غارقات في دوامة الحب

الج الثاني زء
بعد نص ساعة ....
ندى : نوف متى بتروحين للبيت ...
نوف : والله مدري انت بتروحين متى ..؟
ندى : انا قايلة لفهد يجيني بعد ساعتين والحين الساعة ( رفعت ايدها تشوف الساعة ) عشر الا ربع .. بس هو قايلي اتصل عليه .... معك جوالك ؟!
نوف : ايه ...ليش جوالك ما جبتيه ؟
ندى : لا والله نسيته من العجلة ... ممكن شوي جوالك ؟
نوف : اييه اكيد .... تفضلي ..( وعطتها الجوال ) ...
دقت ندى على رقم اخوها فهد ......
في هذا الوقت كان فهد جالس في وحدة من المقاهي مع أحمد وعبدالله ...
كان جالس وفي يده كاس عصير ... وحاط رجل على رجل .. كان يسمع لسالفه لأحمد ..
رن تلفونه .. فرد ...
فهد : الو..
ندى : الو ...هلا فهد ...شخبارك ؟
فهد : هلا هلا ندى ... الحمد لله .. وش عندك ؟
ندى : وش عندي يعني ابيك تجيبني من الجامعة ...
فهد : طيب تكلمي بأدب ... لاهون الحين .. ( وابتسم للي بجنبه )
ندى : يوه عاد فهد ....انا وش قلت الحين ...
فهد بسخرية : تنافخين ..
ندى بدت تتنرفز : والله مب قصدي فهد انافخ ...
فهد : طيب قولي " لو سمحت يافهد تعال خذني " ...... بكل أدب ....
ندى : فهد عاد خلاص ... كفايه ....ذليتني
فهد باصرار وهو مغمض عيونه : قولي ....
التفتت ندى لنوف وقالت لها : شفتي كيف !!! .... اللي يطلب منه شي لازم ينذل ...
ابتسمت نوف على شكلها المنقهر...ورجعت ندى السماعة لأذنها ..
فهد : من تكلمين ....
ندى : وحدة من البنات ...
فهد : طيب ترا اشغلتيني بتقولين والا اسكر .....
ندى وهي تسحب نفس من القهر : .......................
فهد : بتقولين ؟!!!!
ندى بأسلوب تتصنع الأدب : لو سمحت يافهد .........تعال خذني ..
فهد : اييه كذا انا ابيك دايما .... خلاص انا جاي ثلث ساعة بس ... (وسكر الخط) وهو يضحك ويلتفت لأحمد اللي كان بجنبه .....
احمد : حرام عليك ياخي ..... ذليتها صدق ...
فهد : ههه .... بس تستانس عليها ... يالله انا رايح ..
احمد : انا بعد رايح معك .... بجيب نوف من الجامعة ...
وراحوا كل واحد ركب سيارته ...
ندى اللي كانت متنرفزه حدها من اخوها ... شلون يسكر الخط بوجهها ...لا ولا حتى كلمة مع السلامة .....هين يافهيد ...انا اوريك ..... انا اوريك ... أوف
كانت واقفة عند بوابة الجامعة .. جتها نوف وكانت لابسة عبايتها هي بعد ...
ندى : هاه نوف .... بتطلعين انت بعد .؟
نوف : ايه ... يوم قمتي انت دق علي احمد على طول وقال انه جاي ..
ندى انتفضت من سمعت اسم احمد ... ومسكت يد نوف وقالت ...
ندى : اخوك احمد جاي ؟!!
نوف : ايه جاي .... محد بياخذني من الجامعة غيره ... تعرفين امي ماترضى اروح واجي مع السواق لحالي ..... بس ليش السؤال ...؟!!!
ندى : لا ولا شي .....
دقيقتين بعدين لمحت نوف سيارة اخوها ...
نوف : شوفي شوفي هذا اخوي داخل ...
ندى التفتت بسرعة ...كانت عيونها تدور احمد اللي ما شافته طول الاجازة اللي راحت..يعني ثلاث شهور ..او يمكن أكثر بعد ... كانت مشتاقتله موت .... مشتاقة لسواليفه ولضحكه ولزياراته لبيتهم اللي انقطع عنها فجأة ....
نوف : ما جا لحاله .... فهد اخوك وراه بالسيارة ...
ندى ماسمعت كلام نوف وظلت عيونها متعلقة بأحمد اللي كان يقرب بسيارته ، وبملامحه اللي كانت تذوب قلبها ... لحظات و حست بيد تهزها التفتت لقتها نوف ........
نوف : وش فيك ندى يالله خلينا نروح ....
ندى استغربت : ايه بس فهد ما بعد جا !!!!
نوف : وش فيك ندى ؟!!.... شوفي سيارته ورا سيارة احمد اخوي ...
التفتت ندى مرة ثانية لجهة سيارته كأنها مب مصدقة ..... ويوم تأكدت : ايه صدق يالله ...خلينا نروح ...
وقف فهد سيارته جنب سيارة احمد بحيث صار باب كرسي ندى على جهة باب احمد ........
وصلوا نوف وندى للسيارات وكل وحده توجهت لسيارتها .... قبل ما تفتح ندى الباب .. سمعت صوت وراها يقول : شخبارك ندى ؟...
انتفظت ندى من سمعت الصوت .... التفتت لقته احمد فاتح دريشته ولابس نظارته الشمسية ومبتسم ......
**( احمد ... 23 سنة ... ولد خالة فهد وندى ... يعتبر صديق لفهد .. خلص الدراسة الجامعية والتحق بمعهد يدرس فيه دبلوم حاسب ... شخصه يختلف تمام الاختلاف عن شخص فهد ... لذلك يصلحون مع بعض ، شخصية احمد جذابة جداً ....)**
*(* وفي اشياء بتتعرفون عليها ... لاني مارح انتهي لوتكلمت في هالسطور *)*
ندى مرتبكة : هلا ..هلا أحمد ... انا الحمد لله ...انت ..ش ...شخبارك ؟
احمد : انا الحمد لله بخير .. شخبار الجامعة اليوم ؟
ندى : والله مافي اخبار ... ( وضحكت ضحكة ناعمة خجولة ) ....
زادت ابتسامة احمد وتحولت لضحكة : سؤالي غبي صح ؟..
ندى زاد ارتباكها : لا من قال ... ؟؟!!
احمد : محد .. انا اقول ..... المهم اركبي السيارة لا تذوبين علينا من هالشمس ...وسلمي على خالتي والوالد ....
ابتسمت ندى : يوصل ان شالله ... (وفتحت الباب وركبت)...
فهد : ساعة عشان تركبين ..؟
ندى : وش اسوي .. ولد خالتك يسلم .. يعني ما اسلم عليه انا بعد ...
سكت فهد وابتسم ومشى بسيارته للبيت .... اما ندى فكان قلبها يدق بقووة ...من زمان ما شفته ولا سمعت صوته .... !!!!
وصلت ندى البيت وهي هلكانه ... نزلت هي وفهد ودخلوا البيت .... كانت ام فهد جالسه
مثل كل صباح في الصاله تتقهوى ....
ام فهد : هلا والله بولدي وبنيتي .....
جت ندى حبت راس امها وبعدها فهد .....
ندى حطت يدها على خصرها : ياسلام يمه ...وش معنى ترحبين بفهد اول ؟!! ...دايما دايما هو الاول ....
فهد وهو يقعد على الكنب ويحط رجل على رجل : انا الكبير يعني انا الأول ....
ندى : حتى لو الكبير ...
ام فهد : ولا تزعلين تعالي ... (ومسكت ايدها وسحبتها)
جلست ندى جنب امها ... مادرت الا امها حاظنتها وهي تقول ..: هذا انتي يابنتي تقدرين تسوين شي هو ما يقدر يسويه ...
رفعت ندى نظرها لفهد اللي كان قاعد يناظرهم بدهشة .... وطلعت له لسانها عشان تقهره ...
فهد : يمه .... تبين تقهريني يعني ....
ام فهد : وش اسويبك يافهد .... انت دايما تقهرها وتطلع الشيب في راسها ... خلك تحس في اختك شوي .....
حست ندى في هاللحظة انها غالية اكثر واكثر عند امها .... (( اكيد غالية .... انا بنتها مثل ما فهد ولدها )) ...........
قامت ندى من حظن امها وحبت راسها مرة ثانية وجلست على الكنب ......
وقعدوا يسولفون شوي ...... في اثناء السوالف ..
ام فهد : هاه يمه فهد شخبار الجامعة اليوم ....؟
فهد : الحمد لله يمه ماشي الحال ... ما سوينا شي غير الجداول واخذناها ..
ام فهد : ايه عاد ياولدي اجتهد ..ابيك تاخذ شهادة وتشتغل ...وافرح فيك ....
في هاللحظة ندى اطلقت ظحكة عالية ... التفتوا لها كلهم مستغربين .. وش فيها هذي .. ما قلنا شي يضحك ...
ام فهد : خير نديو .... وش اللي يضحك ...
مر في خيال ندى صورة فهد متزوج ... عشان كذا ضحكت ... لان اخوها تحس انه مب راعي زواج وراعي مسؤليات ... كل همه وناسته ... عمر فهد ماحكى عن الزواج وعن الارتباط .. وعمره ماحكى عن احلامه بأنه يكون بيت ويربي عيال ... وبنفس الوقت كانت ترحم زوجته المستقبلية المجهولة اللي بتدخل لقفصه الذهبي ...!!!
ندى وهي تأشر على فهد وتكمل ضحكها : ههه..... هذا ...ههه..هذا يتزوج ؟!
عصبت عليها امها وفهد يطالعها مستغرب ..
ام فهد : نديو اعقلي ...هذا اخوك .... ليش ما يتزوج وش اللي ناقصه يعني ..؟!!
ماردت وكملت ضحكها ..........
ام فهد شافت ان بنتها مصختها قامت ومدت يدها وقبصت فخذها .....
ندى :آآآآآآآآآآآآآآآي .......والله .. .والله بتوب ....بتوب ..والله ..
ام فهد : دواك .. تستاهلين ....
ندى وهي تحك فخذها : آآآآآآآآآح ...... يمه لا تقبصيني ترا قبصك مرة يعور ....
فهد : ساد .... لازم احد يأدبك انت وخبالك ...
ندى تكلم امها بدلع : يمه .... شوفيه ....!!!
ام فهد : اخوك صادق ...
ندى برطمت .. وفهد ظحك عليها ظحكة سخرية ..... تنرفزت وقامت ...
ندى : انا رايحة انوم ...
ام فهد : والغدا؟!!
ندى : يالله الغدا بعد 3 ساعات ....لين حطيتوه قوموني .....
ام فهد : ان شالله ...
فهد : وانا بعد يمه بريح لي شوي ...
ام فهد : يالله ...انا بعد وش يقعدني بنوم لي ساعة ...
قاموا وكل واحد راح لغرفته .....
*** *** ***
الساعة 2:30 الظهر ....صحت ندى من النوم ... وهي تحس راسها بينفجر .... قامت متثاقلة ودخلت الحمام توضت وصلت .. وطلعت من غرفتها ...
وهي نازله جالسه تفكر ... ((غريبة امي بالعادة تصحيني للصلاة ... بس اليوم ما قومتني .... موعادتها تنسى ....))
وصلت تحت شافتهم توهم جالسين على طاولة الأكل ....
ندى : مسا الخير ...
ابو فهد : هلا هلا ببنتي هلا والله تعالي ...
**( ابو فهد " عبدالرحمن" .... 48 سنة ...مثال للأب الحنون الصادق ... مثال للرجل الكفؤ ... شخصية حكيمة جدا اجتماعية ومحب لكل من حوله ... يعرف ربه ... ولا يبخل على ابنائه بشئ مهما كان سواء ماديا او معنويا او دينيا ..... حالته المادية قوية .. وعلاقته مع عايلته رائعة .. )**
قربت ندى وحبت راس ابوها ..
ابوفهد : شخبارك حبيبتي ؟
ندى : الحمد لله انا بخير انت شخبارك يبه ...ما شفتك اليوم ...
ابو فهد : انا الحمد لله ...كان عندي شغل واضطريت اني اطلع مبكر ... (التفت لفهد اللي كان جالس جنبه ).. فهد قم خل اختك تجلس مكانك جنبي ..
فهد شاف ندى بنظرة : ليش يبه يعني انت ما تبيني ...
ابو فهد : اللي يشوفك الحين يقول انك ما قعدت معي .. لك ساعة قاعد معي...قم عن اختك
خلها تقعد .....
قام فهد وهو يشوف اخته بنظرات تهديد .. وهي تبتسم له ابتسامة انتصار ... ابوها الوحيد اللي دايما يوقف بصفها ضد اخوها فهد المغتر....
جلست ندى وجت الام شايله معها صينية السلطة ....
ام فهد : هاه يمه ندى ...قمتي ؟!!
ندى : اييه يمه ...ليش ما قومتيني .. نمت كثير..
ام فهد : والله اني نسيت ياندى ...
ندى : حصل خير يمه ...
جلست الام وبدوا غداهم ..... طول الوقت كان الابو ساكت وشارد الذهن ... ومبين الحزن على وجهه... وكأنه شايل هموم الدنيا كلها فوق راسه ... كل هذا لاحظته ندى في ابوها ....
غريبة!! !!....
العاده ابوي على كل غدا يتكلم ويسولف ويفرفش معنا ...لكنه اليوم باين انه مستهم وضايق صدره .... وامي نفس الشي ..
ساكته .... وش صاير ؟؟؟؟!!!!!!!!
بعد الغدا راح ابوفهد يرتاح له ساعة وام فهد لحقته بعد ما طلب من ندى وفهد ونايف ومنى يكونون موجودين المغرب على اساس موضوع مهم بيكلمهم فيه ......
في الصالة بعد صلاة المغرب كان فهد جالس يناظر التلفزيون .. جت ندى وجلست معه
ندى بقلق : فهد ....
التفت فهد لندى بدون ما يرد
ندى : شفيه ابوي مب على بعضه اليوم ...
فهد : حتى انتي لاحظتي ؟!!
ندى باستغراب : ما يحتاج دقة ملاحظة.....ابوي يخلي اللي ما يشتهي الغدا يشتهيه غصب ... بس اليوم غيير مرة ...انا نفسي ما عرفت اتغدى من حالته ....
سكت فهد شوي بعدين قال : والله مدري.....
ندى : حتى صلاة المغرب ما طلع يصليها ... وامي بعد ما طلعت من ساعة الغدا.. وش فيهم ؟!
سكت فهد وما رد وكانه باين انه سرحان مرة وفي تفكير عميق
فجأة دق جواله ... طلعه من جيبه وشاف الرقم بعدين رد ......
فهد : الو...
ندى كانت محتارة صدق .... وكانت تفكر ...لكن نبهها صوت اخوها
فهد : هلا والله وغلا .... هلا ...عاش من سمع صوتك ..
ندى استغربت ...من قاعد يكلم فهد ... وش هالطريقة اللي قاعد يتكلم فيها !!!.....
لكنها انتبهت لأخوها اللي قام وطلع برا الصالة للحوش...
ندى رجعت لأفكارها اللي بدت تتزاحم في ذهنها... أفكار تجيبها وتوديها ..
في هاللحظة سمعت صوت باب غرفة يتسكر ... شوي وشافت ابوها نازل ويا امها ..
ابتسمت يوم شافته جاي مبتسم ...
ابو فهد : هلا ندودة ...
ندى : هلا يبه ..
ابو فهد : وين خوانك اجل؟!!
ندى : فهد برا يكلم تلفون .. ونايف ومنى يلعبون بلايستيشن فوق ...
ام فهد : وعمر اخوك ؟!
ندى : عمر نايم يمه ...
ابو فهد : روحي ناديهم ندودة ...
ندى : ان شالله ....
رقت ندى ونزلت مع نايف ومنى اللي متحمسين لهالاجتماع اللي اول مرة يصير في بيتهم .. اما ندى فكانت تحس بقلبها تتسارع نبضاته ... ما تدري ليش ؟!!......
**( نايف ... عمره 12 سنة ... ولد عنيد وياخذ حقه بلسانه )**
**( منى ... 11 سنة ... بنت هادية جدا ... ومؤدبة وحساسة )**
جلسوا كلهم كل واحد ساكت ..... شوي ودخل فهد ... وجلس معهم ....
بعد سكوت دام حوالي 3 دقايق ندى كانت تحس بالخوف اكثر واكثر .... ابوي ساكت ومبين الحزن على وجهه .... ليش وش صاير ..!!!!!!!؟؟؟
كل ثانية تمر تحس ان الموضوع كبير .. وصمت ابوها الطويل زاد خوفها خوف ...
لكن ابوفهد في النهايه قدر يتكلم وقال......: في شي يا عيالي انتوا ماتعرفونه .........
... * وسكت * ...
ندى خوفها زاد اكثر واكثر التفتت لخوانها منى ونايف ...كان مبين الاهتمام على وجوههم لكن
مافي خوف ...... لفت وجهها لفهد اللي مابين على وجهه أي اثر... لا لخوف ولا قلق يمكن اهتمام ....
كمل ابو فهد : الشي اللي ما تعرفونه هو ان عندكم ..... عندكم عم ....
شهقت ندى وبققت عيونها ..... الكل التفت لها ..... تمت حاطه يدها على فمها وعيونها مافارقت أبوها ......
ندى بهمس : عم ....!!!!!!
هز ابوها راسه بالايجاب ...وكمل ....
ابو فهد : انا نفسي الله لا يعاقبني نسيت ان عندي اخو ..... نسيته ...ولا عرفت اخباره من 18 سنة ......
وبدت دموع ابو فهد تنزل .... كانت فيه العبرة قبل لا يبدى لكنه من فتح الموضوع ماقدر يمسك نفسه ..
ندى مصدومة : و........ والسبب ؟!!
مسح ابو فهد دموعه وكمل كلامه : ابوي الله يرحمه ....قاطعه .. وخلاني اقطعه وياه ...
كنت ابي ارفض ..اخوي ماقدر استغني عنه ... لكني خفت ابوي يغضب علي مثل ما غضب على اخوي صالح ......
خوف ندى وتفاجئها بنفس الوقت خلى دمعتها تترقرق من عيونها وتسيل برقة على خدها ..... عندي عم واسمه صالح بعد .... الله ... عمي .. ..صالح....
كمل ابوفهد كلامه : اكيد بتسألون عن سبب قطاعته .... طبعا انتوا اكيد تعرفون اني انا مدير الشركة اللي اشتغل فيها الحين وان هالشركة كانت لجدكم الله يرحمه وصارت من مسؤليتي بعد وفاته ......
هزووا عياله روسهم بالايجاب......
ابو فهد : قبل 18 سنة صارت سرقة في هالشركة .... وكل الامور كانت تشير ان السرقة من قسم المحاسبة .. اللي كان مديرها عمكم صالح ... وبما ان ابوي كان شريك في هذي الشركة خاف .... لأن الأموال اللي انسرقت ما كانت اموال ابوي لحاله كانت اموال شركاه معه ...... هنا عصبوا الشركاء واتهموا اخوي بأنه هو الحرامي اللي سرق فلوسهم ...
وكان في اوراق تثبت هالشي .... فصار خلاف عنيف بين ابوي واخوي صالح اللي اعترف بأنه ما سوا شي....... لكن غضب ابوي عليه وخوفه من الفضيحة خلاه يطرده من البيت وطلب منه مايشوفه مرة ثانية ...ولا هو ولده ولا يعرفه ....
طلع صالح من البيت بعدها مكسور النفس ومحطم وما عرفناله مكان حينها ........
