لا تتنهد

الجزء الثاني :
ست الحبايب يا حبيبة يا أغلى من روحي و دمي :
من معاي؟
حايرة والشوق بين عيونج .. خايفة حبين ويلومنوج :
وعليكم السلام
ست الحبايب يا حبيبة يا أغلى من روحي و دمي :
أقولك من معي ؟
حايرة و الشوق بين عيونج .. خايفة تحبين و يومونج:
وإذا عرفتي اسمي بيفرق معك ؟
ست الحبايب يا حبيبة يا أغلى من روحي و دمي :
مو قصدي الاسم بس ؟ قصدي الشخص الي معي ؟ أنا ما أحب أكلم أشخاص غريبين بالمسنجر ؟
و إيميلي مو معروف يعني كل الي عندي بالمسنجر صديقاتي ؟ من معي ؟
حايرة و الشوق بين عيونج .. خايفة تحبين و يلومونج :
وشو هو تحقيق ؟ يعني تبين تعرفين اسمي و عمري و هواياتي ؟ لا تكونين بتخطبين ههه
ست الحبايب يا حبيبة يا اغلى من روحي و دمي :
عن قلة الأدب ترا والله لو مانطقت بحطك بلوك ترا ما عندي وقت للسخافات
حايرة و الشوق بين عيونج .. خايفة تحبين و يلومونج :
مراموه يمة منتس والله أنتس تخوفين !
ست الحبايب يا حبيبة يا أغلى من روحي و دمي :
مرامووه للمرة الأخيرة من معي ؟!
حايرة و الشوق بين عيونج .. خايفة تحبين و يلومونج :
أنا جوري من منتدى بنات !من يومين أرسلتي لي عالخاص طلب إضافة و هذاني أضفتك !
"هنا تيبس الدم بعروق مرام , وحست كأن أحد كب عليها موية مغلية !"
ست الحبايب يا حبيبة يا أغلى من روحي و دمي :
معليش آسفة مرة على أسلوبي بس كنت متضايقة من موقف صاير لي و حطيت حرتي فيك !
حايرة و الشوق بين عيونج .. خايفة تحبين و يلومونج :
ههه لا عادي أكتشفت الجانب السيء فيك
ست الحبايب يا حبيبة يا أغلى من روحي و دمي :
أي جانب ؟
حايرة و الشوق بين عيونج .. خايفة تحبين و يلومونج :
أنك عصبية هذا أولاً , ما ينمزح معك وهذا ثانياً ههه
"مرام : وا خزياه يا ربي أنا وش سويت !"
ست الحبايب يا حبيبة يا أغلى من روحي و دمي :
ههه و الله مو لهالدرجة , تراك أخذتي إنطباع غلط بوقت غلط .
حايرة و الشوق بين عيونج .. خايفة تحبين و يلومونج :
أم ممكن , أنا قلت لنفسي وش فيها البنت أخبرها بالمنتدى ذووق و كيوت ..
بس هنا شفت الوجه الآخر من دلع بنات نياها
ست الحبايب يا حبيبة يا أغلى من روحي و دمي :
ههه أجل لسه ما شفتي شي .. أنتي بس جربي تعلمين أحد بالي صار و شوفي أنا وش بسوي فيك
حايرة و الشوق بين عيونج .. خايفة تحبين و يلومونج :
يمه منتس ! فوق ما أنتي موريتني العين الحمرا من أول محادثة تبين تهدديني بعد !
ست الحبايب يا حبيبة يا أغلى من روحي و دمي :
إيه
حايرة و الشوق بين عيونج .. خايفة تحبين و يلومونج :
طيب .. أنا أورتيس بكرة بتلقين هالمحادثة نازلة في قسم الضحك و الفرفشة
وهذا وجهي إن ما كل الأعضاء شكروني هذا غير الإدارة الي بتعطيني وسام المواطنة الصالحة
و هذا إذا ما عينوني مشرفة بعد !
ست الحبايب يا حبيبة يا أغلى من روحي و دمي :
كل هذا عشانك نزلتي محادثتنا !على العموم نسيتي أني مشرفة و مراقب عام في المنتدى و أقدر بضغطة زر أوقف عضويتك
حايرة و الشوق بين عيونج .. خايفة تحبين و يلومونج :
هاه حبيبتي مروم أنتي اسمك مرام صح ؟
ست الحبايب يا حبيبة يا أغلى من روحي و دمي :
لا رقية ! يعني بالذمة مبين من الإيميل ؟
حايرة و الشوق بين عيونج .. خايفة تحبين و يلومونج :
تشرفنا أخت رقية , بس ما اهون عليك صح ؟ أعتبريني مثل بنتك
ست الحبايب يا حبيبة يا أغلى من روحي و دمي :
وش بنته وجعتين ! ليه أنتي كم عمرك ؟ و على فكرة وش اسمك ؟
حايرة و الشوق بين عيونج .. خايفة تحبين و يلومونج :
طيب إم أعتبريني أختك الصغيرة !
