راح خطب غيرها وتركها بعد ما انتظرته ومشى فيها العمر

السلام عليكم ورحمه الله وبركاتة
كنتي تتمنين واحد او مرتبطة بواحد والناس عرفتكم انكم تبون بعض , وانتظرتي يوم يجي يخطبك
وفجأه جاك خبر انه راح يخطب او خطب غيرك
أو
جاء رد من اهله انهم خلاص ما يبونك بعد ما مسكك مده طويلة ومشى فيك العمر
^ من هذا الباب اقول لكم قصة أختي ^
كل القريبين مننا تقريبآ كانوا عارفين انه اختي لها الولد والولد ذا لأختي << يعني محد يتجرأ يخطب اختي من اهلنا دامهم عارفين أنهم لبعض
"وفي يوم من باب السوالف امه تقول لأمي كلام , معناه انه خلاص تروح أختي لنصيبها "
بكل بساطة ماعاد يبونها .. بعد ما عمرها قرب الثلاثين
امي صارت زي الي يصدق ويكذب
صدمة صدمة صدمة
حتى جانا خبر في يوم من الأيام يعزمونا لملكه الولد على بنت من قرايبنا
استحالة اقدر اشرح لكم حالتنا وقتها
بس لازم نضغط على حالنا ونروح
عشان كلام الناس وعشان لا تقول ما فرحنا لولدها وعشان وعشان
اسباب كثيرة ..و من الداخل ألم
وفعلآ رحنا الملكة وبعدها صار الزواج ورحنا حفلة الزواج
(( ومشت السنوات واختي باقي ما تزوجت ))
تعرفون معناة بنت وصل عمرها الثلاثين ولا زواج ولا وظيفة ومحد بيخطبها من اهلنا لانهم عرفوا انهم كانوا لبعض
بالرغم ماصار بينها وبينه شئ .. بس ما يبونها لمجرد انها المفروض له وهو الي تركها ومالها ذنب
شعور اتمنى من الله ما عاد اشوفة على نفسي ولاتشوفة اي وحده منكم عليها ولا على وحده من اخواتها

• *

وبفضل الله سبحانه جاء الفرج
بعد سنوات جاء الفرج
يا الله لك الحمد يا الله
اختي جاها نصيبها الحمد لله
وتزوجت ماشاء الله
اما هالولد الي تزوج غيرها ماجه عيال الى اليوم
سمعت ان زوجته سقطت جنينها قبل مده
بس الله كريم يعطيه عيال ان شاء الله
ما نبي لهم الحرمان من العيال حتى لو كان صار الي صار منهم
اللهم لك الحمد حتى ترضا ولك الحمد اذا رضيت ولك الحمد بعد الرضا ولك الحمد على كل حال
ادري طولت عليكم
بس عشان اذكركم واذكر نفسي بإن لله حكمة من تاخر زواجنا
" وَعَسَى أَنْ تَكْرَهُوا شَيْئاً وَهُوَ خَيْرٌ لَكُمْ وَعَسَى أَنْ تُحِبُّوا شَيْئاً وَهُوَ شَرٌّ لَكُمْ وَاللَّهُ يَعْلَمُ وَأَنْتُمْ لا تَعْلَمُونَ "
وعشان اعطي حالي و اعطيكم لو بصيص امل
لانه انا مثلكم يا اخواتي اتمنى يجي نصيبي وأتزوج بالزوج الصالح
~
اللهم زوّجني الزوج الصالح وجميع اخواتي في منتدى الفراشة بالأزواج الصالحين. اللهم آمين
اللهم انت القائل وقولك الحق
" ادْعُونِي أَسْتَجِبْ لَكُمْ "
آللهم انا دعوناك كما امرتنا
فأستجب لنا كما وعدتنا
وصلى الله على نبينا محمد وعلى اله وصحبة وسلم