قبل لا تملكي تعالي للاستفاده

1. العوده >>> انا بس حطيت عوده ما حطيت عطر اللي تبغا عطر تكتب عطر


2. نجي لكي انتي


3. حطي عوده في كول مكان وتنظفي من كول مكان اعتبريه زواج مو ملكه


4. اخر شي ابغا اقوك هوا

السلام عليكم
انا بصراحه حابه اخدمكم بكل اللي اقدر عليه
اشياء انا والله ما انتبهت عليها ابدا وما ابغاكم تغلطو غلطتي
اول شي
جيبي ورقة وقلم واكتبي كل الاشياء اللي تفكري تاخذيها معاكي القاعه ودي الورقه انا جهزتها من بدري وكول ما افتكر حاجه اكتبو في الورقه دي
يعني تكتبي اشياء اللي تكون في شنطتك
ابره وخيط
غرا >>> استفدت منو لان في تسريحتي سلاسل ولمن وصلت القاعه طاحت ورجعت لصقتها بغرا يوهو
المبخره اللي تتبخري فيها

العوده >>> انا بس حطيت عوده ما حطيت عطر اللي تبغا عطر تكتب عطر

اكل >>> لان مع القلق ماتحسي انك جوعانه انا جلست يووم كامل ما اكلت ولمن شفت الاكل
( المعجنات اللي فوق الطاوله بس انتي حطي كروسون او معمول او اي شي خفيف ويملي البطن )عرفت اني جوعانه وجلست اكل والمصوره تضحك دخلت مرة اخويا تقولي لاتاكلي يخرب الميك اب بس المصوره قالت الا خليها تاكل عشان في الصور تكون كويسه والعريس ما يشوفها جوعانه
حلاوه بولو >> بعد ما تاكلي طيبي فمك لاتقولي لبان لان اللبان جد حيخرب البرستيج تبعك وحيخرب عند حدود فمك
كريم عشان تنعمي يدك لمن يمسكها المحروس >>> بس انا نسيتو ترا
الصندل والاكسسوار اكتبيه بالتفصيل والله مع الربكه حتنسيها
اكتبي الحلق والساعه والاساور والخواتيم
الاشرطه حق زفتك والضيافه والترحيب
ومسجل ادا كنتي تبغي تشغلي شي وقت التصوير >> جبتو بس الغرفه فيها كهربا وحده والمصوره استخدمتها بس لمن دخل العريس شغلت المسجل وبس
وسلك توصيله
وحطي عبايه تانيه وطرحه تانيه وبخريها >>> هدا امانه ما احد يسويها الا اللي حتروح مع محرمها
لان انا رحت من الكوفيره ع القاعه بعبايتي العاديه
الفستان
والجابونه
ولبس خفيف
اذا كنت تبغي هديه لزوجك احسن شي ساعه برضو اكتبيها >> بس انا ما اهديتو
دي اشياء تقريبا الشنطه

نجي لكي انتي

اول شي الحواجب شقري قبلها بيوم او يومين عشان لون التشقير يزبط وما يكون لونو مو تمام
ثاني شي وجهك شيليه قبلو اقل شي بيومين انتبهي انتبهي انتبهي تشيلي وجهك بيوم او نفس اليوم وكول ماشلتي الشعر قبل المناسبه يكون احسن لان يطلع حبوب وكول يوم والتاني تخف و اول ما تشيلي وجهك حطي كريم اسمو الاسد حطيه على طول وانتي عند الحرمه مو بس مره لا يعني في اليوم 3 مرات تقريبا ولا تخافي يدا المرهم ممتاز دا بالنسبه للي زي حالتي اول مره يشيلو وجههم بس المتعودين هما لهم الخبره وعلى فكره لاتروحي عند الحرمه وتقولي لها ابغا فتله والا شمع قولي لها اللي يناسب وجهي وبشرتي انا الحرمه قالت ليا بعض المناطق شمع وبعضها فتله
ثالثا ظهرك انا وحده نصحتني اني ما اشيلو بالحلاوه بس قلت لا انا كدا والا كدا حشيلو في الزواج ان شاء الله فعشان كدا اعتبر دا الشي بروفا وندمت لان طلع ليا حبوب فظهري واكتافي وانا انصحكم تشقرو ظهركم الا اذا كان في فتره طويله بين الملكه والزواج فيكون حلو عشان كول بعد شهرين او 3 تشيلي بالحلاوه وكمان انا ما حطيت لظهري كريم الاسد فعشان كدا الا الان ما راحت الحبوب وانتو بكيفكم لان كول بشره تختلف عن الثانيه ومو شرط اللي يسير معايا يسير مع غيري
طبعا يداتكم ورجولكم لازم رجولكم وانتبهو لاصابع رجولكم الله يكرمكم شيلوها قبل بيومين مع التشقير والظهر
انا اقولكم ايش صار في يوم الملكه
كنت على تحدي بشي مع زوجي ولمن جلسنا سوا ذكرني بالتحدي جيت بكل عفويه رفعت الفستان عشان يشوف الصندل تخيلو ايش قالي ؟؟؟؟
قالي شوفي كيف اصباع رجلك وسخ (في الجنب تحت الاظفار ) >>> اهئ اهئ اهئ
عشان هوا مايبغاني البس صندل وجيت ارقع الموضوع قلتلو لا والله انا اهتم في رجلي بس تعرف اخر اسبوع عشان كول يوم خرجه ودخله ما مداني >>>> تراك ول الرجال ينتبهو بس زوجي اسم الله عليه جريئ وما خبى شي في نفسو

