دنيا كفى الله شرها روايه كامله

مشكورة يا عسل عالبارت ان شاء الله رح اقراه
لي عودة .................... احلى الاوقات

اتمنى تعجبكم ومشكوره ع الرد

قال لا ان شاء الله يروح بس بقول لك شي علشان يكون وضعك عند اهلك حلو قلت وشو قال ابيك توضحين لهم انك مخطوفه انزلي خذي مني بخااخ منوم وحطيه بالغرفه وقبل ماتطلعين بخي شوي علشان ريحته قويه ولاتاخذين عبايه علشان مايشكون انا بعطيك عباية اختي وش رايك..قلت له حلو بس اكيد بتصير مصيبه وبيتصلون على الشرطه ويطيح كل شي فوق راسك يامنصور قال مو مهم من هنا الين يلقونا بنكون متزوجين وخالصين وإذا ملكنا على بعض انا بنفسي ببلغ اهلي وجيت بتكلم الا قالي البخاخ لاتلمسنه بيدك علشان البصمات تكون بصماتي انا ,,قلت طيب انا بروح اشوف اخوي والبيت وادق عليك علشان اخذ منك الأغراض
بعد ماسكرت منه زاد حماسي بأني انحاش شفت وشلون مايبي يورطني مع اهلي حسيت بشي غريب ماقدر اوصفه لكم لأني مادري وشو بالضبط..المهم طلعت ورحت برا لقيت مافي احد البيت كله نايم لأنه كان وقد مدارس وطليت على اخوي ولقيته بسابع نومه انتظرت شوي علشان اتأكد انه نام وان ابوي نايم بعد ودقيت عليه وقلت له انا عند الباب وجا وقال افتحي وفتحت وكان حاط الأغراض بكيس وبسرعه رحت لغرفتي وقلت له خلك عند الباب وشغل السياره
انا بخيت الغرفه ولبست العبايه وطلعت للصاله وبخيت فيها شوي ونزلت تحت وجتني فكره وفتحت الأبواب الرئيسه للمداخل وفتحت انوار المجلس لأن اخوي دايم ينسى الأبواب والأنوار وطلعت ورميت البخاخ في الحوش وخليت باب الشارع مفتوح وطبعاً تركت الجوال في الغرفه ومسحت رقم منصور والمسجات وكل شي...
بعد ماطلعت لفت انتباهي سلم على الجدار وركبت السياره وقلت له بسرعه بعد مابعدنا عن البيت وطبعاً كنا طول الوقت ساكتين انا ماقدر اقولكم قلبي وشلون كان ينبض من الخوف وكنت مره مرتبكه قطعني صوته وهو يقول انا ادري انك خايفه وحاس بكل شي قاعد يصير فيك بس المهم اننا نكون لبعض
فجأه جلست اضحك واتذكر الأكشن اللي سويته وقلت له وجلس يضحك معاي شوي الا السياره وقفت وقلت ليش وقفت قال بنزل اشتري مويه وعصير وشي ناكله اكيد انك جوعانه مثلي
انا اكتفيت بالسكوت وقلت له لا تتاخر دقايق الا هو جاي ورحنا للشقه وكانت عاديه لأنه قال لي بنمشي حالنا فيها لحد مايطلع بطاقة عايله ونروح احسن منها,,,
جلست اقول بيني وبين نفسي كل شي جد اللحين مو لعب انا هربت وبتزوج من دون ر ضى ابوي لكن قطع تفكيري وهو يقول ماودك تفصخين العبايه والنقاب اللي عليك والا ماتبيني اشوفك..قلت له يعني ماشفتني ابد قال الا بس هذيك الشوفه غير وهذي غير قمت انا وفصخت اللي علي وكنت لابسه بنطلون جينز وبلوزه طويله لونها اسود وكنت فاكه شعري وأكتفيت باني احط شوي كحل وبلاش وشوي قلوس علشان ما أغريه هو جلس يناظر وانا طول الوقت كنت منزله راسي كنت خايفه أكثر من أني مستحيه قال لي شوفي انا بتنازل واروح اسوي عشى أنا مارديت عليه وجلست على الكنب وافكر وش راح يصير بالمصيبه هذي كنت مره خايفه شعوري هذيك اللحظه ماينوصف بس عندي امل بأن منصور بيحميني شوي الا اسمعه يناديني ورحت عنده
وكان يقول ساعديني انا طول الوقت ساكته بان علي الخوف وكان يحاول يلطف الجو شوي وينكت ويقول اعرف اسوي نواشف صح هزيت راسي بس ولا تكلمت قال ناكل هنا والا برا عند التلفزيون قلت اللي يريحك قال برا احسن شال الصحن وراح للصاله وقال لي جيبي الخبز واخذت الخبز ولحقته وحط الأكل على الطاوله وراح شغل التلفزيون وجلس قدامي وفتح لي علبة عصير وقال اشربي وأخذت العصير منه وجلست اشرب شوي واحطه على الطاوله مد لي خبزه وكان فيها جبن وقال لي كليها انا طبعا منزله راسي وقلت مابي شي والله ماني مشتهيه ..قال طيب علشاني قلت طيب وجيت بأخذها وعيا قال انا وحط الخبزه بفمي وجلست اشرب عصير اللي استغربته انه ما اكل شي غير زيتون وكان طول الوقت يمد لي وانا اقول لا وقال علشاني خذي هذي الزيتونه انا قلت منصور الله يخليك مابي شي مابي لاتغصبني وقمت وجلست على الكنب ونزلت دموعي لا شعوري وجلست ابكي من قلب وقرب مني وجلس يمسح على راسي ويقول تكفين لا تصيحين انا آسف أدري انه ماله داعي اجلس استخف دمي وانتي بهالحاله بس والله يانوره ودي تضحكين شوي أنا آسف قام وجاب لي منديل ومويه ومسح دموعي وقال نوره تكفين والله دموعك غاليه مابي اشوفها قلت له منصور انا خايفه من ابوي
قال لاتخافين انا معك ولو صار اي شي في كل الأحوال انا خطفتك من البيت قلت طيب يمكن ياخذني بالقوه عن طريق الشرطه قال مافيه شي بياخذني منك الا الموت تكفين خلاص قومي غسلي وجهك واللحين الساعه 4 نامي شوي لحد ماتجي ااساعه8واتصل على الملاك ونروح نملك..وقمت انا ورحت غسلت وجهي فكرت اني اتحمم لكن مامعي منشفه ولا صابون واستحيت اطلب من منصور او اسأله فتوضيت وجلست اصلي وادعي الين اذان الفجر وبعد ماصليت دخل منصور للغرفه وقال تسمحين انام جنبك الليله قلت له خذ راحتك انا بنام هنا كشر وقال وين على الأرض لا لا نامي فوق السرير
واذا متضايقه ابطلع وانام برا قلت لا لاتطلع خلاص انا بنام على السرير واقول بقلبي من وين بيجيني النوم
وجلست افكر المفروض ما انام جنبه الا بعد الملكه لكن وش بيدي خلاص هو بحكم المحرم لي ملكت والا ماملكت....
