روايتي غصات حنين

(2)
.
.
.
دكتور صالح: رفضتي ؟! بصراحة صدمتيني يا داليا .. هذا المفروض يكون مؤشر ايجابي لكن يعتمد على السبب و ليش استقريتي على رفضج لخطيبج بالنهاية
داليا: دكتور ليش صدمتك
صالح: انتي غرقانة يا داليا.. و الغرقان يتمسك بأي قشة تنجيه من الماي..و انتي تبين تتزوجين تبين تهربين من الواقع و خفت توافقين من غير تفكير.. لكنج رفضتي.. و كلامج اخر مرة كان فيه قبول..داليا خلج صريحة معاي و اساعدج!
داليا: كلمتني و قلتلي اقعد مع نفسي و افكر قبل لا اعطي كلمتي و بالفعل طبقت كلامك.. و كنت استخير يا دكتور..ماكو نصيب
صالح : داليا! أبي الاسباب اللي بنيتيها بفكرج كأساس للرفض
داليا: ما ارتحت دكتور ما ارتحت
صالح: ساعديني اساعدج!! تراوغين بمصلحتج ليش !!
سبب الرفض واضح لكنج ما تبين تعترفين.. ليش يا داليا تحسسيني ان نرد لي ورا ليش
داليا: دكتور! انت قلت ان رفضي فيه مؤشر تقدم
صالح: بأمل مني تبررين لي اسباب منطقية على رفضج .. لكنج رافضة لانج .. تقارنين!! تقارنين المتقدملج ب ضاري!!
بدفاع: لا يا دكتور ان..
صالح بهجوم: لا تنكرين مقياسج بعده اهو ضاري و بعده ضاري مسيطر عليج و بعدج مبهورة بحضورووره المتصور لج من فراغ
بكل جوارحي: أرجوك يا دكتور افهمني مقياسي كان نفسي كان انا! و هالخاطب ما يناسبني ما يناسبني
صالح: ههه أفهمج؟ ولا تقصدين أحس فيج؟
بألم: إفهمني.. عقلي اللي يتكلم والله
صالح: أشك..قوليلي ليش رفضتي
داليا بتشتت: كلامه..أسلوبه..خجله مني ..و واضح مرتبك و يبيني..طموحه البسيط..
صالح: داليا؟ مقياسج ضاري! بعدج تبين حضور طاغي و جرأة .. و تحكم اقوى منج مثل ضاري
مشاعر الدفاع و الانكسار و الحيرة و الحزن فيني اختلطت .. مزيجها مر..مر
صالح: داليا..ضاري راح.. و عايش حياته و سعيد بدونج انتي ساعدي نفسج
كان اقسى شي انه جرح كبريائي كامرأة
غضب طل من عيني و ارتسم على شفايفي و غطى الحزن والله الحزن اللي تفجر من هالكلمة
داريته بالغضب
شلون يا دكتور صالح تقول جذي تجرحني؟!!
انتفضت بمكاني: انا ادري ولاني مهتمة انا ما يهمني مايهمني و انا رفضت هالزواج عشاني انا مو عشانه مو عشان ضاري
دكتور صالح يهيج مشاعري اذا شافني كابتة و مكابرة و لابسة قناع البرود.. و اهوا يدري انه اذا فجر البركان داخلي تكون الجلسة متعبة له مو بس لي.. هالريال تعبته معاي وايد.. ما خذا مني بيزة وحدة من بديت اتعالج عنده.. لاني كنت رافضة العلاج.. و كنت ما اثق بولا ريال بالدنيا .. لكنه بذكائه و بحسن نيته و شطارته قدر يكسب ثقتي.. و كان دايما يقولي انتي مو مجرد مراجعة عندي و يعطيني حافز يقولي عندي أمل فيج.. و بيوم من الايام بكون فخور فيج
شاب صغير بأول الثلاثينات من عمره لكنه أبوي الروحي.. كنت أشوفه معلم و احترمه جدا لكن بعد ما غير فيني واثر فيني.. ساعدني وايد .. كسبني.. صار ابوي الروحي اقولها مرة ثانية و احبه مو بس استاذي اللي احترمه
و بعد الشد و الجذب و المعركة اللي خذت من الوقت ما خذت
..اختصر..
صالح: انتي تدرين اني اسئلج الاسئلة مو عشان اعرف اجاباتج لكن عشان اشوف شلون تجاوبين و هذا اللي يهمني..ما يهمني ضاري او خطيبج او ابوج و اخوج و امج و خالتج و شوق!! يهمني تعاطي داليا في علاقاتها لانج انتي اللي تييني
و لا تزعلين يا داليا اذا قسيت عليج بالعكس.. انتي بالفعل تغيرتي تغير كبير من اول جلسة لنا من سنة؛ تغير أظلمج اذا نكرته.. لج تذبذبات.. ابيج تتخطين هالمرحلة للأحسن
داليا: ادري يا دكتور..
