عشان عروساتنا مايطيحون في نفس غلطاتنا دعوه للنقاش

1. المهم :


2. وش بعد وش بعد يافتو

السلام عليكم ورحمة الله بركاته
الف الف الف الف الف مليون مبروك لعروساتنا
وجعل الله حياتكم الجديده حياة كلها افراح وسعادة وهناء انتي وزوجك يارب
وعقبال كل البنوتا ات ان شاء الله بالي يسعدهم ويحبهم ويهنيهم يارب
بصراحه هذا الموضوع لوحده اعرفها واموت فيها اسمها فتو ....وهي طبعا متزوجه ..وحابه تفيدكم من تجاربها الخاصه ....وراح اكتب كل شي تقوله ...بس ابغا تشجيع ..واي وحده عنده اي معلومه اتمنى تفيدنا ..
ومره ثانيه اوعدكم اني اكتب كل شي ..
وانا بخلي الموضوع كانها هي اللي تتكلم اوكي ...انا مهمتي اني اوصلكم كل شي تقوله ..
اخليكم معاها ..
بصراحه انا حابه افيدكم من تجربتي الخاصه عن اكثر الأخطاء اللي سويتها او اكثر الملاحظات اللي صارت علي علشان تستفيدون ويكون عندكم فكره

المهم :

بدايه التجهيز وماأدراك مالتجهيز حوسه للراس قسم بالله اني ليوم الزواج مرسله بنت خالتي تشتري لي شي من سوق من الحوسه بس
بالنسبه للمكياجات لا تصيرون مثلي ترى انا مره ندمانه الان على الاشياء اللي شريتها كل المكياجات اللي شريتها ماركه قسم بالله راح ربع المهر على مكياج فقط طبعا قمه الدلاخه والسباهه فانصحكم يابنات مو لازم ماركات كلها مثلا عشان الايام العاديه وعشان مايشوفك ابو الشباب:
إلا وانت في احلى طله طبعا طله طبيعيه عندك ميك اب ميبي لين اللي على شكل موس مره مره مره حلو ويعطي شكل طبيعي وطبعا سعره مره ممتاز تقريبا 50 وحجمه صغير ممكن ينحط في شنطه اليد احتياط في الخرجات
مكياج السهرات عادي اشتري ماركه جربي جريلان او شانيل بس اذا حابه تسمعين نصيحه انا اشوف ديرما كول تغطيه مره مره ممتازه وطبيعيه
حلو يصير عندك لونين اساس واحد على برونز وواحد اللي يناسبك عشان التغيير في الطله
البلاشرات والله انا اشوف بلاشرات برجواز مره مره حلوه خذي لك الوان حلوه 3 او 4 الوان بالكثير يعني مشمشي وزهر ودرجه برونز وبس ترى اللي على احمر وبني وفوشي مره ماهي حلوه ومتصنعه وحنا نبي شي شوي طبيعي وبعدين ترى ذا الالوان الرجاجيل مهنا زود عليها ومن تجربه
المسكارا ماكس فاكتور مره مره حلوه وجربي هلينيا روبنشتاين بعد حلوه للسهرات ونصيحه خذي الشفافه من بودي شوف لمظهر طبيعي عند زوج المستقبل واشتري رموش تركيب من الصيدليه ترا مره حلوه للسهرات بس تتدربي على وضعها زين === غلطت ولاشريتها مالت علي
