رواية بيتنا الطين لمبدعة غيوم الشوق مميزة جدا

بيتنا الطين
غيوم الشوق
\
اعرفكم على نفسي .. انا نوره او.. مثل ما اهلي ينادوني النوري ....
ياربي وش اقول عن نفسي ام... بعلمكم مثلا انا بنت أحب امشي بالشارع
حافية ما البس انعول وانتو بكرامه الا وقت العيد عشان كل شي جديد طبعا يوم كنت بزر يعني مو الحين :(
واحب بعد العب بالرمل كان قدام بيتنا حوش كبير وبجنبه كوم رمل هذا مكاني المفضل من يروح ابوي العصر للدوام وانا راميه كتبي وجايه فوق كوم هالرمل وتعالوا عاد شوفوا بزران حارتنا اذا التموا منهم الأصدقاء ومنهم الأعداء كل خططنا على كوم
ه الرمل ويما شهد هجري الكوم زعلنا وفرحنا عشنا فيه اجمل لحظاتنا......
....: النوري تعالي تغدي
اكيد سمعتوا الصوت المزعج هذا وحبيتوا تعرفون من الي صوتها واصل لأخر الحاره تبون تعرفون هذي اللزقه اختي منور او مثل ما اناديها انا منير يعني اختي الي اصغر مني بسنه منيرة اقولكم سلمكم الله ليش سميتها لزقه هذي دايم ناشبة بحلقي اذا رحت لبنات جيرانا او بنات قرايبنا الا تنط بحلقي وتبي تروح اقولها اختاري وين تبين تروحين اذا قالت بروح لجيرانا عيال مزنه قلت خلاص بروح لبنات عمتي صيته يعني انا وياها أطقاق مع العلم لا انا ولا اهي نقدر نستغني عن بعض بس مدري ليش اتوقع لانها اصغر مني ويمكن غرت منها يوم جابتها امي مع اني ما اتذكر بالضبط متى امي جابتها ههه
خلوكم من خرابيطي .......
بيتنا الطين آآآآآآآآآآآه ومن بيتنا الطين وش بقول وش بخلي ذكريات حلوه وبنفس الوقت ذكريات تبكي تسئلوني ليش تبكي لأنها صارت ذكرى يعني مراح اقدر اعيشها مره ثانية راح الطهر الي فيها راحت البراءه مافيها خوف من المستقبل حياه حلوه هذا الي اقدر اقوله يعني يا نوره خلاص أنتي كبرتي صرتي كل خطوة تخطينها محسوبة عليك ..
طبعا ما يحتاج نتأخر على المدرسة لأنا نام من المغرب بسبب الفرفرة في الشوارع
شفتوا كيف حنا حلوين لا دش ولا خرابيط بس القناه الأولى وتعالوا شوفوا بس الرسوم المتحركة وقت العصر يعني لا سبيس تون ولا ام بي سي ثري اربع وعشرين ساعه الي عيالنا متنحين عندها أول كان مسلسل النمر الوردي وش حليلة هو مخدته الي دايم يشيلها ويبي ينام ويجيب النوم لنا ولا توم وجيري أو على قولتنا الفار و القطو متى عرفنا توم وجيري يناس ياهوه اشتقت لزمنا الأول بدون تصنع بدون زيف زمن حلو مافيه لا برستيج ولا غيره ابي بيتنا الطين لالا ماعلي ابيه بتقولون وش ذا المرجوجه وش اسوي كل ما اتذكر ذكرياتي ابكي وتجيني هالحاله وكل اهل البيت يضحكون علي ويئسو مني لكن خلوكم مني وتعالوا اكلمكم عن بيتنا الطين شوفوا طبعا انا ما سكنت بيت طين لكن بعلمكم وش شكل بيتنا الطين هذا بيت جدي الأول بانيه بنفسه كل لبنه فيه وكل ذرة من طينه وترابه لمسها بيده الله يرحمه ولد فيه ابوي وتزوج فيه بعد لكن يقال عنهم تطورا شوي بنو في الأرض إلي جنبه بيت شعبي قديم تدرون كم غرفة بقولكم كم طبعا المجلس والمقلط هذا شي لابد منه في كل بيت رجل عربي قبل يكون سعودي يوه مشكلتي الوصف ما اعرف اوصف زين لا تعصبون الله يهديكم ركزو معي وراح تفهمون فيه غرفه بالمزرعه أي مزرعه كنا ساكنين بمزرعه صح مو مزرعه كبيرة بس انا احب اذا تذكرت بيتنا اقول مزرعتنا كان فيها ست نخلات كبار وسدرة وشجرة عنب يآآآآآه وش ذكرياتي مع هالشجره خلوني شوي بعلمكم بوصف بيتنا وبعدين ذكروني اقولكم سالفة شجرة العنب المهم هذا الحوش او المزرعه الي فيها ست نخلات وسدرة وشجرة عنب وصندقة صغيرة فيها ارانب زين...
دايم انا ومنور طقاق انا كل الأرانب البيض حقتي عيونها زهر والله ما اكذب عليكم عيونها زهر سبحان الله ومنور تاخذ البنيه وهي تصيح تبي البيض لكن من عليه انا النوري اخذ حقي وحق جد جدي بعد المهم وفي الحوش غير الصندقه غرفة سواقنا ابراهيم هذا شايب سلمكم الله هندي وش حليلة مسلم ويحبنا وله سوالف كثيرة مع جدي راح تتعرفون عليها بقصتي وبعد مخزن هذا المخزن صغير يحطون فيه الرز والطحين وثلاجة التمر وجنب المخزن غرفة جدتي تحب تكون في الحوش وتحط بعد قدامها سرير كبير حقها تنام عليه هي وجدي في البراد ما يحبون هوا المكيف وجنب غرفة جدتي عاد المقلط والمجلس الحين هذا التفصيل الدقيقة للحوش نجي للتفصيل لبيتنا من داخل اول غرفة هي غرفة امي وابوي بابها من حديد تقولون ليش لأنا دايم من كثر ما نطق عل امي وترفض تفتح لنا خربنا باب الخشب وصار باب حديد يبون الفكه من شرنا والغرفة الي بعدها غرفة التلفزيون الي نجتمع فيها وبعدين تجي غرفتنا العيال مع البنات وتعالوا شوفوا الطقاق شلون طبعا مافيه شي اسمه سرير كان بس دواشق اذا تعرفونها اذا ما عرفتوها طقوا انتر ههه
المهم كان فراشنا بالارض وكل يوم هواش .. فينا سر وهو الخوف ما نحب نجي يم الباب الكل ينحاش ما يبي يكون جنب الباب يعني اذا جا حرامي بيسرق الي جنب الباب ....
المهم ويجي بعد غرفتنا المطبخ ياحلو مطبخنا زمان لا فرن ولا غيره طاوله كبيره وعليها القز من ثلاث عيون ورف واحد والمواعين تعالوا لا كثيره ولا شي يحطونها بقدر كبيره مستودع ههه ياحلوها بس من ايام ونجي الله يعزكم ويكرمكم لدورة المياه مافيه الا وحده كلنا فيها والصاله هذي كبيرة ومفتوحة من فوق بس مضللينها بعريش وهذي ناكل فيها الوجبات الرئيسية
والله والله لو يقولون يانوري لو نعطيك 15 مليون ولا نرجعك للايام ذيك وتعشينا للابد لحد ماتموتين لاقول رجعوني اعيشها بتدرون بعدين ليش انا كرهت عيشتنا الحين وليش ابي ارجع لذكرياتي الاوله لا تستعجلون وتنزلون لا اخر الصفحة شوي شوي بتعرفون وكل شي بوقته حلوا صراحه انا تعبت وانا احكي لكم عن ذكرياتنا اصبروا الحين برتاح وبرد لكم
\
/
رديت لكم بعد ما نزلت تحت للمطبخ وشربت نسكافيه الله يرحم ايام أول مافيه لا نسكافية ولا غيرة ما غير بيبسي غراش ومرندا مثل ما اخوي رويشد يقوله واذا جا الشتا شربنا حليب بزنجبيل اما الحين نسكافيه وكبتشينو يقالنا تطورنا وصار الواحد يحب يرتقي ونسينا تقاليدنا ومدري مع الأيام عيالنا وش بيكون مصيرهم يمكن لو يمشون بالشوارع نتوقع انا في امريكا مو السعوديه الله لا يقوله يالله ادري غثيتكم نرجع لقصتي اصبروا برشف رشفة من النسكافية قبل يبرد ايوا وين وصلنا لا تعصبون خلاص تذكرت وين وصلنا يوم وصفت عليكم البيت نجي للشارع لا تضحكون من جد لازم اوصف لكم شوارعنا والله يا بنات وانا اوصف انها خانقتني العبرة يوم اتذكر هذيك الشوارع والأيام المهم نجي للشارع ماهو مزفلت مثل ما قلت لكم قبل قدامه حوش بلك وهالحوش سلمكم الله فيه غنم جدتي
الي دايم تلقونا على سورها عشان نطل على الغنم اذا راحت جدتي يعني من غير ما احد يدري عنا العصابة وكوم الرمل وارض كبيرة فيها "تراب احمر" بوجه العدو المهم وفي الأرض هذي العابنا تعالوا شوفو العابنا كيف سيارات بس لا تضحكون ياويلكم سياراتنا مو مثل الي في محلات الالعاب لا سياراتنا تعرفون الجالون حق زيوت السيارات هذا سلمكم الله نقطه ونفتحه ونربط فيه حبل واحلا سيارة بعد وبعد نسوي حديقة حيوانات والله بس حيواناتنا عفازههه أي بعضكم ما يعرف شنو العفاز هذا نمل الي يجي كبير شوي نجمعه ونحطه بهالحديقة ههه اتخيل اشكالكم وانتو تقرون البعض يضحك والبعض متقرف اكيد كل واحد منكم مرت عليه ذكريات طفولة وعاشها بشكل مختلف ما تحسون بحنين وله لذيك الأيام ما تبون ترجعون لها ياناس الحين اعيالنا ما نشوفهم بالشارع مثل اول اغلب وقتهم قدام التلفزيون يمكن ماعاد امان مثل اول او يمكن الزمن تغير الله يعين الزمن كل شي نرميه عليه لالا مو الزمن حنا الي تغيرنا الزمن ماله شغل تطورنا في البدايه جانا الدش وبعد الدش الانترنت وياعالم وش بيجي بعد كدرتكم ادري خلوني بس ارجع لذكرياتي وصفت بيتنا وشارعنا باقي بيوت جيرانا يا ناس تعالوا شوفوا جيرانا وش كانوا قلوبهم على بعض اول بيت جنبنا ام احمد وعيالها ذولي من اهل الجنوب ولدهم احمد كبير ومتزوج ويحب شي اسمه نصر لا تضحكون أيام كان عز النصر كان معاهم ماجد عبد الله واذا جت مباراة ما نسمع الا صياح احمد ونضحك بزران نضحك عشان صياحه وحنا ما ندري وش السالفة أي نسيت أعلمكم بعد أبوي هلالي متعصب ويموت في ياربي وش اسمه تذكري يا النوري لاعب ابوي يحبه اسمه صالح على ما اعتقد بس اسم ابوه ما اتذكره ماعليه اذا ذكرته قلته لكم ويمكن بعد ملخبطه بالاسم المهم بيت جيرانا أم احمد وكان بينا وبينهم سور ولنا ويا هالسور قصص وحكايا وبعد بيت ام احمد بيت عمتي وبعدها في الشارع الثاني عماني ثلاثة بيوتهم جنب بعض بينا وبينهم شوارع ضيقة بس الحين لو تشوفونها تحسونهم قريبين من بعض وباقي البيوت ربعنا وجيرانا الي صاروا حسبة ربعنا عشرة عمر وفيه مخبز وبقالة العم صالح " الله يرحمه يارب " ياما خذينا منه بالدس علوك وكنا نتوقع انه ما يدري وهو كان يتغاضى عنا ويسوي نفسه ما يشوفنا
" الله يعفى عنا بس "
ماكان فيه مغاسل مثل الحين بس بقاله ومخبز وبوفية صغيرة بعد يحليلها هجري البوفيه ومحمود إلي يبيع فيها
%
%
يلا ابحرو معي ترجع قبل 20 سنه يوم كان عمري سبع سنوات
منور : النوري الحين المدرسة شلون
النوري : اقول منيرة اسكتي ترى بطني يمغصني من الخوف وبعدين تعودي تناديني نوره مالت عليك
منور بغباء : ليش طيب مو حنا ناديك بالبيت النوري
نوره : أي يا خبله هذا بالبيت لكن الحين حنا رايحين لناس اول مره نشوفهم يمكن يضحكون علي
منيره ببراءة : طيب ...... واخذت منور تدور وهي تقول هاه نوره وش رايك في مريولي وكشختي
( كانت منور لابس مريول شوال وحاطه جدلتين شعرها كان طويل وشبرات من فوق ومجدلة شعرها ومن تحت بكل بيض وقتها مايعرفون شي اسمه شبصات صغار )
نوره وهي ودها تذبح اختها : وهذا الي هامك
جتهم أمهم تمشي :يالله يا بنات تعالوا افطروا
نوره وشوي دموعها تنزل : يمه مو مشتهيه
أمهم أم راشد : طيب بلف لكم سندوتشات إذا شتهيتوها في المدرسه تاكلونها
نوره : يمه ليه نروح للمدرسة حنا مرتاحين بدون دراسة
ام راشد : لا يمه لازم تروحون تدرسون عشان تتعلمون وتصيرين بعدين مدرسة وتستلمين راتب واصير ام المدرسة
منور : ههه يمه وانا بعد بصير مدرسة
ام راشد وهي تبتسم لمنور : والله يا منور ستعجلنا عليك ودرسناك بدرري مع النوري عشانكم ماتفترقون عن بعض
نوره وهي تناظر اختها بنظرة استهزاء : خبله مدري وش مستعجلة عليه
سمعو صوت الهرن ....
ام راشد : يالله يا بنات ابراهيم يضرب لكم هرن يلا الله يوفقكم
شالت نوره شنطتها وهي خايفه وترتجف ومنور تضحك وما همها شي
ام راشد : لحظة يا بنات اخذو الفلوس وعطوها ابراهيم يمر البقالة ويشتري لكم بيبسي للمدرسة
منور وهي تنط : هاتيها يمه
نوره : يمه وراشد مهو رايح معنا
ام راشد : يقول مايبي يداوم اول يوم مراح يعطونهم شي
نوره وهي تناظر منور : يلا مشينا
%% في المدرسة %%
(المدرسة قديمة وكانت مبنى عادي بيت ومستخدمينه مدرسة ومكثرين الله يعزكم دورات المياه)
كانوا البنات موزعين بالساحة اشكال متنوعة الي بالمستوى الاول والثاني والثالث والرابع والخامس والسادس واشكال المستوى الاول واضح الي تبكي وترتجف والي تضحك والي مربوشه
نظرات نوره للي حولها نظرات تفحص من يوم ما كانت صغيرة وهي حذرة تحب تتفحص الي حولها
سمعوا صوت الجرس الي في المستويات متعودين على صوت الجرس لكن المستوى الاول كان غريب بنسبة لهم فزت نوره مخترعه
منوره : ههه
نوره : ليش تضحكين
منور : شكلك يضحك يوم نقزتي
جتهم ستاذة سعاد وهي تبتسم وتجمع بنات أولى عشان تزين صفوفهم: يلا بسرعة يا بنات تعالوا يا بنات أولى تجمعوا هنا و تأشر على مكان صف أولى ابتدائي ....
