الى عروسات الاردن ساعدوني اين اجد كندره اجلكم الله لفستان عرسي بكعب عالي اقل اشي 15

اولا مبروك مقدما
انا اشتريت صندل من عمان من جبل الحسين في مجمع مكسيم مول
الطابق الأول بس مو متذكرة اسم المحل وطول الكعب 15 سم
الله يوفقك وتلاقي في كثير محلات هناك

مرحبا نانا شوشو
طبعا المفروض بعد الانتقادات اللي حطيتيلنا اياها في المنتدى ما نجاوبك
ما حاولتي تتفاعلي معنا
على كل حال كل انسان الو شخصيتو وحر فيها
طبعا انا ما بعرف انتي وين عايشة وشو بتعرفي بالاردن؟؟؟
تاني شي انتي سؤالك مو محدد بالمرة
على كل حال الكنادر بتلاقي بكل مكان ما في محلات خاصة بالعرايس بالزات بالنسبة للكنادر بدك تلفي وتدوري
في عندك الحسين في مجمعات ومحلات للاحذية
في عندك الصويفية
وفي كمان مكة مول
هادا بعمان
وفي كمان باربد محلات كتير مرتبة وحلوة
يعني انتي ما عليكي غير تنزلي على السوق والمحلات وتدوري

مرحبا نانا شوشو انا كمان راح اعمل باصلي وادلك وبضلك اخت عزيزه وبحترم انتقادك ورايك المهم انا حبيت بضاعة محل بجليريا الطابق الي تحت في محل كله كنادر عرايس بس مو حافظه اسمو في عشرين واعلى اذا بدك وقوالبه مريحه كمان انا اليوم رايحه اشتري منو وبجيبلك اسمو ان شاء الله والحسين مليانه والصويفيه ومكه مول حتى مخيم البقعه والوحدات كثير اماكن
بنسبه لتيجان والطرحات كل محلات بدلات العرايس بتلاقي فيها ومحلات الاكسسوار بتلاقي كثير شغلات كمان يعني بدك تلفي بالصويفيه ومكه مول والحسين وفي سوقين بعمان البلد اسمهم البخاريه وبلابسه فيهم شغلات بتجنن روحي ولفي الله بعينك اما باربد مابعرف بزبط واي خدمه احنا جاهزين

شكرا للاخوات الي ردو اسم باسم يعني الكل
بس انا مش فاهمه وبتوردو ومحمليني جميله اما حكايتكم غريبه واصل ومش اصل انا حره حكيتي رايي وكان نصحيه انه احكو عن العرايس وما ضل فيكم عقل
حره ولساتني عند رايي
هاد اغرب اشي مر علي بحياتي
على كلا شكرا على النصائح
على فكره عجبتني شغله كتير حلوه المخيمات الي حكيتي انه فيهم فرصه اروح اشوف شو يعني مخيم عشني اردنية الاصل وما عمري دخلت هيك اشياء انتي ما دام بتحكي عنهم اكيد بتعرفيهم كويس وعاجبينك
شكرا على النصيحه

الى الحوريه الجميله الي سالت وين نا ساكنه
ساكنه في الجبيهه بجنب الجامعه الاردنيه
ومع اني صغيره بالعمر بس بدرس وبخرج صبايا من عمر الصبايا الي بالمندى
دكتوره في جامعه خاصه تخصص نظم معلومات حاسوبيه
وانا كتير مستعجله ومشغوله عشان عند انشغلت بالسفر يعني رحت عشان اشتري شوية اغراض للعرس واشم الهوا بس ما كان عندي وقت كتير
في باب توما كان فيه اشياء حلوه كتير بالذات من محل اسمه فلورا وهاد المحل اله فرع بمكه مول الطابق التاني الاكستنشن القديم(بالذات القطنيات)
وبعد هيك عندي مؤتمر ب لاس فيغاس في امريكا
وبعد امريكا رح ارجع للسعوديه في الرياض
وللفائده هلا ارتحت لقيت اعلان بجريدة الوسيط فيه اخت اسمها رولا بتساعدني بتنظيم كل الحفله واي ترتيبت جديده حابه اعملها بالعرس
احكو معها ازا بتحبو اسم المكان: لمسات للاحتفالات
ووداعا

اوك نانا شوشو الله يوفقك يارب وتتيسر امورك ان شاء الله

انا بصراحة فكرتك برا الاردن وانو مو عارفة اماكن في الاردن بدك ندلك عليها
بس بما انك بالاردن فما في اماكن محددة بتبيع كنادر خصوصي للعروسات بس انتي محتاجة تدوري وتشوفي اللي بناسبك
معلش هو بدو تفضي شوي يعني الواحدة عرسها فرحة عمرها بيستاهل منها انو تدور
وبالتوفيق ان شاء الله

صباح الخير للي بستاهلو بس الخير
نانا شوشو
رح احكي بس كلمتين
---------------------------------------
على فكره عجبتني شغله كتير حلوه المخيمات الي حكيتي انه فيهم فرصه اروح اشوف شو يعني مخيم عشني اردنية الاصل وما عمري دخلت هيك اشياء انتي ما دام بتحكي عنهم اكيد بتعرفيهم كويس وعاجبينك
شكرا على النصيحه
----------------------------------
اعتقد و اسفة على هالمصطلح
الحمار من ردك هادا بفهم انو مش عاجبك المخيمات
حبيبتي اردنية الاصل على عيني و راسي
هينا كلنا هون فلسطينيات و اردنيات
و في حبيبة شادي و دودو كمان حسبل علمي عراقية
شفتينا جبنا سيرة العنصرية؟
شكلك يما بتحبي تصطادي بالمي العكرة
ستي احنا هون كلنا خوات
بس انه حد يقصد يحكي كلمة وحدة عن المخيمات هادا اللي ما رح اسمح فيه
المخيم و كل اهالي المخيم على راس اللي مش عاجبو
اوك
انا بكتب باسم مدينة فلسطينية بحبها
و بفخر اني فلسطينية
بس ما بعمري حكيت انا فلسطينية و انتي اردنية
ارجعي الله بكون بعونك كلهن بس 120 صفحة اقريهن منيح و تعي يما

السلام عليكم ورحمت الله وبركاته
الدال على الخير كفاعله
ياستي بس بدي اصححلك معلومه اسواق الوحدات والبقعه من الأسواق المشهوره بعمان وهيه فيها نفس بضاعة البلد والحسين وباسعار ارخص وكل الناس من كل الأماكن وكل الأصول بعرفو هاد الحكي وانا حبيت ادلك على الخير وماقصدت اي اهانه
وبرضو راح اعمل باصلي كمان مره واحكيلك روحي على tow lips بجليريا بالحسين متخصص باحذية العرايس انا اشتريت من عندو مبارح 20 سم كثير مريح واسعارو مناسبه
ويا اختي لا فرق بين عربي وعجمي الا بالتقوى وانت دكتوره ماتعاملي اي انسان بعنصريه حتى لو عاملك بعنصريه خافي الله والله هاد الكلام بتذكر انو بالابتدائي كنا نسمعو وانا استغرب انو دكتروه وهلأ لسه بتفكر في والله عيب يا اختي الله يوفقك ويسامحك انا كان قصدي كل خير وانت الله يهديكي