سكت ابوفهد اللي غرق بنوبة بكاء صامته ...... وام فهد نفس الشي ..... نايف ومنى جلسوا مندهشين من شكل ابوهم ......... وفهد اللي دموعه كانت تلمع بعيونه ... مب من هالقصة .. من شكل ابوه اللي يكسر الخاطر ....... ندى كانت في حالة صدمة من هالأخبار الجديدة ومن منظرابوها ......
عقب ما هدا ابو فهد شوي ......تنهد بعمق وكمل ....
ابو فهد : بعد فترة دامت ثلاث شهور كان ابوي فيها ياخذ من فلوسه ويعوض السرقة اللي صارت بما ان ولده هو المتهم .... بينما انا كنت شاك في الموضوع .....انا اعرف اخوي زين مستحيل يسوي شي حرام مثل هذا ..... جبتلي محاسب اثق فيه وبدت التحريات .............
بعد حوالي شهرين اتضحت المفاجأة ........ كانت هناك اوراق مزورة تثبت ان اخوي صالح هو اللي سرق هالفلوس كلها ......وبصعوبة قدرنا نكتشف هالشي ، بالنهايه قدرنا نثبت ان السارق الحقيقي هو احد شركاء ابوي بالشركة .......... وانحبس على اثرها ..........
وسكت .........
الكل تم ساكت ينتظر بقية هالقصة ........... والأثر الحزين باين على وجوه الكل ..
ابو فهد أطلق زفرة طوييلة عشان يقدر يكمل الباقي وذكر الله .. : ......... ابوي بعدها تعب .... حس بظلمه لولده وطلب مني ادوره .... دورته في كل مكان يخطر عالبال في نجد والحجاز والشرقية وكل مكان ... لكني ما حصلته ..... امي بعد 4 سنين توفت ..... ابوي ضاقت به الدنيا عقب ما فقد امي ...حس انه هو السبب بفقدانه لثنين عزيزين على قلبه ... وقفت انا بجنبه ..... وطمنته ان صالح بيرجع فيوم من الأيام وبيتفهم الوضع ...... اطمن ابوي على هالكلام .... وصرت انا سنده الوحيد في شركته بعد ما فك الشراكة اللي كانت وحولني انا لشريكه ....... طلبت من ابوي يرتاح
ولا يتعنى لأني انا اللي بهتم بالحلال كله ..... لكن بعد 3 سنين من وفاة امي توفى ابوي الله يرحمه من الضيق اللي نكد عليه حياته ... ووصاني بحلال اخوي صالح ..........
وسكت مرة ثانية .....
ندى ما تتحمل خلاص ... عمها موجود ولا يدرون عنه ..... اذا كان كلام ابوي صحيح فاني شفته وشافني وانا صغيره ..... وقتها كان عمري ......... سنة بس .... آآآآآخ يا عمي وينك ....وينك ؟!!!!!!!!! ......... انتبهت لصوت فهد ....
فهد : وبعدين يبه ......
تنهد ابو فهد : بعدين ياولدي مرت السنين والايام وانا ماعرف شي عنه ولا اعرف وين أراضيه واذا هو عايش ولا ميت ...... لكن ............... لكن قبل يومين ثلاثة .. جاني رجال غريب في مكتبي
وقال لي انه هو محامي اخوي صالح ........ تفاجأت ..... فرحة غمرتني ..عرفت ان فيه امل القى اخوي .. بس فرحتي ماتمت ..
نايف : ليش يبه ؟
ابو فهد نزل راسه بالأرض يخفي ملامحه اللي انقلبت فجأة : لأنه في النهاية عطاني ورقة قال انها .................. وصية عمكم ....
شهقت ندى وحطت يدها على فمها ... قعدت تناظر ابوها اللي قام يشوف عياله بأسف ........................
ندى بخوف : و.... وص ..... وصية ؟!! ... يعني.........
نزل ابو فهد راسه وهو يقول : ..... ادعو له بالرحمة ........
ندى جلست اطالع ابوها ودموعها تنزل اربع اربع لكن بدون صوت ...... حتى لو ...هذا عمها ....
فهد نزل عيونه للأرض وطاحت دمعة من عيونه ... منى كان حالها غريب وجهها كان جامد ... الكلام والأخبار الجديدة شكلت صدمة بالنسبة لها ونفس الشي نايف ...
ام فهد كانت منزلة راسها للأرض وتبكي بصمت ... وتدعي لصالح بالرحمة ...
بعد فترة هدا فيها الكل ................................. رجع يكمل ابو فهد كلامه ....
ابو فهد : لكن يا عيالي ... ما قلتوا وش اللي فهالوصية ..............
ندى وفهد ونايف ومنى بان عليهم الاهتمام .....................
ندى بترقب : وش فيها ؟!!!
ابتسم ابو فهد : ......عندكم بنت عم ...........
كلهم وعيونهم مفتوحة عالآخر : كيف ؟!!!!!!!!
زادت ابتسامة ابو فهد : اللي سمعتوه يا عيالي ....... عندكم بنت عم ..... بعمر ندى تقريبا
او أصغر منها بشوي ......
كلهم سكتوا مدهوشين .....................
ابو فهد كمل : بهالوصية اللي كتبها لي اخوي كان كلامه كله على بنته اليتيمة...
فهد : ليش هي ما عندها ام ؟!!!
ابو فهد : اللي عرفته من الوصية ان زوجته توفت بالخبيث بعد ما تركنا ب3 سنين ....
ووصاني اهتم ببنته اللي ما عندها ولي الحين ....
وسكت يطالع في وجيه عياله اللي مبلمه مب فاهمه شي ......
وكمل ....ابو فهد : راح اجيبها ان شالله تعيش عندنا ...........................
هدوء ...........صمت .....................الكل عينه متعلقه على والدهم ..... هذا حلم ولا علم .....؟!!!!!!!!!!!!!!!!!!!!....... بنت عمنا ؟!!!!!!!!!!

((يتبع ))
،،،،،،،،،،،،،،،،،،،،،
اكتشاف ان عندي بنت عم فجأة وبنصف عمري رح تكون صدمة بالنسبة لي أكيد !!!
لكن في بيت أبو فهد .... كيف رح يكون الجو هناك ؟!... وكيف رح يكون الاستقبال لهالمخلوقة الجديدة اللي ظهرت في حياتهم فجأة ...
وكيف رح تكون مظاهر الاستقبال لها ؟!.....

الج الثالث زء
بعد ساعتين من هالاجتماع المحزن والمفاجئ والمفرح بنفس الوقت ......
..................
ندى كانت منسدحة على سريرها تفكر...... معقولة بعد كل هالسنين .... يصير عندي عم ...... لا وبعد بنت عم ..... الله ....... بنت عم ...... واسمها مثل ما قال ابوي
..." شوق " ....... الله .....اسمها مرة حلو .....
قطع عليها حبل افكارها صوت دق الباب ....... قامت وفتحته ...كانت امها ....
ام فهد : وش تسوين ندى نايمه .؟!!
ندى : لا يمه .....فاضيه ما عندي شي....
ام فهد : ايه زين تعالي ساعديني اجل.....
ندى مستغربة : اساعدك في ايش يمه...؟!!!
ام فهد : تعالي نجهز غرفة لبنت عمك ....ابوك موصيني تجهز قبل ما يجيبها ....
ندى متفاجئة : بنجهز غرفة ؟! ..... لبنت عمي ؟!! .... ومتى بتجي ؟!
ام فهد : ابوك يقول انه بيجيبها بكرة ......
ندى وهي رافعة حواجبها : احلفي ......
ام فهد : نديو ... من متى انا اكذب .....
ندى : لا والله يمه مب قصدي .... الله ....... بنت عمي بتجينا بكرة ... شوق بتجينا بكرة ...
(سحبت يد امها وطلعت تركض) ... يالله يمه ....خلينا نرتب ....
ام فهد : نديو .......شوي شوي .....ما اقدر اركض انا .....
وقفت ندى فجأة .....والتفتت لأمها ...........
ندى : ايه صدق يمه ...... وين بتسكن .... ماعندنا غرف زايدة.....
ام فهد : انا فكرت فيها ..... قلت مافيه انسب من غرفة المكتبة ..... الأغراض اللي فيها كلها قديمة وما نحتاجها ....بنحطها في المستودع .....
ندى : ايه صح .... غرفة المكتبة انسب من غرفة الملابس ..... اوسع ... وراح ترتاح فيها ....... والحين وش بنسوي .....
ام فهد : انا قلت للخدامات يشيلون الأغراض اللي فيها وينزلونها ... واحنا الحين بنظف......
ندى : اجل يالله خلينا نبدا الحين الحين الحين .... ( وركضت لغرفة المكتبة )
ام فهد تبعتها : كل هذا عشان بنت عمك ..... يوم اقولك اول اشتغلي في البيت تعيين .... والحين طايرة للشغل ....
ندى : يمه هذا غير ..... هذي بنت عمي ..... غير ...... الله ..... والله ماصدق ....ياليت ابوي يجيبها اليوم .... كأنه حلم وتحقق ..
ام فهد : لا وين يجيبها اليوم .... بنت عمك في الدمام عند خالة أمها ....
ندى : هاه !!!! وش وداها هناك ...؟
ام فهد : وش اللي وش وداها هناك ..... عند خالة أمها ....
سكتت ندى عقب ما استوعبت الموضوع ... ودخلت غرفة المكتبة اللي كانت شبه فاضية ..عقب مانزلوا الخدامات المكتبة والمكتب وودوه المستودع ... بدت تنظف هي وامها .....
تمسح وتشيل وتحط وتكنس .. كانت كل ما تجي امها تسوي شي تجي بدالها وتقولها خليني انا اللي اسويه .. يعني ام فهد كانت شبه متفرجة على بنتها وهي تشتغل ... وطول ماهي تشتغل كانت تغني من السعادة ...
ام فهد تدور بالغرفة تتفحص كل شي : ندى عطيني الفوطة بنظف باب البلكونة ...
ندى جت تركض قدامها : لا .... هو يمه انا اللي بنظف وش دعوة ... انا اعرف انتي بس ارتاحي ...
ام فهد : انا مدري وش اللي مقعدني ... كل ماجيت اسوي شي سبقتيني ...
ندى : قلت لك خلي كل شي علي ... كل شي بسويه بطريقتي ...
ام فهد : يعني اروح واتطمن ...
ندى : الا حطي رجليك بموية باردة ... انا بخلص كل شي وبتلقينه زي الفل ..
ام فهد : يالله أجل انا بروح اشوف وش سووا الخدامات بالأغراض ..
طلعت ام فهد عن بنتها .... وندى تمت تنظف ... لدرجة انها كل شوي ترجع تنظف شي نظفته قبل ... ماكان ودها تخلص .... السعادة اللي متملكتها تحركها ... ماتقدر تسيطر على نفسها من فرط الوناسة ....
ياربي متى بشوفها متى بشوفها .... مشتاقة لها موت ... الله بس يصبرني لين بكرة
بعد ساعتين من التنظيف رجعت ندى لغرفتها وهي متكسرة ... ما قد اشتغلت شغل زي هذا ... كله شيل وحط .... تمددت على السرير وهي تتنهد ....
رجعت لأفكارها .... الحين شوق بتجينا بكرة .... وغرفتها فاضية الا من دولاب وكومدينة صغيرة ...... يعني ماراح تنوم فيها الا لما نأثثها على الاقل بسرير.... لالا ماراح تنوم فيها الا وهي حلوة ومجهزة بشكل كامل .... اجل بخليها تنوم عندي .... الله يا شوق ...انت بنت عمي .... من زمان وانا احلم تكون عندي بنت عم في سني ... وكنت متاكدة ان حلم مثل هذا بالنسبة لي مستحيل ... لكنه تحقق بطريقة عجيبة .. شوق بنت عمي صالح .. الله .... دايما بنات العم يختلفون عن بنات الخالة ..... ليش ؟ ماأدري !!!
يا ترى شخصيتها كيف.؟!!!.......
شوي شوي خدرت ونامت من التعب .... وكان الوقت حينها عشرة ونص ........
*** *** ***
في اليوم الثاني يوم الاحد ..الساعة 9 الصباح .......
فتحت ندى عيونها شوي شوي ...ومدت يديها بكسل وتمغطت .... تحس انها مرة شبعت نوم قامت ودخلت الحمام وغسلت وتوضت وصلت الفجر لأنها نست تركد الساعة على وقت الصلاة ... كانت هلكانة ونامت بدون ما تحس ..........
بعد عشر دقايق تزلت للصالة لقت امها جالسة تتقهوى كعادتها .... جلست معها ....
ام فهد : هاه ندى ...نمتي زين اليوم ....
ندى وهي تتمغط : أي والله يمه من زمان ما نمت هالنومة الطويلة ....
ام فهد : عشان تعرفين ان السهر ما يجيب الا التعب ... شوفي يوم انك نمتي مبكرة استصحيتي ... حتى بشرتك اشوف انها غير عن كل يوم ....
ندى : بحاول يمه بحاول .......... المهم ..... وين ابوي ؟؟
ام فهد : ابوك مشى للدمام قبل ربع ساعة .......
ندى بفرح : والله .... يعني خلاص خلاص ....بتجي اليوم .....
ام فهد : هذا اللي قاله لي ابوك ....وان شالله بيوصلون للرياض على حدود الساعة ثمان ونص تسع بالليل ....في هالحدود ..... بس انت ليش فرحانة لها الدرجة .... حتى انك ماتعرفينها ...
ندى : يمه هذي بنت عم .... تعرفين معنى بنت العم .... كل البنات عندهم بنات اعمام
الا انا طلعتلي هالبنت العم الوحيدة ...... وش تبيني اسوي يعني اكرهها .......
ام فهد : لا ...انا ما قلت اكرهيها ... بس اصبري شوي لما تتعرفين عليها ... يبيلكم فترة عشان تتعودون على بعض .....
ندى : انا من ناحيتي متعودة عليها من الحين ... ماعندي any problem ... ومتأكدة ان شخصيتها راح تناسبني .....
.... حتى انا أصلا محتاجة احد اكلمه في هالبيت ... يعني نسيتي ان ماعندي خوات اقدر اتكلم معاهم باللي ابي ....
ام فهد : الله واكبر .... يعني منى ما ملت عينك ..؟!!!
ندى : يمه منى صغيرة .... ما اقدر اتكلم معها بكل شي ... ونجلاء تزوجت وتركتني وراحت مع حبيب قلبها..... انا محتاجة احد يفهمني وافهمه ......... من بنات جنسي طبعا ....
سكتت ام فهد وكملت قهوتها وندى فتحت التلفزيون .... لكنها يوم شافت ان مافي برامج تستحق المتابعة ... التفتت لامها وقالت :
ندى : يمه متى بنروح للسوق ؟
ام فهد : ليش ... وش عندك ؟
ندى : مب لي يمه ....لغرفة شوق ...
ام فهد استغربت : وش فيها غرفة شوق ؟!!!!
ندى : هو !!!!... نسيتي ان ما فيها لا سرير ولا تسريحة ولا حتى كرسي واحد ...
ام فهد : ايه صدق ...وشلون نسيت ؟!!
ندى : انا ادري عنك يمه !!! ليه يعني تبينها تنوم على الارض ....
ام فهد : والله ماجا على بالي ياندى ...نسيت بالمرة ... خذا بالي هالتنظيف ..
ندى : يعني ماراح نروح اليوم ؟
ام فهد : لا ...انا مشغولة اليوم ...من العصر الى المغرب .... خليها تنوم على الارض ما فيها شي ...
ندى : لا يمه مايصير ...... خلاص بخليها تنوم عندي لين تكتمل غرفتها ... انا سريري مزدوج ويكفينا ...
ام فهد : كيفك سوي اللي تبينه ....
بعد نص ساعة قامت ندى وراحت لغرفتها وشبكت النت وجلست عليه تشغل وقتها .... وأفكارها تاخذها وتوديها على بنت عمها اللي ماتدري شلون بتصير ...
الحماس وقلة الصبر بياكلونها ..
*** *** ***
الساعة 2 الظهر نزلت ندى لقت اخوها فهد جالس يتفرج على التلفزيون .... جت وجلست جنبه .....
ندى : هاه فهد شخبارك اليوم ؟
فهد التفت لها ببرود مستغرب من سؤالها : مثل كل يوم ... بس ليش السؤال ؟!!
ندى : سؤال .... اما انا ميته من وناستي .... ماصدق للحين ان عندي بنت عم لا وبتسكن عندنا .. وش رايك انت بالموضوع ...
فهد رجع يشوف التلفزيون وهز كتوفه : عادي.....
ندى عصبت : يا شين البرود فيك ... ياخي ليش انت بارد ... اقولك بنت عمي بتسكن عندنا تقولي عادي ..... طلع ردة فعل على الأقل ...
التفت لها فهد وهو رافع حاجب : وش تبيني اسوي يعني ؟! أقوم انطط لك على الكنب عشان ابين اني فرحان ...
ندى تشوفه بنص عين : مو بمبين الفرح بعيونك ... اقل شي ممكن انك تسويه تبتسم .....
فهد : تبيني ابتسم ؟ ان شالله ... ماطلبت ....( وابتسم بطريقة تضحك خلت ندى تضحك عليه ) ...... ارتحتي الحين ؟!!
ندى : يعني ... ولو اني عارفه انها ما طلعت من قلب .... حتى اسمها ما سألت عنه ..
فهد رفع صوته : نديو .... تراك اقلقتي راحتي.. خلاص مابي اعرف اسمها فكيني بس ( ومسك الجريدة اللي جنبه ورجم بها ندى اللي انحاشت من شافت اخوها ماسكها ... وقدرت تفلت في الوقت المناسب )...
طلعت ندى من الصالة وهي تضحك على شكل اخوها .... من يتنرفز وهو يصير مضحكة بالنسبة لها ...
راحت لامها بالمطبخ واللي كانت تشرف عالغدا .....
وقفت ندى جنب امها ويديها ورا ظهرها .... قالت بحماس : ها يمه ... تبيني اسوي شي ... اقطع شي ...
ام فهد التفتت لها مبتسمة : انت الحماس بياكلك ... لو انك جاية قبل كان لقيتي شي تسوينه ... الحين خلاص قربنا نخلص كل شي ..
ندى : انا عرضت خدامتي ... لا تقولين انت ماتنفعين في هالبيت ... انا جيت وانتي اللي رديتيني ..
ام فهد : ههه ... لو انك تبين تنفعين جيتي عالأقل قبل بساعة ... مو بيوم جت حزة الغدا جيتي ...
ندى وهي رايحة للثلاجة : والله الوناسة اشغلتني ...
ام فهد : ههه
أثناء الغدا ......
ام فهد , فهد ، ندى ، منى ، نايف كانوا جالسين على طاولة الاكل ...... وعمر ذو الثلاث سنين جالس جنب امه تغديه ...
ندى : يمه ... تراني ابي السواق بعد صلاة العصر ....
ام فهد : ليه وش عندك بعد ..؟!!
ندى : بأرسله يجيب من جرير تشيز كيك ....
فهد التفت لاخته : ليش.. وش الطاري عليك ؟! ... تراه يسمن ....
ندى : هاهاها (تضحك بإستهزاء)..... ياخف دمك !!... مب لي هذا يالشاطر ...هذا لبنت عمي شوق ....
فتح فهد عيونه مستغرب : هي اسمها شوق ؟!!
ندى بسخرية : شفت انك ماتدري عن الدنيا !!!...
قاطعتهم ام فهد : ارسليه مبكر علشاني ابغاه ....
منى : ليه يمه وين بتروحين ؟!