حايرة و الشوق بين عيونج .. خايفة تحبين و يلومونج :
يؤ صح نسيت أقولتس اسمي أنا نوف .. عمري 16 سنة .. بأولى ثانوي
أسكن في الرياض و الأصل من القصيم ..أريد زوجاً أسمر .. طويل .. شعره ناعم .. موظف في
إحدى السفارات في الخارج .. رومانسي يحب أكل المطاعم .. و يقدر الحياة الزوجية
ست الحبايب يا حبيبة يا أغلى من روحي و دمي :
وش قالوا لتس عني خطابة !
حايرة و الشوق بين عيونج .. خايفة تحبين و يلومونج :
مدري عنتس قلت يمكن عندتس مشاريع من وفق راسين بالحلال لولويش
ست الحبايب يا حبيبة يا أغلى من روحي و دمي :
ههه
حايرة و الشوق بين عيونج .. خايفة تحبين و يلومونج :
إلا صدق أنتي بأي سنة ؟!
ست الحبايب يا حبيبة يا أغلى من روحي و دمي :
بدينا بالغلط ! حالياً متفرغة للبيت و النوم و الأكل و الشرب بعد 16 سنة دراسة .
حايرة و الشوق بين عيونج .. خايفة تحبين و يلومونج :
صدق و الله حسبتك صغيرة !
_ في هذه اللحظة وصل مرام إيميل و أكيد عرفتوا المرسل , بدون انتباه ضغطت مرام على الإيميل وكملت المحادثة ..
ست الحبايب يا حبيبة يا أغلى من روحي و دمي :
ليه يعني ألحين أكتشفتي أني عجوز !
حايرة و الشوق بين عيونج .. خايفة تحبين و يلومونج :
أوبس لا والله مو قصدي بس من أسلوبك في المنتدى و دجتك حسيت أنك
وحدة لسه في الثانوي .. على العموم أنتي متخرجة من أي قسم ؟
ست الحبايب يا حبيبة يا أغلى من روحي و دمي :
من كلية التربية , إنجليزي
حايرة و الشوق بين عيونج .. خايفة تحبين و يلومونج :
وع أكره الإنجلش
ست الحبايب يا حبيبة يا أغلى من روحي و دمي :
ليه عاد معروف الانجليزية لغة العصر !
حايرة و الشوق بين عيونج .. خايفة تحبين و يلومونج :
أدري بس تدريسهم مرة خايس كله:
He – Him
She – Shim
مع حفظ الحقوق لحسين عبد الرضا
ست الحبايب يا حبيبة يا أغلى من روحي و دمي :
ههه الله يرجك أنتي و إياه
حايرة و الشوق بين عيونج .. خايفة تحبين و يلومونج :
برب
ست الحبايب يا حبيبة يا أغلى من روحي و دمي :
تيت
/
/
وراحت مرام تفتح نافذة ثانية للاكسبلورر , بهالوقت أنتبهت أنه فيه نافذة مفتوحة أصلاً !
فتحتها لقت إيميل واصلها من راكان !
* يوه وش يبي ذا بعد !
مرام أدري أن أنتي زعلانة من آخر محادثة بيننا , و أنا حاولت أعتذر لك أكثر من مرة بس ما حصلتك مسنجر
أدري أنك مبلكتني بس من جد أنا آسف و أبغاك الحين تشيلين البلوك فيه سالفة مهمة أبغى أقولك إياها
بعطيك خيط واحد عشان تتحمسين :
مضاوي أختي + ثامر ولد عمتي = ؟!!
/
/
أستغربت مرام من أسلوب راكان , أكيد هو ندم !
بس وش سالفة مضاوي و ثامر ؟
أمس شفت مضاوي ببيت جدتي و ما قالت شي جديد !
لا يكون بس مسوي لي مقلب و طابخ لي السالفة عشان أتحمس و أشيل البلوك عنه ؟!
ظلت مرام محتارة وتقلب السالفة براسها , لما فتحت المسنجر مرة ثانية لقت راكان حاط نيك نيم :
" ابتدأ العد التنازلي .. لو ما شلتي البلوك في خلال عشر دقايق أنسي السالفة الي بغيتك فيها "
* يمه منه هالدب ! وش عرفه أني أون لاين ؟!
بينها وبين نفسها هي تدري أنه راكان فاهمها وصار يعرف مواعيد دخولها النت أكثر منها !
و في لحظة ضعف قررت أنها تشيل البلوك عنه و تعرف السالفة ..
بس كالعادة كبرياء الأنثى عندها منعها أنها تبادر بالمحادثة !
/
/
على الجهة الثانية كان فيه واحد متشقق من الوناسة :
- ههه والله و عرفت أجيبك يا مراموه .. لكن هين مسوية ثقل .. بشوف قوة تحملك ؟
كل واحد فيهم ظل يعاند و ينتظر الثاني يبادر بالمحادثة !
تذكرت مرام النك نيم حقه و خافت أنه يسوي تهديده و يطلع من المسنجر بدون ما يقول السالفة .
ست الحبايب يا حبيبة يا أغلى من روحي و دمي :
سلام
- هههاي يا حبي لكم يا بنات أفكاري
و الله و عرفت لك يا مراموه ,, لكن هين , خلني أغير النك أول عشان تعرفين ثاني مرة تسفهين !
بعد مرور دقيقة بالضبط !
يالله نعيش بدنيا غير !! :
وعليكم السلام
*يبي يستهبل .. والله مو وقتك !
