وهو ميت ضحك : وش ذنبي يوم رجعت علي
تركي وهو يجيهم ويصفر ويدندن : وش السالفه
ماجد : اشك انك يا تركي فاهي
البنات : خ
تركي وفتح عيونه على الأخر: افا
ماجد وينط ويحب خشم تركي : تكفى يا تركي العذر منك والسموحه
تركي ويسوي نفسه معصب : على شرط
ماجد : ابشر بس وش شرطك
تركي : بعدين اقولك
ماجد وهويضحك : اوكي
عبدالله : يالله ياسعود مشينا
سعود : الحين كلكم بترحون معنا وين البنات راح يجلسن
تركي : انا ماعلي بركب قدام
ماجد : انا بطرد الجرابيع
عبدالله : بعد انا بطرد الجرابيع
سعود : الظاهر اني رايح اصيد بالبنات مهوب العيال
تركي : خالد راقد وفهد وطلال يعني بيجي للباقين
سعود خلاص برتبكم قدام تركي ورى ماجد على الباب وراه عبدالله ثم ريم وراها مها يبقى روان ودانه والضيفه في المرتبه الاخيره
تركي : ياسلام مخلين اختي في المرتبه الاخيره
سعود : ريم محرم لعبدالله عشان كذا جنبه ومها صديقتها ماتستغني عنها
تركي : وش نسووي بنرضى غصب عنا سيارتك وتشرط علينا
سعود وهو يضحك : احمد ربك مركبك قدام لا احطك في الدبه وأجيب ريم قدام
تركي وهو يسوي نفسه منصدم : افا ياخاين العشره
ريم وهي تكلم ساره الي مغطيه نفسها : ليش ماتبين تروحين معنا
ساره وهي تحاول تكون طبيعيه : انا تعبانه ياريم وابي ارقد
ريم : تكفين ابيك تشووفين العيال كيف يطردون الجرابيع راح تموتين ضحك
ساره ولا ردت على ريم
جت ريم وشالت الغطا عن ساره لقتها نايمه راحت وتركتها
والي ماتدري عنه ريم ان ساره كانت تسوي نفسها نايمه وهي قلبها يتقطع مليون قطعه من الم الداخلي فعلا حست نفسها غريبه بينهم تحس بألم فضيع في راسها الدنيا على وسعها صارت صغيره نزلت دمعه وبدت الدمعات تتسابق بالنزول لتعلن سيل مقبل من الدموع يحكي مأساة ساره يكفي أن تعيش بدون هوية ضائعة لا تعلم على أي ميناء سوف ترسو سفينتها آهاتها خنقتها وانعدم الهواء حولها بكت أيامها المستقبلية وما تحمله لها من خوف وترقب وغلبها النعاس وغطت بالنوم والدموع قد حفرت أوديه على خدودها
ريم جت لهم : يلا بسرعه خلونا نروح
روان : وين ساره
ريم : ساره تقول تعبانه ونامت
سعود : خلوها على كيفها اذا ماتبي تجي معنا مهيب مجبوره تجي
مها وهي في عالم غير عن كل الي حولها نظراتها مانزلتها من عبدالله وعايشه في عالمها
روان وتكلم ريم ودانه : والله اني اتمنى ساره تجي معنا ابيها تشوف كيف يصيدون
دانه : أي والله ياحسافه هالبنت له غلا غير طبيعي ي كفي الواحد يكون على طبيعته معها ويرتاح بالكلام معها
ريم : وزود على كذا تجبرك على احترامها
سعود : خلصتو كلام وتقييم للضيفه يلا خلصونا ترى بنرجع بدرري ننام
وركبوا مثل ما خطط سعود
عبدالله يقهر ريم وكل شوي يميل بجسمه على ريم يضيق عليها وهي تدفه :ابعد لا بارك الله فيك ذبحتني
مها تكلم ريم بشويش : احمدي ربك فيه ناس غيرك يتمنون قربه
ريم بصوت عالي وماحست بنفسها : الجربوع
الكل اخترع من صرختها وقف سعود وبدى يقلل نور السياره عشان يعمي الجربوع ويوقف ونزل ماجد وبعدين ولع سعود النور العالي وبدى يسرع وماجد يطرد الجربوع كأنهم القط والفار خ << خوش تمثيل
الكل متحمس مع ماجد ويصرخون بصوت عالي
تركي يطلع راسه من الدريشه : يمين ايه قدام قدامك
ماجد يجي مسرع وبالعصا الي معه يحش رجليه من تحت
روان بنفعال : ايوى
الكل ضحك عليها أنفشلت وقرصت دانه
