رواية خلي خوتك ليه روايه روعه

1. حريز ..


2. اليازي .. واليازيا ..


3. فهيد ..


4. نوف ..


5. شذى..


6. اليازيا: بسم الله عليه ..


7. اليازي: عيل اسكتي ..

مرحبا
أني جايه ومعي روايه روعه بصراحه هي من الروايات
إلي عجبتني وراح أنزل البارتات إذا شفة تفاعل مع الروايه
وهذه الروايه
يخلي خوتك ليه
للكاتبة: وردة بلادي
الأخوه :: غصن رطب لا ييبس ولا يجف ..
الأخوه :: نهر جاري .. لا ينقطع سيله ولا يكف ..
الأخوه :: صداقة ووفاء .. و رفعة وعطاء .. الى آخر العمر ..
الجزء الأول
التعريف بالشخصيات
خلفان ..
الولد العود .. عمره 27 سنه .. شديد شوي .. يعني بس يعطي نظره وحده الكل يخاف.. وظيفته حكوميه .. وهو خاطب بنت عمه ناعمه ..

حريز ..

ايي بعد خلفان .. عمره 23 سنه ..وهو هادي .. ما يخصه في حد .. تقدر تقول عنه انسان غامض .. محد يعرف بشوه يفكر .. وشوه اللي يدور فراسه .. بس مرح بعض الاوقات .. ينفع ينسيك حزنك .. واكثر واحد فاهم خواته هو ..

اليازي .. واليازيا ..

طبعا من تقارب الأسماء عرفتوا انهن توم .. بنتين عمارهن 18 سنه .. الوحده تكبر الثانيه ب ثلث ساعه بس .. الأكبر بينهن هي اليازيا .. يشابهن وايد وبطريقه فظيعه .. يعني ما في فرق بينهن ابد .. غير ان وحده لها شامه على كفها اليسار .. تحت جهة اليمين وهاي هي اليازي .. بس هالفرق الوحيد بينهن .. شعرهن يوصل لركبهن .. قاصينه طبقتين .. بحيث الطبقه اللي فوق تكون اقصر وتوصل لجتوفهن ..
طوال .. ومب متان ولا ضعاف يعني .. كل وحده عليها خدود ورديه .. ويوم تشوفهن تقول كل النعومه فيهن .. بس العكس صحيح .. دفاشة الدنيا فيهن مع ان ما يليق على مظهرن الخارجي ..
في مميزات بينهن ... اول ميزه واهمها .. ان من تخرجن والعرسان اييون يخطبونهن ولا وحده فيهن توافق .. واذا ابوهن جبرهن .. هن بعد ينجبرن بأنه عريس الغفله يخضع لتجاربهن وخططهن اللي تخليه يشرد ولا يفكر فالعرس ابد ..

فهيد ..

آخر العنقود .. يحب يظهر برع البيت ويلعب دوم ... عقله كبير ويفهم بسرعه .. عمره 13 سنهحامد ..
الدنيا عنده لعب لا يروح فكركم بعيد .. عمره 27 سنه.. يعني كل مشكله عنده في هالدنيا ولها حل.. بس كل اللي ذكرته من شخصيتهه يوم يكون ويا ربعه .. اما يمعات العايله بس يشوفهم من مناسبه لغيرها .. وما يجتمع وايد وياهم.. وينقهر من نوف ودلعها ..
ناعمه..
بنت شفافه وناعمه اسم على مسمى 25.. على شدة خلفان و هيبته تحبه ..وهو ولد عمها وخاطبنها .. يعني ما بتلقى احسن منه ..
حارب ..
يحب السوالف والظحك والغشمره .. ويحب اليمعات .. بس تكون يمعات شباب مب شياب .. عمره 23 سنه .. وهو اقرب واحد ل حريز ولد عمه ..

نوف ..

عمرها 7 سنوات .. وهي وايد حشره .. تموت على اخوها حارب .. بس يوم يكون الموضوع متعلق بسيرتها للعين عند بنات خالها هناك .. تنسى حارب وتنسى طوايفها كلهم .. وهي حاليا هناك ..ناصر ..
عمره 27 سنه .. عليه ذاك الجمال اللي يعق الطير من السما ..ربيع خلفان الروح بالروح..اذا بغى يفضفض باللي فخاطره يقوله حق خلفان .. واذا بغى من يساعده في مشكله يلجأ ل خلفان .. وخلفان بعد نفس الشي .. ويشتغل في نفس المكان اللي يشتغل فيه خلفان ..
شهاب..
حشره + مسولفجي + يخرب كل شي = شخصيه روعه .. عمره 21 سنه .. بعده يدرس فالجامعه نظم المعلومات ..

