شفتي هالبنت مستحيل اخليها تروح لازم اصيدها لولدي المصون امهات وعيالهم وزوجات المستقبل

بسم الله الرحمن الرحيم
السلام عليكم ورحمة الله وبركاته
,,,,,,,,,,,,,,,,,,,,,,,,
هع هع جالسه اجرب صوتي
ادري زهقتكم بالمواضيع هاليومين بس مصيركم تشتاقون لي لأني بسافر ان شاء الله تقريبا نص شهر 8 ويمكن اجلس اسبوعين
يعني بعطيكم تصبيره لين ارجع ههه
شكلي بتكفخ اليوم
طبعا هالوقت من الصيفيه الوقت المناسب اللي تدور فيه الامهات على عرايس لعيالهم وتصيدهم وترمي عليهم الشبكه
وتطلع هالبنت من الشبكه العنكبوتيه (الانترت ) اللي كانت ناشبه فيه
وتطيح في الشبكه الحقيقه حقت الزوج
طبعا في امهات كثير الله يهديهم تروح تخطب لولدها وتتقنص هالبنات في العرس
وولدها هذا اللي راح تخطب له مو كفو زواج !!!
خلاص كل من عذب اهله في البيت قالوا اهله بس مالنا الا نزوجه علشان يعقل
!!!
واغلب هالشباب اللي من هالنوعيه تلاقونه فاشل في دراسته
والا همه الا النوم ومصروفه يجي لحد جيبه بدون ما يفكر
وسيارة ابوه ياخذها ويفحط فيها ويعدمها وبرضو ما همه شي
كل همه كيف يبسط نفسه وبس
طبعا هالنوعيه من الشباب الفاشل اذا قلتي له شرايك يا ولدي نزوجك تلاقينه على طول وبدون تردد يقول روحوا اخطبوا لي
لا وبعد يتشرط يبيها ملكة جمال الكون
وتلاقون شعره عشه ساكن فيها مستعمرات من الكدش اللي مسويه
ايه ما ينلام
دام الاب بتكفل في كل المصاريف من زواج لا سياره لا سكن لا فرش بيت يحق له
محد محسسه بالمسؤوليه
او ابوه طفش من كثر ما زن على راسه ولا فيه فايده ولا اي تحسن وبالأحرى عديم الاحساس
عاد ما يلاقون الاهل الا هذا الحل
نزوجه علشان يعقل
طيب وبعدين
وش ذنب بنت الناس مسكينه تبتلش في ولدكم المصون
؟؟؟؟؟؟؟؟؟؟؟؟؟
انا بقولكم كم قصه حصلت
القصه الاولى
وحده اكتشفت بعد زواجها ان زوجها حق سكار وخرابيط
وبغى يموتها وما جلست معه الا اسبوعين وبعدها تطلقت
,,,,,,,,,,,,,,,,,,,,,,,
القصه الثانيه
راح تتعجبون
هذا الشخص الغريب الاطوار
تزوج اربع مرات
وكل وحده من اللي تزوجهم جابت له عيال
الاولى ما قدرت تستحمله الاخ مسوي فيها شخصيه وضربها اول يوم (اعرفها معرفه شخصيه )
اهلها ما صدقوها قالوا لا تبالغين ورجعت له وما كملت معه شهر هالمختل المهم حملت منه
ولكن ما جلست معه ابد رجعت لأهلها
الثانيه مسكينه جابت منه اثنين حاولت تستحمل ما قدرت
والثالثه نفس الشي
والرابعه الله اعلم عنها الله يستر عليها
وكل وحده تروح عند اهلها خلاص تنتهي حياتهم ويطلق ويتزوج من جديد
ومين اللي يخطب له امه تروح تقنص بنات من قبايل ثانيه بعيده وبعض الاهالي لما يسألون عنه يرفضون وبعضهم ما يهمهم يوافقون وما تروح فيها الا هالزوجه المسكينه ..
,,,,,,,,,,,,,,,,,,,,,,,,
القصه الثالثه
وحده تزوجت وما قدرت تجلس مع زوجها الا خمس شهور تقول ما اقدر اجلس معه ولا ادانيه ولا حصل بيننا اي شي مثل اللي يحصل بين الازواج طبعا بسببه
واهلها كل ما هربت رجعوها له
البنت اندمرت نفسيتها
اخر شي يوم اهله شافوها طولت عند اهلها راحوا وقالوا نعترف لكم ان زوجنا ولدنا لأن فيه سحر قلنا يمكن يتعالج !!
طيب شذنب هالمسكينه ورب الكعبه ما ابالغ انها جميله ما شاء الله
ولكن بعدها تطلقت من المحكمه وكتب القاضي انها لسا بنت بكريه في ورقة الطلاق ( يعني مو ثيب )
ولكنها للحين ما تزوجت بالله مو حرام على هالناس اللي ما يخافون الله ؟؟
,,,,,,,,,,,,,,,,,,,,
القصه الرابعه
وحده تزوجت واحد شكاك مريض شك واهله يدرون بهالشي
لدرجة انه لما يطلع من البيت يقفل عليها تخيلوا يشك فيها وهي مسكينه مظلومه
كان كذا مع خواته عذبهم
وبعدها يوم صارت مشاكل قالت لهم زوجت اخوهم انا ما راح اسامحكم لأنكم كذبتوا علي بصفات ولدكم
كلها كوم ولما تجي هالأم وتمدح ولدها اللي تبي تزوجه وتوصله السماء كوم ثاني يعني ما يكفي الخداع برضو فيها كذب لتحسين وتلميع صورة الشاب امام اهل الفتاه !!
,,,,,,,,,,,,,,,,,,,,,,,,
اللي ابي اوصله لكل ام خافي الله في بنات الناس
زي ما تحبين لبناتك حبيه لبنات الناس وحرام عليك تبلشين العالم بولدك
اذا يحتاج له تربية خلوه يتربى عندكم
اما تزوجونه بغرض انه يعقل ويترك خرابيطه !!
هذي لا يقبلها لا عقل ولا قلب
سبحان الله ممكن الامور تقلب وزي ما خدعتوا الناس في عيالكم ممكن يرجع لكم في بناتكم وتنخدعون مثل ما خدعتوا هالناس
لا تستهينون بالدعاء
,,,,,,,,,,,,,,,,,,,,,,,,,,,,,
اللهم صل على نبينا حمد وعلى آله وصحبه وسلم تسليما كثيرا
اختكم في الله
أم البتول
2006