كثري من القلوزات تراها حلوه كمظهر طبيعي وسهره بعد ونصيحه بعد ترى والله مهوب لازم ماركه لان عند البودي شوب وستي بلازا قلوزات جنان وانا من تجربه لقيتها احلى من اي ماركه بصراحه قسم باله
الشدوهات عندك لوح الشدو اللي يصير فيه كذا لون في مطفي وبلمعه بعد ومايكلف علبتين تقريبا ب100 ريال ولا تضيع فلوسك على شدوهات ماركه وهي نفس الشي
كثري من البودرات المعطره والشور جل وخلي استخدامك من العطور في اوقات معينه لان البودرات المعطره تعطيك ريحه مره حلوه ولاهي قويه تزكم بالخشم جربي بودرة الجسم من زهور الريف بريحه الشاي الاخضر وخذي عطرها بعد وجربي بودرة دهن العود من اجمل بعد مره حلوه وعاد يكثر البودرات اللي ريحتها حلوه
عطورك نصيحه خليها دائما الحجم الصغير مهوب بخل لا بس عشان يناسب حجم الشنطه وترا مصيرك تشترين وقريب بعد يعني بتشترين بعد الزواج بتشترين
اشتري فواحات وشموع وشمعدنات هالحركات ترى إذا راح جهازك للبيت وشافها زوجك قال وشذا الرومنسيه :llove
في مكياج شفته مره في صيدليه مستشفى دله يوم اني حامل الصيدليه اللي برا هالمكياج مايروح إلا بمزيل معه حلو للسيقان واليدين يعطيها لون واحد إذا لبستي قصير ولا شورت وكان عندك كم لون مالهم داعي ولا فيه تناسق تسوي تناسق للون ======== طبعا راحت على ولا شريتها يوم اني عروس مادريت عنها على فكره وللامانه انا ماجربتها بس قالت لي اللي في الصيدليه انها حلوه روحوا شوفوا عاد
خذي احتياطك في الفوط الصحيه نصيحه لله ترى قسم بالله يوم جتني الدوره في شهر العسل طاح وجهي قلت لابو الشباب تكفى ابي الصيدليه قام عاد وقعد يتليكع ليش وش عندك قولي لي واشتريه لك انا زوجك عيب عليك وعليها لين كتبتها له في ورقه وحلفته مايقراها الا في السياره من الفشيله قسم بالله كنت خبله
الملابس الداخليه طبعا احلى شي تكون فخمه واطقم يعني شغل قص ولزق ماله داعي خلي كل ملابس الداخليه اطقم ترا احلى واكشخ وفي ترى عند نعومي شي لصف وترتيب الملابس الدخليه يجي قطعه قماش ستان من ظهره وبلاستك شفاف في الوجه وبسحابات مقسم لكذا قسم لترتيب ملابس الداخليه وممكن تعليقه في الدولاب بصراحه مره مره حلو
اذا جتك الهدايا لا تفتحينها إلا معه في بيتك الجديد ترا حركه حلوه بصراحه انا ماسويتها بس وحده من زميلاتنا سوتها رتبت طاوله وحطت شموع وكم حركه وجمعت الهدايا بكروتها وفتحتها معه
حركه حلوه كمان انك تجيبين لزوج المستقبل هديه حلوه مغلفه بطريقه حلوه === عاد برضه هاذي راحت علي

