تجربتي مع الإستغفار والله انه رحمة من رب العالمين

1. واللي حمسني اكثر رساله من العضوه شذى الحنين جزاها الله خير على تذكيري


2. الموقف الاول :


3. الموقف الثاني :


4. الموقف الثالث :


5. موقف حصل لاختي


6. موقف حصل لقريب لي ..

بسم الله الرحمن الرحيم
( تجربتي مع الاستغفار )
السلام عليكم بنات ، كيف حالكم جميعا ..
الموضوع هذا صراحه كان ودي اكتبه من زمان لكن لضيق الوقت عندي وظروفي الصعبه جعلتني أعمل على تاجيله يوما ورى يوم

واللي حمسني اكثر رساله من العضوه شذى الحنين جزاها الله خير على تذكيري

اول شي ماهي تجربه ولا ثنتين ولا ثلاث اللي مريت فيها .. العديد من التجارب ويشهد علي الله اني ابيكم تتعلقون برب العالمين وان مافي شي مستحيل لاني مريت بالمستحيل واليوم صار ذكريات بالنسبه لي واضحك على نفسي واقول معقوله هذا الهم اللي انا شلته كذا حله بكل بساطه !!
لذلك مثل ما تشوفون جعلته توقيعي في هالمنتدى وغيره
الاستغفار
الاستغفار
الاستغفار
يارب لك الحمد على هذه النعمه ..
عالعموم راح اذاكر من القصص اللي تحضرني حاليا وان شاء الله الكل يستفيد منها
بعضها لي انا والبعض معارفي ..< راح اتكلم بالعاميه اريح لي صراحه ههه

الموقف الاول :

يوم كنت ادرس في ايام الجامعه كانت عندي ماده جدا صعبه والبنات يعانون منها كثير بحكم تخصصي صعب شوي لكن هالماده من درستها للامانه احضر ولا افهم شي ولا اكتب معاه شي مو اهمال بس كنت حطيت في بالي اني راسبه خلاص ماراح اتعب نفسي معها ، لكم تتخيلون الوضع درجة النجاح كلها 60 من 100 يعني لازم اقل شي يكون مجموعي 60 عشان انجح وبمعدل مقبول .. وانا كل اعمال السنه 23 درجه والاختبارالنهائي 40 لو اقطع نفسي واحل كل الاسئله صح ولا غلط ما عديت بالامتحان لو ايش يعني راسبه راسبه ههه
والله الذي لا اله الا هو اني كنت بهم مايعلم فيه الا ربي قلت في نفسي راح اتوكل عليه وبذاكر اللي اقدر عليه وشي فهمته وشي مافهمته وقبل لا انام استغفرت 1000 مره وطلبت من الله يسهلها علي وجا الصباح ورحت الاختبار وصارو البنات يراجعون ويطلعون اشياء انا اصلا ما ادري عنها ودخلت ونفسيتي زفت وقلت توكلت على الله وحليت لو اقولكم ان اغلاط الدنيا علي ماتصدقوني ههه وطلعت وانا مبسوطه ومرتاحه والصدمه الكبيره اني نجحت في الماده ههه يارب لك الحمد والشكر .

الموقف الثاني :

قبل تقدمولي كذا شخص وسبحان الله مايصير نصيب .. ما انسى هذيك الفتره اللي مرت علي كان وقت الاجازه الصيفيه واخواتي كانو عندنا وسهرانين وضحك وسوالف جا في بالي اقول الحين انا سهرانه معهم وكله عالفاضي ههه ليش ما اصلي واستغل هالوقت في الدعاء ان الله يرزقني الزوج الصالح ويسر له وفعلا صرت اسهر معاهم وعند الساعه 2 ونص او 3 اروح افرش سجادتي واصلي وادعي بكل اللي خاطري فيه ( ربنا هب لنا من ازواجنا وذرياتنا قرة اعين واجعلنا للمتقين اماما ) (ربي لا تذرني فردا وانت خير الوارثين ) ( ربي اني لما انزلت الي من خير فقير ) .. وكل اللي نفسك وخاطرك فيه ادعيه وكنت اصليه ثلاث ركعات الثالثه اوتر بعدها اقرا سوره الواقعه .. واستغفر 1000 مره ... تخيلو مده اسبوع وانا كذا
تصدقون بالله تقدمو لي ثنين في نفس اللحظه وصارت منافسه ومشاكل عشان الا يبوني اوافق !! ههه سبحان الله والله انه شي غريب .. طبعا وافقت على واحد منهم بعد ما ارتحت له وهو الان زوجي والحمد الله كل اللي دعيته لقيته فيه من فضل ربي طيب وحنون ويخاف الله فيني ويلبي طلباتي واهله ناس طيبين ولا فكرت في يوم او حلمت اني اكون عندهم .

