عروستنا ممكن تقرأي موضوعي قبل زواجك

السلام عليكم ورحمة الله وبركاته
بسم الله الرحمن الرحيم
عرايسنا الحلوات كيفكم؟؟؟............ كيف التجهيزات للزواج ..كوشه .. زفه....طقاقه.... معازيم ....الخ
الله يتمم على خير يهنيكم و يجعلها احلى ليلي العمر
انا كنت مثلكم قبل سنتين اكبر همي هالليله وتجهيزاتها لما افكر اقول كل ذاك التعب عشان 4 ساعات
وانتو اكيد كل همكم الحين هال4ساعات ولازم تكون برفكت
طيب وبعدين
ترا بتدخلين بيت مسكر بابه عليك انتي وزوجك وبس
حياة جديده عالم ثاني انتي المسؤول الاهم فيها وكل شي داخل بيتك تحت مسؤليتك ما تقدرين ترمين هالمسؤوليه على احد ابدا ابدا ابدا
هاه انتي قدها ولا تكنسلين
ههه امزح اكيد انتو قدها وقدود
انا مو جايه لقسمكم اخوفكم لا بالعكس
انا جايه ومعي خبرة بداية الزواج اللي ان شاء الله ناجحه
وحابه اجهزكم قد ما اقدر للواقع اللي بتشوفونه
لانكم بتكونون زوجات وامهات ومربيات اجيال
وياسفني كثير اللي حاصل مع بنات جيلي من سوء التصرفات اللي ممكن تكون سبب قي تدهور حياتها
طبعا ما انفي انه في ازواج للاسف سيئين بس هذا اللي ربي كتبه علينا
الجهاد
ايه نعم الله كتب علينا يالحريم الجهاد
كيف؟؟؟
جهاد المرأه في بيتها
ولك الاجر ان شاء الله في هذا الجهاد قال صلى الله عليه وسلم :
(
إذا صلت المرأة خمسها وصامت شهرها وحفظت فرجها ،
وأطاعت زوجها ، فلتدخل من أي أبواب الجنة شاءت ) !!!
الجنه ان شاء الله ماذا نتمنى اكثر من ذالك؟؟؟
في البدايه انصحكم وانصح نفسي
1- طاعة الله و بالمحافظه على الصلاه ومعاونة زوجك عليها قد ماتقدرين
2- المداومه عالاستغفار
3- المداومه على شكر الله (ولئن شكرتم لأزيدنكم)
4- قرآءة القران ولو عشر ايات باليوم
طبعا هالنصائح سمعتها من كم شخص مو مني شخصيا لاني والله مقصره بس ان شاء الله بداوم عليها لاني شفت النتيجه والكل يعرف انها مهمه
طيب الحين راح ابدى معكم من البدايه
وهي ليلة الدخله :
اول شي اكيد خايفين ويحق لكم
بس لا تخافون كل شي بيتسهل باذن الله
بس بعلمكم اللي عرفته ان اغلب الرجال نوعين
النوع الاول:
متفاهم واعي مثقف يقرا كثير عن هالليله وفهم طبيعة المراه
والنوع الثاني:
دقه قديمه على قولتهم
يعني داخل داخل اول ليلة فاستعدي يا عروسه وان شاء الله بتعدي هالليله على خير
ولا تشيلين في قلبك على زوجك وحبيبك انتي قمر وانتي حلاله وهذي متعته وهذي معرفته
فلا تحرمينه هالمتعه بكثرة العتاب والصياح والنياح
لا تنزعين الحيا
وبنفس الوقت لا تشدين على نفسك
كل الحريم مرو بهالشي وما صارلهم الا كل خير
اما النوع الثاني
الله يكثرهم ههه
بياخذ الامر معاه اكثر من ليله وان شاء الله بيكون متفهم لك وبتمر الامور بسلام
ونفس الشي ريحي اعصابك ولا تشدين وان شاء الله بتتسهل
بالنسبه لشهر العسل عندي نصيحه وحده
لا تزعلين على زوجك بهالايام الحلوه مهما كان يعني لا تمدين بوزك على أي شي
خليك في قمة حياءك وابتسامتك لا تفارقك وخذي أي موضوع بكل روح طيبه
لانها ايام ما تتعوض وحرام يصير فيها ذكريات شينه
حياتك بعد العسل
اذا رجعتي عش الزوجيه اساسيه
معاملة زوجك واهله بالحسنى مهمه جدا وزوجك هو الاهم
لا تعاملينه مثل اختك او اخوك
او صديقتك
لا
هو زوجك
واجبه عليك طاعته
والقيام بحقوقه
والابتسامه في وجهه
لا تحطين راسك براسه
وبنفس الوقت لا ياخذ حقوقك
ويستغلك وانتي ساكته
دافعي عن حقوقك باسلوب هادئ
لا ترفعين صوتك عليه
نقطه اخرى

• الحمل:

افضل شي انك ما تستعجلين بالحمل
3 شهور اتوقع فتره حلوه انك تعرفين زوجك فيها
وبنفس الوقت تستمتعين ببداية زواجك انتي وزوجك
موانع الحمل كثيره
بعد استشارتك لدكتورتك تقدرين تقررين افضل الموانع
الحبوب
اللصقات
او العد اذا كانت دورتك منتظمه
او المانع يكون من زوجك مثل
الواقي الذكري
العزل
استشيري دكتورتك وقرري افضل طريقه تناسبك

