طول العمر حبك هو الوحيد الي ساكن قلبي قصة روعة

على طول العمر حبك هو الوحيد اللي سكن قلبي
للكاتبة: طرفة
الجزء الاول
من يوم وعيت على الدنيا وبديت افهم واميز حصلت نفسي عايشة مع عمتي وريلها وعيالها الخمسة بعد ما تركتني امي وما اعرف ليش وابوي عايش في كندا بعد ما صدر عليه حكم في قضية مخدرات ، قدر يدي يهربة برع البلد لحد ما يسقط الحكم وعقب يمكن يفكر يرجع ..
رغم ان عمتي هي اللى ربتني من وانا عمري ثلاث اشهر إلا اني كنت اناديها عمتي مب امي لا تستغربون مب لانها قاسية معاي لا بس لاني احس تعاملها معاي غير عن تعاملها مع عيالها ولاني من وانا وصغيرة الكل يعرف حكاية ابوي وامي يعني بختصار كل ما حد رمس عنهم احس اني اكرهم لانهم سبب العذاب اللي انا فيه حتى المدرسة صرت اكره اسيرها بسبب ان الاطفال كلهم بدو يبعدون عني وكل الاهالي في المنطقة يبعدون عيالهم عن اللعب معي وكأن الغلط اللي ارتكبة ابوي وامي انا السبب فيه مب كأني انا اول وحده اكون مظلومة فيه..
حاولت اتأقلم على عيشتي جي وان غلطة ابوي لازم اتحملها انا وصرت منزوية عن الناس ما اطلع ولا شئ
عمتي عندها اربع اولاد وبنت وحدة عندها مازن وهو الكبير عمره 27 سنه ومزنه وعمرها 26 سنه وعندها فيصل وعمره 24 سنه وهاني 20 سنه وقيس وعمره 16 سنه وهو الصغير الدلوع... بس رغم ذلك حنون وايد واحب ايلس ارمس معاه لاني احس ان عقلة وتفكيرة اكبر من عمره ..
نسيت اعرفكم بنفسي انا الريم عمري 18 سنه وخلصت الثانوية ودخلت الجامعة وادرس في كلية الاعلام والصحافة اول سنه متوسطة الطول ومتوسطة الجسم شعري بني فاتح نفس لون عيوني وجمالي مب خليجي يعني انا بيضاء وايد والكل لمه يشوفني يحسبني شامية بس هذا الشئ الوحيد اللي خذته من امي جمالها رغم ان امي اماراتية الجنسية ..
......
في يوم كنت يالسة في الصالة اطالع برنامج افتح قلبك وشوي ودخل علي قيس ولد عمتي ويلس يتابع معاي البرنامج وقالي وويه كله صدق وحماس قالي الريم شو رايج ؟ طالعته بتعجب قلت له في شو؟؟ قالي نسير ها البرنامج اوني انا وانتي متزاعلين طالعته بنظره فيها استهبال وقلت له موافقة ولمه يقولوا لنا وانتو من متي متزاعلين نقول لهم من امس ههه قالي سبحان الله تقري افكاري لاني فكرت في نفس الشئ ههه اقول انا فديت اللي يفهم علي ابتسمت لا تستغربوا بس لاني اخذه على قد عقله ههه لا يعني مب لانه مينون لانه الشخص الاقرب لي في بيت عمتي ولاني اعرف ان كل كلامة الحلو يعني يقوله عادي مب قصده منه شئ..
في ها الحزة دخلت عمتي وكانت بعدها لابسة عباتها وبرقعها ويلست بعد ما سلمت نشينا انا وقيس احترام لها وعقب قالت لنا يلسوا ما لحقنا إلا ودخل مازن وهو راجع من المسيد وقال لقيس انت ما سرت المسيد اليوم قاله قيس بلا سرت وتوني راد قاله مازن عيل ما شفتك هناك قاله لاني من خلصت الصلاة ظهرت بسرعة ما يلست وعقب انتبه مازن لامه اللي كانت يالسة وقالها شحالج اماية سمحيلى عصبت يوم ما شفت قيس في المسيد .. قالت له امه لا فديتك معليه المهم تعال هني يمي ابيك في موضوع طبعا انا وقيس ما قدرنا نمنع فضولنا عشان جي ما تحركنا وخلينا نفسنا انا نتابع البرنامج لكن اذونا كلها مع عمتي شو بتقول لمازن من مواضيع مهمة خ
ام مازن : فديتك مازن اليوم سرت بيت يرانا اليديدين وبصراحة عرب اياويد وعندهم بنت حشيم عيبتني وهي تقرب فيني وفديتها ما حلى رمستها ومنطوقها ومن شفتها حسيت انها تناسبك (طبعا عمتي تعبت من كثر ما تدور لمازن عروس لكن مازن عنده عقده من الحريم )
مازن : اماية انا قلت لج انا ما ابي اعرس ويوم انوي بخبرج لا تعبي نفسج
ام مازن : بس هاي غير عن كل اللي اخترتهم لك والله انها حشيم ومنطوقها بروحه يكفي وبنت عرب و..
مازن : قطع عليها قالها اماية لو سمحتي انا قلت لج راي ونش عشان يدخل غرفته .
في ها الحزة قيس قرب صوبي يساسرني وقالي اقول ابرك لي اروح غرفتي لانه مازن من يعصب ما يحصل حد قدامة يهاوشة غيري من رخصتك بنت خالي ههه وفعلا نش ودخل غرفته قبل لا مازن ينش.
عمتي ما حد قدامها غيري تشكي له همها وقالت لي الولد كبر وانا خايفة عليه وابي افرح فيه ما ادري لين متي بيلغي سالفة الزواج وهو الحين مب صغير ولا ناقصنه شئ وبصراحة انا البنت هاي داخلة راسي وحبيتها ولو مازن شافها بعد بيحبها ..
الريم : حاولت اهون علي عمتي وقلت لها لو نصيبة بياخذها يا عمتي لا تشيلى همه وخليه مثل ما قال لج
ام مازن : لا ما بخليه بظل وراه وراه ما بيأس
الريم : براحتج
نشت عمتي وسارت غرفتها وبدلت عباتها وملابسها وظهرت وتخبرت عن مزنه قلت لها مزنه في غرفتها وسارت عمتي لمزنه وحصلتها ماسكة التلفون اللي هو موتها وحياتها اربعة وعشرين ساعة من ترجع من الدوام إلا ماسكة ها التلفون ترمس ربعاتها وتخج هي وياهن لانه بنت عمتي هوايتها المفضلة في الحياة الخج وكالعادة من شافت عمتي قفلت التلفون قالت لها عمتي يالله نزلي بنتعشى ..
فيصل بعده ما رجع من الصلاة لانه متعود يتم يقرأ قرآن وهاني يصلى في المسيد لكنه من يخلص يتم يسولف مع ربعة لحد ما يخلص فيصل ويرجعوا مع بعض البيت اما عن ريل عمتي في ها الحزة يكون قريب ما يرجع البيت من الشركة ..
يله وروني الردود علشان أكمل القصة

القصه فعلا رهيبه حلوه مره كمليها الله يوفقك
لاتطولين بليز
اختك ..ليالي نجد..

&&ليالي نجد&&
مشكوره أختي علي الرد
وإن شاء الله ما يكون خاطرك
الا طيب

وهذي علشان خاطرك يا ليالي نجد
دائما وانا اطالع عمتي وعيالها وريلها استغرب ريل عمتي انسان مب وايد متدين شرات عيالة كلهم ما شاء الله عليهم متدينين إلا مزنه يمكن طالعة عليه الحلو ان عمتي ربت مازن صح ومازن كان له الاثر الاكبر في التأثير على اخوانه الصغار الاولاد طبعا اما عن مزنه فهي ما انكر انسانة مصلية مسمية إلا ان لسانها يمكن هو اللي يضيع عليها وهي طيبة بس طبعا الزين ما يكمل تحب تنم على خلق الله وترمس عن فلانه وعلانه رغم ان عمتي وايد نصحتها عن ها الشئ وهي ما يفيدها ..
تجمعنا كلنا على السفرة عشان نتعشى وطبعا احلى شئ لمه يكون قيس يالس يمي يتم يعلق عليهم واحد واحد طبعا بشوي شوي وانا اتم اضحك ويطيح الهواش فيني من قبل مازن طبعا الاكل له احترامة ومن ها المواعظ ..
بعد العشى الكل يطلع على غرفته عمتي وريلها يدخلون يرقدون مازن بعد يدخل يرقد عشان عنده دوام باجر ومزنه لانها تداوم في بنك ودائما هي وفيصل يتهاوشوا ان الشغل في البنك حرام ودائما يقول لها اللي يستظل بظل البنك حرام ودائما مزنه تخليه وتطلع عنه غرفتها بعد ما تقوله انا اشتغل ومقابل شغلي اخذ راتب فهمت ؟
هاني يكون لاهي في مبايلة يا يلعب يا ينزل لعب يديده يا يرسل مسجات لربعة وله الدراسة بصعوبة يفتح كتبة لكن ما شاء الله عليه عمره ما رسب يعني على قولته عم يدفش هو في الجامعة سنه ثالثة في كلية الهندسة وفيصل اخر سنه جامعة بعد في كلية الهندسة ..