الموقف الثالث :

لما كنت راح اسافر للدراسه للخارج واجهتني امور وربي قلت خلاص راح اكنسل ولا راح اقدر اسافر بس بفضل ربي الدعاء والاستغفار فرجت وسهلت امور كثيره
واجهت امور كثيره في السكن يوم سافرت وسكنا في سكن يعني مو مره ولا عجبني صراحه ولا ابي زوجي يحس مع اني عارفه ان الفتره الاولى صعبه شوي علينا وكذا وصرت ادعي الله واستغفر ما تتصورون لو اقولكم بين كل صلاتين استغفر بحدود الف مره .. مامر كم يوم الا وقال خلاص راح نطلع لسكن جديد وفرحت مره دخلت السكن تدرون وش لقيت ....؟؟
(( فقلت استغفرو ربكم انه كان غفارا , يرسل السماء عليكم مدرارا , ويمددكم باموال وبنين , ويجعل لكم جنات ويجعل لكم انهارا ))
هذا اللي لقيته .. دخلت السكن ولقيته جنه الله في ارضه شي يفوق الوصف يابنات الشجر محوط من كل مكان البيت واحسن موقع في السكن بيتنا وجيت تخيلو على وقت مطر مطر مره وجو اتعب اوصفه وفيه مجرى صغير تحت يمشي عالشجر
ادري وصفي ممكن خيال بس هذا اللي صار وقلت سبحان الله العظيم الاستغفار يسوي كل هذا ....!!!
..

موقف حصل لاختي

كان عندها شغاله مطلعه عيونها مسكينه ههه وتخيلو كانت رافضه تشتغل نهائي وتبي تسافر وهي توها جايه يعني جديده مره ولا تتكلم مع اختي ولا تبي تشتغل جننتها واختي كل ما دقت على مكتب ياخذها رافضين سبحان الله يقولون مانبيها بدون سبب واللي قالو هاتيها تجلس عندهم كم يوم ويرجعونها يقولون كل من جا بياخذها تسوي حركات ويقولون هذي مجنونه مانبيها ههه يعني مسكينه تخيلو شهر او اكثر وهي على هالحال والمشكله انها باسمها .. مره مكتئبه وجتني تقولي قلت لها ليش ما تستغفرين قالت تصدقين ماجا في بالي وصارت تستغفر وتستغفر بس ثلاث ايام تخيلو وش صار ؟؟
قامو المكاتب يدقون عليها من كل مكان ويقولون نبيها وصايره عليها حرب من اللي ياخذها ههه وسبحان الله في الاخير راحت وجتني وقالت لي سبحان الله تدرين كل هذا بفضل الله سبحانه ثم بفضل الاستغفار ..!!

موقف حصل لقريب لي ..

الشخص هذا كان عنده دين مدري قرض بحدود 100,000 ريال تخيلو والشخص هذا مريض ولا يشتغل يعني مره حالته الماديه ماتسمح .. وسبحان الله كان وقت رمضان واخذ الاستغفار والاستغفار في كل وقت والله يابنات ان هذا كلامه لي انا يقول ما جا على نهايه الشهر او بدايه العيد ماني متذكره الا جا واحد وكلم ابوه قال هذي زكاة اموال واحد غني مره قيمتها 80,000 الف ريال ويبي يعطيها يعطيها شخص مديون وكذا وسبحان الله شلون عرفه وشلون جاه المبلغ ما يدري عرف ان الله كريم سبحانه ومايخلي عبده في كربه ..
الاستغفار يابنات هو الفرج هو مفتاح كل شي تبينه
تبين الزواج استغفري
تبين الرزق استغفري
تبين الولد استغفري
تبين النجاح استغفري
تبين الشفاء استغفري
تذكري ( وماكان الله معذبهم وهم يستغفرون )
الدعاء + الاستغفار+ رضاء الوالدين + الصدقه + وحسن الخلق مع الناس
كنز بيد كل وحده وابسط منه مافيه لكن اللي عندها ام والا اب قبل اي شي تبر فيه وتسعى ورى رضاهم وتسالهم الدعاء الدائم لها بالتوفيق لان دعوة الوالد على ولده مستجاابه
لحو بالدعاء واستغفرو الله سبحانه ..
انا مره حلمت ان شخص جاني بس ما اعرف مين ولا شكله ولا اي شي كانه هتف باذني قولي استغفر الله العظيم الذي لا اله الا هو الحي القيوم واتوب اليه
من سمعتها وانا دايم اكررها ويارب لك الحمد ما اشوف الا التوفيق والنجاح فيها ..
اللي تستفيد من موضوعي ابيها تدعي لي بالتوفيق وان الله يرزقني الذريه الصالحه اللي انتظرها ..
ويشفي امي وابوي واخوي واختي ويارب لكم بالمثل
والسلام خير ختام
منقول
دعواتكم ربي يحقق مرادي ويستجيب دعائي