دانه بشويش : آآآآآآي عورتيني حسبي عليك
اخذ ماجد السكين وذبح الجربوع الذبح الاسلامي وحلله وراح لأخر السياره وحطه بكيسه
ماجد وهو يضحك على البنات الي ورى روان ودانه : ترى الحين بينط عليكن
روان : يمه
ماجد : ههه الحين ميت بالله كيف بينط والله انكن يالبنات مخفات
سعود : ماجد مطول بسوالف اركب قبل نروح ونخليك
عبدالله : الحين دوري اطرد بس يارب نطيح بجربوع سمين
ريم : عزالله راح الجربوع وطي
عبدالله يمسك يدها ويقرصها من الكف : آآآي فك يدي ترى بعلي صوتي ونادي عليك سعود
عبدالله : جربي عشان ازيد القرص
ريم : وبدت دموعها تنزل لمحها سعوود من المرايه
سعوود قفل النور
الكل : ليش قفلت
سعود : ليش ماشفتوا الجربوع
عبدالله فك يد ريم : ماجد وخر دوري انزل الحين
نزل عبدالله ورجع ماجد لداخل السياره ومشى عبدالله لقدام يبي يشووف وين الجربوع ومشى سعود وتركه شكله كان تحفه وهو ماسك العصا ويدور الجربوع
تركي يكلم سعود بشويش: سعود وش فيك على عبدالله
سعود : يستاهل ليه يضايق ريم خله شوي يتأدب
تركي : جعلني ما اطيح بين يديك
عبدالله وهو يصرخ بصوت عالي : هيه وش فيكم
ماجد : سعود ليش تركت عبدالله
سعود : خله يتأدب ليش يمد يده على ريم
ريم رفعت عيونها من خلال البرقع لأخوها وشافته يشوفها من المرايه اكتفت بابتسامه ظهرت ببريق في عيونها تحمل له امتنان وشكر
مها تكلم ريم : حرام عليكم ياقلبي ياعبدالله وش يسوي الحين
ريم تناظر مها وهمست لها : أبي افهم وش الي محببك في عبدالله
مها :آآه ياقلبي بعدين أقولك
تركي : سعود ارجع على عبدالله
رجعوا على المكان الي خلو عبدالله فيه لقوه جالس ومتربع الرجال والعصا بحضنه
ماجد : شوفوا شكله خ
ريم : دواه يستاهل
تركي يلتفت على ريم : الله يعينك الحين وش بيفكك منه
ريم انحرجت من تركي دايم تحس نفسها قدامه بزر سكتت ولا ردت
أنحرج تركي من سكوت ريم وحس نفسه صغير بعينها
وقف سعود عند عبدالله الي ماتحرك وضل على نفس قعدته والكل يشوفه وفيه الضحكة
سعود بضحكة : أركب
عبدالله وعارف أن سعود إنسان رحوم: انزل حب راسي عشان اركب
الكل يضحك حتى سعود ومها تفداه بقلبها
سعود : ههه الحين من له المصلحه انا ولا انت اركب قبل اروح وخليك
عبدالله : مراح أتعدى مكاني ألا إذا حبيت راسي واعتذرت مني يهون عليك تروح وتخليني لو جايني ثعل وش راح تستفيد ثعل بالبدوي + ثعلب
سعود نزل من السياره :ههه ابشر وحب راس عبدالله
وقف عبدالله ومسكه سعود وضمه ما تهون علي وما تهون علي ريم ترى يا عبدالله اكره ما اكره الرجال الي يمد يده على مره ضعيفه مالها جهده الا يدها تتقي بها من يد الرجال
استحى عبدالله وعرف انه غلط بحق اخته اليتيمة : ابشر ياسعود مراح امس شعره من راسها بعد اليوم
كل ألي بالسياره تأثروا من شكل عبدالله وسعود وهو ضامه ب ين يديه وأكثر وحده تأثرت ريم دمعت عيونها
ركب عبدالله جنب ريم وهي دنقت براسها للأرض حب راسها وأعتذر منها وهي على نفس وضعها دموعها تنزل
مها بشويش : ريم خلاص ارضي عليه مايستاهل
ريم ضحكت من كلمة مها وقالت في خاطرها الله يعينك يامها الحب معمي عيونك عن شوفت عيوب عبدالله
تركي وهو يلتفت على البنات : الحين كم جربوع باقي وتبونا نرجع
ماجد : اذا تعبوا الجميع رجعنا
عبدالله وهو يضحك : مراح يتعب إلا أنا و أنت يا ماجد ولا ذولي يتفرجن و يصارخن وين يتعبن معه
