ام زوجي ومشاكلي معها كلكم ادخلوا لو تردون بدعوه لي

السلام عليكم
انا اليوم ودي تشاركوني همي لاني تعبت وتعبت اهلي معاي (( امي ))
قررت مااقولها شي
ماابي اضايقها لانها تتضايق عشاني
مشكلتي ام زوجي
واخت زوجي
انا ساكنه مع اهل زوجي
صدقوني انا مافيني شر وبالعكس احب ام زوجي ودائما احاول ارضيها
بس انا احب الهدووء احب اكون لوحدي يعني مااحب انزل كل يوم عندهم
انا اكمل دراستي وعندي طفل
يعني لاهيه بامور الجامعه وكذا
مره من تهاوشنا انا وزوجي بغرفتي الخاصه وانا غرفتي قريبه لغرفة ام زوجي سمعوا طقاقنا
طقت الباب علينا يوم فتح زوجي على طوول قالت طلقها
انا ماصدقت الكلام اللي سمعته مافينا شي انا وياها ابدا
زوجي انصدم من كلام امه قالت طلعها من البيت (طردتني ) وطلقها الحين
هي ماتستاهلك ولا تحترمك ولاتقدرك
واخت زوجي موجوده وتقول انتي ماتجلسين فيتنا لانك مو محترمه وسبتني
وترى انا ماقصرت وقتها رديت عليهم يعني اذا قالت انتي مو محترمه قلت لها انتي مو محترمه
لاني وقتها مصدومه وزوجي ماقال شي ابدا مصدوم
اذا كانوا ما يبوني انزل اطبخ ولا يبوني اسوى القهوه ولا يبوني اسوي العشا كيف يوضح عندهم انو انا وزوجي شارين بعض
حارميني من ابسط الاموور حتى اذا نزلنا سوا انا وزوجي جت ام زوجي تناديه يجلس جنبها علشان ما يجلس جنبي
واللي قهرني انهم يحسون اني انا اعطيهم عين (( احسدهم ))
ماياكلون عندي ولا يشربون عندي حسيت صرت اكل فوق
واذا جيت من الدوام ابغى اتغدا تقول ام زوجي والله الاكل شوي ماتوقعت انكم بتتغدون
بس انا اللي ازيد عليهم يعني ماتسوى ملعقه تكسب جر فيني جايه من الدوام هلكانه
المهم نفس هذيك الليله رحت لبيت اهلي
وبعد فتره رجعني زوجي انا ام زوجي تكلمكت معها لانها حرمه كبيره وام زوجي احس عيب مااحاكيها
اما اخته صراحه ماكلمتها ابدا حتى السلام سلام يد وبس
مره جايه هي قلت لزوجي بروح لاهلي الظهر لان اهلي عندهم مناسبه متفاهمين انا وزوجي
نزلت تحت سلمت على اخت زوجي وماكان عندهم خدامه رحت نظفت بيتهم كذا علشان ارضي ام زوجي
انا دائما اذا صار بالليل انزل انظف البيت بالمويه والصابون لان الخدامه ننتظرها تجي وتاخرت
نزلت رحمت خالتي تعبانه وسكر وكذا
المهم يوم لبست عبايتي واخذت ولدي قلت لخالتي تامريني بشي بطلع لاهلي
كانت متوضيه لصلاة الظهر
استقبلت القبله قالت قولي امين عسى الله لا يوفقك ان شاء الله ماتجيبين غير هذا وتاشر على ولدي
تدعي علي بالعقم يعني انا انهبلت
دخل زوجي بياخذ الاغراض معي شافني مصدومه قال وش فيكم كررتها مره ثانيه
وقالت له زوجتك يهوديه والا نصرانيه والا كافره
تخيلوا كل هذا علشان ايش اني مااتكلم مع بنتها
طردتني بس انا ماطلعت المره الثانيه جلست على قلوبهم
وراحت الايام وانا فوق اتغذا من مطعم واتعشى خبز وجبن او اخلي غدا وعشا وجبه وحده
