ساعدوني شاسوي

السلام عليكم اخواتي الفراشات عندي مشكلة واتمنى انكم تساعدوني قبل لا استعجل
انا مخطوبة وزواجي المفروض يكون على نهاية هالسنة.. وطبعا عارفين شنو يعني حلم البنت بليلة الزواج ولبس الفستان الابيض والتجهيز لهذا اليوم الي كل بنت تستناه وتخيلو انا طول هالايام وانا افكر بهاليوم وشلون راح يكون ومن راح اعزم حتى مجلات فساتين اعراس شريت عشان من الحين اختار فستاني واجهزه وحتى زفات من النت نزلت عشان اختار زفتي وشهر العسل محتارة اروح ماليزيا او تركيا تخيلو شلون كنت عايشة بحلم والمشكلة خطيبي كان يحلم معاي واليوم انصدمت وكل احلامي انهدمت ظ والله دموعي من ساعاتها مو راضية توقف
جاني خطيبي يقولي ترا ميزانيتي ماراح تسمحلي اسوي لج عرس ولا شهر عسل لأنه يمر بضروف مادية ويدفع اقساط قرض قلت له معليه بس مابي شهر عسل على الاقل عرس حرام انا حتى حفلة خطوبة سويت كلش بسيطة حق الاقارب بس وكانت في بيتنا ووعدنا باقي الاهل ان شاء الله بنعزمهم في حفلة العرس وكان معاند مع اني اول امس كنت اكلمه عن العرس ماقال شي.
قلت له اوكي بنخلي زواجنا لي السنة الجاية مارضى قال لازم نهاية السنة انتي في بيتنا بس سوي حفلة حنة وتعالي بيتنا والله بموت من القهر لو قايل لي من قبل جان بتقبلها بس عيشني في حلم ووهم وآخر شي قلي لا
وانا قلت له لازم اسوي حفلة وماراح اتنازل عن حلمي قام يتعذر يقولي يعني تتركين زوجج عشان حلمج قلت له انا ماقلت بتركك بس ان شاء الله الله يسهل عليك لي السنة الجاية وتتعدل امورك وعقب نتزوج قالي لا آخر كلام عندي يا انج اتجين بيتنا بدون حفلة أو خل حلمج ينفعج وقال بخليج لي باجر تفكرين وانا كلش مو جايني نوم من القهرر
الله يخليكم ساعدوني ماني عارفة شاسوي اسلم امري لربي واتنازل عن احلامي
او خلاص اختار حلمي واتركه دام تونا على البر ويمكن تكون خيره لي
ولو انتو مكاني شلون بتتصرفون ؟؟
والي ماعندها رد بس تكفيني دعوة منها
والله يفرج عنكم همكم ويسخر لكم ازواجكم ويفرج عنكم كربكم..