التفتت أستاذة سعاد وشافت نظرات نوره لها ابتسمت كانت عيون نوره تلمع بشي خاص يمكن لان عيونها حلوه وفيها شي يجذب خلت أستاذة سعاد تبتسم وتروح لمهم : وش اسمك يا حلوة
نوره بنظرات جادة : اسمي نوره
أستاذة سعاد : عاشت الاسامي يا نوره وش هجري الزين والحلا الله يحفظك يارب
نطت منور : و أنا و أنا اسمي منيره
أستاذة سعاد : ههه ياحلوك بعد يا الله حبايبي تجمعوا عشان نصفكم
"" جمعتنا وصفتنا وصاروا يعدون الأسماء وحطوا أولى "أ" وأولى "ب" وأنا صرت في أولى "أ" ومنور في أولى " ب" اول مره نتفرق انا ومنور كل اهل المدرسة سمعوا صياح منور وهي تبي تجي معي بصفي كنت وقتها أناظر منور و أكابر ولا ابين اني مهتمه كانوا الأستاذات يسحبونها بيديهم وهي تبكي وتناظرني كانا راح نفترق ومراح نجتمع جلست وأنا ضامه شنطتي بحضني كانوا البنات أشكالهم بالصف تضحك الي تدمع عيونها والي مستحييه جتنا استاذة ساره وهي تبتسم
أستاذة سارة : هلا والله ببنياتنا
كنا نطالعها وكلنا خوف
أستاذة سارة : يالله عرفونا على أنفسكم وحده وحدة
كانت فطوم في أول صف وبعدها نوال .... مدري ليش من يوم كنت في أولى وأنا في الأخير لأني طويلة يجلسوني ورى جرحوا إحساسي
"" في البيت ""
منور وهي تصيح : مابي مابي اروح للمدرسة مخليني في فصل بروحي
نوره وهي تاكل تفاحة :ابلتكم اسمها نوره حسن وابلتنا اسمها ساره
منور بدلاخة : أي ابلتكم حلوه وشعرها طويل وبصوت عالي وصياح مابي فصلي ابي اروح مع النوري
امي انزعجت من صياح منور وشالت الصينية وراحت للمطبخ
وقفت وانا اركض واغمز لمنور عشان تفهم وتجي معي لكوم الرمل كنت مشتهية نسوي مقلب للعيال ما فكرنا في عواقب الأمور اهم شي بس نضحك ونلعب كان وقت ظهر والشمس حارقة كان غايتنا الضحك والعب
منور : هاه وش بنسوي
نوره : وش رايك نلعب عليهم نحفر حفره كبيرة ونغطيها بقشاش ونقول لهم الي يبي بسكوت يجي وهم راح يجون ركض
منور : طيب اصبري لحد ما تجي سارونه بنت خالي محمد
نوره : يا خبله سارونه بحاره ثانيه ودرست و اليوم السبت مراح تجي اهلها مراح يخلونها تجينا الا يوم الاربعاء
منور بحباط : حرام
نوره وهي تناظرها وتضحك : حرام عشان سعيدان مو عشان سارونه
احمر وجه منور : انقلعي اصلن انا احب سعد عشانه ما يخلي احد يضربني
نوره وهي تبتسم : يالله خلينا نادي فطوم بنت جيرانا الجنوبيه
منور وهي تشهق : خبله انتي ترى اخوها احمد بيذبحنا مو يقول تلعب معكم العصر بس وحنا الحين الظهر
نوره وهي تحك راسها :طيب بس انا وياك الي نحفر الرمل
منور وهي تنفخ يدها : نوره يوجع الرمل حار
نوره وهي تحفر ومتحمسه : ماعليه اصبري
جاهم صوت صراخ من بعيد التفتوا البنات شافو راشد قاعد يطالعهم ومستغرب وش يسوون
راشد وهو معصب "على صغر سنه كان وقتها بخامس ابتدائي الا انه مسبب رعب لخواته ما يحبهم يلعبون مع العيال " : وش تسون
تعلثمت منور من الخوف : هاه نسوي مدري انوري نقولي احفري
نوره ولا همها راشد : وش انت تشوف قاعدين نحفر
راشد : تحفرون بهالقايله
نوره : كيفنا أي وقت نحفر فيه
هنا عصب راشد وشال عصى بالارض منور يوم شافت العصى ما شافو الا غبرتها يوم راحت

الجزء الثاني
هنا عصب راشد وشال عصى بالأرض منور يوم شافت العصا ما شافوا إلا غبرتها يوم راحت
نوره تناظره بجسارة عين و هي من داخلها تحس بخوف غير طبيعي بس ما تبي تبين
راشد قرب منها وهم يضربها لكن وقفة صوت ورآه
...: راشد وش تسوي ليش تضربها
راشد وهو يبرر موقفة :خالد جالسات يحفرون بعز الظهر وقلت لهم يدخلون وهي عيت
خالد : طيب صارخ عليها بس تضربها ما يجوز تضرب بنت ما قالك أبوي الشايب ما علمك انه من المرجله الرجل ما يضرب البنات
راشد وهو ينافخ : بس هي تنرفزني
خالد : اعرف تحكم با اعصابك
%% كل هجري الكلام كان على مسمعي كنت اسمع اخوي خالد أي صح نسيت أعلمكم عن اخوي خالد هذا اكبر إخواني في الثانوية بس مو ساكن معنا أي لا تستغربون ساكن مع خوالي مع جدي وجدتي لان خالي جته دوره في الشرقية وعيو جداني يرحون معه وكانت الدورة مهمة عشان ترقيت خالي وحلت امي المشكله يوم خلت اخوي خالد عندهم وبكذا يروح خالي وهو مطمأن على أبوه وأمه باقي اخواني بقولك عنهم خ لا تضحكون علي ما بقى الا اخر العنقود عزوز وحطيتهم كثير يعني عندي خالد وراشد وعبد العزيز وانا ومنور أي نرجع للسالفه يوم اخوي خالد يعاتب راشد عشانه يبي يضربني بعدها فهمت اني ما اخالف امر اخواني واطيعهم كان اسلوب اخوي خالد بمثابة درس لي حتى لو كان هجري الدرس مو موجه لي %%
" الحياة دروس مو بس كل شي نتعلمه في المدرسة لا تمر احيانا علينا مواقف حتى لو كنا صغار تكون درس لنا""
خالد يوجه امر لي : روحي داخل البيت
مشيت مثل عادتي كالبرق اركض ركض دخلت داخل وانا اتنفس بسرعة منور وهي جالسة على سفرة الغدا وتناظرني
منور : طقك رويشد
النوري جت تمشي تجلس على السفرة : لا ما طقني
دخل راشد وخالد والتمينا كلنا على الغدا ابوي وامي وجدتي وجدي وعزوز كان غدانا بسيط رز ولحم وصالونه
ابوي يناظرنا ويضحك : هاه وش سويتو اليوم في المدرسة
منور بلقافتها المعتادة : يبة فرقوني مع النوري وخلوني بفصل بلحالي
ابوي التفت على امي : بكره تروحين للمدرسة عشان يجمعونهن انا ما درست منور الا عشان تجي مع النوري
فزت منور وحبت خشم ابوي
الكل ضحك وعلق ابوي : كان خليتي حبة الخشم بعد الأكل وسختي خشمي
منور : ههه ماعليه يبة اغسله
التفت علي ابوي : هاه يا النوري ما قلتي وش صار اليوم
نوره : ما سوينا شي كل شوي داخله علينا مدرسه وتعرف على اسمائنا
منور : يبه ابلتهم مزيونه وشعرها طويل
امي : وانتي ماتستحين توصفين الحرمه قدام الرجاجيل
جدتي وبضحكة: لا تقولين الرجاجيل قولي قدام ابوك خايفتن ياعرس عليها منور هي معرسة
ابوي ومستانس على غيرة امي : ههه أي والله يا منور انشدي هي معرسة
امي ومعصبة بس ماتبي تبين : الحمدلله " وقامت من الأكل "
جدتي : تعالي تعالي الحين مخليه الغدا عشان طاري عرس انتي الداخله وهي االطالعه ومحد يقدر يغير ام خالد
شفت وقتها الابتسامة بعين أمي واضحه
امي : لا والله يا خالتي ما همني الكلام بس انا قايمه من الصبح والحين يالله اشوف
التفتت امي علينا نظفوا السفرة بعدكم
نوره : ابشري
" أي لا تستغربون انا يوم علي يوم على منور في تنظيف المواعين والغساله وتغسيل الملابس انا ومنور كلنا مع بعض تضحكون على اشكالنا يوم نغسل ملابسنا وكيف ننشرها بين النخل حاطين حبل في نخله ورابطينه في النخله الثانيه وانا اذا غسلت عطيتها منور وهي تنشرها على الحبل وكذا كنا نساعد امي بدون شغالة كنا بسيطين كل شي بسيط مافيه تعقيد كان بيتنا مريح كنت شلون انظفه
تعرفون مكانس الي تسوى بخوص كنا نخم البيت بها ونظفه كنا على بساطة بيتنا الا امي معودتنا يكون بيتنا نظيف ونافس فطوم بنت جيرانا الجنوبيين
صح نسيت اعلمكم عن فطوم هذي اختنا قبل تكون جيرانا من اهل جيزان جو مع اخوهم احمد يوم تعين عندنا بالعسكرية بطبوطه وسمراء وشعرها مفلفل اموت فيها اذا قعدت تضحك قمة البراءة كانت فطوم اذا شافتنا نظف بينتا على طول طيران لبيتهم تنظفه كنا نتنافس في نظافة البيوت وترتيبها "اوه ..... يلا ارجع على وش صار بعد ما تغدينا
كل اهل البيت راحو يريحون شوي قبل اذان العصر وخالد رجع لجداني الا انا ومنور ورويشد جلسنا قدام القناة الاولى كان فيها برنامج عن الحيوانات وكنا كل شوي نصارخ
منور : مابي مابي هذي الأسود لي انا بس
نوره : انا الغزلان
راشد بكل تسلط : كل الحيوانات لي انا
منور صدقت : واع مابي لي انا
مليت من هواشهم طلعت منهم رحت للحوش تحت النخل كان نخلنا تحته ظل العسف ام شلون اشرح لكم تعرفون شكل النخله صح كان سعف النخل متشابك مع بعض لدرجة انه مسوي مثل العريش سبحان الله ومخلي تحته ضل تمددت في هالضل مثل ما اسوي دايم وصرت اغني واحفر والعب بالرمل ما كنت اتذكر اغنيتي بالضبط بس
سمعت صوت فطوم تناديني قمت وجلست وتلفت ادور صوتها تدرون وين لقيتها لقيتها على جدارهم جالسه كان يفصل بينا وبينهم جدار طبعا هذيك الايام الجدران صغار بس وقتها كأنها قمت افرست
تقدمت لحد ما وصلت عندها وكلمتها بضحكه
نوره : وش تسوين
فطوم : احمد الدب مايخليني اجيكم يقول العصر روحي لهم وانا مليت بلحالي وجلست العب مع الدجاج وسمعت صوتك وانتي تغنين ورقيت على كرتون الخشب
قربت اكثر من الجدار وكان جنب جدارهم شجرة العنب جلست اخذ من عناقيد العنب واكل
فطوم وخدودها حمر من الشمس : النوري عطيني
نوره : ههه اخذي
جلست اكل انا وفطوم ونسولف لحد ما سمعنا اذان العصر كنت وقتها احب اصحي جدي من النوم رحت ركض ابي اسبق منور قبل تصحيه لكن دايم تجري الرياح بما لاتشتهي السفن
من الطفاقة فينا تصاقعت مع منور بالدرب كل وحده فينا تبي تصحيه وطحنا على الارض وقعدت افرك جبهتي ومنور ماهمها الضربة وقفت تبي تصحيه بس طلع علينا جدي وهو يفسر اكمامه يبي يتوضى
قعدت اضحك بصوت عالي
نوره : ههه
منور : ههه ماعليه ماعليه اهم شي سبقتك
نوره : ما سبقتيني
كنا فرحانين لانها ساعة الافراج عنا وعن فطوم وعيال حارتنا رحنا ركض للشارع لقينا ابوي قدامنا وطلبنا منه فلوس وقعدنا نحتريهم لحد ما يطلعون من الصلاه عشان نروح نشتري بيبسي اغراش وفش فاش شمس وبسكوت مدور اولكر وونجي نبسط بسطتنا حول كوم الرمل ونتفرج على العيال وهم يلعبون كوره وكل وحده تجشع اخوها قمت ونفضت الغبار وجلست احت يديني من التراب واركض وكل البنات وراي كنت ابي اطلع كوم الرمل وقتها صرخت صرخة ضحك لأني سبقتهم ويمكن لأني صرخت بصوت عالي اتحدى العالم كلهم
منور : فطوم تدرين اني بكره بجي في فصلكم
فاطمه تجي وتمسك يدين منور ويصيرون يدوورن بقوة وانا اضحك على اهبالهم
فطوم ببراءة : ما عطونا كتب
النوري وهي ملانة : بكره بيعطونا تقوله استاذة سارة
منور : ياحرام خرب علينا رشود كان الحين نضحك على العيال
نقزت فطوم : وش خرب عليكم
تذكرت السالفة ونقهرت : أي كنا نبي نلعب على العيال بس رشود خرب علينا
فطوم : احسن عشانكم ما قلتوا لي
نوره : كيف نقولك واخوك يمنعك تلعبين معنا الظهر
فطوم تحك راسها كأنها تذكر اخوها احمد : أي طيب علموني وانا بس بتفرج عليكم مع الدريشة
منور : حتى حنا رويشد يقول لا تطلعون الظهر فيه شمس
شفنا جدي من بعيد وبيده بساط يفرشه في الأرض الي قدام بيتنا وجدتي معها ترامس القهوة والشاهي ناظرنا بعض انا ومنور وعلى طول صرنا نركض ونمسك في اثياب بعض عشان كل وحده ما تسبق الثانية وفطوم معنا بس لأنها دبدوبه ما قدرت تسبقنا على طول طحت انا ومنور على البساط وكل وحده تصرخ مثل دايم انا انا الي سبقت
منور : أنا ألي سبقت
نوره : لا أنا إلي سبقت
جدتي و نزعجت من صراخنا: بتسكتون ولا روحو العبو بيعيد عنا
سكتنا وحنا نشوف شلون جدي يناظرنا ويبتسم جيت وجلست جنبي جدي وحطيت يدي على فخذه يعني متعانزه عليه مثل المركى
جتني منور بلقافتها وغيرتها : قومي بجلس انا جنبه
النوري : يوه وانتي كل شي لازم تقلديني
جدتي وهي تضحك : لانها تبيعتك
نوره : شلون يمه تبيعتي
جدتي : يعني والده بعدك مابينكم فترة طويلة عشان كذا تحب تقلدك
جدي يشيل مقداع التمر " الإناء الذي يوضع فيه التمر يسمى مقداع عندنا "
يلا اكلو تمر تراه مسامير الركب وزين لكم
أي صح نسيت أقولكم لأن فطوم وصلت متأخرة و إذا كان جدي وجدتي فيه ما تتكلم كثير جلست بهدوء وصارت منزلة رأسها طول القعدة جدتي تحبها مره لأنها تستحي
و أنا ومنور سوالف وجدتي تعلمنا بقصص من الأولين بعضها غريبة والبعض الثاني مستحيل المهم وقتها كنا نضحك ونستغرب من قصصهم
جانا ابراهيم" علمتكم قبل سواقنا" : ماما عجوز هذا فيه غنم يولد
وقفت جدتي وراحت تشمي بسرعة للحوش وقفنا كلنا نركض نبي نشوف إذا ولدت
قعدنا عند الباب نتفرج عشان تخلينا جدتي وما تطردنا شفناها يوم يشيل ابراهيم الشاة ويحطها بصندقة بلحالها وكانت جدتي تمسح على بطنها وكانت سبحان الله الشاة تون يعني تحس مثل ابن آدم سمعنا صوت " الطلي << هذي معلومه من امي تساعدني في بعض المعلومات " كلنا ضحكنا يوم ولدت وقربنا اكثر شفنا الطلي كان صغير مره ضحكنا وفرحانيين الحين جدتي بتعطيه لحد منا يا انا يا منور يا راشد يا خالد يا عزوز شافتنا جدتي شلون ملتمين عليها ضحكت وقالت الطلي هذا بنعطيه فطوم
كلنا ناظرنا بفطوم وحنا بين شوي قهر ومستغربين وفطوم قعدت تضحك بشكل هستيري وتغوص عيونها بخدودها يا حلوه يا ناس كنت وربي اموت فيها لكن وقتها فرحت عشاني احب فطوم قرار جدتي كان حاسم ومحد يقدر يقول شي
جدتي : هاه يا فطوم وش بتسمينها
فطوم وهي تحمر خدودها : بسميه ابو ذنيب " قصدها النمر الوردي "
منور والنوري : ههه يا خبله لالا ما يصلح سميه نجمان عشان كان في راسه بياض مثل النجمه
" سمعنا صوت أذان المغرب "
شفنا امي تطلع من الباب وتنادينا بصوت عالي رحنا وتفرقنا فطوم راحت لبيتهم وحنا رحنا لأمي كان بيدها صحن فيه سلييق " عبارعن رز مطبووخ مع للبن " كلينا وبعد ما خلصنا رحت انا ومنور لغرفتنا ونمنا
( في المدرسة )
كنا مجتمعين حول استاذة ساره وهي توزع الكتب علينا كان على طول تعليم مافيه اسبوع تمهيدي
استاذة سارة : يالله كل وحدة تجلس في كرسيها
وخذت طبشورة وجلست تكتب وكان اول حرف "أ" وكانت تقولنا هذا اول حرف من حروف الهجاء الف يعني أب أم يالله عطوني يا بنات اسماء تبدى باول حرف ويكون ألف
نوره : انا انا ابلى بقول
ابتسمت استاذة ساره لي : يالله جاوبي يا نوره
نوره : ابراهيم
بنات الفصل : ههه
وقتها زعلت وجلست اناظرهم ليش ضحكو علي
استاذة ساره وهي تطالع البنات : صح صفقو لنوره صح عليها ليش تضحكون بعدها البنات تفشلوا وكملت تشرح لنا الدروس وتعلمنا كيف نكتب حرف الالف كان القلم يرجف بيدينا وناخذ ساعه على بال ما نعرف نمسكة زين كان بعض البنات يبكون ما يعرفون يكتبون ولا يمسكون القلم
وسمعنا طق علينا وانفتح الباب وكانت منور ومعها مساعدة المديرة كانت منور تضحك وشايله شنطتها قعدت انا وفطوم الناظر بعض ونضحك وقعدت استاذة ساره تكلم استاذة سعاد ودخلت منور وحطتها بالكرسي الي جنبي
منور وهي تضحك : جيت فصلكم
استاذة سارة ببتسامة : اعرفكم على طالبتنا الجديدة منيره اخت نورة
جا وقت الفسحة وطلعنا وقعدنا انا ومنور نفتح سندوتشاتنا لكن استغربنا يوم فطوم تأخرت كملنا فطورنا وجتنا فطوم وعيونها حمر وتنزل دموعها بدون صوت على طول وقفت
نوره : فطوم من طقك علميني
فطوم تبكي بصمت وما ردت علي دموعها تنزل وتسيل على خدودها وتصقع بالأرض
كل شوي انا ومنور نصارخ عليها نبي نعرف من زعلها منو صارخ عليها
شوي التفتت علينا وناظرتنا : فيه بنات يوم رحت للمقصف اشتري وزحمة دفوني وقالوا روحي يا العبده يا السوده
""فبلال كعلي ليس من فرق تراه كلنا لله عبد وله تحنو الجباه""
كان اصحاب النبي عليه السلام عبيد بلال مؤذن الرسول عبد وزياد حبيب رسول الله عبد لم يستنقصهم الإسلام وعدم يحاسب الله الانسان يوم القيامة يدعى بأمه يا ابن فلانه يعني لا يوجد لا حسب ولا نسب ينظر إلى أعمالهم وليس إلى أنسابهم
نزلت دموعي عشان اعز صديقة كيف أهانوها ما كنت وقتها قادرة أدافع عنها كانوا البنات الي سبوها بسادس ابتدائي اكبر عنا
دق جرس يعلن الحصة الرابعة رحنا لفصولنا نركض على صغر سنا إلا إنا نسينا بسرعة إلي صار وجلسنا نضحك
كانت الحصة أناشيد وكانت أستاذة سارة تنشد بصوت عالي وحنا ننشد ورآها كانت أول أنشودة هي السلام الوطني لنا كنا نردد معها بضحك وناظر في بعض ونضحك
الله
الله رب الخلقي أمدنا بالرزقي
إذا دعاه الداعي يحققو المساعي
يسهل الأمورا ويدفع الشرورا
وكل شي عندهو بنعمتا يمده
اكرم به من محسنن يبر كل مؤمنن
من حقه انا يعبدا صدقن وان يوحدا
استاذة ساره : بكره لازم أشوفكم حافظين الأنشودة وحرف الألف اكتبوه زين
( في البيت )
على طول ركض انا ومنور نبدل ملابسنا عشان روح نلعب في الحوش لحد ما يجي ابوي و نتغدى
رحنا نمشي ولقيت جدي عند النخل قاعد يلحقهم صح ما كانوا كثير بس ست نخلات بس كان وقتها كنز عندنا تمددت انا ومنور على الأرض نتفرج على جدي كان جالس على سعف النخل ويلقحها وكنا نسولف معه
جدي : استانستوا في المدرسه
نوره : أي عطونا انشوده
منور : وعلمونا حرف الألف
جدي : ما درسوكم قران
نوره : تقول استاذة سارة انا مدرسة القران بكره بتجينا
جدي : والله يا بنياتي اهم شي يدرسونكم القران
سمعت صوت امي تناديني فزيت اكيد تبيني اساعدها بفرش سفرة الغداء

الجزء الثالث
اليوم كان الأربعاء وخالي محمد بالعادة يجي , اوف نسيت أعرفكم على خالي محمد هو خال أمي مو خالي انا لأن امي تقوله يا خالي انا بعد اقوله خالي وعنده ساره وسعد سعد اكبر عنا كلنا واكبر من اخوي خالد بعد هذا المحامي لمنور ما يرضى احد يزعلها مدري ليش منور بالذات وتجي ساره هذي بعمري إذا اجتمعنا أنا ومنور و سارونه وفطوم صرنا الرباعي المرعب لبنات الحارة والعيال لا تضحكون من جد حتى العيال ما سلمو من شرنا يكفي أنهم ما يقدرون يردون لنا يخافون من اخوي خالد وراشد بكذا نطقهم ونتهاوش معهم وحنا مطمئنين محد راح يردها لنا....