دانه وهي تتكلم بسرعه : والله حنا بعد نتعب انفسنا ونظرنا ونراقب اذا طلع جربوع
الكل مات من الضحك على تلقائية دانه وانفعاله
ا
سعود بكلمه حاسمه : الحين بنصيد جربوعين ونرجع انتو ما تبون تاكلونها صح واليوم قايمين من الفجر بكره بأذن الله نصيد بكم لحد انتو أنفسكم تقلون رجعونا
ريم بضحكه : ابشر
سعود وهو يناظرها من المرايه ويبتسم لها
ماجد : خلاص انا وعبدالله سوا ننزل الحين على الجربوع ونشوف من يصيده
عبدالله : أنت يا ماجد تتحدى وأنا أقبل التحدي
تركي : سعود يمين شوي كني شفت شي
مها : أي قدام قدام
كلهم من الحماس أي قدام
نزل ماجد ونزل وراه عبدالله كانت أشكالهم تموت ضحك وهم يطردون الجربوع المسكين لا حول له ولا قوه وهم بعصي مخصصه للصيد ويلحقونه لكنه على صغر حجمه متفوق عليهم بالسرعة
الكل متحمس معهم وهم بنفس المستوى يطردونه وقف الجربوع وماجد وعبدالله على نفس حماسهم وركضهم تعدوه وهو غير اتجاه تعب ماجد وجلس وكمل عبدالله ركض وراه
تركي وهو متحمس ويحس نفسه بيصيده : وقف وقف ياسعود بنزل
نزل تركي ورمى شماغه بالسياره ويركضى ودانه تشجعه
وميتين ضحك على شكل دانه كأن أخوها في سباق مو رايح يصيد جربوع مسكين طاح بين يديهم
دانه : أي ياتاج راسي تكفى يا تركي خلك أشجع منهم
سعود وهو يضحك : دانه لا تخليني الحين انزل وتشوفين من بيغلب اخوك
دانه : ههاي تركي مافيه قده
سعود وحب يحرجها : حتى خالد
البنات بصوت عالي :ههه
خلا دانه تتمنى الأرض تنشق وتبلعها انصبغ لونها بالاحمر وارتفعت درجة حرارتها ماتوقعت سعود العاقل يسوي كذا
رجع الجربوع لماجد وعبدالله وتركي يلحقونه واشكالهم تضحك واجتمعوا الثلاثي على الجربوع المسكين وأشكال عصيهم يوم يحذفونها عليه تخوف دولة كاملة من الجرابيع مو جربوع واحد ويموت الجربوع المسكين وتفيض روحه وهم يحسون بالنصر العظيم كأنهم قتلوا اسد ليس جربوع يفوقونه حجما
يتبع الجزء الخامس

مها : ياقلبي يالجربوع مسكين
روان بصوت ساخر : أي والله ياقلبي مو كنك الي متحمسه تبي تصيد
جو الشباب وهم تعبانين ويحسون بتعب شديد ورجولهم كلها تمشيخ من الشوك والحصى
عبدالله : خلاص تعبت مراح انزل
تركي : الله يقلعه من جربوع ما اسبقه فحمت ماقدرت اطرده
ريم : والله افضل واحد ماجد
ماجد كان ساكت استغربو الكل سكوته
التفت سعود عليه : يا أبو الشباب وين سرحان فيه
ماجد : سعود ممكن ترجعني للمخيم
تركي : عسى ماشر وش فيك يا ماجد
ماجد ما تكلم الكل احترم سكوته وما بغى يقول له شي بس نظاراتهم خوف وترقب ماجد المرح وش صاير عليه
وصلوا للمخيم نزل ماجد وسعود توه ماوقف زين
سعود بضحكه : اصبر زين لحد ما اوقف
عبدالله : ماجد فيه شي مهوب طبيعي
تركي : الله يستر خلنا نروح نشوف وش فيه
البنات نظراتهم كلها خوف خاصة مها أخته
مها : سعود الله يرضى عليك طمنى عليه تكفى
سعود : ابشرو
وصلوا الشباب للخيمة لقو ماجد رافع ثوبه ويشوف رجله و وجه يتقلب ألوان
عبدالله وهو يتقدمهم ويجي مسرع : عسى ماشر ماجد وش فيك
ماجد : قرصتني عقرب
كل الشباب وقفوا عنده والكل خايف عليه
تركي : امش بسرعه بنوديك للمستشفى
ماجد : لا يأبن الحلال مراح أموت
سمعهم خالد وفز من النوم: وش فيكم
سعود : ابد سلامتك ماجد قارصته عقرب ورافض نوديه للمستشفى
خالد : مهوب على كيفه اركب بس