انا اكون مخلصة كل شغلي ودراستي واتم اطالع التلفزيون لحد ما احس اني برقد الغريب اني الليلة بعد العشى طلعت غرفتي وتميت افكر في مازن ولد عمتي اللي رافض الزواج خاطري اعرف شو السبب وليش هو متعقد من الزواج وقررت بيني وبين نفسي اني اساعدة ولكن كيف اساعدة إذا ما اعرف السبب ما شئ حل غير اني اسير عند مزنه غرفتها يمكن اطلع منها بشئ وفعلا ظهرت من حجرتي ونسيت اتحجب وفي ويهي حصلت فيصل وهو ساير صوب غرفته اتفشلت منه ورفعت شيلتي بسرعة وسرت عنه بسرعة ودخلت غرفة مزنه بدون ما ادق الباب وحصلتها خلاص شبة راقدة بس اول ما دخلت عليها جي نشت مفزوعة قالت بسم الله الريم بلاج؟
الريم : ما شئ بس حبيت ايلس اسولف معاج
مزنه : خرعتيني اقول الشيخة الريم عندج نص ساعة قولي كل اللي في خاطرج فيه
الريم : لا جي ما ابي يوم تحسين نفسج تبين تسمعيني بيج الحين من رخصتج (اوني اتغلا عليها ههه) ويت اظهر من الغرفة حسبالي انها بتناديني لكني شكلي كلت هواء ههه
مزنه : حبت تغلس ومن ظهرت من غرفتها تغطت وحاولت ترقد عشان دوامها باجر
الريم : سرت غرفتي ولكن عيا الرقاد يقارب عيوني نشيت ويلست على الشبرية وحضنت عروستي وتميت اهذرب وياها لكن للاسف ما تسمعني ولا تفهم شو اقول وبعد يأس رقدت يمكن ساعتين ونششتني عمتي للجامعة الغريب اني نشيت نشيطة ههه لا تستغربوا ليش لانه في راسي مخطط كبير ومهم بس مب قايلة لكم لحد ما ارجع من الجامعة ..
كل يوم مازن هو اللي يوصلني الجامعة ويوصل قيس المدرسة نزلت وحصلتهم يتريوني وظربني قيس على راسي وقالي انتي محاضراتج الساعة 8 وانا طابور المدرسة الساعة 7:30 يعني حضرتج اخرتيني ما باقي شئ عن الطابور ابتسمت له قلت له احسن خليهم يهاوشوك ههه قالي واهون عليج ؟؟ دائما يحب يغلس ودائما مازن يهاوشة وهو يسمعة يقولي ها الكلام ويقوله عيب عليك ها الرمسة ويهاوشني انا ويقولي انتي ساكته له يعني عايبنج يتغزل فيج؟؟
ودائما ردت فعلى انا وقيس الضحك بصوت واطي عشان ما نتسفر ههه المهم ركبنا السيارة وطبعا متعود مازن يوصلني انا اول الجامعة عقب يوصل قيس بس اليوم بعد ما اصر قيس انه يسير هو المدرسة اول عشان متأخر وافق مازن انه يوصله وبصراحة هي فرصة من السماء لاني كنت مقررة ارمس مازن في موضوع حتى لو قدام قيس لكن الحين بيكون الموضوع اسهل ..
بعد ما نزل قيس خذت كتبي ونزلت وركبت قدام يم مازن ولد عمتي وهو استحي وانا حسيت اني ميته من الحيا بعد خيبة اول مره احس احساس غريب واحس كل الجرئة اللي كنت امتلكها تلاشت وتميت ساكته لحد ما وصلت الجامعة وانا اعتقد حتى النفس ما رمت اتنفسة ومن وصلت الجامعة انتبهت اني ابي ارمسة في موضوع لكن أي موضوع واي خرابيط الحين افكر كيف بنزل وبتنفس على راحتي نزلت ودخلت الجامعة ودخلت اول محاضرة لي بس ولا كلمة من اللي قالها الدكتور دخلت عقلي وانا اقول شو اللي صار ؟؟ وآلوم نفسي كيف ما ستغليت الفرصة لكن فعلا مازن له رهبة فضيعة احس اني يوم اشوفة اخاف منه غير احساسي اني احترمة حسيت نفسي اني لو دخلت المحاضرة اللي عقبها ما راح افهم شئ عشان جي سرت الكفتريا ويلست على طاولة بصعوبة حصلتها من الزحمة ويبت لي عصير بارد عشان ابرد على قلبي فضولي في معرفة سبب رفض مازن الزواج وكرهه للحريم زاد وقلت لازم استغل الفرصة واكلم مازن يعني هو بياكلني اقصى شئ بيسوية لو عصب علي بيصفعني كف ههه وبيني وبينكم انا تعودت الدنيا ياما صفعتني بي على الكف اللي بخذه من ولد عمتي؟؟
اتصلت بهاني ولد عمتي عشان يرجعني البيت لاني يوم الاثنين متعودة اطلع معاه هو لانه وقت محاضراتنا وحده ونخلص مع بعض يعني هو من يخلص يمر علي الجامعة وصلت البيت وكالعادة ما حصلت عمتي لانها في الحزة تكون بيت اليران لاني انا رجعت من وقت الساعة 11:30 هاني وصلني وقالي انا بسير عند الربع السكن ادرس معاهم وطبعا هي دراسة وهي سوالف دخلت المطبخ اكل لي شئ وعقب قلت للخدامة لا تنششوني على الغداء انا برقد اوكى ؟ قالت لي اوكى طلعت غرفتي بدلت ملابسي وتميت شوي اطالع ويهي قدام المراية واتخيل مازن ولد عمتي قدامي تميت اهذرب معاه ههه مب خبلة يا جماعة لكن هاي حالة وبتعدي ان شاء الله ههه
حاولت ارقد وبيني وبينكم المحاولة مب وايد طولت لاني هلكانه من التعب ورقدت بدون ما احس دقت عمتي الباب لكن لا مجيب خبركم انا نومي ثقيل بعيد عنكم ههه والعصر نشيت وصليت العصر وقررت اني اسير اشوف الدبة مزنه يمكن الحين فاضية لي نسولف واسحب منها رمسة لكن مزنه كانت راقدة رديت دخلت غرفتي واتصلت على تلفون المطبخ من تلفون غرفتي عشان الخدامة تيب لي عصير مثلج لاني احس في قلبي نار ما طاعت تخمد ههه مازن اثارية هب شوية كل هاه خوف ورهبة ؟؟ حليلها بعد 10 دقايق كانت الخدامة تدق الباب يايبة العصير وتارسة الكوب مكعبات ثلج ههه شكرتها ونزلت بس قيس ولد عمتي يخلي حد في حالة يفكر ويمخمخ دق الباب ودخل مبونه اصلا ما يتريا حد يقوله ادخل وسيده مسك كوب العصير اللي كان في ايدي وقالي فديتج عارفة اني بزورج الغرفة عشان جي يبتي لي عصير مشكورة وتم يشرب العصير ههه تميت اطالعة ومقهورة منه وخذت كوب العصير منه وظهرت منه مكعبات الثلج اللي بقت في الكوب بعد ما قضى على العصير حضرته وتميت افره فيهم وهو ميت ضحك علي قالي مالي دعوه بيطيحوا على سجاد الغرفة وعقب خذي هواش من اماية ههه
فكرت ان قيس ممكن يساعدني لكن كيف ؟؟ ما ادري شكلة ما عندي حل غيره هو ارمس معاه قلت له قيس ممكن نرمس في موضوع مهم وجاد بدون ضحك وغشمرة ؟؟
قيس : طالعني بهتمام والحلو فيه انه فعلا وقت الجد جد قالي اكيد فديتج قولي
الريم : تعرف ليش مازن عنده عقدة من الحريم؟؟
قيس : عقدة؟؟
الريم : اقصد ليش رافض فكره الزواج؟؟
قيس : ما ادري شو اقولج بس مره سمعت فيصل يقوله مب يعني هيه جي انت ترفض تعرس وتوقف حياتك عند ها النقطة بس ما اعرف شو الموضوع بالضبط لانهم يوم دخلت عليهم سكتوا وما رمسوا
الريم : يعني فيه وحده في حياة مازن؟؟
قيس : شكله الموضوع جي
الريم : اوكى انا حابة اعرف الموضوع من مازن بروحة
قيس : ها المرة نظراته غريبة يعني فيها استفهام وفيها تعجب وفيها اشياء كثيره
الريم : لا تطالعني جي انا خاطري اساعدة مازن ما يستاهل انه يوقف حياته وما يعرس بعدين ياخي خاطرنا يستوي عندنا عرس وافصل فستان ههه
قيس : وانتن البنات هاي عوقكن الفساتين والربشة
الريم : شو قلت بتساعدني
قيس : اساعدج بس في شو؟؟
الريم : ما ادري لحد الحين بس بفكر وبقولك موافق؟؟
قيس : موافق
عقبها طلع عني قيس وفتحت كتبي لاني مصختها بيأذن المغرب وانا ما صكيت كتبي وتميت ادرس لحد ما يات مزنه غرفتي ويلست قبالي قالت لي هاه الزعاله علومج ؟؟
الريم : طبعا انا نسيت كل شئ ابتسمت لها قلت لها شوفي ما برضى لحد ما تيبين لي هدية
مزنه : صج انج خجاجة ومب منج من اللي ينزل نفسة ليهالوه ههه
الريم : نزين الحين انا يهالوه معليه
مزنه : يالله اشوف قدامي نزلي امي حشرتني تتخبر عنج تقول لتكون بنت خالج مريضة وله فيها شئ قلت لها هاي قطوه بسبع ارواح ههه اقصد دلوعة
الريم : واي انتي بلاج علي؟؟
مزنه : يا ربي شكثر اعاني ههه يالله يالله نزلي نيلس مع عمتج ونحشرها شو قلتي؟؟
الريم : موافقة وفريت كتبي ونزلت معاها ومن شفت مازن ولد عمتي حسيت بمغص في بطني يا ربي شو سويت في عمري انا شو لي دعوه عنه ما عرس وعني ما فصلت فستان لعرسة انا احسن انسى موضوع اني اسأله انا جي ما سألته وميته من الخوف كيف لو تجرأت وسألته؟؟
كل ها الافكار تدور في راسي وعمتي ترمسني وانا ما رديت عليها عقب قالت لي ريموه بلاج اشوفج سرحانه شو فيج شو يعورج؟؟ قلت لها هاه عمتي شو قلتي قالت مزنه احم احم بلاج بنت خالي شو فيج انتي مب بطبيعتج قلت لها ما شئ بس باجر عندي امتحان وعشان جي طالعني مازن اللي كنت منزله راسي وما اطالع صوبه لان مجرد اني اطالع صوبة احس بمغص في بطني واحس جسمي كله يقشعر وشكلة كاشف انه فيني شئ وان موضوع الامتحان كذبة تجاهلت نظرته ووجهت نظري كله لباب الصالة اللي انفتح ودخل فيصل منه كان راجع من صلاة العشاء وفي ايده اشرطة عطاني واحد وعطى مزنه الثاني وطبعا الاشرطة كانت محاضرات عن الحجاب ويلس معانا بعد ما قال ما شاء الله متيمعين شو عندكم؟؟
مزنه ما عندنا غير كل خير بس غريب انت يت تيلس معانا خوفي بس حرام اليلسة معانا بعد طالعها بنظره غريبة وقالها ربي يهديج ويصلح بالج قالت له ويهدك انت بعد قالها امين
انا وعمتي ومازن كنا ساكتين لان نعرف ان مزنه غلطانه وما حبينا نتدخل بينهم وهاي الحركات مزنه ما تيوز عنها بس فيصل ما شاء الله عليه يعرف يتصرف معاها وشوي دخل هاني اللي كان توه بس راجع من السكن من عند ربعة ويلس معانا قالت عمتي عيل ناقص قيس وشوي ونزل ويا صوبنا قالت مزنه ولد الحلال على طارية.