ست الحبايب يا حبيبة يا أغلى من روحي و دمي :
ساعة عشان ترد السلام ! ترا رد السلام واجب !!
يالله نعيش بدنيا غير !! :
أي ساعة كنت مشغول شوي , بعدين تراي رديت السلام وما أخذ مني دقيقة مو أسبوع !
* شفت أنك بايخ والله أني عارفة أنه ما عنده سالفة و بيقعد يحاسبني على البلوك !
ست الحبايب يا حبيبة يا أغلى من روحي و دمي :
نعم وش بغيت ؟!
يالله نعيش بدنيا غير !! :
الله ينعم عليك
ست الحبايب يا حبيبة يا أغلى من روحي و دمي :
شف عاد تراها واصلة حدي منك بتقول آلحين وش تبي و إلا ترا ما يردني إلى البلوك ؟
وأنت جربتني و ما أتوقع ودك تجرب مرة ثانية !
- يمه منها ذي شكله المزاج خربان !
يالله نعيش بدنيا غير !! :
لا تهددين ! أنتي وش على بالك الناس لعبة بيدك ! أنا شرحت لك بالإيميل أني ما كنت أقصد و أنتي سفهتيني
و حاولت أثبتلك حسن نيتي وأعتذرتلك بس ما جاب نتيجة معك ! هذا جزاي الي أبغى أعتذر منك ؟
ست الحبايب يا حبيبة يا أغلى من روحي و دمي :
يعني سالفة مضاوي أختك كذب وأنت سويت كذا بس عشان حضرتك تعتذر !
يالله نعيش بدنيا غير !! :
آهه صدتك !يعني أنتي شلتي البلوك بس عشان مضاوي ؟
ست الحبايب يا حبيبة يا أغلى من روحي و دمي :
اللهم طولك يا روح أبي أعرف فيه سالفة وإلا لا ؟
يالله نعيش بدنيا غير !! :
إيه فيه ؟
ست الحبايب يا حبيبة يا أغلى من روحي و دمي :
أحلف ؟
يالله نعيش بدنيا غير !! :
أصغر عيالك أنا!!
شوفي أنا ناوي أقول لك بس بشرط !
* بعد ناوي يتشرط !
ست الحبايب يا حبيبة يا أغلى من روحي و دمي :
وش شرطك ؟
يالله نعيش بدنيا غير !! :
أم أولاً تسامحيني لأني فعلاً ما كنت أقصد بس أنتي قهرتيني شوي
ست الحبايب يا حبيبة يا أغلى من روحي و دمي :
و ثانياً !!
يالله نعيش بدنيا غير !! :
توعديني أنك ما تسفهين ثاني مرة أزعلي بكفيك بس فرغي و طلعي كل الي في قلبك أرسلي أيميل
و شرشحيني و شرشحي الي خلفوني بعد
ست الحبايب يا حبيبة يا أغلى من روحي و دمي :
ههه طيب مسامح بس لا تكرره أنت و وجهك !
بعدين أشرشحك ممكن لكن الي خلفوك آسفة ما أرضى على خالتي
يالله نعيش بدنيا غير !! :
أعوذ بالله ما تقدرين تكملين جميلك !
ست الحبايب يا حبيبة يا أغلى من روحي و دمي :
يالله عاد وش سالفة مضاوي تراك ما تنعطى وجه !
يالله نعيش بدنيا غير !! :
أي سالفة و مين مضاوي ؟
ست الحبايب يا حبيبة يا أغلى من روحي و دمي :
والله أني حاسة أنك تستهبل من الأول بس تدري وشلون الشرهة علي أنا الغبية الي صدقتك !
يالله نعيش بدنيا غير !! :
أنتي وش متعشية؟!
ست الحبايب يا حبيبة يا أغلى من روحي و دمي :
سؤال سخيف مثل وجهك بس جواباً لك شاورما
يالله نعيش بدنيا غير !! :
بالشطة وإلا بدون .
* سخيف و ربي أنه سخيف .
يالله نعيش بدنيا غير !! :
ما جاوبتي ؟!
ست الحبايب يا حبيبة يا أغلى من روحي و دمي :
على إيش ؟!
يالله نعيش بدنيا غير !! :
الشاورما بالشطة وإلا بدون ؟!
ست الحبايب يا حبيبة يا أغلى من روحي و دمي :
بالشطة , لا و أبشرك ما أحبها إلا بشطة تباسكو
يالله نعيش بدنيا غير !! :
آهه عشان كذا .
ست الحبايب يا حبيبة يا أغلى من روحي و دمي :
ما فهمت؟!
يالله نعيش بدنيا غير !! :
عشان كذا لسانك طوييل و ترادين , بوصي أبو عبدالمحسن إن جا يجيب المقاضي لا يشتري تباسكو
وبقوله هذي وصية من فاعل خير خايف على محارمك
* ههه والله أنك بايخ و سخيف مدري ليش للحين متحملتك !
شاورما بالشطة :
أحد قالك قبل انك سخيف و دمك ثقيل !
يالله نعيش بدنيا غير !! :
لا كل الي يعرفوني يقولون أني مملوح و وسيم و أقدر الحياة الزوجية .