أي نرجع لخالي يجي ويحط عياله عندنا ويرح لم القصيم ويجي يوم الجمعه ياخذهم كان له هناك مزرعه وكان يروح يشرف عليها بنفسه كل اسبوع ولأن خالتي ام سعد ما تحب تجلس بالبيت هناك يضيق خلقها من حيهم تحب تجي عندنا في حينا كله مزارع وأونس من حيهم بكثير كانت سارونه قبل لا تدرس تجلس عندنا بالأيام لكن يوم بدت الدراسة أصبح وجودها عندنا با أيام الأسبوع من المحرمات بقولكم سر أي سر بيني وبينكم
افرحوا يا أعضاء الم الأمارات سر ما يعرفه إلا انتو بس سارونه اذا جتنا نصحى من الساعه ست ألصباح الرباعي المرح ونروح لمزرعة مهجورة كان فيه شارع رئيسي وبعد هجري الشارع كان فيه مزارع ومن بينهم مزرعه مهجورة لكن النخل ما بعد مات وكان نخل كبير مره وكثير وكان فيه عشب بالأرض يابس واخضر يعني يعطي الوان اصفر على اخضر فاتح وكان فيه الساقي بقولكم وش الساقي هذا سلمكم الله مكان يجري فيه الماء مثل النهر بس النهر طبيعي من الله وهذا بعد من الله لكن اجدادنا هم الي قاموا ببناء الساقي وكان من بلك ومشينه على طول المزرعة كان فيه ماء بس قليل تجي اقل من النص وكان فيه ضفادع والله وفيه سمك صغير وفيه طحالب خضراء كثيرة وبعدين تجي البركة هذي عاد مثل المسبح الأيام هذي
لكن يختلف عنه بوجود ماطور أكيد ما تعرفون الماطور هذا يساعد لسحب الماء نرجع لسرنا كنا الرباعي المرح نروح لم هجري المزرعه المهجورة من صباح الله خير الي استغرب وقتها اهلنا ما يخافون علينا كان على بالهم انا نروح نلعب ما درو انا ناخذ معنا فطورنا ونروح نبسط بهالمزرعه ربي وقتها ستر علينا من الحراميه والعماله بس ترى ولله الحمد ايام ما كنا صغار مافيه جرائم مثل وقتنا الحاضر وش رايكم اتوقع كانوا يخافون الله اكثر الله اعلم وش السر ليش مافية أي وكنا نجلس ونفطر ونلعب لحد ما نشوف الشمس بدت بالارتفاع وبدت الأصوات تعلى كان الشارع الرئيسي تمر فيه الشاحنات والسيارت الكبيرة والسيارت بكل شكل ونوع عشان كذا لازم نرجع بسرعة عشان محد يكتشف وجودنا بالمزرعه المهجورة وعشان نقدر نمر قبل تكثر مرور السيارات كنا نمسك ايدين بعض ونقطع الشارع اتذكر شلون اشكالنا كنا نضحك بأعلى صوت والشعور حدث ولا حرج يا الله كيف كنا ونجي ونرتمي على الأرض الي فيها رمل احمر ونتمدد من التعب ما همنا غبار اهم شي نريح رجولنا من الركض كنا نضحك وما ندري وش نضحك عليه كان مافيه تفكير ماكنا نحسب لشي حساب اهم شي نلعب وننبسط
نوره : اقول بنات وش رايكم نروح للخياط
سارونه بتعجب : ليش
فطوم : عرفت النوري وش تبي تبي قطع الزايده من عند الخياط
ضحكت وناظرت فطوم دايم تفهمني
منور : أي أي عرفت وش تبين فيها تبين نصلح عرايس
النوري : أي وبنشوف احلا بيت بعد
رحنا ركض للخياط سليم
النوري : السلام سليم كيف حال انتا
سليم : عليكم سلام نوري انتا شلونك بابا شلونه " حتى عمالتنا زمان غير "
النوري : كوله طيب اقول سليم عطنا قماش زايد انتا ما يبغى
سليم : ايش يبغا بقماش
النوري : عشان انا ابي سوي ملابس عروسه مال انا
سليم : زين زين
وجمع لنا سليم كيسه مليانه اقمشه على كل شكل ولون منها المشجر ومنها السادة
اجتمعنا وحنا نسحبها ورحنا للارض وجينا في ضلال حوش جدتي وجبنا كراتين وكل وحده فينا أخذت كرتون كبير وبدينا نشتغل اول شي فرشنا الاقمشه على الكرتون وبعدين جبنا كراتين صغار حقت الصابون وحطيناها فوق الكرتون الكبير مثل الغرف ولونا كل كرتون بلون وبدين نصنع عرايسنا لو تعرفون شلون كانت عرايسنا بتموتون من الضحك تعرفون الايسكريم الي ابو هدية الي فيه اربع حبات وهديه الي فيه عصا خشب ويجي بوسط الايسكريم ويكون بطعم البيبسي او اليمون او البرتقال كان عرايسنا هذي ههه وكنا نلبسهم ملابس ونجيب خيط صغير ونربط القماش عليهم
النوري بفرح : خلصت
كل البنات يلتفتون عليها وكل وحده تبي تخلص بسرعه
سارونه بعجله : وأنا بعد خلصت
منور : يووه بسرعه انتو تخلصون اصبرو باقي البزران مابعد لبستهم الباسهم
فطوم : طيب شوفوا شوفوا بيتي حلو
النوري : حلو يا فطوم صرت الحين مثلنا واحلا
فطوم وهي تضحك :أي اول يوم جيتكم كنت ما اعرف الحين بصير احسن منكم
منور : كله تخلصون قبلي ليش انا دايم الأخيرة
....: لأنك ارق منهم وأحلا منهم
كلنا التفتنا على مصدر الصوت وعلى طول انا عرفت منهو هذا سعد مدري ليش دايم يحب يدافع عن منور يمكن وقتها انا ما اعرف ولا احد فينا يعرف بس الحين اضحك على نفسي كان الأخ مغرم فيها من يوم ما كنت بزر
منور : صدق يا سعد طيب وش رايك في بيتي مو حلو
جا سعد يمشي وجلس بجنب منور وقعد يناظر بيتها ويبتسم :احلا بيت فيهم والي زاده حلا يوم انتي الي مزينته
النوري : أي أي امدحها عشانك تحبها قلتها بعفويه مثل ما انا بعد احبه ومثل ما احب سارونه مثل ما سارونه تحبني وتحب فطوم يعني حب موالي تتوقعونه حب الغرام والهيام بس وقتها شفت سعد يوم وقف وصار يحت ايدينه بسرعه وكانه مرتبك ما فهت وقتها ليش لا تلموني بزر وراح يمشي وتركنا
بوصفلكم منور اختي كانت عيونها مو وساع ولا صغار وسط عسليه مره ونعمومه حيل وشعرها طويل اذا جلست طاح بالأرض ولونه بني فاتح يمكن بعد من اثار الحنا وبعد امي تقول اصل شعرها بني في لحيها من تحت دقة واضحه مره وحواجبها كانها مرسومه رسم وتجي وكانها مقرونه بس خفيف مو كثيف وكان وجها مو دائري بس صغير ونحيف مالها خدود
شكلكم حابين تعرفون أشكال بعد عائلتنا كلها ابشروا ما طلبتوا
راح ابدا بخالد اخوي خالد من كان صغير وهو رجل يعتمد عليه كان يضيف الضيوف ورحوم مره ما يحب يجرح احد وروحه حلوه كلامه مثل البلسم مراح اطول في مدح اخلاقه انتو راح تحكمون بنفسكم راح اجي لشكل
يشبه منور مره بس كان هو اوسع منها عيون وكانت عيونه عسلية بعد بس هو يختلف عنها بان له غمازة وحده ونفس حواجبها لكن بملامح رجولية وجه نحيف مثل منور وخشمه سلة سيف وجسمه طويل مره ونحيف بعد ومربي شعره بس مو ناعم كثير كان شعر راسه قاسي ومتين كان دايم يبلل شعره وبالمشط يرده على ورى عشان ينعم
ونجي لرشود اخوي رشود بيني وبينه شبه بس مو كثير كانت عيون راشد سود وكبار وجه دائري وخشمة وسط مو كبير بس حلو كانت حواجبه مثل خالد ومنور كلنا نشبه بعض بالحواجب بس فيه دقه مثل منور في لحيه كان يومه صغير دبدوب عكس الحين سبحان الي يغير وما يتغير
نوره بطلتنا والي توصفها غيوم
نوره عيونها كانت وساع سود فيها لمعه غريبة تخلي الواحد ينجذب لها فيها غمزات مروه واضحه حتى لو تخبيها توضح وفيها حبة خال فوق فمها من يمين صغيره محليتها اكثر وفمها مره حلو صغير وشفايفها ورديه من الله كانت بيضاء مره كانت نوره تعاني من شي كانت اذا استحت صارت خدودها حمر حتى لو تعصب على طول يبان عليها اذا عصبت او استحت تحمر خدودها ويصير شكلها يبهر ويضحك بنفس الوقت مثل اخوانها حواجبها مرسومة رسم وشعرها اسود عكس منور وطويل مرره كانت دوم تحتار وش تسرحه بالاخير تتركه منسدل على ظهرها اذا تبوني اوصفها اكثر قولو لي
نجي لعزوز هذا احلا واحد فيهم حتى من نوره نفسها كان مثل خالد مافيه الا غمازة وحده كان بسم الله عليه حلو لدرجه ان امه تخاف عليه من العيون كانت عيونه كبار وسود كان يجذب الواحد له مقدر صراحه اوصفه لكن اذا شافه الواحد ما يقدر يقول الا مشاءلله الله يخليه لهله
نرجع لقصتنا
منور بصوت عالي : بنات تعالوا شوفوا
جينا كلنا نركض وين ما منور تورينا كانت تأشر على الملعب صح نسيت اعلمكم كان في حارتنا ملعب كبير لنادي مشهور في منطقتنا مراح اعلمكم عنه لاني لو اقول راح تعرفون وين بيتنا الطين
كنا نشوف فيه حافله عند الملعب وقاعدة تنزل اشياء رحنا ركض لمهم وقعدنا نتفرج من قريب كانوا ينزلون ملاهي والله مدري ليش وقتها حطو بركن الملعب ملاهي مدري هي للبيع وحنا يوم كنا صغار ستغلينها وصرنا تلعب فيها او كانت لنا لان اغلب الوقت ما يلعبون في الملعلب بس لتدريبات كنا أناظر بعض ونضحك وما خذينا الا رشود جاي يمنا ومعاه سلوم ولد عمتي صيته ياني اكره هذا الولد وهو بعد يكرهني كنت ما اطيقه دايم يحب ينرفزني ويمط شعري ورشود ما يقوله شي لانه خويه جو يمنا وهم يركضون
رشود : وش يسون
منور تنط : ملاهي ملاهي
نوره كنت وقتها فرحانه طفل وقدامه ملاهي وقتها ملاهي عايديه موكهربائية كانت مرجيحه وزحليقة على شكل طائرة ولعبة تدور اذا دفيناها يعني ملاهي بسيطه بس وقتها من الفرحه نشوفها ولا جنغر لاند
كنا نبيهم يبعدون عشان نروح لعب فيها اذكر وقتها موقف صار لي مع سلوم راحوا قبلي يركضون وهو جرني مع شعري له
النوري : أأأي الله ياخذك فكني
سلوم : ليش تسبقيني اذا جيت انا خليني امشي قبلك
النوري ودفته بعيد عنها وراحت ركض : طس ما بقى الا انت انتظرك
سلوم يركض ومسكني مع يدي وصار يفر فيني وبعدين دفني على الأرض خرب علي وناستي صرت اصيح بدون صوت دموعي تطلع
جت فطوم تركض : الله ياخذك يارب وش مسويه اهي لك
قمت وقفت وناظرت يمه كان يناظرني يمكن خوف بس نظراته وقتها غريبة مسحت دموعي كانت نازله على خدودي وعلى خشمي ولصق فيني تراب بسبب الدموع قعدت امسح دموعي بكف يديني ورحت اركض لبيتنا خرب علي فرحتي بالملاهي منور وفطوم وسارونه كانوا مبسوطين بالملاهي محد فكر يلحقني وقتها رحت ركض لحوش بيتنا جيت تحت نخلة وجلست ابكي مو اول مره سلوم يطقني بس هذاك اليوم مدري ليش طقته اثرت فيني رتحت شوي يوم بكيت ناظرت الصندقه الي قلت لكم عنها قبل الي فيها ارانب رحت يمها فتحت بابها وسكرته علي عشان ما تطلع الارانب شفت ارانب صغيروونه مره بيضا وبنيه قعدت اضحك سبحان مغير الاحوال قبل شوي ابكي والحين اضحك اشوفها شلون تلحق امها رحت وخذيت من حوض كان موجود فيه اكل لها خذيت كسرة خبز يابسة وجلست اوكل الارانب الصغيرونه وانا اضحك وقعدت انشد أي وقتها اخوي خالد يسمع اناشيد كثيرة وكنت احفظ منه كنت احب هذيك الانشودة كانت بصوت بنت فلسطينيه مدري وقتها وش اسمها بس كانت تاثر فيني ما اتذكر منها الا يوم تقول
مسلمة من ارض المشرق تستصرخ و إسلاما ...
وقتها اضحك والعب مع الارانب وكانت الارانب ما تخاف مني كانت تجتمع حولي سمعت صوت امي تناديني وقفت وقعدت احت من شعري التراب ورجع الحزن لعيوني يوم تذكرت سلوم يوم رماني في الارض وصار في شعري تراب جلست احته وطلعت على أمي
امي : تعالي النوري اخذي القرصان هذي وديها لأم أحمد
شلت القرصان ورحت امشي لام أحمد ودخلتني زوجة احمد صفية توه متزوجها بالعطله يوم راحوا لهلهم بجيزان
صفيه وكانت حامل وبطنها صاير كبير : هلا والله با احلا نوره بالوجود
كنت احب صفيه لانها كانت تدخلني انا وفطوم بغرفتها وتعطينا بسكوت ريكو وتقعد تعلمنا عن حياتهم بجيزان وكيف هم عايشين كانوا يعيشون بجبال وسكنهم بعريش بوصف لكم العريش الي بالشرقيه او الي راح للشرقيه راح يعرف وش اقصد شفتو الساحل شفتو الي توهم مسوينها على الساحل الي تجي الوان زهر واصفر وسماوي مضلات هذي تخيلوها نفسها لكن تجي من فوق عريش من سعف النخل هذا بس السقف لكن جدرانهم كانت من بلك او حجر خاص عندهم الي راح لأبها بيدري تعرفون جدارن اهل الحبله الي في مزارعهم الي يحطون لبنه فوق لبنه يعني حجر من اراضيهم سبحان الله يطلع شكلها جنان يووه شوفو التفكير وين وداني نرجع يوم عطيت صفيه وطلعت منها ناظرت لجهة الملاهي شفتهم يلعبون ويمكن صوت ضحكهم واصلني
....: ليش ما رحتي معهم
التفت على طول للصوت شفته خالد رحت ركض و ضميته ولفيت يديني على رقبته وجلس يدور فيني فرحت مره اخيرا جا الي مراح يخلي احد يأذيني
النوري وانا شوي وبصيح : خالد شوف سلوم طردني ما خلاني العب معهم
خالد وهو يبتسم : ابي افهم ليش انتي وسلوم دايم هواش ما تملون انتو
النوري : والله والله ما عمري سويت له شي
خالد: خلاص الحين جا الظهر ما يصلح تلعبون فيها اذا جا العصر رحت وديتك وأتحداه اذا مد يده عليك بيشوف هالخيزرانه الي بيدي بتوقع بظهره
تعلقت بيده وبسته على خشمه كنت فرحانه وقتها سبحان الله الحرمه دايم تبي سند لها تبي احد يحميها مهما الحين طالبت بالحرية وتبي يكون لها راي مالها غنى ابد عن الرجل
خالد : ترا جداني جو معي
النوري : صدق جدتي منيرة جت
رحت ركض ابي احبها مدري ليش احب جدتي منيره مره يمكن لأنها حنونه حيل يمكن لأنها داري إحساس الكل وماتحب تجرح احد وتبي الكل مبسوط المهم وقتها رحت ركض لقيتهم جالسين بالحوش وحاطين دلال القهوة نطيت بحضن جدتي منيره وقعدت احب خشمها واضمها وهي كانت لافه يدينها علي وتضمني كأنها تحميني من هجري الدنيا ارتحت حسيت بأمان مو طبيعي ما فوقني الا صوت جدي راشد
جدي راشد : الحين تسلمين على الحرمه وتخلين الرجال
ابتسمت ورحت ابي احب خشمه بس هو بمزح دفني وقال خلاص ماعاد ابي حبتس روحي لجدتس
لكن انا عاندت وجيت يمه وبسته على خشمه وفي خده بقوه لدرجه انه قال يا خالد تعال حوش اختك عني لا تذبحني
الكل : ههه ضحك وقتها على كلام جدي راشد هذا يحبنا يمكن عشانا عيال بنته فلوه أي لا تضحكون كان اسم أمي فلوه
امي فلوه : النوري وين اخوانك الباقين
النوري : يلعبون في الملعب توهم جايبين فيها ملاهي
امي : ملاهي ونادت اخوي خالد روح ناد اخوانك
تو خالد واقف يبي يناديهم الا كلهم داخلين راشد وسارونه ومنور كنت أناظرهم وانا منقهره يعني ما فقدوني ولا احد جا يناديني
اجتمعنا هذاك اليوم كل العائلة زوجة خالي محمد وعيالها وجداني كلهم من امي ومن ابوي واخواني وكان يوم حلو حتى لو صار فيه طق
تلبدت السماء بالغيوم اصبح الجو خلاب بدى ينزل رذاذ من المطر

الجزء الرابع
صار المطر يصب صب وأكيد أذا بيوتنا من طين راح تتأثر كنا بين خوف وبين فرح خوف من أن ينهد بيت الطين القديم حق جدي على بيتنا الشعبي وفرح بشكل المطر خاصه تحت أنوار اللمبات الرئيسية حقت الشوارع كان قطرات المطر تنزل تعاند بعض وحده ورى الثانية جمعتنا أمي وخلتنا في المجلس يمكن هو أمن شي في بيتنا هذيك الليلة ما نمنا لا انا ولا منور ولا رشود ولا عزوز ولا سارونه من الضحك كنا نضحك مدري وش عليه يمكن فرحه لأنا كلنا جميع وجداني كلهم معنا وامي وابوي وخالد وسعد بعد مدري كيف المجلس وقتها خذانا أخر شي خفنا يوم سمعنا صرخة أبوي هنا كلنا استكنينا وسكتنا غصب علينا
أبوي بصرخة : متى أن شاءلله بترقدون
جا الصباح وقمنا مثل العادة الساعه ست شمينا ريح الفطور كانت أمي تقوم مع أذان الفجر وتصلي وتسوي القهوه والفطور كان فطورنا قرص يمكن اغلبكم ما يعرف وشو القرص بشرحه حسب طريقتنا يمكن السعوديين يعرفونه لكن كل واحد له طريقته لكن انا بقولكم وشو قرصنا كانت امي تعجن عجينه وتخليه متوسطه مو رخوه ولا قاسية وبعدين تجيب التاوه وتحط شوي زيت واذا احتمت حطت عليها العجينه وفردتها في التاوه " التاوه يعني الصينية مثل الي ينحط فيها الكيك " وقصرت عليها لحد ما تحمر من تحت وتقلبها وتحمر من الجهتين وتستوي اذا استوت انها مقطعه بصل وحاطه عليه سمن بري ومخليته على النار وحطت شوي عليه بزار وبهارات وكركم وشوي ملح وجابت تمر فردات من التمر وقلبته شوي على النار مو لازم يستوي البصل اهم شي يتقلب مع السمن لو عشر دقايق ثم تجيب الهاون وتقعد تدق القرص " تعرفون الهاون ناس يسمونه يد النجر هذي اله لدق القهوه في القديم ودق الهيل وبعد دق القرص " وبعدين تدق القرص مع البصل والسمن لحد ما يصير مفتفت ناس يسمونه حنيني وانا اقول الحنيني يختلف صح فيه شوي منه لكن يختلف عنه المهم كانت امي تسوي لنا قرص وحليب بزنجبيل
وتجيبه لنا بالحوش الي فيه النخل لأن الجو حلو كان كل جداني فيه ويسولفون عند المشب " المشب يعني مكان يوضع فيه النار " حلو توصيفاتي
كان سعد وخالد وراشد وعزوز وابوي وجداني الثنين مجتمعين يتقهوون وفرشو السفره وحطو الفطور لهم والحريم فطورهم بلحالهم كنا ناكل ونضحك عشان البراد وريحة المطر بعد ما خلصنا فطور وطلعنا نبي نشوف المطر لقينا بحيرات ماء قدام البيت وقدام البقاله وقدام المخبز والبوفيه لكن حنا بزران ما يردعنا شي جبنا لوح خشب وقفنا كلنا عليه وصرنا نسويه مثل السفينه كان شكلنا يضحك كنا نضحك لكن للحظة جمدت ضحكتي شفت سبحان الله اغرب ابتسامة بالوجود كلها انسانه ابتسامته غريبه صح انها تجذب صح فيها شي حلو لكن انا وقتها اخاف منها صدقوني اخاف من ابتسامته حاولت اركز في لعبي ولا ابين اني مهتمه له كن هو على طول نط للخشب الي انا فيها والبنات وماراح للراشد مع انه صديقة لانط لنا كل البنات يناظرون فيني كنت وقتها ما سكه العصا الكبيره حقت سعف النخل الي ادف فيها الخشبه كنت شاده عليها يدي بقوة ومابي ابين له اني خايفه منه ولا مهتمه له لكن هو قرب مني وقعد يطالعني وهو مبتسم ويسوي حركات بعيونه ام كيف اشرح لكم كان يصغرهم شوي ويحرك فكه يمين ويسار وانا كنت اناظره يمكن ملامح وجهي متجمده عيوني فاتحتهن على وسعهن ومره مشدده على فمي وماسكه شفايفي بقوة كأني مابي اسناني تبان و على طول مسك العصا الي بيدي وسحبها ماهمه اذا وجعتني او لا وانا بس نزلت دمعة وحدة من عيني وعلى طول دفيته بالماء ما كان متوقع اني بدفه لكن يوم شفته طاح في المويه ركضت ركضت بسرعه لأمي وجيت وراها وهي كانت تتقهوى مع ام سعد وجداتي
امي : بسم الله عليك وش فيك ترتجفين
النوري : يمه بيطقني بيطقني سلوم