المهم هو ناداني ورحت وانسدحت واعطيته ظهري ولاقدرت انام جلست اتقلب وكل شوي اقوم لدورة المياه اعزكم الله ..وحتى منصور مانام على الساعه 6 طلع من الغرفه وتفاجأت بأني سمعت صوت باب الشقه تسكر طلعت بسرعه ولقيت منصور مو موجود هنا وقف قلبي وين بيروح هذا وانا هنا لحالي حتى مامعي جوال ولا شي ياربي لايكون بيتركني شوي الا شفته داخل ولا شعوري رحت عنده وقلت وين رحت قال ليش قلت استغربت وخفت بنفس الوقت لانك تركتني لحالي
جلس يضحك ههه لاتخافين ماراح اخليك لازم تتعودين على طلعاتي المفاجاه والصغيره قلت ليش قال بعد مانملك اقولك المهم انتي جهزي نفسك بنسلم الشقه وبنروح اللحين للمكتب قلت اللحين مو تقول الساعه 8 قال ايه يالله يمدينا نوصل لأنه مو بالرياض بالخرج قلت اوكي انا تجهزت وطلعنا وحنا بالطريق وقف عند سوبر ماركت وقال انزلي نزلت معاه وحنا نتمشى قال شوفي وش نفسك فيه قلت والله موبنفسي شي قال مو على كيفك خذي اي شي قلت له انت اختار مالي خلق مارد علي اخذ بسكوت وشوكلاته وشوي عصيرات وركبنا السياره وشغل على اغنيه وقال اهديها لك اسمعيها زين هزيت راسي
بيتك هنا داخل القلب وان ماكفاك القلب لافرش لك العين
انت الهوى وانت دفا الشمس للبيت ياوحشتي دونك لو غبت
تعال وارجع لي ورجع انفاسي بوجودك
تعال وحسسني بغلا ريحة ورودك
كل شي مر فغيابك حتى نور البيت ظلمه
وفرحتي دقت بابك ارتوي منها ولا اظمى
صورتك قدام عيني ما انام الا بحظنها
يالله رد الروح فيني رجع الروح لوطنها
كان مره متحمس مع الأغنيه وكان يمثلها بشكل روعه وانا غصب عني بكيت وبعد ماخلصت طفى المسجل وقال كأني اسمع صوت شهقات بكا مارديت مسك يدي وقال ليش الدموع قلت له اول مره أحس باحد يحبني هالكثر من جد الاغنيه اثرت فيني قال ومن قال اني احبك قلت انت اللي قلت
قال صح بس انا ما احبك انا اعشقك ,,,
ما اقدر اوصف لكم هو وش كثر رومنسي والله انا ما ابالغ كانت رومنسيته فظيعه وكان حنون بشكل ما تتصورونه
المهم وصلنا الساعه 8 وربع ونزلنا وكان مكتب وجلسنا في غرفة الأنتظار وكان فيه غيرنا اثنين اتوقع انهم نفس حالتي انا ومنصور شوي الا دخلوا وبعد ماراحوا دخلنا حنا وكان منصور يكلم صديقه يقول لا تتأخر بعد مادخلنا سلم على الشيخ وجلس الشيخ يسألني يقول وش اسم ولي امرك وايش السبب اللي خلاك تجين هنا مع هذا قلت له لان ابوي رفض زواجي منه ومالقيت غير الطريقه هذي قال طيب طيب بالتوفيق
واعطاني دفتر وقال وقعي وقال لمنصور وقع قال فيه شهود والا لا قال منصور ايه الحين هو بالطريق شوي الا طق الباب وكانوا اثنين الاول كان صديقه والثاني كان أخوه سعود يالله وش المفاجأه اكيد قال لابوي وسالت منصور وقال لا محد يدري الا هو سعود اصغر من منصور باربع سنوات وهو شاب خفيف دم بس الولد مره ضايع نفس حالة منصور قبل المهم وقعوا الشهود واعطانا الشيخ ورقه وكانت هذي الورقه يابداية سعادتي او تعاستي او نهايتي واو بدايتي ماكنت ادري وش راح يصير(والشيخ طبعا يتعامل بالفلوس لأن هيئة الأمر بالمعروف والنهي عن المنكر لو تدري عنه طبعاً انتم عارفين وش راح يصير لأن لازم عقد القران مايتم الا بوجود ولي الأمر)
ولكن وبعد ماطلعنا انا ركبت السياره وكان منصور برا جالس يتكلم معهم شوي الا سعود طل علي من الشباك وقال لي مبروك يامرة اخوي اسمعي ترى منصور يحب النوم الله يعينك عليه,, مسكه منصور وقال يالله وخر
مشينا وسالته الحين وين بنروح قال اللي تبين قلت لا صدق وين بنسكن قال سعد صديقي حجز شقه مره حلوه وبروح اسوي بطاقة العايله علشان نستلمها بعد ماخلص من تصليح البطاقه والله لايوريكم وش كثر تبهذلنا الساعه اللحين وحده والله اني يانوره اسعد مخلوق بهالدنيا اللحين وبس انتي لي ومحد له شغل فيك غيري
قلت له دوم انشالله قال لي شكلك مو فرحانه مثلي قلت الا والله يعلم ربي وش كثر مبسوطه بس خايفه قال الخوف ذا شيليه يالله وصلنا للعماره نزلنا انا وياه وفتح باب الشقه وكان مره حلوه ومرتبه كان فيها مجلس ودورتين مياه وصاله ومطبخ وغرفتين كانت حيل ذوق بس يبغى لها شوي اثاث وانشالله بنكمله انا وانتي
قال تعالي خلينا نرتاح والله اني دايخ وما اشوف ودق صديقه عليه وكان جايب لنا اكل بصراحه انا كنت مره جوعانه المهم اكلنا هو راح ينام وانا جلست اناظر البيت اللي بسكن فيه شغلت التلفزيون وجلست اتفرج ومادريت عن نفس الا وانا بالغرفه اسغربت وطلعت برا وشفت منصور جالس يصلح التلفزيون وسألته وشلون جابني قال شفتك نايمه وشلتك وجبتك الغرفه وكان شكلك مره تعبان ناظرت الساعه وانهبلت لما شفتها ياله وشلون نمت كل هالوقت الساعه كانت 11 ونص المهم قال منصور انا بروح اجيب عشا من لمطعم القريب والا وش رايك نطلع نتعشى برا قلت لا نروح نجيبه ونرجع قال اوكي هو كان شكله ماوده ياخذني معاه بس انا مستحيل اجلس بالبيت لحالي بعد ماتعشينا رحت للغرفه ورتبت ملابس منصور وجا في بالي اني اقول له ابغى اروح للسوق بس قلت مابي اضغط عليه هو من نفسه يقول وقررت اتحمم وبعد ماشفت الشامبو معه واخذته واخذت منشفته ودخلت لدورة المياه وتحممت ولبست البيجامه الثانيه اللي كنت جايبتها احتياط وبعد ماطلعت لقيت منصور بالغرفه وقال لي نعيما قلت الل ينعم عليك قال المفروض مو اللحين تتحممين بعد شوي >>>>>
انا قلبي بدا ينبض اكيد هذا ناوي على شي اليوم قلت له منصور ممكن تطلع برا انا لا حظت انا انصدم بس ماقال شي وطلع ولنا قفلت باب الغرفه على طول وكنت خاايفه مره انه يسوي شي وقلت اطلع عنده واتكلم معه وطلعت ولقيته مو موجود شوي الا هو داخل قلت منصور وين كنت قال كنت برا عند الباب قلت وش تسوي قال كنت ادخن!!