شذى..

بنيه حلوه وطيبه ..عمرها 19 سنه .. تدخل القلب بسرعه مع انها حشره ... ولانها البنت الوحيده فالبيت .. فكل حد يطلع حرته فيها .. وهي بروحها تدلع عمرها .. لان الدلع كله للولد الصغير اللي هو شهاب .. يشاركها دلع امها واخوانها .. بس دلع ابوها ما يقدر ..
اليازي: متى بيظهرون ؟؟
اليازيا: ما ادري
اليازي: تعبت من كثر ما اتريا
اليازيا: تعالي تعالي بسرعه ظهروا
اليازي: هههاي اطاعي شكله ههه
اليازيا: احسن يتأدب محد قاله
اليازي: ههه كيف يحجج جسمه قطعه
اليازيا: تصدقين كسر بخاطريه
اليازي: قومي انزين .. ميته عليه وافقي

اليازيا: بسم الله عليه ..

اليازي: عيل اسكتي ..

اليازي واليازيا كانن يراقبن الرياييل وهم يظهرون من الميلس .. والقصه كالمعتاد واحد مثله مثل اي واحد ما عرف حليله بأن في هالبيت ما في بنات للزواج (هذا راي اليازي واليازيا) يا ويبغي يخطب .. بس النتيجه انه خضع لمقلب من مقالب التوم .. الله يعينه .. وهن ملصقات ويوهن في زجاج الصاله .. ومندسات ورا الستاره .. دخل اخوهن فهيد ..
فهيد: شوه تسون ؟؟
اليازي (فزت من مكانها): بسم الله الرحمن الرحيم
فهيد (وهو ييلس عالكرسي): شوه تسون ؟؟
اليازيا: ما يخصك
اليازي: هاللي ناقص بعد اليهال يدخلون
فهيد: جني ما اعرف انكن تراقبن الرياييل اللي كانوا فالميلس
اليازيا: زين يوم تعرف
اليازي: وفرت علينا
فهيد: والله متفيجات .. وهاللي ياي متفيج زياده .. يعني صدق اهبل ما لقى غير من بيتنا يخطب
اليازيا:انا ادري روح قوله والله
فهيد: لو كان بايدي بقوله والله .. قبل ما ياكل من هالمقالب .. صح تعالن شوه سويتن هالمره ؟؟
اليازيا (وهي تظحك):ههه اصبر شوي شوي .. الحين بتييك الأخبار
فهيد: الله يعين
ومن شافن ابوهم واخوانهم يايين صوب الصاله .. ركظن ويلسن مؤدبات ولا جنه يعرفن بالسالفه او مسويات شي ..
فهيد: الله عالأدب
اليازيا:جب انته
بو خلفان: السلام عليكم والرحمه
الكل: وعليكم السلام
اليازيا: مرحبا بالغالي
بو خلفان: مرحبا بج
اليازيا: اقول ابويه تبغي نحط لك العشا
بو خلفان: بلاج الله يهديج .. توني متعشي مع الرياييل
اليازيا: اوه صح نسيت ابويه اسمح لي
اليازي(وهي تبغي تسحب الكلام من ابوها): ثرنا لهينا ونسينا
فهيد: الحين انتي شدخلج .. هو يرمس اليازيا
اليازي: والله بعطيك بالنعال الحين
بو خلفان: قومي قومي عطيه .. ولا تحسبي لي حساب .. قومي شوه تتريين بعد
اليازي: آسفه ابويه
اليازيا: اسمح لها ابويه .. بس هذا فهيد من الصبح ملعوزنا
فهيد: انا ؟؟ والله توني ياي من برع
بو خلفان :وانته ليش ما ييت الميلس تجابل الرياييل ويانا والا فالح بس هياته من بيت فلان لبيت علان
فهيد: ابويه بعدني صغير على هاليلسات .. وبعدين ايي واعرف شوه بتكون ردة الفعل واعرف شوه بيكون الجواب .. اتعب عمريه شحقه
حريز: تعلم
فهيد: والله ما فيه ظحكه لا تظحكني غصب ههه
اليازيا:ههه هيه والله حتى انا
فهيد (وهو يطالع اليازي): اف بعد رمست .. انتي شدخلج
