جميع تساؤلاتك عن شهر العسل

1. تفضلوا .....


2. المطار :


3. تستعملين مرطب خفيف للوجه مرة باليوم


4. اذا طلعت لج حبه شتسوين!!


5. الملابس المستعمله؟

السلام عليكم ورحمة الله وبركاته
وان شاء الله هالموضوع ,,
راح يفيدكم,, جميعاً ,,
,
,
جميع تساؤلاتك عن شهر العسل " !!
اشلونكم بنات
اول شي حبيت افيد كل العرايس بموضوع ان شالله راح يفيدكم وايد
وبجاوب على اغلبيه تساؤلاتكم اللي تخص المرحله اللي بعد العرس وهي شهر العسل
لاني شفت وايد مواضيع تنطرح وفيها وايد اسئله عن هذي المرحله
انا جمعت اكبر قدر من الاسئله وجاوبت عليها
اذا عندكم اي اضافه انا حاضره خصوصا البنات المتزوجات ياليتهم يفيدونا بخبراتهم
اما العرايس اذا عندكم اي استفسار تفضلوا هني انا والمتزوجات بنساعدكم ان شالله
موضوعي قسمته عده اقسام وكل قسم في اسئله عشان تسهل عليكم القراءه

تفضلوا .....

المطار :

• اول شي شنطه السفر ما تكون اكثر من 24 كيلو من بدايه شهر 9 ان شالله
• اذا شنطتج مألوفه حاولي تلصقين عليها شي او تلبسينها حزام عشان تعرفينها ومحد ياخذها بالغلط
• بشنطه السفر لاتحطين فيها مجوهرات او اشياء قيمه - شنطه اليد ما تكون فيها اغراض حاده مثل المقراض او السكين
• شنطه اليد ما تكون فيها اغراض سايله مثل المسكرا او الروج ولو احتجتي ممكن تحطينهم بكيس بلاستك وتحطينهم بشنطه ايدج عادي
• اذا كنتي شايله شنطه كبيره بالطياره لازم ما تزيد عن 15 كيلو
• حاسبي وانتي بالمطار على شنطه ايدج لانهم يترصدون لكم خصوصا وانتوا طالعين من المطار وحاولي تختارين شنطه تنلبس على الكتف وابتعدي عن الشناط اللي تنلبس على الكوع او اللي تنمسك بالكف
• الصندل وانتوا بكرامه يكون مريح لان بعض المطارات تكون وايد كبيره ومتعبه في المشي )صنادل هيش بابيز وماركسبنسر مريحين )
• على البوردينق ممنوع تتكلمين في الجوال ولاتنسين تفصخين النظاره
• في بعض الاحيان يسالونج اساله عشان يعرفون مدى توترج وبهذا يقيسون اذا انتي ارهابيه او لاء فلازم تكونين مستعده لها
• ممكن يطلبون منج فتح شنطه ايدج كوني طبيعيه وواثقه من نفسج عشان ما يبهدلونج ,,,
• ممكن يطلبون انج تفصخين الصندل وتحطينه تحت الجهاز

الشعر: - اشلون اهتم بشعري؟
تغسلين شعرج بالشامبو 3 مرات بالاسبوع
تستعملين البلسم المناسب
ممكن تضطرين تسبحين اكثر من مرة في اليوم بس حاولي ما تغسلين شعرج بالشامبو بس مجرد ماي لان كثره الشامبو تخرب الشعر مثل ما احنا عارفين
شي ثاني حاولي وانتي قاعده قدام التلفزيون مثلا تسوين مساج لفروه راسج بايدج لان مثل ما احنا عارفين العروس بشهر العسل تكون مغطيه شعرها اغلبيه الوقت بالحجاب او الشيله وهاي يسبب تساقط الشعر
بس مع المساج بيخف التساقط لانج تحركين الدورة الدمويه براسج
بعض البنات يفكرون ياخذون حمام زيت معاهم بس انا ما انصح بهذا الشي لان اغلبيه الوقت بالسفر يكون برى البيت ولما ترجعين بتكونين تعبانه يعني يالله يالله تسبحين سبوح عادي وخلاص
اللي شعورهم جافه وخشنه ياليت يستعملون كريم بديل الزيت من بانتين يستعملونه مثل البلسم بس لما يشطفون شعورهم بالماي حاولوا تشطفونه على خفيف

