قصة قصيميات بلبنان تعالوا وشوفوا انواع الضحك

1. هيله: الاخت الوسطى

((((((((((السلام عليكم ورحمة الله وبركاته)))))))
هاي فراشات حبيت انقل لكم هالقصه مره جنان
ضحك في ضحك............
جتني بلوتوث بجوالي وقلت احطها لكم يعني ملطوشه......
(قصه قصيميات فلبنان) حصه وهيله ومنيره .. ثلاثي بنوتي في بيت واحد.,, هذولي خوات ساكنين ببيت ابوهم بعد ماتوفى ومالهم في الدنيا غير هالبيت وراتب ابوهم التقاعدي..,, ومقطوعين من شجره!!
حصه: الاخت الكبيره..يلقبونها وزارة الداخليه..موظفه في احد البنوك..راتبه على قد وظيفته..عمرها في حدود الاربعين..تعتبر اعقلهم..سنعه..شخصيته قويه..

هيله: الاخت الوسطى

( الوسطى ولا الشرقيه؟!) << بدا التميلح خ .. متخرجه من معهد كمبيوتر وجالسه في البيت..تلقب بأم لسانين.. عربجيه بقوه..تكره التنانير وتمووت على سراويل السنه وفنايل العلاقي..عادي تستهبل مع جيرانهم وتنسم كفرات سيارتهم..كانت تلبس مريوله وتلبس تحته ترنق ابو خطين على جنب غير الزبيريه(وانتم بكرامه)..تموت على شي اسمه مقالب..ماتصدق تلقى خنفسان او صوارير تاخذهم وتحطهم بدرج اخته.. باختصار كانت ولد الا حبتين!!
منيره: الاخت الصغرى ..(اجل وين العظمى صاروا درجات حراره!!) << خلصينا وهاتي السالفه!!..تدرس في الثانوي..شايفه عمره على خواته لانه الصغيره..تلقب نفسه ب : ميمي << ياي!!
منيره وحصه وهيله..جالسين بالصاله عند التليفزيون..يشربون شاهي مع كراث وفصفص والجلسه عسل.. وسواليف على كيف كيفكم..,,
حصه: منااير..وش بتس ياقلبي..؟! وراتس تقل ضايقن صدرتس اليوم؟!
منيره: الحين ورانا حنا كذا..؟! كل زميلاتي يسافرون بالصيف برا وينبسطون وانا ماعمري تعديت حدود بيتنا .. ودي اسافر مثلهم..لاتحسونن بالنقص!! << تستعطف خواته
حصه: وين تبينا نروح طيب؟ ومع مين؟ من بيسنعنا .. ومن وين لنا مصروف يكفي!! انتي تحسبين المسأله سهله!!
هيله: هع هع جيبي مدرس رياضيات يحل لك المسأله!!
منيره: بدل ماتستخفين دمتس دوري لنا حل!! الله يخليكم ودي اسافر!!
حصه..هيله..متى تتطورون؟! الناس وصلوا المريخ وحنا سوريا ماوصلناه!!
حصه: حنا ماعلينا من غيرنا..السفر ماهووب سهل!!
هيله: اذا على الفلوس راتب ابوي مع راتبتس يكفون..واذا على المحرم ماعليتس ارقدي وامني انا عن ألف محرم!! صدزز ليش حارمين انفسنا مادام اننا نقدر.؟!
منيره: ايه خلاص ياحبيلتس خلينا نروح!!
حصه: طيب وين..؟!
هيله: قوه لألمانيا تكفون..عشان اتابع كاس العالم!!
منيره: اقول اووص انتي..انا اقوول قوه للبنان..عشان مانتعب انفسنا انجليزي ولاشي..اخواننا عرب..ومنه نروح نلعب بأشكالنا شووي انا اصير زي إليسا وحصه زي باسكال وانتي مثل نانسي!!
هيله: وع مالقيتي الا ذولي من زينهن..انا ازين منهن!
حصه: اقوول اهجدي انتي وياه..فرضا بنروح للبنان..من بيحجز لنا ومن بيستقبلنا ووش عرفنا بالاماكن والسكن و
منيره: خلوا كل شي علي .. انا بسأل زميلاتي ..بس انتم قرروا!!
