خنجر وأحسه بين الأضلاع لاهو الي ذبحني ولاهو الي قويته أيامي سطرتها بين أيديكم

(((القصة منقولة من صاحبتها في منتدى آخر...أرجو أن تدعوا لها بالذرية الصالحة))
خنجر وأحسه بين الأضلاع ..لاهو الي ذبحني ولاهو الي قويته..
.
.
.
((..بين أيديني رواية ماجدولين للمنفلوطي..كنت منسجمة معها مره .. قطع علي صوت منبه الجوال..كنت حاطته قبل وصول سلطان بربع ساعه..
تركت الرواية على جنب مع اني غطست في بحر كلماتها..قمت أخذت شاور ولبست برمود أبيض وتي شيرت وردي..حطيت مكياج ناعم ..
درت حوالين نفسي وأنا أضحك ..أخر شي تعطرت ورجعت لروايتي الي تركتها ..سمعت صوت الباب تسكر..
أكيد حبيبي.. طلعت للصالة..
وصل بس كان شكله شاحب..مو على عادته..رحت له وضميته لصدري..أكيد العمل كان متعبه ..
همست في أذنه

• هلا حبيبي..وحشتني..

رد بصوت مبحوح ومتقطع..

• هجري دي ل

صوته أرعبني خفت عليه..

• عيونها..وروحها..ايش فيك ..؟!!
• تعبان ياهديل تعبان

ضميته لصدري بقوه وأنا أحس بنبضات صدره ترتفع..
بعد دقايق بعد نفسه عني وناظر عيوني وكأنه يجاوب على سؤال في نفسه..

• والله أحبك

أنا لحظتها تفاجأت بكلامه..وفرحت ..دمعت عيوني

• وانا بعد أموت على ترابك..

.
.
تركته يبدل ثيابه ودخل الغرفه يبي ينام..أنا من نظرته حسيت ان فيه شي..ناظرني دقيقه وبعدها شتت نظره لأماكن ثانيه..
ولأن كان من عادتي اني انومه حتى لو مافيني نوم..انسدحت على الفراش ..وانتظرته ينام..لكن كان شكله متوتر وقلقان..جلس على السرير..قام..راح للتسريحه وأخذ جواله من عليها..
رجع ..جلس..وهو يقلب في جواله..بعد ثواني قفل الجوال..تدرون ايش استنتجت..؟!
انه مايبي يحط عينه في عيني..لا تسألوني كيف عرفت..5سنوات من العشرة ..كيف ما أعرف..؟!!
حبيبي هذا كتاب مفتوح أقرأه بكل لحظه..أتصفح حياته من تصرفاته..
قمت علشان ينام..لأني بهالطريقه راح أحرمه من انه ينام..وهو مو قادر يناظرني..
أول ماتحركت..التفت لي..قمت وطلعت من الغرفة..
ايش تتوقعون يخبي علي..؟!!
وليش مو قادر يصارحني ..لدرجة أنه ما يناظرني..؟!!
قطع تفكيري صوت الرعد..بدأت السماء تمطر..ياه من زمان ما أمطرت الرياض..اللهم اجعله سقيا خير وبركه..
فتحت الشياك وجلست اناظر ماء السماء اذا اختلط بالارض..تبدأ الأرض تضحك..الناس تضحك..الأطفال يضحكون..اه من الأطفال..
يارب لا تحرمني منهم..خمس سنوات وأنا أنتظر ضحكه تهز هالبيت ..أنتظر طفل اشيله 9 شهور بين لحمي ودمي..يشاركني نفسي..نبضاتي..
يعيش هنا عند قلبي..يطلع للدنيا ابوسه..اشمه ..اضمه..يارب..لا تحرمني..
حسيت بشي على كتفي..التفتت لقيت سلطان واقف وراي..
وأول ماناظرته شال عيوني عني وناظر السما..ماقلتلكم مابيبي يحط عينه بعيني..؟!!

• هديل في شي أبي أقوله لك..وما قدرت أنام قبل اقولك..
• خير حبيبي..؟!!