• اشلون استشور شعري وزوجي موجود معاي 24 ساعه بالغرفه؟

طبعا هذا السؤال تساله كل بنت قبل الزواج بس الحل سهل وبسيط
اول شي علمي زوجج انج تسبحين قبله
ثاني شي اخذي كل اغراضج معاج للحمام – وانتوا بكرامه – الملابس الكريمات العطور المكياج
تاخذين بالاول شور وبعدين تجففين جسمج .. اما شعرج تجففينه عن طريق المجفف اللي بالحمام
تلبسين لبس وتتعطرين وتحطين ميكب وتلفين شعرج
وفي الوقت اللي يدخل فيه زوجج للشور تستعملين هذا السشوار
وتقسمين شعرج قسمين او 4 اقسام وتبتدين تستشورينه بس اهم اهم شي استشوري الخصل من قدام
وبتطلعين احلى عروس فعين زوجج لما يطلع من الحمام

• شعر الجسم اشلون اتخلص منه؟

عندج حلين الاول الموس : هو سهل صح بس المشكله ان الشعر بيطلع ثاني يوم وبيكون حاد جدا
الثاني اللي هو المكينه اللي تنزع من الجذور: وهي احسن لان شغلها تقريبا نفس شغل الحلاوة وراح تتخلصين من الشعر لفتره طويله
,
,

• المنطقه الحساسه اشلون اشيل الشعر منها؟

نصيحه لاتستعملين الموس لان الشعر يطلع صج صج حاد بشكل مزعج جدا
استعملي البراون .. بتقولين يعور .. شوفي حاولي كل يومين تمسحين بالمكينه على كل المنطقه + خط البكيني لان الشعر بيكون خفيف اول ما يطلع والالم بعد بيكون خفيف
حاولين تشدين الجلد بيد والمكينه باليد الثانيه

• شعر الوجه؟

استعملي المكينه بعد .. لاتخافين مرة او مرتين ما راح ياثرون على بشره وجهج
البشره:

• الوجه ؟

تاخذين مناديل جونسون او مزيل الميكب السائل اللي تستعملينه عشان تزيلين الميكب

تستعملين مرطب خفيف للوجه مرة باليوم

اذا طلعت لج حبه شتسوين!!

اول ما تقومين الصبح تدخلين الحمام –وانتي بكرامه- وتحطين شوي من معجون الاسنان عليها وتخلين المعجون يجف بهالوقت تفرشين اسنانج وتمشطين شعرج لحد ما ينشف واغسلي ويهج من بعدها ... يوم والا يومين بالكثير وبتجف الحبه
وانصح بهذي المضمضه لانها قويه وتمنع الروايح
بعدين حاولي ما تحطين كريم اساس في الطياره لان في نوعيه من البشرات ما تستحمل الاقلاع وهي مغطيه فبتلاقين ويهج يشب عليج كله حبوب ودمامل ممكن تحطين كحل وغلوس كفايه

• اشلون اعتني ببشره جسمي؟

تغسلين جسمج بالشور جل كل يوم
تستعملين بدي لوشن بدون ريحه مثل جلسوليد او بيبي بدي لوشن وممكن تخلطين مع البدي لوشن شويه زيت لوز بيعطيج نعومه اكثر وشويه عصير ليمون للتبييض لاتخافين ما راح يخترب الكريم
مرتين او 3 مرات بالاسبوع افركي جسمج بالليفه المغربيه بعد ما توزعين شور جل على كامل جسمج بكميه وافره