يوه يابسمه كمليها بليز
قريتها اا مأحب اقرى شيء موكامل ماأحب أنتظر
متحمسه ههه
أنتظرك لاتطولين ياعسل

كمليها الله يعافيك روعه
يسلمو

girl saudi
انشالله

قلت ليش برا طيب مو هنا رد علي احترام لك مابي اضايقك بالدخان قلت عادي انشالله اخليك تتركه بس مو كل شوي تطلع قال انشالله فعلا كبر بعيني يحترمني الى هذي الدرجه
قلت منصور ابي اطلب منك طلب وقال آمري قلت ارجوك لا تلمسني التفت علي مندهش ويقول وشلون يعني قلت ارجوك الفتره هذي
<<<< لا تردني قال اوكي وانتم عارفين وش قصدي اكيد قال لي طيب وش رايك بكره الصبح نروح للسوق علشان تشترين اغراض لك قلت اخاف اكلف عليك قال عادي خذي راحتك انتي زوجتي واذا ماصرفت عليك بصرف على مين وقرب مني وطلع من جيبه علبه ومسك يدي وفتح العلبه وكان فيها خاتم ولبسني لخاتم
وقال صحيح يانوره انا ماكان ودي نتزوج بهذي الطريقه لكن كل اللي صار غصب وادري ان كل وحده بمكانك هاللحظه بتكون مبسوطه بفستان ابيض وعرس وناس يباركون لها وطق ورقص ووناسه والكل فرحان علشانك وادري اي واحد بمكاني يتمنى يلبس بشت ويترزز قدام الناس بس ماحس اني بتحسف كثير على هالشي والسبب بوجودك معي وارجوك سامحيني لأني حرمتك من هالفرحه اللي تفرح فيها اي عروس واتمنى ان الله يقدرني واكون عند حسن ظنك واعوظك عن التضحيه اللي سويتيها
قاطعته وقلت له :ومن قال اني مو مبسوطه يكفي يامنصور وجودك معي ويكفي كلامك اللي قلته ويكفيني هاللخاتم ويكفي اني زوجتك جلست ابكي وقرب مني اكثر وضمني وجلس يمسح على راسي ويقول تكفين ما عاد ابي اشوف دموعك انا ضميته بقوه وجلست ابكي اكثر مدري ليش حسيت اني ماودي ابعد عنه
ودي اكون بحضنه دايم حسيت بالراحه حسيت بالحنان وحسيت بالامان فجأه
جواله دق وكان اخوه سعود ومنصور حط على السبيكر وقال سعود والله لو تشوف البلبله اللي صايره في الحاره كان تنهبل,,,
رد منصور ليش وش صاير قال سعود قسم بالله لو تشوف ابوها شلون منهبل كان ترحمه وتدري عاد هو سألنا عنك وقالنا منصور نشوفه يوم وشهر ماندري عنه وقال انا شاك فيه وفي ولد اختي لكن والله لو يكون منصور له دخل بالموضوع اني لأحرمه حياته وجلس يضحك ويكمل والله لو يدري انك مملك اليوم ان ينهبل وشر ايك منصور اقول لأهلي وخل الناس يدرون بكل شي وخصوصا ان السالفه كبرت وصارت فيها شرطه وبلاغ واعلان بجرايد وتحليل بصمات وش قلت اقول لهم؟؟ انا صرخت وقلت لا لحد يدري
قال سعود من وين طلعتي قال منصور ماعليك وش صار بعد قال وبس وانا من رايي انكم تتفقون وتعلنون انكم متزوجين وفيه ورقه تثبت على كذا احسن لكم والله قال منصور اوكي بس اذا صار شي جديد علمني قال اوكي وقفل الخط انا قلت لمنصور الله يخليك لا يدرون قال انتي هدي شوي واسمعيني والله يانونو اذا درو احسن بكره تصير سالفه واكيد بيشكون فيني لأني مختفي وماراح يقدر يسوي شي
احنا متزوجين اسمعي كلامي ياحبيبتي قلت انت رايك كذا قال هو احسن راي حتى سعود يقول كذا وسعد يقول نفس الكلام قلت اوكي بس لايدرون وين حنا قال اكيد مجنونه انتي لويدرون فجر ابوك فينا المهم اني بعطي سعود صوره من العقد وبخليه يوريهم وحتى ماراح اقابله بالبيت لأني ادري سعود تيخ لو يهددونه بيتكلم بقابله برا واعطيه اتفقنا..
قلت اوكي بس لا تتخلى عني قال انتي روحي وعمرك شفتي احد يتخلى عن روحه قرب مني وانا كنت بستسلم له ولكن حسيت انه بيصير شي مو من مصلحتي بعدته ورحت الغرفه وقفلت على نفسي اللحين حطوا نفسكم بمكاني والله ما اكذب عليك تمنيت كل اللي صار حلم بس ارجع لبيت اهلي...كنت خايفه كثير ابوي والله مايفوت السالفه على خير والا اهلي اعمامي وخوالي وش راح يسون صدق اني غبيه ومتهوره ....
حاولت انام ماقدرت سمعت الفجر يأذن قمت وفتحت باب الغرفه وطلعت رحت ابي اشوف منصور ولقيته نايم على الكنب مسكين كان الجو شوي بارد ومن دون غطا رحمته ودخلت الغرفه وغطيته وجلست اتأمل وجهه لأني اول مره اتأمل فيه واناظر ملامحه بدقه كان جذاب والله هالأنسان فظيع قمت قبل لايقوم ويشوفني اناظره وش بيفكني عنه عاد ..
رحت وتوضيت وصليت ودخلت للغرفه ابي انام اتقلب منا ومنا بس مافيه فايده طلعت الشمس وناظرت الساعه الا هي 8 اوف صابني ارق الله يستر قمت ابي اشيك على المطبخ واشوف اذا فيه شي ينوكل اوينشرب للاسف مافيه الا مويه وشاهي وسكر وشوي فصفص ( جايبها سعود لنا ع باله شباب ههه) قلت الشكوى لله حطيت المويه ع النار وصلحت شاهي ودخلت الغرفه على طول مادري وش فيني خايفه من منصور جلست اناظر ملابسه وارتبها زين وياما دخلت وطلعت ورتبت وعدلت بس علشان اضيع وقتي رحت للتسريحه رتبت شكلي شوي حطيت كحل وقلوس وتعطرت وجلس اتخيل واستهبل جتني حاله مادري وشي ويالله شوفوا التمثيل اتخيل اني اقوم منصور للدوام وهو يهاوش صح دوام منصور ما قالي انه يداوم ياويلي وشلون بنعيش لا لا لازم اتكلم معاه بشكل جدي بس اللي سمعته انه يداوم بعد ماطلع من المستشفى ...