امي : الحين كل عيال الحاره تتظاربين معهم وسلوم تخافين منه
جدتي نوره لأن سلوم ولد بنت صيته تحامي عنه
جدتي نوره : تلقينها مخطيه عليه ولا سلوم اعرفه ما يطق احد
النوري : سلوم والله انه يطقني دايم ويمعط شعري " وقعدت اصيح لان جدتي نوره ما صدقتني "
• صح سلوم ما يطق احد والكل يحبه بس من يشوفني يطقني مدري وش فيه علي
جدتي منيرة وكأنها تأثرت يوم شافتني اصيح
جدتي منيرة : والنوري بعد ما تخطي ولا تطق احد
فرحت وناظرت جدتي منيرة سبحان الله كل وحده تحامي عن عيال بنتها مدري ليش الجدات يحبون بنات البنات اكثر من بنات عيالهم رحت ورتميت بحضن جدتي منيره وضمتني مثل دايم مقدر اوصف لكم شعور كل ما تضمني امي منيره مدري سبحان الله هجري الانسانه عجيبة حتى امي اذا ضمتني مو مثلها صح امي بعد مشاءلله وتحبنا وماتحب احد يخطي علينا بس امي منيرة حنونه بزيادة ما ودي اقوم من حضنها انسى الناس انسى كل الي حولي ودي بس انام بحضنها احس بدفا كن الدنيا برد وحضنها الدفا الي يدفيني يمكن لأنها بعد تقعد تمسح على شعري وتذكر الله وتقول كلام ياناس روعه كلام عسل تقعد تقرا علي خلاص نفسيتي تتغير واقعد اضحك وازعجهم
كدر علي فرحتي وراحتي يوم سمعت حس عمتي صيته وهي جايه تمشي وصوت سلوم دفنت وجهي مره ثانيه بحضن جدتي كأني مابيها تشوفني
جدتي نوره : وشف ولدك
رفعت راسي اناظر بنص عين كانت عمتي لافه سلوم ببطانيه خفيفة وجلسته جنب المشب الي فيه النار
ابتسمت وقتها معقولة اكون مجرمة فرحانة بالي سوته يمكن ليش لا قعدت اضحك الي يشوفني يقول كاسبه فلوس لكن هذاك اليوم تعجبت بتقولون ليش لأن سلوم ما علم أنه أنا الي رميته عدلت جلستي و أنا أسمع عمتي تسولف وتضحك وكأن شي ما صار لا وبعد باستني مع غمازاتي دايم عمتي تموت في غمازاتي وتاخذ اصبعها وتحسس عليها خلتني غصب اضحك ومع ضحكتي رفعت عيوني شفت سلوم يناظرني بنظرة غريبة شوي مقدر وقتها أحكم وش نوعها لكن خلتني أزيد ضحك يمكن أبي أقهرة
جدتي نورة : الحين تضحكين وقبل شوي تصيحين
عمتي صيته : ليش من يبكي بنيتي
مدري وقتها حبيت أقهره زيادة وقعدت اطالع عمتي بنظرات تخلي الواحد غصب يتعاطف معي وجيت يمها
النوري : عمتي
عمتي صيته : عيون عمتك
النوري ونظراتها على سلوم : شوفي سلوم دايم يطقني
سلوم ما أهتم وجر البطانية عليه وتدفى أكثر
عمتي : والله اذا سمعت يا سلوم أنك مديت يدك على النوري ليجيك طق
سلوم من تحت الحاف : بطقها وامعط شعرها بعد
يمكن لوتشوفون وقتها شفايفي ترحموني قطعتها تقطيع وأنا أعض عليها
عمتي وهي تضحك : مد يدك عليها وبتجيني تطلب مني اخطبها لك وشوف من بينفعك
ماهتميت بزر ما كأن الموضوع يعنيني قمت ركضت اروح اكمل لعب مع البزران الباقين بالشارع
بس شي لفت نظري كنت اشوف جدي يحمل جراكل زرقا على سيارته كنا نلعب بالطين نجمع المويه ونصبها فوق الرمل ونسوي طين ونبني بيوت كنت ابني البيت وأنا أناظر جدي وسواقنا ابراهيم وهم يشيلون الجراكل ويحملونها بالسيارة ماهتميت جلسنا نضحك ونلعب بس شوي الا ابوي يجي ويرجع السيارة على ورى عند باب الحوش وتطلع امي بجلالها وجدتي ويجي جدي وابراهيم ويوقفون مع بعض وبدى ابوي يفتح صندوق السياره كانت ام غمارتين وبدو يحملون على طول فزينا انا وروشد يمكن الي انتبهنا وبصرخه وحده
راشد والنوري : يطلعون خيامنا
رحنا ركض لهم ولحقتنا منور وسارونه وفطوم
راشد : وش تسوون
كانوا مشغولين ومحد رد على راشد بس انا مسكت طرف ثوب امي وصرت اجره
النوري : يمه يمه
امي وهي شوي معصبه : وش تبون
النوري : وش تسوون
امي : نبي نروح للبر نبي نخيم
منور : والمدرسه وش نسوي
امي : تداومون مع ابوك اذا داوم يوديكم على دربه
قعدنا ننط ونضحك خلاص ملكنا العالم بنروح للبر بنلعب على الطعوس بنغير جو صح نسيت اقولكم زمان يوم كنا صغار كان اذا جا مطر نخيم والي يدرس ويداوم يروح ويجي يعني مكان تخييمنا مو بعيد قريب اهم شي فيه غدران << جمع غدير
سارونه بعبره : وحنا بنروح معكم
منور : أي اكيد بتروحون معنا
سارونه : طيب ابوي مو فيه
النوري : روحي لامك واسئليها
راحت سارونه لأمها وقالت لها انهم بعد بيرحون معنا بس بيتاخرون لحد ما يجي ابوهم من القصيم وبيتاخر يوم لان فيه امطار على القصيم مره وما يقدر يجي الجمعه وهذاك اليوم راحوا سعد وسارونه لبيتهم عشان يقفضون عفشهم ويجهزون واذا جا ابوهم يجونا بس حنا عندنا سواق وجدي فاضي ما وراه شغل على طول اخذ اغراضنا وراح مع دنه وعمال يبنون الخيام ويجهزونها قدامنا من فرحتنا هذاك اليوم صرنا نصايح نبي نروح مع جدي لدرجه ان ابوي عصب وقال اذا مراح نسكت مراح يودينا وعشان كذا سكتنا صح نسيت اعلمكم بعد خوالي بيرحون معنا جدي راشد وجدتي منيرة وطبعا اخوي خالد وبيتصل ابوي وبيعزم خالي فهد يووه نسيت اعلمكم عن خالي فهد الي بالشرقيه الي راح عشان الترقيه اذا تتذكرون هذا سلمكم الله عنده بنتين كبار بالمتوسط اكبر عنا يعني يتغطون نجلا ونجود ولد واحد وحيد خالي ويموت فيه اسمه حمد وهذا ببتدائي من شلة رشود كان ابوي يبي يعلمهم انا نبي نخيم اذا بيجون لمنا وبيسيرون علينا مدري وش رد خالي اتوقع راح يجينا
ايوى نرجع يوم شفت ابوي يدخل حوش جدتي وبعدين طلع وكلنا جالسين على كوم الرمل الي قلتلكم قبل عنه كنا نتفرج عليهم انا ومنور ورشود قاعدين نراقب حركاتهم طلع ابوي وقعد يكلم جدتي وبعدين شفنا واحدطويل واسمر جاي يمشي وقف مع ابوي وجدتي وقعد يكلمهم وبعدين راح وجا ب
عد شوي بسياره كبيره وشفت ابوي يوم رفع ثوبه وربطه على خصره ودخل الحوش مع هذا الشخص الاسمر وجلسوا يطلعون الغنم وحده وحده ويركبونها بالسيارة
وحنا يوم شفناهم يركبونها ركض لمهم وما قربنا مره عشان ما يطردونا على طول عرفنا ان جدتي تبي تطلع غنمها معها بالبر ما تقدر تخليها بالبيت من يبي يهتم فيها والارانب والنخل ومن يهتم فيهم جدتي قالت لام احمد
قعدنا نضحك وفرحانين مره عشان بيودون الغنم معنا بتقولون ليش تفرحون بقولكم عشان اذا راحت الغنم قعدنا لعب عليها ونركض وراها اذا ابعدت عن الخيام ومحد يعلم كنا وقتها كل واحد يستر على الثاني بس احيانا جدتي تكشفنا مدري شلون يمكن عشانا اطفال والبراءة تشع من عيونا وعلى طول ننعرف اذا كذبنا
جت امي تنادينا عشان نشيل شنطنا وملابسنا وعلى طول حملنا اغراضنا ومشينا بسيارة جدي الجيب لان جدي اخذ سيارة ابوي الي فيها الخيام ومشينا للبر وكانت السياره الكبيرة الي فيها الغنم ورانا لو تشوفون يوم نمشي على الطريق وحنا نغني وصاجين السياره صج باصواتنا صح نسيت اقولكم ومعنا خالد وجداني التقينا فيهم عند محطة البنزين قعدنا نمشي شوي على خط وبعدين طلعنا من الخط ورحنا لدرب مو مزفلت فيه رمل مشينا شوي وكنا نمشي بين جبال كبيره ونشوف الماء والغدران قطع قطع على الدرب وبعدين طلعنا على غدير كبير وكنا نشوف الناس حوله مجتمعين وكلنا تلقونا عند الدرايش نطل منها ومطلعين روسنا ونضحك ونصايح عليهم بصوت عالي مدري وش نقولهم بس كنا نبيهم يسمعونا وبعدين لقينا شجر كبار ولقينا مخيمنا جنبه حزم كبير مره " حزم + طعس + جبل " كلها تجي بمعنى واحد فرحنا بيكون هالجبل مكان لعبنا طلعنا من السياره وركض على الجبل وشوي نرقاه وشوي ننزل
ما كنا مهتمين بالاغراض ولا كيف ينزلون الغنم ولا كيف يبنون حوشها ولا كيف يرتبون عفشنا اهم شي نلعب جلسنا نلعب ونضحك لدرجه ما حسينا الا بامي تنادينا عشان نتغدى
وقتها نفسيتنا مفتوحه للغدا السما فيها غيوم وكأنا المغرب والأرض ممطوره وفيها غدران يعني فرحه ما توصف وجو لو كنت رسامه رسمت اشكالنا ومخيمنا وجونا والمطر يعني انتو بس تخيلوا وراح توصلون لأشكالنا
تدرون تعب اليوم قايمين من الصباح ومتغدين اكيد بتلقونا متخدرين بس ما نقدر ننوم وتو العصر ما جا
شفنا ابوي راح يمشي يبي يركب سيارته نطينا كلنا
راشد : يبة وين بتروح
ابوي : ابي اتفرج على المنطقة حولنا
راشد : بروح معك
ابوي : اركب
منور والنوري : وحنا بعد بنروح
ابوي : يالله بسعه اركبو قبل ما يجي عزوز ازين له عند امه
رحنا ركض قبل ابوي ما يهون وركبنا في الصندوق ورشود مع ابوي داخل
وقنا وتمسكنا وصرنا نضحك بصوت عالي
بدى ابوي يمشي ويمر على ناس وهم جالسين عند الغدران وفارشين فرشاتهم ويتقهوون وكنا نتفرج عليهم وبدينا نمشي ونمر على ابل وراعيها بجنبها وكنا نضحك بعدين ابوي شوي غير المسار ومشى لقينا سياره اعرفها مره مو غريبة علي اكيد دام مو غريبة فصاحبها اعرفه زين كان سلوم وعمتي صيته وابوهم جايينا كانوا توهم جايين بعد ما صلوا ابوهم الجمعه ومعهم عفشهم وقف ابوي اثاري رشود يبي ينزل ويركب مع سلوم كان ابو سلوم يأشر لي انا ومنور ويسوي لنا باي باي وكانت منور تسوي له نفس الحركه لكن انا عيني على الي يسويلي حركات بوجه ودي ياناس اكفخه وانا اشوفه بنظرات استهزاء بعدين مشى ابوهم وتركنا
ومشى ابوي ولقى غدير ونزل عنده ونزلنا معه
ابوي وهو يبتسم : من يبي يسبح
قعدنا نضحك وجلسنا نلعب بالمويه ونرش على بعض وابوي يتغسل منه ويتوضى وبعدين صلى العصر وطلب منا نركب ونرجع للبيت
رجعنا للمخيم شفناهم فارشين فرشه بين المخيم وحاطين عليها دلال القهوه والشاهي ومراكي وكان جداني جالسين فيها وجا ابوي وقف السياره عندهم رحنا انا ومنور لجدتي عند الغنم
النوري : جده وش تسوين
جدتي نوره : ابي ازين مكان الصخال وادفيهم لا يبردون
كانت جدتي مزينه صندقة صغيره ومجمعه فيها الصخال
منور : اقول النوري انتي حليتي الواجب
النوري : أي حليته من زمان
منوره وهي تسوي نفسها مسكينه : تعالي ساعديني ما عرفت ازين الهمزه حقت الالف
النوري : لا بتطقني استاذة ساره سويه انتي بنفسك
منور وهي شوي وبتصيح : ما عرفت
مابي مابي روحي لراشد او خالد ورحت العب وقتها وخليتها مسكينة مدري وقتها وش صار عليها
بدى الليل يليل ومثل العادة امي تسوي عشانا بدري وتعطينا ورحنا لداخل الخيمه ولقينا فرشنا مفروشه وقبل جلست امي تسوي شعورنا وبعدين لفت علينا شيل ونمنا

الجزء الخامس
أستاذة ساره بعصبية :يا نوره سولفي انتي وفطوم بعد الحصه
كانت اول مره استاذه سارة تعصب علي كنت اعلم فطوم وش سوينا في البر سكت وماعاد بعدها تكلمت
"وحنا في الساحه "
فطوم :ليش زعلانه عشان استاذة ساره عصبت
نوره : أي اول مره تعصب علي
جتنا منور وهي تاكل سندوتش حقتها : بنات بنات تدرون غاده وش تقول عنكم
فطوم : وش تقول
منور : تقول انتو كسلانات مو شاطرات
فطوم وهي تحط يدينها على خصرها : حنا اشطر منها اصلن اهي ام شعر منفوش
النوري : ههه
ضحكت هذاك اليوم ومت ضحك على فطوم تتكلم وتعاير البنت ولو تشوف البنت قدامها بتهج وما تقدر تنطق بحرف واحد
رجعنا وجلسنا بزاوية الي نتفسح فيها وكنا مستعجلين عشان نقعد نلعب كنا بنات فصلنا نسوي دائره كبيره الحين نسيت طريقة اللعبه بس الي اتذكره من العبه كنا لازم ندوس رجل الي بجنبي عشان تطلع خارج اللعبة
سمعنا صوت الجرس وصفينا طابور ومشينا لفصولنا يوم وصلنا لفصلنا الا استاذة ساره واقفة اصبرو لا تدخلون يالله ننزل تحت ومشت ومشينا مستغربين وراها مع اني كنت شوي زعلانه وابين لها اني متضايقة مشينا وستغربنا يوم وصلت الله يعزكم لدورات المياه مو داخل الحمامات لا للمغاسل الي برى قعدنا نشوفها وبعدين خلتنا مجموعات وقالت اليوم درسنا بيكون عن
صفة الوضوء
ترى مو زين ذكر الله في الحمام نفسه الله يكرمكم بس حنا كنا بمغاسل للاغتسال
بدت تشرح وتقول آيات وأحاديث
قال الله تعالى : { يَا أَيُّهَا الَّذِينَ آمَنُواْ إِذَا قُمْتُمْ إِلَى الصَّلاةِ فاغْسِلُواْ وُجُوهَكُمْ وَ أَيْدِيَكُمْ إِلَى الْمَرَافِقِ وَ امْسَحُواْ بِرُؤُوسِكُمْ وَ أَرْجُلَكُمْ إِلَى الْكَعْبَينِ }
عن أبي هريرة رضي الله عنه أن رسول الله صلى الله عليه و سلم قال : " إذا استيقظ أحدكم من نومه فليغسل يديه قبل أن يدخلهما في الإناء ثلاثاً ، فإن أحدكم لا يدري أين باتت يده " متفق عليه (.
عن حمران أن عثمان رضي الله عنه : " دعا بوضوء فغسل كفيه ثلاث مرات ، ثم تمضمض و استنشق و استنثر ، ثم غسل وجهه ثلاث مرات ، ثم غسل يده اليمنى إلى المرفق ثلاث مرات ، ثم اليسرى مثل ذلك ، ثم مسح برأسه ، ثم غسل رجله اليمنى إلى الكعبين، ثلاث مرات ، ثم اليسرى مثل ذلك " ، ثم قال: " رأيت رسول الله توضأ نحو وضوئي هذا " متفق عليه (.
عن عبد الله بن زيد أنه : " توضأ وضوء النبي صلى الله عليه و سلم فأكفأ على يديه من التور فغسل يديه ثلاثاً ، ثم أدخل يده في التور فمضمض و استنشق و استنثر ثلاث غرفات ، ثم أدخل يده فغسل وجهه ثلاثاً ، ثم غسل يديه مرتين إلى المرفقين ، ثم أدخل يده فمسح رأسه فأقبل بهما وأدبر مرة واحدة ، ثم غسل رجليه إلى الكعبين " متفق عليه
(والتور: شبه الطست).
اليوم وحصتنا عن صفة الوضوء الحصه الجايه عن نواقض الوضوء وبعدين جابت بنت وخلتها تتوضى قدامنا وتشرح لنا وكل شوي تطلع ثنتين ثنتين منا و نتوضى كنا نضحك ومستغربين هذا بدرس الفقه وقالت اول شي بعلمكم كيف تتوضون وبعدها كيف تصلون
رجعنا لفصلنا وحنا نضحك ونسولف ونركض كل وحده تبي توصل قبل لكرسيها كنا مستمتعين بشرحها وطريقتها نسيت اني زعلانه فرحت يوم قعدنا نطبق ونسيت كل شي وحان وقت الطلعة
طلعنا ندور على ابوي لكن ما شفناه بس سمعنا احد ينادينا التفتنا شفنا رشود وسلوم مع خالد وهم الي مرونا يبون يوصلونا رحنا ركض انا ومنور نبي نسبق من توصل قبل ويكون لها مكان مميز بالسياره لكن منور سبقتني وجت على الدريشه وانا جلست جنبها بجنبها لداخل
خالد وهو يبتسم : بباشر عليكم وش تبون تشربون
منور حركتها كثيرة وما تجلس بمكان واحد اقلقتني
منور : انا انا ابي ميرندا
النوري : وانا ابي بيبسي عشقي الأبدي
راشد : وانا ابي مثل منور ميرندا
وقف خالد عند المحطه ونزل وكل العيال نزلو معه ما خذينا الا الي يطل علينا مع الدريشة كان سعد وهو يبتسم
النوري : سعد وين سارونه
سعد وهو يضحك : معي في السيارة
قلت بروح معكم وعلى طول منور تحب نقلدني
منور : وانا وانا سعد الله يسعدك بروح معكم
سعد وهو مبتسم : حياك الله
نزلت منور لأنها اقرب وانا قعدت اربط خيوط جزمتي لأنها نفسخت وجيت بنزل
الا سلوم ماسك يدي
سلوم : على وين
كنت بطنشه خالد معنا ومستحيل يخليه يمد يده علي ناظرته : بروح مع سعد
سلوم : مافيه ادخلي بسرعه
النوري : وانت وش دخلك فيني
بعدين اهو اخذ اصبعه وحطها على راسه وقال : كيفي
سمعت سعد يناديني يبيني الحق عليهم وقعدت اطالع سلوم ابيه يفك ايدي وكل شوي التفت على سيارتهم خايفه يروحون ويخلوني
جا خالد يمشي ومعه كيسه : النوري كلكم ترحون وتخلوني
طالعت بخالد اموت فيه : خلاص بجلس معكم
اشرت لسعد اني بقعد مع خالد هنا فك سلوم يدي وراح ورى على الدريشة وانا فرحت لاني بعد بصير جنب الدريشه وبطلع راسي منها وبتفرج على كيفي
سبقنا سعد ومنور مدري وش صار في سيارتهم لكن انا ويا الي معي صرنا ناكل
فش فاش ابو شمس ونشرب بيبسي ونسولف سوالف كثيره بس يوم طلعنا على البر وخلاص صرنا نمشي في البر شفنا الغدران قعدنا نصايح على خالد يوقف عشان نلعب
وفعلا وقف خالد ونطينا وقعدنا نلعب وقتها حتى سلوم ما قالي شي قعدنا نرش على بعض ونضحك بصوت عالي اصوات ضحكنا كأنها تنعاد براسي الحين ونسمات الهوا وصوت الشجر كان فيه نسمة هوا وكان فيه طيور اصواتها غريبة كان لها صدى على الماء على اصوات الشجر كأنها لوحة فنيه طبيعيه كلنا انا وراشد وسلوم اتفقنا على خالد وقعدنا نرشه وهو يتوعد فينا ويقول شوفوا من بيوقفكم مره ثانيه عند الغدران
رحت ركض له وقعدت الف يديني على خصره واعتذر منه : خلاص خلاص توبه مراح نسويها مره ثانية
وركبنا ومشينا وقربنا صوب اهلنا شفناهم من بعيد الخيام وحوش الغنم الحديدي والوايت والجبل الي جنبنا
نزلنا وشفنا جداتي كانوا فارشين برى الجو روعه حلو يغيم شوي وشوي يروح الغيم جينا ركض لمهم شفنا سعد جالس ويتقهوى معهم وسارونه ومنور يلعبون على الجبل رحت لم الخيمه اغير مريولي وجبت شنطتي وفرشت دروسي وقعدت احلم المطالعه = القراءة وقعدت اكتب حرف الباء واكررة واحل واجب الرياضيات ابي اخلص دروسي عشان اروح العب معهم يوم خلصت وكتبت دروسي دخلتهم الشنطه وجبت كتاب الاناشيد وقعدت اكرر
مليكنا مليكنا مسكنه قلوبنا نحبه لانه إلى العلى يقودنا "ههه نسيت باقيها الي تعرفها تكملها "
جتنا سارونه ومنور : وش تسوين
النوري : اذاكر عشان اروح العب معكم
منور : يوه بعدين خلينا نلعب اول
النوري : لا اول شي بذاكر وبعدين بروح
جت منور وفتحت شنطتها وقعدت تبرا اقلامها وكل شوي تبرا وينكسر وترجع تبرا القلم لدرجه انها وسخت الخيمه
سارونه : يوه النوري حنا الحين مابعد جينا مليكنا تونا
النوري : لا حنا اليوم خذينا مليكنا
سارونه : بوريكم النجمه الي حطتها لي المدرسه في دفتري
مضى على وجودنا بالبر تقريبا اسبوعين وكلكم عرفتو كيف طريقتنا اذا رحنا لمدرسه وإذا جينا هذاك اليوم كنا مسوين عزيمه كبيره صح نسيت اعلمكم جانا خالي فهد وعياله فهد ونجود ونجلا وكانت عزيمتنا كبيرة مره كل الي في حارتنا جونا من ربعنا وعيالهم وجيرانا وجتنا فطوم كنا مجتمعين البزران حول غدير بعيد شوي يعني مثل دايم نتسلل ونتفق ونروح يمه وكنا نلعب لعب فيه لدرجه لو تشوفون شعورنا تخترعون كانت مصبغه به تصبيغ اتحدى أي صبغة امريكية تجي مثل لونه الطبيعي ههه
