تجربتي انا ام وليد ويوسف كانت يوم 10 10بديت مشوار النحافه مع د رنده

يسعد مساكم والصباح يا أغلى فراشات
هلا بالغاليات واللي أنا أحبهم وأموت فيهم
هلا بالدبدوبات واللي على طريق الرشاقة الله يوفقكم وتوصلوا للي تتمنون يارب
هلا باللي أزعجوا الخياط بس يقوصر ويضيق بها الثياب
وهلا باللي دواليبهم وفضت وصارت ملابسهم كأنها ما كانت لهم بيوم
بفضل الله وهم بكامل صحتهم
هلا باللي ينتظرون يوم الميزان وقلوبهم طخ طراخ طخ طراخ
والمزاج متعكر
هلا باللي فتحوا في حياتهم صفحه جديدة
وبدو الحياة من جهة جديدة
أنا اليوم حبيت اكتب لكم تجربتي مثل ما أنا وعدتكم ومثل ما تعرفوني دائما أحب اذكر لكم تجاربي
للدرجة صرت أحس إني بينكم مفضوحه خ
من كثر ما اكتب لكم عن كل شيئ مجربته
حبيباتي
أنا اليوم حابه اذكر لكم قصتي وتجربتي وانزل لكم الرجيمات اللي أنا اتبعتها
طبعا أنا كنت مريضه سمنه سابقه
ترى من جد اللي سمينه لازم تقول عن نفسها أنها مريضة سمنه
رح اكتب لكم قصتي اللي ما توقعت بيوم ولا حتى تخيلت إني راح اكتبها ولكن تحقق المستحيل والحمد لله بفضل الله
طبعا يا بنات أنا أعاني من كسل الغده الدرقية وسبق نزلت لكم موضوع هذا رابطه
http://alfrasha.maktoob.com/alfrasha49/thread955265/
عن الغده الدرقية
وطبعا كنت أتعالج منها وتتحسن وتسوء
وكنت أراجع عند الدكتور كان يقول لي لاتسوين رجيم رح يرجع وزنك ويزيد دبل
لكن بس امشي وسوي رياضه ساعدي جسمك على الحرق
وهنا مشكلتي صدقته
طبعا كنت امشي ثلاث مرات بالأسبوع وأحيانا مره ساعة إلى ساع هالا ربع
والموهيم قبل حملي بولدي الثاني زاد وزني ووصل لل82 وهنا سويت حالة استنفار
وغيرت نظامي وطريقة لبسي
لاني بالبيت كنت البس أشياء مريحه قطنيات وإلا قمصان وحركات
ما تبين أن الوزن قاعد يزود
وبعد ما وزنت قفلت فمي ووصلت لل74 واستمريت لل70
لاني كنت مخططه احمل فلازم انزل وزني مو عشان أي مشكله الحمد لله
لكن عشان لما أولد ما يكون وزني زايد
وكنت اخذ فيتامينات عشان نقص الحديد لأنو كان عندي مرره ناقص 7ومره وصل ل6 من اصل 12
وحملت والحمد لله أنا بطبعي ما اسمن لا مع حمل ولابعد أنا سمنتي تكون بعد الفطام غالبا
الموهيم بعد ما ولدت والحمد لله
كان جسمي مره حلو بالنسبه لي وما كانت زايده للدرجة اللي حولي استغربوا مني ليش
يعني حتى انحف من قبل الحمل شكلا
وبعدين رح اكتب موضوع عن هالشيئ
وبعد ولادتي طبعا بدأ زوجي مشاوره لإنقاص وزنه ونزل من وزنه 46 كيلو
سبق ونزلت لكم تجربته على هالرابط http://alfrasha.maktoob.com/alfrasha19/thread1089496/
ما كنت اهتم بالرغم من كل اللي حوالي يقولون لي انحفي
زوجك نحف وأنتي لا
بس كنت أخذه على سبيل المزاح وما قد اهتميت
وبعد ما نزل زوجي وزنه وبدأ مرحلة التثبيت من جد بدأت تتحرك المشاعر عندي
(ادري عن مشاعري سودانيه ما أحس إلا بعدين خ )