ناظرت الساعه الا هي 12 مليت وانا جالسه قلت بروح اتفرج على التلفزيون طلعت ومنصور مازال نايم شغلت التلفزيون وجلست اقلب بالقنوات قام منصور من النوم والتفت علي وقال صباح الخير قلت صباح النور سالني عن الساعه وقلت 12 ونص قال اوه نمت والله مارديت عليه
قال ليش ماقومتيني معك قلت اصلا مانمت
وهو يقوم :وليش مانمتي؟؟؟
انا: بس ماجاني نوم
راح للحمام من دون مايرد وسمعت صوت اأذان وصليت بس الغريبه شفت منصور مايصلي الا على كيفه قلت له منصور ليش ماتصلي قال اوه نسيت ان ابوك مطوع....
انا انصدمت من رده ابدا ماتوقعت يكون رده لي كذا قلت له الصلاة مو للمطوع بس لكل الناس والعهد الذي بيني وبينكم الصلاة فمن تركها فقد كفر...
سكت ولا قال ولا كلمه وسمعته يقول وهو بيطلع انا بروح اجيب غدا وكنت استهبل معك قلت له بروح معك قال وين بروح اجيب شي ناكله 10 دقايق وانا جاي قلت ماقدر اجلس لحالي قال ترى ماينفع كل ماطلعت تروحين معي ابدا ماينفع وسكر الباب وتركني آآآآآآآآآآخ هذي البدايه احسن استاهل وانا داخله للغرفه سمعت صوت الباب ينفتح والله بغيت اموت ركضت للغرفه الا سمعت صوته يقول يالله البسي عبايتك فتحت الباب وناظرته وقلت لا
وهو يتكتف وليش؟؟؟
قلت بس ماله داعي اضايقك قال نوره يالله عاد عن المصاخه والله جالس استهبل طلعت ادخن والا مستحيل اروح شبر الا وانتي معاي ناظرته نظرة عتاب ورحت اخذت العبايه وطلعت قبله وحنا بالسياره قال وش رايك نوقف في مطعم ونتغدا احسن من البيت قلت اللي تشوفه نزلنا لمطعم وجلسنا ناكل انا بيني وبينكم استحي اتثاوب قدامه لأاني خلاص وصلت حدي ابي انام المهم قلت لا افاتحه بموضوع الصلاة والوظيفه
منصور
وهو يناظرني: لبيه..
ودي اقولك شي
منصور: آمري
انا: لازم تصلي كل فرض بوقته..ماقدر اشوفك ماتصلي
قالي انشالله من عيوني
قلت له وعد
قال وعد
قلت له في شي ثاني بعد؟؟
جلس ياكل قال قولي
قلت له انت تشتغل..
رفع راسه وجلس يضحك ههه: الله يقطع بليسك احلفي انك ماتدرين؟؟
انا مستغربه: والله مادري بس سمعت قبل انك توظفت بعد ماطلعت من المستشفى
ههه نوره الحين وشلون ابصرف على نفسي وعليك يعني ابوي بيعطيني والا امي ههه والله انك ضحكتيني!!
انا جلست اضحك على نفسي لاني غبيه وقلت: معليش بس مجرد استفسار
قال: كثري من استفساراتك هذي علشان اضحك كذا
قلت: لا والله تبي اصير عندك نكته هين هذا وجهي ان سألتك مره ثانيه..
قال: ياولي عليك اقسم بالله اني احبك..
انا دورو وجهي اللحين صار صلصه والمشكله جلس يضحك
قلت له وشفيك ليش كل هالضحك قال مبسوط
قلت الله يدوم هالبسطه انشالله قال بوجودك قلت ايه مو لأني نكته عندك..
قال يالله طيب قومي نروح
دفع الحساب وطلعنا وحنا بالسياره
قال اي سوق تبين
قلت مابي شي
قال يالله عاد والله ماعرف الأسواق الزينه اي سوق تبغين ..ودك تجلسين من دون ملابس ترا عادي عندي
قلت لا والله هذا اللي ناقص
قال طيب ودك نروح لصحارى
قلت له اوكي اللي يريحك
نزلنا لصحارى وقلت له بروح لمحل العبايات قال شوفي روحي للي تبين انا هنا جبتك علشان تاخذين كل اللي نفسك فيه قلت اجل تحمل قال اتحمل بس هذا وجههي ان طبتي السوق مره ثانيه قلت انشوف بيني وبينكم انا مستحيل اخذ كل شي ابغاه فشله منه مابعد صرت امون عليه المهم رحت شريت لي عبايه ورحت شريت لي كذا بنطلون مع تي شيرت ودخلت شريت عطور وادوات مكياج ودخلت الصيدليه و أخذت بعض الأشياءالمهمه المهم اخذت كل شي احتاجه ومهم وضروري وقلت له خلاص يالله انا بروح ودي انام منصور قال لا والله طيب متأكده انك خلصتي قلت ايه وشتبي اخذ اكثر من كذا قال طيب تعالي
ياويل حالي هذا دخلني نعومي قال يالله اشتري قلت منصور خلها طلعه ثانيه قال لا تخليني اسوي فضيحه عند العالم يالله تعالي شوفي هذا القميص مره روعه قلت طيب انا واله استحي اطلع برا شف المحل مافيه الا رجال انت ناظرني وقال هذا مقاسك عرفت انه مافي امل يتصرف فشريت بعض الأشياء صدق انا مجبوره والا غيري كل وحده مع امها تعلمها وش تلبس وش تاخذ طاحت عيني على بيجامه مره حلوه وحتى قلت لمنصور مره فضيعه قال طيب شوفي مقاسك الحمدلله لقيت مقاسي بس كان سعرها مره غالي وقلت ماله داعي اكلف عليه وطلبت انه يرجعها لكن سحبها مني وقال اتركي عنك المصاخه... وجلسنا عند الكاشير ولما شفت الحساب بغيت اموت منصور بليز خلني انقص من هالملابس شوي قال نوره تكفين اسكتي توقعو الحساب كان 3000 ريال بس غير اللي خسر في المحلات الثانيه وربي جتني الصيحه طلعت من السوق وانا خلاص متفشله منه يالله وش اقوله اللحين لا ويقول بنروح لسوبر ماركت علشان نتقضى للمطبخ المهم توكلت على الله ودخلنا وتقضينا ولا طلعنا الا الساعه 10 ونص يالله انا خلاص احس اني بدوخ من امس مواصه ماقدر
قلت لمنصور:: الله يخليك خل نروح للشقه ابي انام
قال لا فيه عشى نتعشى ونروح
قلت منصور الله يخليك والله احس اني بدوخ