ام فهد : بروح لحرمة في المستشفى ... ساعة وارجع ....
.........................
بعد الغدا نزلت ندى للصالة رايحة للخدامة عشان تخبر السواق وتقوله وش يجيب ... قابلت فهد اللي كان جالس في الصالة وقالها ...
فهد : جيبي كراميل اوكي ...
ندى التفتت عليه وهي ماشية : لا حبيبي ...شوق تحب تشوكليت ....
فهد يطالعها بسخرية : وانت وش دراك انها تحب تشوكليت ؟!!
ندى : لأني انا احبه ... ماراح تكون مختلفة عني ....
فهد فتح عيونه وابتسم ابتسامة اغاظة : واثقة انت بزيادة ... توك حتى ماشفتيها ....
ندى بغرور : مايحتاج اشوفها .... بنت عمي واكيد مثلي ..( قالت هالكلام والتفتت عنه للمطبخ )....
اما فهد قعد يضحك على خبال اخته ..... مجنونة هالبنت .... مهووسة في بنت عمها حتى قبل ما تشوفها ..... الله يعيني عليها اجل اذا جت ....
لكنه فجأة جلس يفكر ..
ليش انا ماني متحمس مثل ندى .... اكتشفت ان عندي بنت عم لكني ماتحمست اني الاقيها واسلم عليها ... صح تفاجأت ... لكني ماني متحمس ..... يمكن لأني اعتبرها غريبة ... يمكن ..
...........................................
الساعة 6 المغرب .... كانت ندى جالسة في غرفتها ..... كل ماله وشوقها يزيد لشوفة بنت عمها ..... صلت المغرب ودخلت الحمام تاخذ لها شاور ... بعد نص ساعة طلعت ولبست ملابسها ... كان ودها تسشور شعرها لكن ما فيها حيل ... افكارها تجيبها وتوديها وخيالاتها عن بنت عمها ماخذه وقتها كله .... في هذي اللحظات ... دق جوالها على نغمة ( كل يوم في عمري ) ....
راحت شافت الشاشة لقت اسم " نوف " ... ابتسمت وردت .....
ندى : هلا والله وغلا ...
نوف : اهلين بالقاطعة ...... وش هالقطاعة يالدبا ....
ندى : ههه ... هلا هلا نوف.... توني شايفتك امس .... كيفك ؟
نوف : الحمدلله تمام ....شخبارك انت؟!
ندى : انا الحمد لله بصحة وعافية .....
نوف : وينك .... من تركتك بالجامعة امس مادقيتي .... خير مريضة ...
ندى : لا والله انا بصحة .... بس انشغلت شوي ..
نوف : علي انا هالكلام ؟!... احنا امس ماخذين الجداول يعني ماعندك دراسة ولا شي ... وش بتنشغلين فيه بالله ؟! .....
ندى : انشغلت بوناستي ...
نوف باهتمام : خير وش اللي مونسك لهالدرجة .... لا تقولين فهد لأني ماراح اصدق ...
انسدحت ندى عالسرير وجلست تلعب بشعرها اللي كان رطب : لا وين ....... فهد اصلا انا قاطعه الامل فيه من زمان .... هو اساس النكد اللي انا فيه .....
نوف : ههه ..... لا تبالغين ... المهم قولي وش سر هالفرح اللي طلع فجأة ..... ؟!
ندى : ام ......بقولك مع اني دارية انك راح تتفاجئين مثل ما انا تفاجأت ...
نوف : قولي تراك حمستيني ...!!!
ندى : طيب ........ انت تعرفين ان ماعندي اعمام صح ؟ ....
نوف استغربت سؤالها : ايه ماعندك اعمام ..... بس ليش هالسؤال ؟!!!!
ندى : لأنو ...............
نوف باهتمام بالغ : أيوا ....... كملي ...
ندى تبي تطفشها : لأنو ....
نوف : أيه قولي خلصيني ..
ندى : طلع عندي واحد ...
نوف : ..........................
ندى : ههه .... نوف وين رحتي ؟!
نوف بهمس : عيدي اللي قلتيه قبل شوي ......
ندى : عندي عم ..... وبنت عم بعد ....
نوف بانت عليها العصبية : ندى انت تمزحين معي ولا شلون ..؟!!!
ندى : لا والله ما امزح ..... انا توني دارية امس ... بس انه توفى قبل شهر او اكثر بشوي...... الله يرحمه ...
نوف : ............................ الله يرحمه .... طيب وبنته ...وش صار عليها ....
ندى : مو بهذا سر وناستي ...!!!!!!
نوف : سر وناستك ؟!!
ندى : ام........ راح تعيش عندنا .... ابوي راح للدمام من الصبح عشان يجيبها ... كلها ساعتين ثلاثة الا وهم واصلين ... الله والله اني مشتاقة اشوفها ....
نوف : ليش هي عايشة في الدمام ؟!!
ندى : ايه عند خالة أمها من توفى عمي ....... بس قولي الصراحة نوف .... مب مفاجئة انك تكتشفين ان عندك بنت عم بعد هالعمر ؟ ...
نوف : والله هي من ناحية انها مفاجئة فهي مفاجئة وكبيرة بعد .... بس ما قلتي لي كم عمرها ؟ .....
ندى : ابوي يقول انها بعمري او اصغر مني بشوي ... يعني قولي انها بسننا انا وانت .....
نوف : يعني هي راح تعيش عندكم على طول ....
ندى : أكيد .... لانها مسكينة مالها اهل غيرنا ولا ولي الا ابوي من بعد عمي الله يرحمه ....
نوف : الله يعينها ان شالله .....
ندى : اقول نوف .... غيري السالفة لانو اذا تميت اتكلم عنها .... بشقق نفسي ... ماقدر اصبر ..
نوف : ههه ..... اوكي وش تبين اقولك ..
ندى : وش اخبار اختك امل وحملها ...
نوف تضحك : ههه ...... ياحليلها .....
ندى : ليش وش فيها ..؟!
نوف : جتنا امس ... لو تشوفينها بكرشتها .... تموتين عليها ... كبر بطنهاعن اخر مرة شفناها فيها ....
ندى : ههه .... والله ودي اشوفها من زمان عنها ....
وكملوا سوالف .... وبعد ساعة الا ربع .......
نوف : اقول ندى ترا خسرتيني ..... لي حول الساعة وانا اكلمك ....
ندى : ويعني ....
نوف : يعني ضفي وجهك وخليني اسكر لا تطلع فاتورتي بالهبل .....
لكن قبل ماترد عليها ندى دخلت منى فجأة الغرفة وقالت بصراخ :
منى : ندى ندى ... ابوي دق قبل شوي ويقول انهم نص ساعة ويوصلون الرياض ...
ندى بصراخ بعد : قولي واله ..... نوف نوف يالله باي ... شوق جايه بالطريق .. ( وسكرت الخط حتى بدون ما تسمع كلمة مع السلامة )......
نزلت ندى ركض في الدرج وعلى طول للمطبخ ..... طلعت الكيكة اللي شرتها اليوم من جرير وحطتها في صينية حلوة وقطعتها مثلثات .... وقالت للخدامة تعصر عصير .... وبسرعة رجعت فوق لغرفتها وغيرت ملابسها ولبست بنطلون جينز بسيط وتي شيرت اسود ..... وحطت غلوس وكحل ورفعت شعرها ونزلت .....
لقت امها بالصالة قاعدة تنتظر ومعها عمر الصغيرون ومنى ونايف اللي كان قاعد يناظر التلفزيون .... واستغربت يوم مالقت فهد ....
هذا وين الحين .. البنت بتوصل وهو ماجا ..
سألت امها : يمه وين فهد ما رجع؟ .....
ام فهد : انا توني واصلة قبل شوي ....مادري .... مب في غرفته هو ؟
ندى : لا ... من المغرب وهو طالع ....
ام فهد : روحي دقي عليه بسرعة ... ابوك وبنت عمك في أي دقيقة بيوصلون الحين ...
ندى : انشالله ....
وقامت بسرعة للتليفون ودقت على رقم فهد .....
كان فهد جالس بأحد المقاهي مع احمد واثنين اسمهم عبدالله و حسين اللي تاركينهم من فترة يلعبون بلياردو .......
فهد كان جالس يسولف مع احمد لما دق جواله .... رفعه وشاف رقم البيت ...
فهد : هذا رقم البيت ... لحظة احمد .... ( ورد ) الو
ندى : هلا فهد ..... وينك انت الحين ....
فهد مال بشفايفه على جنب : هذا انت ندى .... طيب مافي سلام .....
ندى : فهد تراي ماني رايقة لك قل لي وين انت الحين ..
فهد : انا مع احمد والشباب في مقهى ..... ليش؟
ندى : وش اللي ليش ؟!!..... ابوي وبنت عمي بيوصلون في أي دقيقة وانت حظرتك في مقهى ....
تنهد فهد : والمعنى ....
ندى : شف !! ... يعني ماراح تجي تستقبلها معنا ....
فهد : مدري بشوف ....
ندى بدت تتنرفز : شلون يعني بتشوف .... اقولك بيوصلون في أي لحظة ...
فهد : اوهو .... خلاص قلت لك بشوف ... يالله تبين شي بسكر ...
ندى اللي تنرفزت حدها : لا مابي شي مع السلامة .. (وسكرت الخط ) ...
رجعت ندى سماعة التلفون مكانها بعصبية ..... اوف هذا ما يحس .... مايقدر المسؤولية ..... وش اقول لامي الحين والا لابوي ... بيزعلون اكيد ...
في هاللحظة سمعت بوري سيارة ابوها داخله البيت ... ماصدقت نست كل ضيقتها وركضت للباب .......
فهد من سكرت ندى السماعة بوجهه سأله احمد
احمد : خيير وش صاير ...
التفت لأحمد : هذي ندى ...
احمد : ادري انها ندى سامعك تقول اسمها ... بس وش تبغى منك ؟ ....
فهد : تسألني متى بجي عشان استقبل بنت عمي ....
احمد مستغرب : بنت عمك ؟؟! ... أي بنت عم ؟!!
فهد : اوه .... اثرني ماقلت لك ....
احمد : خير ... وش اللي ماقلته لي ؟
وخبره فهد بالسالفة كلها .....
احمد : وانت من صدقك منت رايح تستقبلها ؟!!
فهد : والله يا احمد ماني بتارك وناستي عشان اروح اسلم ... ان ماسلمت عليها اليوم قدامي بكرة وبعده والايام كلها ....
احمد : صدق انك بارد وماعندك دم ...
فهد وهو ياخذ رشفة من كوب القهوة اللي قدامه : البنت قاعدة في مكانها مهي بطايرة ..
.........
اما في البيت ندى كانت على نار تنتظر.... وعيونها معلقة على باب الصالة تنتظره ينفتح في أي لحظة ............
ندى : يالله يالله يالله يالله .....
ام فهد : هو ندى منتي بصاحية ... البنت جايتك الحين ... اركدي ...
ندى : ماقدر ياناس ما أقدر .... حسوا فيني !!
بعد لحظات انفتح الباب اخيرا .... ودخل منه ابو فهد والتفت للي وراه بابتسامة وقال :
ابو فهد : ادخلي حبيبتي ... البيت بيتك .....
((يتبع)) ...

الج الرابع زء
اما في البيت ندى كانت على نار تنتظر.... وعيونها معلقة على باب الصالة تنتظره ينفتح في أي لحظة ............
ندى : يالله يالله يالله يالله .....
ام فهد : هو ندى منتي بصاحية ... البنت جايتك الحين ... اركدي ...
ندى : ماقدر ياناس ما أقدر .... حسوا فيني !!
بعد لحظات انفتح الباب اخيرا .... ودخل منه ابو فهد والتفت للي وراه بابتسامة وقال :
ابو فهد : ادخلي حبيبتي ... البيت بيتك .....
الكل كان يترقب هالبنت تدخل .... وخاصة ندى .....
دخلت هالبنت بعباتها والطرحة على كتوفها ...... دخلت والابتسامة عالثغر ... الكل ابتسم لها ...
حط ابو فهد يده على كتوفها وتقدم معها بكل هدوء ..... ووقف جنبها قدامهم ....
ابو فهد : هابنتي .... هذولي عيالي وزوجتي اللي كلمتك عنهم قبل شوي ....
زادت ابتسامة شوق ... واشرت على نايف ومنى اللي كانوا واقفين جنب بعض ويناظرونها ببلاهة للحين مو بمصدقين ..
قالت بصوت كله نعوومة : انت نايف وانتي منى .... صح ؟
ابتسموا نايف ومنى وهزوا روسهم بالايجاب ....... تقدموا وسلموا عليها ..
بعدين انتقلت يدها على ام فهد وقالت : وانت خالتي ام فهد ؟! ....
ابتسمت ام فهد وتقدمت لها وهي ترحب ...
ام فهد : هلا والله ببنتي .... حيالله من جانا .... أسفرت وانورت
ردت شوق : الله يحييك خالتي ....... ( سلمت عليها وحبت راسها ) ......
ام فهد : عسى ما تعبتي حبيبتي ؟
شوق : لا خالتي وش دعوة ... اللي يسمعك يقول جيت على رجليني .... جاية مع عمي انا
( والتفتت لعمها وهي تبتسم ) رد عليها ابو فهد بابتسامة صادقة .....
التفتت اخيرا لندى وزادت ابتسامتها ..... ندى عيونها ماراحت عن شوق فصفصتها من فوق لتحت ..
وش هالجمال ؟! وش هالنعومة ؟!! .... وش هالبراءة ؟؟!! ......
انتبهت من افكارها على صوت يقول ..
شوق : وانت اكيد ندى ....
ضحكت ندى وتقدمت تسلم عليها ... لكنها بدال ما تسلم سلام عادي حضنتها وهي تضحك من الوناسة .. وشوق ضحكت معها ......
استانس ابو فهد على بنته .... حركتها هذي راح تبين ان شوق مرغوبة اكثر بهالبيت ....
ندى بفرح : اهلين حبيبتي .... هلا وغلا ..... عاش من شافك ...
شوق والابتسامة مازالت مرسومة على وجهها : عاشت ايامك بنت عمي ....
ضحكت ندى .... (( قالت لي بنت عمي )) .....
ندى : وينك انتي من زمان ... والله لو انك متاخرة شوي ... كان انجنيت ...!!!
شوق : ههه .... بسم الله عليك ... وش دعوة عاد .. اللي يسمعك يقول مرة مهمة ...
ندى : أيه .... أكيد مهمة ...
شوق : ههه ... تسلمين ياعمري ... وانا مشتاقة أكثر ...
ندى : لاأ .... أنا أكثر وأكثر ...
شوق نزلت راسها تضحك .. منحرجة بين هالعائلة الجديدة : ههه ... خلاص انتي أكثر ولا تزعلين ...
ابوفهد وابتسامته مافارقته : ارتاحي حبيبتي ... اجلسي ...
ولما جلسوا شوي ..... يسلمون على شوق وياخذون اخبارها ...
ابو فهد : اجل وين فهد .....
ارتبكت ندى لكنها قالت بسرعة ......
ندى : يقول انه جاي بالطريق .....
ابو فهد : هالفهد انا مدري متى بيتعدل !!! هذا وانا موصيه ومحذره .... المهم ندودة قومي وخذي بنتنا الجديدة لفوق خليها ترتاح وتغير ملابسها اذا تبغى .....
ندى وهي تقوم : انشالله يبه .... يالله شوق ....
شوق : يالله .....
مسكت ندى يد بنت عمها .... ومشت جنبها .. رقوا فوق .... وهم بالدرج ......
شوق : اقول ندى .... شنطي وأغراضي في سيارة عمي ....
ندى : ولا يهمك الحين اقول للخدامات يرقونها .....
مالت ندى على دربزين الدرج ....
ندى تنادي : منى ..... منى .....
منى : نعم .....
ندى : روحي قولي للخدامات ينزلون شنط شوق ويجيبونها فوق لغرفتي ....
منى : طيب ......
كملوا ندى وشوق طريقهم لفوق .....
فتحت ندى باب غرفتها ودخلوا وسكروا الباب .... كان الغرفة تفيض بريحة الورد والياسمين ... ندى قبل لا تجي شوق عطرتها ورتبها ... لأنها كانت محيووسة ...
شوق : الله ..... غرفتك مرة نعٌومة .....
ندى : تسلمين .... عيونك الحلوة ...
شوق : والله صدق انتي اللي مختاره الوانها ؟
ندى : ايه انا ....
شوق : بصراحة ذوقك مرة حلو ..
ندى : مشكورة ياعمري ....
فسخت شوق عباتها وعلقتها على الشماعة مع الطرحة ..... كانت لابسة بنطلون جينز وبلوزة بيج مكتوب عليها بالأسود miss you .... وندى جلست على السرير...
ندى بمزح : اشوفنا انا وياك مطقمين اليوم .... متفقين وإنا ماندري .....
شوق التفتت لها مستغربة ونقلت نظرها بين ملابس ندى وملابسها بعدين ضحكت .....
شوق : ههه ..... بنت عمي ... اكيد مثلي ....
ندى : جعلني مااخلى من بنت هالعم ..... اكدتي نظريتي ...
شوق مبتسمة : أي نظرية ..؟!!
ندى : من وقت مادريت عنك وانا اقول لهم .... بنت عمي مثلي .... رح اتفق انا وياها .... بس يقولون انت توك ماشفتيها .. يعني لا تصيرين متأكدة ... بس الحين تأكدت اكثر ...
شوق ضحكت : انا اصلا ما حبيت البس شي رسمي ... بما اني رح امشي مشوار اربع ساعات .... وفوق هذا رايحة لبيت عمي ...مايحتاج يعني ....
ندى قامت من السرير وهي تضحك وحضنت شوق : يالله .... تصدقين انك نزلتي علي من السما .....
شوق خنقتها العبرة …. وبسرعة سالت دمعة على خدها : ههه ... وانتوا بعد ...
ابتعدت ندى عن بنت عمها ... ولما شافت دموعها .. : افا .. حبيبتي ليش تبكين ؟
شوق بابتسامة ممزوجة بالحزن : لا بس ..... فرحانة ..... توقعت اني راح اضيع بعد ابوي ..
ندى : يابعد عمري ...
خذت راسها بحضنها ... : ليش التشاؤم ... هذا احنا اهلك بعد ... وراح تصيرين بالنسبة لي اكثر من الاخت ..
زادت دمعات شوق وشدت على ندى اكثر كأنها ماتبي تضيعها ... ضحكت ندى وانتظرت شوق تفكها لكنها طولت ...
ندى : ههه .. شوق شفيك ؟!
شوق : لا تروحين ...
ندى : ههه وين اروح انا موجودة ...
انتبهت شوق وابتعدت ... رفعت يدها تمسح دموعها بسرعة وحمرة خجل توهجت بخدودها : انا آسفة ندى ... مدري وش اللي جاني فجأة ..
ندى : لا عادي خذي راحتك ...
في هاللحظة دق الباب ودخلوا الخدامات مدخلين اغراض شوق .......
ندى : leave it here ….. thanks
طلعوا الخدامات والتفتت ندى لشوق ....
ندى : هاه شوق بتركك الحين تاخذين شاور ... اوكي .... مالك اكثر من ثلث ساعة ...
شوق مبتسمة : مستعجلة ..... لا تخافين ماراح اطير ....
ندى : ما علي منك .... ماراح اخليك تنومين اليوم ... يالله see ya
شوق : .... اوكي ...... ههه
طلعت ندى وراحت للمطبخ تجهز صينية ... وحطت فيها الكيك وجلاسات انيقة للعصير ....