آآآآه يا دكتور
صالح: يا داليا انا عندي ايمان فيج ..و انتي.. مو اي واحد يقبل بحالتج صعبة!
ههه بكل حسرة و وِحدة !! صحيح اهو الوحيد اللي قدر يمشي معاي بالعلاج و غيره ما قدروا
داليا: شلون
صالح: لانج مرتبة كل شي بمخج بتسلسل معين ما تقبلين انه ينكسر بسهولة و عنيدة منطقج ما تساومين عليه و كنتي رافضة العلاج و راسمتلي حدود لا يمكن تسلمين اني اتخطاها
داليا: العلاج ما كان رغبتي ولا كان اختياري, كان بأمر اهلي خالتي و امي..ما كان عندي رغبة ولا ثقة..شلون يصير عندك ايمان فيني و انت تدري؟!
صالح يبتسم: ام تحدي! و انتي تدرين انا اعشق مهنتي
ابتسمت ادري والله الله يحلل رزقه هالانسان دينه برقبتي لي يوم الدين
صالح: و ساعدتيني بشغلة فيج وايد يا داليا ما تتخيلين
داليا: شنو
صالح: صراحتج مع نفسج و صدقج.. انتي ترفضين النفاق.. عنيدة لكن اذا شفتي الكلام منطقي اقتنعتي..ما تمثلين على نفسج
داليا بغصة: المنافق ظالم المنافق ظلمني يا دكتور
صالح: انظلمتي وايد.. داليا انتي تبين الريال اللي يحتويج ما تبين اي واحد انتي عشتي حياة و ضروف صعبة و تبين تعوضين .. صدقيني يا داليا الرياييل مو مثل مثل ! انا كنت اشوف بذاك الخاطب الريال اللي شاريج و اللي ممكن يعوضج حرمانج.. بس ولا يهمج انسي اللي فات و ركزي عالمستقبل
آآآآآآآآه و بانكسار من قلبي.. نزلت عيني بحضني
صالح: و شوق يا داليا ؟
بغصة و برود مصطنع: خلاص يا دكتور..كتبة الله احسن..اهيا ما تقدر و انا تعبت.. يمكن باجر الله يكتب شي ثاني؟ لكني اليوم راضية
صالح: أسئلج سؤال؟ ليش تييني دام انج راضية!!
.
.
.
بعد جلسة الساعتين كالعادة.. و بسيارتي الساعة 12 و نص الظهر
امسح الدمعة..طالعت البناية اللي فيها مكتب الدكتور صالح ..
و مر علي كل شي مثل الشريط يمر جدامي
.
.
.
طيبة بهلع تحاول تصد زوجها عن بنتها: جاسم حرام عليك هذي طفلة سبع سنوات ما تفهم
جاسم و كل شياطين الجن براسه: برا برا البيت انتي مو بنتي مو بنتي
و يطالعها بعيونها : تسمعين؟؟؟ انتي بنت امج منتي بنتي انا ما احبج ما أحبج
و يغرس اصابعه بجتفها بكل ما تحمل قوة ضابط على بنت سبع من قسوة و يحذفها حافية برة البيت
بعز الظهر
و الشمس مستوية
و داليا تبجي بصوت مسموع و تداري صرخات الالم من آذان الجيران و عيون المارة في الفريج بحياء و خوف
رغم الالم .. من حرقان حرارة الشمس المنعكسة عالارض اللي تلهب ريولها الصغيرة الحافية
آآآآآآآآآآآآآآه آآآآآآآآآآآآآآآه
تبجي و تتأوه و تداري
وين أروح؟
طقيتني يا يبا..و حذفتني بالسجين على فخذي
و الدم من شفايفي نزل على طراقاتك
و بعدي احس بضرب النعال على ظهري من امس
و دميت لي ايدي بالمسطرة من ايام
و ضرب الخيزرانة على ريولي
اللي قاعد تاكلهم الشمس!!
و تطردني؟ عشان تطالع مباراة من غير ازعاج!!
و لا ازعجك و انا اتهاوش مع عبدالرحمن اخوي
اهوا الولد
و انا البنت
اهوا غير
انا... ما تحبني...و طردتني
لو جلب ما قطيتني جذي يا يبا
بس عطني نعال البسها و علمني وين اروح؟
.
.
