خلطة للشعر المتساقط مكوناتها سهلة جدا

ازيكم يا أحلى فراشات
ملوكة جاءت اليوم ومعها وصفة قديمة جديدة للشعر المتساقط
بتستغربون... كيف قديمة وجديدة في نفس الوقت!!!!
قديمة... لأن الكل سمع عن فوائد الحلبة للشعر
وجديدة لأن هذي الوصفة معدلة من وصفة ثانية قريتها باحد المنتديات والله ماني فاكرة وين شفتها
زبدة الكلام
زميلتي في الدوام ما شاء الله تبارك الرحمن شعرها طويل وناعم كثير
بتقولون هذا هو المطلوب... ويش فيها هالبنت شو مشكلتها ما هي حابة شعرها الطويل الناعم
بقول لكم..... لالالالالالالالالالالالالا
صحيح شعرها ما شاء الله طويل وناعم بس خفيف كثير ويتساقط وبادي يتقصف من أطرافه
المهم شكتلي همها... وجات أختكم ملوكة ودقت الصدر وقالت لها عندي لك الحل
وعطيتها وصفة طويلة عريضة وقلت لها حطيها بشعرك وقولي لي النتائج
للأمانة أنا لما عطيتها الوصفة ما كنت مجربتنها ولكنها مكونة من أشياء طبيعية ويمدحونها للشعر
البنت (مجبر أخاك لا بطل) أخذت مني الوصفة
وراحت البيت وجابت المقادير والمكونات....(وهات يا طبيخ)
قالت لها الشغالة الهندية إلي في بيتهم (ترا أنا كل سوالفي عن الهنود ههه)
قالت لها احنا ما نحط كل هذا
يكفيك انك تحطين كذا وكذا على النار وبعدين تحطينهم على شعرك
(توضيح كذا وكذا = مكونات الخلطة)
(مصدقة عمرها هذي الملوكة انها سيباويه ) ههه
وبعد اسبوعين بدأت تلاحظ الفرق... توقف التساقط معها... ونتيجة توقف التساقط شي طبيعي ان الشعر رايح يغلظ أكثر
وقالت لي النتيجة وفرحت كثير وقلت لازم أحطها للفراشات العسولات إلي بالمنتدى
حتى لو سمعتوا عنها من قبل... على الأقل أكون شاركت بتجربة ولو ما كانت تجربتي الشخصية بس من مصدر موثوق منه
مكونات الخلطة
هاتي ورقة وقلم
سيداتي وسادتي
اختي ربة المنزل
إليكي هذه الوصفة التي سوف توقف تساقط شعرك
سويها لنفسك وعيالك... وأبو الشباب إذا حاب بعد..
(آسفة... دخلت في قناة غلط... برنامج حياتنا اليوم)
نصف كأس من سمن النارجيل إلي علبته خضراء ومرسوم فيها نارجيل مقطوع نصيين (عرفتوه؟؟؟)
إلي ما تحصله بإمكانها تستخدم إي زيت نارجيل ثاني
ونصف كاس حلبة ( لا تقولون وع ع ع ع ع ع ما نروم... ريحته خايسة... ترى إلي يريد الزين يصبر)
وبإمكانك بعد ما تغسلين شعرك تبخرينه أو تعطرينه علشان الريحة تروح
وبس هذي هي المقادير... شفتوا كيف سهلة
حطوا المقادير في النار وحركوهم وبعدين صبوا الخليط بعد ما يبرد في غرشة فاضية
واستخدموه مرتين في الأسبوع
نصيحة لزيادة فعالية امتصاص الزيت... لدكي فروة راسك زين ومشطيه وبعدين حطي الزيت لمدة ساعة
وإلي خايفة إن الحلبة تأثر في شعرها خلها تجرب تحطها في يوم اجازة نهاية الأسبوع مرة واحدة للتجربة
وإذا شفتيه زين حالك... حطيه مرتين بالأسبوع
وسلامتكم