بصراحة كنت حاسة بالغربة وسطهم رغم اني تعودت عليهم لكن من دخل قيس حسيت ان الوضع تعدل وهو ما يحلا له اليلسة إلا يمي حتى بعد ما قالت له عمتي تعال يمي قالها لا بيلس عند خطيبتي ههه ايه هو دائما يناديني خطيبتي بس طبعا يمزح لا تاخذوا على رمسته قالي هاه حصلتي فكره ؟؟ قلت له شو فكره احس بطني يعورني بس افكر اقولك هونت نجع ضحك علي وقالي يا جبانه طبعا كل الانظار توجهت لنا بعد ما قال قيس اخر كلمة بصوت عالي وطبعا ما يخلى الموضوع انه ياكل هزبه محترمة من مازن وقاله عيب عليك شو ها الرمسة ؟
قيس : اسف وسار صوب عمتي ويلس يمها عشان تدلعة ههه عيار على قولتها.
الكل طلع غرفته بعد العشى كالعادة بس اليوم ريل عمتي ما تعشى معانا لانه كان مسافر مب موجود وبيني وبينكم وجودة في البيت مثل عدمة احسه يعني ما له اثر فعلي لان طول الوقت يقضية في الشغل والصفقات التجارية ..
انا يلست على التلفزيون طبعا عقلي ابدا ما كان في التلفزيون بكثر ما كان يدور على فكره اعرف فيها سالفة مازن يلستي طولت والساعة 12 سمعت صوت حد ينزل من الدرج طالعت إلا وهو مازن طالعني بنظرة شفقة ها المرة قالي بلاج ما رقدتي لين الحين؟؟
الريم : الحين بطلع وقفلت التلفزيون وطلعت بعد ما قلت له تصبح على خير ومن وصلت غرفتي قلت يا ربي انا ليش دائما اضيع الفرص وله الحين كانت فرصة زينه عشان ارمسة ولكن في خاطري بعد اقول انا اش لي دعوه لكن بعد في داخلى شئ يقولي مازن انسان طيب وما ياني منه غير كل خير ليش ما اساعدة وانا قادرة؟؟ عشان جي عقدت النية اني ارمسة واللي يصير يصير بس ادور على فرصة ثانية وحاول هاي المرة ما اضيعها من ايدي ..
شكل الرقاد كل ليلة يجافيني عشان جي نشيت الصبح وقلت لعمتي انا ما بسير الجامعة قالت لي انتي قلتي عندج امتحان يعني الكذبة اللي كذبتها البارحة طاحت فوق راسي اوكى بنزل عمتي دخلت الحمام وسبحت بماي بارد يمكن يوخر التعب والحرارة اللي في جسمي ونزلت كنت هادية مب على عادتي حتى لمه حاول قيس يضحكني ما ضحكت وكتفيت اني ابتسم له وصلت الجامعة وانا كل تفكيري متي برجع البيت واليوم عندي محاضرات لحد الساعة 4:40 يعني رجعتي قرب المغرب خيبة تخيب الجامعة ليته ما شئ جامعات في الكون (مب كسلانه بس تعبانه ههه) دخلت الجامعة وخطواتي كأنه شخص موداي صوب المشنقة ..
في البنك كانت مزنه مشغوله ياها خط في التلفون الدوام ردت خاصة انها متعودة ان بعض العملاء يتصلون فيها يتخبرون عن رصيدهم وغيره من ها السوالف بس هاي المكالمة كانت مختلفة صحيح من عميل عندهم بس ها العميل طلب منها انه يرمسها في موضوع خاص وعطاها رقم مبايله وقالها يوم تفضين اتصلى فيني طبعا مزنه محترمة وايد قالت له اسفة اخوي لو عندك موضوع في الشغل تفضل بخدمك لكن مواضيع خارج الشغل اسفة وقفلت الخط عنه ..
خلصت شغلها وتجاهلت مزنه موضوع الاتصال وسارت البيت ويلست مع امها بعد الغداء وتخبرتها عن ابوها ما اتصل وله ؟؟ قالت لها امها اتصل وقال انه بيتأخر كم يوم بعده لانه ما خلص شغله ..
فيصل رجع البيت وقال لامه انه ما يبي غداء وانه بيطلع غرفته يرتاح وهاني في البيت معاه ربعة عازمنهم على الغداء وقيس راجع من المدرسة وراقد ومازن يطالع التلفزيون لانه ما يقدر يرقد لازم يسير يب الريم من الجامعة بعد ما اعتذر هاني لان ربعة معاه في البيت وما يقدر يخليهم ويسير يب الريم من الجامعة ..
طلع مازن من البيت الساعة 4:30 عشان يب الريم من الجامعة وطبعا هي متعودة تطجع هاني برع شوي وظهرت الساعة 5 كان مازن ساكت وما قال ولا كلمه وهي حست ان ريقها نشف شو تقول الحين وقالت وله بقوله الدكتور اخرنا في المحاضرة ركبت السيارة بس الغريب ابتسامة مازن سبقت كل شئ قالها الله يعينج هاه كيف الجامعة والدراسة؟؟
الريم : الحمد لله اني متغشيه وله كل تعابير ويهي بتبان قلت له هاه كل شئ تمام وعقب قلت له اشوفك انت ياي تخذني جي وين هاني؟؟
مازن : هاني عنده ربعة في البيت
الريم : سكت ولا قلت ولا كلمة وتميت اطالع الشارع والسيارات وكأني اول مره اطلع من البيت يمكن حابة اشغل نفسي بشئ وفي نفسي بعد شئ يقولي هاي فرصتج يالله رمسي وشوي وتميت اشجع نفسي قلت بصوت واطي مازن..
مازن : شكلة كان يتريا اني ارمسه عشان جي قالي نعم رغم ان صوتي كان واطي
الريم : فيه شئ بقولك اياه او بمعني اصح سؤال
مازن : تفضلى ؟؟
الريم : بصراحة وما لحقت اكمل رمستي رن مبايل مازن كان ربيعة وتؤام روحة سعيد داق عليه طبعا رد عليه بعد ما قالي لحظة برد على الخط وتم يسولف معاه لحد ما وصلنا البيت نزلت من السيارة ودخلت البيت ومن قهري ما شفت حد قدامي رغم انه كلهم في الصالة وطلعت الدري بس نادتني عمتي وقالت بلاج الريم انتي ها الايام ما عايبني حالج قلت لها ما شئ عمتي سمحولي ما شفتكم وسلمت عليهم ورديت اطلع غرفتي يمكن استعجلت بعد اطلع غرفتي عشان ما يدخل مازن ويسألني شو هو السؤال اللي بغيت اسألة اياه قدامهم فتجنب للاحراج طلعت غرفتي بدلت ملابسي وصليت العصر وفتحت الكمبيوتر قلت بيلس شوي على النت رغم اني تعبانة إلا اني محتاجة ارمس مع شخص وفيه شخص انا تعرفت عليه عن طريق النت احب اسولف معاه لانه انسان فاهم وعلاقتي فيه علاقة بريئة خالية من أي شئ وتمنيت اني احصلة على النت والحمد لله اني حصلته ..
يلست اسولف معاه شوي وعقب بعد حسيت بملل وستأذنت منه وحاولت ارقد لكن دق الباب هو اللي قطع علي وكانت مزنه ياية تيلس معاي وحسيت فيها انها تبي ترمس معاي عشان جي نسيت سالفة النوم ويلست معاها
يا تري الريم ممكن تعرف شو فيه مازن؟؟
نزين مازن ليش متعقد من الزواج؟؟
الجزء الثاني
الريم : هاه فديتج احس فيه رمسة على لسانج شو؟؟
مزنه : ما ادري بس حسيت اني محتاجه لج
الريم : قولي فديتج اسمعج
مزنه : ما ادري ما ادري اقولج شو رايج نقول لهنوي يظهرنا تراني ملانه وخاطري اطلع السوق
الريم : لو انه ما كان لي بارض لاي شئ لكن عشانها قلت لها اوكى شوفي هاني ولو وافق قولي لي بتجهز ..باستني مزنه على خدي ونزلت والابتسامة شاقة الحلق
مزنه : سارت غرفة اخوها هاني وقالت له انها تبي تسير السوق وتبيه يوديها هي والريم قالها اسف عندي دراسة قالت له عشان خاطري واللي تبية بعطيك اياه
هاني : بصراحة العرض مغري ههه وبعدين فرصة اطلع من البيت اوكى خلاص تجهزي بس عندج عشر دقايق لو تأخرتي ما بوديج
مزنه : ظهرت من غرفة اخوها وخبرت الريم عشان تتجهز لكن منو يقول اني والريم نجهز في عشر دقايق جي تضبيط العباة والغشواه يبالة ربع ساعة ههه عموما بعد اربعين دقيقة نزلنا انا والريم وما خلينا سوق ما سرنا له وشترينا اغراض وايد ..