• النظافه :ما يحتاج اقولكم على نظافتك ونظافة البيت والروائح الطيبه
• الاكل:اهتمي بتحضير افضل الاكلات لزوجك

من الحين تعلمي القهوه العربيه
وكيف تسوين بعض المأكولات الخفيفه
اشتري كتاب نخبة الاطباق
معروف انه ينفع للمبتدئات

• نقطه مهمه وهي النوم:

لا تخلين النوم يسيطر على يومك
حاولي تنظمين نومك
مو يجي زوجك من الدوام وانتي نايمه
ترا الرجال ما يحبون المراه الكسوله ابدا
وكثرة النوم يجيب الكسل

• الكمبيوتر:

انتي داخله على رجال ما يعرف عنك شي
مو زينه بحقك من اول ما تتزوجون وانتي لاصقه بشاشة الكمبيوتر
ابتعدي عن الشات والمنتديات المختلطه قد ما تقدرين
حتى لو نيتك زينه
هذا باب للشيطان بزرع الشك في قلب زوجك
حاولي تكون قعدتك عالكمبيوتر للشي المهم فقط
((( الجنس )))
الان انتي متزوجه ومعك كل الحق بالاستمتاع بهذي الغريزه الفطريه انتي وزوجك
في بداية الزواج
لا تنزعين حياءك حتى تتعودون على بعض
وبنفس الوقت لا تبيني لزوجك عدم رغبتك
حاولي تتفاعلي معاه بس بكل حياء
وان شاء الله مع الوقت بتصيرين خبره بهالموضوع
بس في نقطه مهمه
بداية الزواج
يكون الرجل راغب اكثر وقادر اكثر
بحيث يكون الجنس شبه يومي
بعدها بفتره
يمل ويصير الجنس اقل تكرارا
بس هنا يجي دورك انتي
حاولي تغيرين وتبتكرين اشياء جديده والنت مليئ بهالأمور
كل يوم قبل النوم سواء كان فيه جنس او لا
رتبي الغرفه حطي شمعتين البسي لبس حلو تعطري بعطر مغري
لا تخلين ليله تمر الا وانتي مهيئه نفسك سواء صار شي او لا
لان الرجل عادة يرغب بالجنس كل يوم لكن نتيجة المؤثرات النفسيه والاجتماعيه تحبط الرغبه ومن ضمن المؤثرات الملل من شكل الزوجه والروتين في نفس عملية الجنس
عشان كذا هنا دورك كامرأه تغرينه باسلوب غير مباشر وتحيين هالرغبه حتى لا يبحث عن مصدر اغراء خارجي
وانا استغرب من بعض الزوجات لما يكون زوجها طبيعي وما فيه اي مرض عضوي او نفسي انهاتفكر ان مره واحده بالاسبوع امر طبيعي
لا مين قال
الاحصائيات تقول اغلب الرجال من سن 18 الى 50 يفكر بالجنس كل 5 دقائق
معقوله الزوج ما يرغب الا مره وحده بالاسبوع؟؟؟!!
انتي ما هيئتي له المغريات اللي تشجعه عشان كذا ممكن يدورون عليها برا
وان شاء الله حياتكم كلها حب وموده
كيف تتجنبين مشكلة سهر الازواج خارج البيت
للاسف اغلب رجالنا يحبون يسهرون مع اصحابهم للفجر وبالتالي الزوجه تقعد وحيده بالبيت وتشتكي من الملل
طيب لو فكرنا بالسبب لخروج الزوج هذه الساعات الطويله خارج البيت نعرف انه يحصل متعه مع اصحابه ووناسه اما بالبيت غالبا بعد ساعه بالكثير يتسلل الطفش للزوجين
وهنا ايضا دورك يا حلوه
اخلقي جو حلو بالبيت يشد زوجك للجلسه فيه
اكتشفي الاشياء اللي يحبهامثل اذا هو راعي كوره
قبل ما يصحى من النوم حطي قناة الرياضه اللي يحبها
وجهزي شاهي وماكولات خفيفه وعطري البيت ونظفيه
حتى اذا صحى وشاف هالجو راح ينشد للجلوس معك
وانتبهي من كثرة الجلوس معه
اعطيه مساحه
روحي اقراي مجله بعيد عنه شوي
خلصي شغل البيت
الخ
وطبقي هالشي عالافلام جهزي فلم يحبه او شاركيه بالاهتمام بالاخبار المحليه والدوليه
اساليه اساله تدل على ذكاء وبنفس الوقت تخليه يتفلسف عليك لان الرجل يحب يبين انه اذكى وافهم
كيف تتجنبين الروتين
ايضا مشكله تعاني منها بعض الزوجات الحديثات
لكن ممكن تسيطرين عليه انتي كزوجه
وذلك بتغير مظهرك
الطلعا والتمشيات
بس ابعدو عن الاسواق اللي تكثر فيها قلة الحيا
ممكن العاب البلاي ستايشن العاب الزوجيه
وغيرها كثير من الامور وكل وحده وذكائها وافكارها
اتمنى تتقبلون موضوعي بصدر رحب
ومن قلبي اتمنى انه يفيدكم
واذا اعجبكم كملت الباقي
بس لا تخافون بعدل على الاساسي ما راح اضيعكم بالصفحات
دعواتي لكم بالتوفيق والحياة السعيده الهنيئه المليئه بطاعة الله
اختكم
بحر الحلا