زوجي واهله جابو لي احباط

1. السلام عليكم


2. انا بستعمل يوزر اختي عشان اطرح مشكلتي :


3. اقولكم قصتي من البدايه حسبي الله ونعم الوكيل فيهم :


4. عشان زوجي طيب معهم ومستحيل يقولهم ليه ماقلتو لزوجتي خلاص سحبو قدره ؟


5. وفعلا زوجي الغبي صدق وقال ايه صح انا ماقلنالهم اي وقت..

السلام عليكم

انا بستعمل يوزر اختي عشان اطرح مشكلتي :

ماادري من وين ابدا ولا كيف ابدا مشكلتي كانت في اهل زوجي ومعاملتهم لي لكن الان تجاوزت حدودها وصارت مع زوجي نفسه صرت احس انهم حزب ضدي .. اهلي مو معي بنفس المدينه واحس بغربه ولما اشكي له همي يضحك علي ويستهتر فيني بالمره .. انا نفسي مستغربه لو احد يقول لي القصه كان قلت هذي تبالغ لكنها والله العظيم حدثت ومابالغت ولا ذكرت ولا شي غير حقيقي..وشلون هالناس ليه يبغوني غصب اكرههم؟

اقولكم قصتي من البدايه حسبي الله ونعم الوكيل فيهم :

انا تزوجت قبل سنه .. قبل زواجي اهل زوجي طلبو زواج كبير وقلنا اوكي رغم اني ماكنت ابغى لكن مجامله لهم قلنا اوكي .. بعد اصرار منهم كنت بحط مسجل قالو لا نبغى طقاقه وعطوني رقمها عشان ادفع بس ولا هم حجزوها وبرضو قلنا اوكي
قلنالهم شاركونا في التكاليف رفضو قالو احنا طبعنا نعمل استقبال للعروسه بس مالنا علاقه بالزواج وقلنا اوكي.. لانهم فعلاتزوج اخوه الكبير قبلي وعملولها استقبال في صاله احد الفنادق ..
جهزت فستاني عشان العزيمه وقالو لي اسمحي لنا بنأجلها شوي ان عندنا ظروف وكذا قلت لهم ان شاء الله .. وفي هالوقت رجعت انا من شهر العسل واخوه رجع من استراليا مخلص الدكتوراه وزوجته ماجستير .. جيت اسلم عليهم ولا استقبلوني زين حتى الشاي حاطينه بارد كانه مصلح من العصر . وقالولي انهم بيجهزون شقتي وجيت لقيتها على حطة يدي وكلها غبار والثلاجه مفصوله وفاضيه ورتبت شوي باللي اقدر عليه وتعشينا خبز وجبن انا وزوجي وهم بنفس اليوم كانو عاملين حفله تخرج زوجة اخوه وماعلموني حتى مااقول ليش بس دريت من قرايب لنا بعيدين وتأكدت قبل لا اقول لكم ..
المهم ان زوجة اخوه عندها طفله صغيره وعندها شغاله لسى جايبتها جديده ومع هذا كل يوم يرسلون لها اكل ومجهزين شقتهم وحتى الحلويات والفواكه مجهزه فيها وبكل وقاحه يسولفون علي ويقولون والله رحنا جهزنا شقه فلان وهم ماعلمو لي وانا العروسه ولا شي
المهم مع الوقت تزوجت احد بناتهم وعملو شبكه بالبيت ونادو زوجة اخوهم وانا مادريت الا بعدها بيوم ,, وزعلت وقلت لزوجي راح قال لهم ولما جا زعل علي وقال انتي بس تظلمينهم وتغلطين عليهم حرام عليك ..قال زوجي اصلا موب شبكه بس خرابيط زمختصره ولافيها احد !!!!
كل شي عندهم مو قدري وموب مقامي ويبون لي الاحسن وهو كله كذب والغبي زوجي يصدق
وتوالت المناسبات والحفلات والعزايم والبعيد يجي وانا مااجي ..يقولون فيها نزيف بسم الله علي حتى يتفاولو علي بالشر حسبي الله عليهم .. قلت لزوجي ع الاقل عطوني خير وقالولي انهم عازمين زوجة اخوك على تخرجها قال لا تظلمينهم هم قصدهم موب هذا قدرك وهذي خرابيط انتي تستاهلين اكثر
ومرت سنه وقسم بالله اني ماقد كلت وجبه في بيتهم ولا ضيفوني مثل الناس وكل هذا يقولون انتي تستاهلين اكثر احسهم حاقريني وزوجي مبسوط وابيه يوقف معي يقول لا هم صادقين هذي خرابيط لو جا شي يسوى نادوك .. وش اكثر من حفلات تخرج وشبكات وعروس؟
راح حاكاهم قالو وش سوينا والله اننا نموت فيها موت حتى ان جتنا والله كن شي نازل من السما
وجا نقلي هالكلام بالحرف الواحد وحسيت بغثيان من نفاقهم !!!!!!!!
اخر مره جيت عندهم وقلت بنروح نتعشى مع زوجة اخوك المهم صار ظرف لزوجة اخوه وماجت وجلست عندهم الين 12 ونص وهم كل شوي يقولون ها وش نجيب عشا ياخزياه ماجبنا تبون ؟؟؟
نفس السؤال يتكرر الين 12 ونص ولا حتى كاسه مويه زي الناس اما الباقين يجون ويتعشون وينبسطون ويعاملونهم زين وش معنى انا كذا يعاملوني؟

عشان زوجي طيب معهم ومستحيل يقولهم ليه ماقلتو لزوجتي خلاص سحبو قدره ؟

المشكله اني لما قلت له حطني انا غلطانه وكنت اكلمه وانا منهاره وابكي وقام بكل برود ويشرب كوفي ويكلم صاحبه ولا احترم حتى نقاشي معاه وكل مره اقوله هالسالفه يتهمني اني اظلمهم ويحتقرني ويسوي نفس الحركه معي .. ويقول عني اني كذابه وانهم يستنونك تقولين لهم موعد عشان يعزمونك وانتي حاقرتهم << شوفو شلون قلبوها علي !!

وفعلا زوجي الغبي صدق وقال ايه صح انا ماقلنالهم اي وقت..

وهم كل شوي يأجلوني وباين عليهم يتحججون ويتعذرون باي شي حتى مايعزمون وهو حتى الان يقول لا هم يستنونك وانتي حقرتيهم واحلف له بأغلظ الايمان ان عمري ماأجلتهم ولا قلت لا تعزمون وبرضو مايصدقني وقلت له مستعده اواجههم واقولهم انا ماقلت لكم تأجلون ولا ماتعزموني ويستخف بعقلي ويقول انتي عقلك صغير وتفكيرك تافه ومن هالكلام لحد ماطلعت من طوري
قلت له وفهمته اني ابي احترام ماابي لاعزايم ولا شي الله لايغنيهم ولا يقدرهم ابي معامله بس ليه هالتفرقه وهو مو مهتم وشلون اقنعه بصراحه طفشت من عيشتي معه ودي اطلع واروح عند اهلي ابرك من حياة الذل اللي هو راضي فيها .. كل يوم يكلمونه مو عشان مشتاقين لا .. كلم السواق , ادفع راتبه, دق عليه ,, احجز لنا بنسافر . شغالتنا مو راضيه تشتغل تعال سفرها وتستمر المكالمات وهو يستمر السواق حقهم ..
قولولي وشلون اتصرف معاه ؟ احتقرته لانه سمح انهم يهينوني ببيته ولاهمه وطلعت في بيت اخوي اريح لي الين مااشوف حل لمصيبتي ..