هاني : اقول شو عندج انتي وياها ؟؟
الريم : بعد ما قررت اني انسى اللي صار اليوم ابتديت اضحك وأوجه كل تفكيري في الطلعة هاي الحلوه ويمكن اللي خلاني ابتسم اني تذكرت ان يوم الاربعاء ما عندي محاضرات يعني ما فيه جامعة ولا نشه من الصبح .. وقلت اكمل الفرحة وطلبت منهم انا نروح فيفل ونيب من عندهم حلاوة وطبعا هاني تحت الطلب بعد ما قالت له مزنه بتعطية 500 درهم
وصلنا البيت بس فرحتي شكلها ما راح تكمل لاني شفت مازن في ويهي نزلت راسي وخفت ليسألني الحين عن السؤال اللي كنت بسألة لكن مازن اذكي من جي بس كان معصب على تأخرنا برع البيت لها الحزة مما خلانا كلنا ناكل هزبه محترمة منه وعقب انا ومزنه طلعنا غرفة مزنه وتمينا نقيس الملابس اللي اشتريناهم وقالت لي مزنه اختار لها احلى لبس اشتريناه عشان تلبسة باجر وبعد ما خترنا لها بعد بدلت شنطتها لانه خبركم بنت عمتي خجاجة درجة اولي وشياكتها وكشختها يهمها بالدرجة الاولي .. عقبها خذت اغراضي وسرت غرفتي تميت يالسة مب عارفة شو اسوي رغم اني طلعت ورغم اني مب راقده اليوم إلا اني احس اني مب قادرة ارقد وحاسة بملل عشان جي لبست شيلة الصلاة ونزلت عشان ايلس شوي في الحوي وشليت معي الوكمن وحطيت اناشيد دينيه عشان انا متعودة اني ما اسمع اغاني بالليل .. رفعت نظري لسماء وغمضت عيوني ودعيت ربي انه يساعدني ويوفقني في حياتي ودعيت لعمتي اللي ربتني من وانا وصغيرة وما نسيت ادعي لمزنه بالزوج الصالح لاني احس انها تفكر في ها الموضوع بس كبريائها يمنعها انها تعترف لي به او يمكن يمنعها انه تعترف به قدام نفسها ويمكن انا اشفق عليها لانها انفصلت عن خطيبها الاول اللي هو ولد عمتها اللي كانت مسماية له بسبب اللي سواه خالها اللي هو ابوي وما نسيت عيال عمتي كلهم بلا استثناء ..
فتحت عيوني وكان مازن يوقف قدامي قالي شو ميلسنج الحين هنا والجو بارد رغم انه فعلا مثل ما قال انه بارد الا اني احس بحرارة كبيرة في جسمي ما ادري ليش وما قدرت اجاوب عليه غير اني نزلت راسي وانتظرت انه يكمل رمسته لكن سكوته خلاني ارفع نظري له وسألته اكيد حاب تعرف السؤال اللي خاطري اسألك اياه اليوم ؟؟
مازن : قالي اكيد بدون ما ينطق بكلمة كل حواسة كانت معاي وانا اقول كلامي
الريم : يمكن تعتبر سؤالي فضول لكن صج السؤال حيرني وخاطري اعرف جوابة انت ليش رافض سالفة الزواج؟؟
مازن : استغرب من سؤالي وشكلة انصدم منه وكتفي انه قالي ممكن ما نرمس في الموضوع ؟ وتركني ودخل البيت
الريم : يا ربي شو سويت بدل ما احصل الجواب حصلت مليون سؤال وسؤال غيره لكن انا عندي حل وان شاء الله هذا اللي بيفيد الحين انا اقول يا مازن بظل وراك لحد ما ازوجك مب عمتي وبس ..
الصباح كالعادة الكل نش لدوامة إلا انا ويمكن تعتقدوا اني برقد لوقت متأخر لكني من نشيت اصلى الفير ما رجعت ارقد قريت قرآن وعقب نزلت لعمتي بعد ما تأكدت ان كلهم توكلوا لدوامتهم وقلت لها عمتي شو رايج نزور يرانا اليدد واتعرف انا على بنتهم اللي قلتي تبي تخطبيها لمازن
استغربت عمتي من اللي اقوله مب عشان بخصوص مازن لا بخصوص اني اطلب اطلع من البيت واني ازور ناس لانها مسكينة عمتي حاولت انها تخليني اطلع إلا ان خوفي من الناس ومعايرتهم لي بهروب ابوي وقضيته خلتني ابتعد عن الناس لكن عشان مازن احس اني لازم اسوي أي شئ على الاقل ارد الجميل لعمتي اللي ربتني واكيد زواج مازن يسعدها ..
ام مازن : فرحت وايد بقراري وقالت لي انتظري لحد الساعة 10 وبنسير نزورهم
الريم : ابتسمت لعمتي وطلعت غرفتي انتظر الموعد المحدد اللي بشوف اختيار عمتي لمازن وما ادري ليش ظهرت احلى لبس معاي وحطيت مكياج خفيف جدا عشان انا ما اعرف ها الناس زين وما اعرف كيف انطباعهم عني بيكون والساعة 10 نزلت لعمتي اللي كانت في غرفتها تتدخن ونادت علي عشان اتدخن وفعلا دخنتني وظهرنا وسرنا بيت اهل ثريا
ام طارق : اللي هي ام ثريا كانت وايد حبوبة ومرحة وشكلها مب باين عليها انها عندها عيال كبار
ثريا : ما شاء الله عليها جمال واخلاق وطيبة واللي يشوفها هي وامها يقول خوات مب ام وبنتها
الريم : سرحت في ها الحزة وفكرت يا تري لو كانت امي معاي بتكون علاقتي فيها مثل علاقة ثريا وامها؟؟
ثريا : فرحت وايد بزيارتي وقالت لي زين بشوف بنات مثلى كل اللي يزورنا حريم كبار وانا تعرفي يديده في المنطقة وخاطري اتعرف على بنات واكون صداقات ..
اللي ما تعرفوه ان اهل ثريا كانوا مسافرين خارج الدولة وتوهم السنه بس راجعين لان ابو طارق كان يدرس وحصل فرصة عمل في بريطانيا كان يدرس طب وما شاء الله عليه هو طبيب مشهور في البلد وكانت حرمته وعيالة طارق وثريا معاه عشان كذا ما شاء الله لغة ثريا الانجليزية قوية ومن هنا ياتني فكرة ثانية اني اطلب من ثريا تزورني البيت عشان تدرسني انجليزي والباقي يتدبر (فديتني يوم افكر ههه)
يلسنا يمكن ساعتين بيتهم ولا حسينا بالوقت ما

مشكوره ياعمري وبليز لاتطولين نزليها الله يخليك
اندمجت معها مايصير تقطعينها علي
انتظرك لاتطولين

&&ليالي نجد&&
مشكوره يا قلبي وأبغاكي تعرفي شي واحد
أنا قاعده انزل علشانك بس

الريم : كنت نازله من غرفتي وشفت الوضع في الصالة شو اللي يصير كأني وانا نازله سمعت كلمة مات بس ما سمعت بالضبط منو ومن الخوف بدل ما ازيد من خطواتي عشان اوصل بسرعة واعرف الموضوع تبطأت بخطواتي لاني ما ابي اسمع خبر مب زين لكن مهما حاولت اخر خطواتي في النهاية وصلت الصالة وشفت عمتي وعمي يبجون وشفت فيصل واقف على اليدار يبجي وبصوت مخنوق قلت لهم شو اللي صاير شو فيكم؟؟
فيصل : قربت صوب الريم وقلت لها هاني عطاج عمره
الريم : شو تقول انت لا طبعا اكيد تمزح هاني ولد عمتي ...
في ها الحزه دخل مازن وقيس ومزنه وراهم وهي تتحايل على مازن يقول لها شو السالفة ومن دخلت شافت الوضع كان الخوف بيقتلها شو صاير
بو مازن : يالله يا مازن نروح المستشفي نكمل اجراءات وانت يا فيصل تم هنا مع امك وخوانك
مزنه : اجراءات شو يا يبة فهموني
قيس : حرام عليكم قولوا شو صاير وسار صوب ريم قالها شو صاير ريم قولي لي ليش اماية تبجي وليش انتي تبجي
الريم : شو اقول لك ما كان ودي اقول ها الخبر بس مضطرة وقلت بلسان ثقيل وحرف يا دوب قدرت اطلعها هاني مات
صدمة قيس ومزنه كانت قوية ويمكن الصدمة على قيس كانت اقوي وما قدر يمسك نفسة وطاح على الارض .
شله فيصل غرفته وطلب من ريم تم معاه اما مزنه كانت يالسة يم امها وحاطه راسها في حضن امها اللي الغريب انها ما نزلت ولا دمعة كانت بس ساكته .
نص ساعة من الاحداث هذي وكان البيت متروس ناس اكيد انهم اهلهم ومعارفهم ويرانهم وبعدها بساعة ثانية كانت سيارة بو مازن دخله البيت وفيها على الكرسي الخلفي جثة هاني عشان يشوفونه اهله للمره الاخيرة في حياتهم قبل ما يغسلونه ويدفنونه ..
ام مازن : مشيت بخطوات بطيئة كيف بشوفك يا هاني وانت في خلقة بيضاء وانت ظاهر من عندي الصبح بكندورتك وغترتك وضحكتك يالله يا ربي ترحمة وتغفر له رضيه عليك يا هاني دنيا واخرة راضيه عليك يا ولدي وربي يرضى عليك من رضاي وحبته على راسه .