حصه: والله اني خايفه...خلون افكر!!
منيره: ياحبيلتس الحصي تكفين ودي لو مره بحياتي استانس(وكان لهذه الكلمه وقع شديد في نفس الحصي)..!!
بعد اسبوع..نزلت الحصي على البنات بالصاله.....
حصه ومعها ورقه تقرا منها:
بسم الله الرحمن الرحيم..اما بعد..بعد مناوشات ونقاشات وتكتيكات وتفكيرات متلازمه..قررنا نحن(حصه العلي)..السفر خارج المملكه ولكن بشروط سنسردها كالتالي:
1/ الميزانيه تكون بيدي..وسوق لاتفكروون تروحون,,
2/ مسألة الكشف شيلوها من راسكم,, لو تعضين الارض ماخليتس تطلعين خشتس لأحد,,
3/ السفر لمدة اسبوع فقط,,
4/ الاقتصاد بالاكل والشرب,,
5/ ان هيله تترك عنه اللقافه وطولة اللسان,,
6/ ان كلمتي هي اللي تمشي..واي قرار اتخذه هناك ينفذ بلا نقاش,,
هذا ولو تم تجديد في الشروط السابقه فيلزم الاطراف التقيد بها..والا:
اقعدوا هنا وانثبروا ..,,
هيله ومنيره بصوت واحد: لالالا خلاص اللي تبينه بيصير!!
وبدأت هيله ومنيره والحصي بتجهيز أغراض السفر..
هيله: اقول مناير,,وش رايتس اخذ لبس كشخه..ولا كله ترنقات وقمصان؟!
منيره(بغت تجيه سكته قلبيه)وش قمصانه انتي ووش ترنقاته..تبينهم ينزلوننا من الطياره!!
الله يفشل العدوو خوذي احسن لبس نبي نروح نكشخ هناك حنا مووب اقل من غيرنا..!!
هيله: اندري..انا اقول محد يعرفنا..يعني احس اني باخذ راحتي هناك,,
حصه: وش دعوه عاد انتي مقصره هنا..اقوول تراي شارطه عليكم ولا ترى بهوون!!
هيله: لالاخلاص وه بس وانتي حبحرمحد يقولتس شي ..كنت امززح معتس يااخيتي,,
حصه:خلي مزحتس ذا بوقت ثاني..وخلصي ترى بكره الساعه8 لازم نصير بالمطار,,
منيره: اقول هلو..تكفين عطين الكاميرا حقتس ودي اخذه معي..!!
هيله: اقول طسي بذااك مابقى الا هي..ماعندي غيره بمن ريحة المرحوم!!
منيره: من زينه الحين..ابيض واسود..لا وبعد متكسره مابقى به سنتيمتر الا ملصق بشطرطون,,
هيله: ماعليتس .. يكفي انه من ابوي,,
حصه: وبعدين انتي وياه..يالله خلصوا واخمدوا بفرشكم بروح اكمل المطبخ..,,
الساعه..2 بالليل..
هيله: يماه..,,
منيره: بسم الله الرحمن الرحيم..وش بتس وجع هبلتين!!
هيله: ماادري يممااه حلمت حلم يخووف!!
منيره: خير اللهم اجعله خير..وشو؟!
هيله: حلمت ان معنا بالطياره انترتيكر..واني تهاوشت معه وجدعن من الطياره!!
حصه: يوه وانتم ماتخلون احد ينام براحه!!
منيره: هيله..اغديتس نايمه بس. وه ياشين الشهابه من كثر ماتهوجسين بالطياره تحلمين به خ وهذا اللي يشوف مصارعه قبل ينام!!
هيله: وه بس تووبه,,
(ورجع الهدوء يعم ارجااء المكان)
الساعه..8 a.m
حصه جايه من المطبخ تنافخ وبيده مغرفه: وقسم بالله ان ماقمتوا اني لااهون عن السفر..انتم كفوكم تروحون لخرخير وترجعون بنفس اليوم بعد..قومي انتي وياه يالله!!!