في الفتره اللي كان زوجي ينزل وزنه فيها كان أكلنا صحي وكنت امشي معا هانا وأولادي أحيانا وأحيانا بس أحنا الاثنين
وبعد مرور هالوقت يا بنات
وجاء رمضان الماضي وجاء يوم العيد
وتبادلنا الهدايا مع أهلي بين خواتي وميمتي والوالد ربي يحفظه
وزوجي ما أهداني شيئ
مدري ليه حسيتا ني حقدت عليه ما يحس على دمه زعلت وتشرهت قال لي بعدين خير
مر العيد وصمت القضاء ومن ثم الست من شوال والمهم جاء مره وقال أنتي مو تبين تنحفين
قلت أكيد
قال كلام نسوان وإلا من جد
قلت لا والله أبي انحف أتمنى انحف وأحس إني تغيرت
وقمت أتعذر بعذرنا يالبنات بس تعرفني جسمي يحبس سوائل وما ينزل مع الغده
وانو ما اقدر أتخلى عن الشوكلاتات والحلويات اموت فيها عشقها يمشي بعروقي
قال إذا أنتي عندك عزيمه رح تنحفين وكيلو بالشهر تنزلينه أحسن من تزيدينه
قلت طيب
قال خيارك بين النادي وإلا تروحين عند اخصائيه تغذيه
فكرت واستشرت والكل قال سجلي بالنادي
بس أنا فكرت انو لا أبي أروح لاخصائية تغذيه بس وين أروح
قال لي زوجي انو عند الدكتوره رنده اللي برياض الهجن اثنين من أصحابه مره نحفوا وان واحد من أصحابه نزل 10كيلو بشهر
تحمست مره وتذكرت انو ثنتين بنات كنت اعرفهم راجعوا عندها ومره نحفوا وهم كانوا بال90 قلت تم
والموهيم ورحت للدكتوره بيوم 10\10\1430
بعد ما خلصت صيامي وتوكلت على الله
ورحت ودخلت عند الدكتوره
وجلست تسأل عن نظامي وهنا اكتشفت نفسي
أنا افطر وباقي اليوم شكولاتات ودائما شكولاتات حتى بالشنطه
ومافي نوع يجي جديد إلا اشتريته
للدرجة انو لما كان عندي فقر دم زوجي حلف ما يدخلها للبيت واني ما اشتريها صرت أخذها تهريب
من عند سلفتي حبيبتي ههه
والله كأنها حشيش ههه اموت فيها
وبعدين لما عرف هاوشني وصار يجيبها لي لكن مو كل يوم مثل اول
وسكتت والدكتوره اعطتني الدايت
طلعت من عندها وانأ متوكله على الله
طبعا أنا جربت الحبوب اللي عندها مالها أي مفعول استخدمتها شهر وتركتها هي مفعولها نفسي فقط وما أثرت فيني كثير هي من خلاصه الشاي الاخضر وتباع في صيدليه الاسره وصيدلية الحبيب
أما الإبر الصينيه أيه حسيت بفرق إني ما أدوخ
طبعا استخدمت مع الرجيم فيتامينات من أرمال
وبديت الرجيم وبديت احلى مشوار بحياتي
وخصوصا اني اول مره اسوي رجيم
رجعت بهذاك اليوم وتعشيت من خطة الرجيم حقتي
واستمريت وبعد 9ايام رحت لها ولقيت نفسي نزلت ال4كيلو
شيئ خيالي ما توقعته
وكان هالرجيم أول رجيم أسويه بحياتي
استمرت عندها
وجاء عيد الأضحى وانأ بشكل جديد مقاس جديد نفسيه جديدة الحمد لله
واستمريت ومازلت مستمره
لاني أبي أصير مليكان
من الأشياء اللي حبيت اذكرها لكم
كنت أخاف من اليوم اللي بروح أوزن فيه
ما أبي اخذل نفسي
ولا أبي اخذل زوجي ولا الدكتوره وهذي فايدة المراجعه عند اخصائية التغذيه
وكمان يا بنات شيئ حلوو لما تحسين انو وزنك ينزل ينزل وانك تحلوين وتصغرين