اليازي:لا تطالعني مساعه كنت انا اللي ارمس الحين اليازيا رمست
فهيد: انتي والا هي كله واحد .. تعودنا
خلفان: ها ابويه شرايك بالمعرس
من طرا خلفان المعرس .. واليازيا واليازي يترين بس واحد فيهم يرمس ويقول انه ما يناسبهن ويفتكن منه مثل الباقين ..
بو خلفان: ما ادري
حريز : انا اشوف انه ما يناسب ولا وحده فيهن
بو خلفان: وانا بعد .. من الصبح يالس ويحجج فجسمه .. ما ادري مريض شفيه .. عفانا الله .. ما فينا نبلي وحده من بناتنا به
خلفان: انا بظهر الحين .. مع السلامه
بو خلفان: وانا بسير حجرتيه .. متى ما امكم يت خبروني
اليازيا: ما يحتاي روحها بتيي الحجره عندك
اليازيا واليازي كاتمات الظحكه .. بس يترين متى ابوهن يسير الحجره .. واخوهن خلفان يظهر .. واول ما ظهروا هالاثنين .. ظحكن ظحك لين ما دموعهن نزلت ..
حريز: شوه حطيتن فالميلس؟؟
اليازيا: ما شي
حريز:علي انا هالسوالف .. قولي بسرعه
اليازي:حطينا بودره ههه
فهيد: مقوات عينكن .. صدق ان كيدهن عظيم
اليازي: توك تدري ههه
حريز: انزين بس عاد
اليازيا:ههه اتخيل شكله
اليازي: احسن .. اف راحه والله راحه
حريز: حرام عليكن .. والله جريمه ولازم تتعاقبن عليها
اليازي:حريز .. انتوا اللي حرام عليكم .. يعني قلنا لكم ما نبغيه العرس .. مب غصب
فهيد: بكفيج انتي وياها .. نحن نبغي نعرسكن ونفتك
اليازيا: مالت عليك
فهيد: اختيه العوده وقدوه وقدوه .. القدوه تقول مالت عليك انا بعد ما انلام
حريز: والله شاك انكن حاطات بس بودره .. الريال قطع عمره ..
اليازي:لا لاتخاف .. بس خل يسبح وخلاص ما بيقطع عمره بعدها
اليازيا:اما اذا كان ما يسبح فهاي مشكلته يعاني لين ما يتكرم حضرته يغسل جسمه ههه
فهيد: لوعتن جبدي
حريز: تصدقن والله حاس بحجه فجسمي .. ليكون حطيتن فالميلس كله
اليازيا:لالا بس وين ما هو يالس ..
فهيد: شدراكن انه هني بييلس؟؟
اليازيا:لان اي حد ايي ييلس هناك
حريز (وهو يحجج جسمه): انا اسير اسبح احسن والله
اليازيا:ههه روح الحق على عمرك عيل ..
شذى كانت يالسه فالصاله ويا امها .. دخل شهاب وهو منتهي تعبان .. ومب متفيج ..
شذى:الناس يسلمون
شهاب:مب متفيج
ام ناصر: بلاك ؟؟ شفيك ؟؟ قلت لك لا تظهر لا تظهر ظهرت والحين راد وانته تعبان ..
شهاب:والله امايه ما فيه الحين عالمحاظرات
شذى:دوم هالجمله على لسانك متى عيل بتتفيج
شهاب:بتسكتين والا صدق اقوم لج الحين
ام ناصر:بس يا شذى سكتي عن اخوج
شذى:شوه والله ملل .. هم يظهرون يسيرون ويردون .. وانا حليلي هني محبوسه فالبيت .. اف شوه هالعيشه
ام ناصر:يعني تبغين تظهرين انتي بعد ؟؟
شذى:هيه عيل .. شوه قالولج عني .. ثرني انسانه حالي حال هذيل
شهاب: يالله يالله .. يلسي فالبيت .. البنت مكانها البيت
شذى:والولد الشوارع والهياته والا شوه ؟؟
ام ناصر: صح كلام اخوج بعد شعنه تراددين
شهاب: قفطوها .. سكتي سكتي الله يخليج
شذى:اف
ام ناصر:لا تتأففين .. وقومي حطي العشا لاخوج
شذى:والله يبغي يدله المطبخ .. يروح ويحط لعمره .. انا مب متفيجه