حطي عوده في كول مكان وتنظفي من كول مكان اعتبريه زواج مو ملكه

وانتبهي انتبهي تكشري في صورك لمن كوني معا هانا والله ندمت رغم اني قولت للمصوره مانبغى صور يمين شمال >>> يعني نبغاها حركات معقوله وفهمت زوجي على دا الشي بس تعرفو الرجال انا اقول للمصوره لا وهوا يقول الا الا
ترى كول الصور وربي عاديه بس انا هباله فيا استحيت
ووقت الزفه كووني ريلاكس لاتضحكي كثير بس ابدا ابدا ما تكوني مكشره >>>حتندمي لو كشرتي
واقعدي اقري وصلي ع النبي واستفغر وانتي تنزفي وقولي انا ملكه والكل يستناني ويطالع فيا>>> كوني واثقه
ولاتنسي اذكار الصباح والمساء وسبع تمرات واول ما تدخلي القاعه قولي اعوذ بكلمات الله التامات من شر ما خلق ويفضل انك تكوني على طهاره ولمن تكوني عند الكوفيره وياذن للصلاه قومي صلي بسرعه عشان لو اخرتيها حتاخريها وحتسير قضا
انا لمن كونت في الكوشه ما عرفت ايش اسوي لمن طلعت ماما وامو
اقول اسلم عليهم والا لاء >>> معليش غباء في ديك اللحظه
بس عادي سلمي عليهم لازم قدام الناس
اتفقي مع احد ما ينربك وما يقلق وخليه يكون قريب منك وقت الزفه لحالات الطوارئ لا سمح الله
نحنا الملكه كانت حريم بس
ومع القلق اهلي نسيو يعشو العريس
وجا اليوم التاني يقولي حتى عشا ما عشيتيني رحت البيت جوعان >>> والله اتفشلت
بس اهلي والله كانو مجهزين عشا للعريس بس مع القلق والربكه نسيووه
وفي النهايه ترى الملكه يوم واحد ان شاء الله بس عيشيه بكل لحظه وسيبي القلق انتي راجعه على بيت اهلك اعتربيه بروفا للزواج
وانتبهي انتبهي انتبهي انا اول زيارة عمل ليا حمله تفتيش
رجولي ( شاف القدم وقالي شوفي كيف متشققه وسوده قلتلو لا ةوالله انا مهتمه بس البلاط قالي البسي شبشب بيت قلتلو لا انا البس شراب كلو صوف >>>ترقيع
وشاف هداك الكوع اللي في الرجول ما اعرف اسمو اللي في الغالب يجي مسمر >> كبيره ع الفاضي
وجا يبغى يشوف الركب هانا دفيتو عشان سيقاني كولها شعر>>> يكفي فشايل عاد الركبه ما شاء الله سواد الليل فا انتي انتبهي انا كنت لابسه بنطلون وقلت رجلي ماراح تبان لا تغلطي غلطتي
وجا قالي اشوف كوعك انتي مهتمه بنفسك ا ولاء >>> اهئ اهئ من العذاب بس
فانتي انتبهي ترى والله كول الرجال يتنبهو بس مو كولهم يتكلمو >>> بس دا زودها من اول زيارات
انا والله ما قلت دا الكلام الا والله اني ابغا لكم الخير وما ابغاكم تغلطو غلطتي

اخر شي ابغا اقوك هوا

الدعاء الدعاء الدعاء لاتنسيه وحوالي بقد ما تقدري ما تسوي شي حرام في ملكتك اغاني او لبس فاضح او تركيب رموش واظافر عشان الرسول صلى الله عليه وسلم قال لعن الله الواصله والمستوصله >>عشان ماتنطردي من رحمة ربنا وانتي في دا الموقف محتاجه الرحمه من ربنا طبعا وفي كول وقت
اتمنى الموضوع يكون خييف عليكم وتستفيدو منو واي وحده تقرا الموضوع تدعي ليا بالتوفيق وانو ربنا يسخر زوجي ليا ويسخرني ليه ويبعد عننا شر الانس والجن ويجعل ما بيننا موده ورحمه والفه وسكن مو لازم تكتب اهم شي تدعي ليا في ظهر الغيب
واي استفسار ان شاء الله اكون اقدر اجاوب عليه