شريط الرسائل

1. بقى الجزء الأخير و هو بعنوان كلنا دكاتره

موضوعي اليوم عن شريط الرسائل و ما به من أشياء مضحكه لحد البكاء و إليكم ما شاهدت
طبعا 99.9 % من الرسائل نسائية تتنوع من التعارف لحد طلب الاستشارات الإجتماعية و الطبيه و ما يغيظني هو الطبية منها و ما يغيظني أكثر صاحبات الخلطات اللاتي يطلبن شيء مقابل خلطاتهم السرية عموما سوف أكتب العامية حتى تفهمون ما أ‘اني
واحدة ترسل " بنات عندي خلطة تطول الشعر ما أعطيكم مكوناتها إلا بمقابل " وشو هالمقابل ما أدري و كأنها مخترعه القنبلة الذرية
وحده ثانيه : اللي تبي تطول شعرها تستخدم رمش نملة حزينه على خشم هدهد يتيم و تحلف إنها مجربه و بعدين تطلب يدعون لها و أنا متأكد راح يدعون عليها و بعدين شلون نعرف النملة الحزينه من السعيدة لكن لقيت لها حل نجيب مجموعه من النمل و نعطيهم سكر و أكيد بيفرح النمل و بعدها نأخذ السكر منه و راح يحزن و بكذا تكمل خلطتنا و بالهناء و الشفاء للعقول و لا تنسى صاحبة الخلطة أن تطلب من كوكو أن يكرر 10 مرات ( كوكو اسم الدلع للكنترول ) و اللي الله يجزاه خير يغثنا بالمسج 10 مرات
الثالثة: بنات عندي خلطه تنعم الشعر و أبي خلطة تنحف الخشم و تطول الرقبة ( كرر 10 مرات كالعادة )
رابعة تقول: بنات من يبي خلطة توسع العين و تصغر الفم و أنا متأكد لو إنها هالخلطة لو حقيقية كان صغرت فم صاحبتها و فكتنا منها كرر 10 مرات
و تعالوا شوفو مئات الرسائل من هالنوع لكن اللي يقهر هو إنه مع تكرار المسج 10 مرات تلقى من يطلب إعادة هذه الخلطات لأنها ما لحقت تكتبها
نوع من المسجات هو رسائل الترحيب و الأخوات تعطيك تفاصيل حياتها بما فيها مقاس فستانها و تطلب إنهم يرحبون فيها و إن رحبوا فيها فرحت كأنهم سوو لها استقبال رسمي و إذا ما عطوها وجه يكون واحد من 2 يا تزعل وتتشره عليهم و برضو ما أحد يعطيها وجه و لا ترحب بنفسها من جوال ثاني و تتعدل حالتها النفسيه و تدخل معمعة الخلطات مع البقية
نجي للأدعية
خذوا عندكن هالهبله " اللهم اشفي أختي مزنه و عمتي مدري من عشان يحضرون زواجي" و بعد العرس ما تبي تعرفهم:
ثانية تقول " اللهم اشفني من تكسر الشعر عشان أقهر بنات خالتي كرر 10 مرات يا كوكو
و فيه عينه طيبه تدعي للمسلمين و المسلمات الله يجزاهن خير
نروح للاستشارات الاجتماعية
وحده تطلب شي يحبب زوجها فيها و أنا أقول لها أول شي خففي من المسجات كسرتي ظهر زوجك بالفاتورة إذا عرفنا إن المسج ب 5 ريال
وحدة ثانيه تقول تقدملي واحد في كل المميزات بس عيبه برجه من التيس :و أنا برجي البقره تتk:وقعون ينجح هالزواج و أترك لكم الحكم بس لا تنسون كلما أفرطت في دلال البقرة شافت نفسها عليك
وحدة تقول " زوجي يحب أمه و أنا أبيه يحبني أكثر" هاذي وش نرد عليها تبينا نقول لا ماله حق و المفروض يرميها بالشارع
والله في مشاكل سخيفه جدا ترفع الضغط ما أدري هالكوكو ليش يطلعها مع مشاكل ثانية تكون فعلا محتاجه حل

بقى الجزء الأخير و هو بعنوان كلنا دكاتره

لكم تتخيلون في ناس فاضية ترسل تطلب حل للأنفلونزا و ناس يائسه الله يشفيهم تطلب حل للسرطان غير اللي يبون الحمل و أنا ما أضحك عليهم بالعكس اللي يضحكني إن الكل عنده حل لكل الأمراض و يقعد يعطي وصفات ممكن تودي بداهية
الصيغة للطلب للتالي " بنات من جرب ****** عشان المرض الفلاني اللي تعطيني و الله لأدعيلها " طبعا و لا واحد جرب بس الرد يكون كالتالي " أنا أعرف وحده جربتها و النتايج مذهلة " و اللي مسويه فاهمه تقول روحي للدكتور الفلاني في العيادة الفلانية بنت خالة عمة جدتي راحت له و ألحين طيبه تنقز الجدران من العافية
و الله لو أبي أكتب سويت مجلد و أنا على فكرة ما تكلمت عن الوصفات و الطبخات و هذاي يبي لها موضوع مستقل مع إني متأكد إنهم ما يعرفون يطبخون
قبل الختام من كثر ما يقولون للكنترول يا كوكو بديت أشك إنه ديك
أتمنى لكم ويك إند سعيد و يا ليت تكررون الموضوع 10 مرات
الموضوع منقول بس بطريقتي الخاصه