• منطقه الابط؟

نستعمل ديودرنت خالي من المواد الكيماويه وبنفس الوقت يكون قوي ويمنع رائحه العرق وانصحكم بديودرنت كلينك السائل مب الشمع صج روعه
وانتي تفركين جسمج بالليفه المغربيه ركزي شوي على هذي المنطقه

• المنطقه الحساسه؟

تنغسل جيدا بماي دافي وتنشفينها بفوطه نظيفه
ودايما استعملي كير فري .. لاتلبسين اي اندر وير بدون الكير فري لانه يحفض المنطقه جافه ويحمي المنطقه من انواع الاندر الوير اللي تسبب للمنطقه الحساسيه
وانا انصح بهذا النوع
الملابس:

• ايش الملابس اللي اخذها معاي؟

اخذي معاج 5 اطقم اندر وير
تقريبا 7 قمصان نوم
شنطه يد تناسب لبسج
للصيف :
صندلين مريحين اللي لهم كعب كامل عرفتوه؟
واحد بلون فاتح مثلا الاوف وايت مثلا والثاني بلون اسود
اذا بتلبسين عبايه:
اخذي 3 عبي طقم يكون فيهم شغل خفيف بالوان مختلفه
و 3 بناطلين مريحين تحت العبايه
5 تيشيرتات او بديات
اذا بتفصخين العبايه:
اخذي 3 بناطلين وركبي عليهم 3 قمصان بنفس اللون وانا اقترح
قميص اسود ساده + بنطلون اسود ساده من نفس القماش
قميص اوف وايت ساده + بنطلون اوف وايت ساده من نفس القماش
قميص بلون بيج على رملي شوي + بنطلون بنفس اللون والقماش
حاولي ما تاخذين بديات اخذي قمصان عشان ما تفصل ايدج وظهرج
القمصان استر بوايد
وتركبين عليهم 6 فساتين قصيره بحبل تلاقينهم بالمحلات مثل زارا ومانغو يكونون وساع ما يفصلون جسمج وطوال شوي يعني لحد فوق الركبه بشوي
يعني لكل بنطلون وقميص ساده اخذي فستانين يناسبون
او ممكن تاخذين القمصان الطويله تجي كت بدون اكمام
حاولي تختارين شيفونات او حراير لانها تكون خفيفه وراقيه وبنفس الوقت ما تزيد عليج الوزن
بعدين اخذي شيل ملونه تكون شيفونات وثابته على الراس وبنفس الوقت يكون حجمها اوكي
اخذي 3 شيل تناسب لبسج
للشتاء:
بوت طويل بيج وواحد ثاني اسود + دلاغات
قفازات
مظله
اذا بتلبسين عبايه :
اخذي جاكيت بلون اسود طويل
3 بديات هاي نك شتويه
3 وبناطلين ثقيله جينز او مخمل
اذا بتفصخين العبايه:
جاكيتين واحد بيج والثاني اسود او بني والثاني وردي المهم لون غامق ولون فاتح
4 بديات هاي نك وتكون طويله تقريبا فوق الركبه بشبر
بناطلين تكون شوي قصيره يعني لحد عضمه القدم عشان ما تتوصخ بالمطر والثلج
يكونون بالوان تناسبه الجاكيتات
شالات شتويه ضعيفه تنلف حول الرقبه
شيل ملونه تكون شتويه

• غسيل الملابس؟

ملابسج العاديه ممكن تبعثينها للمغسله بالفندق
الانر وير ما يحتاي تغسلينه دام انج بتلبسين كير فري
بس اذا طولتي واحتجتي تغسلينه .. اغسليه بشويه ماي وصابون وعلقيه داخل الكبت
واذا تنحرجين جيبي تي شيرت ما تبينه وعلقي الملابس داخل التي شيرت المعلق فهمتو؟