ماجد وهو يحاول يخفي الألم الي يحس فيه صار يعرق وأسود وجه وبدى يحس بالارتجاف "طبيعة الرجل تختلف عن المرأة الرجل مهما كان يشعر بالألم يحاول يكابر ويبين عكس مشاعره والمرأة لا تبقى صرخة مدوية إلا أطلقتها حتى يسمع بها البعيد قبل القريب "
فهد سمع كل كلامهم لأن بطبيعة الحال أصواتهم عاليه أقبل عليهم بوقار بوجه يحمل أجمل ابتسامة وجه مشرق با الأيمان وسواد لحيته تفصل في بياض وجهه
فهد : ماجد اجلس وعطني رجلك
ماجد سوى مثل ما طلب منه فهد مسك فهد رجل ماجد وصار يقرا عليه سورة الفاتحة وينفخ عليها ويفرك محلها بيده ويقرا المعوذات وآية الكرسي و أوائل سورة البقرة وأخرها وصار ينفث ويقول أذهب البأس رب الناس اشف وأنت الشافي لا شفاء إلا شفاؤك شفاء لا يغادر سقما باسم الله أرقيك من كل شيء يؤذيك من شر كل نفس أو عين حاسد الله يشفيك باسم الله أرقيك
قلت حرارة ماجد وهدئت أنفاسه واستكنت جوارحه وشعر بالنعاس الكل يترقب ما وقع تلك الكلمات التي فاضت من فم طاهر
خالد: وش تحس فيه يا ماجد
ماجد والنوم بدأ يغلبه : الحمد لله ما احس الا بوخز شوي في مكان القرصه بس فيني نوم
عبدالله وهو يحاول يقوم ماجد لفراشه : قوم ارتاح ونام عشان ترتاح
الكل حس بالنوم من الصباح وهم قايمين وزيادة عليه صياد الجرابيع لا وبعد تعب ماجد أثر على نفسيتهم
كل واحد منهم توجه لفراشه ومن التعب نسو يطمنون البنات كلهم حطو روسهم على الفراش وغطوا بنوم عميق وبدت الأحلام تنساب في مخيلتهم ولكل واحد منهم عالمه
سعود وهو في فراشه ويبي ينام صاح بصوت عالي : يوه نسيت اطمن مها على اخوها
فهد وهو رايح يبي يتوضى ويصلي التهجد : انا بقولهم ارتح يا سعود
سعود : جزاك الله خير
مها رايحه جايه وكل شوي تقول ريم قومي كلمي سعود او عبدالله طمنينا على ماجد تكفين
ريم : اذكري الله يا مها سعود راح يطمنا لا تشيلين هم
دانه : ان شاءلله مافيه الا العافيه
روان ساكته اول مره تحس بالخوف على ماجد هم إلى الآن ما يدرون وش صاير عليه
اقبل عليهم فهد : السلام عليكم ورحمة الله وبركاته
البنات بتفاوت أصواتهم وعليكم السلام ورحمة الله
روان ما توقعت ألسانها يفلت ويقولها بس خوفها على ماجد خلاها تنطق : بشر وش أخبار ماجد
مها مع أنها تستحي وخاصة من فهد ولد خالها شخصيته تخلي الواحد يحترمه ومو أي كلمه تنقال له بس هذا أخوها ولازم تسأل عنه : فهد ماجد وش فيه
فهد بابتسامه تشرح الصدر : مافيه الا العافيه قرصت عقرب
هو قال قرصة عقرب صرخوا البنات بصوت واحد
ناظرهم فهد نظرة استنكار: بدال ما تدعون له تصارخن
مها وهي متخنقتها العبره وشوي بتبكي : طيب ليش ما وديتوه للمستشفى
فهد بصوت واطي وفيه تطمين لهم : كلام الله وسنة رسوله والرقية الشرعية ان شاءلله انها أفضل من أي طبيب مثل ما وصانا الرسول عليه الصلاة والسلام والاتكال على الله وقريت عليه و الحمد لله هو نايم وما فيه إلا العافية
مها : الله يجزاك خير و يطمن قلبك دنيا وأخره
روان بفخر: أي ياماما هذا اخووي فهودي مافيه مثله أفضل شيخ بعيني
فهد ويبتسم ويضم روان له
فهد : يا بنات بكره بدال ما تقضون أغلب وقتكم في أشياء ما تفيدكم ترى معي قصص مؤثرة للبنات ودي اقرأ عليكم شوي منها
البنات كلهم : أن شاءلله
راح فهد وتركهم
ريم وهي تحس بالتعب خلونا نروح نرقد أنا ميتة تعب
راحوا البنات ينامون تقريبا الساعة وحده بالليل كلهم يبون ينامون
