تعالوا ياعرايس نهتم باجسامنا قبل فصل الشتاء

السلام عليكم ورحمة الله وبركاتة
مساء الخير مساء النفسية المزاجية
كيف حالكم كيف الصحة عساكم بخير
ياعرايس خلونا نشجع بعض في الاهتمام والعناية بالبشرة والجسم من (خلطات - كريمات-تقشير-شيل الشعر سواء الوجه اوالجسم او المنطقة الحساسة)
وكل وحدة تقول لنا وش تستخدم لبشرتها ولجسمها
يعني نبغى التجارب
اللي عرسها قريب او بعيد شوي لازم تهتم من اللحين لان مافيه وقت والنفسية تتغير ولازم نقطع وغير كذا فصل الشتاء على الابواب
برد وكسل وخمول ,افضل وقت هذا الوقت خصوصا اللي اجسامهم يبي لها عناية اكثر (تتكلم عن نفسها)
ابدا انا اول واقولكم وش اسوي
اولا وجهي ورقبتي
بدات اهتم فيه من شعبان استخدم كورس التقشير من زين الاتات بس يبي له وقت مايبين بسرعة وغالي
واستخدم واقي الشمس من زين لاني موظفة واطلع شوي في الشمس وعيوني استخدم كريم السواد والترهلات من زين .
بالنسبة للجسم
جسمي كنت قبل في رجب اخلط زبادي منتهي مع سدر واخلية ربع ساعة يمكن استخدمته 6 مرات واشوف الحين جسمي فيه بقع بيضاء شكله من الزبادي المنتهي ههه
بكحلها عميتها ,
الحين سويت لي هلخلطة
(- صابون الغار -ماءورد - علبتين جلوسليد الاحمر حجم صغير - علبة جليسرين السائل - فنجال قهوه من ( زيت الزيتون + زيت الخروع + زيت اللوز المر )

• ملعقتين كبيره كركم للجسم مو للطبخ (وهذا بتلقونه عند العطار قولو كركم للجسم وهو بيعرف وش تبون ) - علبة فكس صغيره )

تبشرون الصابونه برش ناعم وبعدين تحطونها في كاس ماء ورد من الليل الى الصبح عشان يذوب الصابون في المويه وبعدين اذا اصبحتو تضيفون الجلوسليد والجليسرين السائل والزيوت
وملعقتين كركم وعلبة الفكس الصغيره واخلطو المقادير جميعها في خلاط كهربائي عشان تختلط زين بعدين تحفظونها في علبه زجاج عشان تبقى نظيفه وتستخدمونها اطول فتره ممكنه وبعد كذا
تحطونها على جميع مناطق الجسم (يعني الجسم كله ) وتخلونها ساعتين وبعد كذا تجيبون ليفة الجسم اللي من بودي شوب صايره على شكل قفازات احسن من الليفه المغربيه وتحطون
عليها ملح خشن وتعصرون ليمون فوق الملح ويالله تبدأون بالفرك ) طريقة الخلطة منقولة
استخدمتها خمس ايام بعد مااجئ من الدوام الظهر احط منها واغير المفرش واحط شرشف عليه والبس بجامة خاصة بهالخلطة واذا جلست العصر تروشت استخدمت الملح الخشن مع الليمون
مرتين وقلت استخدم ملح الحليب مع الليمون احسن وبعدين اغسلة بصابون الطاووس وبعدين ادهن جسمي كله (جلوسليد-زيت زيتون -زيت خروع - ليمون كثروا منه) وعساني استمر عليه يارب
اليوم ماحطيت مالي خلق .ومرة استخدمت صابون المغربي وخلطت معه زيت زيتون وليمون وخليته ساعة قبل السباحة.
والله حتى الزيت الزيتون مع الليمون يكفي لصفاء الجسم بس وين اللي يستمر
بالنسبة للمنطقة الحساسة لي سنتين وانا اشيلها بالحلاوة كيف ؟
كانت صديقتي تقول ان خواتها يشيلون بالحلاوة ويقولونها لها حاولي وقالت لي وبعدين انا حطيت الفكرة في بالي !!!!!
وكنا مرة غايبين من المعهد وفيني حره من تصرف المدربات مع انه شئ تافهه لكن اثر فيني وطلعت حرتي قلت لازم اشيل بالحلاوة
غسلت المنطقة اول وحطيت فيها بودرة وبدات اشيل والله احسن ان روحي طلعت وطلع دم واحس المنطقة من داخل تعورني لان الشعر قاسي وقعدت تقريبا اكثر من ساعة ونصف في الشيل طبعا
بس اللي فوق بس والله تشوفين المنطقة انظف واحسن
بعدين قلت لصديقتي عملت انجاز وتشجعت اكثر وشالت وبعد مرتين من الشيل حاولت اشيل اللي تحت بشويش وهو اللي ياخذ وقت واحيانا احط مسحه طبيه والحين بس اغسلها بالصابون
واشيل مرة كل شهر او كل ثلاث اسابيع احسن علشان مايطول واذا طول تطلع الروح معه بس مع التعود يصير عادي والشعر بدا يصير انعم ومدة الشيل صارت اقل احيانا ساعة او اقل وهالمرة نصف
ساعة وبعده ادهن المنطقة بزيت الاطفال او ليمون مع جليسرين او زيت الزيتون وليمون او نشا اذا كان فيه احمرار ,ومرتين استخدمت نبته السعد بعد مااشيل ولاحظت قلت نمو الشعر لكن
ينبت تحت الجلد وتركته هالشهر واستخدمت منقوع الترمس المر .
ويبدأ ظهور الشعر تقريبا بعد 10 ايام او 12 يوم والاحسن الشيل بعد ماتنتهي الدورة الشهرية
وايضا منطقة الابط بالحلاوة والله المفروض امهاتنا نبهونا مانشيل منطقة الابط الابالحلاوة وانا مطفوقة اشيل بالموس شكلي وانا مغمضة يعني اروح لمساحات اكبر ومافية شعر وبعدين تصير
مساحة الشعر اكثر وحتى المنطقة الحساسة كنت اشيل اللي على الجنب وهو مافية بس شكل الموس يمشي لحالة ههه
وسلامتكم وارجو من كل العرايس يدخلون ويفيدون ويستفيدون