قال طيب ورحنا للشقه وساعدته في تنزيل الاغراض وسيده للغرفه نمت صحيت الساعه 1 الظهر يالله ماصليت ما صدق نمت كل هالوقت وشفت الاغراض اللي شريتها كانت على الأرض ومرتبه بشكل حلو طلعت لقيت منصور نايم رحت للمطبخ شفت الاغراض مرتبه وكل شي كان يحتاج للتبريد بالثلاجه ياحليلك يامنصور مرتب رحت وصليت وقومت منصور وشفته قام وصلى ورجع ينام قلت مابي ازعجه اكيد مانام الا متأخر المهم اخذت الاغرض وجلست اقوسها علي الحمدلله كل شي طلع اوكي يعني مايحتاج للتبديل والترجيع رتبت ملابسي واغراضي كلها وتحممت احترت مادري وش البس المهم لبست بجامه ساتره شوي ورتبت شعري وشكلي وحاولت اني اما اكشخ مره علشان ماغريه طبعا لاني مازلت خايفه منه وطلعت للمطبخ كنت ابي اسوي غدا حرام مابي اخسره كل يوم مطعم سويت شي خفيف من اللي شريناه مكرونه وبيتزا طبعا هو قام وانا رحت عنده للصاله وشفته اخذ الجوال وفتحه ايه علشان كذ ماحد اتصل عليه ياربي اكيد مصايب صايره شوي الا قال يوه 140 مكالمه من سعود و30من اخوي بدر اوف وش صاير انا تعالو دوروني انقلب وجهي خلاص احس اني اخنقت اتصل منصور على سعود وقال وش صاير سعود جلس يهاوش يقول مقفل الجوال والدنيا مصيبه منصور قال خلص وشو قال انهم طلعو تحليل البصمات وجربوها على كل الناس ولا بقى الا انت وقلت لبدر انك تزوجتها خلاص وبغى ينهار
منصور.. طيب وبعدين
سعود: انت لازم تجي لازم وتجيب معك الورقه انا ماينفع والله ان يقتلني ابوها
منصور: طيب هو درا عن شي
سعود: لا بس لازم يدري
منصور خلاص انا بتصرف يالله مع السلامه
انا جلست اراقب وش راح يصير
شفته يتصل على خويه سعد وقال السالفه وسعد قال خلاص انا باخذ الورقه واتصرف لا تشيلون هم انبسط يالمعرس
منصور: قال الله لا يخلينا منك يالله اجل فمان الله
ناظرني وقال وشفيك منقلب لونك كذ
قلت خايفه
مسك يدي وقال نوره انا معك انا معك انا معك خلاص افهمي انتي مسؤليتي انا لاتخافين
قلت مادري اخاف تتخلى عني ضغط ع يدي وقال اوعدك وعد واعاهدك اني ما تخلى عنك والله والله ان ماحد راح يمسك بشعره وانا موجود خلاص نوره وش تبين اكثر من الوعد وانا اسويه ...
ارتحت وتطمنت شوي وقلت له ماتبي غدا قال الا والله قمت من ريحة الأكل وش مصلحه
مكرونه وبيتزا شي خفيف
قال اهم شي يشبع ورحت انا وجهزت الغدا وتغدينا وبعد العصر قال لي نوره:انا بطلع مشوار صغير وراجع ماراح اتأخر ربع ساعه بس
قلت وين
قال شوي وراجع خلاص لاتصيرين كذا وطلع وحتى ماعطاني فرصه اتكلم قلت اكيد بيروح يدخن كالعاده
ودخلت الغرفه وقفلت على نفسي من الخوف وجلست اتأمل الخاتم اللي اهدانيه منصور ورحت في دوامه من التفكير ياترى وش راح يصير هل انا بستمر معاه والا لا انا بموت والا لا ياربي ساعدني ساعات اقول ليش سويت كذا وساعات اقول لا لاني اشوف تصرفات منصور معي كان واضح عليه شاريني الله يستر بس وشوي الا منصورداخل وسمعته يقول افتحي يالخوافه
جلست اضحك وقلت والله ماتبيني اخاف وانا لحالي قال خلاص هذا جوال وجبته لك تفضلي شكرته ورحت فتحت الجهاز وجلست اقلب فيه وهو كان يتفرج على التلفزيون سألته
منصور وش صار مع اهلي
قال انشالله بكره بروح لبيت اهلي واعطيهم الورقه علشان يورونها ابوك
انا جلست اترجاه انه مايروح
منصور: طيب ليش؟؟
انا: خايفه عليك يمكن اهلك مايرضون ترجع او ابوي يسوي فيك شي او احد يلحقك لحد هنا سو اي شي اما انت لا ماتروح يعني ماتروح
منصور: ههه ياحظي واخيرا في احد يخاف علي ههه ابشري ولا يهمك ماروح يعني ما روح انا كم عندي من نوره
طيب مين بيوصلهم الخبر ويعطيهم الورقه
خلاص بعطيها سعد ويتصرف هو
انا قلت الله يستر
بيني وبينكم حياتي معاه الى الحين عاديه جدا وحتى النقاش بيني وبينه نادر جدا بعد ماتعشينا انا دخلت الغرفه لأني مليت وانا لحالي بعد ما جاء منصور صديقه سعد حاولت انام ماقدرت جلست اقلب بالجوال بغيت اتصل بوحده من صديقاتي لكن خفت وقلت ماله داعي واخاف منصور يزعل والا شي شوي الا اشوف الجوال يدق وكان رقم منصور ورديت وقال اطلعي من الغرفه ترا سعد راح انا قلت له ابنام قال اوكي براحتك
بعد ماسكرت جلست شوي وجاني مسج منه وكان كاتب
(الى متى وانتي كذا ليش الحواجز هذي كلها شوفي انا مابي اناقشك بالموضوع هذا لأني مادري وش راح تكون ردة فعلك لكن اتمنى تحسين فيني انا وانتي تزوجنا خلاص ليش تحرميني من حقي ليه)
يالله انا قلت ماراح يسكت ياربي وش اسوي انا فعلا خايفه اذا صار شي اخاف يرميني بس هو وعدني وحلف لي جلست افكر وقررت اني اتوكل على الله واللي كاتبه ربي بيصير ونمت وصحيت بدري وصلحت الفطور ومر هذا اليوم عادي وماكان يتكلم معي الا فموضوع اهلي وان سعد راح وعطى الورقه اهله وهم عاد بيتصرفون بس تغدينا وكان هذا اليوم الوحيد اللي من عشت مع منصور جدا كئيب كان واضح عليه طفشان ومتضايق والدليل انه يدخن بشراهه دخلت للغرفه وارسلت له منصور اذا ماعليك امر واذا ماعندك مانع عادي توديني للمشغل..