شهاب: ومنوه قال اني باكل لو حطيتي لي .. اخافج تحطين سم ما فيه عقب ..
شذى:احسن
ام ناصر:فديتك والله يا ولدي .. انا بقوم احطي لك .. هاي خلها دومها مب متفيجه ..
شهاب:لا الغاليه والله ما ابغي .. لو ابغي بقول .. بس متعشي وخالص ..
اليازيا كانت فالحجره ووياها اليازي .. وكانن يسولفن عن الجامعه وعن الدراسه .. وعن الأرف!!!
اليازيا:تذكرين قبل شوه كنا نسوي في حصة الجغرافيا
اليازي:ههه غبيه كانت الأبله ..
اليازيا:ما كانت غبيه .. احس انها كانت تتغابى .. عاد مب لهالدرجه فرينا اوراق عادي فرينا مقالم عادي فرينا دفاتر عادي فرينا كتب وخرايط وشنط عاد صدق انها تتغابي يعنى ما تشوف
اليازي:ههه يمكن صدق ما كانت تشوف .. وبعدين تدريبها ما بتسوي شي ... تعرف ان بنطلع منها
اليازيا:ههه غباء
اليازي:انزين تذكرين حصة التاريخ
اليازيا:فديت فطوم انا
اليازي:منوه فطوم ؟؟
اليازيا:منوه بعد ؟؟ ابلة فاطمه ابلة التاريخ
اليازي:هيه صح .. هيه والله فديتها .. كانت طيوبه
اليازيا: والا ابلة الرياضيات ههه تذكرين يوم بدلنا اوراقنا انا وانتي ..
اليازي:هيه عيل ما اذكر .. ما كنتي مذاكره هذاك اليوم .. بدلنا الأوراق وكتبت لج الاجابات
اليازيا:الله يخس ابليسها اونها عاد جكتنا بس مشتها لنا
اليازي:خليها زين .. خلصت السنه ونجحنا الحمدلله وافتكينا
اليازيا:هيه والله
ويسمعن حد يدق الباب ..
اليازيا:ادخل ادخل ..
اليازي: منوه ؟؟
اليازيا:يعني في غيره فهيد
فهيد (فج الباب ودخل) :كيف عرفتيني
اليازيا: ساحره
فهيد:ما استبعد
اليازي:نعم خير شوه تبغي؟؟
فهيد: ويوهكن مب ويه حد يعطيكن سالفه .. بس شوه نسوي ..
اليازي:خلصنا شوه تبغي ؟؟
فهيد:حريز تحت ويايب فلم يديد .. مسرحية على كيف كيفكن ..يقول لكن تبغن تشوفنه .. تعالن تحت بسرعه
نقزت اليازيا واليازي وياها .. مسرحيه يديده وحريز يايبنها اكيد حلوه .. اخوهن ذويق ..
فهيد:هي هي انتي وياها
اليازيا:شوه
فهيد:لبسن شيلكن
اليازيا: لا تقول حارب وياه
فهيد:هيه وياه
اليازي:ههه الحين بيتخربط مثل كل مره
اليازيا:عاد هالحارب .. والله احس انه يجذب .. واحس انه وايد يستعبط
فهيد:لا والله .. حرام عليج لا تظلمينه .. ما يعرف
اليازيا:بلى يعرف
فهيد:انا اللي اخوكن مرات ما اعرف .. هو بعد ما ينلام
اليازي:انزين يالله بسرعه .. يسويها حارب ويشل الفلم ويرد بيتهم يطالعه
حارب وحريز كانوا يالسين .. نزلت اليازيا واليازي .. ووياهن فهيد ..
اليازي:السلام عليكم
حارب:هلا .. هلا والله ببنات عمي هلا
اليازي:اهلين .. بحويرب
حارب: حويرب ؟؟!! بطوفها لج .. شحالكن
اليازيا:بخير
حارب:والله احس ان عيوني تعورني يوم اشوفكن
اليازيا:احسن عيل لا تشوفنا
حارب:انتي منوه الحين ام لسان
اليازيا:يزوي
حارب:لا .. حلفي ؟؟ قولي والله ؟؟ تصدقين عاد يعني اسمج انتي فالشرق والثانيه فالغرب.. انتي قلتي يزوي وادلعين عمرج عسب جذه انا عرفت منوه اللي ترمسني
اليازي:ههه شوه نسوي يوم سمونا بأسماء متقاربه بعد