* وش سالفة الحياة الزوجية ! بالأول نوف و ألحين ذا السخيف !
إلا على طاري نوف ما عاد رجعت ؟ وراحت مرام تشيك على نوف لقتها أوف لاين !
أوف يعني الحين ما لي إلا هالماصل؟
يالله نعيش بدنيا غير !! :
مراموه وين رحتي ؟ بعدين وش هالنك الله يرجك ههه
شاورما بالشطة :
رحت السطح أشيك على الحمام لقيتهم ناموا قعدت أغني لهم وأنا أطق أصبع :
الله أكبر يا حمام من صلاة العصر نام!
يالله نعيش بدنيا غير !! :
ههه ههه
يا قدمك من وين طلعتي بهالأغنية ؟!
شاورما بالشطة :
من أرشيف غصب ون ! أنت وش عليك ؟
يالله نعيش بدنيا غير !! :
ههه
تتذكرين برنامج أحلى التهاني الي كانوا يدورون بالقاعات ويقابلون المعاريس ههه
*الظاهر أنه نشبة و مطول !
شاورما بالشطة :
إيه أتذكره .
يالله نعيش بدنيا غير !! :
تتذركين ذاك العرس الي سويناه يوم كنا صغار وأنا أختاروني المعرس ..
* يوه الولد شكله بيرجع يبنبش في الماضي
شاورما بالشطة :
إيه أتذكر .. أقول راكان أمي تناديني و ألحين لازم أطلع يالله مع السلامة
- ههه أكيد بتقول مع السلامة ,, يا حليلها تستحي بس ما فيها شي كنا بزران
يا حليلها وهي مسوية دور مرتي ههه
يالله نعيش بدنيا غير !! :
طيب مع السلامة ألاقيك بكرة بس مو مثل هالوقت ..إم لا ابكر عشان يمديني أقول السالفة ..
شاورما بالشطة :
أي سالفة ؟!
يالله نعيش بدنيا غير !! :
سالفة مضاوي .
شاورما بالشطة :
يعني فيه سالفة ! طيب قل يالله ؟
يالله نعيش بدنيا غير !! :
لا خلاص ما عاد يمدي .. دخت مرة و بكرة عندي دوام .. بعدين مو قلتي تو خالتي تناديك؟
* يا شين المصالة .. طيب وش دخلك أعتبرني صرفتها !
شاروما بالشطة :
هاه لا خلاص هي كانت تتطمن علي و راحت ,, أيوه وش السالفة ؟
- والله أني عارف أنك كنت تصرفيني .. لكن هين !
يالله نعيش بدنيا غير !! :
إم السالفة مرة طويلة و محتاجة تركيز ,, بعدين قلتلك ددايخ تراي المفروض نايم من ساعة
و إلا تحسبين الناس ما وراهم دوامات زيك !
* يا كرهي لك راكانووه ,, لكن هين مردودة
يالله نعيش بدنيا غير !! :
تصبحين على خير .
شاروما بالشطة :
و أنت من أهله .
يالله نعيش بدنيا غير !! :
مرام خوذي هاللنك إهداء ..
وطلع راكان من المسنجر..
بس ظلت مرام تضحك من قلب على الإهداء ..
خبل وربي خبل ..
يتبع

/
/
رجعت مرام من صحارى مول و هي مرة تعبانة !
على غير عادتها قررت ما تشتري لها عشا من المطعم و أخذت لها موكا بس !
- الله ما فيه أحلى من أني أبدى يومي بالمول .
وبدت تنشر الأغراض الي شرتها عشان تقيسهم
-يووه شكله هالجينز ما رح يدخل ! هذا و أنا ما افطرت و لا أخذت لي غير هالموكا !
لكن من غير شر بكرة بيبدأ الدايت.
قررت تاخذ لها شاور سريع عشان تدخل نت بدري .
-يمكن يدخل راكان ألحين أبي أعرف السالفة ..
إنشالله يكون فيه سالفة أصلاً !
بعدما خلصت الشاور جابت عدة الأظافر الجديدة , وعلى مهلها فتحت اللاب توب و دخلت مسنجر و مثل ما توقعت
كان راكان أون لاين ..
شاورما بالشطة :
سلام
لا تتنهد :
وعليكم السلام
شاورما بالشطة :
أيوه وش سالفة مضاوي أختك !
لا تتنهد :
بدري !غريبة وش مصحيك بدري ؟!
شاورما بالشطة :
بدري من عمرك .. وش السالفة ؟
لا تتنهد :
أي سالفة ؟
شاورما بالشطة :
راكان و ربي أنك سخيف أنا من رجعت من السوق دخلت نت و هي مو من عادتي بس عشان اعرف وش سالفة أختك
و أنت ألحين تستخف دمك و تقولي أي سالفة ؟!
لا تتنهد :
بأي سوق كنتوا ؟!
شاورما بالشطة :
تدري وشلون مع السلامة أنا حاسة أن ما عندك سالفة بس ناوي تلعب بأعصابي !
لا تتنهد :
أول جاوبي على السؤال , لأني مودي أهلي السوق قلت بخاطري يمكنكم متواعدين و شفتي مضاوي هناك
و قالت: لك السالفة .