كل خوانه شافوه ودعوه الوداع الاخير إلا قيس اللي كان مغمي عليه من سماع الخبر
الريم : كنت اطالع على هاني وكل حركاته وسوالفة وهذربته وضحكه في خيالي وكنت مثل اللي مب مصدقة ان هاني مات على الرغم اني اشوفة الحين قدامي جثة هامدة ما تتحرك
في ايام العزاء ام طارق وثريا ما خلوا ام مازن كله معاها وكأنهم من اهل البيت فعلا الناس معادنهم تبان في الشدائد والنعم والله يا ام طارق على وقفتج الحلوه مع اختج ام مازن .
في غرفة مزنه كانت مزنه يالسة تقرأ قرآن وشوي دق الباب كانت خلود هي اللي تدق الباب (خلود هي بنت عمة مزنه ) هم صار لهم فتره متزاعلين وما يكلمون بعض بسبب حسين اللي طلب فك خطبته من مزنه بعد اللي صار لخالها بو الريم لكن في حزه الحزن الاهل مهما كانوا متزاعلين يكونوا محتاجين لمواساة بعض
حسين كان يالس في الميلس مع الريايل وبعد كان متأثر وايد بوفاة ولد خاله هاني وكان ندمان على اللي سواه لانه عرف ان الدنيا على كبرها ما تسوي وفي لحظة الانسان يخسرها .
خلود : لوت على مزنه اول ما فتحت الباب وتمت تبجي من خاطر
اللى حصل ان مزنه هي اللي تمت تسكت خلود وقالت لها اطلبي له الرحمة يا خلود هو ربه ختارة وما اعتقد ان الانسان مفروض يعترض على ارادة الله .
بعد شهر من كل الحزن اللي خيم على بيت بو مازن وصار كل شخص من ها العائلة حزين رغم ايمانهم بالله إلا ان الموضوع ما يخلى افتقادهم لهاني اللي كل ركن في البيت يذكرهم فيه وعشان جي قرر بو مازن انه يشتري بيت ثاني غير ها البيت عشان ينتقلوا فيه لانه في كل ركن من اركان ها البيت ذكري لهاني من هو وصغير لين يوم وفاته .. بس ام مازن رفضت ها الفكرة وقالت انها راح تقضى عمرها الباقي في ها البيت وانها ما تقدر على الاقل تتخلى عن ذكري ولدها وطبعا بو مازن ما قدر يسوي شئ غير انه ينفذ لها طلبها هاي ام مازن الغالية وهو يمكن فكر في ها الفكرة بعتقاد منه ان ها الفكرة ممكن تخلى ام مازن تنسى ولدها .. ما عرف ان ذكري ولدها مب بس في المكان بس هي كانت مجرد محاولة عشان يطلعها من الحزن اللي فيه .
صار بو مازن قريب من عيالة اكثر وعرف ان العمر مب بس شغل عشان جي صار يرجع البيت من وقت ويخلى حد من اللى معاه في الشغل يسافرون لمه كان فيه شغل مضطر انه يسافر له ..
مزنه رجعت دوامها ولكن اكيد ان وفاة هاني اثرت فيها كثير وصارت ما تحط مكياج في الدوام وصارت محجبة والكل لاحظ التغير اللي تغيرته مزنه ..
مازن اول يوم دوام اتصل فيه خليل اللي ما قدر يزوره البيت بس عزاه في التلفون لانكم تذكرون ان خليل زار مازن الدوام وطلب منه يشوفه ولكنه لمه تصل بمازن بالليل وما رد عليه هذيج الليلة لانها كانت ليلة وفاه اخوه بس اليوم رد مازن عليه وتعذر منه وطبعا خليل قدر ظرف مازن وقاله خلاص اكلمك يوم ثاني واسف على ازعاجك ..
الريم : الكل تأقلم الحين على وفاه هاني بس انا ما قدرت اتحمل صحيح ان علاقتي في هاني مب لين ذاك الزود بس حتى ولو انسان كان عايش معاي في نفس البيت اشوفه كل يوم فجئة يختفي ما قدرت استوعب ها الموضوع وكل مره اغلط لمه ازجر على قيس اقوله هاني وها الشئ كان يمكن يضايق عمتي ويضايقني انا شخصيا ..
قيس : حاولت اني ارجع لدراستي وحاولت اسوي كل شئ كان هاني يطلب اني اسويه واللي يمكن غريب صرت اتصل بربع هاني واحب اسمع منهم سوالف هاني خارج البيت والحمد لله اخوي هاني انسان تقي ويخاف ربه وحتى مع ربعة له سمعة حلوه بأخلاقة العالية وتدينه
فيصل : يمكن تعتقدون اني ما احس او اني قوي لكن من داخل انا حزين ومتضايق بس يمكن كنت امسك نفسي عشان امي وأبوي وخواني وبنت خالي الريم وله انا يمكن اكثر واحد فاقد هاني في البيت لانه على الاقل هو الشخص اللي ييلس يسولف معاي ويمزح معي لكن ما في ايدي اقول غير الله يرحمة وبصراحة انا خطرت لي فكره بعد نهاية هذا الكورس قررت اني اخذ امي ونسافر السعودية نعتمر عن هاني ومنه امي ترتاح في بيت الله وتدعي لهاني وما ترددت اني اقولها ها الشئ بس لمه اماية خبرت ابوي قال لا احنا كلنا نطلع على العمرة في اجازه نص السنة وها الخبر اسعد الكل بس مازن اللي ما يقدر يسافر معاهم لانه ما عطوه اجازه في الدوام خاصة انه ماخذ كل اجازتة وقال معليه بسافر السعودية اول ما اخذ اجازه لاني انا بعد محتاج اني ازور بيت الله ..
في بيت بو طارق
ثريا : في ايام العزاء تلاقيت مع شاب حلو واخلاقة عالية وحشيم بصراحة يلفت انتباه كل بنت سمعت مزنه تقوله مازن يعني هو ولد خالتي ام مازن اخو مزنه ومن هذيج الايام وهو في بالي ما رضي يسير من خيالي وبصراحة اكثر ادعي ربي في كل صلاة انه يكون من نصيبي ايه لا تطالعوني جي (من منا حنا البنات ما تبي تنستر تحت ظل ريال حشيم ومتدين واخلاقة عالية)
امي بعد لاحظت ان ها الموضوع في بالها خاصة اني احسها انها صارت تلمح اني كبرت واني بعرس وبخليها بروحها بس هي ما تبي تزوجني لحد ما يرجع طارق يعني اكيد فيه حد كلمها عن موضوع زواج معقوله تكون خالتي ام مازن لا اكيد لان خالتي وايد متأثره بوفاة ولدها هاني الله يرحمة يا ربي تراني ما ابي اتزوج أي شخص غير اللي في بالي (شو يالسة اقول انا شكلي مريضة وله فيني شئ اللي يسمعني الحين ارمس يقول ان مازن لمح انه يباني وله شئ ما كأنه حب من طرف واحد ويمكن حتى ما يكون حب )
ثريا : بصراحة صرت اتحين الفرص واتصل في الريم لانها اقرب لي من مزنه واعرض عليها خدمتي في مساعدتها في الدراسة عشان بس اسير بيتهم مجرد اني اشوف مازن حتى من بعيد او مجرد اني احس اني متواجده في المكان اللي هو متواجد فيه احس براحة (وربي تراه مب خبلة بس شكلي طبيت ولا حد سمى علي)
في بيت بو مازن
ام مازن : فكرة ممكن تقولون عنها شريره او تسلط خطرت في بالي بس خلاص انا احس اني مب قادرة اتحمل ان ولدي مازن مب معرس لين الحين عشان جي انتظرت لحد ما رجع مصلى العشاء وقلت له مازن ابيك في موضوع .
مازن : خير اماية ؟؟
ام مازن : مازن انا بخطب لك ثريا بنت يرانا وما ابيك ترفض
مازن : طالعت اماية مستغرب لهجة اماية في رمستها كأنها تأمرني وكأنها قررت وما فيه مجال اني اناقش وهذا الاسلوب غريب عن اماية عشان جي ما رديت عليها باي شئ وطلعت غرفتي ما حبيت ايلس واتناقش معاها لانها شكلها معصبة وعشان ما اغلط بكلمة معاها هاي امي وطاعتها من طاعة الرحمن وقلت بكلمها بس في وقت تكون هدت فيه لاني الحين لو كلمتها بتعاند .
ام مازن : ما ستغربت تصرف مازن الحكيم وحسيت انه عرف اني ارمس وانا مب مقتنعة
الريم : بصراحة انا سمعت كلام عمتي لمازن واستغربت رده فعل مازن وبصراحة قهرني وايد عشان جي طلعت وراه وقبل لا يدخل غرفته قلت له مازن ممكن اتكلم معاك (لا تستغربون من ها الجرأه ) وقلت له انت اناني تفكر في نفسك وبس وما فكرت في عمتي اللى تبي تزوجك وتفرح فيك وين التدين اللي تقول عليه
مازن : شكلي مسكت اعصابي وايد وحان الوقت اني الضغط اللي داخلى يطلع وكنت اطالع ويه ريم وهي تتكلم وقهرتني عشان جي رفعت ايدي وصفعتها كف على ويها عشان تسكت .
مزنه : كنت طالعة من حجرتي وشفت الموقف اللي يصير قدامي مازن يصفع الريم يا ربي عشان جي بسرعة ركضت صوب الريم .
الريم : الكف اللي عطاني اياه مازن كان معناه كبير مازن عمره ما سواها حتى وانا صغيرة يسويها الحين والغريب اني حسيت اني انا اللي غلطت في رمستي معاه وقلت له اسفة ودخلت غرفتي ودخلت مزنه بعد وراي .
مزنه : شو اللي صار شو قلتي لمازن خلاه ينقهر بها الشكل مازن الهادي ؟؟ بصراحة انا مب عارفة شو يصير في ها البيت وقربت صوب الريم ولويت عليها لاني حسيت انها الحين محتاجة لحضن دافي ترتمي فيه واول مرة احس بأحساس اني الكبيرة والريم صغيرة ومحتاجة رعايتي وهتمامي فيها .