جاسم: صلّي ولا والله احرق ويهج بهالنار
و باجر بتحترقين بجهنم أكثر
بهلع و صراخ: يبا لا تكفى يبا لا تحرقني يبا لاء لاء
جاسم: و اضربوهم ل سبع
و تلمع النار من عود الجبريت و تلمع عيون بوعبدالرحمن وياها
.
.
جاسم: عبدالرحمن ولدي و شايل اسمي
طيبة: يا جاسم هذي هم بنتك لا تفرق بين العيال صاروا يكرهون بعض يكرهون بعض
داليا من ورا الباب تتسمع و بقلبها تتمنى تكون صبي و عزمت تكون
صبيان و كرة و مصارعة و شورتات و قص الشعر! و البنت فلتت صارت دفشة تماشي الاولاد!!
طيبة بعصبية: انتي مافيج انوثة مافيج؟؟!!
و تجاوبها عيون داليا بالكثير واللي انتي ادرى فيه يا يمه
و تمنعها طيبة بألم عن رفقة الاولاد و تقول بقلبها يالله صبرني
داليا تستسلم لتدخلات امها... ابوي ما اهتم.. صبي ولا بنت ماراح يهتم!!
أكرهه.. اي.. ماحبه
انا اكرهه .. و بيوم راح يكبر و اقطه بدار العجزة هذا اذا رحمته
.
.
تدش داليا مراهقة و تفهم .. تفهم اللي ابوها يسويه بالصالة!!
و تحط بقلبها سنين ما تقول حق احد ان ابوها يلمس نفسه بالصالة
و بالطقاق عنده شافته بنته او لاء!!
داليا: انت.. انتاا ن جس
و الجواب كف لا يرحم و على منطقة بويهها يدري انها حساسة ..داليا تتعالج من ارتخاء اربطة الفكين ,عظام ويهها ضعيفة
طيبة: تبي تشوه البنت تبي تشوه بنتك؟؟؟؟؟؟؟؟؟؟؟؟؟ بتفر و يهها
جاسم: اكسر ويهها هالجلبة
طيبة: و ليش ليش تقولين حق ابوج نجس مو عيب؟؟
داليا:...
طيبة: يا يمه ردي شسوى ابوج
داليا:....
.
.
طيبة تبجي من ورى التلفون: ط طقني يا تهاني مد ايده علي فوق الدسك اللي بظهري يطق يبي يشلني
تهاني: ما اخليج وياه و انا اختج و انا امسك قضيتج و انا محاميتج اترافع حق الناس و اخلي اختي تنهان!! عطيني تقاريرج الطبية و كل اوراقج
طيبة: يما داليا انا عزمت اتطلق و لا تلوميني
داليا: يعني.. يعني قصدج راح اصير مثل شوق؟ امها و ابوها ما يعيشون مع بعض مطلقين
طيبة: .. يا صبر أيوب على بلواه
داليا تبجي .. مابي امي تتطلق مادري ليش .. و ياخوفي اعيش مع ابوي!!! انا خايفة امي تروح و اعيش مع ابوي!! شوق و اخوانها مع خالي زيد بس خالي زيد طيب انا ابوي يكرهني يكرهني لاء
.
.
جاسم: سمعيني زين يا بنية.. يا حماارة
انتي تسوين مشاكل بيني و بين امج
داليا انصدمت:..انا!!
جاسم: ايه انتي السبب انتي السبب
.
.
طيبة بحزم: داليا سمعيني.. اذا ما قطيتي شي على راسج (تحجبتي) ابوج بطلقني فاهمة؟ تبين تتسببين بطلاقي من ابوج ؟؟ تبين تطلعيني من بيتي؟؟
داليا بضياع: لاء مابي اكون السبب خلاص خلاص راح اتحجب
راح اتحجب
.
.
طيبة: تكلمين؟؟؟ تحبين؟؟؟ يا قليلة الادب شقصرنا عليج فيه ما تقولين ؟؟؟؟؟؟
داليا ببكاء هستيري: آآآآآآآآآآآه وعدتيني اكلم فهد لو بس ايميلات من فترة لي فترة الله يخليج احتاجه يما احتاجه
طيبة: جذابة قليلة ادب ما وعدتج و ابجي ان شالله تموتين بجي انتي ياهل و اللي براسج بيصير بريولج و بربيج من يديد يا دلوي حمدي ربج ما علمت ابوج والله اعلمه ترا والله
داليا: لا يما
و ألف آآآآآآآآآآآآآآآآآآآه
.
.
و آآآآآآآآآآآآه
و وايد أكثر
و بهالاجواء.. على هالمنوال.. في منزل متواضع.. كبرت داليا
شوق: ههه يا معودة حمدي ربج ما عندج مرت ابو تغصبج تقولين لها (يمّا) عشان عيالها لا يتعقدون!!