شاورما بالشطة :
كنا بصحارى , ما شفنا أهلك , وش السالفة ؟
لا تتنهد :
آهه , لا أهلي موديهم للفيصلية و شكلهم مطولين امي قالت أرجع البيت و إذا خلصنا بنكلمك !
شاورما بالشطة :
؟!
لا تتنهد :
شوفي مرام و ربي لا تزعلين بقولك السالفة بس أخاف تفوتني صلاة العشا !
شاورما بالشطة :
طيب خلاص مع السلامة
لا تتنهد :
مرام والله جد أنتي ما ترضين تفوتني الصلاة بس خليني أرجع و اقولك !
شاورما بالشطة :
إيه يا شاطر أهم شي الصلاة لا تفوتك .
لا تتنهد :
أحسك تتطنزين ! عموماً ما رح اطول و أنتي روحي صلي و أول ما تخلص الصلاة أدخلي و بتلقيني أون لاين
وساعتها والله العظيم لأقولك السالفة أوكي ؟
شاورما بالشطة :
طيب باي .
/
/
_ يا ربي أنا ليش متحمسة معه ؟ أحسه يستهبل و بمجرد ما يرجع من الصلاة بيقولي أنها كانت كذبة لفقتها عشان
تشيلين البلوك ! و إلا اصلاً لو فيه سالفة تخص مضاوي ليش هو الي يعلمني؟
أنا غبية بدق على مضاوي أكيد لو فيه سالفة بتقول لي شي ..
جاري الاتصال ب .. مضاوي
( إن الهاتف المطلوب لا يمكن الاتصال به الآن , نرجو محاولة الاتصال في وقت لاحق !)
-يوه طيب برسلها plz call me ,خ أحسن خلي الفاتورة تصير عليها !
و قعدت مرام تلعب بأظافرها و تقص من هنا و تبرد من هنا لحد ما رن جوالها ..
_ آلوو أهلين
+هلا بك مرووم , وش عندك مرسلة plz call me ! ما خبرتك قعيطية لهالدرجة !
- ههه , و أنا ما خبرتك تصبرين عن جوالك و تخلينه مقفل و أنتي بالبيت , وشلون و أنتي بالسوق لا و بالفيصلية !
+بسم الله علي الرحمن الرحيم , أولاً وش دراك أني ما أصبر عن جوالي !
ثانياً وش دراك أني بالفيصلية ؟
* آخ هنا مرام توهقت , أول مرة من عرفت راكان على المسنجر يزل لسانها بهالطريقة!
- مدري كني سمعت أمي تقوله , بس وينك إحنا كنا بصحارى سويت shopping من الساعة 5 العصر إلى 7 و نص المغرب .
+ إخص و ش مصحيك يالبطة من العصر ! أخبرك أنتي من ستايل حمامن جانا مسيّان !
ما تصحين إلا 7 و نص !
- بسم الله علي منكم وأنتو وش عليكم , لا تكون وسادتي أشتكت لكم ؟
+ ههه إي والله , الله يعظم اجرها , مسيكينة أحسها لو بتنطق يوم بتقول لك :
أعطني حريتي أطلق يديّا .
- لا و صرنا نغني لأم كلثوم بعد ! وش عندك يا بنت هاه أنطقي أعترفي , أخرسي خالص أنتي طالق !
+ ههه لا و الله إلا أنتي الي طالق .. أنجزي يا بنت وش تبغين ترا ألحين بيفتحون
المحلات و أنا ما بعد صليت !
- لا بس كنت بسلم مشتاقة لك .
+ تشتاق لك العافية .
- لا تقولين هالكلمة أحسك تدعين علي بطريقة غير مباشرة !
+ هاو مراموه , يا منزوعة الحيا ! ألحين لا قلت لتس تشتاق لتس العافية صرت أدعي عليتس!
- شوفي حبيبتي أنتي تقولين " تشتاق لك العافية " يعني بما معناه جعلك تمرضين ذاك المرض الي من عقبه تشتاق لك العافية فهمتي ؟!
+ اقول عمتي مرام بلا فلسفة للحين ما خلصت من السوق و باقي لي كم محل و بعد شوي ما رح ندري إلا رويكين جاي ولاقطنا !
- بس مو راك ....
+ وشو ؟
- لا و لا شي سلامتك !
+ يالله باي .
* يوه للمرة الثانية بغت تغلط مرام غلطة عمرها و تقول أن راكان بيصلي و بيرجع البيت عشان .. يوه السالفة ؟
وش السالفة شكل راكانووه بيطلع لي قروون !
لما رجعت مرام للاب توب لقت راكان أون لاين , بس هالمرة قررت تنتظره هو يتكلم خلاص ذليت نفسي عاد !
/
/
لا تتنهد :
باك
شاورما بالشطة :
حياك
شاورما بالشطة :
حرماً !
لا تتنهد :
جمعاً إن شاء الله
شاورما بالشطة :
لا إنشالله
لا تتنهد :
وجع وش الي لا إنشالله , بعدين تعلمي الإملاء صح تراها تنكتب كذا : لا إن شاء الله !