طبعا انا بروح اتعدل كاي زوجه تتزين لزوجها فسمعته يقول يالله انا انتظرك بالسياره طلعت وراه وسألني اي مشغل قلت اي مشغل يمر عليك وقفنا واعطاني فلوس وقال تكفي والا لا قلت انشالله تكفي
قال طيب اذا خلصتي اتصلي علي
سكرت الباب ودخلت وطلبت اني اسوي حمام مغربي وتنظيف وحطيت شوي ميك اب وكان خفيف وناعم وشعري طلبت من الكوافير تقصه قصه حلوه تناسبه وخصوصا انو شعري كان متوسط الطول وطلبت انها ماتاكله بالمقص مرره وبعد ماخلصت ناظرت شكلي وابتسمت ابتسامة رضا عن شكلي وكان جدا ناعم وكيوت وكانت القصه مغيره شوي من شكلي المهم اتصلت بمنصور وطلعت وكنا طول الوقت بالسياره ساكتين وحاول يقطع الصمت وسألني وش سويتي قلت كل شي حلو وانشالله يعجبك دخلنا للبيت وتفاجأت من منظر الصاله اللي كان حيل رومنسي والشموع بكل مكان وريحة البيت جدا روعه ولما دخلت الغرفه شفت الورود منثوره على السرير يالله يامنصور مسكين شكله متعذب المهم جاني مسج منه يقول اطلعي انا جايب جاتو تعالي كلي معي انا غيرت ملابسي وطلعت وهو وقف كان منصدم من نوره اللي طلعت العصر واللي قدامه الحين وجلس يصفر وانا رحت جلست كنت احاول اتغاضى نظراته نظراته كانت حيل تذبحني والله تذبحني ومد لي قطعه وقال تفضلي ياعروس انا بصراحه تفاجات منه كان ساكت وبس يناظر قلت له منصور لا تناظر كذا ترا بدخل للغرفه قال والله كل هالزين ولا تبيني مااناظر مو على كيفك يالله اشربي عصيرك وشوي الا قرب مني ومسك يدي وحضنها تمنيت انه مايبعد يده تمنيت ان هاللحظه تطول
رفعت عيني وقلت::منصور
قال :اوش لا تقولين شي!!
وضمني لصدره انا مادري ليش خنقتني العبره والله بصيح مادري ليش تمسكت فيه بقوه وكاني خايفه يفلت مني وقلت له اخاف يجي اليوم وانحرم فيه من حضنك ضمني اقوى وقال هاليوم ماراح يجي الا اذا روحي طلعت
فتحت عيوني بصعوبه منصور نايم جنبي يالله يعني اللي صار مو حلم قمت بصعوبه احس بتعب توضيت وصليت وقومت منصور وقلت له يالله الساعه 4 العصر وقام من النوم وصلى وصلحت اكل وجلسنا ناكل وبعد ماخلصنا سالني عن جواله قلت مادري وين انت حاطه وقلبنا البيت عليه لحد مالقياناه لاني حاولت اتصل فيه وكان مقفل الظاهر البطاريه مخلصه وبعد دقاايق ابوه كان يتصل عليه استغربت ان منصور جلس يضحك
ههه ابوي مايتصل الا اذا فيه مصيبه والا يبغا يهاوش والا اذا في احد مات
انا استغربت طيب رد عليه
قال شكلها 3 في واحد انا بالبدايه مافهمت وبعد ماحللت 3 في واحد طلع انو فيه مصيبه وانه بيهاوش وفي احد مات الله يستر
حط منصور ع السبيكر وكان ابوه مولع مره
الحين انت ماتستحي على وجهك تسوي كذا؟؟
منصور: للأسف لأ
اصلا انا ماعرفت اربيك يالهايت يالصايع لا وبعد تلعب علينا جايب ورقه تقول متزوج ومالقيت الا البنت هذي الله ياخذ عمرك ماكفاك فضيحتنا يالمدمن جاي اللحي بخطف سودت وجهي اله يسود وجهك..
منصور بطوالة بال: خلصت ؟؟؟
كان واضح على صوته مخنوق: وش تبيني اقول بعد هاه حسبي الله ونعم الوكيل اسمعني من اليوم ورايح لاتوريني وجهك فاهم وانت لا ولدي ولا اعرفك انا متبري منك
طاخ
منصور واضح عليه انه متعود على هالكلام فقال لا تشيلين هم ابوي كذا دايم
انا كنت مره متضايقه الحين هذا ابوك اللي متعود على سوالفك وشلون عني انا ابوي وش بيسوي ابوك كان منصدم وشلون ابوي قال لا تشيلين هم ابتصل بسعود وبقوله وش صار اذا ابوك شاف الورقه والا لأ
سعود: نعم
منصور: الله ينعم عليك ابسالك وش صار على ....شاف الورقه والا لأ
سعود: ايه شافها
منصور: وليش ماقلت لي وانا موصيك
سعود: دقيت ولقيت الجوال مقفل!!
منصور: ايه ماكان فيه بطاريه الا علمني وش صار؟؟؟؟؟؟
انا حطيت يدي على قلبي من الخوف قلت اكيد ته جلطه او مات
سعود: ابدا كم سبه جت لأبوي ولك وكم تهديد بس
منصور معصب: سعيدان تكلم زين عطني بالتفصيل
سعود: طيب ابوي راح وحط الورقه من تحت الباب وشوي الا شفنا ابوها عند بيتنا ومسك ابوي وقال له بلغ ولدك اللي ما عرفت تربيه اني انا بربيه وخله يقول للي معاه قصده حبيبتك انه متبري منها وراح بس..
منصور: بس هذا اللي صار
سعود: اييه بس والله ان شكله ينرحم مسكين كان منصدم والله اني رحمته
منصور: طيب ان صار شي جديد علمني
سعود: وانا مرسال عندك خلاص كلم بدر انا ابوي طردني
منصور: يالله باي
منصور يناظرني:نوري عادي كلنا في الهوى سوى لازم نتعود على العيشه من دون اهل..
انا الكلمه مو قادره تطلع مني من الصدمه: ابوي تبرأ مني!!!!!!!!!!ح
منصور: اسمعيني يانوره من اليوم ورايح أنا أبوك وأنا أمك وانا اخوك واختك وصديقك وحبيبك وزوجك واهلك كلهم وانت اهلي وناسي خلاص انسي اهلك وكل شي راح انسيه فكري في حياتنا
طول الوقت وانا ساكته صعبه على الانسان يعيش بدون اهل انا حياتي صارت محكومه علي بالوحده حتى منصور مهما سوى مايقدر يعوضني عن امي عن اخواني لكن هذي الدنيا وهذي انا ولازم اصبر لأني انا اللي اخترت هالحياة بأقتناعي

ياجروحي مابقى لي من عنى وقتي طريقه 000غير جرح يحتضني في دهاليز القصيد
وين ربعي وين ناسي آه من همي ما اطيقه000 جار وقتي وين صبري خايف صبري يزيد
آه منكم اه منهم آه مني كل طعناتي عميقه000 راح عمري بين همي مالقى قلبي عضيد
مر شهر على زواجي من منصور أبوي ساكت والى الآن ماشفت منه اي شي لا إيجابي أو سلبي 00الشهر هذا كان احلى شهر بحياتي كلها والله كنت مره مبسوطه منصور صدق لما قال انه بيعوضني عن كل شي فعلا كان لي الأب والأم والأهل كلهم عوضني عن كل شي
الحين باقي اسبوع وتنتهي اجازته وانا اعد الساعات لأني اخاف اجلس لحالي جتني عقده من اللي صار لي قبل مع ولد عمتي لازم اتعود
منصور الحين مكان دوامك قريب من البيت ؟؟
منصور: يعني تقدرين تقولين قريب ربع ساعه بس
سكت شوي بعدين قال: الا نسيت اقولك سعد صديقي بيتزوج,,
انا: ياحليله متى ؟
منصور: يوم الخميس الجاي
انا: الله يوفقه طيب من بياخذ؟؟
منصور: بيتزوج بنت خالته مسكين ما اخذ حبيبته..
