عشق مات قبل ان يولد

جيت يسبقني ظلام الشارع اللي تسكنينه=قلت افاجئ غايتي واضمّها واكسب رضاها
انتظرتك تحت شبّاكك لعلّك تفتحينه=وانكشف نور الصباح ولاروت عيني ضماها
شفت بابك من غيابك تشتكيلي قفلتينه=والبيوت اللي ملاها الحزن وش علمه ملاها
عانك الله يالمشاعر والفؤاد الله يعينه=سافرت نبض الغرام وخلّت حطامي وراها
سافرت كل الغلا زهر الرياض وياسمينه=واحرقت كل القلوب اللي تغذّى من شذاها
هالني ذاك السكوت اللي حملني في يدينه=واخنقتني عبرةٍ قشرا وسرّاني عناها
انكسر خاطر فؤادي والعيون امست سجينه=للدموع وكلّ دمعٍ هلّته عيني فداها
قمت انادي مثل طفلٍ ضاع يبغى والدينه=ضاقت اسوار البيوت وضاق بالدنيا فضاها
رحت ازايم حسرتي والقلب يوجعني ونينه=صرت بالدنيا وحيد وصاحبت روحي شقاها
كلّ لحظات الزمن عندي تشابه مع سنينه=والشفاه اللي تبي الفرحة كساها ماكساها
والشقا وجهه عبوس وقام يرفع حاجبينه=للّيالي..والسعادة طول عمري في حراها
سافر الحزن وتمادى واتّخذ قلبي سفينه=والغياب امواج بحر وسبّة الرحلة هواها
احضنه طيفك واضمّه والمسه وامسح جبينه=واسأله ياطيف ويش اللي على بعدي حداها
بشّروا جده واهل جده ومكة والمدينه=جتهم اللي ماذبحني فالحياة الاّ غلاها
جتهم احلام القلوب ودرّة العمر الثمينه=جتهم اللي كلّ شيٍ يسكن احلامي معاها
اكتأب وجه الرياض اللي من غيابك حزينه=صابها لون السواد وخيّل الحزن بسماها
ارجعي واخذي حياتي واخذي اللي تاخذينه=يكفي انواع العذاب النفس جاها ماكفاها
ارجعي لعيون بندر طالبك لاتذبحينه=قبل تنهيه الهموم اللي لحق نفسي مداها
اتركي ذيك الديار وبحر جده والمدينه=وارجعي لاجل الرياض اللي طغا الحزن بسماها