شاورما بالشطة :
ههه قلبنا حصة إملاء
لا تتنهد :
ههه بس ما قلتي وش الي لا ؟
شاورما بالشطة :
جعلي ما أطب الحرم معكم يا عيال خالاتي
لا تتنهد :
آفا ليش ؟
شاورما بالشطة :
أبد نسيت حضرتك آخر مرة رحنا , و ترا هالكلام من زمان كيف هبلتوا فينا يالتماسيح
بس صاكين علينا الشقة و ما تخلونا ننزل للحرم إلا وقت الصلوات و أنواع العقد
لولا أمي نورة الله يخليها ذخر لنا كان ما تهنينا !
لا تتنهد :
الله و أكبر يالعقد! بس شي أكيد ما بنخليكم تنزلون الحرم غير وقت الصلوات !
و إلا كان ما غير دوران و سعسعة بالأسواق , ترا مكة نروح لها عشان نتعبد موب عشان نوسع صدورنا !
شاورما بالشطة :
إيه صح نتعبد زيكم بالضبط يالتماسيح !
لا تتنهد :
وش قصدك ؟
شاورما بالشطة :
سلامتك بس أنتو كنتو تسهرون للساعة 7 الصبح بره الشقق , الله و اعلم مارح أحط بذمتي
و اقول أنكم كنتو تدورون و "تسعسعون" بالأسواق , لكن بقول أنكم شبابن صالحين و كنتوا " تتعبدون" بالحرم
و حنا يعني يالحريم ما يحق لنا نتعبد الله بالحرم
لا تتنهد :
بتقنعيني إنكم لو بتنزلون من الشقق بتروحون " تتعبدون" بالحرم ؟
شاورما بالشطة :
و أنت بتقنعني إنكم تسهرون للساعة 7 الصبح في الحرم ؟ عموماً : " لا تمنعوا إماء الله مساجد الله "
لا تتنهد :
و بيوتهن خير لهن !
شاورما بالشطة :
بس هذاك مو أي بيت هذاك بيت الله و أنتو كنتو تمنعونا عنه ؟ يا ويلكم بس من حساب ربي يوم القيامة !
لا تتنهد :
يوه خلاص آسفين عمتي مرام , المرة الجاية محد بيمنعك أعتكفي في الحرم ,زي ما تبين.
شاورما بالشطة :
و أنا وش اقول من الصبح ؟ ما عاد فيه جايات معكم يا عيال خالاتي
لا تتنهد :
ممكن سؤال ؟ وش فتح السالفة ؟
* وبهاللحظة يرن جوال راكان ..
شاورما بالشطة :
أنا قلتلك حرماً , و أنت قلت جمعاً .
لا تتنهد :
برب
شاورما بالشطة :
تيت
_ آلو , هلا يمة .. لا الحين بالبيت ؟ هاه خلصتوا ؟طيب خلاص عشر بكون عند الباب بس من أول رنة تطلعون
مو زي العادة تخلوني أنطق !
/
/
لا تتنهد :
باك
شاورما بالشطة :
حياك
لا تتنهد :
يووه دقيقة مرام اوكيه ؟
شاورما بالشطة :
وش عندك أنت ؟ عالعموم أنا بطلع ألحين أوكي ؟
لا تتنهد :
لا استني لا تطلعين ما قلتلك الساللفة ؟
* الله يغثك أنت و سالفتك
شاورما بالشطة :
بسررعة طيب ..
بعد دقيقتين رجع راكان ..
لا تتنهد :
باك
شاورما بالشطة :
حياك
لا تتنهد :
أيوه .. شوفي تذكرين من فترة كنت تسولفين عن أنك لو بتصيرين خطابة بتخطبين مضاوي أختي لثامر ولد عمتي ؟
شاورما بالشطة :
كح كح وش هالغبار ؟يا قدمك
شاورما بالشطة :
طيب إيه اذكر و بعدين ؟
لا تتنهد :
و لا قبلين
شاورما بالشطة :
يوه وش دخل هذا بالسالفة ؟ إذا أنت فاضي تراي مشغولة ؟
لا تتنهد :
لا والله مشغولة بإيش يا حسرة ؟ عموماً من قالك أني فاضي نسيتي أني بروح اجيب أهلي من السوق ؟
* لا زم يرمي كلمة تجرحني
شاورما بالشطة :
يالله باي أمي تناديني ؟
* يوه شكلها زعلت , آفف من هاللسان ..
قصدي هالأصابع
لا تتنهد :
طيب أستني خليني أكمل ؟
شاورما بالشطة :
للحين ما خلصت سوالفك البايخة مثل وجهك؟
تدري الشرهة مو عليك الشرهة علي الي مضيعة وقتي معك
* كأني أشم ريحة بلوك ! و الله شكلي مصختها بقولها السالفة و أمري على الله !
لا تتنهد :
الله يسامحك , عموماً السالفة بإختصار من كم أسبوع كلمت عمتي تخطب مضاوي أختي لثامر ولدها
و وافقنا عليه و بعد بكرة بيجي يشوفها .
شاورما بالشطة :
أ ح ل ف
لا تتنهد :
والله العظيم
شاورما بالشطة :
لا تتنهد :
ههه كل هذا من الصدمة , و إلا زعلتي عشانهم ما عطوك حقوق الخطابة ؟
شاورما بالشطة :
يا حبي لي , و الله يطلع مني شكلي من جد بشتغل خطابة .