روان بصوت عالي : قبل ما تنامون صلوا ركعتين
التعب والقومه من الصباح مآثره على البنات وحاسين أنفسهم دايخين بس كلمة روان ولأنها أصغر وحدة فيهم وهي ألي تأمرهم حسو انفسهم اصغر منها قاموا وامتثلوا للي قالته لهم روان وكل وحده اتجهت للقبلة وصلت ودعت بالي في خاطرها وكل وحدها و اهتمامها
روان : يارب ترجع لساره ذاكرتها ويارب تلقى اهلها وتجمع شملها يارب
دانه فراشها قريب من ساره تسمع أنين ساره ارفعت راسها دانه وصارت تراقبها تشوف ساره تغمض بعيونها وشاده عليها بقوة وتمتم بكلمات غريبة
لكن التعب غلب دانه وخلاها تنام ولا تدري وش قالت سارة او ميزت وش كلماتها إلي تمتمت فيها
صوت الآذان الآسر دغدغ مسامعهم
قاموا كلهم مبادرين لأمر ربهم واتجهوا لقبله واحده بقلوب صافيه ترجو قبول صلاتها وخوف وترقب من الله ورجاء بكرمه
ارجعوا الشباب والبنات للنوم بعكس الأمهات إلي نايمين تقريبا من صلاة العشا ما فيهم نوم راحو وجتمعوا حول الضو " النار"
حوارات بينهم لا تخلو من المناقشات السياسية والاقتصادية والشيء الأكيد الاجتماعية
عائله مثل أي عائلة في الكون لكن الاختلاف في العادات واللهجة تهتم بروابطها ومدى ألفتهم مع بعضهم البعض أخوان جمعهم والدهم في حياته ووصاهم عند وفاتهم سعيد وأخواته ام محمد وام سعود وام تركي وام خالد أخ وأربعة أخوات الكل منهم يخاف على الآخر يراعي مشاعر الآخر لذالك نراهم مع بعضهم البعض
استيقظت ساره من نومها وهي مازالت تحس بصداع فضيع يكاد أن يفجر رأسها ذهبت للوضوء لتشعر بالراحة لكن مازال الصداع فما كان منها إلى أن تتوجه إلى الأم الحنون التي قبلت بها وضمتها تحت كنفها دون الخوف من ماضيها قبلت بها بغريزة الأمومة
ساره بصوت مبحوح :السلام عليكم
الجميع : وعليكم السلام ورحمة الله وبركاته
ام محمد وهي تأشر لساره بيدها : تعالي يمه ساره جنبي
أمتثلت ساره لأمها الحنون جلست بجوارها وكادت دموعها تنزل شعرت بعطف تلك المرأة
ام تركي وهي تمد كاس حليب لساره : تفضلي يا ساره
ساره : مشكوره يا خالتي ما قصرتي
ام تركي : والله يابنتي ما سويت شي ما غير صبيت كاس
ام طلال : ساره شوفي الحافظة فيها قرصان مسح بالسمن أذا أنتي من الي يشتهون يفطرون أول ما يقومون من النوم ذوقيها ترى بتعجبك
ساره : تسلمين ياخالتي يكفيني الحليب
ام محمد ما أعجبها صوت ساره وتشوفها كل شوي تسرح لبعيد
ام محمد : تعالي يمه ساره نتمشى أنا وأنتي
صوت العصافير وقطرات الندى على الألواح الزجاجية للسيارات و العشب إلي مغطي الأرض ومسيرة الإبل وهي تغادر للمرعى لتتزود بالعشب أشياء تبعث التفكر في ملكوت الله وما انعم الله بها على الإنسان وسخرها له سخر له الحيوانات لتنقله ويأكل منها أشياء كثيرة واقلها نسمة الهواء التي يتنسمها الإنسان ولو نعد لا نحصي نعمه الله
ام محمد بسؤال لساره مباشر بدون مقدمات : ساره وش فيك ما عجبتيني شكلك مهموم
ساره تتنهد بصوت مسموع : سلامتك يمه ما فيني شي
كلمة يمه من ساره لها وقع خاص في نفس ام محمد دائما عيال أختها يقولون يمه لكن كلمة ساره حسست ام محمد ان ساره فعلا بنتها
ام محمد وهي تجلس وتحث ساره على الجلوس : الا فيك شي قوليلي لا تخبين على امك
ساره وبدئت الدموع تنزل والكلمات تضيع بين شفتيها تخرج كلمة أو تمتمة وتضيع خلف عبرات وبكي