داليا: الله يخليج لي.. اختي
شوق: و يخليج لي.. انتي مو اختي.. انتي آنا!
.
.
ارتجف اسمها على شفايفي.. همست لما ذكرتها : ش وق..
بنتين خوات توأم ... مو بالدم .. لكن بالروح
بع سنة 1995 يد
كانت داليا و شوق قاعدين يلمون بعض و يبجون و يمهم الباربيات و الالعاب عالارض..
شوق: لودي والله احبج انتي اكثر من مشاري مهما صار انتي بنت عميمة طيبة و مشاري ولد يرانّا..!!
داليا: و حتى انا.. اوعدج ان اذا مشاري خطبني اقول له على شرط تتزوج شوشو وياي .. انتي بعد سوي نفس الشي >>> تبي تضمن لول
شوشو: اي اي يالله عاد لا تبجين ههه
داليا: ههه
داليا و شوق عاجبهم هالصبي و نسجوا عليه خيالاتهم الطفولية و سوو المسألة باتفاق ودي,, اهوا ولا يدري عن هوا دارهم ... بس مو اهو المهم
.
.
و بعده بعيد ... سن 2000 ة
شوق: ههه.. يتراوالج ان انا وياج بنتم دايما ربع! .. باجر ليمن نكبر و كل وحدة فينا تتزوج ماراح نزور بعض وايد نفس الحين ماراح نصير وايد ربع
;P
داليا اللي حز بخاطرها كلام شوق : معقدة ! شمعنى
شوق: يعني شوفي امي قبل لا تاخذ ابوي كانت رفيجة عمتي تهاني الروح بالروح,, و بعد ما ابوي طلق امي انقطعوا عن بعض... اصلا من ايام ما ابوي و امي متزوجين و مشاكل بينهم.. خلاص اقولج مو ربع ! الكبار حياتهم معقدة انتي صغيرة و ما تفهمين هالشي >> ياه يالكبيرة @@
داليا و اهيا تكابر الغصة : كيفج اذا كبرنا صيري معقدة !! بس انا مابي
الكلام مو من قلب شوق .. شوق خسرت و فقدت حنان .. لو مهما دللها ابوها زيد هالريال الطيب.. فحنان الام اللي انحرمت منها ما يتعوض.. تبني هالحواجز عشان تحمي نفسها من خسارات ثانية
بس داليا عكسج ! فقد الحنان اللي عندها من نوع ثاني !
و بكل شي هالبنتين عكس بعض .. سبحان الله كأنهم يكملون بعض !! و تمر الايام و يكبرون مع بعض
في بيت يدهم عبدالله و امهم شريفة ربوا مع بعض ..شوق تعيش هناك مع زيد ابوها و اخوانها بدور و عبدالله .. قبل لا ياخذ مرته الثانية و يطلعون في بيت مستقل
و داليا تزور بشكل يومي ليل نهار ..
وين شوق ؟ مع داليا
وين داليا ؟ مع شوق !
;>
.
.
في 2002
شوق: أأأأأأأذبحج لا ريمو ولا لويلو لهم شغل بمكياجج و بدلتج بعرسج لودي فاهمة !!!
داليا ميتة ضحك و بلعانة: ههه م مو بكيفج ريم و لولوة رفيجاتي خو ماكو غيرج مثلا؟! ههه
شوق بصدمة: !!! داليا انا غير
داليا: ههه انزين انزين يبا فهمنا.. اللي يسمعج يقول الخطاب عند الباب!! ليما اصير عروس مالي غيرج,, و انتي بعد
شوق: حمارة! عبالي بعد
.
.
سن 2003 ة
داليا تكلَم و تحب اول مرة
شوق تكلّم و تحب هم أول مرة
ينقدون على بعض و يتناجرون و كانت اكبر زعلة و اطول زعلة بينهم مدتها شهر ما يتحاجون... و بالعيد .. يتصالحون
شوق بعتب و من ورى دموعها: م ما هقيتها يا داليا تخلين هالامور تفرق بينّا احنا اكبر من جذي
داليا بتناقض حزم و حنان: قلتلج هالولد ما يصلحلج .. ما هقيت تخلين ريّال يفرق بينّا
شوق: والله ما اخلي ريّال يفرق بينّا انا اختارج انتي و سيف بنساه حتى لو اني احبه.. الله كريم
داليا: و انا احبج ! اكثر من فهد والله والله
شوق بألم : شلون تقولين ان ريال يفرق بينّا شلون !! انا كنت ادري ان بنتصالح لانج داليا و انا شوق
داليا: اوعدج عن نفسي ما اسمح حق ريّال يفرق بينا وعدي ما انساه يا شوق
شوق: و انا اوعدج .. ما يتدخل ريّال بينّا.. ولا نفترق .. ولا اي ريّال يفرقنا..