لا تتنهد :
عاد الله يسلمك لا كثر البزنس عندك لا تنسين تدورين لي
شاورما بالشطة :
أنت بالذات ما فيه أمل أتعامل معاك ؟ ألحين عشان سالفة بسيطة تنقال بثلاث ثواني ذليتني عليها إم أسبوع ؟
لا تتنهد :
لا والله أنا ما ذليتك كنت ناوي أقولك من زمان بس قلت خلي الموضوع يصير رسمي
بعدين مستغرب أنه مضاوي ما قالت لك مو أنتو صديقات ؟
* والله أنك صادق ! صدق مجتمعنا متخلف وش فيها إذا هي قالت لي أنه ثامر خطبها ؟
لا تكون تحسبني بأنظلها
و الله عاد يا مضاوي لو تدرين أن اخوك يمون لدرجة أنه قالي عن خطوبتك قبلك وش بتسوين؟
ههه وش تسوين اصلن الحق لي أني أزعل يعني بالذمة وش شكلي و أنا أعرف من ولد خالتي عن خطوبة أخته !
لا تتنهد يرسل لك إشارة تنبيه !
شاورما بالشطة :
خير !
لا تتنهد:
وين رحتي ؟
شاورما بالشطة :
رحت السطح
لا تتنهد:
ههه عجبك الإهداء ؟
شاورما بالشطة :
ههه الله يرجك .. والله ضحكت من قلب و رئة و شرايين بعد .
لا تتنهد:
بس ما قلتي وش رايك بالخطوبة ؟ ما أحسك متفاجئة ؟
من جد تتوقعين هو حاط العين عليها من زمان و إلا جت صدفة ؟
* يا حليلك يا راكان تبغاني أقولك أن مضاوي تموت بثامر ولد عمتكم من يومها صغيرة ؟
شاورما بالشطة :
تقدر تقول رمية من غير رامِ !بس على العموم الله يوفقهم و يهنيهم إن كانوا مكتوبين لبعض!
لا تتنهد:
إخص منتي سهلة و تعرفين رمية من غير رامي ؟
شاورما بالشطة :
ههه أعرف رامي و أعرف الهداف بعد ! بعدين تراها تنكتب رامِ <<-- كذا مو بالياء
لا تتنهد:
ههه قلبنا حصة إملاء
شاورما بالشطة :
إي والله .. يالله ضف وجهك و مشكور على السالفة الحصرية
لا تتنهد:
وين اضف وجهي ألحين الساعة 9 و 10 دقايق و أمي مواعدتني الساعة 10 , يعني بتنطقين هنا لحد ما تجي
الساعة 9 و نص و إلا ربي يرحمك و يدخل أحد معي على المسنجر
شاورما بالشطة :
يوه الساعة 9:10 يالله مع السلامة جا مسلسلي و بيخلص و كله منك !
لا تتنهد:
أي مسلسل يمكن يعجبني ؟
لا تتنهد لا يمكنك إرسال الرسالة لأن الحالة المعينة لشاورما بالشطة هي غير متصل !
*ما عندها وقت !
/
/
يتبع

تسلو أخواتي بهذي الأجزاء وباشوف تفاعلكم مع القصة وإن شاء الله اكمل الأجزاء الباقية...
تحياتي ..

صراحه روعه مره وشكرا على الاختيار

اختي القصة مرة روعة
كمليها

sksk28
يسلمو أختي على مروركي الحلو

وهذي تكمله القصه لعيونكم
بعد مرور ثلاثة أيام على آخر محادثة بينهم , قررت مرام بالعاني أنها ما تدخل مسنجر مع راكان , عشان ما تحرجه
بموضوع أخته مضاوي , أو بالأصح تنحرج هي لأن مضاوي ما قالت لها ! خصوصاً أن خالتها ما عطت أمها خبر !
اليوم كانوا في بيت أمهم نورة الي من توفى زوجها أبو عبدالله و هي ساكنة بالبيت مع ولدها فيصل و زوجته الحامل ..
كانت مبسوطة عالآخرر بجمعة بناتها و حريم عيالها الأسبوعية ..
و الكل كان ملتم حولها و سوالف و قهوة , و فجأة ..
مادورا إلا بأم عبدالله تنط ذيك النطة و هي تشرب فنجال قهوتها :
- ترانا بنروح لمزرعة الخرج ذا الأسبوع و كلكم بتجون !
الكل بدا يتغمغم و محد كان مقتنع بالروحة , بس طبعاً بناتها ما يقدرون يقولون لا !
بس حفيداتها - ( مرام و مضاوي بنت خالتها,و بنات خالهم عبدالله وجدان و شيماء و نورة و أخيراً ليلى بنت خالتهم
وسمية ) -ما عجبتهم الفكرة ! كانوا يجلسون على كنب مستقل و سمعوا نطة جدتهم ..
مرام : يوه وش قصة أمي نورة مع مزرعة الخرج!
ليلى: وشفيها مرووم خلينا نطلع مع بعض من زمان ما تجمعنا في المزرعة ؟
وجدان: إحنا مب رايحين معكم و هذا أهم شي
مضاوي:خير ! ما سمعتي أمي نورة تو تقول كلكم بتروحون .
