كل المتفوقات بالعلمي والادبي نصايحكم تكفون

والله اني نفس الحاله
اتمنى ادخل طب
يارب احد يفيدنا

قلبوا أنا دخلت عشان أفيدك لأني السنة اللي فااتت الحمدالله تخرجت وبالنسبة حلوة ومرت بالتجربة حبيت أنقلها لك
أول شيئ قلبوا اذا كنتي علمي فأنا أقول عن جد الله يهنيك فية لأنة مرة روعة والصراحة ممتع
قلبوا لاتخافي أبداً انا كنت زيك خفت ولكن عقب مابديت بالدراسة صاار لأمر ممتع وأكثر كمان
انا من ناحيتي الصراحة ماكنت أدرس يوم في يوم لأنة مدرستنا كانت مافي جدول لأختبارات القصيرة يعني كل يوم أختباار
يعني أجي من الممدرسة وأدرس بس الماادة اللي علي بكرة أخباار فيها وأذا كان مافي أختبار ماأدرس بس أحل وااجباتي
ولازم قلبوا تصيرين متعاونة مع لأبلات عشاان هم يتعاونوا معك ويساعدوك
ومن ناحية النسبة لاتشيلي همها اذا كنتي تدرسين وشاده على حيلك ولأهم ولأهم ولأهم انك تكوني مركزة أثناء الشرح وأنا والله هذا اللي نفعني أكثر شيئ
اتمنى أكون افدتك ياعسل ( ربي يوفقك ياارب ويسهل أمرك ويسرة وتدخلي القسم اللي انتي تبية )
أي استفسار لايردك لأكيبوردك أنا جاهزة
أدعيلي أنا ربي يفرجها علي وتححقق أمنيااتي أمين

اهليين قلبي
انا رايحه ثالث علمي ومريت في ثاني << اكييد مريتي اجل طرتي لول
فلذا ان شالله افيدك واقدم لك نصاايح
اولا ..
تقدرين ترفعي مستوواك وتجيبي 100 بالسهوله بس لزوم الجد والاجتهااد
ثانيا ..
حطي هالهدف قداام عيونك ولا تتنازلين عنه بسهوله
ثالثا ..
توكلي على الله واعرفي انه قاادر على كل شي
رابعا ..
الجد والاجتهااد والمذااكره يوم بيووم
مو تذااكري وتجتهدي اول شهر وبعدين تتكاسلين وتهملين لا مايبغا له كذا
وجووب ماتضغطي على عمرك من البداايه مشاان ماتطفشين في النهاايه
وحااولي كل يوم خميس الصبح تذااكري مااده وحده من اول درس الى اخر درس وصلتوه
>> لاتقولي صعب بالعكس مراا سهل ومراا بيريحك
كانت ابله الحااسب تخلينا في حصتها نذااكر من اول درس الى اخر درس وكنا مانحبها واستغفر الله كانو بعض البنات يدعون عليها
وكل يوم اربعاء حصتها كنا ماننام من الخووف نجلس نذااكر ونضغط على عمرنا مشاان مانوقف وتنقصنا
يوم جا الاختباارات النهاائه انا ماراح احلف لك بس راح اقولك انو ذااكرنااها في ساعه او نص سااعه تخيلي
بس نقراا الكتااب .. لانو خلاص حفظنااه ومايستدعي نذااكره حتى الدروس حفظنا ترتيبها من كثر مانذااكر فيه
وكمان مشاان الاختباارات الدوريه بيصير عندك ضغط مو طبيعي
يعني لا تستغربين لاصار بيوم واحد اختباارين او ثلاثه
الا اذا ابلاتكم بيرحمونكم << اتذكر يصير عندي باليوم اختباارين مثلا رياضيات وحديث << وطبعا دوري
فلذا حااولي قدر مستااطعتك تفتحي كتااب يوم الخميس ماياخذ من وقتك سااعه او نص سااعه ومشاان كمان في الاختبارات النهاائيه
بيصير مراا سهل عليك وماتتعبين في المذااكره << ترى ذي نصيحه واتبعيها
وترى الفيزياء يبغاله مذااكره كل يوم لانو بصرااحه مراا صعب اصعب ماده في ثاني الفصل الاول هو الفيزياء
ولانو كان صعب وماأذاكره اول باول في الاختباار ذاك اليوم مانمت اذاكر وابكي من الخووف وكان اختباار دوري
<< مو بس انا كل بنات الفصل واكثرهم جاو وهم مو حاافظين حتى القواانين يقولون مايمدي نحفظها
وترى ثااني مراا حلو ه بس يبغالها جد ومذااكره
وكمان نصيحه اذا نقصتي مو تترااجعين وتقولي خلاص انا نقصت لا والف لا
تنقصين درجه ولا تنقصين 10 درجاات
والله يوفقك ياارب وتفرحي بالنسبه العاليه ياارب
واي سؤال انا حاضره
وادعي لي بالنسبه الحلوه في القدرات والتحصيلي