و كانت مراهقة
كانت فترة مراهقة
.
.
صداع براسها .. تعبت .. تعبت
حركت داليا سيارتها من مواقف البناية رايحة بيتهم رغم انها تحس انها ماشية بدرب المجهول...
.
.
.
ممكن يكون هالبارت ثقيل و مشحون مضغوط لكن ما عليه انا متعمدة لاني بنهي المقدمة و ال"فلاش باك" هني..
و بعد هذا راح نبدي بالفصل الأول
فا يا ترى هل من متابعة ؟ p;

الجزء الاول-
تذكر قبل عام؟
.. بداية س 2008 نة..
صرخة فزع و ألم لا ارادية انطلقت من أعماقها و اهيا تحس و تشوف بعينها اللي توه صار فيها
محد سمعها..
كانت بحمامها داخل دارها المنعزلة نوعا ما ,, تسمع ولا تعي صوت الماي يجري بغزارة من الدوش
بصمت من بين دقات قلبها الذاهلة كانت تراقب و تستوعب الدم دمها و اهوا يختلط في الماي
و تبدي.. تستوعب
صرخت اراديا هالمرة و و لصقت ظهرها العاري بطوفة الحمام و اهيا لا تستشعر برودتها القاسية على جلدها ..كأنها تحتمي في هالطوفة من هول اللي صار و اللي ممكن يصير بعد هالحادثة
فقدت شوق عذريتها
بكت بمرارة بمرارة و تزيد تزيد كل ما استوعبت اكثر
عقلها يشتغل بسرعة رهيبة بهاللحظة, يستوعب - مع كل لحظة تمر - اللي صار اكثر
و يألمها احساسها كل ما تشبًّع عقلها من استيعاب للموقف واهي تستشعر بكل مافيها و لحظة بلحظة
صانت نفسها..
رغم حبها القديم ل سيف و اللي لازال ياكل قلبها التعبان
شوق ما رضت حتى يشوفها من بعيد لي بعيد !
تشاء حكمة الحكيم سبحانه انها اهيا من بين كل البنات اللي حبوا تفقد أغلى ما تملكه البنت في حادث تعيس خارج عن ارادتها
حركت عيونها و طاحت على اللي خذا عذريتها.. الحديدة المكشوفة في البانيو!!
آآآآآآآآآآآه ليتني و ليتني استعيلت على تصليحها ليتني
جان ما تلقفتني من تحتي لما زلقت بهالماي
بس لو صلحت هالحديدة!!
يا حسرتي !!!
!!!!!!
فجأة .. علت ملامح الجد وجهها ..استنكرت اللي صار شنو بهالسهولة تصير مو بنت بلحظة جذي معقولة !!! لا هذا لا يعقل
فكرت : بتأكد !! انا بتأكد
و بكل يأس و بحركة قد يعتبرها البعض غبية
حيث انها و بالتأكيد تقضي على بقايا عذريتها ان بقيت
تاخذ شوق بطل ماي صحة تفرغه...و تدخله فيها
ببكاء مكتوم مرير تتأوه: آه
يطلع البطل منها مغطى بالدم
و شنو كانت تتوقع غير جذي ؟؟ اهيا اصلا تدري انها قاعدة تخوره بهالتصرف !!!!
بس نفسها كانت تاكلها انها تتصرف اياً كان التصرف!!!
حذفت البطل بقسوة بقسوة بعد ما تأكدت ان البطل محى آثار عذريتها اللي مزقتها الحديدة المكشوفة
و بكت بحرقة .. كانت عارية فوق نزيفها على ارض الحمام..
.
.
داليا: هالو
شوق: دال يا
داليا: يس يالقاطعة ههه
شوق و الجد بصوتها: اوكي باي ليما تشبعين هبال دقي
داليا: !!! شدعوة عليج
بعصبية و تهجم: انتي غبية !! بكل وقت تضحكين!! ما تحسين قلبج ميت !! روحي جد جد مالي خلقج عبالي كفو والله
داليا: شوق!! انتي شفيج
انفجرت شوق باكية و قصت لها اللي صار من اسبوعين
تناثر الكلام مبعثر.. جمعته داليا من بين صدمتها و ذهولها حتى تكمل الصورة البشعة
و تفهم
داليا: من اسبوعين
شوق: اسبوعين
داليا: ولا تقولين حق احد؟! و الحين قاعدة تقولين لي!!
