تعالي ادخلي قبل الزواج اذا تبين زواجك يستمر

1. موب شرط يشتري لك كل شئ تبينه


2. موب شرط قال لك اليوم ايه معناتها بيطيعك في كل شئ

السلام عليكم ورحمة الله وبركاته
سؤال اوجهه لكل بنت مقبله على زواج ....
وش بعد الزواج ؟
فرضا وتم الزواج ... هل تبين يدوم هالزواج ؟ ام تبين كم شهر وتتطلقين ؟
كثير بيقولون لا ان شاء الله وش اتطلق .... !
اقولها ياحبيبتي هل انتي تحسبين ان كل بنت تطلقت .. انها في يوم كانت تظن انها بتتطلق !!!
طيب هل تعرفين وش المشاكل المنتشره الي تؤدي الى الطلاق كي تتجنبيها ...؟؟؟
هل تعرفين حقوق الزوج الشرعيه كي تؤديها ؟؟؟
هل بتطيعينه في اوامره ولا بتصيرين عنيده ... ؟؟؟؟
هل بتكتمين اسراره ولا بتطلعينها كلها عند امك ؟؟؟؟
هل تعلمين ان المحافظة على منزل الزوجية و الطبخ من مسؤولياتك
ام انك متأثره من الثقافه الغربية وتشوفين انه لا والله هذا استعباد ؟؟؟؟؟
هل بتواصلين كثرة الاستغفر و الذكر والصلاة بعد الزواج .. ام اذا تم الزواج بتنسين كل هالاشياء ؟؟؟
هل حاطه في بالك ان الزواج كله احلام ورديه وايام عسل وسعاده ... ؟؟؟؟ احسبي حسابك من الحين ترا الزواج ايام بيضه وايام سوده ,,, المشاكل لابد منها ! والأهم من كذا .. اذا صارت مشاكل هل تعرفين كيف تحلينها مع زوجك ولا على طول سيده تشاورين خواتك وبنات عمتك وصديقاتك وامك ويعبون راسك ثما تكبر المشاكل الي بينك وبين زوجك
للأسف للأسف للأسف
كثير بنات يتمنون الزواج وكلها كم فترة وهم متطلقين ثما يروحون يبحثون عن اسباب الطلاق
بعد ماوقع الفاس بالراس
اي بنت مقبلة على زواج لابد تعرف وش لها وش عليها
ترا الزواج مو بس طقطقة واغاني وزفه وافراح ... هذي كلها خرابيط اول ليلة وبتختفي
وزين ان عدت اول ليلة من دون نظرات الحسد من الناس
اذا ملكتي وقال لك الزوج ابي زواج عائلي مختصر لا تعاندين وتقولين لا ابي انزف قدام كل الناس
ياما بنات انزفوا و اخرتها كم شهر ومتطلقين من آثار الحسد
انتبي تبين تتزوجين كم شهر و لا تبي زواجك يستمر سنوات ؟؟؟؟
اسمعي الكلام وخلي زواجك مختصر في بيتكم
ترا فرحة الزواج ماهي في أول ليلة ... فرحة الزواج لا تم الزواج وصار فيه انسجام بين الطرفين بعد الزواج واستمر هالزواج وبدت العشره بحلوها ومرها ..... أما جلب الأنظار أول ليلة تراها اول خطوات الطلاق ...
و واضبي على الطاعات .. واسمي كلام زوجك , موب شرط تتدلعين عليه كل يوم يوديك بيت اهلك

موب شرط يشتري لك كل شئ تبينه

موب شرط قال لك اليوم ايه معناتها بيطيعك في كل شئ

موب شرط تقارنين حياة الناس الثانيين في حياتك انتي وزوجك’ يعني فلانة وعلانه سافرت مع زوجها لباريس و زوجك انتي وداك الشرقية موب لازم تكشرين !!!!! لاتحسبين ان الي راحوا باريس حياتهم كامله ,,, كلن وعنده مشاكله الخاصه .... لا لا لا تقارنين مع الناس الثانيه
احمدي ربك على النعم
القناعه كنز لا يفنى
والزوجة الي ماتقتنع بالي عندها راح تكفر النعمه
وتنكد على نفسها وعلى زوجها و تزرع المشاكل بنفسها
الين تنتهي الى الطلاق
موب شرط تقلبينها نكد اذا رفض انك تروحين العرس الفلاني
اذا قال لك ايه ايه واذا قال لا لا .... ترا هالامور الصغيره هي سبب في طلاق كثير بنات هالوقت
احفظي اسراره واياني وياك اسراركم تطلع ... ومشاكلكم تحلونها بينكم
لا تشاورين احد في مشاكلك مع زوجك ... عندك مشكله مع زوجك توجهي مباشرة لزوجك وصارحيه
ترا حق الزوج اعظم من حق امك عليك للمعلومية
امك وابوك هذا قبل الزواج ... بعد الزواج زوجك هو الأولوية ... وترا هالشئ في الشرع مو كلام من راسي
يمكن تلاحظون كلامي شديد اللهجة شوي
بس من الي اشوفه
اسباب طلاق تافهه هالايام
بسبب عدم الوعي
وضعف الوازع الديني
وعدم التهيئة المناسبة للفتاة والشاب قبل الزواج
وكشف الاسرار
وتدخل الاطراف الخارجية في كل مشكلة
تحصل بين الزوجين
بالذات تدخل ام الزوجة في حياة بنتها الزوجية
وهذا الشئ الي يخلي الرجال يطرطعون
واذا قفلت معه طلقها وقالها خلي امك تنفعك
في الختام
ان سويتي كل الي عليك واديتي ماعليك من حقوق
و كنتي مع ربك في الرخا
ومع ذلك صار طلاق !!!
اعلمي بأن الله صرف عنك شر انتي ماتدرين عنه
واعلمي بأن الله سوف يعوضك خيراً
فلا تلومي نفسك
بالتوفيق لكل البنات
الي عندها اضافة تتفضل
الموضوع للنقاش