المهم ارجع لقصتي ايوى كنت انا وسارونه ومنور وفطوم نلعب ونضحك وكان معنا رشود وسلوم وحمد ولد خالي فهد كان حمد انسان غريب مره يختلف عن سلوم ورشود صح يلعب معاهم بس كان يتفرج علينا وحنا نرش بعض ونلعب بالطين خذيت رشه من المويه ورشيتها عليها اتذكر وقتها انه تأفف وسبني بكذا سبة وراح بعيد ينظف ثوبه كأنه يتقزز منا وقعد يلعب بكورته بعيد عنا حز الموقف في قلبي ولا بغيت ابين بس الي زاد الطين بله ضحك سلوم يا ناس اكره واكره اكثر يوم جلس يضحك علي يعني هو من بد هالبزران انتبه لسب حمد لي مع ان البقيه ما عطوني خبر شفنا سياره جتنا من بعيد كلنا وقفنا لعب وقعدنا نطالع وش نبرر الحين وش نقول لو بنكذب اشكالنا برهان على فعلتنا
كان سيارة جدي ويسوق فيه سواقنا ابراهيم جى يمشي وقف كان جدي يطالعنا وساكت ما درينا وش بيقول لنا مع اني اعرف جدي زين وما اتوقع راح يضربنا بس مدري ليش حسيت بخوف حسيت ان فعلن سوينا شي غلط روحتنا للغدير بلحالنا ولعبنا فيه غلط ابراهيم هو الي تكلم
ابراهيم : انتوا ايش سوي
راشد رد عليه : شدخلك انت
جدي بعصبيه : عيب ياراشد حتى لونه سواق تحترم الشخص الي اكبر عنك
" اعتذر منكم اذا قلت الحين ما اشوف تربية مثل اول لكن اول حياتهم مدرسة لكن حنا الآن اكتفينا بالمدرسه تعلم عيالنا وخلينا التلفاز يكمل تربيتهم لكن قبل كانت الام تربي الاب يربي الجدان يربون كان الطفل منهو صغير يضيف ويرحب كان يعرف العيب والزين والشين الحين مع احترامي لاطفالنا نقدر نقول دلوخ ومابي احد يزعل من كلامي وما راح اقول الكل لكن اقول الاغلبيه "
نرجع لحوارات القصة
راشد وهو منزل راسه : جدي جدي انا اعتذر منك
جدي : اذا تبي تعتذر اعتذر من ابراهيم
وفعلا اعتذر راشد من ابراهيم
جدي بحزم : يالله امشو واذا بغيتو تبعدون بلغو اهلكم لو احد فيكم غرق او كان في الغدير زاروط =" حفره غميقه تبلع او تزرط الشخص "وش بتسون ومن بينقذه
فعلا كلام جدي في محله لو غرق فينا احد محد راح يقدر يساعده ما انتبهنا لغلطتنا بزران ما همنا الا اللعب رجعنا وكلنا ركبا فوق وسياقة ابراهيم يسرع وجدي مثل العاده يصارخ عليه يهدي وكلنا نضحك على جدي وعلى ابراهيم لانه شايب بعد وكأنهم يعاندون بعض
نزلنا وكل واحد اخذ علقه من امه عشان اشكالنا حتى رموشنا ما سلمت من الطين
بعد ما اغتسلنا رحنا لم الخيمه وكان فيه حريم كثار حريم عماني وحريم جيرانا وطلعنا بزران ما نحب جو الجمعات نبي نلعب بلحالنا شفت نجلا ونجود بلحالهم وكانوا على الجبل الي قلت لكم عنه رحت لمهم سارونه والبنات الباقين راحو يلعبون عند حوش الغنم رحت ركض لمهم ولقيت نجلا معها عصا وتخطط على الرمل الي كان في عرض الجبل وتسولف مع نجود
نجلا : هلا والله هلا وغلا بالنور كله هلا بالنوري
جيت وانا اتشقق من الوناسه بزر ولقى مثل هالترحيب بيوصل للسقف كانت نجلا اكبر من نجود بس فيها نعومه وجمال غير طبيعي حتى نجود نفسها بس نجود تحسون فيها قوه الا نجلا تحسون ان نسمة الهوا تجرحها فيها رقة غير طبيعيه كانت رافعه برقعها من على راسها وبسمتها جذابه
نجلا : تعالي النوري جنبي قولي لنا وش سويتي بالمدرسه
النوري :استاذة ساره تحبني صح عصبت علي مره بس دوم تحط لي نجمه وعطونا انشودة الله وعطونا مليكنا وطلع البدر علينا وبديت اعلمها عن ادروسنا وهنا حكت نجود
نجود : نوره انتي تحبين الدراسه
كان في سؤالها قوه غريبة الحين لما اشوفها واتذكر هذيك الايام اقول سبحان الله اثاري الانسان الي قوي شخصيته ينبان حتى لو كان صغير يمكن تعجبون سؤالها عادي تحبين المدرسه بس طريقتها في طرح سؤالها شكلها وهي تناظرني خلاني ادري ان نجود قويه
النوري : ام أي احبها واحب استاذة ساره واحب خوياتي غاده وحنان وسعاد وبديت اعد بنات فصلي
نجود : يعني انتي تحبين صديقاتك مو المدرسه
نوره : يوه لالا انتي ماتعرفين وش ابي اقولك انا اقول احب صديقاتي واحب استاذه ساره واحب دروسي كل شي كل شي
ضحكت نجود ونجلا على كلامي وقتها ناظرتهم وبتسمت مسكت نجلا خدودي وصارت تقرصهم وانا ازيد في الضحك
سمعنا صوت رجال يتحنحن نزلوا البنات براقهم وتغطوا بالاجله وانا التفت لقيته
النوري : خالد
خالد : السلام عليكم
البنات : وعليكم السلام
خالد : كيف حالكم يا بنات
تفاوت اصواتهم وهن يردن عليه
خالد : المعذره يا بنات بس انتو رافعين براقعكم وحنا نشوفكم من بعيد والشباب كلهم مجتمعين
شفت نجلا ونجود كل وحده تقول لثانيه ردي عليه قولي ليه اخير نطقت نجود
نجود : اسمحلنا يا خالد ما درينا انكم تشوفونا
ابتسم اخوي خالد : ماصار شي
ونزل راجع وبعد ما راح شفت الخجل في نجلا اكيد بتخجل ولا كيف صارت زوجة اخوي خالد اقولكم الحين سالفة زواجهم وكيف خطبها خاص شكلي مراح اقول مابي تتهون ابي امشي معكم خطوه خطوه نرجع يوم نزل خالد
نجلا : يووه الله ياخذ الشيطان شافونا
نجود : طيب حنا ما نقصد
نجلا : ولو الحين وش بيقول خالد عنا
نجود وهي تضحك : وانتي وش همك وش بيقول خالد طيب ليش ما هتميتي بالباقين
التفتت لي نجلا وانا كنت اشوفهم وفهمت نجود انها ما لازم انها تتسرع وتتكلم
نجلا وقفت : اقولي نجيد قومي واقفة خلينا ننزل
نزلت نجلا ونجود وكنت امشي معهم واسمع سواليفهم مع بعض وكانت نجلا تغني بصوت حلو بس ما اتذكر وش اغنيتها لكن اتذكر نجود يوم تقولها : يا عيني يا عيني
دفت نجلا نجود وهم ينزلون : الله يا خذ ذا الوجه انطمي بتفضحينا
ما فهمت ولا هتميت اني افهم نزلوا هم وراحو للحريم وانا رحت للبنات عند حوش الغنم لكن سمعت صوت خالد يناديني
خالد بصوت واطي : النوري النوري تعالي
النوري : وش تبي
خالد : البنات زعلو يوم قلت لهم
اه يا خالد مالقيت الا بزر تسئلها مثل هالسؤال وقتها اقول والله ان الحب يخبل الواحد اجل فيه عاقل يسئل بزر هالسؤال
النوري : وشو لا نجلا قالت الله ياخذ الشيطان وش بيقول خالد عنا
خالد : هي قالت كذا
النوري : أي قالته وقالت نجود ليش وش يهمك في خالد ماكل العيال بعد شافونا
" والله وقربت بينكم يا نجيل انتي وخلود وانا مدري "
شفت الفرحه على خالد صار انسان غير مسكني وصار يلف فيني وهو يضحك وضمني له
خالد :ياحياة خالد انتي تدرين انك ريحتي قلبي
سالفه عرس خالد على نجلا راح تعرفونها بعدين وبعد نجود من تتوقعون بتاخذ

الجزء السادس
" بعد مضي 3 سنوات "
الأحداث وفاة جدي و رحيلنا
فراق ... وداع ... قسوة ... حزن ..
نعم رحلنا تركنا بيتنا كتمت عبرتي وانا اركض بالحوش تحت النخل ادخل لصندقة الارانب وحتى وهي خاليه من الارانب السدرة شجرة العنب شارعنا الدكان البوفيه ويوم نعسكر فيها برمضان أي برمضان كان كل يوم على واحد بالحاره كان يخلص رمضان يمكن ما جا الواحد الا مره او مرتين كل يوم عند احد كان جو إيماني رهيب كنا نشوف الفوازير بعد المغرب كنا نلعب بالشارع اذا صلينا المغرب عند بيت الي عنده الدول او الي عنده العزيمه اتذكر اكثر لعبة نلعبها شبرا امرا خمس نجوم صرت اركض بشوارع حارتنا كنت اشوف بيوت الطين كنت اشوف الشوارع العامه اشوف المسجد اشوف جيرانا اسمع الأصوات الي اموت فيها صوت الديك لا تضحكون انا اعشق صوته يذكرني بايام طفولتي لأنه مقترن بقومتنا الصباح اسمع اصوات الحافلات الكبار اسمع اصوات غريبه علي اصوت الطيور طير غريب عجيب تدرون وش كنا نتوقع يوم كنا صغار يقول كأنه يقول جديتي احس بحنين لذيك الأيام احس بوله
"يأخذني الحنين من خواطر غيوم الشوق "
يأخذني الحنين لأشياء أجهلها ....
اسمع صوت ذكرني بماضي بعيد ..
بذكرى مازالت عالقة في ذهني ....
أحاول ترجمت الرؤيا الغريبة التي تراودن.. ..
لا زلت تائهة
لا اعرف أي درب أسلك ...
جدار الصمت أشرف على الانهيار .
ولغات البوح قاربت الانفجار .
وسيل التسأولات انصب انهار .
فكيف السبيل ..
لا أعلم هل هذا سر من أسرار الكون ...
هل هي قوة خارقة ... لا يحس بها....
إلا صفوة من البشر...
شيء عجيب !!.. أمر رهيب..!!
لا احد يستطيع أن يتنبأ به ؟
عثرات أو مجرد ذكريات......
لا استطيع أن أدرجها تحت أي مسمى...
لكن ما أنا متأكدة منه
أنها ورقات طويتها ولن استطيع ان ارجعها كما كانت ....
ابحث في دجى الليل ....على نبراس الهدى ...
مازالت الرؤيا معتمة ....لا تظهر أي ملامح!!
فعلا اشياء غريبة تحصل لي ساعدوني انجدوني انتو مثلي احد يا بنات الم الامارات مثلي احد مثل نوره يحس بالي تحس فيه تحن حتى لأصوات السيارات تحن لأصوات الطيور اذا سمعتها بكت تحس بأحاسيس غريبة بشي فريد شي الي حولها ما تكلموا عنه شوارع من يحن لشوارع مغبرة من يحن لأرض لكوم رمل هل الذكرى او هل أيام السعاده هي سر تعلقنا بتلك الأصوات رجعنا من البر وسارت حياتنا عاديه من المدرسه إلى البيت ومن البيت إلى المدرسه وكما تعودنا نلعب في وقت العصر بالشارع ونجحت ورسبت منور باولى وتفرقنا واخذت الأيام بالسير وانتقلنا من مرحله لمرحله لحد ما سمعنا بحادث جدي المرعب يوم لن أنساه صحيح وقتها كنت صغيره بس كنا مثل عادتنا بالشارع نلعب شفنا شخص متلثم بشماغه وجا يمنا وين ابو خالد
وقف راشد : ابوي في الدوام
الرجال : وين يشتغل ابوك ما تعرف رقمه
راح راشد يمش معه وعطاه رقم ابوي كنا نلعب بس سمعنا صراخ وبكي جينا ندخل شفنا جدتي تبكي وتقول لا اله الا الله يارب صبرك يارب صبرك يارب ثبتنا يارب ثبتنا صوت بكي امي يخرع
النوري : يمه يمه وش فيكم صرت اجر امي واهزها ابي تعلمنا وش فيهم يصيحون
لكن محد رد علينا شفت عمتي صيته داخله علينا وماعليها الا جلال
عمتي صيته : يمه ابوي ما مات يكذب من قاله ابوي ما مات
هنا شهقت جدي مات دمعت عيوني جلست جنب امي امسح دموعي وتنزل مو راضيه توقف شفت بكيهم يقطع قلبي اصوات شهقاتهم تروع كانت جدتي مغطيه وجهها بشيلتها وجسمها يهتز هز كانت تقول لا حول ولاقوة الا بالله يارب سترك يارب يارب
بس عمتي صيته تفرك صدرها : راح خلاص راح مراح اشوفه مره ثانيه خلاص اسمحولي مراح اكمل ما عاد اقدر اكمل كل ما اتذكر الأيام هذيك ابكي
\
/
مضت الأيام والشهور وجا يوم ابوي يتكلم اهو وأمي وجدتي كان كلامهم كثير واصوات تعلى وتوطى كان الجو برد وكنا مجتمعين بغرفة التلفزيون ونلعب بورقة لكن مثل عادتي انا ملول وقفت وجيت امشي لقيت جدتي تقول مراح نبيعه بأجره وشو الي يأجرونه بزر ما اهتميت
جا الصباح وراحت امي بدرري مع ابوي وكنا نطالعهم بالشارع ورحنا ركض نبي نروح معهم بس رفضوا يودونا وقعدنا بنص الشارع نطالع بعض كنا في إجازة وقعدنا نسولف
لكن المفاجأة الي درينا بها إن أبوي راح مع أمي عشان يشترون أثاث بيتنا الجديد ما كان احد منا يدري سمعنا ابوي بالصدفه وهو يعلم جدتي ويسولف مع زوج عمتي صيته ويقولها عن بيتنا
احس نفسي بحلم كيف وشلون كيف بنروح ونخلي بيتنا بخلي النخل والطين بخلي ذكرياتي وطفولتي لا مو معقولة بس فعلا بدى كل شي بسرعة شفت فطوم تساعدنا وحنا نعبي سيارتنا من اغراضنا ما خذينا من بيتنا إلا ملابسنا جت امي لنا وقالت يالله امشو ومشينا معهم والتفت شفت فطوم وهي تفرك عيونها مشهد ما راح من بالي كانت تدمع عيونها ركبنا السيارة ومن ركبناها ومشينا شوي انهارت فطوم وجلست على الارض وجلست تصيح بصوت عالي وكنا نسمعه وكنا بحالة صمت كانت عيوني تدمع ومسح دمعاتي بدون صوت و كانت امي تسولف مع ابوي وكان خالد اخوي معه جدتي بسيارة الثانية كان راشد ومنور يتناقرون مع بعض ويتهاوشون بينهم وانا كل شوي اتلفت على حارتنا كنا نمشي ونمشي مع الشارع الرئيسي بين النخيل كنا نمشي ونمر على مزرعه ونتعداها لمزرعه ثانية ونمشي وكأنا نطلع من المزارع ودخلنا شارع ثانوي ومنه شارع رئيسي وتعدينا شوارعنا الي انا متعوده نروح ونرد معها مشينا ومشينا وبدينا ندخل على شوارع وعماير وبيوت وفلل شفنا بيت من دورين ثنين له حوش كبير بس خالي من أي شجره كله بلاط كان صح ابيض مره وكانت بوابة البيت قدامنا بس غريب علي هذا الي بعيش فيه مافيه نخل مافيه طين حتى شارع ما نقدر نجلس فيه اغلب جيرانا ما شفناهم برى كل واحد بيته حسيت كأني غريبة وانا وسط اهلي ليش انا غير ليش انا مو مثل منور اركض واكتشف البيت ليش بس اشوف بيتنا القديم قدام عيوني وكأني فاقدة شخص مو بيت ليش ما عرفت ارد على نفسي ولا على الأسئلة الي داخلي
مشينا كنا نسمع كلام جدتي وامي وكانوا يقولون كلام ويذكرون الله
الدعاء عند دخول المنزل
عن أبي مالك الأشعري - رضى الله عنه - قال: قال رسول الله - صلى الله عليه وسلم: إذا ولج الرجل بيته فليقل "اللهم إني أسألك خير المولج وخير المخرج بسم الله ولجنا وبسم الله خرجنا وعلى ربنا توكلنا ثم يسلم على أهله"
رواه أبو داود
شفنا القسم الي بالحوش كان الملحق المجلس والمقلط والمغاسل
دخلنا داخل العماره مع البوابه الرئيسة لقينا قدامنا سيب طويل و على اليمين صالة كبيرة وكان فيها كنب دائري لونه فستقي فاتح والفرش موج بين زيتي وفستقي وستاير نفس الشي بعدين غرفه فيها على اليسار فيها فرشه بني وسجده بني وبيج ومساند نفس التمويجه بني وبيج ومكتبه بسيطه فيها تلفزيون وبعدها الله يكرمكم دورة مياه ومغسلة برى لغسل اليدين وبعدها غرفة فيها سرير كبير ودولاب بس السرير والدولاب نفس اللون كان عودي غامق كان هذا غرفة جدتي ولقينا الدرج جدتي رجلينا ما تساعدها ترقى فوق جلست على سريرها وحنا كملنا نستطلع البيت كان فيه على طول غرفه وبدورة مياه قالت امي لنا انها لخالد اخوي وان شاءلله اذا اعرس لعروسته معه وبعدها غرفه ثانيه لرشود وعزوز ياحبي لعزوز ما اتكلم كثير عنه يمكن اغلبكم نسى ان لي اخو اسمه عزوز ولا يهمكم ان شاءلله راح اسلط عليه الضوء بعدين ايوى نجي لغرفتي انا ومنور كانت عاديه دولاب وسريرين لي واحد ومنور واحد اخيرا بنرقد على اسرة قبل ما نعرفها كانت بس دواشق الله شكلنا الحين عز وبعدها غرفة امي وابوي وكان فيه بلكونه احسن شي بيتنا ان فيه بلكونه صح امي تطردنا نطل معها لأنها مكشوفه والي برى يشوفنا اذا طلينا بس كانت تخاف علينا نطيح مو قصدها يعني احد يشوفنا لأنا تونا صغار انا برابع ومنور بثالث يعني تونا ما تغطينا
ابد ابد ما حبيت بيتنا سوا ابوي عزيمه وعزم جيرانا الي جنبنا وعزم اكيد عماني وعماتي وخالي فهد وجداني
الحين وين نلعب اجتمعوا البزران الشارع ممنوع نلعب فيه يعني مافيه إلا الحوش نلعب فيه كان صوت اصراخنا واصل اخر الحي كل شوي نلعب وشوي نجتمع دائرة ونقعد نسولف
بعكس راشد وسالم وخالد كانوا ياخذون القهوة ويقهون الرجاجيل خف سلوم عن اول ماعاد صار يهاوشني احسه صار يتجاهلني يمكن لأنه صار الحين كبير وبمتوسط يمكن ليش لا وكانت نجلا ونجود بالمطبخ مع امي يساعدونها بتزيين القهوه وتقديمها لرجاجيل والحريم وانا ومنور كتفينا بالعب او اذا بغت امي انظف أي شي توسخ نجي ونقعد انا ومنور نظفه تغيرت الحياه عن اول صار مطبخ كبير اكثر عن مطبخنا الأول ولون ادراجه بيضا مره وكان دائري وجاب ابوي فرن عزت انا ومنور نطوله اذا جينا نسوي اكل وصرنا نجيب قدر صغير ونحطه بالارض ونطلع عليها عشان نحرك الكشنه او البصل او اذا سوينا اكل وكان بوسط المطبخ بعد مغسلة الي نغسل فيها المواعين كان غير عن مطبخنا القديم ياربي بيتنا غير صار غير كل شي تغير حتى انا ومنور صرنا نغسل ملابسنا وننشرها بالسطح يالله تذكرت النخل تذكرت يوم اصعد عليها واطل على بيوت كل حارتنا واقعد اقطف الرطب وعبي سلتي ونزل بها لهلي يتقهون عليه خلاص خلاص يالنوري خلاص مراح تشوفين النخل مره ثانيه او مراح ترقين عليه مره ثانية
تعبت لحد ما تعودت على حياتي في حارتنا الجديده حتى بمدرستنا صح كنت متفوقة بس كنت احاول اثبت وجودي لأني تونا جدد ولازم يعرفون اني ممتازة وهذا شي صعب علي
مرت الأيام وبديت اتعود شوي شوي صح نسيت اعلمكم المدرسه قريبة من بيتنا كنا نمشي مشي وسواقنا سفرناه بعد وفاة جدي لأنه اكثر شي يحبه وجدتي باعت غنمها مع الارانب أي اقولكم ومرت الايام وصلت لمتوسط كان اخوي خالد مخلص كلية العسكرية وله سنه من توظف مريت ولقيته يسولف مع امي ما كنت قاصده اتسمع بس سمعته يقول ابيها كان يبي نجلا
امي :هذولي بنات اخوي يمه بس ودي تاخذ نجود
خالد : يمه وانا مابي الا نجلا وبعدين نجلا اكبر من نجود
امي : بس نجود قويه سنعه ولا نجلا ياولدي ما تحمل الغربة انت تبي احد يروح معك لكل ديرة تنتدب لها شوي بخميس مشيط شوي بالشرقية شوي بالحفر شوي بتبوك شوي بجده ونجلا يا ولدي ما تحب تبعد
خالد : تكفين يمه لا تحرميني منها انا ابيها اغليه يمه
امي : والله يا ولدي بخطب وبشوف الله يستر لا يرفضون
خالد وهو يحب راس امي : قولي ان شاءلله يوافقون
فرحت يوم سمعت موافقة خالي وزوجته على زواج خالد حتى ولو انه ابتعد عنا واخذ نجلا وراحوا بس كل ما تجي لهم اجازة يجون يمنا
بقى راشد اخوي الي متسلط علي انا ومنور ومخلينا عنده مثل الشغالات انا اسوي له بطاطس مقليه وعصير سان كويك ومنور تغسل ملابسه وتكويها وحيانا يتأمر علينا لا كله كوم واذا جانا سالم الحين من قدهم هو وسالم صاروا بالثانوي واكبر صح سالم تغطينا منه وصرنا ما نطلع عليه بس بعد يزهقونا وهم يلعبون سوني وقدام التفزيون وكل شوي نسوي لهم شاهي وسندوتش وشوي يلعبون سوني وشوي يتفرجون على المباريات كان فيه دوري واحد متعصب هلال والثاني نصر وصياح وحنا المستفيدين كان أي فريق يفوز الي فايز فريقه يعشي من المطعم عرفنا المطاعم صح كان دجاج مشوي شي فضيع وقتها ما يساوي كنتاكي بس عندنا يسواه ويستوي