وشوك ومناديل .... يعني اللي يشوفها يقول انها جايتها ضيفة مهمة للغاية .....
كل هذا استغرق من ندى حوالي 25 دقيقة ....خذت الصينية ورقت بها فوق ... دقت باب الغرفة .... وصلها صوت شوق ودخلت ......
ندى : ماشالله عليك .... خلصتي ...
كانت شوق واقفة قدام التسريحة تمشط شعرها .... ورفعته .... والتفتت على ندى...
شوق : هو ....ندى وش ذا كله !!!! ....
ندى : هيدا لعيونك حبيبتي ....
شوق : لك تؤبريني .... بس ليش متعبلة على عمرك كذا ؟!!!!...
ندى : لا متعبلة ولا شي ....يالله بس تعالي سولفي لي عنك .....
حطت ندى الصينية على طاولة موضوعة بين كنبتين ..... بعدين راحت فتحت الابجورتين اللي حول السرير .... وسكرت نور الغرفة .... وتوجهت للمسجل وشغلته على موسيقى كلاسيكية ...... صار الجو بالمرة مريح ...... وروعة !!!
شوق كانت تراقب ندى وتبتسم .... بنت عمي هذي مو هينة رومنسية مرة ....... من شكلها اصلا واضح .... نعّومة بالمرة .......حتى ان ديكور الغرفة تغلب عليه شموع ملونة وبأشكال مختلفة وهذا يعكس شخصيتها ... ياحليلها والله ...
رجعت ندى وجلست على الكنبة الثانية ...... ومدت يدها وحطت قطعة الكيك في صحن ومعاه شوكة ومنديل ملون ..... ومدت يدها بالصحن لشوق ...
ندى : تفضلي بالصحة والعافية .....
شوق : الله يعافيك .... الله ..... تشيز كيك صح ؟!!
ندى تهز راسها مبتسمة : تحبينه ؟؟
شوق : احبه وبس ؟؟ ..... هذا أعشقه ... اموت فيه ...
ندى : يا بعد هالدنيا ..... وين فهيد يسمع !!!!!!
شوق ضحكت عليها وهي تقول هالكلام ..
شوق : ههه ..... ليش ؟
ندى : اقولك واقف لي هنا !!!! .. ( وتأشر باصبعها على حلقها ) ... يقولي لا تصيرين واثقة ... انت توك ماشفتيها عشان تعرفين وش تحب وش ماتحب .... هو اصلا كان يبي كيك بالكراميل بس انا ماعطيته وجه .....
شوق : حرام عليك .....
ندى : وش حرام علي .... خليه يستاهل ...... لو تدرين وش يسوي فيني ... خليه يولي ...
شوق : بس لحظة صدق ... انا ماشفت الا اخوك نايف وعمر ... وهو ماشفته ....
ندى : مادري عنه طالع .... وشكله ماراح يرجع الا نص الليل ...
شوق : هو كم عمره ؟
ندى تفكر : ام .... اظني 22 .... وبيتم ال23 بعد شهرين او ثلاث اعتقد ..
شوق : اها.... يعني هو في اخر سنة جامعة ؟
ندى : لا .... هو في ثالث ....
شوق : غريبة ...اللي مثله يكونون آخر سنة الحين
ندى ابتسمت بسخرية : الا فهد ...هذا مستهتر مايهمه الا وناسته .... و" غامض " ماينعرف وش يبي او وش ينوي عليه ....
شوق : طيب هو مايخاف انه بعدين مايلقى شغل ؟!!
ندى ضحكت : لا حبيبتي ... من هالناحية هو ضامن الشغل في شركة ابوي .... بس ماخذ الدراسة يشغل بها وقته ان كان فاضي ....
قطعت لها شوق قطعة من الكيك بالشوكة وكملت ندى....
ندى : الا على طاري الجامعة .... انت تدرسين فيها ؟!!
شوق مبتسمة : هذي اول سنة لي ......
ندى : صدق .. ؟!!! ....... كم عمرك الحين ...
شوق : 18 سنة ....
ندى : ماشالله .. واي قسم اخترتي ؟
شوق : لغة انجليزية ..
ندى : حلو !! .. في أي جامعة ؟!
شوق : في جامعة الملك سعود .. بس الى الحين مادري اذا انقبلت او لا ..
ندى : ليه ؟ انت مارحت عشان تتأكدين ؟
شوق نزلت راسها : لا .... انا قدمت اوراقي عليها اول الاجازة .... بس .. من تعب ابوي وتوفى وانا مادري عن الجامعة اذا قبلتني او رفضت ..
حست ندى في شوق الحزن ... حبت تفرحها
ندى : ولا يهمك بكرة اروح انا وياك ... ونشوف .. شرايك؟..
شوق : ليه انت في أي جامعة ؟
ندى ابتسمت : انا معك في نفس الجامعة لا تخافين ...
شوق من الفرحة : والله !! ... ايه بس خليها بعد بكرة .... مايصير انا توني جايه وعلى طول من اول يوم طيران على الجامعة ... لازم اجلس مع عمي وخالتي
ندى : بكيفك اذا تبين نروح بعد بكرة نروح ..
شوق : ماشفت نجلاء اختك ؟
ندى : نجلاء ؟
شوق : أيه قاللي عمي ان عنده بنت اكبر منك ..
ندى : أيه صح نجلاء اكبر مني ... بس الظاهر ان ابوي ماقالك انها متزوجة
شوق : ماشالله .. من متى ؟
ندى : من سنة تقريبا ... وهي في جدة الحين مع رجلها سعود
شوق : ليش هو من جدة ؟ ... ولا يشتغل هناك ؟
ندى : لا هو يشتغل ضابط هناك .. واهله ساكنين في الرياض لأنهم اصلا من هنا …
شوق : اها ..
ظلوا يسولفون ...ويضحكون وكل وحدة تسأل امور شخصية عن الثانية .. يعني باختصار كل وحدة تحاول تكتشف الشخصية اللي جالسة قدامها ...
بعد ساعة ونص ..
ندى : شوق يالله قومي
شوق : على وين ؟
ندى : قومي بوريك بيتنا ..
ابتسمت شوق وقامت معها وطلعوا من الغرفة .. توجهوا اول شي لغرفة شوق اللي الى الحين ماجهزت ...
فتحت ندى باب الغرفة : ها شوق هذي غرفتك ..
شوق وهي تقلب عيونها في أنحاء الغرفة : الله .... نايس !!!!!
ندى بسخرية : أي نايس ؟!! .. مافيها غير كمدينة والموكيت ...بس
شوق : حتى لو ... حلوة مادامها في بيت عمي وجنب غرفة ندى حبيبتي ..
ظحكت ندى وحطت يدها على كتوف شوق : شوفي عاد ياحلوة ..غرفتك هذي نبيك انت اللي تختارين اثاثها ولونها عشان نصبغها لك...
شوق ابعدت يد ندى عن كتفها وتراجعت وهي تقول : لا عاد ياندى ... ذا كثير
ندى : أي كثير انت بعد ... هذا كلام ابوي وما نقدر نخالفه .. وبعدين هو يبغاك تختارينها عشان تكونين مقتنعة وترتاحين فيها اكثر ..
شوق في هاللحظة حست بفرحة كبيرة تغمرها ... معناة كلامك ياندى ان عمي فعلا يبيني اسكن عنده ... الله لا يحرمني منك ياعمي
ندى لاحظت سرحان شوق والابتسامة اللي مازالت مرسومة على وجهها
ندى : ها يالحلوة .. وين رحت ؟
شوق انتبهت : ها .... مارحت بعيد معك ...
ندى : طيب تعالي اوريك باقي البيت
طلعت وعلمتها وين غرفة عمها وزوجته اللي كان لهم جناح خاص .. وغرفة منى اللي كانت قبال غرفة شوق ... وغرفة فهد الملاصقة لغرفة منى ....وبعدين غرفة نايف اللي بجنب غرفة ندى ... كانت الغرف على شكل دائرة وفي الوسط الدربزين اللي يطل على الدور السفلي .. كان البيت كبير وعلى درجة من الفخامة والرقي ..
بعد كذا نزلت بها للصالة ... وكانوا نايف ومنى يلعبون بلاي ستيشن .... من شاف نايف شوق نازلة ابتسم لها والتفت لمنى ..
نايف : هي انت ... قومي خلي بنت عمنا الجديدة تجي تلعب بدالك ..انت زلابة ماتعرفين تلعبين ..
ظحكت شوق على ( بنت عمنا الجديدة ) .... راق لها اللقب
منى حطت يدها على خصرها : لاه ... وليش انت اللي ماتقوم وتخليني العب معها ...
ندى : اقوول بلا طقاق انت وياه ... شوق مهي بفاضية للعب ( والتفتت لشوق ).. يالله شوق اوريك الحديقة ..
طلعوا من باب الصالة المطل على الحديقة ( كان للصالة بابين .. باب عالحديقة على طول وباب عالحوش ) شوق لما شافتها شهقت
شوق : الله ..... مرة مرة مرة روعة .... خيال !!!!
ندى ظحكت : عجبتك اكيد ... هذي الله يسلمك ابوي مختار تصاميمها كيف تكون .. من احواض ورد واشجار والتوزيع وشكل النافورة .... عاد ابوي ماشالله عليه ذوق في هالاشياء ... وجايب متخصصين بالحدايق عشان ينسقونها ويرتبونها ...
شوق : بصراحة ندى .... تجنن ... مع النافورة طالعة روعة
ندى : تعالي خلينا نشغلها ... بتلطف الجو وبتكون الجلسة احلى ....
توجهوا لطاولة وكراسي في وسط الحديقة بجنب النافورة اللي كان ديزاينها عجيب وجاعلة للحديقة رونق رائع .....
ندى : اجلسي وانا بروح اشغلها
ندى توجهت للمفتاح اللي كان بزاوية في الحديقة .... وأما شوق بدل ماتقعد قربت من النافورة اللي ادهشتها فعلا ... وطلت بوجهها على احد النوافير الصغيرة ... وتمت تتأملها فترة .......
فجأة ............. اندفعت الموية في وجهها ... فصرخت من الروعة ...
شوق : حسبي الله على العدو
رجعت ندى وهي تضحك ...
ندى : ههه .... ماقلت لك بشغلها ... ليش قربتي منها !!
شوق ببراءة : مادري ........ جذبني شكلها .... شوفي وجهي شلون صار ... يقطر
ندى : ههه ... تعالي اجلسي وتفرجي عليها مثل ماتبين ..
راحوا للطاولة وجلسوا عليها اللي كان الستايل حقها حلو ايضا ...... وكملوا سواليفهم
وهم في غمرة السواليف والضحك …. شافت ندى عمر جاي من بعيد يمشي ببراءة …
ندى : عمر حبيبي تعال ….
راح عمر جنب اخته وسأل : ندى …. مين هاذي ؟!
شوق سبقتها … وهي مبتسمة في وجهه : أنا شوق بنت عمك ياحلو …؟!
عمر بتساؤل : سوق ؟!
شوق : ايه …. شوق … ماتعرفني .. ؟!
عمر : لأ …. ليث ديتي ؟!... ( ليث = ليش ) ( ديتي = جيتي )
شوق وهي تضحك : جيت عشانك …. مادريت ؟!
عمر مافهم : هاه ؟!
شوق سحبته وحضنته وهي تضحك ..: ندى اخوك هذا عاجبني من أول ماشفته …
ندى بفخر : من حقك …. وين تلقين مزيون مثله …؟!
شوق : أقول لا يكبر راسك … أنا قلت هو مو بأنت ..!!
ندى : أصلا هو ماطلع مزيون الا عشاني اخته ..
شوق : وفي هذي صدقتي … كم عمره ؟!
ندى : ثلاث سنين تقريبا ..
عمر : من انتي ؟!
شوق التفتت له مبتسمة : أنا شوق …. قول شوق ..
عمر : سوق …
شوق : شوق
عمر : سوق ….
شوق وندى : ههه
عمر كان واقف ومطلع لسانه من الحيا …. شوق كانت حاضنته وتبوس فيه كل شوي …
شوق : عمر عطني بوسة …
عمر على طول طبع بوسة على خدها ..
شوق : الله …. وهذي مني لك …
وباسته على خده …
بعدها قام عمر من حضنها وراح راجع لداخل …
شوق : ياحبي له …. يجنن …
ندى : مستحي … للحين مستغرب وجودك عندنا ..
شوق : ايه من حقه … المهم يالله سولفي لي عنكم …
ندى : وش تبيني أقول …
شوق : كل شي يخطر عالبال …
ندى : ههه …. أوكي …
وقعدوا على حالهم ضحك ومزح وسواليف …
*** *** ***
في بيت أبو أحمد زوج أخت ام فهد ... طلعت نوف من غرفتها ونزلت الدرج وهي تغني ..
لقت أمها وسهى أختها جالسين بالصالة ...
نوف : هاي ...
سهى : هايات ...
**( سهى ... عمرها 22 سنة ... في آخر كورس بالجامعة ... بنت هادئة الملامح .. رزينة وثقل مثل مايقولون ... )**
ام أحمد : نوف وينك انت من الصبح ؟!... كل هذا في غرفتك ...
**( ام أحمد " سارة " ... 46 سنة ... تشبه في أطباعها طبايع أختها الجوهرة " ام فهد " .. سواء في هدوء ملامحها وحكمتها وعقلانيتها ... )**
نوف : أبد كنت عالنت .. وش تبيني أطلع اسوي ... فاضية لا شغل ولا مشغلة قلت خلني أضيع وقتي بالنت ..
ام احمد : ايه بس النت مهو بحلا تقضين كل وقتك عنده ..
نوف : يمه انتي تعرفين كرف الجامعة وشلون ... خليني هالأسبوع أطلع واسوي كل اللي أبيه ...
سهى : الله يستر أجل ... ماندري وش اللي بيطلع لنا هالأسبوع ..
نوف : أيه وش عليك انتي .... مابقى لك الا هالكورس وتخلصين ... من قدك ..
اكتفت سهى بابتسامة فخر ..
ام فهد : انا مابي اسمع كلام .. انا أبي اشوف .. ابي العلامات تطلع عالية .. الجامعة مهي بمثل المدرسة وانتي تعرفين ...
نوف : ان شالله ان شالله بس يمه لا تحنين على راسي من الحين ... لسا بدري على هالكلام .. باقي اسبوع ..
وقعدت تتقهوى .... ومادرت الا بأمها تقول ..
ام أحمد : مدري وش صار على أختي الجوهرة ... لها فترة ماكلمتني ...
نوف هنا تذكرت : أيه مادريتوا وش صار ؟!
التفتوا لها امها وسهى ...
سهى : خير وش صاار بعد ؟!.... الله يستر من أخبارك انتي ...
نوف : لا هالمرة جايبة لكم خبر غريب عجيب ...
ام احمد : احكي قولي ...
نوف : دقيت على ندى اليوم وقالت لي ... ( ووقفت عن الكلام ... مدت يدها للفنجال بتشرب )
سهى : تكلمي خلصي ... حشى تحكين بالقطارة ..
نوف رجعت الفنجال للصينية : اليوم الجو في بيت خالتي غير .. تدرون ليش ؟!
سهى بتملل : انا لله !! .... ليش ؟!
نوف : بنت عمهم شوق ... جتهم اليوم ..
سهى بتكشيرة تنم عن الاستغراب : بنت عم ؟!.... ماعندهم بنت عم !!
نوف : لا طلعتلهم وحدة من تحت الأرض ... بقدرة قادر ...
ام أحمد بتركيز وبهدوء وتفكير : أكيد بنت صالح !!!
نوف التفتت لها مستغربة من معلومتها : وش درااك يمه انها بنت صالح !!؟
ام أحمد : لأننا نعرفه من قبل لا يختفي ... فأكيد بتطلع بنته اذا هي بنت عمهم ..
نوف تحمست واستعدت تسأل وتستفسر : يعني يمه انتي تدرين ان عنده بنت من قبل ...
ام أحمد : لا ماندري ولا اعتقد ان ابو فهد بعد كان يدري ... لأن صالح اختفى هو وزوجته من قبل لا تحمل ...
نوف : اها...!!!
سهى : طيب وش صار عندهم ؟!... وش قالت ندى ؟!
نوف : ياعمري ياندى بتطير من الوناسة ... مهي بمصدقة ...
ام أحمد : خنت حيلي ندى .... والله من حقها تفرح ... نجلاء اللي هي اختها تزوجت وسافرت لجدة .... خلوها تفرح ...
نوف : ماتصدقون قد ايش هي فرحانة ... تقول حلم وتحقق
سهى : ياحليلها والله ... بس عسى بنت عمها تطلع زينة معها ... ماتدرين بعد وش ورا هالبنت ..
في هاللحظة طل عليهم أحمد ..
أحمد : السلام عليكم ..
ام أحمد : هلا وعليكم السلام ...
نوف اعتدلت بجلستها : أحمد تعال لا يفوتك هالخبر ... بألف رياال ..
احمد : لا اذا فيها ألف انسحب مابي اسمع ...
راح وقعد جنب أمه ...
سهى تبي تخرب على نوف .. فقالت بسرعة : عيال خالتي الجوهرة طلع لهم بنت عم ..
التفتت لها نوف وهي متفاجئة .. ومن قهرها رمت عليها مخدة كانت عالكنبة : ياحمارة يالملقوفة يالسخيفة ...
سهى اكتفت بالضحك ...
لكن أحمد سكتهم كلهم : قديم الخبر ...
نوف : تدري انت بالخبر ...
احمد : ايه ادري ... علمني فهد ...
نوف : وانا اللي متحمسة اعلمك .. مالت علي ...
سهى : ههه ... احمدي ربك اني انا اللي قلت له ..
*** *** ***
على الساعة 12 في الليل ... دخل فهد الصالة وسكر الباب وراه ..
مشى للدرج يبي يرقى لكنه لاحظ ان باب الصالة المطل على الحديقة مفتوح ... استغرب انه مفتوح في هالوقت فتوجه له ..... لما قرب سمع ضحكات انثوية ...... ميز انه صوت ندى وصوت ثاني ماعرفه ... وكانت هالاصوات بعيدة .......
ندى : ههه ..... حسبي الله على بليسك ... في احد

يتصرف هالتصرف !!! ههه ...
شوق : شسوي فيها !!! .... رفعت ضغطي .... ماتنعطى وجه
وقف فهد عند الباب ..... وشاف ......... ندى كانت جالسة على كرسي ووجهها قباله ... كانت مركية يديها على الطاولة ووجهها على يدينها .... وباين انها مندمجة بسوالف البنت اللي قدامها ....
اما البنت الثانية اللي ايقن انها بنت عمه كانت جالسة وملقيته ظهرها ... وما شاف منها غير شعرها اللي كان مرفوع لفوق......... وانوار الحديقة كلها مشغلة ... والنافورة بعد ... ياسلام .... الله يعين ابوي على مصاريف كهرب الليلة.....
فكر يسلم .... لكنه استبعد الفكرة .... انا الحين تعباان وابغى اروح انوم.... مالي خلق اسلم ... بكرة يصير خير ..... البنت ماراح تتطير ...
رجع ورقى فوق لغرفته ....
بعد عشر دقايق ....... في الحديقة ...
شوق : اقول ندى يالله ندخل
ندى : ليش ملليتي ؟
شوق : لا والله القعدة بصراحة ما تنمل .... بس الساعة الحين 12.10
ندى رفعت يدها تشوف الساعة : اوه .... ياسرع الوقت ... ماحسينا فيه!!!! (رفعت راسها لشوق مبتسمة ) كل ذا من سوالفك الحلوة ...
