كوفي ينافس ستار بكس من اختراعي وبالصور وش تبون بعد

السلام عليكم ورحمة الله وبركاته
فراشاتي العزيزات مع دخول الشتاء نحتاج لشي دافي يدفينا من هالبرد الي الله يكافي يدخل بالعظم
وبهالمناسبه الثلجيه جبت لكم كوفي من اختراعي وتصميمي << اما تصميمي وين صوره هي خ
صراحه انا من مدمنين ستار بكس وبما ان صاحبة يهودي ما ودي اكسبه وصرت كل ماشربت كوفي عندهم احس اني اقتل به فلسطيني فتظامناً مع اخواننا الفلسطينيين ولمحاربه اعداء الله اخترعت كوفي يهوس
بصراحه اعتبر هالكوفي منافس لستار بكس
واكتشفت هذا الشي لما صرت اروح لستار بكس وما استلذ بكوفيهم مثل اول لاني ماصرت احس بفرق كبير بين كوفيهم والكوفي الي اصلحه وهذي شهاده الكثير الحمدلله
حتى ان مره صلحته لاخوي وصديقه وحطيته لهم بمق عشان ما يحسون انه شغل بيت وقلت لهم اني طالبته من كوفي جديد
وبعد ساعه جاني اخوي يسألني وش هالمحل قلت له بالفم المليان :
ليش تسأل ؟
وجاوبني حرفياً : كوفيه موب صاحي
للترجمه( موب صاحي يعني حلو ) خ
عاد انتم عارفين الشباب ما يمدحون الشي الا اذا كان توب
المهم ماودي اطول اكثرمن كذا لاني بديت احس اني طولت بالسوالف خ << توها تحس خ
هذي صوره الكوفي
وهذي من قريب
ندخل بالطريقه
تجيبون غلايه الحليب وتحطون فيها
3\4 كوب ماء (نفس الكوب الي بتشربون فيه الكوفي)
رشه فانيلا
1 ملعقه صغيره نسكافيه
4 ملعقه صغيره حليب بودره
1\2 ملعقه صغيره دريم ويب
1\4 ملعقه صغيره كاكاو بودره
1 ملعقه صغيره كوفي ميت ( مبيض القهوه )
2 ملعقه صغيره سكر ( او حسب الرغبه )
2 ملعقه صغيره صوص الكراميل
واغليهم بالغلايه
لما يبدى يغلي سكريه وصبيه بالكوب .. طبعا الكوب بيكون مو مليان يعني تقريبا للثلاث ارباع .. زيني فوقه بالقشطه المضغوطه وبوريكم صورتها علشان تعرفونها تلقونها بالسوبر ماركت جنب الاجبان والالبان
المهم بعد ما تزينينه بها صبي فوقه من صوص الكراميل للتزين وللتحليه
الي ع اليمين هي القشطه المضغوطه والي جنبها صوص الكراميل
وبالنهايه يطلع لكم الشكل التالي
وبالهنا والعافيه
وتتربى بعزكم الشحوم ههه
والي تسوي الكوفي ويعجبها تدعي لي بالزوج الصالح التاجر ههه