مازن : دخلت غرفتي وانا مب مستوعب اللي صار اللي اتذكره انها كانت ترمس واني رفعت ايدي وصفعتها .
في اليوم الثاني نزلت الصبح من وقت وطلعت وما هتميت منو بيوصل قيس ومزنه والريم دوامتهم وطلعت سرت الدوام اليوم وصلت من وقت ويلست على مكتبي مب سرحان وله ضايق مثل ما راح تعتقدوا لا يلست اخلص شغلى وعلى الساعة 10 ترخصت من المدير بعد طبعا ما خبرته اني خلصت شغلي وطلعت على بوظبي عند ربيعي بوعسكور اللي يداوم هناك .. اكيد ان امي اتصلت قبلها عشان تعرف ليش انا طلعت من وقت وانا اعتقد هي تحسبني ضايق من كلامها هي معاي عشان جي قلت لها اماية ما فيني شئ بس خلي فيصل اليوم يوصلهم وحاولت انهي المكالمة بسرعة .
الساعة 12 وصلت بوظبي لا تستغربوا ليش خذت كل ها الوقت بس كنت امشى على راحتي لاني بصراحة انا مب عارف شو اسوي وكيف اتصرف جي المهم كنت متواعد مع سعيد اني اتلاقي وياه في باركنات المارينا عشان انا ما اعرف شقته وين بالضبط وياني بو عسكور وقالي يالله بتتغدى معاي قلت له لا انا ما خبرت الاهل بس كنت حاب ارمس معاك قاله سعيد نزين انا خبرت الحرمة تسوي الغدي وبعد الغدى بنسولف على راحتنا يالله يا مازن .
طبعا سعيد معرس وعنده بنت ما شاء الله عليها حبوبه وعليها سوالف وبصراحة حسدت سعيد على السعادة اللي عايشها واكثر شئ لمه سمعت روان بنته تنادية باباه وتميت اضحك على سعيد اللي يالس يأكلها هو اللي من زمان ما يطيق حد يقطع عليه لمه ياكل ههه سبحان الله المهم بعد الغدى خذ سعيد روان بنته اللي رقدت وفي ايدها العيش ههه وعطاها امها .
سعيد : هاه الحين فضينا لك يا مازن قول شو عندك
مازن : ما ادري كيف ابتدي سالفتي يا سعيد غريبة وحلها يمكن في نظر الناس سهل بس في نظري صعب
سعيد : السالفة جي سالفة حب وله يا مازن؟؟
مازن : هيه نعم اللي احبها ما تحس بمشاعري تجاها وانت عارف انا مب من النوع اللي ممكن اسوي مثل أي شاب واصارحها هاي بنت خالي يعني حشمتها من حشمة اماية وما ابي امي تفاتحها عشان ما توافق على زواجنا رد لجميل امي عليها وبصراحة انا البارحة تأكدت اني مب في بالها وخبر سعيد السالفة كلها .
سعيد : تسمع رايي
مازن : يا ريت يا بوعسكور
سعيد : تزوج اللي امك اختارتها لك وله بنت خالك شكلها ما تكن لك مشاعر غير مشاعر الاخت لاخوها وعيش حياتك تراه العمر يمضى يا خوي وبصراحة اجمل نعمة على الانسان لمه يتزوج الحرمة الصالحة واكيد خالتي ما ختارت لك غير بنت ناس ومحترمة
مازن : يصير خير يا سعيد .
اكيد اني اتصلت بامي وقلت لها اني ما بتغدى في البيت ولكني ما قلت لها اني في بوظبي قلت لها عندي شغل بخلصة وبرجع المغرب لاني مقرر اني العصر ارجع العين وفعلا بعد ما صلينا العصر في المسيد انا وسعيد ودعته وسرت على العين .
رايكم مازن ممكن يسمع نصيحة صديقة سعيد؟؟
والريم معقوله انها ما راح تحس بمشاعر مازن؟؟
ضنكم شو بيصير بين مازن والريم ؟؟
وثريا يا تري ممكن تكون شئ بحياة مازن؟؟

لالالا يارب مازن مايسمع كلام خويه ويتزج ثريا انا ابيه يتزوج الريم حرام هو يحبها
مشكوره على الجزء ياعسل وانتظر الباقي

الجزء الخامس
في بيت بو مازن
ام مازن : كنت انتظر مازن يرجع واقوله اني ما كنت اقصد الكلام اللي قلته لاني عمري ما كنت مستبده في تربيتي مع عيالي وقلت اني بستسمح منه على اسلوبي معاه البارحة فديته مازن ما يهون علي يزعل ويتكدر ويمكن هو في خاطره وحده معينه وبيخبرني عنها بس ينتظر شوي .
مازن : اول ما رجعت البيت وشفت اماية سرت صوبها وحبيتها على راسها .
ام مازن : فديتك مازن سامحني على اسلوبي معاك البارحة تراه والله ما كان قصدي بس كنت خايفة عليك يمر فيك العمر ولا تعرس ولاني حابة اشوف عيالك واكحل عيوني فيهم
مازن : ابتسمت لاماية وقلت لها اماية خلاص فالج طيب مره باجر سيري على العرب وخطبي لي اللي خترتيها لي تراني ما بخذ الأ وحده انتي تختاريها بنفسج ودامج مقتنعة ببنت اليران خلاص كلميهم وردي علي .
ام مازن : انصدمت من اللي قاله مازن يعني صج وافق ولحظة حسيت اني تضايقت وقلت له مازن تراه لو كنت موافق عشان ترضيني انا راضية عليك بدون ما تخذ اللي اخترتها انا لك لو كان يعني فيه وحده في بالك
مازن : افا عليج يا ام مازن لا ابدا ما فيه حد في بالي وبعدين انا بصراحة حسيت بالغيرة يوم شفت روان بنت سعيد تقوله يبة وخاطري يكون عندي اولاد (شكلي خرتها وشكل امي عرفت اني كنت في بوظبي عند سعيدعشان جي قالت لي كيف حالة سعيد ؟؟)
في بيت بو طارق
كانت ام خالد مع ام طارق في ميلس الحريم شكل ام خالد قررت انها تخطب ثريا لولدها وشكل ام طارق مستانسة بها الخبر الحلو لان اكيد سعادة كل ام لمه تزوج بنتها وتطمن عليها انها عند ريال يحترمها ويقدرها وخالد والنعم فيه هو يقرب حج ريلها بو طارق وهي كل اللي سمعته عنه خير عشان جي قالت ام طارق لام خالد انها بتشاور البنت وابوها وبترد عليهم .
في ها الوقت اتصلت ام مازن فيها وقبل لا ترد عليها ام طارق اترخصت ام خالد عنها وقالت لها ننتظر ردكم يا ختي وطبعا ام طارق وعدتها خير ..
ام طارق : هلا والله بام مازن هلا الغالية
ام مازن : هلا فديتج والله تولهت عليج اليوم ما سريتي صوبي
ام طارق : سمحيني فديتج بس كانت عندي ام خالد ياية تطلب ثريا لولدها خالد
ام مازن : شو؟؟
ام طارق : ياية تطلب ثريا لخالد
ام مازن : يا ربي شو ها الحظ هيه ورديتي عليهم ؟
ام طارق : لا طبعا قلت بشاور ابوها والبنت
ام مازن : يالله عسى ربج يقدم اللي فيه الخير وتعذرت لها بانه ياني خط ثاني وقفلت السماعة لاني اتضايقت بصراحة بس قلت بتريا وما بقول لمازن شئ لين ما اتاكد ان ثريا نخطبت وبدور له وحده ثانية .
في بيت بوطارق
بو طارق : رجعت من الدوام وناديت على ام طارق وقلت لها شو اللي سمعته اليوم من طارق؟؟
ام طارق : شو سمعت فديتك؟؟
بو طارق : قالي طارق ان فيه عرب خطبوا منج ثريا وطارق اخر الدنيا يعرف وانا ما ادري
ام طارق : فديتك تراه من سارت عني ام خالد اتصل طارق فديته وخبرته ان خالته ام خالد عندها وانها ياية تخطب ثريا وعاد اكيد هو اتصل فيك وعلمك لاني قلت بعلمك اول ما ترجع البيت
بو طارق : ههه لا فديتج بس حبيت امزح معاج وله ادري انج بتعلميني المهم شو خبرتي ثريا؟
ام طارق : لا ما قلت لها
بو طارق : يالله نزين عشوني تراه ميت يوع
في ها الحزة نزلت ثريا وشافت ابوها وامها يضحكون هي اصلا متعودة تشوفهم جي كل ما يكونوا مع بعض وقالت لهم العذول وصل ههه يالله اقطعوا الرمسة السرية وخليكم على الاخبار العامة ويات ولوت على ابوها وحبته على راسه وقالت له فديتك من 8 ساعات ما شفناك ههه(لواته طبعا)
بو طارق : هلا فديتج انتي طالعة على امج حنونه
ثريا : كل شئ ترجعة لها ههه خلاص اوكى يا بو طارق على امي على امي
ام طارق : ولج الشرف يا بنت راشد
بو طارق : زين جي يا ثريا يبتي لنا الرمسة ؟؟ ههه
في بيت بو مازن
في غرفة الريم
كنت يالسة وما نفس في أي شئ كل اللي في بالي اللحظة اللي صفعني فيها مازن معقوله انا عصبت فيه لها الدرجة؟؟ وشو قلت له اصلا يعصب ؟؟
شوي ودخل قيس اللي متعود يدق الباب ويدخل ما يترياني اقوله ادخل وقف على الباب لمه شاف الدموع اللي في عيوني وقالي سلامت بلاج شو صار بعد تراه مب حمل خبر شين يكفي اللى فينا
الريم : ما شئ مزكمة شوي عشان جي
قيس : واللي مزكم على قولتج عيونه تدمع اقولج انا صح صغير بس مب غبي ولو ما تبي ترمسي خلاص قولي ما بقول ما فيه داعي للجذب وعقب يكتب الملك اللى في ايدج اليسار لج سيئة (بصراحة كنت مقهور)
الريم : حسيت اني تفشلت من رمسة قيس الصغير وحسيت اني صرت ملطشة الكل عشان جي قلت له خلني بروحي ما ابي اشوف حد ممكن؟
قيس : انقهرت اكثر صحيح اني حاس اني متعاطف معاها بس اسوبها كان مب اوكى معاي عشان جي انسحب من الحجرة ومن قهري رزعت الباب بقو .