شوق ابتسمت : نص هالسوالف اللي قلتها ... انتي اول وحدة تعرفها
ندى : يابعد عمري والله .... ( وقفت ) روحي اسبقيني داخل ... وانا بطفي الانوار والنافورة
مشت شوق تسبقها لجوا وهي مبتسمة ... كان ودها تضحك وتصارخ للعالم ليما تقول بس من الفرحة اللي داخلها ..... كانت خايفة ان بيت عمها مايتقبلونها
كانت تحس برهبة عجيبة من فكرة انها تجي تعيش في بيت عمها مع انها ماشافتهم ولا مرة في حياتها ولا حتى تعرفهم
شعور كبير بالرهبة كان يغمرها لفكرة العيشة في بيت يعتبر غريب عنها .... لكن ندى اثبتت العكس وممكن تكون بالنسبة لها اكثر من الاخت .... وهالليلة من احلى ليالي عمرها اللي عاشتها بعيد عن اهلها واقاربها ....
رجعت ندى ومسكت بيد شوق ورقت معها فوق للغرفة .....
*** *** ***
في بيت ابو أحمد ... نوف كانت ماسكة الجوال في يدها .. ومن القهر ماعرفت تقعد بمكان .. ترقى وتنزل ... وتطلع من غرفة وتدخل لغرفة ..
نزلت الصالة للمرة العاشرة ... وراحت رمت نفسها على وحدة من الكنبات ..
نوف : أوف !!
التفت لها أحمد مستغرب من حالها اللي مستمر لها ساعتين ..
أحمد مبتسم على شكل أخته اللي من تبرطم يطلع شكلها طفولي ..
احمد : خير وش فيك !!.... لك ساعة تمترين في البيت .. شفيك محتشرة ..
نوف : ندوه هالخاينة .... أدق عليها لي ساعتين ولا ترد ... سافهتني ..
أحمد : يمكنها مشغولة مع بنت عمها ... ليش متنرفزة ..
نوف : أيه وانا قلت لها اني بدق عليها وبشوف الأخبار وش اللي بيصير ... بس الحمارة جحدتني ...
سهى : ههه ... تلقينها الحين ناسية العالم كله .. ولا تدري عن هوى دارك ..
نوف : أيه ليش تسفهني .. لو انه جوالها مقفل ماقلنا شي ... بس يرن وهي قاصدة تسفهه ...
أحمد : ههه ... طيب انتظري لين بكرة ... ودقي عليها ..
نوف : وانا وش بيصبرني لين بكرة ... أبي أعرف وش صار ...
سهى : خللي عنك هاللقافة .... لو تبي تكلمك ردت ... سفهتك معناته ماتبي تحاكيك ..
نوف : الحقيرة هين أنا أوريها ... اصلا هي وعدتني انها تدق علي تخبرني ...
سهى : أقولك الوناسة نستها حتى عمرها ...
تأففت نوف بقهر ... قامت وراحت لغرفتها ... انسدحت عالسريرودقت على ندى للمرة العشرين .... لكن بعد مافي جواب ..
حطته عالكومدينة بعصبية .. وانقلبت عالجهة الثانية وهي تتوعد ...
ليم ما النوم غلبها ونامت ...
*** *** ***
أشرقت شمس أول يوم تقضيه شوق في بيت عمها ... العصافير والطيور انطلقت من أعشاشها بفرح ... وانغمرت الأرض بالدفا والنور ...
الساعة 9 الصباح .... فتحت عيونها ..... فركتها بيدينها .... قامت قاعدة عالسرير بكسل..
نقلت نظرها بأنحاء الغرفة .... هذي مب غرفتها ....
تذكرت ... انا في بيت عمي ....
في غرفة ندى ....
التفتت بسرعة ليمينها لقتها غاطة بسابع نومة ...... يحليلها ... سهرنا امس للساعة 2.30
رفعت يدها شافتها 9........ رجعت رمت نفسها عالمخدة لما تناثر شعرها البني اللامع عليها بطريقة حلوة ... حاولت ترجع تنوم لكن النوم خلاص طار ..
قامت وراحت للحمام ... غيرت البجامه ولبست لبس بيتي ... وصلت ... جت تطلع لكنها خافت لا تلاقي فهد بوجهها ....
فكرت .......
ندى تقول انه مايجي الا متأخر دايما ولا يصحى قبل 12 ....
توكلت على الله ونزلت .....
دخلت الصالة لقت مرة عمها جالسة تتقهوى .....
شوق : صباح الخير خالتي ...
ام فهد رفعت راسها : هلا ...هلا والله ... صباح النور ..... هاحبيبتي نمتي زين ؟!
شوق مبتسمة : أي والله خالتي .... مع اني ما نمت كفاية بس احس اني شبعانة نووم ...
ام فهد تأشر بيدها لها : تعالي اقعدي حبيبتي تقهوي معي ....
شوق : ان شالله ... ( جلست جنبها ) .... الا اقول وين عمي ؟
ام فهد : عمك توه طالع ماله سبع دقايق ....
شوق : خسارة .... كان ودي اصبح عليه ....
ام فهد : اييه ولا يهمك .... بيرجع ان شالله اليوم مبكر ... الا اقول ندى ماقامت ؟!
شوق : لا خالتي ماقامت ...
ام فهد عصبت شوي : ايا قليلة الخاتمة ... المفروض هي اللي تصبح عليك موب انتي ..
شوق تضحك : لا خالتي .. انا عاذرتها ... مانمنا امس الا على حدود ال3.... سهرتها مسكينة
ام فهد : حتى لو ... هذا انتي قمتى .... وش معنى هي ..
شوق : معليش خالتي بروح اقومها بعد شوي ....
جلست تسولف مع خالتها .... دخلت قلبها بسوالفها وروحها المرحة ...
ام فهد : اذا تبين فطور بخلي الخدامات يصلحون ....
شوق : مب الحين خالتي ... ندى متوعدتني امس ... تقول ياويلك ان صحيتي قبلي وافطرتي عني .... ليقالها الحين تبي تخلي اول صباحية صباحية تاريخية ... عاد انا مادري وش ناوية تخلي الفطور .....
ام فهد : ايه عاد مايصير تقعدين جوعانة ... روحي صحيها ... خلاص ماعاد الا الخير ... الساعة الحين 10.30 ....
شوق : ان شالله ...
قامت شوق رقت فوق .... توجهت لغرفة ندى وتوها بتفتح الباب سمعت فتحة باب غرفة ثانية من وراها ....
كان فهد اللي طالع من غرفته وشماغه على كتفه .... رفع عيونه وبصدفة تطيح على شوق اللي ملقيته ظهرها وواقفة على باب غرفة ندى ....
عرف انها مو ندى من الطول والوقفة ورفعة الشعر اللي شافها أمس بالحديقة ..... تنحنح ونزل راسه ...
شهقت شوق وفتحت الباب بسرعة ودخلت ..... فهد في طريقه كان يضحك ... حتى هالبنت فيها عقدة الشهاق ....... ماغلطت ندى يوم قالت مثلي ...
شوق اللي وقفت في الغرفة مذعورة .... من هذا صوته ؟؟؟ ... عمي طلع ........ اكيد فهد .... بس ندى تقول انه نادر ما يقوم بهالوقت ....... يالله ماشاف مني غير مقفاي ........
نست الموضوع وما عطته اهمية ... وتوجهت لباب البلكونة وفتحت الستاير وانغمرت الغرفة بنور الشمس .... التفتت لندى لقتها معقدة بين حواجبها ....... ابتسمت .... وراحت تركض للسرير وهي تصارخ
شوق : ن دى ...
ونطت فوق السرير وخلت ندى تطير شوي وتضرب بالسقف .....
ندى كل اللي سوته انها ابتسمت ولفت بوجهها لجهه ثانية .....
شوق كانت واقفة فوق راس ندى : مادريت ان نومك ثقيل .... ولا كان جبت كاس مويه ثلج من الفريزر ....
وقامت تهزها من كتفها ........
شوق : ندى .... wake up
ندى : ................
شوق : قومي انا جوعانة
ندى : ................
شوق بتحدي : طيب
مدت يدها وقعدت تدغدغها .....
ندى بدت بنوبة ضحك غريبة ولا كأنها وحدة توها قايمة من النوم .....
ندى : شوق بس خلاص .... بقوم ...ههه
شوق : الحين
ندى : ههه..... طيب بعدي عني ..
شوق بعدت وهي مستانسة انها اكتشفت نقطة ضعفها ........
قامت ندى وهي تترنح ...... كشتها طايرة ...... مشت وهي تضحك .... مفعول الدغدغة مستمر .....
شوق نفسها قعدت تضحك عليها .....
.........................
نزلوا مع بعض وتوجهوا للمطبخ .. ندى طلبت من شوق تستريح وهي اللي راح تتكفل بكل شي .
مامر ساعة الاربع الا وكل شي جاهز .... صحيح فطور متأخر لكن كان حلو ومشهي وكأنه فطور وحدة من الفنادق الراقية ... طلبت ندى من الخدامات يشيلونه ويحطونه برا في الحديقة .... كان الجو ولا اروع .... حلو نوعا ما وحرارة الشمس لسا مابعد زادت .... لكن مع النافورة تلطف الجو وصار فيه نسبة رطوبة ....
بدوا الفطور وهم ضحك وسواليف ..... وفراشات الحديقة الملونة كانت ترفرف حواليهم ...
شوي وتذكرت شوق الموقف اللي صار الصبح
شوق : اقول ندى
ندى : سمي
شوق مترددة : ام .... جلستي هنا ... يعني ...ماراح ...ماراح تضايق فهد اخوك
ندى تتفحص وجه شوق : ........ ليش ؟!! صار شي ؟!!
شوق : لا ... ماصار شي ... بس ... احس اني بصير ثقيلة عليه .. يعني موبداخل وطالع على كيفه ...
ندى حطت يدها على يد شوق مبتسمة : لا حبيبتي اطمني ... من هالناحية اخوي اصلا مايجلس في البيت كثير .... من بعد الغدا يطلع من البيت وما يرجع الا نص الليل ....... وبعدين ......تبين رايي ؟
شوق مستغربة : رايك في ايش ؟
ندى بعد ماخذت رشفة عصير : انا اقول صيري مثلي ....
شوق عقدت بين حواجبها : مثلك شلون يعني ؟!
ندى : يعني خذي الامور ببساطة ... easy ... طريقة حياتي وحياتك وحدة ... يعني صيري مثل اخته ..
شوق : يعني قصدك ....؟؟
قاطعتها : ايه .... قصدي .... عشان تكون الاموربالنسبة لك وله free
شوق : مدري احس انها صعبة ...
ندى : لا صعبة ولا شي ... مع الايام بتتعودين
شوق حاست بوزها : مدري ندى .... بس لاتنسين اني للحين ماقابلته ولاسلمت عليه حتى ....
يعني مايصير اطلع لها فجأة كذا من الباب للطاقة ... واخذ واعطي معه ...
ندى : لاتصيرين معقدة ... انا ماقلت على طول خذي وعطي معه .... بتشوفينه اليوم على الغدا وبتسلمين عليه ...
شوق : اليوم ؟.... لا ماقدر .... لاتنسين عمي ... يمكن مايرضى
ندى هزت كتوفها : يمكن يرضى ويمكن لا .... بس انا اعرف ابوي ... متفهم .. ويثق في فهد ..
شوق : ايه بس اليوم خلي الغدا في الغرفة فوق ... ماستعديت لهالمقابلة ...
ندى : كيفك انت حرة .... بس انا اقولك من الحين .... ياما بتصير لك مواقف مع فهد طالما انت عايشة في هالبيت .... راح تكون محرجة لك وله .
هزت شوق راسها : نشوف
شوي وشافت ندى عمر جايهم من بعيد وهو يفرك عيونه وباين عليه انه توه قايم من النوم ...
ندى : هلا عمر .. تعال ...
الفتت له شوق : هلا حبيبي عموري تعال اجلس ..
سحبته شوق وجلسته جنبها ...
ندى : صح النوم ... توك قايم ...
عمر بهمس : ايه ..
ندى بسخرية : ايه باين ... من شفت هالعيون متفخة وهالشعر حوسة وانا دارية ...
شوق : ههه خليه ينوم وش وراه خليه يستانس بنومه الحين ... اذا مااستانس الحين متى يستانس .... ( والتفتت لعمر )... صح عمر ؟!
عمر اكتفى بانه هز راسه مثل الأطفال ومثل برائتهم ...
ندى : ها عمر جوعان تبي فطور ؟!
عمر : ماما قالت رح كل عند ندى وسووق ...
ضحكت شوق عليه : ههه ... ( وقالت بصوت عالي ) ياحلو اسمي على لسانه ياناس .... يجنن هالولد ....
ومسكته وباسته بقوة ...
عمر : أبي عثير ...
كان كاس عصير ندى قد خلص وباقي في كاس شوق أقل من الربع ..
شوق : تبي عصير ؟!.... انت تامر أمر ...
خذت الكاس وعطته اياه ...
مدت ندى يدها لخبزه وصلحت له ساندويتش عشان يعرف ياكل ... ومدت له اياه ..
خذها وبدا ياكل .. شوي مل من القعدة وخذ الساندويتشة معه وراح داخل ..
اما بالنسة لندى وشوق
كملوا الفطور والسواليف وهم من سالفة لسالفة .
((يتبع )) .....
،،،،،،،،،،،
ماهي حقيقة التطورات اللي بتصير ؟!!

الج الخامس زء
رقت نوف الدرج رايحة لغرفتها .. فتحت الباب وعلى طول مسكت الجوال ودقت على رقم ندى ..
ظلت تنتظر رد وهي تحرك رجلها من العصبية ... تبي تفش كل هالضيقة في بنت خالتها اللي جحدتها ...
ندى : هلا نوف !!
نوف انفجرت : تدرين انك لئيمة ولا ماتدرين ... ياحمارة ... يالجاحدة ... يالحقيرة ..
ندى كانت مبعدة السماعة عن اذنها ومكشرة : هوو هوو .... شفيك ؟!... كلتيني بقشوري ؟!
نوف : ودي أذبحك ... أموتك ... تدرين ؟!
ندى : هوو !!...... ليش ؟!
نوف : ماتدرين يعني ليش ؟!
ندى : والله مدري ..... وش صاير لك انتي ؟!
نوف : وليش امس ادقدق عليك لي ساعتين ولا تردين يالسخيفة ...
ندى : أمس ؟!
نوف : أيه أمس .... ولا نسيتي وش قلتي لي أمس !!
ندى عضت على شفايفها يوم تذكرت : آآآوه ... آآآآآسفة يانوف .... كنت حاطة جوالي عالسايلنت ... ولا دريت ...
نوف تتهزا : " كنت حاطة جوالي عالسايلنت " ... وانا وش قلت ..!! ماقلت لك بدق عليك وبشوف ..
ندى : ههه ... معليش سامحيني ... امس نسيت كل شي ...
نوف : مالت عليك .... انتي أحد يعتمد عليك انتي ... رفعتي ضغطي بصراحة ..!!
ندى : forgive me .. بليز ... تعرفيني ماأقدر على زعلك ..
نوف : انطمي !!!
ندى : ههه ..!!
نوف : ولك وجه بعد تضحكين يالزفتة ..!!!!
ندى : ههه...
نوف : اقول عطيني شوق ... خليني اسلم عليها بدل مايرتفع ضغطي اكثر ..
ندى : شوق في الحمام ..
نوف : شخبارها ؟!
ندى : تهبل يانوف تهبل !!.... ماتوقعتها كذا بصراحة ...
نوف بنبرة سخرية : شلون متوقعتها ؟!.... عفريتة يعني ؟!... يعني اكيد بتصير آآدمية مثلي مثلك ..
ندى : تتمصخرين انتي وياهالوجه ... مالت عليك .... الشرهة علي انا اللي أكلمك والا اعبر عن مشاعري عندك ..
نوف باستهزاء : عشتوو!!..... اللي يسمعك يقول مرة هالمشاعر الجياشة .... !!
ندى : نوفو اعقلي ... لا تتهزين !!
نوف : عطيني بس شوق خليني اكلمها ..
ندى : اقولك في الحمام لسا ماطلعت ... آآآآآآخ يانوف ياهي تاخذ العقل ... كل شي فيها يهبل ... ماتوقعتها اجتماعية لذيك الدرجة ...
نوف : تراك حمستيني ...خلاص ابي اشوفها ...
ندى : ليش ماتزورينا .. ومنها تشوفينها ؟!
نوف : انا بصراحة مقدر اصبر ... بشوف امي وبعدين بعطيك خبر .. اوكي ؟!
ندى : اوكي ...
نوف : يالله باي ..
ندى : باي ...
أول ماسكرت ندى التلفون .. طلعت شوق من الحمام ... تمت تناظرها ندى وهي مبتسمة ..
شوق راحت للتسريحة ترتب شعرها ... وانتبهت لنظرات ندى العميقة فيها ..
شوق : خير ندى ..... شفيك تناظريني كذا ؟!
ندى : لأني للحين مو بمصدقة ... حاسة اني في حلم وبصحى منه في أي لحظة !!
شوق بمزح : تبيني اعطيك كف ... عشان تصدقين ...
ندى : لا لا مايحتاج ... بديت أصدق ..
شوق هزت راسها وهي تضحك ...
*** *** ***
عند الغدا كان الكل مجتمع على طاولة الأكل الا شوق وندى الي طلبت من الخدامات يرقون الغدا لغرفتها .
ابو فهد : اجل وين البنات .
منى : في غرفة ندى بابا
ابو فهد : وليش ؟ مو بمتغدين ؟
منى : لا بابا ... الخدامة ودته لهم فوق .
ابو فهد : ورا ما يتغدون معنا ..... كنت ابي اتغدى مع بنت اخوي
ام فهد : والله حتى هي ... قايمة اليوم من تسع تبي تصبح عليك ... بس مالحقت وقلتلها خلاص تغدي معه .... لكن تعرف بنت ومايصير تجلس مع ..... ( ونقلت نظرها لولدها فهد )
فهد انتبه لنظرة امه
فالتفت لها وهو رافع حاجب وببرود : طيب وليش ماقلتولي ... اتغدى في غرفتي ولا في المجلس ..
ام فهد انتبهت لولدها اللي حزت في نفسه : لا يافهد وش دعوة ... مهيب تتغدى لحالها ندى معها ..
ابو فهد : وانت ليش معصب الحين ؟ .. ماقلنا شي يضايق
فهد : لا ابد يبه ... ولا شي
وفي نفسه يقول ( الله يستر اذا هذي بدايتها ... مهو بصاير فيه حرية ) ...
.............
فوق في غرفة ندى ... كانوا جالسين في البلكونة وخلصوا غدا .......
ندى : ها وش رايك في الاكل ؟
شوق وهي تتنهد : اه بطني ....... ماقد في حياتي كلت مثل هالاكل أشكال وأنواع .. لذيذ !!
ندى تضحك : ههه ... اليوم مناسبة خاصة ... حتى امي نفسها ماقد طبخت طبخ مثل هذا للغدا ... العادة صنفين ثلاثة ... وان كثرت اربعة ... بس اليوم سبعة لسواد عيونك ...
شوق : الله يكثر خيرها ...... اللي يشوف هذا كله مايقدريقاوم.... حتى اني حاسة اني سامنة في الايام الاخيرة .... وان بتلت امك كذا ... اكيد بصير بلونة ...
ندى ضحكت وهي تتخيل شكل شوق بلونة .. بيصير تحفة
شوق : على ايش تضحكين بالله ....
