جبت لزوجي واهله احلى ولد شوفوا وش كافئوني

1. ورحت لأهلي ،،

السلام عليكم ورحمه الله وبركاته
انا متضايقه جدا وحاسه ان الأرض كلها ضاقت فيني بما رحبت
لو قرأتوا مشكلتي بتلتمسولي العذر
اول شيء ربي شاهد عليا اني منتظره الفرج منه وثقتي فيه مالها حدود لكن بسرد لكم مشكلتي من باب الفضفضه ولعل وحده فيكن يرسل لي ربي الفرج عن طريق ردها او مشورتها أو دعائها
اول شيء علاقتي بأهل زوجي سيئة جدا
مو سببي وربي شاهد
ربي شاهد اني بسعى لأكسبهم وهم بالعكس
بسبب عمة زوجي وابوه اللي عايشه معهم بالبيت نفسه
ظنت انه ولد اخوها تزوج عشان يجيب لها زوجته خدامه لها وللمعسل حقها
شغلتها تحبك المؤامرات عليا من تحت لتحت لين خلت كل اهل زوجي يكرهوني
الحين انا نفاس عند اهلي
وكنت منتظره يوم طلاعتي عشان اسويها احلى ليله مع زوجي لكن ،،،،،،،،، دخلوا اهل زوجي بيني وبينه وخربوا عليا وعبوا راسه عليا والحين مايرد على اتصالاتي ولا رسايلي اطلاقا
اقول لكم المشكله بإختصار
قبل ولادتي صارت مشكله بين زوجي وابوه وانا السبب فيها لكن بحق ،، ابو زوجي يبغا مني مودم القو تبعي ليعطيه لولده الصغير
وكان يطلبه مني بصيغه الأمر وكأنه تبعهم رغم انه هديه من صديقتي
الين مره من المرات طلبه مني بصراخ لسبب اني قلت له احتاجه شويه ،، قال لي اعطيه الولد يبغا يلعب سوني اون لاين وانا كنت محتاجته مسن
بالإجبار ابوه اخذ المودم مني واعطاه لولده وولده راح بالمودم لبيت امه وزوجها وانا جلست ابكي بحسرتي على الذل والهوان اللي اشوفه في بيتهم
لمن عرف زوجي عصب واتضارب مع ابوه لسبب انه ابوه هددني ليغتصب مني حاجتي لولده
اخرتها ابوه طردني انا وزوجي من البيت ،، رحت انا عند اهلي وزوجي عند صاحبه
وانا عند اهلي جاني اتصال من اخت زوجي تقول لي انتبهي ترى اهلي يقولوا عنك انك طلعتي اسرار زوجك وماضيه زمان وفضايحه كلها قبل يتزوجني عند اهلي ،، وقالت لي كمان انه اللي طلع هذا الكلام حلف بالله انه سمعني لمن قلت رغم اني مظلومه وربي خير الشاهدين بعمري ماطلعت سر لزوجي عند مخلوق
المهم قلت لأخت زوجي بكل برود ( افهمي الموضوع هم يبغوا ينتقموا مني بهذا الموضوع ومقهورين لأن زوجي بيوقف معاي ضدهم وصدقيني زوجي ماراح يصدقهم لأنه عارفني مستحيل افشي اسراره )
اخت زوجي ردت عليا تحذرني قالت لي انا قلت لك عشان تعملي احتياطك انه ممكن زوجك يقلب عليك
قلت لها حطي في بطنك بطيخه صيفي انا اعرف زوجي مايصدق عليا هرج فاضي لو ايش ماكان ....