استغربت ام محمد: من مزعلك يمه قوليلي انتي الحين بمثابة بنتي واي كلمة تجرحك تجرحني
ساره وهي تحاول تسيطر على دموعها : صدقيني يمه ماحد زعلني بالعكس انا الي احس نفسي غريبه بينكم بس أبي أهلي أبي أبوي أبي سندي أبي أحس أن لي عائلة أحس نفسي منبوذة وشهقت بعبرتها الي خانقتها من الكلام الي سمعته
ام محمد وهي تحس بألم ها لبنت : صدقيني ما بعد الضيق إلا الفرج والله إذا حب عبد ابتلاه اصبري ومالك إلا الفرج بأذن الله
احم : صباح الخير
ام محمد : صباح نور يمه سعود
كلمة سعود فجرت الألم والحزن بقلب ساره ما نطقت ولا بكلمة منزلة عيونها للأرض ومن كثر الدموع بللت برقعها
سعود بضحكه : ليش مبعدين عن الخيام ولا بينكم أسرار
ساره ما تحملت كلامه ولا صوته وقفت وعطت سعود نظرة هو أنصدم بدموعها وعيونها إلي فيها كلام عجز يفسره وقتها مشت بخطوات سريعه من بينهم وراحت
سعود يكلم ام محمد : وش فيها
ام محمد وهي تتنهد : الله يفرجها لها يمه لازم تدورون عن أهلها
سعود : طيب يا خالتي ليش ما نسلمها لملجئ وهم يتصرفون عندهم خبره اكثر منا
ام محمد بعصبيه : ساره مراح تتحرك من بيتي إلا لبيت اهلها كلمه خلها في بالك يا سعود
سعود : طيب ولا تزعلين نفسك أنا أبي أريحك وما تشيلين همها
ام محمد : طيب ما فكرت بإحساسها يمه يوم تقول تخيل نوديها وش بتقول عنا ما تحملنها تخيل لا قدر الله تضيع ريم وتطيح في يد ناس وش بيصير فيك حزتها
سعود : الله لا يقوله يمه
ام محمد : شفت ما ستحملت أكيد ان ساره ورآها قصه وان لها أهل بعد ما يستحملون عليها
سعود ولأول مره ام محمد تعصب عليه زعل وشال في خاطره استأذن وراح
يتبع الجزء الخامس

ام تركي تحاول تصحي البنات : احد يجي للبر ويرقد قوموا مافيه نوم الحين بيذبحون الذبيحه نبي همتكن
دانة وترفع الحافها وتغطي راسها : تكفين يمه والله ما رقدنا الا متأخرين
ام تركي : وليش ترقدن متأخرين يلا قوموا قبل أجيب سطل مويه وأرش عليكن
صوت ام تركي خلى البنات يقومون إلا روان إلي نومها ثقيل
مها وهي تلتفت على روان وتكلم البنات : الحين ذي ما حست بالازعاج
بنات وش رايكم نكب عليها مويه وننحاش
ريم وهي تأفف : والله انك فاضيه يا مها مالي شغل وش بيخلصني من لسان روان
دانه : ساره قايمه بروح لها
ريم : بروح معتس
مها وهي الوحيده الي جلست بالمقطوره وحبت تزعج روان خذت من جيك المويه الي عندهم وصبت في كاس مويه في البدايه رشت خفيف على روان لكن لا حياه لمن تنادي ولا كأنها رشت عليها بعدين صبت الكاس كله على رأسها وانحاشت من غير ماتدري عنها
روان وهي تشهق وتقوم مختلعه : حسبي الله ونعم الوكيل الله من الي كب علي مويه راحت تشوف برى المقطوره لكن مالقت أحد غيرت ملابسها ولحقت البنات للخيمه
دخلت عليهم بهدوء غير طبيعي الكل يراقبها يبي يشوف ردت فعلها لكن الي سوته روان أخذت جلال الصلاه والسجادة وصلت صلاة الضحى
خلصت روان من الصلاة وجت وجلست جنب البنات
ريم بادرتها بالسؤال : مشاءلله يا روان تصلين الضحى
روان : أي الحمد لله ما دريتوا بفضل صلاة الضحى
الكل منتبه معها بمعنى كملي وش فضلها
روان : وعن أبي أمامة ؛ قال : قال رسول الله صلى الله عليه وسلم : " من صلى صلاة الصبح في مسجد جماعة ، يثبت فيه حتى يصلي سبحة الضحى ، كان كأجر حاج أو معتمر ؛ تاماً حجته وعمرته". أخرجه الطبراني .