ندى : ههه ولا شي بس تخيلتك بلونة
شوق : الله لا يقوله انشالله ... جسمي كذا عاجبني
ندى : ههه ... أي والله جسمك بالمرة خطير ..... لا تخربينه بالاكل
شوق : عيونك الحلوة عمري تسلمين ..
في هاللحظة دق الباب ....
ندى : ادخل
انفتح الباب ودخل ابو فهد للغرفة ..... وهو مبتسم ...
ابو فهد : الله الله .... شهالجلسة الحلوة في الهواء الطلق..... لو دريت كان تغديت معكم وتركت اللي تحت يتغدون لحالهم ....
ظحكت شوق : والله مو بناقصنا الا انت ياعمي وتكمل الجلسة ...
ندى : ياسلام ..... يعني انا ماكفيتك ..
شوق تناظرها بطرف عينها : لأ .... انت ماتسوين شي من غير عمي .
ندى تأشر باصبعها لنفسها وبقهر: انا ما اسوى شي يا شوقوه !!!!!!! .... هين ....
تقدم ابو فهد يضحك وسحب له كرسي وجلس : بس بس ...
ندى : ماسمعتها يبه وش تقول ...
ابو فهد يبتسم : وهي ماقالت شي غلط ...
ندى : افا ... (التفتت لشوق لقتها مطلعة لسانها وتضحك ) .... والله ماهقيتها منك يبه ...
العادة توقف بصفي ... ماهقيت ان شويق بتقلبك علي ... ( وبرطمت )
ابو فهد : يالله عاد بلا دلع ندوتي ....
ندى مثل الأطفال : مابي مابي ... زعلت ... لا تكلمني
شوق تحر ندى : عمي .... اسفهها ....شوي وترضى ... عارفتها دلوعة ...
ندى ترد عليها : يازين الدلع على البنت .... ماحصلتيه ( وطلعت لها لسانها )
طبعا كل اللي صار كان مزح ....ابو فهد يضحك ويرد .... والجلسة كانت بالمرة حلوة .
ابو فهد وقف بيطلع : يالله اجل يابناتي ....
شوق : لاه وين عمي اقعد شوي ....
ابو فهد : ودي حبيبتي ... بس بروح اريح شوي .. تعبان عقب الشغل
شوق ابتسمت بتفهم : اه على راحتك اجل ...
ابو فهد : بعد ساعة بكون صاحي ... ابيكم تنزلون تتقهوون معي ... ابغى نصير كلنا موجودين ...
شوق ارتبكت ... كلنا ؟؟ .... : ان شالله عمي ...ب .. بس ......
ابو فهد فهمها : الا فهد اللي بيطلع مثل العادة ....
شوق : ان .. انشالله عمي ... اكيد بننزل ....
طلع ابو فهد .....
بعد ساعة كان الكل في الصالة وصينية الشاهي موجودة مع الكيك ....... والسوالف والضحك قايم ......
ندى : مادريت يبه ؟
ابو فهد : لا حبيبتي مادريت .... خير
ندى تناظر شوق : شوق معى بجامعة الملك سعود ....
ابوفهد : لاه !!! ماشالله ... زين انكم مع بعض ... في أي سنة الحين ...
ندى بسخرية : توها اول سنة .... شف وجهها وتعرف ... ماكنها فالجامعة ... كنها فالمتوسطة مسكينة ....
نايف بسخرية اكبر: ههه ..... من كبرك عاد ماشالله .... ترا وجهك وجه بزر ... لا تحسبين نفسك حرمة ...
شوق نقعت من الضحك : تعجبني والله نيوف ... قدها وقدوود .... كفك كفك ....
ندى : نويف ..... انت محد كلمك فاهم .....
شوق تصرف ندى : ماعليك منها نيوف .... من الحين انت محامي الدفاع حقي اوكي ... شكلها ناوية علي ...
نايف : اوكي ولا يهمك ..... لا تخافين مادام وراك رجال .....
شوق : بعدي والله ...... رجال ولد رجال..... والله مايقدر عليها الا انت .... خلك كذا شوكة في بلعومها ...
نايف يتكلم بطريقة الرجال وبفخر : مايحتاج تقولين ..... انا داري
ندى تطالعه من فوق لتحت .. وباحتقار : مشكلة الثقة ..... هي ترا بيني وبينك سبع سنين فاهم سبع سنين ..
شوق : ما عليك منها اسفهها .... قلها الكبير كبير بعقله موبعمره ...
نايف بخفة دمه : صح لسانك شيخة القبيلة ....
الكل نقع من الضحك حتى ابو فهد .... وندى اللي ماقدرت تكتم ضحكتها على خفة دم اخوها.
رجعوا لسالفة الجامعة ....
ندى : عشان كذا يبه ... بنروح بكرة نشوف اذا انقبلت في الجامعة او لا ...
ابو فهد : خير ان شالله .... كم الساعة بتروحون ..
ندى : ام يعني تسع .. تسع ونص ...
ابوفهد : على راحتكم ..
اذن المغرب ... والكل تفرق رايح يصلي ....
بعد الصلاة كان فهد جالس مع احمد على طاولة في احد المقاهي و باقي الشباب كانوا يلعبون بلياردو .....
احمد : ها ابو فيصل شخبار بنت العم ؟
فهد مبتسم : بنت العم !!!! .... تصدق عاد اني ماشفتها ولا سلمت عليها
احمد مستغرب : ماسلمت ؟!! ..... ليش عاد ؟
فهد يهز كتوفه بلا مبالاة : مدري ... ماسنحت الفرصة .... وبعدين انا اصلا ماهتميت
احمداستغرب اكثر : ماهتميت تسلم !!!.. بنت عمك هذي ترا ...
فهد : ادري انها بنت عمي وانا قلت لا ... بس ياخي امس يوم رجعت كنت تعبان وماكان لي خلق اسلم .... واليوم ماقابلتها ابد ... ( وابتسم يوم تذكر موقف الصبح ... البنت شكلها خبلة مثل ندى )
احمد : خير... ليش هالابتسامة ؟!!!
فهد : لا ولا شي ..
احمد : فهد ترا مايصلح كذا .... البنت بتحسب انك ماتبغى تسلم عليها ...
فهد بلا مبالاة : والله بكيفها .... تحسب اللي تحسبه !!...
في هاللحظة دق جوال فهد ....
رفع فهد الجوال يشوف الرقم ... وابتسم .... جا بيرد
احمد : فهد انا اكلمك
فهد : فكني من هالسالفة واللي يرحم والديك ...
فهد يرد : الوو ..... هلا هلا بهالصوت ...... شهالغيبات ....... وينك عمري ........ انا الحمد لله بخير من سمعت صوتك ........ ههه ......... انا ماانسى حياتي ........ شخبارك عيوني ....
احمد بهمس : فهد انت صاحي ولا منت بصاحي ...
فهد اشر لاحمد بيده يسكت ......
احمد : اروح العب بلياردو مع الشباب اصرف لي ....
توجه احمد لطاولة البلياردو اللي كان مجتمع عليها باقي الشباب عبدالله وحسين واسامة
عبدالله : هااحمد .... بتلعب ؟
احمد : أيه العب ليش لا .... استعد للخسارة التاريخية
اسامة : لا تستخف فيه ... هزئني انا وحسين قبل شوي ....
احمد : مشكلتكم انكم زلايب ماتعرفون تلعبون ...... انا اعلمكم شلون اللعب على أصوله الحين
عبدالله : تتحدى يعني ... ؟
احمد مسك عصى اللعبة .. والتفتت لعبدالله بنظرة تحمل التحدي : ايه اتحدى
عبدالله : نشوف
حسين : انا بروح عند فهد اشرب لي شي بارد وراجع ....
بدت المباراة بين احمد وعبدالله .... ومن اللحظة الاولى صارت المباراة لصالح احمد ... احمد معروف بين زملائه بانه ماهر جدا في هاللعبة ... وهزائمه نادرة .. وكثير مايقولون له زملاه ليش ماتشترك في نادي وتلعب مبارايات بس هو مو بفاضي لوجع الراس .. لانه يلعب هاللعبة لمجرد المتعة وشغل الوقت ... وهالمبارايات راح تربطه وتمنعه من اشياء كثيرة ...
عبدالله : اهب عليك ... دخلتها من الضربة الأولى
احمد يضحك : قل ماشالله لا تصكني بعين ...
ضرب ضربته الثانية لكنه ماجاب شي ..!!
احمد : اعوذ بالله من هالعين .... كله من عينك الحارة ماجبتها
عبدالله بسخرية : البلا فيك انت ... لا تحطها فيني ...
احمد : اعوذ بكلمات الله التامات من شر ماخلق
ضرب عبدالله ... لكنه ايضا ماجاب شي
عبدالله تنرفز : قهر .... والله قهر .... شطفتها
احمد يضحك بسخرية : تستاهل .... عقوبتك ... المرة الجاية قل ماشالله
وكملوا لعبتهم واحمد في تقدم على عبدالله ......... بعد فترة رجع حسين
حسين : ها ... وش النتيجة ...؟!!!
اسامة : تعال ..... لا يفوتك ..... عبدالله شكله بيتهزأ اليوم
حسين : والله ماينفع له الا احمد ...!!
عبدالله بتنرفز: ورا ما تنطم انت وياه ...!!
احمد ببرود : ليش هالعصبية هذي .... خل عندك روح رياضية ياخي ..!!
أسامة : اقول عبدالله .... خلاص شكلك انت خسران خسران .... وخر خل ننادي فهد يلعب
حسين يضحك بسخرية : فهد!!!! ..... فهد رح شفه غارق في الحب لين اذانيه ..!!
احمد مستغرب : ليكون لين الحين يكلم من تركته ؟!!
حسين : ابد على حاله .....
عبدالله : من صدقك هذا يحب!!! ..... هذا يكلم بس يلعب .... ولا فهد يحب عن طريق التلفون !!!!.... مستحيل .... ماسمعته وش يقول ذيك المرة .... ماخذ المكالمات مجرد لعب وتسلية ... ولا ممكن تتطور لعلاقة جدية
حسين : اللي يسمع طريقته في الكلام يقول هذا من جد يحب ... اللي مايعرفه بيصدق على طول
في هاللحظة اقبل فهد عليهم
اسامة : الطيب عند ذكره
فهد : وانا كل ماتركتكم قمتوا تحكون فيني وتحشون ...
حسين : ابد ... مانحكي الا عن تلفوناتك
فهد : وانتوا شعليكم من تلفوناتي .. اكلم اللي ابي ...
حسين : ماقلنا شي ... بس انت مامليت ؟ ..... حنا اللي كنا مثلك ملينا من هالمكالمات
فهد : لا انا مامليت ولاني بمال .... وخروا بس خلوني العب ...
راح لعبدالله وسحب منه العصا وبدا مباراة جديدة مع أحمد ...
أحمد بأسلوب تهديد : اذا ماكنت تبي تصير مصخرة .... أنصحك تنسحب ..
فهد بنظرات حادة .. وبثقة وعدم اهتمام باللي قاله أحمد : أنا أنسحب ؟!.... انا بو فيصل اذا ماكنت تدري ....
احمد : لا أدري .... وادري انك بعد ولد عبدالرحمن ... بس خايف على معنوياتك ياخوي ...
فهد ابتسم ابتسامة تحمل الكثير من الثقة ... مال عالطاولة واستعد انه يسدد : معنوياتي دايما فوق .... وانت وامثالك مايقدرون ينزلونها شبر واحد ...
أسامة يكلم احمد : لا ياأحمد .... شكل هذا ناوي عليك اليوم ... انتبه ...
أحمد : انا بسكت .. بس برد عليه فوق الطاولة ...
اكتفى فهد بابتسامة ... وبدا أول ضربة ...
*** *** ***
الساعة عشر ونص .... كانت شوق واقفة على شرفة غرفة ندى .. مسندة كل جسمها على الدربزين ... وسرحانة بخيالها ...
ابتسمت لما ظهرت أسنانها وهي تتأمل النجيمات اللي برزت تتلألأ في جبين السما وضاءة ضاحكة ..
كل ساعة تقضيها في هالمكان تحس بارتياح أكثر وشعور بالفرح انها لقت أهلها اللي ماعرفت عنهم شي لفترة 18 سنة ...
بس هذا مايمنع الحزن اللي تحس به يكتسحها في بعض الأحيان لفقدانها الأم والأب ..
لكن حزنها على أبوها اكثر .. لانه هو اللي عاشت معه مراحل حياتها السابقة .. وبرغم كل هذا تأسى على نفسها لأنها ماعرفت أمها ... الأم اللي فقدتها وهي بعمر ثلاث سنين ..
صعب أسترجع ذكريات عنها من ذاك العمر .. آآآآآآآخ يمه .. ياترا أبوي عندك الحين .. ولا وين سكن ووين حل ؟!...
الله يرحمكم ان شالله ...
ماحست بالدمعة اللي لمعت في وسط عيونها .. وجفت لما مر نسيم قوي خلاها تغمض عيونها بابتسامة .... تنهدت ..
تراجعت بخطوات متأنية للغرفة ... دخلت وسكرت باب البلكون وراها ..
كانت ندى منسدحة عالسرير وبين يديها رواية تقرا فيها من ساعة ..
شوق : اقول ندى ... وش بلبس بكرة للجامعة ...؟!!
ندى : روحي افتحي دولابي ... وتنقي اللي تبين ..
شوق : طيب ماعرف وش اللي يناسب ..!!
ندى : أي تنورة وبلوزة ...
راحت شوق وفتحت الدولاب .... وبدت تتفحص الملابس ..
شوق : ماشالله .... متى يمديك تلبسين هذا كله ؟
ندى : بعضها جديدة ماقد لبستها ..
شوق : وليش طيب ؟!
ندى : مدري ... مافي مناسبات .... وبعدين بعضها القاها في السوق تعجبني ومااكون مخططة اني اشتري ... بس اخذها لين يجي وقتها
شوق : بس هي حلوة ... وبتروح موضتها وانتي مالبستيها ...
ندى : ...................... ( ماردت لأنها اندمجت مع احداث روايتها الرومنسية )
شوق بعد ماخذت وقت تشوف الملابس ........ خذتلها تنورة جينز شيك وبلوزة مشجر اورنج واسود مخصرة .... وراحت للحمام عشان تجربها
بعد دقيقتين طلعت.... راحت للمراية تشوف نفسها .... وندى مازالت عايشة احداث الرواية وما التفتت لشوق حتى ....
شوق انعجبت بنفسها وبدون ماتلتفت : ها ندى وش رايك ؟
ردت ندى بصرخة : لا ........ مايصير !!!!!!
شوق فزت من مكانها من الروعة : بسم الله ... روعتيني ووجع .... طيب خلاص بفسخها
التفتت ندى والدموع ماليه عيونها : لا .... حبيبها مات ... مات ..... حرام !!!
تقدمت شوق لندى : أي حبيب ؟
ندى ودموعها سيلان : قتله اللي مايخاف ربه .... الحمار !!!!
شوق ضحكت : ههه .... لها الدرجة متأثرة ؟!!
ندى خذتلها منديل تمسح خشمها اللي بدا يصب من الدموع .....
شوق : اقول ندى تراها خيال خيال
ندى تغالب دموعها : لا لا ماصدق ... بعد كل هالحب يموت " جاك " ... لا !!!
شوق : واسمه جاك بعد ..... ههه
ندى من القهر الي فيها رمت الرواية وصقعتها بالجدار لين انشق نصها ....
شوق ضحكت : شوي شوي ... تراك للحين ماخلصتي القصة
ندى صرخت : ومابي اخلصها .... بعد جاك تخرب القصة
شوق : لا لا .... الاخت رايحة فيها من جد !!!!
ندى : انتي لو قريتيها عرفتي شلون هو حظ " نانسي " يوم لقت حبيب مثل جاك
شوق تضحك على بنت عمها : ونانسي بعد .... ( وبسخرية ) وش اسم القاتل بالله ..؟!!
ندى تنرفزت يوم تذكرت اسمه : اسمه داني الله يدنيه من القبر .... الحقير... ياخي هي ماتحبك تحب غيرك غصب يعني .....
شوق نقعت من الضحك على شكل ندى ..........
شوق : لهالدرجة معجبة فيه ؟!!
ندى : مب اعجاب بس ... عشقته .... وسيم ... رومنسي .... حنون .... شتبين بعد ... ماقول الا ياحظ نانسي لقت لها واحد مثله ...
شوق : الله الله ..... (وبسخرية ) بصراحة .... بعد كل هذا ولا تحبينه .. من حقك
ندى بسخرية : تتمصخرين انت ووجهك ؟
شوق : ايه اتمصخر .... والا انت من جدك ينقلب حالك من رواية
ندى : مو بكيفي .. غصب علي ... قلبي مايتحمل
شوق راجعة للتسريحة : والله من الرقة الزايدة !! .... انسي جاك ذا وقولي لي وش رايك في اللبس يناسب ؟
ندى بعد مامسحت عيونها من الدموع : ايه يناسب
شوق : وليش تقولينها ببرود ؟
ندى رجعت دموعها : مااقدر انسى جاك مااقدر ... ونانسي وش بيصير فيها اذا درت ... ( وفزت كأنها تذكرت شي ) .... ايه والله وش بيصير فيها ؟!!!!!!!..
ركضت للرواية ولقطتها ودورت عالصفحة اللي وصلت لها وراحت للمكتب وجلست تكمل الاحداث
شوق تكلم نفسها : عسى مايصير في نانسي شي وتنهبل ندى ... خبلة !!!!
راحت شوق للحمام تغير ......... بعد شوي طلعت وكان التلفون يرن اللي قامت ندى ترد عليه
ندى رفعت السماعة : الوو
..... : السلام عليكم

الج السادس زء
صباح يوم السبت ... الساعة 7:30
كانت شوق واقفة قدام التسريحة تحط لمسات تجميل بسيطة صباحية بعد ماخلصت لبس .....
طلعت ندى من الحمام بعد مالبست هي بعد .....
ندى : الله الله ... أي دي الحلاوة ... تصدقين ملابسي طالعة احلى عليك
شوق : أيه عاد لا تبالغين ...
ندى : ما ابالغ .... والمكياج محليك بالمرة .... بينهبلون عليك البنات ... اقري المعوذات لا يصكونك بعين
شوق : تسلم عيونك ... تحرجيني ترا
ندى : يالله ننزل ... ترا تأخرنا
شوق : يالله .... let's go
خذوا عباياتهم ... ونزلوا ... بالصالة تحت كان ابو فهد جالس.....
ندى وشوق : صباح الخير
ابو فهد بحنيته المعتادة : هلا هلا ببناتي .... صباح النور
شوق راحت تحب راس عمها : شخبارك عمي
ابو فهد : بخير دامك بخير
ام فهد : روحوا افطروا قبل ما تطلعون
راحوا واجلسوا كلوا فطور سريع وقاموا ... وهم طالعين نادى ابو فهد البنات ...
ابوفهد : ندى ...شوق ... تعالوا شوي
ندى : سم يبه بنتأخر
ابو فهد : تعالوا خذوا المصروف
تقدموا له وعطا كل وحدة مصروفها ..
ابو فهد : .... وشوق اذا بغيت شي اطلبي لا تستحين
شوق : ان شالله عمي ماتقصر
خذوها وطلعوا
.......................
الساعة 10 في الجامعة .... شوق ونوف توهم طالعين من اول محاضرة ...
نوف : ها وش رايك في المحاضرة ....
شوق : مختلفة عن المدرسة بكثير ....... فرق
نوف : هذا اللي حسيت فيه انا بعد
شوق : خلينا نروح نشرب شي ترا عطشانة ...