تقوم هلوو وميمي بشين نفس ويتسحبون للحمام(وانتم بكرامه)..بعد اقل من نص ساعه الكل كان واقف عند باب البيت..
منيره: الحين بنروح للبنان وتبيني اروح للمطار بليموزين؟!!! انا منااير اخر عمري اركب ليموزين؟!
هيله: أي والله صادقه مناير..المفروض استاجرنا دينّا2005 عشان تودينا..
منيره: تطنزين انتي ووجهتس..اصلا هذا مستواكم..حدكم بيجو 82.. حصه: اقول رجعوا الشناط خلاص..سفر ومانيب مسافره!!
هيله ومنيره: خلاص خلاص أي والله نسكت,,
ركبوا الليموزين وراحوا للمطار..,,
عند البوابه..
الهندي: هدا كمسين ريال عطي..
حصه:وشو خمسين..لاكثير..نزل شويه الله يعافيك!!
هيله: لا احسن حبي راسه..وخري وخري افتح بوجهه خط سريع واحط به نخل بعد!!
حصه: اقوول طسي ادخلي وخلين اتفاهم معه,,
هيله ومنيره في صالة الانتظار..
منيره: ياي شوفي الاشكال الصح .. واو واو شوفي شنطة هذي اللي قدامنا هذي فندي..
هيله: منهو الافندي؟!
منيره: وش افنديه..اقول اسكتي تكفين لاتحومين تسبدي!!
وهيله ومنيره استلموا الناس ضحك وتطنز.........................
حصه خلصت التذاكر وحملت الشناط وضبطت كل شي..
حصه: يالله خلونا نركب خلاص نادى علينا,,
منيره: شلون نادى؟ ماسمعت اسمي!!
هيله:هههاي ياربي يالمتطوره تبينه يقول يالله يامنير تعالي اركبي..
حصه ميته من الضحك ومناير تمشي قدامهم من الفشيله.....
وعند البوابه وقبل مايركبون..
نادى المنادي: الرجاء من الاخت حصه العلي التوجه الى ادارة المطار للضروره وشكرا..
حصه: يماه وش السالفه؟!
هيله: اقول اعترفي وش انتي مسويه؟!
منيره: ياربيه فشلتوني...روحوا لاتاقفون جنبي مااعرفكم..,,
هيله: انطمي اويلاه حنا وين وانتي وين!!
حصه: الله يستر..,,
مدير الامن: من فيكم حصه؟
هيله: اختار انت وش رايك من اللي تصلح تصير حصه؟!
المدير: تستهبلين انتي؟! ولا مانتب صاحيه؟!
هيله: الا اصحى من امك بعد!!
حصه وبعد قبصه محترمه لهيله: لا انا حصه..سم اخووي وش السالفه؟!
المدير: ممكن اعرف ميولك السياسيه؟!
حصه بعد ان طاحت خشته من هول الصدمه: وشو؟؟ وشلون يعني؟!
هيله: يعني وش تشجعين؟! هلاليه ياحضرة الزاابط
المدير: ترى لو مااسكتي انتي..عيونك ماراح تشوف النور..!!
هيله: صدزز؟ ههه احسب مير عندك سالفه..
منيره تسحب هيله برا الغرفه بأمر من حصه....
حصه: والله اخوي مدري وش تقول..ومافهمت قصدك!!
المدير: ممكن تفمينن عن سبب وجود سكاكين بمختلف الاحجام حاطتها بشنطتك؟!
حصه: هاو .. وش فيها يعني..انا خفت ناخذ شقه مابه مواعين..قلت اخذ احتياطاتي من هنا
المدير: شايفتن بالروضه تلعبين علي؟! اعترفي وش وراك؟!
حصه: والله العظيم هذا السبب حتى شف الاغراض ماخليت شي بالمطبخ ماجبته!!
وبعد تمطيع حلوف وايمان..
المدير: شوفي سكاكينك بتتصادر..وبتوقعين على تعهد..والله يساعدكم ولاتعودين له مره ثانيه!!
حصه: سم وابشر..