وكملت روان عن أبي هريرة ؛ قال : قال: " لا يحافظ على صلاة الضحى إلا أواب" . قال: "وهي صلاة الأوابين". أخرجه ابن خزيمة والحاكم.
وبعد عن أبي ذر ، عن النبي صلى الله عليه وسلم ؛ أنه قال :" يصبح على كل سلامى من أحدكم صدقة ؛ فكل تسبيحة صدقة ، وكل تحميدة صدقة ، وكل تهليلة صدقة ، وكل تكبيرة صدقة ، وأمر بالمعروف صدقة ، ونهي عن المنكر صدقة ، ويجزئ من ذلك ركعتان يركعهما من الضحى" . أخرجه مسلم.
ريم : كل هذا فضل صلاة الضحى اجل وش فوائد النوافل إلي بعد الصلاه المفروضه
روان : يووه اسمعي يا ريم
بقولك أحاديث كثيره اسمعي بس
قال صلى الله عليه وسلم : ( أول ما يحاسب به العبد يوم القيامة صلاته فإن كان أتمها كتبت له تامة . وإن لم يكن أتمها قال الله لملائكته انظروا هل تجدون لعبدي من تطوع فتكملون بها فريضته ). رواه أحمد وغيره.
قال صلى الله عليه وسلم : ( ما من عبد مسلم يصلي لله تعالى في كل يوم ثنتي عشرة ركعة تطوعاً غير الفريضة إلا بنى الله له بيتاً في الجنة ). رواه مسلم .
وتقول عائشة رضي الله عنها : ( لم يكن النبي صلى الله عليه وسلم على شيء من النوافل أشدُّ تعاهداً منه على ركعتي الفجر ). متفق عليه .
دانه : مشاءلله يا روان كل هذا حافظته
روان : الله يسلم اخوي فهد هذا من فضل الله ثم اهو الحياة ساعات ودقائق يغتنم الإنسان حياته ويتزود قبل وفاته
روان الي في نظر الباقين بزر كبرت في عيونهم
مها بخجل : روان اسمحيلي ترى انا الي كبيت عليك المويه
روان وهي تناظرها و طولت وهي تناظرها ثم قالت : ولا يهمك
ام سعود : افطروا ترى الفطور في الحافظة الي وراكم وهذا الحليب تعالوا اخذوه
راحو البنات وفرشو سفرتهم وحطوا الحافظه
ريم : يمه ساره افطرت
ام سعود : لا ما شربت إلا كأس حليب
دانه وهي تفز: بروح أناديها
ساره كانت قاعدة تقرا قران ما فيه غير القران إلي يشرح الصدر ويزيل الهموم والغموم
دانه : صباح الخير على الناس الحلوين
ساره بابتسامه بعد ما حست نفسها ارتاحت وطلعت شوي من إلي في قلبها لام محمد : صباح النور هلا وغلا بدانه
دانه وهي تسحب يد ساره : قومي يلا يلا تعالي افطري معنا ترى سمعنا انك ما افطرتي
ساره وهي تضحك : ابشري من عيوني بجي وبفطر بعد
خلصوا البنات فطورهم وقعدوا يتفرجون على العيال وهم يذبحون الذبيحه
وشوي وسمعو صرخة مها الكل التفت عليها
مها : يمه
ام خالد : بسم الله الرحمن الرحيم وش فيتس
مها : يمه علموك ان ماجد قرصته عقرب
ام خالد : بسم الله علي أي دريت قالي خالد ورحت وشفته لقيته راقد والحمد لله ما فيه إلا العافية
البنات ضحكوا على طيحت وجه مها
روان : خلي القافة تنفعك تبشرين أمك يوم تقولين لها
مها وهي تبرر موقفها : لا بس خفت محد قالها وهذي امه يا خبله لازم تدري
روان وهي توقف : تعالي معي يا مها اوريك ناقتي
مها : يلا مشينا
بقى في الخيمة دانه وريم وساره يسولفون سوالف عاديه ويتفرجون من بعيد على الشباب
أقبل علهم خالد وكان معه صحن شايل فيه جوف الذبيحه الكبد القلب الكلاى
خالد وهو يبتسم وداري ان دانه معهم : صباح الخير
البنات : صباح النور
خالد : وش أخباركم يا بنات
البنات : بخير الله يسلمك وش أخبارك أنت
خالد وهو يناظر دانه : بخير ولله الحمد
دانه منحرجه دقات قلبها تزيد وتحس نفسها شوي بيغمى عليها من الحياء أول مره تتقابل مع خالد من يوم ما خطبها مع أنها تحس خطوبة تقليدية إلا حياء الفتاة المسلمة والعربية مغطي عليها