نوف : let's go
راحوا للكافتيريا وجلسوا على وحدة من الطاولات ..
نوف بعد ماحطت شنطتها على وحدة من الكراسي : وش تبين شوق ؟
شوق : بيبسي
نوف : اوكي ... بخلي شنطتي عندك انتبهي لها ... ترا الحرامية كثير !!
شوق ابتسمت : اوكي لا تخافين
توجهت نوف للكافتيريا ....وشوق تمت قاعدة بمكانها تراقب اللي رايح واللي جاي ..
بعد خمس دقايق رن جوال نوف ..... تم يرن ويرن وشوق ماتدري ترد او لا
في النهاية طلعت الجوال تشوف من اللي يتصل ... ولقت اسم " ندى "
فكرت تسوي فيها مقلب ....
ابتسمت قبل ماترد وهي تتخيل شكلها ...
غيرت صوتها وردت بصوت مايع : الو ...
ندى : الو هلا نوف ...
شوق : أي نوف ؟!
ندى بتساؤل : هذا مو بجوال نوف ؟
شوق كاتمة ضحكتها : لا حبيبتي ... معد صار جوالها
ندى بحدة : وش قصدك ؟.... سارقته ؟
شوق : وانت يهمك هالشي ؟
ندى عصبت : طبعا يهمني ...
شوق اعصابها بدت تفلت : الجوال صار لي ...اذا انت تبغين نوف ... ترا انا ما أقدر اساعدك عمري ...
ندى تنرفزت وبصوت عالي : هي !!! ... انت لا تقولين لي حبيبتي وعمري
شوق : يوه عاد ترا اشغلتيني .... ماني بفاضية للمعجبين انا
ندى : صدق وقحة !!
شوق وضحكتها على وشك الانفجار : يوه ... تدق تأذي الناس ... وفوق هذا تشتم ....
ندى فقدت اعصابها : ماتستاهلين احد يكلمك بأدب يابنت ال.......
ماقدرت تكمل لأنها سمعت ضحكة عالية بالجهة الثانية ..... : ههه
شوق : وش فيك ندى .... مادريت ان دمك حار
ندى صرخت : شوقوه .... هذا انت ... هين يالدبا اوريك
شوق ميتة ضحك : ههه
ندى : وينك فيه انت الحين ؟!
شوق : ههه ... في الكافتيريا
ندى : هين .... جايتك الحين
سكرت ... وكملت شوق ضحكها وكانت نوف راجعه....
نوف : خير ليش هالضحك لحالك كنك مهبوله ...
شوق : فاتك مقلب سويته في ندى تو
نوف : وش سويت ؟
شوق : دقت قبل شوي على جوالك ورديت ... ومثلت عليها اني بنت مايعه سارقة الجوال ... وقعدت استهبل عليها لين عصبت وقامت تصارخ ..... وفي النهاية ماقدرت اكتم ضحكتي ... عصبت علي وهي جايه الحين
نوف : ههه .... ندى خبله طوول عمرها ..... خذي البيبسي
شوق : مشكورة
في هاللحظة كانت ندى جايه ... انتبهت لها نوف ... لكن ندى اشرت لها انها تسكت عشان ماتنتبه شوق
جت ورا شوق وشدت اذنها ....
شوق : آآآآآآآآي !!!
ندى : مرة ثانية لا تمثلين علي هاللعبة فاهمة
شوق ضحكت : ههه .... طيب بس بعدي عورتيني
جلست ندى عالكرسي : وانا وش جبتوا لي ؟
نوف : جبنا بيبسي زايد اذا تبين
ندى : أيه اكيد ابغى
نوف : عندك محاظرة ثانية ياندى ؟
ندى : لا ... وانتوا ؟!
شوق : حنا عندنا محاظرة ساعة ... من 11ل12
نوف : من بتقعدين معه لين نخلص
ندى : بدق على خلود وابتسام ... كانوا معي اليوم بالكلاس
رفعت جوالها ودقت ....
ندى : الوو...
هلاابتسام ...
شخبارك ... تمام الحمد لله
وين انتوا الحين ...
اها ...
خلاص لا تطلعون منه ..
انا جايتكم عالساعة 11 ..
اوكي ...
باي ...
جلسوا يسولفون لما جت الساعة 11 ... وقاموا شوق ونوف لمحاظرتهم ... اما ندى راحت لصديقاتها ...
..................
عالغدا الساعة 2.30 ... كانت ام فهد تبي تفتح موضوع فهد اللي مضايقها من كم يوم مع زوجها ... كان هالشي فعلا مضايقها لأن انعزال فهد عنهم قلبت نفسيته فوق تحت ...
حتى انه معد صار يحب يقعد في البيت ... كانت تبي تفتح معه الموضوع من زمان لكن ماكان فيه فرصة ... لكن الحين بما ان البنات مو بموجودين ولسا مانزلوا ... وفهد طالع برا كالعادة ..
ام فهد : اقول ابوفهد
ابو فهد : نعم
ام فهد : شف حل لولدك فهد ... مايصير كل يوم ذاب عمره عالناس ويتغدا برا ... كأن ماعنده بيت ..!!
ابو فهد بعد صمت للحظات : تصدقين عاد اني قاعد افكر بالموضوع من كم يوم ..
ام فهد : كاسر خاطري .. كل يوم طالع في هالظهرية بعد عمري ..
ابو فهد : وانا بعد حاس فيه ...
ام فهد : طيب وش الحل ..؟!
ابو فهد : انا فكرت .. ولقيت الحل ... بس القرار يرجع فيه لشوق ..
سمعوا حس البنات في هاللحظة جايين نازلين من الدرج ... دخلوا عليهم وسلموا ... وقعدوا ..
ابو فهد : ها بناتي ... شخبار الجامعة اليوم
شوق : حلوة
ابو فهد : عسى ارتحت فيها ..
شوق : الحمد لله ..
وفي نص الغدا.......
ندى : اقول يبه
ابو فهد : لبيه
ندى : اليوم .. نبي نروح للسوق نشتري ملابس للجامعة لشوق ..
ابو فهد بابتسامة : والمطلوب مني ؟!
ندى بخبث : we need some money
ابو فهد مبتسم لشوق : وليش شوق هي الي ماتطلب ..!!؟
ندى وهي تناظر شوق : هاللي قالت لي اطلبي .. لانها توها تستحي
شوق ضربتها بكوعها ...
شوق : ترا والله عمي ... ماجبت لها طاري أي شي ... هي اللي جابت هالكلام من عندها
ابو فهد : وانا وش قلت لك الصبح ؟...... ما قلت لك اذا احتجت أي شي .. تعالي انت اطلبيه مني
شوق انحرجت : كنت ناوية بس ندى سبقتني ...
ابو فهد : المهم ياشوق ... بعد العصر تعالي ابغاك في موضوع ... ومنها تاخذين اللي تبين للسوق
شوق : ان شالله
*** *** ***
في بيت ابو أحمد ..
دخلت نوف المطبخ اللي كانت امها جالسة فيه تشرف على الترتيبات النهائية للغدا ...
نوف : يمه ..؟
ام احمد : هلا ..
نوف : ليش حاطين سفرة في مجلس الرجال ... اشوف الخدامات قاعدين يودون الأكل هناك ..
ام احمد : أحمد عازم فهد ولد خالتك عالغدا ...
نوف : غريبة !!
ام احمد : خير ..!!
نوف : من زمان فهد ماتغدى عندنا .. آخر مرة كانت يمكن قبل ثلاث سنين ...
ام احمد : والله خبري خبرك ... أحمد دخل علي اليوم وقال لي ان فهد جاي اليوم عالغدا ..
هزت راسها وتوجهت للثلاجة وطلعت لها جيك موية بارد صبت لها في كوب وراحت جلست على كرسي ...
ام احمد : وليش انتي واختك مانزلتوا تساعدوني !!
نوف : وش يدرينا ... وبعدين الغدا نفس كل يوم ... فهد مو بغريب عشان نسوي له وليمة ..
ام احمد : الا شخبار الجامعة اليوم .... ماكلمتيني عنها ... اول بتموتين تبين تروحين للجامعة ..
نوف بعد ماخذت رشفة من الكاس : مدري يمه ... أول يوم مقدر اقولك رايي ...
ام احمد : اخذتوا شي اليوم ؟!
نوف : محاضرتين ... دكتورة وحدة من المحاضرات تلوع الكبد .. !!
ام احمد بابتسامة : وليش ماعجبتك ياآنسة نوف ؟
نوف : مغرورة .... رافعة خشمها علينا كننا عبيد عندها مو طالباتها ..
ام احمد : ههه ... هذولي دكاترة جامعة مو بمدرسات مدرسة ...
نوف : لا واللي يزيد الطين بلة انها عندنا اربع محاضرات بالأسبوع ... يعني بتلوع كبودنا منها ..
ام احمد شالت صينية السلطة ومدتها لبنتها : خذي نوف وديه لسفرة الرجال ..
حطت نوف الكوب عالطاولة ... خذت الصينية وطلعت متوجهة للمجلس .. قابلت احمد بوجهها ..
نوف : خذ هذي السلطة ..
احمد اخذها منها : مابقى شي غير هذا ...؟!
نوف : باقي الفطاير والعصير ..
احمد : اوكي ... قولي لأمي بسرعة ... فهد ميت جووع ..
نوف مسكت فمها من الضحك : مايستحي على وجهه ....طرار ويتشرط ... يجي لبيتنا ويقول سرعوا بالغدا ... صدق ولد خالتك هذا مدري شلون طالع ..!!
احمد وهو يشوتها بس بخفة .. وبابتسامة : اقول انطمي ... وبعدين انا اللي عازمة ...
نوف راحت راجعة للمطبخ وهي تضحك ..
نوف ويديها على خصرها : ماماتي ... السيد فهد يقول سرعوا بالغدا ...
ضحكت ام احمد : ههه .. بعد عمري جوعان ...
نوف : الا مايستحي يتطلب وهو في بيتنا ..
ام احمد : نوف وش هالكلام ... ولد خالتك ومثل ولدي ...
رجعت تلف لبنتها وهي شايلة صينية الفطاير بعد مارتبتها : خذي ودي هذا ..
خذتها وطلعت به ... ولقت اخوها ينتظرها عند باب المجلس ...
نوف : باقي العصير بخلي الخدامة تجيبه ..
خلصوا كل شي وارسلوه لسفرة الرجال ...
ام احمد : نوف روحي نادي اختك سهى .. قولي لها الغدا ..
انصاعت نوف وتوجهت لغرفة اختها ودقت بابه اللي كان مقفل : سهى ... سهى .... سهى .... هوو .... سهى وصمخ ...
سهى همهمت : نعم نوف ... وش تبين ؟!! ...
نوف : قومي يكفي نوم .... يالله الغدا ...
سهى : مابي خلوني نايمة ...
نوف : ماماتي تقول صحيها ...
سهى : قولي لها مااشتهي .... بعدين ...
سكتت نوف عنها ... كل شي ولا النوم عند سهى .. لذا تركتها ونزلت تتغدا مع امها ...
*** *** ***
في بيت ابو فهد ... بعد العصر ..
في غرفة ندى ... حيث كانت شوق تقلب وحدة من المجلات بتوتر ..
شوق : اقول ندى وش تتوقعين عمي يبيني فيه ؟!
ندى بلامبالاة : روحي له ... وتعرفين
شوق : يوه ... يابردك يالباردة
ندى كانت تقرا في رواية من رواياتها كالعادة : وانا وش دخلني ... يبيك انتي ولا انا !!
شوق : طيب تتوقعين قام الحين
ندى : ايه اكيد قام ... روحي
شوق : طيب تعالي معي ..
ندى تهز رجلها وتركيزها كله عالسطور اللي قدامها : لأ ... هو قال يبيك انتي بموضوع ما قال جيبي ندى معك ...
شوق : ندى عاد ساعديني شوي
ندى : مالي دخل ... انتي روحي لحالك ..
شوق وهي طالعة : ياللئيمة ....
طلعت شوق ونزلت تحت .... لقت عمها قاعد يشرب شاهي مع مرت عمها ومافي احد من العيال موجود
ابوفهد : هلا شوقتي ... تعالي تفضلي
شوق : تسلم
جلست وهي على اعصابها .... تم العم ساكت فترة ويقرا الجريدة ... لمدة ربع ساعة يمكن
وشوق معها بيالة الشاهي وعيونها عالتلفزيون لكنها كانت تفكر ....
تمت تنتظر عمها يتكلم لكن ساكت .....خلاص اعصابها تلفت ....... وقررت هي اللي تسأله ...
شوق بهدوء : اقول عمي ..
رفع ابو فهد راسه مبتسم : لبيه ...!!
شوق مرتبكة : آآ ..آآ.. انت قلت ..... انك ...... انك تبيني في موضوع ........ وشو ؟
ابو فهد تذكر لأنه كان ناسي : آآآآه الموضوع ...... احم .... شوق ؟
شوق استعدت تسمع .... وتعدلت في جلستها : سم ..
ابو فهد : سم الله عدوك ....... انت مرتاحة هنا ؟
تفاجأت من السؤال : وش هالسؤال عمي ... اكيد مرتاحة
ابو فهد : لا .... ما اقصد من ناحية الاكل والشرب والنوم ... انا اقصد ................. من ناحية فهد ...
شوق : فهد ؟ ........ وش فيه فهد ؟
ابو فهد : انا اسألك مرتاحة ؟! ... من ناحية دخول فهد وخروجه من البيت ؟!
هزت كتوفها : وش اقول عمي .... هذا بيته يدخل ويطلع مثل ما يبغى ...
ابو فهد هز راسه مبتسم : ادري وهو بيتك بعد ...
شوق مرتبكة من هالسالفة : طيب عمي .... وش المطلوب مني ؟
ابو فهد : شوفي عيوني ..... انت عارفة ان فهد من كم يوم يتغدا ويتعشا برا البيت ..... صح ؟!
شوق : أيه ادري ..
ابو فهد : وانت اكيد بتقعدين عندنا لما يجي نصيبك ان شالله صح ولا لا؟
شوق هزت راسها : ....... صح .....
ابو فهد : ومو بمعقول يتم فهد على هالحال الى ذاك الوقت ...
شوق نظراتها على بيالة الشاهي بيدها : ............ صح ....
ابو فهد : عشان كذا اطلب منك تاخذين راحتك بهالبيت وتعيشين زي ماندى عايشة
شوق بلعت ريقها : ويعني؟
ابو فهد : يعني يابنتي ... اعتبري فهد اخوك ... وانت اخت فهد ... عشان انت تاخذين راحتك وهو ياخذ راحته ....... هاه وش قلت ؟
شوق عيونها للأرض : ........ وش اقول عمي ... خلاص اللي تشوفه انا موافقة عليه
ابو فهد : شوفي حبيبتي انا مابي اغصبك على شي انتي ماتبينه... وعالعموم انا بكلم فهد بهالموضوع ...
شوق تهز كتوفها : خلاص عمي ... انت ابخص ..
ابو فهد رفع يده وحطها على كتفها يطمنها : يعني اكيد موافقة ...؟
شوق ابتسمت : ايه عمي موافقة
ابو فهد : بارك الله فيك ... الحين خذي هالفلوس واشتريلك اللي تبين ... وان بغيتي اكثر لا يردك الا لسانك ...
شوق : مشكور عمي ماتقصر
قامت حبت راسه ورجعت راقيه فوق .....
دخلت الغرفة ... وندى على حالها مثل العادة اذا مسكت روايه معد فكتها..
ندى وعيونها عالسطور : ها شوشو ... وش السالفة ؟
جلست شوق على السرير وهي تتنهد : احزري .....!!
تحمست ندى وصكت الرواية واعتدلت بجلستها ...
ندى : يالله عاد قولي
شوق وهي تعفس بوزها : موضوعي انا وفهد ..
ندى : أي موضوع ؟........ آآآه ... لا يكون ذاك
شوق تهز راسها : هو نفسه
ندى : شفتي قايلتلك ان الموضوع بيطلع من ابوي بنفسه ...!!
شوق : ياخوفي تكونين انتي اللي قايلتله ...!!
ندى رفعت يدها تدافع عن نفسها : لا والله ما قلت شي ولا فتحت فمي بكلمة ..
شوق تمد يدها بالفلوس : المهم هذي الفلوس خليها عندك لما نطلع
ندى خذت الفلوس منها : خلك من الفلوس الحين وقولي لي وش رديت عليه
شوق : اقنعني وقلت له موافقة
ندى : احلفي !!!!
شوق : ههه والله ... ليش منتي بمصدقة ؟
ندى : لا مني بمصدقة ..... لاني قاعدة ايام اقنع فيك ولا اقتنعت ... صدق ابوي عنده قوة عجيبة
شوق : لا قوة عجيبة ولا شي ... انا قلت لك ماأقدر افتش لفهد الا لما يكون عمي راضي
.... وبعدين هو قالي انه بيكلم فهد ..
ندى : انا قايلتلك من قبل ... ابوي يثق في فهد ... ولو واحد غيره ماقالك هالكلام ..
شوق : وهذا شي يريح بعد ...
ندى : المهم وش رايك نروح للسوق بعد صلاة المغرب
شوق : كيفك مثل ماتبين
ندى : بس خلينا ندق على نوف يمكن تبي تجي معنا ...
*** *** ***
في بيت ابو أحمد ... وتحديدا بالصالة .... كانوا احمد وسهى ونوف يلعبون آونو ...
ابو احمد وام احمد يتقهوون ويضحكون عليهم وعلى نوف خصوصا اللي كل ماخسرت صرخت وقومت الدنيا وقعدتها ..
نوف : لا ... انتوا متآمرين علي .... يامخادعين ..
احمد : ههه ...
سهى : ههه ... اجل اخليك تطمرين دوري ... اعطي الدور لاحمد عشان ماتفوزين ... احمد معه أوراق كثيرة ..
نوف : انتوا غشاشين .... متفقين من قبل انكم تتبادلون الأدوار عشان مقدر ألعب ...
احمد : ههه ... اذا عندك أي اعتراض روحي كلمي اللي حط القوانين ... احنا نلعب على حسب القوانين ...
التفتت نوف لأبوها بدلع تطلب النجدة منه : باباتي ... شفهم ... يتآمرون علي ..
ابو احمد يضحك على دلع بنته : وش فيكم على حبيبتي .... خلوها تفوز ... كل ماجت تفوز سكرتوا عليها ..
سهى ويدها على خصرها : يا سلام !!.... نخليها تفوز علينا ... لا مايصير ..
نوف بحسرة : الثلاث مرات اللي لعبنا فيها كلها بغيت افوز ... ومابقى

معي الا بطاقة وحدة ... رحتوا اتفقتوا علي وخسرتوني ..
احمد : ههه ... انتي مخك مسكر ماتفكرين ...
نوف بعصبية : يعني انا غبية ؟!
احمد وهو يرمي بطاقة من بطاقاته : والله اللي تفهمينه ..
نوف رجعت لفت على ابوها : باباتي ... شوفه يقول لي غبية ..!!
ابو احمد : اها عاد حميد ... لا تغلط على حبيبتي ...
نوف مثل الأطفال : ايه لا تغلط على حبيبته ... تفهم ؟
احمد : كملي كملي ... يالله هالمرة دوري أفوز ... مابقى معي غير ثلاث بطاقات ..
سهى عشان تغيظ نوف : انا فزت مرتين وانت مرة ... بخليك تفوز عشان نتعادل انا وياك وشرايك ؟
احمد بنبرة باردة عشان يغيظ اخته هو بعد : اوكي ..