بعد فتره ولدت ،،
و ايام المستشفى مااحد طل عليا غير امي بس وزوجي ماكان يجي الا متأخر
اهله ما شفت احد منهم رغم ان الولد اللي جبته حفيد العيله الأول من بين 10 اخوان لزوجي
اخته الكبيره اتصلت بي قالت بعد ماتخرجي من المستشفى ارجعي بيت اهلي انتي وزوجك خلاص انا كلمتهم ينسوا الزعل مع جيه الولد
ورجعنا انا وزوجي وزوجي حب يد ابوه واعطاه يأذن في اذن الولد وقعدت احمد الله ان الأمور بدأت ترجع بين زوجي وابوه واهله زي الأول عشان يكفوني شرهم،،
ماشفت اهتمام من اهله زي ما الناس تهتم بالنفاس ،، ما اعرف للحين ايش اكل النفاس وايش هي روتينها ،، انحرمت هالفرحه ،، الين زوجي اقترح عليا قال لي روحي لأهلك لين تخلصي الأربعين ،، وقتها كنت والده لي 18 يوم

ورحت لأهلي ،،

بدأت اتصالات زوجي تقل ،، واوقات مايرد ،، استغربت ،، وقلت يمكن مشغول او يمكن مايبغا يرد يبا يشتاق لي لأني كنت اظن انه قصد زوجي من جلستي عند اهله اني ارجع له ويرجع لي بعد الأربعين بنفسيه جديده غير انه اهلي يهتموا بي
الين صار شي غريب من اسبوع
اتصلت بي طليقه ابوه ( هي تتواصل مع خوات زوجي ومعاي للحين رغم انها مطلقه وتدري عن كل شيء يصير )
صارت تقول لي انتي ليه جالسه عند اهلك للحين خلاص ماتعافيتي
قلت لها انا وزوجي متفقين ارجع لمن اخلص الأربعين كامله
قالت لي اقول ،، الخميس الجي خلاص تعبي اشياءك وترجعي لبيت زوجك ،، لاتكلميه بس ارسليله رساله انك راجعه وارجعي بلموزين اوك
استغربت من كلمه لا تكلميه ارسليله رساله ؟؟؟
غريبه ايش صاير ،،
بس ما اعطيت الموضوع اهميه قلت لها اوك وانتهينا
بعد يومين صرت اتصل بزوجي عشان نتفق ايش نسوي يوم الطلاعه خصوصا انها اول طلاعه لي
ماكان يرد ابدا ،، جلست يوم وليله اتصل وارسل مايرد وانا اعرفه لمن يطنشني كذا معناها زعلان بقوة
تذكرت اتصال طليقه ابوه لي ،، قلت شكله صاير شيء
اتصلت عليا اخته اللي سبق وقالت لي طلعوا عليك كلام و و
قلت لها زوجي مايرد عليا + مره ابوك قالت كذا وكذا ايش صاير ماتدري عن شيء
اول انكرت انها تعرف بس بالتدريج قالت لي انتي تهملي ملابسه ومقصره معاه بالأكل ماتطبخي له ماتسوي ماتفعلي وانتي ع النت 24 ساعه و و و و
بعدين قالت لي اهلي اشتكوا منك بهالشيء لطليقه ابونا
وقالت للأمانه اخويا ما اتصلت عليه وما اعرف ايش صاير
قلت لها دحين هذا اللي زعله طيب لو هذا اللي زعله كذا يقاطعني فجأه
وانا على نياتي قلت لها هو مايرد شكله صاير فيه شيء وانا خايفه عليه ( استبعدت يكون تطنيشه زعل )
قالت لي الحين اتصل عليه
واتصلت به ورد عليها رغم انه مره ماكان يرد عليا قبلها بدقايق
عاد بعد ربع ساعه رجعت اتصلت اخته باين من صوتها كأنها حزنانه عليا
قالت لي شفتي الكلام اللي قلت لك ان اهلي طلعوه عليك ،، الحين قالوه لزوجك وزوجك زعلان منك