خالد : دانه
دانه تحس نفسها كأنها في قاع بير وان صوت خالد جاي من أعلى البير ويا لله تسمعه
لدرجه أن خالد كرر اسمها مره ثانيه :دانه
البنات عيونهم ترقب على شكل دانه بين ضحكة و انحراج وكيف بيكون ردها
دانه بصوت مبحوح يالله ينسمع : هلا
خالد بابتسامة تجذب : هلابك أبيك الله لا يهينك تسوين لنا فطور ومد لها الصحن إلي معه
دانه وقفت وحست أنها بتطيح دوخه وزيادة عليه انحراج فضيع : ابشر
ومدت يدها تبي تأخذ الصحن المست اطراف ايديه حست بربكة وإحراج حس خالد بلمس دانه و مسك طرف أصبعها بيده هي سحبت يدها وطاح الصحن
البنات ما قدرو يمسكون نفسهم :ههه
خالد ودانه الله عالم بحالهم انحرجو من موقفهم ونزل خالد وبنفس الوقت نزلت دانه يبون يلمون إلي طاح من الصحن رفع عينه وطاحت في عيون دانه و تجمدو ضل الصحن في مكانة وهم على نفس قعدتهم ونظراتهم مصوبه لبعض وفي عالم ثاني قطع عليهم صوت
تركي : مشاءلله
فركز خالد وحس با لإنحراج : هلا تركي " ماعاد عرف يتكلم "
اما دانه لمت إلي بالأرض وراحت بسرعه برى الخيمه وألحقوها البنات
تركي وهو يتعمد يحرجه: هلابك رحت تودي لهم الكبده ولا عاد رجعت الظاهر جازت لك الجلسة
خالد يبي قهر تركي : أكيد فيها دانه وما تجوز لي على فكره ترى ودي أتملك حدد يابو الشباب الوقت الي تبون
تركي حب يقهره : بعد سنة تملك وبعد سنتين الزواج
خالد وهو يفتح عيونه : تقوله صادق
تركي وهو يضحك بصوت عالي : شوي شوي لا تطيح عيونك امزح معك أذا جا ابوي من القنص تفاهم معه
خالد : إلى على فكره عمي متى باقي عليه و يجي
تركي : يمكن بعد سبوعين تقريبا يمدي اذا جا ابوك يا خالد
خالد : أبوي رايح للهند يجيب بضاعة واحتمال بعد بكره يجي يعني يا السبت يا الأحد خلاص نخلي الملكه بعد ثلاث اسابيع وش رايك
تركي : اصبر يا رجال لا تستعجل يمكن لابوي شور ثاني يمكن يرفض مايبي ملكه قبل الزواج بفترة
خالد : فال الله ولا فالك ألا أن شاء لله بيوافق
تركي وهو يدف خالد قدامه : مشينا للمجلس
كان عبدالله وسعود عند الوايت يغسلون الذبيحه عشان يعطونها الحريم يطبخونها
في الوقت إلي مها وروان رايحين يشوفون الناقة
مها : يا حضك شكلك بتصيرين مليونيره تخيلي تبعينها بمليون
روان وهي تضحك وناوية على مها بنيه : أي ما أعطاني أياها أبوي ألا لأنها غاليه وهذا يدل على غلاي
مها وتناظر روان بنظره الي يشوفها يتوقع أن ودها تذبحها دفت روان : امشي اخلصي علي
كان فيه شبك وباب الشبك مفتوح وكان داخله أكثر من ناقة والباقي في المرعى
روان : شوفيها هذيك
مها : أي وحده
روان بصرخة : مها جتنا جتنا انحاشي
مها ما صدقت احد يقولها تنحاش طارت تركض والناقة وراها شكلكها تحفة الي ما عنده نية ضحك بيموت ضحك على شكلها
ودانه ميتة ضحك عليها : دواك خلك تعرفين مره ثانيه تكبين علي ماء
مها وهي ما زالت تركض : دانه الله ياخذك افزعيلي وخري ناقتكم المتوحشة عني
ما خذت الا الي معه عصى ويطرد الناقة وقفت مها وناظرت الا الي جالس على الأرض ميت ضحك : انتي ماتعرفين ان الناقة هذي تحب الي يركض على طول وراه
نهاية الجزء الخامس
ها بنات شكلها القصه ما عجبتكم ..
يعني ما اكملها ؟؟

لا والله احلى قصه من احلى سارونه في الدنيا بس.......
القصه مكرره