• الكوي؟

افضل شي تشترين مكواه البخار تلاقينها بكارفور صغيره وتستعمل للسفر
تقدرين تكوين ملابسج وهي معلقه سهله وايد
وعشان ما تكوين وايد بالسفر حاولي ترتبين ملابسج بالشنطه بطريقه ما تعفس فيها الملابس بسرعه اشلون؟
يعني مثلا البنطلون تطوينه طويه وحدة بس وافرشيه على عرض الشنطه فهمتو اشلون؟
القميص بس طويه وحدة بالطول ..قمصان النوم على حالها افرشيها في الشنطه
بهالشكل الملابس ما راح تتعفس وايد ويسهل عليج الكوي

• اختيار الملابس؟

اشلون اختار ملابسي داخل الشنطه بطريقه سريعه ومن دون ما اخرب واعفس الشنطه؟
هذي يعتمد عليج من بدايه الموضوع يعني قبل السفر واشلون ترتبين شنطتج!
يعني الشنطه اول شي تقسمينها بالعرض لقسمين
وتبتدين تحطين الملابس
اول شي البنطلون وفوقه القميص اللي راح تلبسينه مع هذا البنطلون
بعدين البنطلون الثاني وفوقه القميص اللي راح ينلبس مع هذا البنطلون
وهالشكل تعبين القسمين
اما الشيل او الحجابات تحطينها بالاخير فوق عشان بعدين تختارين منهم بسهوله على كل بدله
اما القطعه اللي تجي بنص الشنطه واللي فيها السحاب عرفتوها؟
هذي تعبين فيها قمصان النوم والاندر وير
عشان لاسمح الله اذا اضطريتي تفتحين الشنطه بالمطار ما تتناثر هذي الملابس !

• الملابس اللي لبستهم وين احطهم؟

اول ما ترجعين من برى وتبدلين ملابسج حاولي تفرشينهم على الكرسي كم ساعه عشان تروح منها ريحه الجسم اذا ما كانت وصخه
بعد كم ساعه طبقيها بنفس الطريقه اللي رتبتيها فيهم داخل الشنطه
يعني البنطلون طويه وحدة بس والقميص طويه وحدة بالطول وحطيهم فوق بعض على احد الرفوف ... افضل رف هو الموجود باعلى الكبت
بهالطريقه لما تدورين على ملابسج مرة ثانيه بتعرفين وينهم بالضبط
وحتى بيساعدج هالترتيب على ترتيب الشنطه مره ثانيه لان الملابس بتكون مطويه وجهازة بس حطيها بالشنطه

• قمصان النوم... ايش اللي ممكن البسهم باول الايام؟

حاولي تاخذين معاج كل الانواع
في البدايه اول 3 ايام لبسي طويل
بعدين حاولي كل مرة تغيرين
مرة قصير ومرة طويل...مرة غامق ومره فاتح...مرة شيفون مرة حرير دانتيل المهم تغيرين
بس المهم حاولي انج بعد اسبوع واحد او 2 بالكثير تلبيسن القصير لانج لو استحيتي من البدايه بتلاقين نفسج طول العمر مستحيه منه

الملابس المستعمله؟

هذي الملابس تحطينها على طول بكيس الاندري حتى لو ما راح تبعثينها لاندري بس حطيها بالكيس ... ولو مثلا كانت عندج ملابس مستعمله واضطريتي تنتقلين من دوله لدوله حطيهم داخل كيس الاندري وبعدين حطيهم بالشنطه علشان اول ما توصلين تبعثينهم لاندري
متفرقات:

• العلب اللي فيها سوائل ؟

هذي العلب لو بتحطيها بالشنطه بتلاقينها تسرب شوي
مثل الشامبو والبلسم
وتخيلي لو انكسرت العلبه داخل الشنطه !! يعني ملابسج كلها راحت
تعرفين الاكياس البلاستك اللي تنحط فيها السندويشات ؟؟
بتلاقين في الجمعيات احجام شوي كبيره هذي تقدرين تعبين فيها اغراضج السايله بدون خوف