شوق: ما تتخيلين الخوف..انا ما انام
شوق كتومة .. كتومة .. و اذا قربت عالانفجار لجأت لبنت عمتها و توأمها داليا
فقط لا غير
مع الرفض القاطع لأي تدخلات خارجية
بعد محاولات مكثفة في ظرف اسبوع قدرت داليا تقنع شوق تاخذها بالسر عيادة امراض نساء
شوق ما تبي احد يتدخل!!!
داليا بنت عشرين و قليلة خبرة!! إي شتسوي ؟؟ مو نوعها تعلم الكبار اذا أمنوها على سر
ادري مو تصرف حكيم..بس انا شايفة ان ماكو احد كبير يقدر يكلم شوق غير طبيبة
و الطبيبة تكون اقسمت على سر المهنة .. تكلم شوق عن علم و خبرة و دراية .. اكيد مارة عليها مثل هالسالفة مليون ! ممكن تقنعها بحل او عالاقل تقنعها بتدخل الاهل
و خذيت شوق و رحنا
و مرت علي الدقايق دهر و انا انطر شوق برة غرفة الفحص
سألت رفيجاتي منو احسن طبيبة امراض نسا و ولادة و خليتهم يسئلونلي و بالاخير دلوني عليها
بس يوم رحنا هناك لقيناها مو مداومة !! و بمكانها طبيبة ثانية.. دكتورة هالة
ترددت اخلي شوق تدش ولا لاء؟ بس انا اضمن هالعنيدة ترضى تيي مرة ثانية؟!! مستحيل
توكلنا على الله
آآآآآآآه يا طول الانتظار
يا صبر أيوب
و تهلل وجهي يوم طلعت شوق.. تبادلت الارقام مع الدكتورة
الدكتورة: زي ما وعدتك يا حبيبتي.. حبئى أطمنك بكرة المسا ان شاء الله
شوق: دكتورة انا مو عارفة شلون اشكرج
الدكتورة: لأه يا حبيبتي حتزعليني منك واللهِ دي مهنتي و ده واجبي
و طول ما البنتين ماشين و طالعين من العيادة حتى وصولهم للسيارة كانت شوق كلها نظرات حذر و شك و ريبة و احساس بأن الناس كلهم يدرون كلهم يعرفون ليش اهيا هني
شدت داليا على ايدها برفق, طالعتها شوق .. و بادلتها الابتسام بانكسار
اتفقنا نكون اثنين ..
آنا الرمش و انت العين ..
إذا ما فرقنا القدر .. ما تفرقنا البشر
مادري.. آه من القدر ؟ ولا آه من البشر !
ولا الاثنين؟
الاثنين..
...
و بأجواء ثانية
مختلفة بما تحمله كلمة اختلاف من معنى
رغم شبه واحد بس..
انهم ايضا اثنين اصحاب و اخوان دنيا.. و يجمع بينهم رابط الدم كذلك
علي و ضاري
علي: يا اخي والله سياقتك برود برود
ضاري: الشارع يقول 80 .. نمشي 80 !!
علي: يبا والله انسطلت و الشمس ما ترحم , صارلنا جم يوم بالبحر نحدق يرحم امك اسرع شوي بنام
ضاري: الله!! الحين إنت يالميدة تقول هالحجي ! ولك شخليت لغيرك هع هع
علي: خير خير يبا اللي يحدق وياك ياكل تبن قايلك مريض لا تهوس علي لا تمددها
ضاري: سلم قلبه سلامتس
علي: مداوم بااجر؟
ضاري: إجازة يا حبيبي
علي: بتتفرغ حق شيسمونه
تغيرت ملامحه للاقتضاب..ضاري حذف زقارته من الدريشة
علي: اي مالقيت اللي تريحك.. عادي يا اخي نادية تعين و تعاون,, شدعوة على كبريائك اللي ما يسمحلك تسمح حق نادية تلقالك صاحبة .. اهيا عارفة المزاج
ضاري: انطم لا من الدريشة و الله.. انا ما قلت جذي ! اهيا قالت مو عاجبني حالك و بلقالك اللي تسرك... جانها بتلقى ما عندي مانع و ان مالقت طقاق يطقها و يطقك ماني عيزان عن روحي ولاني طايح بجبد نفسي ولاني سائلها لقيتي ما لقيتي و من صج جب لا ترد على كلامي لا صج من الدريشة تلحق زقارتي
علي: بل بل بل
ضاري: ايه والله!
علي: ...
ضاري: ههه ياخي دبر عمرك بالاول
علي: ايه الله كريم !
