تجربتي المذهلة مع الإثمد تنبيت وتطويل عجيب للرموش لايفوتكم

بسم الله الرحمن الرحيم
السلام عليكم ورحمة الله وبركاته
ماراح أذكر مقدمات طويلة وعريضة..
فقط أبحكي لكم عن تجربتي مع كحل الإثمد..
أنا من يومي صغيرة وأنا رموشي قصار
وقبل كم من سنة طاحوا رموشي بشكل فضيع
وصار الفراغات أشوفها من بعيد وصارت حالتي حاله
حتى الماسكرا مااحس تضبط معاهم أبدا
جربت زيت الخروع نفع بس مو مرة بعدين ريحت الزيت وع وماارتاح له أبدا..
الين جا ذاك اليوم وقالت اختي ان عندي كحل الإثمد
كنت بذيك الأيام توي سامعه بحديث الرسول عليه الصلاة والسلام -فيما معناه-
(خير كحولكم الإثمد فإنه يجلو البصر وينبت الشعر)
وهي جايبته عن وحدة حرمة تسويه على ايدها تاخد الحجر الاثمد وتطحنه على ناعم حيل واهلي كلهم ياخدون من عندها من وانا صغيرة مايتكحلن الا بهدا الكحل
ويكفي انه حديث يعني مافيه مجال للشك..
المهم ويجي ذاك اليوم وأتكحل فيه بصراحة
حار مرة على العين لكن أنا سمعت انه إذا كان حار معناته انه أصلي
وطبعا تحملت وصار لي يمكن ثلاث ليالي تقريبا اللي أتكحل فيه وأنام....
قمت تقريبا باليوم الثالث وأطالع بالمراية الا فيه شعرات قصيرات نابتات بالأماكن الفارغة من الرموش ورموشي طايلات حتى رموش الجفن السفلي صايرات طوال ونابت كمان فيهن رموش زيادة
والله يابنات اني استانست وتشققت ونقزت بروح أتكحل بعد عشان ينبت زيادة لكن أختي قالت لاتوهقين يمكن مايناسب لعيونك الرموش الكثار..
لكن والله اني الحين كل شوي أروح أطالع رموشي
بالمراية (ماشاء الله تبارك الله) من الفرحة
حتى أمي قالت عيونك صايرات محددات بأسود!!
وماادري يابنات شرايكم أتكحل زيادة أو لا
لكن والله اني إلى الآن منبهرة جداجدا من سرعة النتايج يعني معقولة ب3أيام فقط تصير رموشي كذا بس يكفي انه حديث يعني مفروغ منه
وبعد شي ثاني لاحظته.. أنا أصلا نظري ضعيف مرة أجلس بالمدرسة بالصف الثاني وماأشوف السبورة
لكن الحين أقسم بالله ان مكاني قبل الأخير وأشوف السبورة صح انه مو مرة بس أقدر أشوف أغلب المكتوب عليها ولله الحمد
صراحة يابنات حبيت الكحل حتى أمي قلتلها وصارت بعد هي تكحل فيه..
بنات والله ماكتبت الموضوع
إلا اني أبغاكم كلكم تجربون اللي جربت وتستفيدون مثل مااستفدت..
وإذا عندكم أي سؤال أنا حاضرة
حتى لو وحده تبغى أصورلها الكحل صورته
أنتم بس آمروا وتدللوا