انا: ومن هي حبيبته ؟؟
منصور: بنت جيرانهم!!!
انا: صدق والله وليش طيب ماتزوجها؟؟
منصور: ابوها رفض!!
وانا ارمي عليه المخده: بلا استهبال
منصور: ههه انا وانتي مافيه مثل قصتنا...
انا: بس فيه احسن منها..
منصور: مايهم مدام انا وانتي صرنا لبعض..على فكره ترى سعد بيسكن هنا في العماره اللي حنا فيها..
انا: زين تصدق والله اني مليت ودي اتعرف على الجيران والغريبه انه مافيه احد جا يتعرف علي وانا توني ساكنه
منصور: عادي تجي زوجة سعد وتعرفي عليها
سكتنا شوي.......
منصور: حياتي انا بروح انام الساعه 4 الحين
وهو يقوم لاتسهرين كثير نامي
قلت له اوكي بس يخلص الفيلم واجي انام
,,,,,,
صحينا على صوت الجوال وكان المتصل بدر اخو منصور وقبل ما قول وش كان عنده لازم اعرفكم على اخوانه..
بدر هو الكبير وعمره 31 وماتزوج لما سالت منصور ليش قال انه مايبغى يتزوج طول عمره من دون سبب كان ملتزم واخلاقه عاليه جدا وهادئ عكس اخوانه كلهم..
وبعد بدر كان منصور وانا عرفتكم بمنصور طبعا
فاطمه عمرها27 اصغر من منصور ومتزوجه وعنده بنتين
وبعدها يجي سعود وبعد سعود
أماني وعمرها 24 ومنصور ماكان يحبها يقول شايفه نفسها مره
وبعده ناصر 20 سنه
وابرار واسرار توأم وعمرهم 17 سنه
واخر العنقود زيادوعمره 12 سنه
بدر اتصل علشان يبلغ منصور ان اماني تملكت وزواجها بعد شهرين..
بعد ماانتهت المكامه منصور كانه تضايق شوي
وشفيك؟؟
منصور: مادري بس حز في خاطر اختي تنخطب وتتزوج وانا اخر من يعلم..
انا قربت منه ومسكت يده وقلت له لا تشيل هم عادي هذا حنا تزوجنا ولا عبرنا احد!!
منصور: على قولتك ......
....مرت الأيام وتزوج سعد ومنصور بدا يروح لدوامه وكانت ايامنا حلوه احيانا احسد نفسي لني تزوجت منصور الين جاء اليوم فاجاني منصور وقال لي
منصور: نوره ابي اكلمك بموضوع ضروري وبدون ماتسأليني ليش؟؟
انا قلت له: اوكي
منصور: الحين لنا تقريبا شهرين وزياده متزوجين والى الآن ماحملتي والحمدلله انه ماصار حمل الحين وبكره الصباح نروح انا وانتي لدكتوره علشان تصرف لك حبوب منع للحمل فتره لحد ماتتحسن اوضاعنا وبعدين اتركيها لأني بصراحه مابي ابتلش ببزران الحين..
انا انصدمت من كلامه وقلت: وش فيها اوضاعنا الحمدالله كل شي تمام ؟؟؟
منصور: نوره انا قلت لأتسأليني ليش انا قلت اللي عندي مو علشان تناقشيني لأ علشان اعطيك خبر بس
انا: علشان تعطيني خبر بس!!!وليه ما اناقشك اتوقع انه من حقي وليش تبي تحرمني من الأطفال لا يامنصور انا ماحب ارفض لك طلب لكن هذا انا آسفه..
وقمت ودخلت الغرفه مابي اسمع جوابه مابي اسمع شي اول مره واحد يقول لزوجته مابي عيال ..
فتح الباب بأقوى ماعنه وقرب مني وكان معصب مره: اسمعي انا ماطلبتك علشان تقولين انا آسفه هذا اول شي ثاني شي اذا قلت شي يتنفذ اذا مو بالطيب بالقوه شوفي انتي عايشه مع منصور الطيب والحنون واللي يحبك للموت لكن اذا انقلب كياني صدقيني بتكرهين الساعه اللي عرفتيني فيها لا تخليني ازعل منك لاني اذ زعلت ما اشوف غير الشر وان دريت انك ماتاكلين الحبوب اقسم باللي رفع سبع وطمن سبع انك ماراح تشوفين شي طيب واتعبريه تهديد وبكره الصبح بستأذن من الدوام على الساعه10 ونروح ولا عاد تكلميني بالموضوع..
قال كلامه وطلع وهذي اول مره اشوف منصور يتكلم معي بالاسلوب هذا جلست ابكي من الحرقه اللي بقلبي مايبي عيال ويهددني ليش كل هذا وش صاير حرام عليك يامنصور انا يكفي ان ماعندي اهل وبعد تبي تحرمني من الاطفال
قومني الصباح ولبست عبايتي وطلعت وبدون ما اقول اي شي وطول الطريق وحنا ساكتين دخلت على الدكتوره وبما اني ما حملت اعطتني نوع معين من الحبوب وقالت اذ حسيتي بأي شي تعالي وسألتها اذا انا فيه احتمال احمل وانا اكل الحبوب لأني سمعت كثير يحملون وهم يستخدمونها قالت لي طبعا كل شي بيد ربك واذ حملتي لا تعترضين على حكمته....وطلعت ولما وصلت البيت جاني منصور وقالي انا آسف على الكلام اللي قلته بس انتي استفزيتيني باسلوبك
انا::::لايوجد رد
منصور: قولي اي شي بس لا تسكتين!!
انا جلست اناظره وقلت: ممكن سؤال؟؟؟
منصور: اسألي!!
ابي اعرف ليش ماتبي عيال
منصور: فتره بس وما عندي اسباب لكن حاليا مابي اطفال نهائي
انا: طيب براحتك بس انا بقولك شي للمعلومه فقط..ترى الحبوب مو دايم تمنع الحمل كثير ياكلون حبوب ويتفاجاون بالحمل واذا مو مصدق رح بنفسك واسال الدكتوره وانا باكل الحبوب وبمشي عليها لن هذي رغبتك لكن ان صار الحمل لا تجي وتناقشني...
ورحت للمطبخ اصلح الغداء ,,,
مرت الأيام وانا ومنصور مانحتك في بعض كثير هو يرجع من الدوام ينام ولما يصحى انا انام ماكنت اجلس معاه كثير وكان هو بنفسه يجي ويعطيني الحبوب كان شاك باني اتركها او اني اسكته لكن هو ماتفوته هالشياء انا بديت اتقبل الموضوع او احاول اني اتقبله لأن مالي غيره ولازم ارضيه بأي وسيله فقررت انسى موضوع الحبوب والحمل واعيش حياتي واللي كاتبه ربي بيصير
وانا بصراحه مليت من الوحده ما اتكلم ولا اسولف الا مع منصور حتى صديقاتي منصور رفض اني اكلمهم جاب لي جهاز لابتوب علشان اسلي نفس فيه واضيع وقتي واللي صار انه 24 ساعه مع منصور قال لي تعرفي على زوجة سعد
قلت له استحي والله ماله داعي..