نوف رمت اوراقها : بطلت .... بطلت معد ابي العب ..!!
احمد : هيي هيي ... خلاص انا بفوز الحين ... كملي اللعبة بعدين بطلي ..
نوف : عناد فيك ... منيب مكملة ... خلك عشان ماتفوز ..
احمد : اقول عن الدلع ... بتكملينها غصب عليك ..
نوف : ومن اللي بيغصبني ... ؟؟!
احمد بثقة : أنا .... ولا مرة ثانية مافي لعب معنا ان نجيب محمد ونخليه يلعب بدالك ..
انصاعت نوف لهالكلام ... وتوها بتلعب دورها يرن التلفون ..
قامت بترد وكأنها تبي تهرب من اللعب ..
احمد : تعالي ... خللي امي ترد ...
سفهته نوف وردت .. : الوو ..
ندى : السلام عليكم ..
نوف : وعليكم السلام هلا ندى ... شخبارك ؟
ندى : تمام ... وانت ؟
نوف : بخير ... بس قبل شوي مو بخير ..
ندى : ههه ... ليش ؟
نوف : أحمدوو وسهى هالخايسة ... متآمرين علي بالآونو ... وهزئوني ..
ندى : ههه ... ماتدرين ..!!! احمد من صغره وهو فنان بهاللعبة ... مو بشي جديد ..
نوف برطمت : متآآآآآآآآآآمرين علي ياندى ... خلوني ماأسوى ..
والتفتت لأخوها أحمد لقته يضحك عليها ..
نوف توجه كلامها لاخوها : وش تضحك عليه انت بعد ... ؟!!!
كمل احمد ضحكه وهو ساكت ..
نوف : أأأوف كرهوني بهاللعبة ...
ندى : ههه ... مادامك مشغولة باللعب اجل منتي بجاية معنا ..
نوف بفرح : وين ؟!
ندى : بنطلع بعد شوي انا وشوق للسوق ... تبغى بعض الاغراض للجامعة وبنروح ل shopping ... وقلت بدق عليك بشوف بتروحين ولا لا ..
نوف : لا لا بروح أكيد .... من زمان ماطلعت للسوق ..
ندى : أوكي ربع ثلث ساعة وبنجيك ...
نوف : خلاص بقول لأمي ..
ندى : حلو ... باي
نوف : باي ..
سكرت والتفتت لامها : ماماتي ...
ام احمد : يانعم ..
نوف : ندى وشوق بيطلعون للسوق بعد شوي وابي اروح معهم ..
احمد قاصد يغيظها : تروحين ليش ؟!... ماعندك شغل هناك ..
نوف : وانت وش دخلك ... بروح اوسع صدري ..
ام احمد : بكيفك ..
من سمعت هالكلمة من امها طارت لغرفتها تغير ملابسها .. لبست عبايتها وخذت شنطتها ونزلت لقت احمد وسهى على حالهم وكأنهم ينتظرونها تجي تكمل ..
نوف : مابي ألعب كملوا لحالكم ..
احمد : اقول تعالي بتكملين غصب عليك ...
رن جوال نوف في هاللحظة ... طلعته من شنطتها لقت اسم " ندى " يتصل بك ..
نوف : مارح اكمل انطق انت وياها ... ندى وشوق ينتظروني عند الباب ..
ردت : هلا ندى ............ اوكي طالعتلكم الحين ..
سكرت والتفتت عنهم ماشية بكل غرور وكبرياء ... اول مافتحت باب الصالة بتطلع للحوش استوقفها احمد ..
احمد : تعالي تعالي ...
التفتت له لقته قايم بسرعة وكأنه ناوي يلحقها ويمسكها ويمنعها من الطلعة ..
صرخت هي وركضت للحوش وبعده للشارع ... راحت فتحت باب السيارة ..
نوف برعب : وخروا وخروا خلوني أركب ...
ندى خافت : هوو ... وش فيك مرعوبة ... أحد لاحقك ؟!
ركبت نوف وقعدت بينهم في الوسط عشان مايقدر احمد يطلعها ... ومدت يدها تسكر الباب ..
نوف بأطراف مرتجفة : أحمد لاحقني ..... يمه يمه يخوف !!
شوق : ههه ... أخوك تراه مو بجني ...
ندى : وليش يلحقك يالخبلة وش مسوية ؟!
في هاللحظة طلع احمد لهم وتوجه للسيارة .. وضرب شباك ندى يطلب منها تفتحه ..
نوف تأشر بخوف : شوفيه شوفيه جا ..
التفتت ندى ... اهتزت الارض من تحتها ... انفاسها بدت تتسارع بشكل جنوني ودقات قلبها بعد ... بدت تحس باضطرابات عنيفة تزلزلها ....
ضرب الشباك مرة ثانية ..
شوق : ندى افتحي الدريشة شوفي وش يبغى ...
نوف برعب : لا لا لا ... خليه مسكر ...
لكن من غير ماتحس ندى بنفسها .... رفعت يدها وضغطت على الزر ... وظهر وجه احمد القريب منها بوضوح زلزل كيانها بعنف ...
احمد : مين ؟!.... ندى ؟
ندى بهمس : ايه ندى .... شخبارك ؟!
احمد تبدل عبوسه بسبب نوف الى ابتسامة وسيعة : تمام ... شخبارك انتي .. وشخبار الأهل ؟
ندى : كلهم بخير ...
كان احمد مسند يديه عالسيارة ومايل بوقفته ... اللي خلا ندى تنعفس فوق تحت .. ومهي بقادرة تحرك اصبع واحد من الاضطراب الشديد اللي معايشته في هاللحظات ..
نوف : وش تبي انت الحين ؟! ... ابعد وخلني أرووح بسلام ...
احمد قطب وبابتسامة : انت انطمي يم لسان .... مارح اخليك تروحين الا لما تنزلين وتكملين الآونو ...
ضحكوا شوق وندى غصب عليهم ...
نوف : تضحكون ؟!.... ( والتفتت لقاسم السواق ) ... قاسم روح يالله ...
احمد بعناد : لا قاسم انتظر لا ترووح ...
طبعا قاسم امتثل لأمر الرجال اللي هو أحمد ...
شوق : هلا فيك احمد شلونك ..؟!
احمد عرف انها شوق : هلا هلا شوق بخير ... شعلومك انتي ؟
شوق : بخير ..
نوف : لو تموت ياأحمد ماأنزل ... كل اللي سويتوه فيني انت وسهى وتبيني أكمل ... قسم بالله مصخرة ..!!!
احمد : لا تتحديني اشيلك الحين وادخلك داخل ...
نوف التجئت لندى : ندى ... قولي لقاسم يحرك ... ترا بيسويها أحمدوه ..
احمد : نعم ؟!... وش قلتي قبل شوي ..
نوف : ماقلت شي ..
ندى بهدوء : معليش أحمد ... سامحها هالمرة ...
احمد عفس وجهه وتم يناظر في ندى لفترة خلت الدم يتجمع بوجهها .... واطرافها تبرد من القشعريرة اللي سرت في انحاء جسمها كله ....
نزلت عيونها عنه تهرب من هالنظرات ...
احمد : خلاص .... عشانك ياندى انا بسامحها ...
نوف : ياسلام !!..... كنها هي اختك وانا مو اختك ...
احمد رجع يزجرها بابتسامة : انت انطمي ... انا عمري مارفضت لندى طلب وهي تدري ...
ندى خلاص لسانها انعقد ... وقلبها فقد دقة من دقاته .... هي تعرف وش يقصد ..... يقصد أيام الطفولة ..
نوف : خلاص خلاص طيب ... ممكن تخلينا نروح ..
رجع احمد يلتفت لندى : ها ندى .... ماودك تغيرين رايك وتخليني ادخل نوف داخل ...
ندى منزلة راسها : لا ... انا ابيها تروح معنا ..
احمد وهو يتراجع عن السيارة بذات الابتسامة : خلاص اجل .... يالله قاسم حرك ..
سمع قاسم الكلام ... ومشى ..
نوف : اوف .... عيا يحل عني ..
شوق : كان خلصتي اللعبة بسرعة .. وانتهيتي منه ..
نوف : اقولك كنت بخسر للمرة الرابعة ... وانا بصراحة كرامتي ماتسمح لهالهزائم ...
شوق : ههه ...
نوف : معدني لاعبة معهم ... مؤامرة تقهر بصراحة ...
التفتت شوق لندى : ها ندى ماقلتي وين بنروح ..!!
كانت ندى سرحانة بوجه احمد اللي كان قريب منها بشكل اول مرة يكون ... تتنفس بصعوبة ... وبهدوء تحاول تسترجع توازنها اللي أختل بسبب أحمد ...
شوق : ها ندى ؟!... وين نروح ؟
ندى بهدوء غريب : للفيصلية ... اوكي ؟
شوق : انت اخبر مني ...
الساعة 7.30 في الفيصلية ..
كان لهم يمكن أكثر من ساعة وهو يدورون بالسوق ... وشرت شوق كذا قطعة مناسبة ومعقولة للجامعة ...
نوف : ندى ... انا بدخل وجوه ترا ... ودي اشتر لي ماسكرا ... حقتي قديمة ..
ندى : خلاص اوكي وحنا بندخل محل الشوز ...
وأشرت لها المحل اللي كان بالمقابل ....
نوف : اذا طلعتوا وانا لسا ماخلصت دقي لي تلفون ...
توجهوا كلهم لمراده ... ندى وشوق لفوا محل الشوز اللي كان يعرض موديلات جديدة وعالموضة ...
ندى خذت لها شبشب سماوي بسيور ملونة وفي الوسط كرستالة ... جربتها ... وطلعت في رجلها ناعمة ..
ندى : ها شوق وش رايك ؟
شوق : حلوة ... طيب وش رايك في هذي ؟
كانت شوق اختارت لها شبشب وردي بعد بس بكعب صغير وسيورتحمل في الوسط فراشة بكرستالتين عنابية ...
ندى : مرة حلوة ... جربيها ..
جربتها شوق وظبطت على رجلها ...
خذوا اللي اختاروه ... وهم طالعين من المحل كانت نوف جاية لهم ..
ندى : لقيتي اللي تبينه ؟
نوف : ايه ... بس ماركة جديدة ... قلت خل اخذها أجرب ... وشريت بعد غلوس فوشي روعة ..
توجهوا لمحل شوز ثاني ... وخذت لها شوق منه شوز يناسب الجامعة وطلعوا ..
نوف : اقول ... انا نفسي باكسسوارات ...
ندى : اوكي نروح لاكسسوريز ... سمعت انهم عارضين اشياء جديدة ..
دخلوا لهالمحل ... واللي شرتلها حلق جديد .. واللي اختارت شنطة عالموضة واللي خذت لها سلاسل وميداليات ... يعني اشكال وأنواع ...
طلعوا وكملوا لف عالمحلات اللي يحبونها واللي دايما يشترون منها ...
نوف : انا جوعانة خلونا نروح ناكل شي ...
التفتت ندى لشوق : ها شوق .... شريتي كل شي تبينه ...
شوق : ايه تقريبا ... كل شي تمام ..
ندى : خلاص اجل خل نروح نتعشى ..
راحوا لدور المطاعم وكل وحدة توجهت للمطعم اللي تبيه ... بعد ماحجزوا لهم طاولة ..
ثلث ساعة وكل وحدة طلبها مخلص ... فرجعوا لطاولتهم ..
كانوا نوف وشوق يسولفون وهم يتعشون بينما ندى كانت تاكل بصمت وهدوء ...
نوف كانت تتكلم عن اللبناني اللي باعها في وجوه : ياربي ياشوق .... ماصخ ... يتميلح ..
شوق : لازم .... لبناني ويبيع في محل مكياج شلون تبينه يطلع ....
نوف بسخرية : لا وش يقول ... " هيدا الغلوس لأحلى شفايف متل هالآنسة " يتكلم عني ليقاله ...
شوق : ههه ... وش قلتي له ؟
نوف : وش تبيني أقوله ... قلت له " اخلص اخلص لا تزود حكي " ...
شوق اللي توها بتشرب من علبة البيبسي ... تراجعت على ورى تضحك ...
شوق : حرام فشلتيه .... هذا جزاه يمدحك ويتغزل فيك ...
نوف : يرحم والديك ..
شوق : طيب وش رد عليك ؟
نوف : " ليش زعلاني ... انا بدي خبرك انو هيدا الغلوس اجدد بضاعة وصلت عنا "
شوق : طيحتي وجهه مسكين ...
نوف : خليه يستاهل ... خلي التميلح ينفعه ...
التفتت شوق لندى : ندى وش فيك ساكتة ..؟!
ندى بهدوء : عادي ... أسمعكم ...
شوق وهي تناظر للصحن اللي قدامها : طيب وجبتك مانقص منها شي ... كلي لا يبرد ..
ندى : قاعدة آكل ...
كملوا عشاهم وخذوا أكياسهم وطلعوا ....
وصلوا نوف أول لبيتهم ... وكانت ندى تتمنى ان احمد يطلع قدام عيونها مثل قبل ساعات ...
لكن اللي فتح لنوف الباب كان محمد اخوها الصغير اللي كبر نايف ...
فكرت ندى انه يمكن طالع ... فرجعوا للبيت ..
*** *** ***
في وحدة من المقاهي الساعة 9 ... وبين الضجيج وضحك الشباب اللي من كل جهة ...
كان فهد جالس يكلم تلفون ومعه احمد وعبدالله ..
فهد : ههه .... يا بعد قلبي انتي ..
احمد يأشر لفهد : هيه فهد ... خلاص سكر .. لك ساعة تكلم الحين
فهد يأشر له يسكت : خلاص حبي ... اكلمك بعدين اوكي .... باي
سكر
احمد : ارحم نفسك ياخي .... الفاتورة بتطق الخمس الاف ..
عبدالله : أي والله فهد تراك صرت تطول بهالمكالمات بزيادة ..
فهد : اللي يسمعكم يقول انكم انتوا اللي بتسددونها بدالي
احمد : وحنا صادقين .... هالمكالمات بتدفعك غالي ترا يافهد ..
سكت فهد وهو يهز راسه باستياء من الاسطوانة اللي يكررونها عليه كل مرة ..
دق جواله وقطع عليهم كلامهم ...
احمد باستياء : شف ... ما يخلص من وحده الا تنط له وحده ثانية ..
فهد وهو يناظر شاشة الجوال : لا هذا الوالد ...
ورد...
فهد : الو
ابو فهد : هلا فهد
فهد : هلا هلا يبه
ابو فهد : وش فيك فهد ادق عليك من نص ساعة وتلفونك مشغول ... ؟!!
فهد : كنت أكلم .... واحد من الشباب ..
ابو فهد : حتى لو ... خفف من هالمكالمات شوي ... الشباب تقدر تشوفهم لا تطول معهم في التلفون ... حتى يضرك انت ..
فهد : ان شالله يبه .... بغيت شي آمرني ..
ابو فهد : أيه ابغاك بموضوع مهم .. لا تتأخر اليوم ... ابي اكلمك بالموضوع قبل ماانوم
فهد : ان شالله ... يعني كم الساعة تبيني
ابو فهد : يعني قبل 11
فهد : ان شالله ... قبل 11 اكون عندك
ابوفهد : خير ان شالله
فهد : مع السلامة
ابو فهد : مع السلامة
احمد : ها خير ...
فهد : والله مادري يبيني ابوي في موضوع
احمد : يعني بتروح مبكر اليوم
فهد : عالساعة عشر ونص انا ماشي للبيت ..
عبدالله : اجل قوموا نلعب بلياردو ... فيني طاقات ابي اطلعها ...
احمد : لا مالي خلق ... انتظر لما يجي حسين او اسامة والعب معه ..
عبدالله : خايف من الهزيمة ؟
ابتسم احمد بسخرية على عقلية رفيقه : الا قول خايف عليك انت من الهزيمة ... تعرفني ماانهزمت ولا مرة منك ..
عبدالله : اليوم بهزمك ..
احمد : لا اليوم مالي خلق ..
رن جوال فهد مرة ثانية وقطع عليهم نقاشهم ..
احمد : الوالد ؟
فهد بابتسامة اعتزاز وثقة بالنفس : لا هذي وحدة منهم ...
احمد باستياء : أعوذ بالله ... مايحلون هذول ...
عبدالله : اتركها لا ترد ..
فهد رجع الجوال وحطه عالطاولة علامة انصياعه لهم ...
فهد : مارح أرد ... ارتحتوا الحين ...
عبدالله : اجل يالله قوم نلعب ..
قام فهد معه .. واحمد تم في مكانه لما وصلوا حسين وأسامة ..
*** *** ***
عالساعة عشر وربع ... كانت ندى جالسة بالحديقة ومعها دفتر كانت تتصفحه ... صوت خرير الموية الصادر من النافورة ملطف الجو ... ندى دايما تحب هالقعدة بهالوقت بالذات ...
شوق بعد ما قاست كل ملابسها اللي شرتها نزلت للصالة تدور على ندى ...
شوق : منى .... شفتي ندى ؟
منى : بالحديقة جالسة
نايف : دايما تجلس بالحديقة ومعها دفتر مدري وش تسوي فيه
شوق استغربت وطلعت من باب الصالة المطل على الحديقة ...
مشت بهدوء لندى بدون ماتحس ... ندى كانت منزلة راسها وكأنها تقرا شي او تكتب شي
لما قربت منها شافت معها صورة صغيرة... لكنها ماعرفت لمين .. ومبين انها صورة رجال
شوق فجأة : ندى !!!!!!
ندى بروعة فزتها من مكانها : يمه !!!! .... روعتيني !!!! ...
شوق حاطة يدها على خصرها وبخبث : وش عندك هنا ... وش هالصورة اللي معك
ندى خبت الصورة بين يدينها : وش هاللقافة ...؟!!!!!!!
شوق سحبت الدفتر من حضن ندى ...
ندى بخوف : لا شوق امانه … رجعيه
شوق حبت تلعب بأعصابها : اذا تبينه الحقيني
وركضت هاربه ... وندى ركضت وراها .... راحت شوق ورا النافورة وندى محاصرتها
شوق بخبث .... مدت يدها الماسكة للدفتر بقرب الموية : ارميه في المويه ؟
ندى اعصابها تلفانه : لا شوق ترا اموت ....
ضحكت شوق وانحاشت لجهة الصالة ... وندى مسكينة ماعندها حيلة الا انها تلحقها ... روحها في هالدفتر
في هاللحظات كان فهد توه داخل للبيت ....
كانت شوق تلف وتدور في الصالة .... وندى قلبها على الدفتر لا يصير فيه شي .. وتضيع روحها
ونايف ومنى يضحكون عليهم .... وعمر نفس الشي شافهم يتراكضون بالصالة قعد يركض معهم بدون حاجة ...
ندى : شوق تكفين بليز رجعيه .... !!!!
شوق كانت ميتة ضحك ومستانسة على ندى : نو ووي ...
ندى : شوق حرام عليك رجعيه لي لا يصير فيه شي ...
شوق تركض وهي تضحك وعمر وراها : ههه .... تحلمين ...!!!
ندى برجا : يا ربي ...... شوق
في الاخير ركضت شوق لباب الصالة اللي يطلع عالحوش على طول
فهد اللي كان متوجه لباب الصالة كان يسمع ضحكات مرحة من جهة وصراخ خوف ورعب من جهة ثانية .....
شوق كانت لافة وجهها تتابع ندى .. وماحست الا ان كتفها اصطدم بشي .. ارتدت على اثرها بقوة وأوشكت انها تطيح ... لكنها تسندت عالجدار ..
(( يتبع ))