ضاري: جب كل خ.. شتبي بعد! متزوج و مرتاح انا ما عندي حتى احد يسويلي لقمة يوم اكل يوم لاء
علي: والله شكلي بطلقها والله
ضاري: الطلقة الثانية
علي: دفعة مردي
ضاري: كفو عليك بو لطّووف
ضاري و علي ماهم شباب مراهقين..
يومها كان علي 32 سنة.. متزوج أمل من العايلة,, خذاها و اهيا بعدها بنت ثانوية
واهوا مراهق ما كمل ال20 سنة ..
كانوا يعشقون بعض في بداية زواجهم
كانوا احلى زوجين صغار لين ما بدوا الاهل يتدخلون بينهم
يتدخلون امهاتهم!! هذا و اهم اهل!
أمل يات على نفسها ألف مرة لين قدرت تكسب خالتها ام ريلها و شوي شوي صارت بحسبة بنتها مو مجرد جنتها
أمل ذكية , بس عنيدة
أما علي كان يتبع سياسة الصد.. كان يصد و يصد عن المشاكل و الحنة و يعرف على مرته بنات و ينسى عندهم لكن الحنة تطحن تطحن فوق راسه و ام امل تشب الشر و تفتح عين بنتها على علاقات ريلها و يزيد التدخل اللي يؤدي ب علي للانفجار اللي نتيجته تجريح و تهشيم لعلاقتهم اكثر و اكثر او تهور لا تحمد عقباه وصل مرة الى الطلاق
لوما غضب ابو علي و ابو امل جان ما ردوا
بنتهم لطيفة فاهمة كل شي .. لطيفة مو صغيرة .. لطيفة بنت 11
علي صاد عنها و عن امها مل من المشاكل.. يبي حب ينسيه.. رومانسي بزيادة .. كان رومانسي مع امل لحد ما كرهها ..
تعبان .. و شخصيته ضعيفه.. واضح تعطشه لحنان انثى..
عشان جذي اغلب البنات ما ينجذبونله و يبقون علاقتهم فيه مجرد صداقة.. و اهوا ميت يجذبله وحدة أي وحدة
عكس ضاري
ضاري شخصية معقدة يصعب وصفها
كثر ما يصعب التعامل معاها
ساحر شخصيته فيها سحر توحي فيه و نابع من التضاد المتأصل فيه
سكّير عالمزاج لكن حاضر البديهة و سريعها.. لي درجة الذكاء الحاد
ما يصلي, لكنه يصوم!!
راعي حفلات لكنه يختار منها الارقى لانه يشوف نفسه راقي و فوق الكل
مراوغ مناور و خادع بدون ما يقول في حديثه جذبة وحدة... انما يخلق جو كاذب وهمي (نفاق )
مغرور بنفسه حتى و اهو رخيص!
كلامه موزون مدروس موضوع منطقي تحليلي و ان كان في ما لا يقبله المنطق!
حضوره .. طاغي .. طاغي طاغي و ان كان ظالم
تحتار.. هل في بقلبه حنان؟ انت بالفعل تسأل!! في بقلبه حنان؟؟ مرات يتهيألك حنانه .. رغم انك ألف مرة تشوف جبروته
آنا ما اقدر اقول عنه اكثر من جذي..
بستشهد بكلمة قالها عن نفسه:
آنا الريّال اللي أمج دايما تحذرج منه!
حبّوه ألف و بيحبونه بعد ألفين.. كثر ما يكبر بالعمر كثر ما تزيد جاذبيته
و اهو ضابط بالجيش يومها كان 33 سنة, مطلق و عنده ولد (حمد) ثلاث سنوات.. أهو نقطة ضعفه و مصب حنانه الصادق..محروم منه بأمر المحكمة.. اللهم الا 4 ساعات في الاسبوع..
ذيج الايام ضاري يدورله صاحبة يديدة .. مل من الاشكال الي مرت عليه مؤخرا كلهم جلاب كلهم وصخات
وده بشي غير يشيل عنه الكآبة و يردله الروح .. بس شنو و اهو اللي جرب كل الانواع! اهو نفسه ليلحين ما يدري شنو البلسم المنشوود
نادية هذي صديقة على شاكلته لاحظته وحيد بسهرتهم ذاك اليوم,, و وعدته باللي يسره
بس ماهو متحمس.. عارف شنو الاشكال اللي بتيي من تحت ايدها .. لا جديد!! نفس النمونة..
.
.
بيومها و حزتها كانت داليا عند رزان, بنت وياها بالقروب في مادة ماخذتها بالجامعة,, كانوا متيمعين و يحضرون شغلهم مع بعض
بس داليا ما كانت مركزة و ماخذة سالفة شوق حجة تمنعها عن التركيز..