رفع الموضوع
ياليت احد يسعدنا
انا طلعه تانيه تانوي

اهم شي المذاكرة اول ب اول انا فادتني كثير العام
خآصه ايام الإختبارات النهائية ب ترتاحين مره
و أهم شيء التركيز في الحصه واي شي مهم تقوله المعلمه اكتبيه
لاتتكاسلين وتقولين مو لازم !
لأن الملاحظآت هذي والقوانين ب تفيدك ايام الاختبارات النهائية وبتفيدك بالقدرات والتحصيلي
و إذا نسيتي الدروس بتتذكرينها مع الملاحظات على طول
و لاتنسين شدي حيلك بالرياضيات لأنو عن 6 درجات
حاولي ماتنقصين فيه ولا ربع درجه
الفيزياء كآن صعب علي مررة الله يعينكم يارب انا بسببه كرهت الماده بكبرها ومعلمته بعد
وبالنسبه للإختبارات القصيرة أكيد بتكون مُتعبه مرره
بس بالتنظيم كل شي بيمشي تمام معك
والغياب ياليت تنسينه احسن والله لأن اذا فاتك درس ماراح تفهمين ولا شي من المادة
كلها مرتبطه ببعض
طبعاً لاتنسين الدعآء الي هو قبل كل شي
صراحه سنه ثآني كانت سنة صعبه ومتعبه صحيح لكن مع ذلك استمعت فيها مرره
والله يوفقك وتصيرين آكبر طبيبه ..
دعوآآتك آتخرج من ثآلث ب نسبه زينه وفي القدرات والتحصيلي بعد ..

شوفي ياقلبي.. انا طالعة ثالث ثانوي علمي..وبحاول افيدك من اللي استفدته بسنة ثاني..
أهم نقطة هي الانتباه لشرح المعلمة..وأي نقطة تقولها خلي معك اوراق الملاحظات اللي تجيك صغيرة وملونة وتلصق في الكتاب .. واكتبي فيها الملاحظات اللي تقولها..وطريقة حل المسالة او المعادلة بالعامي لو بغيتي اسهل لك ..بمثل الطريقة اللي صاغتها المعلمة او بالطريقة اللي تفهمينها..بحيث لو بغيتي تذاكرين الدرس بعدين ماتنسين كيف طريقة الحل وبالتالي تعتمدين على الحفظ بلا فهم وهذا أكبر خطأ..كنت ماانتبه للشرح ولا اسجل الملاحظات ودايم اأجل اقول قبل الاختبار اخذ كتاب بنت كاتبتهن وانقل منها..ولايمديني اخذ ولا تغاب البنت ولايجي ظروف واصلا شرح البنت بيكون يفهمها هي باسلوبها بس يمكن ماتفهمين مثل اللي صار لي..وبالتالي احفظ الاشياء اللي يبي لها فهم..على شان بس اختبر واخذ درجة ويوم جيت في النهائي نكبتني هالطريقة نكبة..
والنقطة الثانية..النوم بدري يعني الظهر خذي لك نومة لاتقل عن ساعة ولاتزيد عن ساعتين.. تريحك وتصفي ذهنك وفي الليل نومي بدري لاتتأخرين عن 11 ..
النقطة الثالثة:حلي واجباتك اول باول ويفضل قبل تحلين الواجب تطلعين على الدرس وتقرينه اكثر من مره مو شرط حفظ لا اهم شيء قرااءة لاني كنت بالاحياء اطنش شرح المدرسة لان شرحها موب زين وكنت ماانتبه زيادة على كذا واحل الواجب تسكيته بس حرفين وانا مغمضة ويوم جاء النهائي الله لا يوريك ميتين صفحة ورب الكعبة أغلبها ماادري وشي ولا ادري انا قد خذناها مع اني ماقد غبت الا كم يوم لظروف صحية .. فاهم شيء تحددين المعلومات اللي شرحتها الاستاذة في كتابك لانها ممكن تكون من النوع اللي مايشرح كل شيء وبالاختبارات تركز على اللي شرحته وهذا مايمنع تذاكرين اللي ماشرحته احتياطا بس يكون عندك فكره عن النقاط المهمة وهي اللي تركزينن عليها وتراجعينها..
النقطة الرابعة:شوفي انا الحمدلله نسبتي حلوة يارب لك الحمد..وماكنت من النوع اللي يذاكر اول باول لاني اطبق هالطريقة اول اسبوع ثم اطفش اكره الموااد والدراسه..فافضل طريقة تحطين لك مدرسة خصوصية في المواد اللي تصعب عليك.. مثلا الرياضيات والفيزياء وتتابعينها حصتين في الاسبوع تخلصين فيها كل الدروس اللي خذتيها بالمدرسة وكذا مادتين صعباات يطيح عنك همهن.. والانجليزي ممكن بعد كل وحدة او نصف وحدة تراجعينها يوم الخميس مثلا ..ومواد الدين سهلله جدا ماعدا الفقه صععب شوي ويبي له مذاكرة اول باول.. والنحو والادب شويات وسهلاات لاتشيلين همهن بس الدب احفظي الابيات اول باول وتأكدي من اول السنة هل معلمتكم تحدد اذا كان نعم فلا تذاكرين الابيات لانها ممكن تحذف بعدين نصها ويروح تعبك خسارة ويلخبط عليك..واذا لاا..احفظي الابيات اول باول.. والحاسب النظري شوي مره والعملي يبي له تركيز وكتابة شرح مختصر للطريقة في اوراق الملاحظات اللي قلت لك عليها..والتطبيق في البيت يعني مثلا كل يوم اربعاء اذا جلستي على النت خلي لك نص ساعة تطبقين فيها..وش بقي ام الكيمياء لو تلاقين فيه صعوبة انصحك بالمذاكرة اول باول في هالمادة تحديدا تلقين سهولة بعدين موب طبيعية اذا ذاكرتيها اول باول..اعتقد خلصنا المواد بكذاا..
وللمعلومية اولى ثانوي فيها ضغط رهيب يعني باليوم الواحد يجيك اكثر من امتحان سواء دوري او نهائي..لكن ثاني ابداا ابداا مافيها ضغط ويقولون هي اسهل سنة ثانوي..مره سهلة وممتعة..وبتحسين فيها براحة فظيعة بعد اول وبتلاحظين عندك وقت فراغ كبير مو زي اول يالله ناخذ نفسناا..
انا بالخدمة خيتو اي مساعدة ارسلي لي على الخاص واذا قدرت ماراح اقصر..
ربي يوفقك ويكتب لك اللي فيه الصالح والخيره
دعواتك لي بالنسبة الحلوة في ثالث وتسهيل القدرات والتحصيلي خاايفه منهم.. وبالشفاء العاجل وتفريج الهم