وملابسك بالدولاب تلبسيها وكأنها ما كانت لك بيوم
شعور لا يوصف لما تطلعي بلوزه أو تنوره كنتي تحبيها تلاقيها واسعه او طويله
شعور حلو لما تروحي للسوق وتشتري مقاس جديد
شعور حلو لما تحسين بنظرات الإعجاب من زوجك كأنك عروس
والله من جد وجسمك ينحف وبشرتك تحلو
وثقتك بنفسك واو ومزاجك عال العال
وهنا أقول للمتزوجات قبل لاتدوروا حركات للتضويق غيري نفسك وانحفي وغيري من نفسك وغيري من حياتك
تستمتعي اكثر والله كانك عروس
حلوه الحياة
حبيباتي
ما كتبت لكم هالتجربه إلا لاني ما توقعت اكتبها لكم في يوم
أنا وزني نزلته
وهالرجيمات رح انزلها لكم رح تنزل من اوزانكم اكثر من 15 كيلو باذن الله مع المشي
وتوقعي الافضل واصدقي مع نفسك ولا تخذليها
وان خربطتي أو شيء
عاقبي نفسك
وازني دائما كل اسبو عين واحسبي لكل شيء حسابه
وبأذن الله رح تاخذي أحلى نتيجة
طبعا أنا رح انزل لكم رجيماتي
بس انتظر أختي الصغيرة تطبعها لكم وأبي منكم دعواتكم الصادقة لها بأنها تجيب أحلى درجات
وربي يوفقها وخاصة أنها عسوله وتستاهل منكم دعواتكم الحلوه
وما تهمني الردود قد مارح يهمني دعائكم لي بالغيب
الله يوفقكم ويسخر لكم من يخدمكم وييسر لكم أموركم
ويذلل لكم الصعاب ويرزقكم يارب امين
الدكتوره رنده
بمركز الطب الصيني رياض الهجن
معروفه
تكلفت اول زياره 300ريال
وتحسبها لك على عدد الجلسات اربع جلسات ب300
وبعد كذا الاربع جلسات الثانيه على 200
والابر اول جلسه ب300
اانا سويتها مره وبعد كذا ما سويتها لاني خلاص ما احتاج لها تعودت على النظام
مع الرجيم مافي جوع
لكن فيه شعور خفي بالحرمان من الشكولاتات
لكن انا ما حرمتني منها
كانت تعطيني اياه اسبوع وتحرمني منها اسبوع
كنت اروح لها كل تقريبا من السبت اول اسبوع والاربعاء من الاسبوع الثاني
وكنت امشي 35دقيقه 3كيلو
ثلاث مرات اسبوعيا
سبق وسويت عنها سيرش الس لبي اكثر من الايجابي لكن اكتشفت اها ترجع لعزيمة الشخص نفسه ونوعية الجسم
واذا انتم استمريت على الانتبها لانفسكم بعد الرجيم اولا
تركت رجيمها فتره شهرين ومازدت ونقصت لاني تعودت على النظام
ولاني غيرت عاداتي الغذائيه فاي وحده حابه تنزل من وزنها وتثبت عليه
توزن كل اسبوع
وتنتبه على عاداتها الغذائيه
وتعامل نفسها انها مريضه سمنه
اللي تحبينه ودسم كلي منه مره بالاسبوع
وااللي مره دسم مره بالشهر
مع االاستمرار على المشي والانتباه على الاكل
كذالك
من الاشياء المهمه وقت الرجيم
تكثري خضروات بقدونس جرجير طماطم فلفل رومي وليمون
وشاي اخضر
قشر بالزنجبيل
زهورات مع القرفه او الزنجبيل
وان شاء الله بعد يومين بنزل لكم الرجيمات بعد ما تطبعها لي اختي القميله هومي
طبعا لما تشوف دعواتكم خ
وفي الاخير
أسأل الله لي ولكم التوفيق
واني اكون افدتكم بشيئ يغير حياتكم او يساعد على تحسينها يارب
كتبت موضوعي لكم هذا مرتين بس والله عشانكم يا قلبي
ان شاء الله يفيدكم