وش بعد وش بعد يافتو

ايه في عند محل ابو ريالين اللي في البديعه بودره بعشره ريال بودره سائبه فيها لمعه مب طبيعيه مره حلوه ورخيصه عشان تلمعين جسمك للبستي قميص نوم ولافستان سهره هاذي جابتها لي وحده قسم بالله ماتقولين من ابو ريالين يعني اشتري خمس ولا ست علب وحطيها في علبه فاضيه شكلها حلو تصير والله كانها بودره ماركه خاصه احنا بنستخدمها للجسم بس فمامنها مضره ان شاء الله ولا اقولكم اشتروا بودره جونسون وحطو عليها شوي ملمع اللي ينباع عند محلات المكياج الناعم وخليه في علبه ومتى مابغيتي استخدميه لأنك بصراحه بتستخدمين هالحراكات واجد عزايم على لبس بيت يعني خابرين عاد انتم
ايه بصراحه انا بعد غلطت في شي كثرت ملابس الخرجات على ملابس البيت وبصراحه ملابس البيت اهم لأنها هي الشي اللي بيشوفه زوجك عليك يعني مهوب كل شي قمصان ننوم لا في ملابس تلبسينها في الضحى في العصر في المغرب قبل الطلعات فكثري منها وترا عند ستي بلازا حركات حلوه
كثري من الاكسوارات الناعمه الاستراسات على سلاسل البطن على الخلاخيل اللي في الرجول ترى هاذي اشياء تلفت النظر بالنسبه للرجال مو لازم اكسسورات فخمه وعقود واساور لا وترى اكسوراتك وانتي بنت ترا حلوه بعد تاخذينها معك مهوب لازم كلش جديد خذوها نصيحه
وش بعد وش بعد يافتو ام م
بصراحه في حاجه بعد ماسويتها بنات ترى شيل الوجه والجسم بالليزر اريح واحسن وانعم وافضل وهذا من تجربه زميلتي تقول خلاص مرتاحه كلها جلستين وارتحت مره
بعد نصيحه إذا زواجك قبل شهر سوي حمام مغربي كل اسبوع مره وقبل الزواج بيوم شيلي جسمك كله لأن الحمام المغربي مره مره مره حلو ينعم ويفتح ويشد مهم عاد هذا الحمام مره مهم
الجزم لا تكثرون منها يابنات لأنها بتقعد على قلبك والله شوفي مليت دولاب الجزم اكرمك الله وهالحين وديتها للمبره قسم في شي مالبسته بس شفاحه شريتهم ...
بعد شي مهم قد قالت عنه الاخت الله يسعدها وهي كانت صادقه فيه لا تجيبين الجهده في التمكيج لانك بعد كم شهر خلاص بتملين يعني خليك نعومه حكل على ماسكرا وقلوز زهر ترى هاذا اللي يحبونه وحافظي على بشرتك وتغذيتها وتنظيفها والعنايه بها وبشره جسمك بعد والتزين خليه في اوقات معينه يعني في البيت على خفيف في الوقت الخاص دعجي العيون أذا طلعتي تتعشين تزيني عشان مايبقق عيونه في البنات
الزبده في هالموضوع لا تجرين ورا الماركات في كل شي زي ترا والله في اشياء مره حلوه مره حلوه ولاهيب ماركه والفلوس اللي تزيد عندك وفريها اكثر في الاهتمام بصحه بشرتك بعمل كورسات لها في مراكز متخصصه عشان تطلع احلى ى بشره ولا خليها للمراكز اللي عندهم عمل اقنعه الطحالب للجسم كله ونظام تنعيم الجسم وشده بالاجهزه لأن هذا الأهم وهاذي نصيحه ..
بنات نصيحه ثانيه ترا الآي لينر مني خذيها نصيحه مافي زي لانكوم ريشه مره حلو وخذي لك واحد قلم من ريميل حلو بعد ليش القلم ؟؟ من تجربتي الشخصيه لقيت القلم اسهل في التحكم لرسمات العيون زي التايجر والفراشه افضل كثي ير من الريشه
بنات انا ماجربته بس الكثير يمدحون كحل من ماك اسمه كربون يجي بودره الظاهر وريشه رفيعه
بعد نصيحه للي بيسافرون لشهر العسل في مناطق سياحيه لا تنسين النظارات الشمسيه وحتى اللي بتروح لو الشرقيه ولا دبي ولا مكه والطايف او جده يعني كذا سوي حركات دلع كأنك راعيه نظارات شميسه طبعا اذا قعدتوا في قعده على البحر او حديقه انتي وهو طلع النظاره واكشخي تراها حركه رهيبه ونصيحه بعد مهوب لازم ماراكه تراهم مايدرون وش الماركات خذي كذا كم وحده الوانها حلوه على زهر وحده غامقه الالوان اللي تجي كذا حلوه على اللبس وتعكس على البشره حلو ترى فيه عند مانجو نظارات مره حلوه
بعد نصيحه القمصان القصيره في اول يوم ترا مالها داعي لأنها بتعطي فكره ثا انيه مره مره هاذي وحده تقول انا اساسا ملبست قصير بس لبست شفاف الاخ حسب ان على بالي شي ثاني وبعد مرور فتره صرح لها وقال ترى احسب ان في بالك شي ثاني عشان كذا صار اللي صار
======= رابطه الروب ونايمه فيه من الدلاخه ولا في احد ينام بالروب ؟؟؟؟؟؟
عاد هذا اللي عندي وافكر وش في شي غلطت بعد فيه واقولكم ثاني مره بس ودي بتفاعل إذا شفت تفاعل صدقوني بتحمس واجيب تجارب ناس ثانيين وياليت المتزوجات بعد يدخلون ويفيدون عرووساتنا الحلوات وبالتوفيق للجميع
اذا ما لقيت تشجيع ماراح اكمل ..
سلام ..