الريم : انا شو سويت؟؟ وليش انا دائما احس فيهم وهم ولا واحد حس فيني؟؟ لا يا الريم حرام عليج قيس طول عمره اقرب واحد لج وهو حساس وايد يا ربي شو سويت انا ؟؟
رقدت من الضيق اللي فيني صحيح سمعت صوت مزنه وهي داخلة الحجرة هي صارت كل يوم تيني عشان تسولف معاي وصارت تحسسني انها قريبة مني لكني بصراحة في ها الوقت ما كنت ابي اتكلم مع أي شخص عشان جي خلتني وسارت
في حجرة مازن
بصراحة قررت اني ما افكر في أي شئ وعشان جي لمه حسيت اني متملل نشيت وقررت اني اظهر ايلس مع فيصل بس ما اتمني انه ما يعرف اني وافقت اتزوج البنت اللي خطبتها امي لي لاني ما ابي اتكلم عن الموضوع ابي اتكلم عن أي شئ غير ها الشئ .
والحمد لله لمه دخلت على فيصل حجرته حصلته يلعب بلاي ستيشن ههه بعده الحبيب ما نسى اللعب (الله يرحمك يا هاني كان هو دوم هو وياه يلعبون مع بعض وكنت دوم اسمع سوالفهم وضحكم ) قربت من فيصل وقلت له اللعب وياك؟؟
فيصل : يا ريت
مازن : بس انا ما اعرف علمني
فيصل : ههه نزين يا مازن وتميت افهم مازن الاشياء الرئيسية وهو ما شاء الله عليه ذكي لقت الملعومات بسرعة ههه
مازن : خلاص كل يوم بلعب وياك
فيصل : لا الشيخ بعد انت ما تصير حريف بلعب مع قيس ما فيني كل يوم اخسر ههه
مازن : فيصل شو رايك نطلع نمشى
فيصل : احس ببرد خليها يوم ثاني الحين اللعب اللعب
مازن : نزين وتميت اللعب وحاولت اشغل بالي باللعب وما افكر في أي شئ لحد ما حسيت اني نعسان وترخصت عن فيصل عشان اروح ارقد .
بعد 10 ايام من كل ها الاحداث بس شفت الريم وجه لوجه واكيد اني تجاهلتها تماما وسرت صوب التلفزيون وشغلته وتميت اطالع برنامج سيرة ونفتحت الموضوع بصراحة شدني
وشكل الريم طلعت بسرعة لانها هي بعد ما تبي تشوفني رغم اني حسيت انها نقهرت من تجاهلي لها ولكني قلت في نفسي احسن تستاهل حد قالها تغلط في الكلام معاي اونه شو انا اناني لو كنت اناني كنتي انتي يا الريم ملك لي الحين ولا كنت احس بتعب وضيق الحين
الريم : كنت انتظر ثريا تزورني لاني متواعده معاها عشان تدرسني انجليزي او بمعني اصح كنت محتاجة اسولف مع شخص غير الاشخاص الموجودين في البيت وعشان جي طلعت في حديقة البيت عشان اترياها ومن وصلت وفتحت باب الصالة قلت لها ولد عمتي في الصالة يعني لا ترفعي الغشواه مرينا من الصالة وطلعنا غرفتي .
ثريا : يا ربي شكثر انا محظوظة اني اشوف مازن اول ما ادخل البيت فديتك يا مازن وانت تطالع التلفزيون (الحمد لله ان الريم نبهتني وخليت الغشواه بصراحة تحتها اتصرف على كيفي ههه كان ودي ابوس الريم من الفرحة)
الريم : يلست قدام ثريا وانا ساكته وسرحانه وعشان جي اكيد انها سألتني عن السبب لكن ما كان عندي جواب او بمعني اصح ما ابي اجاوب
ثريا : بلاج انتي اليوم احسج غريبة مب ريم اللي اعرفها
الريم : ما شئ تعبانه شوي وبصراحة مالي خلق ادرس انا اتصلت فيج عشان اسولف معاج
ثريا : فديتج قولي اسمعج
الريم : لا مب موضوع معين يعني انتي رمسي سولفي لي عن أي شئ وبعدها السوالف بين ههه
ثريا : شو اقولج خاطري بصراحة كنت ارمس عن المشاعر اللي احسها تجاه مازن بس ما قدرت وعشان جي ما طلعت عن الموضوع وسألت الريم انتي عمرج حبيتي؟؟
الريم : بصراحة سؤالها كان مثل السهم اللي اتصوب على الفريسة وصابها سؤال غريب عمره ما خطر في بالي وعمري ما حسيت ان ممكن شخص يسألني ها السؤال ما ادري شو اقول لكم وابتسمت لها وقلت لها ليش عاد سألتي ها السؤال ليكون انتي ...
ثريا : ما انتظرتها تكمل رمستها وبصراحة حسيت في لحظتها انها كاشفتني او خفت ان عيوني تكون فضحتني (يقولون اللي على راسه....) لكن تداركت الموقف وقلت لها لا بس لان البنات كلهم يرمسون عن ها الموضوع وانتي ما شاء الله عليج حلوه واكيد ان فيه شاب حاول يتقرب منج ان كان من عائلتج او من اخو ربيعاتج ..
الريم : شو فيها ثريا اليوم كلامها احسه مثل الاسهم شو اقولج يا ثريا وقفت وتميت واقفة على الشباك وقلت لها انتي ما تعرفي شئ عن حياتي يا ثريا وانا ما لي خلق اضايق فيج بس انا اقولج شئ واحد اني عايشة مب عشان احقق اهداف مثل كل بنت انا عايشة عشان ربي عاطني ها العمر واحس اني افقد كل يوم منه بدون هدف ولا اني اسعي لهدف فيه مالي احلام مثل كل بنت بالزواج والاطفال لانه حلم بعيد وصعب انه يتحقق يمكن الشئ الوحيد اللي سمحت لنفسي اني احلم فيه اني اشتغل وما ادري ان كان بيتحقق وله بيكون مصيري جدران ها الغرفة .
ثريا : استغربت من الحزن اللي ترمس فيه الريم وقفت وسرت صوبها وحطيت ايدي عليها وحسيت اني لازم اوقف معاها عشان على الاقل اعرف شو فيها يمكن اقدر اساعدها وما اقول لكم ان مليون شئ خطر في بالي من كلام الريم ولكني حاولت ابعد كل شك وقلت لازم اصبر واعرف منها .
دخول مزنه قطع علي كل شئ وعشان جي حسيت ان الريم ما تبي تكمل الكلام وقلت لها هلا مزنه والله تولهنا عليج يا القاطعة اللي ما تسالي
مزنه : هلا والله الغالية سمحيلى لكن الدوام مخذني لكن اوعدج اني بزورج .
وبعد ساعتين سوالف اترخصت ثريا لانها ما تقدر تخلى امها في البيت روحها خاصة ان ابوها مب في البيت وقالت مزنه لريم شو رايج نظهر نوصلها البيت وكانت الفكره حلوه للريم قالت لها يالله بس انتي ترخصي من عمتي قالت لها مزنه افا عليج المهم انتي لبسي عباتج ويالله لان بيت قوم ثريا مب بعيد عن بيت قوم مزنه ولمه سارت مزنه تترخص من امها وافقت وقالت لهم انها هي بعد بتسير معاهم لانها ما شافت ام طارق من كم يوم ..
في الطريق كان خاطرها ام مازن تتخبر ثريا عن موضوع العريس اللي متقدم لها لكن عقب قالت لا مب حلوه وبعدين يمكن ثريا لين الحين ما تعرف احسن اتخبر ام طارق بروحها ويمكن كان هذا هدفي في ها السيرة لاني بصراحة اتمني ثريا لولدي مازن ما شاء الله عليها كل ام تتمناها لولدها ..
في بيت بو حسين
طبعا بنتعرف على هاي العائلة الحين
ام حسين : وهي اخت بو مازن عندها ثلاث اولاد وثلاث بنات كلهم معرسين ما عدا حسين وخلود وعيالها كل واحد ساكن بروحة لانها انسانه شريه ما حد يطيق يعيش معاها وراعية مشاكل عشان جي عيالها عادل وبراهيم سكنوا بروحهم وبناتها سارا وزينب بعد عرسوا وما وايد يزورها لانهم كل ما يزورها تترس راسهم على ازواجهم .. طبعا حسين كان يموت في شئ اسمه مزنه لين الحين بس بعد اللي حصل لخالها بو الريم طلبت فك خطبة حسين ومزنه اللي مفروض يعرسون من كم سنه وخلود لحد الحين عايشة معاها صراع هي الوحيده اللي قدرت تتمرد على امها وهي الوحيده اللي ظلت علاقتها بعيال خالها بو مازن مستمرة حتى بعد ما امها هددتها انها ما تتصل فيهم لانها ما تطيق ام مازن حليلها ..
بو حسين : انسان لا حول ولا قوة له انسان تسيره حرمته وهذا ما ادري شو اقول عنه طيبة وله شو بالضبط ؟؟
حسين : عايش في نار حبه ونار رضى امه ولكنه ما قدر لحظة ينسى مزنه والحين بعد وفاة هاني وزيارتهم لخالة وعيالة حس ان الحب اللى في قلبه كبير لمزنه وقرر انه يكسر كلام امه وانه يرجع يخطب بنت خاله ويتزوجها .