حارب:والله مصخره .. اونه عاد عمي.. سمى الاولى اليازيا .. و زاد شي وسوى انجاز في اسم الثانيه .. شل الألف الاخيره واختصر السالفه على عمره
فهيد:يالله حطوا الفلم
حريز:اصبر بنعيده
فهيد:ليش انتوا شايفينه ؟؟
حارب:لا يا بويه ما شفناه . وين بنشوفه يعني
فهيد:قلت بعد يمكن !!
حارب:اليوم الخميس صح
اليازي:هيه وباجر اليمعه
اليازيا:على طاري الخميس .. جيه ما يبت ناعمه وياك ؟
حارب:والله ما احيد اني اشتغل تاكسي اييب واودي لكن ..
اليازي:سخيف انزين
حريز:كان ويايه .. وكنا ظاهرين ويا الشباب وين نييب ناعمه بعد
اليازيا:حليلها هالناعمه
حارب:تتريا فارس الاحلام متى يشفق عليها ويقول يالله .. طنق طنق ..عرس
اليازيا:ههه حلوه حلوه .. بس لا تعيدها
حارب:لا .. حلفي .. قولي والله ؟؟ لهالدرجه عيبتج
اليازي:ههه هيه والله حتى انا عيبتني ..
حريز: انته جنك الا مصختها يالله شغل
فهيد:هيه والله
حارب:هدوء بدت المسرحيه
خلفان: ناصر بسك عاد
ناصر:يوعان والله يوعان
خلفان: نرد البيت الوقت متأخر باجر اليمعه بعد
ناصر:انزين وشوه يعني ؟؟
خلفان: شوه يعني شوه ؟؟ صلاه بيقومونا من وقت
ناصر:هيه صدق والله ذكرتني ..
خلفان:نش عيل
ناصر:خلني اخلص وجبتي .. دافع فيها
خلفان:برد لك البيزات اللي دفعتها بس نش .. ما فيه الحين تلقى يمكن العيوز اترياني جني ياهل
ناصر:لا انا عيوزتنا ملت من كثر ما اتريا .. ترقد الحين ولا تعبر
خلفان: والله احسن
ناصر:انزين يالله الحمدلله .. سرينا
خلفان:يالله ..
نشوا خلفان وناصر بيردون البيت .. خلفان بيوصل ناصر وعقب بيسير بيتهم ..
خلصت المسرحيه .. وفهيد فيه رقاد من الخاطر .. واليازي واليازيا للحين ما خلصن ظحك .. مع ان المسرحيه خلصت !!!
حارب:والله خبايل
اليازي:ههه يظحك والله يظحك
فهيد:انا بسير ارقد ..
حريز:بس يالله نشن انتن بعد باجر اليمعه
حارب:دخل دخل هالسويحرات خواتك
اليازيا: نحن الحين ما بنرقد حتى لو سرنا فوق
حريز:ليش؟؟ شوه تبغن بعد
اليازي:بنتم نسولف لين نرقد ..
حريز:سيرن رقدن بسكن ..
اليازيا: حريز
اليازي: الله يخليك
حريز ( ما قدر يقاوم نظرات خواته مع انه يعرف انهن يمثلن):خلاص كيفكن
حارب:ط .. لو انا منك بدخلن حجرهن غصبن عنهن .. والله حاله .. قصن عليه بكلمه ويالله خلاهن
اليازي:اف يالغيره .. لا تخرب اخونا علينا
حارب:كيفكن انتن واخوكن هذا .. انا بسير بيتنا
اليازيا:سلم على ناعمه
حارب قبل ما يرمس شاف اليازيا فاتحه عينها واليازي شراتها .. وركظن فوق بسرعه ..
حارب:بسم الله بلاهن خواتك
حريز:شوف وراك
وشاف ان خلفان كان داخل توه من باب الحوش بسيارته ..
حارب:ههه وانا اقول
حريز:عسب جذه خليتهن .. عرفت ان الحين خلفان بيي وبروحن بيسيرن
حارب:والله خواتك .. ما في منهن
حريز: ادري ان ما في مثلهن ..
حارب:لا تصدق عمرك .. اقصد ما في مثلهن .. يعني وع
حريز:مالت عليك .. سر سر بيتكم
حارب:ههه تطردني .. بيت عمي انزين
حريز:سر سر انزين ليكون تبغي تبات هني بعد