مآششآء الله آلبنآت كفو ووفو
وآهم شيء آلمذآكره آول ب آول
وربي يوفقك ونشوفكم من كبآر آلآطبآء

الله يحقق لكم يارب كل الي تبونه
وكلكم تجبون 100% في الثانوية والقدرات والتحصيلي وترفعون راس اهاليكم وتتخصون الي تبونه ويسهله عليكم
يارب آآآآآآآآآآآآآآآآآآآآآآآآمين

انا الحين هالسنه تخرجت من الثانوي وانقبلت بالشي الي ابيه وهو الاقسام الطبيه صحيح توني ماتخصصت سنه تحضيريه بس كل الاقسام الي فيها حلوه وطبيه اهم شي
المهم بالنسبه للثاني مااذكر اني اذاكر لاختبار شهري ولانهائي بالمرره يعني كانت مذاكره عاديه وجبت امتياز
لكن ثالث شديت على نفسي بالنسبه للكيمياء كنت احضر اول بااول وهالشي ساعدني لان الاختبارات النهائيه مذاكرته عدل انحست وكله ابكي مدري وش سار لي بالكورس الاول والكورس الثاني معن الكيمياء احلى واحسن ماده بس الحمدالله التحضير فعلا استفدت منه وجبت بالكيمياء مجموع الفصلين 100 يعني بالتراكمي 400 مانقصت ولادرجه
وهم الرياضيات انتبه للشرح اول بااول وبس نهايه السنه كل يوم نذاكر بااب بس عشان نركز ونفس الشي جبت 100
فيه بالنسبه للفيزياء ماذكره عددل يمكن لاني اكرهه بس نصيحه ذا بالذات ذاكريه اول بااول
والاحياء ماده ممتعه وتعتمد على المعلمه لان بثاني كان حفظ معلمتنا كذا شرحها بس بثالث معمتنا حلو شرحها وتخليه فهم وسهل بس ذااكريه اول بااول لاانه يعتمد كثير على الحفظ طبعا
بس ااختبارات بالنسبه للمدرستنا تقريبا يوميا اختبار ماده لانا احنا بعد كل باب اختبار ماتجي نهايه السنه الا انتي مذاكره الكتاب كله
يعني باختصار رياضيات انتبهي للشرح
الاحياء احفظي مع المعلمه
فيزياء ذاكري اول بااول
كيمياء تحضير
هذي وجهة نظري اتمنى لكي التوفيق ان شاءلله