الدكتورة هالة قالت ل شوق انها غلطت شلون سكتت على نفسها فترة طويلة, لان الجرح الداخلي - اللي سببته الحديدة المكشوفة في البانيو - خلال هالفترة احتمال كبير يكون اندمل!
و هالجرح اهو الدليل الوحيد على ان شوق تعرضت لحادث مو...
كان المفروض تراجع ابجر عشان تثبت هالشي بتقارير طبية
لكن بكل الاحوال طلبت الدكتورة منها تراجع الطب الشرعي
و شوق حلفت يمين انها ما تراجع الطب الشرعي لان السالفة فيها حضور ولي امر,, و خلاص سلمت بيأس ان الجرح التأم
اهي وسواسية و منعزلة و حزينة و فاقدة الامل بالذات بعد ما تخلت عنها الطبيبة اللي اكدت لها انها صدقت عفتها و بتكون يمها.. ما دقت على شوق ولا ردت على اتصالها!!
و قالتلها داليا خنروح لها العيادة و شوق رفضت لانها حاسة برفض الدكتورة لها
شوق بهدوء: أعذرها.. راجعت نفسها او زوجها.. و شافت ان من مصلحتها و اهي وافدة ما تدخل نفسها بمسائل معقدة و طب شرعي
داليا بحماس و انزعاج: حقيرة!!! يبا اذا ما ترد عليج هذي اكو غيرها و احنا بالاساس ما كنا رايحين لها و بنروح للي كنا نبيها ما خسرنا شي
شوق باصرار قاطع: خلاص
داليا مو قادرة تشتغل مع رزان, و تحس بحمل هالسر اللي ممكن تكون غلطانة انها تحتفظ فيه و تبي تطلع من رزان بأسرع وقت عشان تروح تقنع شوق عالاقل تدخّل بدور اختها الكبيرة بالموضوع
الطبيبة هالة وضحت ل شوق ان الموضوع مو هيّن, فوق ما شوق اساسا كانت مستكبرته...آه منها الكلبة شلون تنسحب جذي!!
شوق بروحها ما تثق بأحد و هذي اكبر طعنة تتوجه لها
قطعت قلبي و انا اسمعها تبجي بحرارة تقول ليت امي عايشة معاي مثل باجي البنات انا ضايعة ضايعة
آه يا شوق ما تضيعين و انا اختج!! والله ما تضيعين و انا اختج!!
قلبي عليج و يعورني
رزان: ههه يبا خلاص بلاها شغل حتى انا طقت جبدي ههه
داليا: زين ما بغيتي,, خلأقوم انا من رخصتج
رزان: لا وين عيب تو ما نور بيتنا اول مرة تزورينا خلج ترا انا اعرف اسولف و اونسج و اقلبها قعدة طرب مو نشب هيهيهي
داليا: يا بعد قلبي والله اليايات اكثر ان شالله بس صج لازم امشي وراي لوية
رزان: انزين لودي انحاشي انحاشي يمه منج
داليا: شدعوة
و شلت اغراضي و مشيت معاها توصلني
.
.
علي: ما بغينا نوصل يبا.. ودي اقول حياك بس ادري انت هلكان تبي شقتك تبي تتسبح و تخمد مثلي ! سو باي باي آند جاو
ضاري: لا حبيبي قول حياك آند ولكم لاني بنزل اسلم على خالتي صارلي دهر ما شفتها
علي: او يبا لزقة عنزروت يا اخي فارج بنّام بنّام الوالدة و الوالد هجواا من البيت ماكو الا امل و لطّوف و رزان
ضاري: لزقة شنو يا روح امك؟ يلا ول نامت عليك طوفة شابع من ويهك الودر و هم بنزل عشان خاطرك أسلم على بنت خالتي رزان @@ اخلص نادلي امك و انت طس لا ترز فيسك يالله
علي: بل والله بل
و ينزلون,,
يقعد ضاري تحت بالصالون و يروح علي فوق ينادي امه
ضاري طقت جبده.. ما يسويها عليوي ينساني و يخمد!.. يسويها؟
إف
***********************************************
<; ? Guess What

أهلين صبايا
كان هذا آخر بارت نزلته لي هاللحظة
و ان شالله بكمل لكم حسب تفاعلكم كما ذكرت آنفا >> حلوة آنفا لول
المهم واضح كلامي كويتي لاني كويتية فا اذا وحدة ما فهمت شي مني عادي تقولي و انا اوضح لها
يالله على خير ألقاكم

موفقه
اللهم صل على نبينا محمد