بعد ماكنت العقربة سرت بلسم جروحي

1. وانا صح صغير لما أزوجت كان عمري 19 سنة بس كنت ما أحب أسمع لأحد

هاي على أحلى فراشات
اليوم بصراحه جاي في بالي أدردش معاكم عن أم الزوج وكيف علاقت كل وحده مع أم زوجها
انا راح أحكيكم عن تجربتي مع أم زوجي ويارب تستفيدو منها
انا زي ماقلت لكم إنو أخذت زوجي عن حب وزوجي ثالث واحد في أخوانو يزوج
وطبعا أخوان كلهم مزوجين تقليدي يعني أمهم أختارت مو هما وبيني وبينكم أم زوجي شوي متسلطة وقويه
المهم زوجي المسكين راح لأمو وقال لها أنا أبغى أزوج طبعا هيا في وحده من زمان في راسها الي هيا بنت أختها قالت لو طيب خلاص انا بكرة حكلم خالتك ونروح تشوفها
طررن >>>صاعقة على زوجي قام قال لها لا والله يامي انا في وحده في بالي أبغاها ومني أخد غيرها بصراحه وهيا تحلف يمين غير بنت خالتك مافي
المهم أستمرت هذي الأزمة تقريبا 7 شهور وهيا تقول غير بنت خالتك مافي وجلس المسكين يقنع فيها لين أقتنعت طبعا مو إقتناع كلي لا
المهم جا تاني يوم وقال الف مبروك أمي خلاص حتكلم أمك وهيا مرة فرحان وانا عارفه أنو كداب بس هو ا يقول كده عشان لا أكره أمو
كلمت أهلي وحددو يوم الشوفه وكل شي طبعا شافتني وزوجي شافني ولبسني وخرج من عندنا مرة فرحان وهيا تطالع في وتقولو وع اللع يقرفك منها حلوة
المهم سارت الملكة وكل فترة وفترة أكلمها وأسئل عنها طبعا ما كنت أروح عندها لانو هيا في بلد وأنا في بلد وكانت ماتخلي زوجي ينزل عندي تطلعلو مشاوير من تحت الأرض
سار الفرح وسافرت شهر العسل وطبعا جبت لها هدية ولما أعطيتها هيا أتخيلو إيش قالت لي ((اهو كلو من خير ولدي)) انا أنخنفت من قوة الضحك لانو فكرتني يجدتي الله يرحمها وخرجت من الغرفه على الحمام وأضحك ومن كثرت الضحك بكيت وهوا يسلم على راسي لاتبكي هيا أمي كده يقولي >>لما رحنا البيت عرف أنو كنت أضحك قال والله فجعتيني أعرفك منتي من النوع الحساس مرة أستغربت
المهم يوم من الأيام عرفت إنو أسمي في جوالها العقربة وسلايفي يقولو لي نافقيها تكسبيها ترى هذي ماتمشي غير كده ولا تعطيها وجه ومدري إيش

وانا صح صغير لما أزوجت كان عمري 19 سنة بس كنت ما أحب أسمع لأحد

بعدها كل يوم وانا عندها بعد العصر أشرب القهوة وهيا ماتبغاني >>قاطه وجهي وفي الصباح اتصل عليها أقولها تعالي أفطري عندي >>>كلنا في عمارة وحده ومحد من سلايفي يروح عندها غير يوم الجمعة يوم مايجتمعو كلهم عندها وانا كل يوم يا انا عندها ياهيا عندي بيني وبينكم أبغى أكسبها عشان أرتاح وبصراحه ماعندي غيرها أهلي في بلد وانا مع زوجي في بلد تانية المهم وأحيانا زوجي يسافر أروح أبات عندها ونسهر انا وهيا ونهرج
أتصلحت علاقتي فيها الحمد له بعد فترة أنقطعت عنها سارت تدور عليا وانا مرة تعبانه أيام الوحام وكل ماتكلمني تلاقيني نايمة
وتاني يوم تعبت ودخلت المستشفى والله جاتني جري وهيا تبكي وتقولي ليش مادقيتي عليا وقلت لي إنك تعبانه وجلست عندي في المستشفى
ولما رجعت ماخلتني أنام في بيتي بت عندها 5 ايام لين اتعافيت وطول فترة حملي وهيا ترسلي غدا مرة ماكنت أطبخ
ويوم من الأيام أجتمعنا كلنا وسلايفي في إستراحه طبعا بعد ماخلصو كل وحده راحت مع زوجها وانا جلست معاها ألم العفش وانا حامل وهيا تقولي لاتشلي ومدري إيش وجوالها ضاع ودورنا عليه مالقينا راحت قالت لي أتصلي وشوفي فينو ولما لقيت الجوال أتخيلو إيش لقيت إسمي ( بلسم جروحي )
وفي العيد تعيدني ب 500 ريال سلايفي ياخدو 100 وعيالهم 50 بنتي تعطيها 100 ريال
وقالت لي انا عارفة إنو سلايفك مايحبوني وينافقوني وأنتي الوحيده الي تحبيني
ومن يومها هيا أمي التانيه
عشان كده الي تقول لك نافقي ام زوجك تكسبي كدابه
الطيب غلب الطيب ياحبايبي وهذا قصتي مع أم زوجي يلا أستنى تجاربكم بفارغ الصبر