قصه واقعيه الوحيده

1. بعد متابعتي وقراءتي لكثير من القصص الموجودة بالانترنت


2. لكن اناا!!!!! من بيزوجني !!! ولو صار وتطلقت او ظلمنى زوجي لمن بروح!!

هاذى اول مشاركه لى معكم والصقه منقوله لكن اعجبني فيها انها واقعيه واعرف صاحبتها شخصيا
بسم الله الرحمن الرحيم

بعد متابعتي وقراءتي لكثير من القصص الموجودة بالانترنت

لاحظت الأكثر أو الأغلب تكون من نسج الخيال عاد قلت ليش مااكتب لكم قصه حياتي ومن هالسطر أوعدكم واحلف باني ماراح اكذب او أبالغ بشي فيها ..ابي اكتبها يمكن علشان أفضفض لانى مو لاقيه اللى أفضفض معه
ويمكن بعد لان حياتي وصلت لطريق مادري وش بيكون آخره وحاسه انى ماراح ادخل النت كثير زي أول أو نهائيا ماراح ادخله علشان كذا حبيت يكون من آخر الاشياء اللى كتبتها فيه قصه حياتي وغرضي إنكم تدعون لى ولوالدتي وراح اتركم مع قصتي (طبعا راح أغير اسمي)
في يوم من الأيام سافر محمد وزوجته والادهم لديرتهم وكانت أول مره يسافرون لها بعد ماجابوا أولاد
المهم كان عنده بنت اسمها ريم عمرها 15سنه
بعد ماوصلوا لديرتهم وحظروا أكثر من مناسبة فيها جا واحد من أقارب محمد وخطب ريم لولده فهد
المهم محمد وافق مع ان فهد مافيه اى مميزات ولاحتى يعرفه زين ومع كذا وافق وزوجه لريم
ولما رجعوا للرياض قال محمد لزوجته عن الموضوع رفضت وقالت البنت توها صغيره
لكن محمد اصر على رايه وقال بنتى وانا ادري بمصلحتها تزوجت ريم فهد بليله ربكم اعلم فيها ريم كانت صغيره وطول الوقت كانت تبكي ورافضه هالزواج والغريب ان فهد مااهتم برفضها له
اخذ ريم وسافر معها لجده لمكان سكنه وعمله مرت الايام وهو وريم من مشكله لمشكله
وخصوصا ان فهد كان مدمن كان يجي لريم بآخر الليل سكران ويضربها ..اتصلت ريم على أهلها حجز لها فهد وتركها تروح للرياض
للأسف ريم كانت حامل وجابت بنت وسمتها خلود (اللى هى انا) وعاشت خلود مع امها فى بيت جدها محمد
لحد ماوصل عمرها 5سنين بعدين جا ء فهد يبي ريم وخلود وعد جدها انه تاب وترك الادمان ويبي يبدا حياته من جديد صدقه الجد وغصب ريم للمره الثانيه انها تروح للمجرم فهد
عاشت ريم معه فتره كلها حرمان وقساوه بس هالمره كان فى خلود معهم فى كل مره يزعل منها فهد
يضربها قدام خلود ويسحب خلود منها ويقول (شوفيها زين ترا هاذى آخر مره بتشوفينها)
دائما كان يقول بيوديها لدار للأيتام ومرات يقول لريم بطلقك وبتزوج وحده اخلى بنتك شغاله لها
بعد معاناة طلق فهد ريم وتركها هى وبنتها مع جدهم محمد عاشت خلود مع جدها احلى عيشه هى وامها
وكملت ريم دراستها وكافحت وتخرجت من جامعه الملك سعود وأخذت دورات بالحاسب الا ان الله مو كاتب لها تحصل وظيفة دورت ودورت لكن الحظ معاندها ..تخرجت خلود بعد بس كانت من كليه لكن حظها كان مثل امها ولاحصلت وظيفة
حاليا خلود عمرها 24سنه ..طول هالفتره جدها كان يصرف عليهم بنفس طيبه
لكن الحين بدا يمل او كرهها هى وامها ماادري لكن االلى اعرفه انه تغير عليهم
وهالشي أثر فى نفسيه خلود وامها صاروا على الطالعه والنازله يسمعون كلام تجريح
حاليا خلود فى حيره من امرها ولاتدري بكره وش مخبي لها ولامها هذا جدها اللى شالهم بيعونه بدا يتغير وشلون لو يتوفى ..؟؟ وين بتروح خلود وامها..؟؟ خصوصا انا ابو خلود مايجيها ولايصرف عليها ولايعرف حتى شكلها..!!
هنا بكتب نهاية القصة وأقولكم قصتي انتهت وبكره وش مخبي مادري بس اللى اعرفه ان الخوف بيضل يكبر كل يوم لانى مالى سند بهالدنيا غير امي
اقول بكره اتزوج لكن ممكن زوجي يعيش امي معي!! او ممكن يصرف على امى!! فى اشياء كثير فى بالي
لو بكره مصيري صار مثل امي واصبحت مطلقه!! وين بروح على الاقل امى حصلت ابوها جنبها

لكن اناا!!!!! من بيزوجني !!! ولو صار وتطلقت او ظلمنى زوجي لمن بروح!!

اتمنى منكم تدعون لى ولامى..انتهت قصتى وهاذى هى باختصار شيديد ادري مافيها حوارات مثل باقى القصص السبب وبكل بساطه انا مو كاتبه ولاعندي ملكة الكتابه الا انى سهرانه وغرقت دموعى مخدتى وحبيت اشارك النت اللى دائما اجلس اسهر معه همومي واطرح مشكلتى يمكن تكون عضه للي يبي يطلق او للى طلق زوجته وله منها اطفال انهم مايقطع فيهم ويزورهم ويحسسهم ان لهم أب سند وظهر لهم
علشان مايجي يوم وضناه يرفع يديه لسماء علشان يدعي عليه مثل مااسوي انا!
أحب أقولكم بعد ان أبوي تزوج وعايش الحين مع زوجته وأولاده حياه سعيدة
تارك وراه بنت مسكورة قلب وجناح
(لاتنسوني من دعائكم ولاتنسوون امى)
وآآسفه للاطاله
الوحيده