هذاك اليوم الي غير حياتي كلها كانوا طالع راشد وسالم للمطعم مثل دايم يجيبون عشا وبيسهرون مع بعض وانا ومنور بنسهر بغرفتنا على فلم اجنبي على القناه الثانيه صح نصه مقطع بس العوض ولا القطيعه نزلت بسرعه للمطبخ اجيب لنا بيبسي كنت مخليته بالفريزر يجمد وخذيته وشفت انوار غرفت التلفزيون مشغله جيت ركض ابي اسكرها دايم ابوي يعصب علينا لازم نقفل الانوار رحت بسرعه ومديت يدي على الانوار ابي اطفيها بس لقيت واحد متمدد ومتمركي على المركى صرت اطالع فيع ويطالع فيني شعره طويل ونحيف وخشمه حاد مره وعيونه لا تسئلوني عن عيونه عذاب وربي يابنات لو اوصف مقدر اوصل المعنى المطلوب تدرون اذا صارت العين كبيره وجتها بنيه عيونه كانت ناعسة كنت لابسه جلبيه ولافه شعري أي كلام كان شكلي مبهذل مره جلابية بيت ولولد الي قدامي ملاك ما تحركت كنت اقول في خاطري معقولة هذا سالم معقولة صار حلو كان شماغه جنبه وماعليه الا طاقية ويمكن مخليه شعره يطلع بشكل جنان حسيت بنفسي وهزيت راسي ورتجفت شفتي كنت بتكلم بس لمحت ابتسامة منه بينت اجمل ابتسامة بحياتي رحت ركض وانا ارتجف رميت اغراضنا على سريري ورحت ركض للمغسله اشوف شكلي على طول ليش ابتسم اكيد يضحك على شكلي المبهذل ياربي ليش انا مو مثل منور دايم تحب تتكشخ بالبيت ليش انا ما اهتم بنفسي بالبيت دايم بس انظف والم شعري معقولة ابتسامته ابتسامة سخريه اكيد هو من يومه بزر وهو يكرهني وكل شوي اخذ من المويه وغسل وجهي ابي ابرد حرارة وجهي رحت وجلست على سريري ونسيت بيبسي وصار حار وانا عايشه بعالم ثاني سارحه بعيونه وابتسامته
كانت بداية حبي أي لا تستغربون حبيت سالم تعلقت فيه صرت افرح اذا جا بيتنا وجتمع مع راشد بس انقهر اذا جا ولد شريك ابوي عامر الي جيرانا والي جا ابوي الحي هذا عشان يسكن جنبه وبدى ابوي مشاريعه معه كنت انقهر لاني ما اسمع سواليفهم كان عامر هو الي يسولف وكان يحب يتفلسف شفت عزوز جاي ويشيل شنطته
عبد العزيز : نوره وش تسوين هنا
كنت جالسه على اخر درجه بالدرج واسمع حكيهم
نوره : ابي انتظر ابوي ابي اطلب منه طلب
عبد العزيز : طيب الحين لو يطلع احد من العيال راح يشوفك
نوره : لا محد راح يشوفني بسمع صوته اذا تنحنح
عبد العزيز : نوره ارقي فوق عيب وش بيقولون عنا
نوره : لاحول راح راشد جان عزوز
عبد العزيز : عزوز بعينك يالله طسي
نوره انقهرت كنت ابي اسمع وش يقولون لاني سمعت سالم يضحك مره كنت متحمسه وشو الموضوع الي خلاه يضحك
"صدمة "
كنت جايه من المدرسة وكانت منور غايبه كنت بثاني متوسط ومنور باولى كانت مريضه مزكومه شوي والي وداهم للطبيب سعد انصدمت من الي شفته كان سعد يحكي لولد جيرانا عامر الي معطيني ظهره كلام صدمني كانوا مو منتبهين لي بس صدمتي ان اسم اعز مخلوقة على قلبي واختي بينهم كان سعد يتعرف بحبه لمنيره اختي لكن الي صدمني انه راح يتزوج نجود كيف يتزوج نجود وهو يحب منيره وكيف سعد يحب منيره وحنا نعتبره اخو كبير مثل خالد مشيت وحاولت ما ابين لهم نفسي ماحبيت اعلم منور عن الكلام الي سمعته يكفي مرضها الله يعينك يا نجود كيف تاخذين واحد يحب غيرك شفت شي صقع برجولي وانا كنت فاتحه باب البيت وبدخل دنقت شفته شريط = كست دنقت عليه والتفت شفته سالم كان ياشر لي بحركه باي وباس يده وارسلها لي دخلت وبسرعه لغرفتي ونسيت سالفه منور وسعد ونجود وقعدت شوي اضحك وشوي ارتجف من حركه سالم سبحان مغير الأحوال من كره لحب
رحت بيدين ترتجف وفتحت مسجل وحطيت الشريط وبدت تنهل الكلمات منه
الشاهد الله بدونك ضايق صدري يفز قلبي الى من جابك الطاري انا ذبحني غيابك وانت ماتدري قلبك بعيد وعيونك تسكن افكاري اسوق عمري غلا يوم الغلا مشري وابيع كل البشر واصير لك شاري
كانت اغاني متنوعه كلها شوق وله معقولة معقولة يحبني انتو معي تتوقعون يحبني ولا لا فكروا معي

الجزء السابع
انطلاقة ونمو ذاتي وتحرر بسيط للعادات
منور : يوه النوري صدعتي راسي قفلي المسجل ترى راسي تصدع تعرفيني اكره الرياضيات والحين انا احل واجب الرياضيات وابلا حصه معقدة لو اجي ما حليته صح هزئتني قدام البنات يوه ارحميني انتي كل شوي مشغله ذا الشريط
جيت امشي يمها واطيح على سريرها وهي كانت فارشه دروسها على السجاده الي عند سريرها بالأرض
النوري : هذاني طفيته تصدقين منور فطوم من زمان ما كلمتها دايم اذا التهيت وما كلمتها تكلمني
منور : يمكن طفشت منك
النوري : كش عليك فطوم صديقتي مراح تطفش مني مستحيل
منور : ياربي طيب روحي كلميها وشوله مزعجتني
النوري : مالت عليك ابي اسولف معك واعلمك بخباري
منور : مستغنيه عن اخبارك مابيها
النوري : أي حبيبتي بعدين راح تترجيني وتقولين تكفين نواره عمري نوره علميني وانا اتشرط وقتها
منور : اذا جيتك ذيك الحزه تعالي ناقشيني
وبدينا مثل العاده نتناقر لكن قطعت علينا أمي يوم دخلت وجلست على سريري لا تستغربون امي دايم اذا دخلت غرفتنا تحب تجلس على سريري وتقعد تسولف معنا جيت ركض وجلست جنبها
امي بضحكة : صديقتكم بتعرس
صديقتنا صديقتنا كلمه قعدت ترن بأذني نجود بنت خالي مو صديقتنا ساره لا ساره مثلنا توها صغيره طيب امي تقول صديقتكم
النوري بتردد : من هي يمه
امي : فاطمة بنت جيرانا
منور بصرخه : مو معقوله ليه يمه حرام توها صغيره
نوره : عشان كذا ما ترد علي
امي : مسيكينه مقطعه نفسها من الصياح بس بيدخلونها عليه الخميس هذا وبتروح معه لجيزان
نوره بصرخه : حرام عليهم ليش يمه ليش
امي : وشو الي ليش جاها نصيبها وهم طبعهم كذا
نوره : بس توها يمه بثاني متوسط و توها صغيره
امي : يابنت حنا نتزوج تو عمارنا تسع عشر الحين تحمد ربها عمرها 14 سنه كبيره ما عليها خلاف الله يوفقها
رحت ركض لتلفون البيت امسك سماعه التلفون وتطيح من يدي وارجع امسكها مره ثانيه ايديني ترجف وانا ادق رقم حافظته عن ظهر قلب حتى لو اغمض عيوني ادل ارقامه رن وجلس يرن مو على العاده دايم فطوم ترد من ثاني دقه بس الحين انقطع ورجع يدق مره ثانيه جاني صوت صفيه
نوره : السلام عليكم
صفيه : وعليكم السلام اهلين نوره كيفك
نوره : بخير فطوم فيه
كنت معصبه ابي اقولها لا تخلين احد يتحكم فيك ارفضي ما عليك من أي احد بس من سمعت صوتها المميز غصب ابتسمت
فطوم : النوري كيفك
نوره ببتسامه : بخير يا قلبي شلونك انتي
فطوم : بخير
قعدنا شوي ساكتين
نوره : فطوم انتي راضيه تتزوجين
فطوم وهي تتنهد : ولد عمي كبر خالد اخوك
نوره : بس مو كبير عليك
فطوم : نوره حنا غيركم حنا البنت اذا تغطت خلاص زوجوها يقولون ستر لها
نوره : اهم شي ما تتضايقين
فطوم ضحكت : اهم شي افتك من المدرسة
نوره : فطوم يعني خلاص بتروحين وتخلينا
فطوم : يا عمري يانوره هذا احنا تفرقنا وما صرنا نشوف بعض مثل اول بس بينا مكالمات وهذا نفس الي بيصير اذا رحت للجنوب
سكت ماعاد عرفت اكمل تعذرت من فطوم ودعيتلها وقفلت وقلت يمكن ان شاءلله يكون ولد عمها حبوب ويحبها وقعدت افكر لو اتزوج سالم وش بيصير وتخيل حياتي معاه لكن قطع حلمي صوت راشد
راشد : نوره اليوم سوي لنا عشا فيه مباره بين الهلال والشباب وبيجون الشباب يحضرونها عندي
نوره : وش تبي بالضبط
راشد : عادي أي شي خفيف تعرفين انا والشباب مابينا رسميه
نوره : ابشر من عيوني
كنت فرحانه صح سالم نصراوي بس اكيد جاي اليوم عشاني
رحت للمطبخ وفتحت الثلاجه وشوف وش فيها عشان استعد وافكر وش بسوي لهم
رجعت لغرفتي لقيت امي نايمه الضحى على سريري ومنيره نفس مكانها تحل
نوره : ههه اخيرا يا منور لقيتي مدرسه تخرشك وتخليك تعرفين السنع
منيره : اسكتي بس الله ياخذها بهذلتني ياربي ودي افتك من المدرسه
نوره : تعرفين راشد عازم العيال يسهرون ويتعشون عندنا وش رايك نقول لساره تجي
منيره : تعرفين ساره من بعد الموقف الي صار لها مع راشد اخوي وهي حالفه ما تطب بيتنا
نوره : الله يقلع عدوه يارب لازم اقنعها تجينا نبي نسهر ونسوي لنا قعدة بالسطح
منيره : كلميها وشوفي بترضى او لا او يمكن مشغوله عشان عرس اخوها سعد
انصدمت منور عارفه ان سعد بيعرس اشوى يعني عادي عندها
نوره بتردد : منيره لو سعد متقدم لك بتوافقين عليه
منيره : يووه نوره شوفي تفكيرك وين وداك يعني شفتي فطوم بتعرس تبين تزوجيني بعد والله انك خبله انتي وسارونه
نوره : وش دخل سارونه
منور : أي قالت لي ياليتك تعرسين على سعد وتجين بيتنا قلت لها خبله انتي سعد كبر اخوي خالد او اكبر عنه وتبيني اخذه وبعدين مثل اخوي
نوره بصدمة : وش قالت لك
منور : قالت بس انا الي اقولك اصلن سعد مراح يفكر فيك يبي واحده كبره او اصغر عنه بسنه او اقل
نوره : مالت عليك ورافضه سعد مشاءلله جمال وشخصيه لا وبعد معيد بالجامعة ان شاءلله تاخذين المعقد
منوره : قصدك حمد يا حليلك مو امه دايم تقول نوره زوجة حمد
نوره : بسم الله علي لا نشاءلله
منيره : وقت الجد ما تقدرين تقولين شي ها بتقولين لساره عشان نفلها ونجتمع بالسطح
نوره : بقولها يعني معقولة عقلها صغير ترد على راشد تعطيه ابو لباس وتسفهه وربي راح ينقهر
منيره : طيب اتصلي عليها وشوفي
رحت بسرعه ابي اقنع ساره عشان تجينا ودقيت ورد علي سعد
نوره : السلام عليكم
سعد : وعليكم السلام
نوره : هلا سعد شلونك
سعد وعرف انها نوره : الحمدلله بخير الله يسلمك انتي اخبارك واخبار الأهل
نوره : الحمدلله بخير الا مبروك سمعت انك خطبت
تنهيدة سعد كانت واضحه : الله يبارك فيك وعقبالك
نوره : تسلم بس ليش متضايق
سعد : ولا شي لان الدنيا ما تجي على الي يبي الواحد
نوره : هونها وتهون وعسى ان تكرهوا شي ويكن فيه خيرا كثيرا
وبمزح رد علي : والله وصرتي يانوره تنصحين
نوره : على بالك يعني شايفني بزر
سعد : ههه حشاك بس نوره الي بالشوارع تفرفر صارت حرمه وقاعده تنصح
نوره : اقول عطيتك وجه يا ولد خالي نادي بس سوسو خلها تكلمني
سعد : أي الحين هذي نوره الي تكلمني
ولا سمع ردي لانه راح يناديها خذتني الأفكار حرام سعد شكله يحب منيره والخبله بزر ما تستاهل حبه جاني صوت فوقني من تفكيري
سارونه : هلا وغلا بالنوري
نوره : هلابك اكثر وسلام عليكم قبل كل شي
ساره : وعليكم السلام ورحمة الله وبركاته شرفتينا ونورتينا يانور العين
نوره : لاحول على الاستهبال
ساره : وش فيك هذا من زود فرحتي بسماع صوتك
نوره : اسمعي سوسو حبيبة قلبي وصديقتي عرفتي باخر خبر
ساره : الصرصور في خطر
نوره : ههه كش عليك لا مو هذا الخبر فطوم بتعرس
انخرعت من شهقت ساره
ساره : نصابه قولي انك تكذبين
نوره : والله العظيم اني صادقة
ساره : ياقلبي توها صغيره
نوره : نصيبها وش تسوي
ساره : نصيبها اقول انوري وش التفكير هذا احس انك صرتي كبيرة وعجوز مو صديقتي الي نفس عمري كأني اكلم امي مو صديقتي
نوره : ههه مالت عليك هذا وانا داقه عليك ومعبرتك وابي اعزمك عزيمه ما حصلتش وابي نسوي لنا جمعه حلوه بالسطح ونعزم فطوم قبل تروح وتخلينا وهذا ردك
ساره قاطعتني : لالالالا تحاولين بيتكم مراح اطبه لحد ما يفارق اخوك هو وخشته
نوره : ههه خشته ازين منك
ساره : مالت عليك عشانه يشبهك شكلي بقاطعك بعد انتي اذا قاطعت الاصل بقاطع النسخه
نوره : ههه صراحه انك خبله تقاطعين بيتنا عشان راشد طيب هذا مو بيته بلحاله
ساره : بليز نوره ما ترضينها لي موقفه معي ما ينسكت عنه
نوره : يعني بطولين وربي ما درى عنك تعالي وقهريه وخلينا نفلها مع فطوم تكفين طلبتك عاد
ساره : يالله يالنوره صراحه تقهرين انتي ياختي انا عندي كرامه
نوره : اقول تعالي ولا يهمك بنتظرك عند الباب لحد ما تجين ومراح اخلي لحد فرصه انه يكلمك ها وش تبين بعد بس انتي علميني اذا طلعتوا من بيتكم
ساره : خلاص الله يعيني يارب
بعد ما قفلت من ساره اتصلت على فطوم وقلت لها تجينا ورحت للبيت انا ومنور وقسمته بينا وصارت كل وحده تنظفه واخيرا خلصنا من التنظيف وبخرت البيت ورتبته ودخلت على المطبخ وبديت اسوي الغدى لان الغدا علي ويوم ركبت الغدا خذيت روايتي ورحت للحوش وقعدت اقرا وندمجت بعالمها الرومنسي ولا فقت الا على خبطه جتني في وجهي جلست شوي وانا حاطه يديني على وجهي استوعب الي جا على وجهي وافرك خشمي الي شوي وبينكسر رفعت وجهي وخلاص دخنت اذوني من القهر واحس ان ضغطي تش لقيتها منور وعزوز يبون يخربون علي
منيره وعزوز : ههه
عزوز : مسويه لنا رومنسيه جايه بروحك وتقرين وفي عالم ثاني
يعني وش بسوي الحين خذيت الله يكرمكم جزمتي ورميتها عليه ولأنه ما تفادها صكته براسه الي ورم على طول
عزوز : الله ياخذ شكلك يارب
من جد خفت وبسرعة البرق انحشت للمطبخ لانه اقرب شي لي ودخلت وقفلت علي الباب
اسمع صوت منور تضحك وعزوز يسب
عزوز : افتحي قسم بالله ما اسكت لك
نوره : انت الي بديت وش سويت لكم قاعده بروحي واقرا لا اذيتكم ولا جيت يمكم
عزوز : والله ثم والله ما خليك بتطلعين يعني بتمين هنا
قعدت انادي امي
نوره : يمه يمه يمه
منور : نوري تبين فزعه
نوره : مالت على ذا الخشه الحين من بيفكني هاه
سمعت صوت من احب الأصوات لقلبي لا طالعوني من جد اذا سمعت صوته استانس احس براحه احس ان لي سند على طول فتحت الباب وجيت يمه اركض
نوره : الفزعه الفزعه تكفى ياخالد افزعلي
خالد : ههه وانتوا لحد الحين تتطاقون
نوره وهي متوزيه وراه وماتبي تبين لعزوز : خالد هم الي بدوا وخربو علي
لفني خالد يمه وباس خمشي : اول سلمي وبعدين كملي هواشك
الظاهر عبد العزيز استحى من نجلا الي مانتبهت لها لأنها كانت متغطيه عشان عبد العزيز
نوره : آآآآآآآسفه نجلا عزوز طير عقلي ما نتبهت لك
نجلا : ههه غريبة يانوره اول مره اشوفك تهاوشين اعرف منور اربعه وعشرين ساعه مع رشود هواش طق وطقيق
منور : الله يسامحك يا نجلا ماهقيتها والله منك
نجلا : ههه يالله بتزعل منور مني
نوره : ماعليك منها تزعل وترضى
وقعدت ادف منور ومنور تدفني وناظرت عزوز وشفت جبهته مورمه وحمرا
نوره : ههه ضحكت غصب عني شكله يضحك
هنا شب ضو عزوز وفعلا ما خذيت الا الزبيريه جايتني بس اشوى جت في رجلي لأني جيت بنحاش وتعثرت بالمركى وجت على رجلي الحين مراح يهدى عزوز الا لما امثل عليهم
صرت امسك رجلي
نوره : آآآآآآآآآآآآآآآآي أي تكفون الحقو علي أي أي يا رجلي آآآآآآآآآآآآآي يمه تكفين وينك أي ياربي يارجلي انكسرت
كنت ماسكه ضحكتي لاني شفت الخوف في عيون عزوز وجتني منور وشوي عيونها بتدمع
منور : بسم الله عليك عورتك وريني وريني
جا خالد يمشي بسرعه ومسك رجلي وقربت من اذنه وشوشت له هنا خالد ما قدر يمسك نفسه
خالد : ههه ههه ه
الكل استغرب ضحك خالد الا انا وعشان اكمل الكذبة
نوره : حرام عليك ياخالد تضحك تضحك وانا انكسرت رجلي آآآآآآآي ياربي ارحمني
جا عزوز وملامحه وجه مره مبين عليها التأثر وصاير وجه اسود وقعد يطالعني ويطالع رجلي لكن ربي يبي يبين كذبتي يوم قال خالد
خالد : ترى بروح لبيتنا القديم المستأجر طلع وبروح اشوفه بعده
هنا نسيت التعب والالم ونسيت كل شي ونطيت
نوره : انا انا بروح معك تكفي ياخالد مشتاقه لبيتنا
عزوز : الله يا خذ شكلك تكذبين طول وقتك
نجلا وخالد : ههه جاك الموت يا تارك الصلاه
نوره : الا تعور بس راح العوار يعني تبيني طول عمري اقعد ما امشي
منور : والله اعرفها حسيت انها تكذب تبي تتخلص من عزوز وما يضربها مره ثانيه
هنا قعدنا انا ومنور نرمي على بعض الخداديات حقت الكنب
خالد : اجل تبون تكملون لعب خلاص بروح بلحالي
نوره : لا تكفى علي الغدا اصبر لحد ما نتغدى واغرف الغدى لهم ونروح مع بعض
خالد : خلاص الله يعين وين جدتي وامي
منور : بقولكم بالتفصيل وينهم جدتي سلمك الله وامي كل يوم الصبح عند بيت من بيوت جيرانا يروحون يفطرون ويتقهون وما يجون الا اذا اذن الظهر وابوي مثل العاده مع ابو عامر ومشغول وما يجينا حتى على الغدا وراشد اربعه وعشرين ساعه مع سالم او يروح لعامر
نجلا بضحكه :وانتو وش تسون
نوره : انا ومنور يا نذاكر يا نظف يا نشوف التلفزيون يا نتهاوش مع عزوز
الكل : ههه
عزوز : نصابه انا العب مع العيال كوره وما اجيكم الا وقت الغدا
نوره : طيب وليش اليوم تجي بدرري وخربت علي قصتي
عزوز : لان اغلب العيال كاشتين مع اهلهم للبر
منور : ياربي خاطري نكشت ما صرنا مثل اول ايام جدي الله يرحمه الحين ماعاد رحنا للبر وابوي طول وقته منشغل بالتجاره وانت يا خالد رحت وسافرت وراشد اربعه وعشرين ساعه مع اخوياه
راشد : وانا كل ما ادخل البيت القاك تتكلمين فيني
الكل : ههه
قام خالد وسلم على راشد وسلم راشد على نجلا الي لبست برقع بحكم انها تقعد معنا ولازم تتستر من اخواني
نوره : صادقه منور ما صرنا نكشت مثل اول
خالد : ولا يهمكم الخميس الجاي كشتتكم علي
فزينا كلنا انا ومنور وعزوز نحب خشم خالد وهو يضحك ويدفنا شوي شوي لا تكسرون خشمي كل هذا عشان كشته
راشد : ماشافو خير
عزوز : أي لانك كل يوم وانت مخيم مع العيال
راشد : اذا كبرت خذيتك معنا
زعل عزوز: اصلن انا رجال وارجل منك
منور : لاحول الحين خلص عزوز من النوري قلب على راشد
راشد يحب يطيح وجه منور : وانتي وش دخلك احد شكى لك الحال
كلنا الا منور : ههه
النوري : تستاهلين وشوله تفزعين له
