تعالي اقول لك كيف تستغني عن الشغاله وماتصيري رهينه لها

السلام عليكم ورحمة الله وبركاته
كيفكم يا فراشاتي الحلوات < الاخت حبابة على غفله
بدخل في الموضوع مباشرة
شوفوا يا سكاكر انا ولله الحمد بيتي فيلا مو كبيرة مرة
بس دور ارضي ودور اول وملحق و ما استقدمت شغاله
لانهم دايما يهربوا
فلذلك اجيب من خدامات العمرة وكذا و كل وحدة تجي
تتعب من الدرج لان غرفة الشغاله فوق في الملحق
و مايكملوا عندي شهرين على بعض
تعبت جدا معاهم فجأة الوحدة تروح بعد ما اكون
علمتها على كل شي واكيد اللي عندهم شغالات
حاسيين فيني
انو ماتكمل معايه شهرين وتروح تعب مرا
المهم الغساله الكبيرة الاوتوماتيك والمنشر و
الكواية كلها فوق
امس نزلتها كلها الا الغساله عندي وحدة صغيرة
كنت حاطتها في حمام غرفتي علشان الملابس الداخليه وكذا
ف اعتمدت عليها في الغسيل
اضافه الى ان المطبخ في الدور الارضي ف حطيت
عندي في غرفة من الغرف المايكروويف و في
ثلاجة صغيرة من اول حطيت فيها اجبان وفواكة
ومشروبات و حطيت كمان حليب والنسكافيه
واغلب اشياء الفطور علشان ما اضطر انزل
تحت الصباح و اطلع بالصينية و اتعب يعني
حاولت اسهل شوي الموضوع
والغدا ينزل زوجي و نتغدى في المطبخ
لانو مصيبة اذا بطلع كل الغدا فوق لوحدي
بس باقي موضوع الكوي هو اللي شوي متعب
لانوا تعودنا نلبس بدون حساب لان في شغاله
وتعرفوا لما الرجال يتعود على شغل الشغاله
ما يرضى الا بالكمال
على الاقل الان انا انتظر وحدة بتجي بكرة
بس مو ضامنتهم لانهم كل يوم لهم كلام ما يعتمد
عليهم كدابين لذلك انا مجهزة نفسي على الاقل
امشي اموري بين وجود كل شغاله و الثانية
و الا رواتبهم اقل اقل اقل وحدة 1300 طبعا
و ماتطبخ اللي تطبخ ب 1800
و مافي نظافه زي الناس ما ارتاح الا لما انظف انا
المهم << بدري تو الناس
حبيت تفيدونا يا بنات اللي عندها فكرة
او طريقة سهلت عليها الترتيب او التنظيف تقولها
و تساعدنا بدل
ما صرنا تحت رحمتهم الله لا يسامحهم
و ادعوا لي انها تجي الشغاله بكرة وتكون نظيفة ومحترمة
و ما تتعب من الدرج
و شكرا لكل وحدة تدخل وترد باللي تقدر عليه
وشكرا لكل وحدة تدخل و ترفع الموضوع بدعوه او كلمة حلوة
وشكرا لكل وحدة دخلت وماردت بس دعت لي بظهر الغيب
شكرا لكم كلكم