حارب: حلوه الفكره .. يالله وين في حجره فاضيه
حريز:اقولك .. ادل الباب والا ادليك
حارب:ههه لا ادله .. يالله بسير الحين
حريز:اشوفك باجر ان شاء الله
حارب:ان شاء الله اذا الله حيانا .. مع السلامه .. وسلم على خواتك ههه السويحرات
حريز:الله يسلمك ههه
في حجرة التوم .. عقب ما بدلن ثيابهن .. تمن يتحرطمن ..
اليازيا:اف خرب علينا
اليازي: كله من حوبات حويرب
اليازيا: بسنا خلاص نرقد
اليازي: ما فيه رقاد
اليازيا: يزوي نرقد احسن والله .. باجر ورانا نشه ..
اليازي: انزين .. يالله
اليازيا: يالله تعالي
يلسن اليازيا واليازي على شباريهن .. اللي ملصقينها في بعض .. كل وحده متربعه ويالسه .. وغمضن عيونهن .. وبدت اليازيا ترمس .. واليازي تكمل .. كل وحده حافظه هي شوه تقول..
كل ليله على هالحاله .. يقولن اللي حفظنه من يوم هن عمارهن 11 سنه .. وما يرقدن الا لو قالوه .. يعني لو وحده فيهن محد الثانيه ما تقدر ترقد .. الا لو تكون موجوده و يقولن هالجمل اللي حافظينها ..
اليازيا:وعد
اليازي: وعد
اليازيا:يالله رقدي
اليازي:اف
اليازيا: رقدي لا تتأففين .. خلفان رد وما بيخليج تسهرين
اليازي:برقد وأمري لله ..
اليازيا:ههه حلوه هاي بنات كبار نخاف من خلفان
اليازي: هو يخوفنا .. معاملته جافه .. عكس حريز .. شوه نسوي
اليازيا: بس اعرفي ان احترامنا له اكبر من خوفنا
اليازي:اكيد
اليازيا:عيل تصبحين على خير
اليازي:وانتي من اهله ..
بالباجر .. الساعه استوت 1 واليازي واليازيا بعدهن راقدات .. دخلت امهن عليهن ..
ام خلفان :ويديه للحين راقدات .. اليازيا اليازي ..
اليازيا (بصوت ثقيل): ها
ام خلفان:نشي نشي بسرعه
اليازيا:شوه تبغين امايه .. فيه رقاد
ام خلفان: بسكن الساعه استوت وحده .. ابوكن واخوانكن الحين بيردون من المسيد وانتن عالفراش
اليازي:امايه خلينا بس شويه
ام خلفان:نشن بسرعه الحين لا شويه ولا شويتين
اليازيا:ههه اونه عاشت العيوز والله .. قامت ترمس شرات اخوانا المصريين
ام خلفان :شوه نسوي من كثر ما نشوف مسلسلات مصريه .. ما عندنا شغله
اليازيا: الساعه كم الحين ؟
ام خلفان: وحده وحده .. يالله نشن .. اليازي .. نشي اميه .. بسج
اليازي:ان شاء الله الحين بنش
ام خلفان:الحين بتنشين ومنسدحه بعدج نشي .. والله ما فيه شده
اليازي:ليش خير امايه ؟؟ شوه فيج ؟؟ شوه يعورج ؟
اليازيا:امايه تعبانه ؟؟
ام خلفان :رويلاتي شوي تعورني ...
اليازي:خلاص عيل نوديج المستشفى
ام خلفان: لا لا .. لا مستشفى ولا شي .. شحقه مستشفى ..
اليازيا: لا بنوديج
ام خلفان: ما فيني شي يعورني خلاص .. طبت الحمدلله .. روحه العوار بيسير .. بس انتن نشن
اليازي:اوجي
ام خلفان: شوه هاي اوجي بعد ..
اليازيا:ههه يعني اوكيك امايه
ام خلفان :اوكيك بعد سويتيها انتي .. والله انكن .. مب منكن من الاأفلام اللي تطالعنها .. بقوله حريز ما اييب تخرب مخوخكن وتخترب رمستكن
اليازي:ههه امايه تطور شوه نسوي
ام خلفان:ما نبغيه هالتطور جانه بيخرب بناتنا