سكت..أخذت ايده وجلسته على الكنبه..
وهزيت رأسي له أشجعه علشان يبدأ كلامه..
لف ايده على خصري وقربني منه حيل ..

• هديل..ماادري كيف بأبدأ كلامي..هديل ..والله ماني قادر..
• حبيبي قول..مهما كان كلامك..أنا زوجتك..وهديل الي تعرفها..ماراح تعاتبك على شي أنت سويته..لأنها واثقه فيك..

كل هذا وهو مايناظرني..
مرت دقيقة صمت ..بعدها مسك ايدي وأخذ نفس عميق وتكلم..(وليت الدنيا وقفت لحظتها وماتكلم)

• هديل ..أنت عارفه أني أنا واياك ما نقدر ننجب..وانا مو معترض على قضاء الله..بالعكس..راضي والحمد لله..

وقبل هالشي..أنت ماتشكين طرفة عين أني أحبك وما أقدر أستغني عنك أبدا..ياهديل أنا ما أتخيل أعيش لحظه من دونك..أرجوك يا هديل ..
أرجوك سامحيني..أرجوك لا تتركيني مهما صار بيننا..أرجوك ياهديل ..
أنا أنقبض قلبي وقتها..كنت حاسه أنه أنتهى الموضوع الي كلمني في قبل فتره أنه يبي يتزوج علي..
نبتت أشواك في حلقي ..ما قدرت أطلع الكلمه القاضيه..كنت أبي أعرف خلاص انتهى كل شي..
طيب ليه أنا الحين مو قادرة أتحرك حتى ماقدرت أرمش من الصدمة ..وأنا الي أعطيته الضوء الأخضر انه يتزوج..
حس فيني..

• هديل..؟!!
• ك م ل
• حبيبتي فيك شي..؟!!

هزيت راسي نافيه..ورجعت ناظرته كنت ابيه يكمل كلامه..
ضغط على ايدي الي كانت بين ايديه وكمل..

• هديل الي اخترتها ماراح تكون أفضل منك في شي..أنا اشترطت على أمي تكون مطلقه أو أرمله..

واليوم كلمتني تقول أنها كلمت أم محمد جارتنا وخطبت بنتها المطلقه..وأكبر منك ب4 سنوات تقريبا..

• خطبتها..؟!!

نزل راسه

• ايه..ويوم الخميس الملكه..

خنجر قاتل انغرس بين ضلوعي بقوه والله حسيت ان الدنيا تدور فيني..شعور جامح شل كياني..
جسمي تصلب ..ماني قادره حتى ارمش..
طيب ليه أنا كذا..أنا الي طلبت منه ..صح..؟!!
بس ماتخيلت بيوم هالشعور ..صح كنت متأكده اني راح احزن..بس مو لهدرجة..
.
.
هديل..توازني ..عيدي حساباتك..من حقه ..من حقه..هديل..هدي اعصابك..
اه كيف تقاسمني فيه وحده ثانيه..كيف بصبر عنه يوم كامل..كيف ..يارب ساعدني..يارب ثبتني..
كان يناظرني بقلق ينتظر ردة فعلي..لكن انصدم لما قلتله..

• مبروك حبيبي..ان شاء الله تسعدك..

وقتها حضني..وهو ينطق بكلمات والله عجزت اسمعها حسيت ان جسمي تعطلت فيه كل خليه..
اه باقي 3 أيام ..3 أيام ..وتشاركني بهالحضن وحده ثانيه..
كنت وقتها أقرب للمغمى علي ..طحت بحضنه زي الميته..كنت أتمنى وقتها أرجع بهالحضن قبل 5 سنوات..لما كنت عروسه محد يشاركني فيه وأتهنى فيه خمس سنوات كمان..
لا أبي أرجع بهالحضن لذيك المراهقه الي تنحصر اهتماماتها على الميك اب واللبس والطلعه..
لا أبي أرجع طفله..
أبي أكون أي شي..إلا أني أكون زوجه زوجها بتشاركها فيه غيرها..اه ياربي والله أكبر مني الالم..ياربي ياحبيبي ساعدني..
والله يارب لو مابتصبرني ما أقدر أتحمل..
.
.
.
للحديث بقية..فاسمعوني..