خلود : اول سنه في التقنية يعني هي كبر الريم بس ما شاء الله عليها شخصيتها قوية وكم مرة وقفت في ويه امها لمه كانت تقرر انها تزوجها وقالت انها تبي تكمل دراستها وانها ما راح تسمح لامها انها تسوي فيها مثل ما سوت في خواتها ..
في بيت ابو طارق
بعد ما طلعت ام مازن ومزنه والريم من بيتهم نشت ثريا عشان تروح غرفتها بس امها قالت لها ان فيه شخص متقدم لها وانه انسان محترم واخلاقة عالية وانه يقرب لهم طبعا على الرغم ان ثريا كانت حاسة بها الشئ إلا ان سماعها للخبر صدمها يعني احساسها كان في محلة يعني فيه حد رمس امي عن موضوع زواج يعني شو ومازن؟؟ قلت لها وبدون ما احس مستحيل اتزوج
ام طارق : يا بنتي ادري انج تحاتيني انا بس انا ما اقولج باجر بتعرسين يعني ممكن نقول لهم خطبة الحين وعقب ما يرجع اخوج طارق نكمل الزواج .
ثريا : اماية انا ما ابي اعرس الحين وما ادري ليش دموعي سبقت كلامي (الحين بس حسيت اني اللي احسة تجاه مازن مب اعجاب هذا اكيد حب)
ام طارق : ليش يا بنتي خالد انسان محترم و
ثريا : الله يخليج اماية ما ابي يعني ما ابي وطلعت غرفتي (يا ربي ليش الفرح ما يكمل يعني انا فرحانه اني شفت مازن وكحلت عيوني بشوفته اسمع ها الخبر الشين الحين منو خالد هذا بعد يباني ومن وين طلع لي ورفعت ايدي لسماء ودعيت ربي يرحمني )
لمه رجع بو طارق من الدوام لاحظ ان ام طارق متضايقة وقالها بلاج مويمة شو فيج قالت له ما شئ بس انا فاتحت اليوم ثريا في موضوع الزواج ورفضت وانا بصراحة خايفة انها رافضة الزواج عشان ما تبي تخليني
بو طارق : ههه وعشان جي متضايقة؟؟ لا تضايقي ولا شئ وان كان على ثريا انا برمسها وبشوف هي ليش رافضة موضوع الزواج يمكن هي ما مقتنعة بخالد ؟
ام طارق : هي مب رافضة خالد هي رافضة الزواج وعشان جي انا خايفة
بو طارق : خلاص ما ابي اشوف الزعل في ويهج انا برمسها وبفهم منها كل شئ خلاص ارتحتي؟؟
ام طارق : فديتك
في بيت بو مازن
مازن : كنت يالس اصلح حنفية المطبخ بعد ما زجرتني الخدامة اشوفها ورن مبايلى طالعت منو كان المتصل بك خليل رفعت السماعة وقلت له هلا والله مرحبا خليل
خليل : هلا مازن هاه وينك ؟؟
مازن : في البيت
خليل : لو ما عندك مانع ومب مشغول بغيت اشوفك
مازن : نزين حياك تفضل عندي البيت
خليل : لا خلي زيارتي للبيت ليوم ثاني انا ابي ارمسك في موضوع وافضل يكون كلامنا خارج البيت لو فاضى اترياك في باركنات العين مول وعقب بنيلس في مكان هادي
مازن : افا عليك عطيني بس ساعة وبكون عندك
خليل : اترياك
مازن : ما انكر اني مستغرب من دخول خليل حياتي وشو الموضوع اللي يبيني فيه وعشان اقطع كل الاستفهامات طلعت غرفتي وسبحت ولبست كندورتي وسفرتي وتعطرت وظهرت وانا طالع من غرفتي كانت الريم تطلع هي بعد من غرفتها وشكل عيونها كانت موجه على غرفتي عشان جي عيوني يات في عيونها شو تتوقعون مني سويت؟؟ ههه ما شئ تجاهلتها لانها بصراحة قاهرتني واول مره ما احس بالذنب علي سويته ونزلت بدون حتى ما امسى عليها رغم اني اول اتحين الفرص اسلم او امسي عليها .
قيس : تلاقيت ما مازن على الدري لاني انا كنت في المطبخ بس ما اصلح الحنفية مثل ما كان يسوي مازن ههه كنت اطلب من الخدامة تسوي لي عصير اسخن قبل العشي ههه وعشان اتنشط بعد دراسة مملة ههه (لا تفهموني غلط انا شاطر وكل علامتي مرتفعة بس بصراحة لمه ادرس احس بملل يالله متي بخلص وبشتغل)
الريم : اسلوب مازن معاي غريب يعني معقوله ما حس بالذنب باللى سواه وعادي عنده صراحة اسلوبه يقهر انا لازم ارمسة (لكن ارمسة شو اقوله ؟) واللي قهرني بعد تجاهل قيس لي عشان جي قلت لا عاد وعشان جي زجرت على قيس
قيس : نعم ؟؟
الريم : خيبة شو بلاك حشا جي انا قدامك ليش ما تسلم
قيس : اخاف بعد انج مزكمة وله شئ وتعديني عشان جي
الريم : اسلوب قيس ضحكني وعرفت انه زعلان مني من هذاك اليوم عشان جي قربت صوبه وخليني اول مره في حياتي اتعامل معاه باسلوبه خذت كوب العصير من ايده وشربت منه وقلت له انت زعلان ؟(قلتها ببرود اعصاب)
قيس : وانا بعد ضحكت لان الريم تبي تقلدني بس ما تعرف ههه عشان جي خذت كوب العصير من ايدها اللي ما شربت منه غير شوي ههه رقيقة بنت خالي ههه وشربت العصير كله عشان ما تخذه من ايدي عقب رديت عليها وقلت لا مب زعلان متضايق بس منج
الريم : نزين اسفة
قيس : شوفي اسفج هذا لازم تكتبية على ورقاء بيضاء وتسلميها للسكرتيرا وانا اشوف في الاجتماع اللي بعقده ان كنت اسامحج وله ههه
الريم : لا عاد مصختها عشان جي كفخته بالكتاب اللي كان في ايدي على ظهره وقلت له عيل مب اسفة واقلب ويهك مب منك
قيس : فديت بنت خالي ويها صاير احمر وهي معصبة ههه خلاص تعالي تعالي سامحتج
الريم : لا والله ؟؟
في العين مول
في واحد من المطاعم الفاخرة فيه كان على طاوله بعيد يالس مازن وخليل يرمسون وشكل الموضوع اللي بينهم مهم وبصراحة اللي يطالعهم يحس ان الموضوع اللي يرمسون عنه حساس لكن في نهاية اليلسة هاي نش مازن وبتسم وسلم على خليل
مازن : ما ادري صراحة شو الاحساس اللي احسه الحين فرحان ومتضايق عشان جي حبيت اني اتمشى في المحلات ودخلت محل هوم سنتر وشتريت هدية وطلبت من البائع انه يغلفلى اياها (خيبة يا فضولكم مب قايل لكم شو من هدايا اشتريت ولا لمنو؟)
في بيت بو طارق
بعد العشى طلعت غرفة ثريا اللي ما نزلت تتعشى معانا ودقيت الباب ودخلت حصلت بنتي حبيبتي يالسة على شبريتها وشكل عيونها حمراء يعني كانت تبجي عشان جي لويت عليها وقلت لها ممكن ارمس معاج ؟
ثريا : نزلت راسي وطبعا بدون تردد قلت له تفضل الغالي
ابو طارق : فديتج ما فيه شئ يستاهل اني اشوف ها العيون الحلوه تبجي وان كان على الزواج لاحقة عليه وانا هنا الحين مب عشان اقنعج انا هنا عشان اعرف شو يدور في خاطر بنتي ؟
ثريا : سكت يعني شو اقول لابوي اني احب واحد ثاني ؟
ابو طارق : ثريا انتي رافضة خالد وله رافضة الزواج
ثريا : الاثنين
ابو طارق : اها فهمت خلاص حياتي لا تخافي لانه ما راح يصير غير اللي انتي تبي ويالله نزلي يلسي معانا وبعد ما كلمت ثريا عرفت ان بنتي فيه شئ في خاطرها وعرفت انها مب رافضة الزواج كزواج هي رافضة خالد وحسيت ان فيه مشاعر خفية في قلب بنتي لا تستغربوا انا انسان فاهم وعاقل وعارف ان بنتي انسانه لها مشاعرها واحاسيسها واكيد غصبا عنها ها الاحاسيس مالت لشخص معين واكيد اني بعرفة في يوم من الايام لاني اعرف بنتي زين واعرف اخلاقها
ثريا : نشيت وغسلت ويهي ونزلت ايلس مع ابوي وامي وغصبا عني ضحكت لسوالف اللي قالهم ابوي واللي كان متعمد انه يضحكني فيهم
بو طارق : وعشان اكمل فرحة بنتي قلت لام طارق شوفي يا ام طارق ردي على ام خالد وقولي لها ان ثريا مب موافقة
ام طارق : حسيت اني مقهوره لكن في النهاية هاي رغبة بنتي عشان جي ابتسمت له وقلت له تامر امر يا بوطارق
ثريا : الحين ما حسيت بفرح وبس حسيت اني بطير من الفرح وللحظة فكرت اني انش عنهم بس استحيت ويلست مجاملة لهم وعقب ما قدرت ايلس ونشيت وطلعت غرفتي وما اخبركم عاد شو سويت فوق مسكت المخدة ورقصت معاها ههه وحمدت ربي انه خلصني من البلوه اللي اسمه خالد
انتهي الجزء
رايكم ثريا بتكون لمازن ؟؟
والريم ومازن معقوله ما يصير بينهم شئ ؟؟
مزنه بتكون لمنو لحسين وله لخليل؟؟
والهدية في ظنكم مازن اشتراها لمنو؟؟