زيت الزيتون وصية الرسول ص وصديق الطفوله لاتظلمونه

1. وما ضرب الله هالمثل سبحانه الا لانها افضل شجره هذا اولا

مرحبا يافراشات كيفكم مثل ماقريتوا بالعنوان انا اليوم بكتب لكم موضوع عن زيت الزيتون لما قريت عن الاخوات اللي يقولون انه حار على الشعر وانه يساقطه
ها عاد الا زيت الزيتون والله انه صديقي العزيز وزيتي المفضل من كنت بالابتدائي وانا بقولكم سالفتي وياه بس قبل لازم تعرفون ان الله سبحانه وتعالى ضرب مثل لنوره في سورة النور بالمصباح اللي يضيؤه زيت من شجرة مباركه(اللَّهُ نُورُ السَّمَاوَاتِ وَالْأَرْضِ مَثَلُ نُورِهِ كَمِشْكَاةٍ فِيهَا مِصْبَاحٌ الْمِصْبَاحُ فِي زُجَاجَةٍ الزُّجَاجَةُ كَأَنَّهَا كَوْكَبٌ دُرِّيٌّ يُوقَدُ مِن شَجَرَةٍ مُّبَارَكَةٍ زَيْتُونِةٍ لَّا شَرْقِيَّةٍ وَلَا غَرْبِيَّةٍ يَكَادُ زَيْتُهَا يُضِيءُ وَلَوْ لَمْ تَمْسَسْهُ نَارٌ نُّورٌ عَلَى نُورٍ يَهْدِي اللَّهُ لِنُورِهِ مَن يَشَاء وَيَضْرِبُ اللَّهُ الْأَمْثَالَ لِلنَّاسِ وَاللَّهُ بِكُلِّ شَيْءٍ عَلِيمٌ)

وما ضرب الله هالمثل سبحانه الا لانها افضل شجره هذا اولا

وثانيا الرسول (ص) وصى به وقال( كلوا من الزيت وادهنوا به فانه من شجرة مباركه )والله يابنات انا من كنت بالابتدائي وانا استخدمه لما قريت بمجله ان زيت الزيتون ينعم وطريقته اني كنت مره بالاسبوع واللي هو يوم الجمعه اسخن زيت زيتون شوي الين يصير دافي وبعدها اجيب قطنتين واغطسها بالزيت وابدا ادلك فيها فروة راسي اسوي مساج ابتداءا من عند الاذن الين ورا وبعدها ارتفع شوي فوق وادلك الين ورا الين اوصل للخط اللي بالنص عند الفرقه اللي باعلى الراس واغطيه بفوطه ادفيها فوق النار من بعيد او اي غطاء للراس واتركه ساعه وبعدها عادي اتحمم وبس لكن والله انه صار يطول وصارت فيه كثافه ولمعه والكل يسالون اهلي وش تسوي لشعرها وبعد كذا صرت استخدم خلطة الحناء بالزيوت والثوم مره بالاسبوع او مره كل اسبوعين عادي بتحصلين نفس النتيجه ان شاء الله
ومقاديرها :حناء وقليل من الزيوت انا كنت احط كل الزيوت الموجوده عندي واولها زيت الزيتون وكنت احط بالخلاط بيضه وعصير نص ليمونه وغطاء خل ابيض وشوي شاهي مطحون ناعم وربع بصله وفص ثوم واخلطها واضيفها للحناء واتركها ساعه تخمر واحطها ساعه بشعري ..ساعه وحده تكفي وبعدها اتحمم والله انها هالخلطه انا كنت استخدمها من فتره وانها احسن خلطه للشعر النعومه من وانت تتحممين تحسينها واللمعه مو طبيعيه كل مااعطيها وحده تمدحها واهم شي انها تكثر الشعر بشكل خيالي بس ريحتها الله يعين وانا صرت مااحطها عشان الريحه
والله والله يابنات ماكنت اروح لمكان مايسالوني الناس وش تحطين بشعرك حتى اللي مايعرفوني حتى ان وحده قلت لها انا وزني زايد ودي اخفف قالت يزيد وزنك والا مايزيد انت عندك شي يغطي كل العيوب اللي فيك تعني شعري وكنت اذا تكاسلت عن الخلطه اكتفي بزيت الزيتون احسه يغذيه وينعمه وعلى فكره انا كنت استخدم ساسو اللي بالعلبه الخضراء والحين استخدم الطبيعي (عصره اولى )وللتساقط فيه طريقه وهي انك تدهنين شعرك بزيت زيتون كل يوم قبل النوم وتغسلينه بالصباح لمدة عشرة ايام هذي علاج للتساقط وهذي تجربتي ودفاعي عن صديق طفولتي زيت الزيتون
وترى ياويل اللي تقول عنه اي شي تكفيخ
امزح ترى مافي اكفخ احد
دعواتكم الحلوه ياحلوين