اليازيا:تجلبينها محاظره .. خلاص بنش .. سيري تحت ولاحقينج
ام خلفان: انزين انزين .. يالله بسرعه
خلفان وحريز .. وفهيد وامهم يالسين على الطاوله .. بس يتريون بو خلفان ايي ويتغدون ..
اليازي واليازيا .. كانن نازلات من فوق يركظن ..
ام خلفان: انتن خبايل .. بغيتن وحده فيكن تتكسر عالدري
اليازيا:الحمدلله وصلنا .. ابويه بعده ما وصل
فهيد:بلى .. بس سار الحجره والحين بيي ..
اليازي:اشوه ..
اليازيا( من شافت خلفان يلست مؤدبه وتمت تصاصر اليازي): بس خلاص يلسي وانتي ساكته ..
اليازي:ليش؟؟
اليازيا:ما يبغيلها ليش .. بترمسين ارمسي .. بس ما يخصني عقب اذا عصب عليج خلفان .. مب فاكتنج من نكده
اليازي:لا ما فيه .. خلاص بسكت
فهيد:يالله امايه ابغي آكل
ام خلفان:كل انزين .. منوه ميودنك
فهيد:وين ابويه ؟؟ تأخر
حريز:اصبر الحين هو ياي
خلفان: يعني وايد يوعان تبغي تاكل بسرعه .. شوه وراك ؟
فهيد: ما ورايه شي ..خلاص بتريا
خلفان:تريا .. احسن
ام خلفان: بلاكم على ولديه .. كل كل حبيبي .. عادي ابوك ما بيزعل لو كلت شوه يعني .. كلوا انزين ..
وتوه بو خلفان واصل ..
بو خلفان :السلام عليكم
الكل: وعليكم السلام
فهيد:زين يوم يت .. والله يوعان
بو خلفان:جان كلت ..
فهيد:لا افا .. آكل وانته محد ... ما تنزل (وأشر على رقبته)
اليازي:فهيد .. لو الحين بس عالغدا سكت .. بسوي لك اي شي تبغيه عقب
فهيد:ليش اسكت
اليازي:بس جذه .. يالس حذالي وتثرثر .. تعور الراس
فهيد: عيل عناد ما بسكت
اليازي:لا تسكت انته الخسران
خلفان: بس سكتوا
فهيد:اصلا لازم ما نسكت
خلفان: والله ؟؟
فهيد:هيه والله .. جيه يهود نحن .. التشبه باليهود هذا .. لازم عند الاكل نرمس
خلفان: انزين ما قلنا لك تشبه باليهود ولا ترمس .. ارمس بس في شي مفيد .. مب انته وياها كل ما ييتوا يلستوا تظحكون وتبربرون رحموا لسانكم
فهيد ما قدر يمسك عمره وظحك .. واليازي وياه .. واليازيا عاضه على شفايفها لانها هي المسكينه اللي يالسه بينهن اثنينتهم .. ومجابله خلفان .. وحريز ابتسم لان خلفان طريقته فالكلام تدل على أنه جاد .. وما يدري ان فهيد مب مال سوالف الجد ..
ام خلفان: شوه هالظحك الماصخ بس سكتوا عاد
فهيد:ههه يزوي سكتي والله ما اقدر
اليازي:انته اللي اسكت ههه انته بديت ..
اليازيا: اليازي بس سكتي عاد
اليازي:خلاص والله بس ظحكني ههه
بو خلفان: فهيد خلاص اسكت .. يالس تاكل انته
فهيد:والله ابويه بطني يعورني
اليازيا:سخيفه انزين
اليازي:انزين سكتيه هو .. لانه يظحك وظحكته تظحكني
حريز:ههه بس انزين خلونا ناكل عدل ..
خلفان:الحمدلله شبعت ..
بو خلفان: وين ؟؟ ما كلت شي
خلفان:بسني كلت .. وكلت وايد بعد ..
ونش خلفان .. وقفطت اليازي اكيد زعل من طريقتهم .. واليازيا يالسه تعطيها نظرات كانها تقول اصبري ودواج عندي ... وفهيد اللي اصلا عمره ما حس هذا زعل والا شي وعادي عنده خلفان دومه جذه .. كمل ظحكه وغداه ..
ردود الله يعطيكم العافيه
أكملها ولا لأ
تحياتي لمحبيني
نسى وراح