زوجي و علاقته بفتاة الماضي

السلام عليكم يا فراشات
انا راح ادخل للب الموضوع على طول وبدون مقدمات
انا متزوجة لياالان حول السنة وثلاث اشهر وتوي نفاس الله رزقني ببنت
المهم في بداية زواجي طبعاً قدرت بطريقتي افتح ايميل زوجي بدون ما يدري
ولقيت عنده حوالي 27 بنت في الماسنجر المهم
ولاحظت انه كان مركز يرسل لوحدة اكتر من الباقين اسمها نوف المهم
طلعت رقم البنت هادي وكلمتها والصدمة انها طلعت تعرفني وتعرف كل تفاصيل حياتي مع زوجي
المهم واجهتها وقلتلها اني ما ابغاها تكلم زوجي من بعد اليوم وبينت لي انها موافقة وانها احترمت رأيي
مع انها كانت تكلمو قبل زواجة بيا وتقابلو بعد
المهم مع العلم انها متزوجة هي من رجل ثاني تكلم زوجي ......
المهم رحت واجهته بعد ما كلمتها هي انه هل هو يعرف وحدة اسمها نوف انكر الشي دا
وحلف لي عالمصحف المهم انا هنا من شدة ما عصبت رحت قلتلو اني فتحت ايميلو وشفت الرسايل اللي كانت بينهم و كلمتها عالتلفون
المهم برضو انكر وقلب الغلط عليا انا اني ليش فتحت ايميلو المهم رحت انا قلتلو شوف يا فلان انا راح اسوي نفسي الان انسانة غبية واصدقك واني انا الغلطانة لكن قسما بالله لو يوم من الايام اكتشفت انك بتكلم اي بنت حتى لو بس مجرد كلام اعتبر الحياة بيننا انتهت حتى لو كنت جايبة منك درزن عيال
المهم اتفقنا على كدا ومرت الايام.....واكتشفت اني حامل وهواستمر معايا من احسن ما يكون قدامي
لكن في فترة الحمل الاخيرة مرة اتغير بس انا كنت اغض النظر واسوي نفسي مو شايفة شي
عشان انا حامل وما ابغى اتعب نفسيا اكتر مما انا اصلا تعبانة نفسيا
المهم عدت الايام وولدت وطبعا انا حاليا في بيت اهلي فترة النفاس
زوجي زاد واتغير معايا 360 درجة غير
صار يجي يشوف بنته ربع سا عة ويطلع مستعجل على انو رايح مع الشباب
وانا لما يشوفني يصافحني!!!! مو زي زمان
المهم ولما ادخل النت بالاقيه هو اون لاين الساعة 1 بالليل ولما اسألو غريبة انت عالماسنجر دا الوقت
يقولي عادي باكلم خالاتي في جدة ....... كنت في البداية اطنش
المهم الين امس اكتشفت انو نوف هاذي لازالت على اتصال بيه
والدليل اني فتحت ايميلو بطريقتي مرة ثانية بدون ما يدري
مع العلم انوايام المشكلة الاولي انسرق ايميلو وسوا ايميل ثاني جديد قدامي
يعني بالعربي ماحد من بنات الماضي يعرفه
المهم لما فتحت واكتشف الصدمة نوف بتراسله وبدأت ترسله من اول يوم انا ولدت فيه
والرسايل صدمة اكبر طلعت بترسله رسايل لصور بنات عراة!!!!!!
ليش ترسله كدا وبصفتها مين ترسله صور زي كدا
ايش راح تستفيد !!!!!!!! غير انها بتخرب بيتي بدي الطريقة!
غير انو الاوقات اللي هو بيكون عالمسنجر بتكون هي عالماسنجر والايام اللي هو ما يدخل النت هي ما بتدخل......
انا الان لا زلت في بيت اهلي بسبب النفاس وما رحت البيت الي الان
و زوجي الان ما يعرف اني انا عرفت عن نوف
لاني ما قلتلو ولا حتى اتغيرت عليه في شي
بس الان ابغى اعرف وش اسوي في نوف بالضبط؟؟؟
لانو زوجي انا لي تصرف ثاني معاة بس ارجع البيت راح اجرحه زي ما جرحني
اما هي ماني عارفة كيف اتصرف معاها هل اخرب بيتها زي ما خربت بيتي ولا ايش اسوي بالضبط.......
وآسفة على الاطالة بس والله من القهر ومالي احد افضفضله غيركم بعد الله ......