منصور: هي توها عروس والمفروض انتي تروحين وتسلمين عليها
انا ماعجبتني الفكره بس قلت عطني رقمها من سعد زوجها وانا بكلمها واشوف
اليوم منصور مادري شفيه من جاء من الدوام وهو طفشان ومعصب ولما سالته قال الشغل متعبه بس لا اللي فيه اكبر من الشغل اول مره احس ان منصور متضايق كذا ..حاولت الطف الجو شوي معاه علشان يروق واعطاني رقم زوجة سعد 0000
بعد فتره كلمتها وعرفتها بنفسي وقلت لها اذا فضيتي اتصلي علي علشان اجي ازورك او تعالي عندي اذ تبغين..
وزرتها وكانت مره حبوبه واسمها منال..
سالتني عن اهلي وقلت لها انهم ساكنين بالدمام وماعرف احد غير منصور تزوجته وجيت معاه للرياض
تكلمنا في مواضيع كثيره واستاذنت منها
انا قلت لها كذا لأني انا ومنصور متفقين على كذا وسعد نفس الشي كان متفق مع منصور
طبعا منصور قالي قبل ماتطلعين اتصلي علي علشان اوقف لك عن باب الشقه ,,انا قلت ماله داعي اتصل يمكن نايم ولا ابي ازعجه ومعي مفتاح.. ..
انا دخلت البيت ناظرت الصاله منصور ماكان موجود وانا بطريقي للغرفه كنت اسمعه يتكلم..
منصور: انتي ماتفهمين,,خلاص اللي بينا انتهى,,طيب,,وش اللي تبغينه,,طيب قوليه بالتليفون,,اوكي لكن بعد مانتقابل هالمره انسي تقولين مره ثانيه وينك والا تعال
طيب طيب ,,لا ماقدر احدد لك اي يوم لاني مشغول مره ,,ليش مستعجله
خلاص انا بشوف بعد يومين اذا كنت فاضي ,,انتي لا تتصلين ابدا وياويلك ان شفت رقمك والا والا بهون
طيب لا تصيرين عله اعطيك خبر انا
وحتى انا اغليك لكن خلاص احنا اتفقنا على كل شي
اوكي
يالله مع السلامه,,
انصدمت بوقتها كني انعميت وكل قطرة دم بعروقي نشفت
وانهدم قدام عيني مابنيت والظنون الطيبه بلحظه اختفت
آآآآآآآآآآآآآآآآآه معقوله منصور يسوي كذا يخوني يخوني انا تخيلو بس لو وحده بمكاني وبالهموقف وش راح تسون قولوا لي ,,انا تمنيت اني مت ولا سمعت الكلام هذا تمنيت اني ماجيت تمنيت اني اتصلت عليه بس علشان ماسمع اللي سمعته
طلع من الغرفه وانا واقفه بمكاني والله رجولي مو قادره تتحرك من الصدمه حطيت عيني بعينه ابيه يدري اني سمعته وبنفس الوقت هو كان منصدم من وجودي سالني متى جيتي؟؟
قبل شوي..
وهو يقرب مني ليش ما تصلتي؟؟
خفت انك نايم ولا حبيت ازعجك..
ابي امشي ابي ادخل للغرفه ابي اصرخ ماقدرت والله ماقدرت
منصور: وشفيك ؟؟
انا مازلت واقفه واناظره..
منصور بدأ يرتبك فهم اني سمعته وقال انبسطتي عند زوجة سعد.؟؟
مشيت للغرفه وبدون ما ارد عليه ابي اتكلم ابي اصيح ابي اصرخ ابي اسوي اي شي اطلع القهر اللي جواي ماقدرت والله ماقدرت فسخت عبايتي وانسدحت بالملابس اللي علي منصور مازال برا
آآآآآآآه من جور الأأيام وعودك كانت كلام
وهم في وهم وظلام صحيت من احلى منام
هانت الايام وهانت عشرتي وآآآآآآآآه
من اعز الناس سالت دمعتي
جلست ابكي من قلب احس بقهر احس بجرح مافيه احد اقدر اشكي له مافيه يارب انت الوحيد اللي تدري باللي فيني انا استاهل هذي نتيجة اللي سويته
منصور دخل وجلس جنبي وقال نوره لاتصيحين
نوره علشاني مابي اشوف دموعك..
انا:اوص
منصور: تكفين اسمعيني؟؟
انا: سمعتك والله سمعتك,,انا وش قصرت فيه علمني ليش تخوني ليش
قمت وجلست قلت له علشان مالي أحد الجأله بالدنيا تسوي فيني كذا؟؟
قرب مني يبي يحضني بعدته وقلت لاتلمسني
منصور: نوره ارجوك انتي فاهمه غل.....ز
بس لا تقول ولا شي تبي تقابلها وهي غاليه عليك وافهم غلط منصور صارحني اذا انا مقصره في شي وتروح تدوره عند غيري قل لي اذا فيني نقص ولاقيه عندها قل لي بس تقول اني فاهمه غلط لأ انا عندي عقل انا انسانه احس والا ماتعرف معنى الأحساس ..انحرمت من الناس واهلي علشانك لأني احبك حرمتني من الأطفال والحين حرمتني منك قل لي وين بروح لا تناظرني كذا قل لي وش بتسوي لو تدري اني اكلم واحد علمني ؟؟
منصور:00000000!!!ك
انا بديت اهدا:اكيد ماراح ترد لأنك ماتعرف شمعنى الخيانه00000
انا سكت ولا تكلمت وهو كان ساكت لحد ماقال تتوقعين اني بفكر بوحده ثانيه وانتي معي؟؟
التفت عليه:وانا معك تروح تقابلها؟؟
منصور: انا اسكتها لاني لو ماقلت لها كذا بتزعجني
انا: اها زين علمتني
منصور يصرخ:لاتجلسين تتريقين انا وانتي اتفقنا نفتح صفحه جديده وانا غيرت رقمي وكل شي كنت اسويه قبل مانتزوج تركته بعد ماتزوجنا..
انا: طيب وش الهدف من هالكلام وشلون جابت رقمك؟؟
منصور:مادري عنها وشلون جابته بس انا مستحيل اقابلها ..
انا: جالس تبرر موقفك ولا تدري ان الخيانه خيانه اسمعني هي غاليه عليك واذا تبي تقابلها قابلها وتقدر تقابلها من وراي بس تاكد اني انجرحت منك مهما حاولت تقنعني وفوق هذا انصدمت منك وين حبك اللي تقوله وين راح لو تحبني صددق ماتفكر مجرد تفكير تتكلم مع وحده غيري لكن حسافه انا ماقدر قاطعني...
نوره لاتصيرين كذا ..
قلت له طيب ماراح اصير كذا وعطيته ظهري..
بطل تستاهل وسام تنام وغيرك ماينام
بارع برمي السهام والمكر عندك غرام
ما اقوى بأسك وانت لاهي وماتحس
فاقد الأحساس لايمكن يحس..
ابي اشوف ردودكم....انشالله عجبتكم
واذا فيه أي توجيه وجهوني وبصراحه ,,,,,,,,

مشكوره بسمه على البارت الجديد
ننتظر الباقي على احر من الجمر