المهم صرت انزل شوي شوي علشان زوجي تضايق من الموضوع اذا جيت اسلم على خالتي ماترفع يدها
بس انا بطريقتي واصراري خليتها تتكلم معي كويس والحمد لله
المهم بالاجازه اللي فاتت سافرنا انا وزوجي الامارات مارجعنا الا قبل رمضان بيومين
طبعا رمضان انا اسوي لهم الفطور
من يوم مارجعنا وهم ما يتكلمون معنا ابدا حتى تسحروا اول يوم ماقالوا لنا
بالاخير زعلوا ليه نسافر تقول ليه التبذير
( حالتنا الماديه كويسه م ه ))
المهم في رمضان تاخذ صحن بلاستيك وتجمع لي من اللي انا مسويته في الفطور كل شي على حبه
وتعطيني اياه تقول افطري فوق
ويكون البنات موجودات ليه ماافطر معاهم
سكت ماقلت شي لاني انا بعد العشا اروح لاهلي واكل على كيفي
فجاه انا عند اهلي كنت
كلمني زوجي بالجوال قال ان امي تقول لاترجعين للبيت
قالت لاترجعين للبيت ولا تدخل للمطبخ ولا تسوي شي ولا تاكل مننا شي
يقول اسالها ليه وماليه تقول بس ماابيها
عصب زوي قال خلاص نبي نطلع فبيت
طبعا قبل احنا قلنا نبي نطلع براا بس ام زوجي قالت اذا طلعت لاانت ولدي ولا اعرفك
قال زوجي باخذ بيت وبحطهم قدام الامر الواقع لانهم ماخلوني ارتاح ولاشي
استاجرنا شقه فجاه درت ام زوجي واحنا رايحين بننشتري الاغراض تونا بنبدى كلمت وقعدت تصيح
قالت اذا طلعت ماتمشي بجنازتي وانا غضبانه عليك ليوم الدين ومن هالكلام
انا هنا دارت فيني الدنيا لانو حتى لو قال زوجي غصب انا برفض اننا نطلع لان امه اولى صراحه
بس ضاق صدري اهلي كانوا دارين اني بشتري اغراض واجي عندهم فجاه وانا نازله من السياره طحت بالشارع
جا زوجي وركبني وتكلم معي بعد ماصحيت انو مستحيل يخليني وارجع وكرامتي فوق ومن هالكلام
انا عارفه ان مافيها كرامه لو ارجع بس علشان زوجي
ورجعت وكملت رمضان كله قبيتهم مدري وشلون راح
والى الان انا عندهم صح اني انزل بس يكرهوني مدري ليه
والحين سطح بيتهم قلنا نسوي زي الشقه ونسكن فيها
وبدينا والحمد لله بس طلعت لنا مشكله ثاني
احنا على حسابن يعني محد ساعدنا بشي
والمشكله اذا اشترينا شي قالت ام زوجي اشتري لنا حنا بعد
زي مثلا بنصبغ بويه قالت ياليت تصبغ المجلس
محد ساعدنا ومامعنا شي يعني احنا ماسكين شوي الين نخلص واهي تزعج زوجي
وعلى كل طالعه ونازله انت ماتنفع وانت ماتنفع تقصد زوجي
ورب البيت اقسم بالله العظيم ان زوجي هو اللي يوديها ويججيبها
وللمعلوميه فيه بنفس البيت 4 رجال
يعني 2 ماتزوجوا بس ماتزعل الا على زوجي بس
نفسيته انعدمت زوجي وانقلبت حياتي
انا لي 4 سنوات متزوجه اقسم برب البيت ان يمكن اللي انبسطت فيها 6 شهور
داىما نتهاوش ودائما نقرب للطلاق
بس بالاخير نتراجع يايذكرني او اذكره انو ليه نوصل هالمواصيل
مدري وش اسوي
بس ادعي ربي انه يهونها علي ويخلي لي زوجي وولدي
تكفين اذا دخلتي ادعي لي ولو بدعوه