• المقراض ,, المبرد ,, الملقط ,, المقص ,, اشلون بحصلهم بسهوله داخل الشنطه؟

طبعا انتوا عرايس وبتشترون مكياج بكميه كبيره
واكيد بيعطونكم شناط الميكب الصغيره كهدايا
اخذي اصغر شنطه موجوده وحطي فيها هذي الاغراض وحطيها في الاكياس الموجوده على اطراف شنطه السفر مع مكينه نزع الشعر وشنطه المكياج

• الحمامات العامه بالمجمعات ؟

طبعا هذي الحمامات الوحده منا تخاف منها لانها عرضه لامراض وخصوصا باول ايام الزواج اجسامنا تلتقط المرض بسرعه
اول شي لازم ترفعين الفلاش بالحمام عشان الماي الموجود يروح ويعطيج ماي جديد ونظيف
بعدين مقعد الحمام هذا اللي فيه اكبر كميه من الميكروبات اشلون استعمله !!
بتلاقين في بعض الجمعيات اوراق خفيفه تنحط على المقعد بالحمام عرفتوها ؟ ممكن تشوفونها ببعض الفنادق موجوده اكيد شفتوها من قبل
ممكن تاخذين كم حبه منهم وتحطينهم بشنطه ايدج وتستعملينهم وقت الحاجه

• ايش احط بشنطه يدي؟

ا ول شي البوك وكل البطاقات
مفتاح الفندق اللي ساكنه فيه وعنوانه احتياط لو ضعتي مثلا او لو ركبتوا تكسي ما يعرف اسم الفندق اللي انتوا فيه
بولو... علوج ... مقراض ...كير فري .... اوراق الحمام وانتوا بكرامه ...فاين عادي ... فاين معطر .. بانادول

• الكير فري ( الكوتكس اليومي ) ؟

حاولي تختارين نوع جيد مافيه عطور ويكون مصنوع من القطن وانا انصح بهذي الماركه
بعدين حاولي تاخذين كميه كبيره تقريبا لكل يوم 3 حبات وانتي احسبي كم يوم راح تقعدين هناك
بس لاتعتمدين على انج بتشترينهم من هناك .. لان في بعض الدول ما تبيع اليومي لانهم اصلا ما يستعملونه
بتكون عندج كميه كبيره من العلب تقريبا لو مسافره شهر راح تلاقين نفسج محتاجه ل خمس علب ... تخيلي شكلهم بالشنطه!!
حاولي تدورين على شنطه صغيره ونظيفه تجمعين فيها كل الكميه
انا استعملت شنطه البارشوت كان عندهم عرض كل علبتين فشنطه بلاستيك
ومن ذاك اليوم استعمل هذي العلبه حتى وانا في البيت لانها تكون احسن من علب الكرتون اول شي ما تدخل فيها حشرات وثاني شي ما ترطب مع السبوح بالحمام

• المكياج .. ايش اخذ معاي؟

اللي بشرتهم جافه ياخذون كريم اساس سائل خفيف مثل ديور
اما اللي بشرتهم دهنيه لازم ياخذون كرم الاساس المضغوط او البودر مع الاسفنجه
روجين واحد بلون وردي والثاني بني بس الدرجات تكون فاتحه
بلاشر مع فرشاه البلاشر
ضل لون وردي فاتح وبني فاتح مع فرشاه
مسكرا... كحل لداخل العين... وكحل لبرى العين مع فرشاه
نصايح عامه :

• قبل كل شي وفوق كل شي الله ... الصلاه يا بنات لاتلهيكم الدنيا والوناسه عن الصلاه ... القران حاولوا لو مرة في الاسبوع تقرون صفحه وحده كفايه اهم