..حصه وهيله ومنيره..ركبوا الطياره,,
المضيفه: مرحبا اهلين وسهلين..شرفتووا..ممكن تعطيني تزكرتك بليز؟! ايه اختي هوون الكرسي تبعك..تفضلي..
حصه ومنيره صاروا جنب بعض..اما هيله طلع مكانها جنب رجال..
هيله: وش تبين انتي!!! وربي مااقعد هنا لو اتعلق بالجناح!!
الرجال: ههه
هيله: وش تضحك عليه انت ووجهك استح على دمك وجع!!
الرجال: انا اسف!!
هيله: اقول اووص بس! << اسلوب خ
المضيفه: ماعليه اختي هيدا هو محلك..مو بإيدي انت اجلسي هوون وبعد ماياخدوا الركاب اماكنهوون فيكي تغيريه!!
هيله: اقوول لو يجي ابوي اللي بقبره يقول اقعدي ماقعدت..ماعلي دبري عمرتس!
الرجال: ههه ههه
هيله: ضحكت من سرك بلا...خير خير وش تناظر؟! تبين اسوي بوجهك عزيمه؟!
الرجال طاح من الكرسي من الضحك!!
هيله: وتبينن اقعد بعد!! اقول والله لو اركب مكان الطيار ماقعدت هنا!!
والرجال مازال مستمرا في الضحك المتواصل
حصه ومنيره لاهين بتقليب القنوات..,,
سمع المضيف صوت هيله الرناان وجاء يشوف المشكله..
المضيف: خلاص اختي تفضلي اجلسي هناك فيه بالدرجه الاولى مقعد فاضي
هيله(تقل وده تستحي): شكرا الله يعافيك..,,
وجلس كل واحد بمكانه..بانتظار اقلاع الطائره الى بيروت..,,
بدأت الطائره بالاقلاع..,,
استقر كل من حصه ومنيره بأماكنهن .. أما هيله فقد أخذت لها مقعداً في الدرجة الأولى..,,
وشوية شوية<< وينك ياسيبويه!! بدأت هيله تتحدث مع السيدة التي كانت قابعة في القرب منها..

• مرحبا ياام الشباب..,, << ماهيب عربجيه ابدن ابدن
• اهليين وسهليين ..
• وش اسمتس انتي؟!
• انا السيده كارول..
• كارول سماحه؟؟ خ
• لأ شو كارول سماحه!! انا وحده تانيه!!
• ايه ادري.. انتي لبنانيه؟
• أي لبنانيه اصل وفصل
• فصل ولا مقصف خ
• باردوون ؟!
• لا حرون هههاي
• عفوا ماعم بفهم عليكي..
• لا ولاشي المهم .. انتي موظفه ولا مثلي حاطزه بالدار..؟!
• شو يعني حاطزه؟؟ لا انا سيدة أعمال ,,
• أحلى ياسيدة الآعمال..!!
• (تبتسم ماتدري وش السالفه )
• وش تشتغلين؟؟ تبيعين غنم ودبش وحركات؟! << هذا حده المسيكينه ههه
• والله ماعم بفهم شو أصدك .. لكن انا بشتغل بالاسهم وهيك بشوف شغلي بالحافظات ويعني هيك شي ?
• حافظات؟؟ ايه يعني تطبخين وتبيعين؟!
• إطبخ شو؟! لا حبيبتي انا عم بشتغل بالاسهم..!
• يعني وشو انا مااعرف,,
• انا بفهمك .. لكن شو اسمك؟
• انا اسمي هيله .. تقدرين تنادينن الهلّي << ام العربجه!!
• لأ مابدي إلك الهلي .. بدي ناديك هلوو ممكن؟!
• ايه ميخالف.. ان بغيتي نادين سحيله ام الخلاقين..
• ايه حلوو نادين .. خلاص اسمك نادين؟!
• لا والله انتس تنكه!!
• شو تنكه؟!
• ماتعرفين التنكه؟! << بريئه ياعالم ,,
• لا مابعرف,
• انا اعلمتس بس انتي علمين وشو شغلتس..
• - - - - - - - - - - - - - - - - - - - - - - - - - - - - - - -