منور ونظراتها تضحك : مالت عليه ما فزعت له انا مره تقول كلمة الحق مو يعني فزعه
الكل :ههه
التفت راشد على خالد كانه يطنشنا وقعد يسولف معه عن اوضاعه بالعمل والمنطقه الي اهو فيها وحنا رحنا وقعدنا جنب نجلا وتعلمنا باخبارها كان اخوي خالد مستانس على غير العاده وفعلا جاينا بدري وما علمنا قبل حسيت ان في الموضوع شي
منور تسئل نجلا : جايين عشان نجود
نجلا : مو بس عشان نجود عشان فيه موضوع ثاني
منور بلقافه : وشو
نوره : منور وش دخلك ما يصير يابنت عيب
نجلا : ههه اسمحيلي يا منور مقدر اقولك
منور تفشلت ورديت عليها : تستاهلين لا تعودين تطفلين على احد عشان ما يطيح وجهك
منور : يالله والله غصب عني
نجلا : اسفه منور بقولك بس مو الحين
سمعنا صوت جدتي
كلمتها المشهوره اذا دخلت حوش بيتنا : لا اله الا الله
كانت تمشي بالعصى ومعها امي ويسولفون ويضحكون
جدتي : أي شفت سيارة خالد ما صدقت ياهلا والله ومرحبا
خالد فز وراح يحب خشم جدتي وامي
جدتي : اكيد جايين عشان ملكة سعد ونجود
خالد : أي وعشان شي ثاني
امي : عسى خير ان شاءلله
خالد : كل خير ان شاءلله انا ما حبيت ابلغكم بالتلفون لكن قلت لازم اقولكم وجه لوجه نجلا حامل
مع كلمه حامل الكل صرخ طبعا حنا يالاخوان لكن امي وجدتي قعدوا يكررون الحمدلله الحمدلله الله يجعله قبول خير عليكم الحمدلله لان لهم فتره من تزوجو وتوها تحمل
شفت الفرحه بعيون خالد ونجلا هنا حسيت بشعور غريب اتمنى فعلا اكون اسره لا تضحكون صح اني عند بعضكم بزر بس هذا احساس كل مره بالعالم اتحدى كل انثى ما تتمنى يكون لها بيت وزوج وعيال الي تقول غير كذا هذي مريضه ولازم تتعالج
خالد : بتروحون معي يمه يقصد جدتي
جدتي : وين نروح معكم له
خالد : بروح انا والبنات اشوف البيت بعد ما طلع منه المستأجر
جدتي : تروح يمه وانت توك جاي من السفر
خالد : يمه متعود على التعب والبيت لازم احد يشوفه ويهتم فيه
جدتي : بروح ان شاءلله معكم
راشد : على وين ان شاءلله نسيتو اني عازم اخوياي
هنا تذكرت يالله لازم اروح معهم لازم اشوف بيتنا وانقذني خالد ويلوموني ليش احبه
خالد : مراح نتأخر والعشى بجيبه من برى خلهم يستانسون
نوره : الله لا يخليني منك يارب
خالد وبضحكه : ولا منكم يارب
لا تضحكون علي رحت يوم سمعت اذان الظهر وكبست غداي وسويت القهوه والشاهي أي والله سويت قهوه وشاهي كنا ناويين نتقهوى هناك نبي نسترجع الماضي

الجزء الثامن
كان الجو بالسياره ازعاج وضحك كنا نحس بفرحه مالها مثيل صوت ضحكنا يمكن السيارات الي حولنا يسمعونه من فرحتنا حل صمت أي صمت يوم دخلنا المزارع كل شوي نتلفت وندور بعيونا بدينا نمر على مزرعه مزرعه على طول فتحت الدريشه بدى الهوا يدخل داخل سياراتنا بدى كل جزء من جسمي ينبض احس كل الي حولي سمعوا دقات قلبي خلاص ماعاد شفت الطريق عيوني لمعت بالدموع بدى يتضح شارعنا شفته أي والله شفته بدت الذكريات تنهل علي بدى شكلي شكل اخواني يجي قدام عيوني يوم نركض بهالشارع الي اغلبكم الحين مستغرب ليش انا اوصفه وبحراره ما درى اني اشتقت له شفت اول شي حوش الغنم الي من البلوك وقف خالد السياره نزلوا كل واحد راح يتفقد المكان بنفسه مشيت لحد ما دخلت الحوش لقيته خآآآآآآآآآلي بس باقي فيه بقايا علف لقيت الصندقه الصغيره الي يحطون فيها الصغار اذا ولدت منكسره والهوا يلعب بها يمين ويسار حسيت بحرقه طلعت والتفت لقيت كومنا الرمل مثل ماهو ما تغير يمكن ماطولنا من غبنا عنه فيه شي بس شي واحد تغير اني مقدر مثل اول اناظر بحرية صار فيه قيود تمنعني لو يشوفني رجال بعبايتي اتلفت على الشارع على الارض الي نلعب فيها بيقول مو صاحيه اكيد تدور شي على طول والعبره خانقتني دخلت داخل البيت كيف اوصف كيف اقولكم شفت على طول السيب الطويل الي فيه دورة المياه الله يكرمكم ثم وراه المطبخ والصاله الي سقفها من قش او عريش كانت اشعة الشمس متسلله للبيت صارت دموعي تنزل وانا ادخل كل غرفة واتذكر كل ذكرى مرت علينا اتذكر نومنا اتذكر هواشنا اتذكر يوم ناكل يوم نلعب كل شي كل شي كل ركن كل جدار كل قرنه بالبيت لها ذكرى مشيت وطلعت للحوش شفت الشجر شفت النخل ذابل القلب اخضر لكن الاطراف ذابلة وباديه تصفر ماكانوا الناس الي فيها مهتمين بها كان فيه بقايا العابنا الي نصنعها بنفسنا شفت رمل النخل الي بالارض فيه شويه قشاش من اثار العج مجتمعه عجيب يمكن الي عاش بمزارع يعرف وش اقصد كل شي متغير صاير الحوش قشاشه مره كثير شجرة العنب ميته السدره مليانه ومحد اهتم يقطف الي فيها شفتوا البيت المهجور صار بيتنا مهجور من طبعي وانا صغيره ما احب احد يشوفني ابكي رحت لم الصندقه استغليت فرصه اخواني يتلفتون وبكيت بكيت ليش صار كذا ليش تغيرت سمعت صوت وما توقعت ابد اني اسمعه
...: نوره وش فيك ليش تصيحين
انفشلت مابيه يشوف الدموع بعيوني لكن فرحت بشوفته فيه شي يجذب يخليني غصب ابتسم سبحان مغير الاحوال سبحان الله هذا الشخص الي فيه ابتسامة لؤم الحين اشوفها جذابة ابتسامة غير يمكن حب مراهقه سموه الي تسمونه لكن هالشخص احب اشوفه واذا ماشفته اقعد افكر فيه واتخيله
بتررد: مافيني شي
سالم : اجل ليش تصيحين احد مزعلك
وقفت ماحبيت اكون انا وياه بروحنا ما يجوز وجيت بطلع
سالم : نوره اسمعي بقولك شي قبل لا تطلعين
خفت وش يبي يقول ترددت اسمعه او لا بس قلبي يقول اسمعي وش يبي يقولك التفت عليه
لقيته مبتسم وجه صاير احمر ومنحرج مره
سالم : نوره انا .. انا آسف
بستغراب ناضرته : آسف على وش
سالم يضحك ويحك راسه ومنحرج ما يدري وش يقول : على حركات الخبال يوم كنا صغار
نوره :ههه يعني معترف انك خبل
سالم بضحكه : لا والله ترى فيها قبايل تبيني الحين اعلمك الحين انا خبل او لا
ستفزيته : وش بتسوي يعني بتطقني
سالم وهو يوطي صوته ويقول بصوت عذب : مقدر امد يدي عليك احس اعذب عمري
كلامه احرجني وطلعت وانا اركض صح حب مراهقين يمكن تقولون خبال يمكن تقول مجنن بس حب عفوي طاهر عفيف نظرات ابتسامات هذا كان كل شي لا رسايل لا مكالمات ماغير هذاك الشريط الي احتفظ فيه الى الحين
رحت لقيت كل اهلي فارشين بمقدمة الحوش في نفس مكانا المعتاد
خالد : تعالي يا نوره ربي جابك
نوره : سم تدلل يا عيون نوره
خالد : بقولك شي وانتي احكمي
منور : يا سلام وش معنى نوره
خالد : لانها اكبر منك ولانه يعجبني تفكيرها
نوره : خلود قول حمستني للموضوع
خالد : شوفي سلمك الله حنا متحاقين على سالفه وكل واحد يقول الحق معي و نبي تحكمين بينا
في نفس الوقت الي يقولي خالد كلامه جا سالم وجلس معنا جلسته معنا وترتني وصرت اضيع كلام خالد وما ركزت وش يقولي
نوره : ماعليش خالد وش تقول ما نتبهت
خالد : افا وانا اعيد وزيد واحسبك منتبه اثاري منور صادقه
ياربي تكفى ياخالد ارحمني وربي اني مو على بعضي كان هذا كلامي لنفسي
نوره : ماعليش يا خالد اعذرني راسي يعورني لنا زمان عن جو المزارع وصدعت من الهوا
خالد : بسم الله عليك ماتشوفين شر
نوره : الشر مايجيك
رفعت عيوني لشخص كان واضح كيف يطالعني شفته يناظرني وابتسم يوم جت عيني بعينه على طول نزلت عيوني وصرت افرك يديني بتوتر بترحمون حالتي ماقدرت اسيطر على نفسي قمت وقفت ابي اروح مابيه يراقبني
جاني عزوز
عزوز : نوره وين كنتوا تنامون
نوره : انت كنت تنام مع امي بغرفتها وشوف وين كنا نام فيه وصرت اشر على اماكنا بغرفتنا واعلق شوف كنا نتطاق دايم كل واحد يبي يجي يم الجدار عشان الباقين يجون جنبه كانه يحتمي بالجدار كنا نخاف
عزوز : ههه والله لو اشوف اشكالكم فله
نوره : يالله يا عزوز قسم بالله وناسه تعال اوريك وين كومنا الرمل وبوريك وين حديقتنا حقت الحيوانات وين كنا نسوي عرايس ووريك المخبز تدري قبل يوم يكون السواق مشغول وش نسوي
عزوز : وش تسون
نوره وانا اتذكر : ههه ناخذ فوطه ونروح للمخبز ونصف مع الرجال انا ومنور ما كان احد يطردنا ونشتري خبز ونحطه بالفوطه ونرجع للبيت كانت اشكالنا تحفه ههه استغرب وقتها كيف رشود ما طردنا
عزوز : ههه الله ياخذ شكله ما اهتم اخوياه يشوفونكم وانتو تشترون خبز
نوره : اصبر بعلمك بعد شفت البقاله نشرتي ببيبسي اغراش وفش فاش شمس وريكو ونجي على عتبة البقاله وناكل ونتفرج على العيال وهم يلعبون كوره او النادي الفلاني يوم يسوي تدريباته بالشارع وربي فله
عزوز : ياحظكم ياليتني مثلكم
سرحت بفكاري نوره حياتك بدت تتغير وش بيصير قعدت اطالع غروب الشمس كانت المزرعه المهجوره قدام عيوني شفتها وابتسمت يالله راحت روح المغامرات ليش نتغير ليش الزمن يغيرنا ليش احداثنا الي حولنا تبدلنا سمعت اصوات اهلي ينادوني يبون يرحون للبيت يالله دايم الأوقات الحلوه تروح بسرعة سبحان الله
نوره : خالد بعد عمري اصبر نسيت شي مهم
رحت ركض للبيت ام احمد طقيت على بابهم شفت الباب ابتسمت كان اخضر وفيه خط من فوق لتحت بني في عيني يهبل الا روعه عشانه مرتبط بذكرى حلوه يوم نطق الباب كل شوي على فطوم
سمعت صوتها ياناس تجنن هالانسانه
فطوم : مين عند الباب
نوره : انا الحرامي
فطوم : النوري
فتحت الباب على طول ضميتها وصرنا ندور وصوت ضحكنا شايل البيت انا اتكلم وهي تتكلم ومحد فاهم الثانيه وش تقول
نوره : تعالي معنا بروح الحين
فطوم بدهشه : وين اجي
نوره : تعالي بيتنا اليوم مسوين جمعه
فطوم : مدري بقول لامي
نوره : قولي لها ابصم بالعشرة مراح ترفض حنا عشرة عمر
فطوم ببتسامة : اكيد طيب شوي بستاذن
راحت فطوم تستأذن يالله هذي فطوم ما تغيرت بس كبرت نفس الشكل نفس البراءه يابختك يا قاسم لا تضحكون اسم زوج فطوم قاسم أي والله يابختك ياقاسم بتاخذ كتلة براءه وطهر مالقيت مثلها بالكون الله يسعدها يارب
جتني البطبوطه بعبايتها وهي تمشي بسرعه : يالله يالله
نوره ببتسامه : مشينا
رحنا ركض كانا نعيد طفولتنا لقيناهم بالسياره كلهم وينتظرونا
عزوز : عمى والله تركضين بالشارع كنك مهبوله
نوره : يوه وش فيك انت خلني اعيد ذكريات الطفوله
الكل : ههه
جدتي : هلا وغلا بفطوم اسمحيلنا يابنتي ودنا نمر امك بس ما طولنا يالله لفينا البيت ما قعدنا ان شاءلله اجي يوم مخصص لها واسلم
فطوم : ان شاءلله وحياكم الخميس الجاي
جدتي : أي نسيت اثاريه يوم زواجك
نوره : اي
كانت فطوم من احراجها ومثل عادتها دايم تقبصني اذا انحرجت
منور : ههه اكيد منور مثل العاده انحرجت وقبصتك
الكل : ههه
امي ما راحت معنا اهي ونجلا لانها تعبانه من مشوار الطريق بس كان خالد ومنور وعزوز وجدتي وانا عشان كذا مابغينا نطول وعشان بعد خالد توه جاي من السفر
دخلنا بيتنا واصواتنا جيرانا الي حولنا يسمعونها من فرحتنا بشوفة فطوم ولأنها معنا على طول قطيت العبايه والبرقع على الكنب وسمعت صرخه
...: وجع أن شاءلله
نوره بخلعه: يمه ويوم شفت وجه سارونه ههه جيتي
سارونه : جيت جعل الموت يجيك
نوره :ههه ستغفر الله استغفري حرام عليك
سارونه : هاذي الي بتحتريني عند الباب
نوره : والله جانا اخوي خالد والتهينا
سارونه : تعالي رحتو لبيتكم الطين
جيت وجلست جنبها وتنهدت : أي والله رحنا وشفت بيتنا يالله يا سارونه لو تشوفين البيت كيف تغير
سارونه : بالله تغير مره طيب والشوارع والبيوت نفسها
نوره : مره تغيرت صارت الشوارع في عيني ضيقه مره بس هذا بيتنا الطين نفسه يمكن اشياء خارجيه اثرت فيه بس تعالي انتي ليش معصبه
سارونه : اخوك السخيف
نوره وهي كاتمه ضحكتها : وش فيه
سارونه : مو كافيه الموقف الي سواه معاي ذاك اليوم جاي اليوم يستهبل
نوره : ساره وربي انتي مكبره الموضوع موقفه عادي
سارونه : الا بايخ يعني دخل وشافني قاعده العب في سونيهم يقعد يهزئني واني قاصده اقعد بدون غطا قدامه يرضيك كذا يانوره يعني انا متعمده يشوفني بدون برقع او غطا
نوره : تعرفين تفكير راشد وشوله تنقهرين
سارونه : أي ما دريتي وش قالي اليوم يقول ليش مشرفتنا وش انا مسويه له
نوره : عطيه ابو لباس يعني طاف وتشوفين اذا ما انقهر ترى اهو يحب الي يعانده
سارونه : مابي اكلمه خير شر
نوره : اليوم انا عازمتكم عشان نفلها خلينا ننبسط وفطوم حبيبة قلبي بتروح مانبي نكدرها
وفعلا رحت للسطح وفرشت فرشة وفي البداية سوينا شاهي وشرينا من البقاله كاكاوات وبطاطس ومشروبات يعني لزوم السهر والفله وقبل كل شي ضبطنا صينية الرجاجيل والقهوه والشاهي وجينا كلنا ركض للسطح ولقينا مكانا وجينا وجلسنا وكل وحده تسولف بسالفه وانا اشوف السما فوقنا والبيوت الي حولنا ومن بعيد مره اشجار كان الجو حلو
منور : بنات ياليت مافيه شي اسمه مدرسه
البنات : ههه
نوره : وربي انك فاشله
منور : لا ياقلبي انا على كيفي لو بمزاجي صرت الاولى
نوره : أي هين
فطوم : تتوقعون يا بنات بشوفكم بعد كذا
كلنا سكتنا وناظرنا بعض ونطينا عليها وقعدنا نصيح
فطوم وهي تصيح وتبي تغير الجو : قوموا قومو ذبحتوني
كانت انا ضامتها وسارونه مرميه علينا وضامتنا كلنا ومنور جت تبي تشارك معنا
نوره : منور قومي كسرتوني
منور : لالا انا وزني ريشه
كلنا قعدنا نضحك بين دموعنا شفتوا شلون تختلط الدمعه بالضحكه كانت سوالف فطوم تجبرنا نضحك هي ومنور وبنفس الوقت فراقها وفكرة ان مراح نشفها تخلينا نبكي فعلا لك فقده يا فطوم الله يعينا يارب على فراقك \
/
/
مضت الايام وراح خالد ونجلا للحفر كلكم عارفين نظام الضباط ما يمدي الواحد يجي مع اهله الا منادينه وعشان كذا وعدنا خالد اذا جانا مره ثانية يكشتنا ويخلينا نخيم بعد لو يومين مثل قبل و راحت فطوم مع زوجها للجنوب وبدت اختباراتنا كنت ولله مرتاحه لاني اذاكر كل يوم بيومه واحضر وكانت منور مشتطه ومنقهره وتذاكر من تجي من الاختبارات لحد اخر الليل وانا ولله الحمد انام اذا جيت من الاختبار واذا جا العصر بديت اذاكر واذا صارت الساعه عشر في الليل اخلص واذا خلصت بدى المسلسل على القناه الاولى كل ما اتذكر سالفة اخوي عزوز مره يوم كنا صغار اول ما سكنا بيتنا هذا ما خذينا الا عزوز جاينا طاير
عزوز : بنات ببشركم
منور ونوره : وشو
عزوز : الاخبار خلاص الحلقه الاخيره
نوره ومنيره : ههه ههه
عزوز : وش فيكم
نوره : ليش تقول الاخيره
عزوز : الي يعد البرامج يقول الاخبار الاخيره
نوره : لا يا قلب امك هذا يقصد الاخبار الي تجي اخر الليل
صدق موقف يضحك كنا نزهق من الاخبار ويوم ننتظرها تخلص عشان يبدى مسلسلنا ايام ما كان فيه دشوش او ستالايت ما كنا نسافر اذا خلصنا كان كل وقتنا نقضيه ببيتنا يا نلعب ورقه يا نسهر لحد ما يطلع الفجر الله يرحم ايام بيت الطين كنا النام من المغرب انقلب الحال صرنا النام اذا صلينا الفجر حتى يوم طلعت النتايج ونجحت وانتقلت لثالث متوسط ومنور لثاني متوسط انا ولله الحمد مثل العاده بتفوق ومنور ينكتب في تاريخها التعليمي جيد جدا محد سوى لنا حفله ولا شي بس ابوي وزع علينا فلوس وقضيناها بالبقاله نشتري ونسهر انا ومنور وعزوز عكس راشد الي دايم برى البيت ماخذ راحته على طول يا مع سالم يا مع عامر ولد جيرانا يا مع حمد
نجي لحمد اكيد ما كلمتكم عنه وش صار عليه هذا انسان متفوق عقله كمبيوتر كلمة حلو شوي عليه يدرس بالجامعه تدرون وش تخصصه طب مدري ليش عيال الطب جديين مره المهم ستغربت يوم طرى راشد انه معهم اكيد عطل مثل دايم متفوق شي اكيد يبي يرفه عن نفسه ما راح انسى هذاك اليوم الي بكيت انا ومنور فيه بكى من جد صح انا ما ابكي قدام احد بس غصب عني تخيلوا امي وجدتي مثل العاده يرحون لجيرانا او يقعدون بالحوش وقت الصباح ويتقهون وحنا بس سهر على التلفزيون وياليت فيه شي يفتح النفس الا برامج تطفش المهم جانا راشد كان مستعجل مره
راشد : نوره نوره بسرعه تعالي
نوره : وش بغيت
راشد : بسرعه كوي شماغي
راشد: اصبري امي وينها
رحت وناديت امي وكويت شماغه وجيت لقيت منور جالسه بينهم
امي : طيب ياولدي انتبه على نفسك
راشد : ابشري
مدري وش يتكلمون عنه
نوره : وين بيروح راشد
امي : بيروح لابها
نوره : نبي نروح معه
راشد : بروح مع اخوياي وش ابي فيكم
نوره بصوت مخنوق : ليش وحنا وش ذنبنا نعطل وننجح ومافيه سفر نبي نروح نبي نشوف العالم
منور بصياح : اهي ي مابي نبي نسافر
امي : لاحول ولا قوة الا بالله هذاك ابوكم روحو وقلوله
نوره : انتي عارفه انه راح يرفض ونه طول الوقت مشغول
تركنا راشد وراح مع اخوياه وضلينا انا ومنور نصيح ومنقهرين ما قدرن نسافر ولا رحنا ولا جينا رحت انا وهي لغرفتنا ومن القهر شغلنا مسجل وقعدنا نرقص عمركم شفتوا خبال مثل كذا من الطفش قعدنا نرقص ونستهبل فكيت شعري وجلست انفح فيه واستهبل ومنور مثلي ونقلب صياحنا ضحك
راح راشد وخوياه وعرفت منه انه وسالم وحمد وعامر كلهم ومعهم ثنين من اخوياهم للبها كنا نسمع في ابها ونتمنى نروح نشوفها كل العالم تروح لها الا حنا وكان امنيتنا نشوفها
منور :وش رايك بما ان راشد راح انادي ساره ونفلها
نوره : ساره مشغوله اخوها توه متزوج وزوجته عندهم
منور : طيب نعزمها ونعزم نجود تجي معها
وفعلا واتصلت فيهم وجونا بس الشي الغريب الي شفته في نجود كانت صامته مرره وتناظر منور وتسرحه وكلم نفسي معقوله تعرف نجود ان سعد يحب منور الا ولا ليش تناظرها كذا
--------------------------------------------------------------------------------

الجزء التاسع
يعني بعيش كذا عايشه على الروايات وعلى إنسان رحل وتركني سنين ومدري وش انطباعه عني إذا شافني ... بس مجرد اسم زوجه بالاسم ...