انا ساعتها وربي نزلت دموعي بدون ما ارد عليها ،،، بس قلت لها وانا ابكي ( وكيف يصدق هو ،، وين ثقته فيني )
تذكرت اتفاقه معايا قبل الزواج بإنه مهما سمعنا على بعض كلام مانصدقه لين نشوف بعيوننا
ما اعرف ليه صدق ،، ايش قالوله عشان يصدق رغم انه عارف انه اهله يكرهوني ويدورون لي الزله عشان يطلقوني
لمن شافوني ماشيه سيدا ومافي اخطاء صاروا يألفوا مصايب ويرموها عليا بدون خوف من الله
واللي بكاني انه هو صدقهم هالمره ،،، ليش يصدقهم
حسسني انه معاهم ضدي ،، حسسني اني وحيده وفريسه الكل ينهش من لحمها
انا اعشق زوجي للموت ،، لكنه صغرني قدام اهله لمن صدقهم على حاجه هم عارفين انها ماطلعت مني ابدا ،، صغرني لمن يسمح لهم يدخلوا بيني وبينه ويسمح لهم يفتروا عليا ويطبل لهم كمان
صغرني لمن صارت خصوصياتي ومشاكلي انا وهو على لسان الصغير والكبير
كله هذا بسبب قعدتنا عند اهله اللي قاعدين بس يراقبوني يدوروا غلط مو محصلين
لي حوالي يومين ما اكل زي الناس والولد مايشبع من حليبي بس يبكي ،، افكر بالمصيبه اللي انا فيها واللي اسمها اهل زوجي
زوجي وضعه صعب وعاطل ومايقدر يخرجني بيت لحالي هالفتره واهله شادين الحيل يبغوه يطلقني بأي طريقه ،، كله هذا لأنه وقف معايا ضدهم في كم مشكله صارت اول
بالوقت اللي زوجي كان مطنشني فيها ويعاقبني على فريه ماسويتها كنت ارسل له احبك ومشتاقتلك وايش ناوي تسوي بالأربعين وهو مايرد ،، كنت اقول فيه شيء او مو فاضي يرد او ماعنده رصيد ،، التمست له مليون عذر لكن مافكرت فيه بالسوء زي ماسوى هو ،،
بنات انا احب زوجي واعشقه وما ابغى اخسره رغم انه هو اللي بايعني بالحركه هذه
ايش اسوي انا مخنوقه وابكي وما ابغى بيتي ينخرب عندي ولد ماله ذنب ،، ماتوقعت هذه هديتهم لي بعد طلعتي ،، تخيلت جيه الولد راح تحنن قلوبهم عليا لكن قلوبهم حجر
سبق وقال لي اخويا بالحرف ( ابو زوجك يقول انها عمه زوجك قاعده تسعى لطلاقك بأي طريقه ) كله هذا عشان زوجي دافع عني قدامها
خبرت زوجي بهالكلام ضحك وقال لي ما احد يقدر يفرقنا خصوصا هالإنسانه
بس ايش اقول الحين غير حسبنا الله ونعم الوكيل
اللهم من ارادني بسوء اللهم رد كيده في نحره واشغله في نفسه
انا يوم طلعتي بالصباح قبل ارجع له ناويه اعتمر لله بالحرم
ابغى ادعي ربي يفرجها عليا طول ما انا بطوف وبسعى
ان شاء الله ربي يقرب لي الفرج اللي انتظره
اعرف انه ربي يطالعني بكل وقت ويقول لي ان الله مع الصابرين اذا صبروا
مايصبرني بمصيبتي في زوجي واهله الا ان الله معي لأني مظلومه والله
ادعولي بنات انا في كربه كبيره
اللي مثلي اهل زوجها يحتفلوا فيها وفي ولدها عزايم وذبايح لكن انا من مشكله لمشكله معاهم
ادعوا انه ربي يعمي زوجي عن كلام الأعداء ويسخره لي ويفتحها بوجهه عشان نخرج انا وهو وولدنا ببيت لحالنا قبل ماتحقق عمته هدفها اللي تسعاله واتطلق ،،،،