الله يهديك يبه بالله عليكم عمركم شفتو زوج يترك زوجته خمس سنين ولا حتى يسئل عنها حتى مصروفي اهله الي يرسلونه لي ولا عمره اتصل وطلبني اتذكر هذاك اليوم يوم زرت امة وتصل وقتها انحرجت يوم عطتني السماعة عشان اكلمه شلون اكلم انسان بارد خالي من المشاعر احس نفسي مفروضة عليه فرض
المشكله ما هي مسافه أو سفر
المشكله بعد القلوب عن القلوب
ما مل منهو ينتظر طول السهر
بس البلا من ينتظر رجعت كذوب
اكيد مستغربين ومتفاجأين أي انا متزوجة وآآآآآآآآه ليتني ما تزوجت بقولكم سالفة زواجي وكيف صارت كنت بثالث متوسط وعامر أي عامر ولد جيرانا الي علمتكم عنه بثالث ثانوي وحيد امه وابوه كان ابوه شريك ابوي وسبحان الله ما راح فيها إلا أنا بس المشكلة كنت صغيرة بكيت وترجيت امي لكن أمي وأبوي يشوفون الموضوع بنظرة ثانية
حتى عامر نفسه مايبيني كان يبي يكمل دراسته بس تزوجني عشان يوافقون اهله يكمل دراسته برى اسمعوا وانتو احكمو كيف بدت معاناتي من أول حوار دار بيني وبين ابوي
كنت جايها وأغني بأغاني شريط الي أهداني أياه سالم
بحبك لو تكون حاضر بحبك لو تكون هاجر ومهما الهجر يحرقني
راح امشي معااك للاخر....
سنين وسنين وانا صابر وراح اصبر كمان وكمان وبحر الشوق
يلعب بي الين اوصل لشط امان ....
كنت شايله شنطتي وفرحانه هذا اخر يوم لي بالمتوسط صح ما بعد طلعت نتيجتي بس كنت فرحانة أني خلصت اختبارات
ابوي : نوره تعالي
ابتسمت لابوي وجيته وحبيت راسه قعدت وكنت كلي فرح حلو مقدر اوصفه شعور نفسي يعني لم تكونين فرحانه وتحسين بطعم الفرح بضحكتك بنظرتك بمشيتك حتى شي تعشينه وتتمنين كل الي تحبينهم يعيشونه جلست وانا اضحك واناظر ابوي فرحانه
النوري : هلا يبه امر لو تبي عيوني هديه مجانا لك
ابوي بجديه: تسلمين والله يابنتي انا ابي شي واحد منك موافقتك
قلت بفرح وضحكه ملت المكان : اكيد يبه بوافق ما انت ابوي الأمر الناهي بحياتي كلي لك وحياتي لك امر امر
ابوي : عامر خطبك وانا وافقت
صدمه
ما صرخت مع ان صوتي يوصل لحد حلقي بس مدري ليش يرجع على ورى يرجع ابيه يطلع ابي ابوي يسمعه ابي يحس فيه عيوني تعلقت بالفضا دموعي ملت عيني كيف كيف لا شلون مستحيل هذي الكلمات الي تدوور في راسي طلع ابوي تدرون طلع ما انتظر اقول ايه او لا هو حكم هو اطلق حكمه علي بس ينتظر التنفيذ وانا فعلا قلت انا تحت امرك طفله لا تضحكون أي انا طفله عمري 15 ياناس طفله حتى لو كنت في نظر بعضكم لا كانت لي احلام كانت لي خطط كانت لي حياة ابي ارسمها ابي الونها على كيفي ابي احط الوانها بنفسي ابي ابدع فيها
بس ابوي كسر بروازي قبل ما ارسم لوحتي كسر الواني قبل ما اخذها حكمو علي حكمو علي بالأعدام ومن منه من عامر عامر اكثر شخص انا ما اتمنى قربة انسان فيه غرور غير طبيعي لا واكثر شي يكرهني ما يدانيني يحتقرني لا تستغربون نظراته لي احتقار مع اني ما سويت له شي وما سويت شي يستدعي هالاحتقار الي بعيونه بس مدري ليش احسه مو زوج لي مو الأنسان الي بشارك معه حياتي بفرحها بحزنها وينك يا سالم وينك معقولة بترضى اروح من بين ايديك شلون هذي حرب انا الي اعلنت خسارتها وهي توها تبدى انا الي قبلت لالا بروح لبوي بقولة مابيه جلست على الأرض ايديني صارت بارده من براد السراميك من كثر ما افرك ايديني فيه بس ابو عامر شريك ابوي ليش يبه ليش والله ان عامر مايبيني ليش قبل اروح له اقوله وش تبي فيني بس اخاف راشد يذبحني ياربي ساعدني ياربي الهمني
صح نسيت خالد بقوله بس خالد مابي اورطه بمشكلة مع ابوي سكت وكأني بحلم اشوف وش مصيري
ركضت لغرفتي اكتم شهقتي الي طلعت وانا داخله الغرفة
منور : وش فيك نوره بسم الله عليك
نوره : آآآآآآآآآآآآآآآه تكفين يا منيره الحقي علي
منور : بسم الله عليك علميني وش فيك
نوره : ذبحوني ذبحوني خلاص
منور صارت تبكي من بكاي
منور : نوره الله يخليك روعتيني وش فيك
تهز فيني وتصارخ وش فيك
نوره : منور ابوي يبي يجوزني عآآآآآآآآمر
ارتخت ايدين منور مني وجلست على السرير وصارت تطالع فيني هدت ماعاد سمعت بكاها بس ما قالت الا
منور : ليش
نوره : ليش مدري ليش انا نفسي مدري ليش
منور : بس انا سمعت انه بيسافر
نوره وانا امسح دموعي بكفي : مدري عنه يعني توقعين يبيني اسافر معه
منور : مدري
ورجعت ابكي ودموع غصب عني تطلع وكل ما تذكرت سالم ارجع اصيح زياده
صرت اكرر اسم سالم
نوره : خلاص سالم مراح يكون لي
ومن هنا عرفت منور قصة حبي لسالم والغريبة ما ناقشتني ولا خلتني اقول شي بس انا الي قعدت اكرر مراح يكون لي خلاص احرموني منه
بدى الخبر يتسرب بدى الكل يدري وكيف دريت انهم دروا يوم شفت عمتي صيته يوم جتنا ودخلت اهي وابوي وامي لغرفة وسمعت اصواتهم عاليه ويصارخ ابوي على طول رحت انا ومنور فوق وما تمينا معهم لكن حسيت ان عمتي تبيني ما اعرس على عامر واتوقع ابوي رفض لان عمتي ما حضرت زواجي حتى سالم مدري وش سوا يوم عرف
نفسي ادري وش سوى صرت احس ببرود امي وجدتي يرحون ويشترون لي اغراض ومقاضي لا وياليت شفتو شكلي يوم الزواج وكيف تزينت بنت صغيره صح حلوه بس توني صغيره ما بعد عرفت للمكياج وما اهتم كثير بالكشخه وكنت نحيفه مره وقستاني بيج الحين كل ما اشوفه تخنقني العبره شلون لبسته مدري بس شكلي اقل من العادي لبسوني وروني اغراضي يبوني افرح وانا بس اطالعهم وساكته شفت ساره ومنيره متكشخين ويضحكون وانا اطالعهم وبالي لبعيد كنت جالسه وشايله مسكتي وتسريحه شعري ما رفعته منزلته كله وكان طوويل مره يعني بختصار شكلي مو حلو مره صح انا جميله لكن ما عرفت اتكشخ جابوا لي وحده خبصت فيني وطفله صغيره المفروض يكون مكياجها ناعم بس هذي كثرته شوي المهم قعدوا البنات يرقصون قدامي كان زواجانا زمان يجيبون كرسي ويحطون عليه العروسه والباقين يجلسون على زوالي حمر ويجون الناس يسلمون عليها ويعطونها هداياها كان كل واحد يجي يسلم علي ويحط هديته والبنات يمشون عليهم بالقهوه والشاهي والعصيرات والبخور كان زواجنا بالبيت واعلنوا اني خلاص لازم اطلع مع رجلي يحتريني برى بالسياره ما اعرف شي ولا امي علمتني عن شي بس دخلوني عليه كان بالسياره ولابس بشت اسود وغتره سكريه هذا الي لمحت منه ركبت السيارة وجلست جنبه وانا ارتجف مثل الورقة كان الجو هدوء بالسيارة وصلنا ونزلت بمساعدته ودخلت غرفتنا او جناحنا ويدي ترجف احاول اوقف رجفتها وقفت ابي يقولي اجلسي هنا بس هو راح للشماعه وعلق بشته وغترته وانا بس اطالعه واطالع حركاته شفت يوم علق غترته شفت شعره الطويل تحت الطاقيه كان حلوو مره بس مو احلى من سالم في عيني
جفلت من صوته وناظرته كنت ساهيه
عامر : بتمين واقفه وتبحلقين فيني
لو تدرون كلمته هذي وش سوت فيني العبره اخنقتني ليش معصب علي اذا انت بعد مغصوب علي فانا بعد مغصوبه وما ابيك وين يبيني اقعد مافيه كراسي عسى يبيني اجلس على السرير تدرون وش سوا بدل قدامي وانا شهقت أي شهقت حتى اخواني ما يبدولن قدامي
عامر : اذا ما تبين تشوفيني التفتي وراك
بالله عليكم هذا اسلوب ليش يعاملني كذا وبسافر معه وش بيكون مصيري
التفت ابي يخلص لبس
عامر : خلاص لا تنكسر رقبتك ترا خلصت
شال الحاف ونام ولا عبرني ما اهتميت وقتها لكن الحين احترق من تصرفه بس هو مو بزر أي مبرر اخذ له 18 عمره وانا 15 يعني يمكن هو افهم مني المهم شفته نام رحت وخذيت جلابيتي ورحت للحمام عزكم الله وشهقت يوم شفت وجهي
نوره : الله يا خذها شوهتني هي وها الكحل على طول غسلت وجهي وساح الكحل وصار وجهي كله اسود وبدلت ولبست جلابيتي العنابية ورحت لتسريحه شفت مناديل و خذيتهاو شامبو ورجعت للحمام وجلست ساعه اغسل وامسح لحد ما حمرت عيوني ناظرت وجهي وربي اني ارحم كذا المهم رجعت شفته نايم على السرير وين انام انا يووه رحت للارض ونسدحت وتكورت على نفسي ولا قمت الا على صوته
عامر : قومي الله يفشلك امي تطق الباب وانتي راقدة بالارض
فزيت واقفه وطالعته ببلاهه
نوره : وشو
جلس شوي يطالعني وتعرفوني انا وقلت لكم من قبل اذا استحيت ولعت خدودي
عامر : امي تطق الباب ما تسمعين
طيب بالله عليكم مو المفروض هو ينقلع ويروح يفتح لها يبيني اروح انا
رحت امشي وانا فيني نوم وفتحت الباب
ام عامر وهي مستانسه وتضحك : على البركه وشلونك يمه عسى ما ازعجتكم
نوره : الله يبارك فيك
ام عامر : وين عامر خله يصلي الفجر
نوره : صاحي قام من زمان
قعدت تناظرني وتضحك وقالت لي كلام وانا اطالعها بستغراب مافهمت وش تقصد بالله وش قصدها بكلمة قضيتوا انتو خلصتوا او لا قسم بالله اني فاهيه وغبيه وقتها يالله يا فشلتي منك يا خالتي
نوره : وش خلصنا منه
ام عامر وهي مستحيه : خلاص يا بنيتي فهمت
اكيد فهمت وعرفت الله يهديك يمه ليه ما علمتيني دفيتوني وزوجتوني وبس وهذا بعد يقهر شوفوا كيف يعاملني ما هتميت له
راح عامر للصلاه وقالت لي خالتي اذا صليت البس ازين ثوب عندي والبس الذهب والله اني قعدت اضحك احسن شي كان بزواجي الذهب لبست ثوب ازرق مرره وفيه مديل ذهبي ولبست الذهب وفليت شعري وتكحلت من جوا بس وما اعرف احط روج مسكت الروج الاحمر الي علبته سودا القديم ما يروح بسهوله المهم خفت ما اعرف له وخليته سمعت حسها ياحبي لها ولزوجها ولدهم الصغير تركي جات نجلا تساعدني باللبس وهي شايله تروك بين ايديها
نجلا : مشاءلله ولا حول ولا قوة الا بالله وش اخبارك يا عروسه بشري خلصتي
نوره : ياربي كل من يدخل علي يقول خلصتي اخلص من وشو
مسكت نجلا راسها: قصري صوتك لحد يسمعك
وشوشت لي وقالت لي كلام وانا شهقت وربي شهقت يالله شوفوا البراءة
جلست على السرير وانا احس برجفه بكل جسمي معقولة كذا كنت اعتقد الزواج بس ضم يضمها يبوسها وبس ما اعرف شي وما عمرنا سئلنا
حطت لي نجلا الروج الاحمر وطلعت يوم سمعت صوت عامر
دخل وقف فجأة وقعد يطالعني من فوق لتحت وانا زدت رجفه وكلام نجلا خوفني زيادة وشوي بصيح المهم سوا نفس الحركه بدل قدامي ولا اهتم وانا شهقت مره ثانيه وما تبت اول مره اشوفه يضحك ضحك بصوت عالي يوم شافني مستحيه وانا شوي بصيح لبس وطلع وانا طلعت وجيت امشي لقيت امي وابوي واخواني كلهم ونجلا وعمي ابو عامر وخالتي ام عامر وجداتي كلهم كل العالم الي يبارك المهم غصبوني اجلس جنبه وانا كل ما اتذكر الكلام الي ينقالي ارتجف ومدنقه الله يهديك يا نجلا لازم تقولين لي خليتني استحي ولا ارفع راسي مدري وقتها وش ضنوا فيني بس خلاص ما قدرت ارفع راسي
خالد : الله الله على الزين كل هذا لعامر
ما قدرت حتى ابتسم ويمكن حفظت عدد النقش الي بالزوليه
راشد : زين اخيرا استحت نوره
كنت منقهره بخاطري هين يا ريشد
رفعت راسي شفت منور وضحكتها لي تمنيت ارمي كل الوزن الي شايلته من الذهب واركض لها ونطلع نلعب الشارع وننسى انا كبار
حطو الغدا وراحو اهلي وجداني وتميت جالسه بمكاني ما تعديته لحد ما قالت لي خالتي ام زوجي روحي لغرفتك قيلي
ياربي مابي مابي اروح له شوي وصيح مابي ادخل عليه بس وش اسوي جالسه على راسي لحد ما دخلت الغرفة دخلت وشفته متمدد على السرير وقعدت مثل الهبلا واقفة وهو اهبل مني بعد ما يعرف يتصرف اجل فيه معرس يخلي عروسته واقفه ما يجي ويمسك يدها ويجلسها وربي يا عامر انك ما تعرف الرومنسيه هذا كلامي الحين بس زمان حتى انا ما اعرف الرومنسية المهم ما عرفت وش اسوي
بس شفته يوم نام فرحت ورحت ونزلت الذهب الي علي ولاني ما تعودت انام الظهر جلست بالارض بس ما غير اخطط في الارضيه باصبعي ارسم مربعات دوائر لحد ما سمعت صوت اذان العصر ياربي اصحيه او لا قلعته خله اذا يبي يصلي يقوم بنفسه بس يمكن خالتي تزعل رحت وانا خايفه ومابي امسكه وصوتي لحد الحين ما سمعه الا الشهقه بس
كل شوي افتح فمي ابي اناديه وارجع اقفل افتح وارجع اقفل ما قدرت الا انا فزيت من الخرعه على صوت الطق
خالتي :من ورى الباب قوموا قوموا صلوا
تقلب عامر وتأفف مزاجه معكر جلس شوي على السرير وقعد يفرك عيونه ويرد شعره على ورى وانا بس اطالع فيه مشى وقرب مني صرخت بصوت عالي
عامر : عمى بعينك وش فيك
كان يبي فوطته وراي وانا ما دريت وش الطبخة احسب مثل ما قالت لي نجلا تفشلت مره
راح وتروش ولبس وطلع وانا رحت وتوضيت وحسيت براحه مافي الغرفة الا انا وغيرت ثوبي ولبست ثوب ثاني دولابي مليان فرحانه كل يوم بلبس ثوب بس الوان حدث ولا حرج كل الالوان ههه كل ما اتذكر جهازي اموت ضحك المهم بدلت وصليت وحسيت براحه وطلعت عليهم لقيتهم فارشين بالحوش كان عامر وحيدهم ومستحيل احد يجيهم جيت جنب خالتي وجلست وانا مدنقه ومستحيه وهي ترحب فيني
جا عامر وابوه من الصلاه وجلسوا وقعدوا يتقهون
عامر : يبه ترى بسافر الخميس الجاي
ابو عامر : تسافر وانت توك معرس
عامر : يبه الله يهداك انا وافقت اعرس واخذ بنت ابو خالد عشان تخليني اكمل دراستي
خلاص بصيح العبره تخنقني يعني متزوجني عشان يرضي اهله ويخلونه يسافر
فهمت من كلامه انه يبي يسافر بلحاله ويكمل دراسته وسافر عامر وخلاني اسم زوجه له
رحت لبيتنا بعد ما سافر وكل يومين اروح لخالتي ام عامر حبيتها لكن الي حرق قلبي اكثر سالم ما شفته ما صار يجينا اسمع راشد يتكلم عنه بس ما عاد شفته