وجدان : لا يا حبيبتي إحنا بنروح الشرقية مع خالاتي يوم الإربعاء .
مرام:يوه كملت يعني بنروح عشان نتقابل أنا و أنتي – وتأشر على مضاوي - !
ليلى : خيير و أنا وين رحت !
مرام : مدري أخاف أمك ما توافق عشان عندك دور ثاني – وتطلع لسانها - !
ليلى : إيه طيب ما توافق ! إذا بتروحون بروح معكم و بقولها عشان مرام تدرسني إنجليزي – وتطلع لسانها - .
و تنط الخالة وسمية بالسالفة :
وسمية : إي والله صادقة ليلى , ليتك تدرسينها إنجليزي يا مرام .. أنتي بسم الله عليك متخرجة من الإنجليزي
و كودها تفلح على يدينك !
مرام : سوري خالتي ما أعرف أدرس بنتك البليدة ذي ! بعدين ترا الدروس الخصوصية مو ببلاش !
وسمية : أبد درسيها و لك علي إذا نجحت أن أعطيك الي تبين , حتى لو تبين معرس – وتضحك-
مرام تضايقت من خالتها ! أف والله توي صغيرة ليش غصب يحسسوني إني عانس !
مرام : لا والله توني صغيرة على العرس , بخلي العرس للي يبيه – و تطالع مضاوي –
مضاوي أستحت بس في بالها أن مرام للحين ما تدري عن ثامر , مسكينة مضاوي تحسب مرام تحارشها!
وجدان : إي و الله يا عمتي إذا عندك معرس حوليه علي شكل مرام مطولة .
و مادرت وجدان إلا و أمها تعطيها ذيك النظرة .. أختها شيماء تضحك و تهمس لها:
قلعتك تستاهلين , توك متخرجة من الثانوي لاحقة على العرس .
مرام : شوفي يا ليلى إذا والله فيه شي مو فاهمته ترا عادي بشرحلك , وبدون عريس – وهي تغمز لها –
ليلى : أجل خلاص بجيب كتبي كلها في المزرعة !
مرام : وش هالاستغلالية ! إحنا إتفاقنا كان على الإنجلش ؟ بعدين عمتي ليلى أنتي راسبة بكم مادة ؟
ليلى وبابتسامة عريضة: 5 مواد , بس المجموع 7 كتب .
مرام : الله يزيد و يبارك ! لا و متأملة بالنجاح !
وسمية – أم ليلى -: فالتس ما قبلناه !
ليلى : ههه يا حوبي لتس يا أوميمتي شفتي وشلون قلب الأم يا مرامووه قال إيش قال زيد و
بارك!
مرام : ههه لا و الله أنتي مو صاحية أنا عارفة أولى ثانوي مو سهلة بس 7 كتب كثيرة!
ليلى : لا و أبشرك الإنجليزي حاملة الفصل الأول و الثاني !
بغت مرام تغص بالعصير الي تشربه !
و في بالها : لا حول فصلين لا و إنجليزي يعني كتابين يعني 4 كتب !
ليلى : بسم الله عليتس كل ذا تحبيني و خايفتن علي !
مرام : لا و الله خايفة علي . مالت عليك و على نتيجتك لو أنك ماخذة مؤبد كان أهون .
وضحكوا البنات .. وخلصت السهرة و الكل راح لبيته يستعد لمزرعة الخرج !
/
/
مرام من اول ما رجعت بدت الدوامة مع أمها , تحاول تقنع فيها أنهم ما يروحون المزرعة !
مشاعل – أم مرام - : مراموه و وجعتين ! لا تغثيني قلت بنروح يعني بنروح !
مرام : طيب أنتي روحي مع أخواني بدوني !
مشاعل : وش نقول لهم إذا قالوا وينها ؟بعدين وشلون نخليك بالبيت لحالك ؟
مرام : وديني بيت أمي سارة ! أكيد عماتي بيتجمعون عندها الخميس و الجمعة !
مشاعل : لا والله من متى أنا أخليك تروحين لبيت أمك سارة و تنامين عندهم ؟وش تبين اخواتي يقولون ؟
أكيد بيحسبونك ما تبينهم ؟
مرام بعصبية : إيه بصراحة ما أبيهم !
مشاعل : خير إنشالله وش هالكلام ؟ وش الي ما تبينهم و أنتي اليوم كنت تسولفين وتضحكين معهم ؟
مرام : يمه أسولف معهم شي و اروح أقابلهم المزرعة 24 ساعة شي ثاني ؟ بعدين سمعتي ليلى بنت اختك وش تقول ؟
عمتي ليلى تبغاني أدرسها أربع كتب ! ما دريت والله بروح أستانس و أوسع صدري و إلا اروح أشتغل مدرسة
خصوصية !
مشاعل : أستحي على وجهك مو أسمها بنت أختي اسمها بنت خالتي تخلخلت عظامك!
مرام : إيه خالتي ذي ما سمعتيها و هي تتميلح و تقول درسيها وأجيب لك المعرس ! وش عليها مني إنشالله عمري ما
أعرست , لا أكون قاعدة على قلبها !
مشاعل : استحي على وجهك وش هالحكي ؟ بعدين تراها صادقة منتي صغيرة و ما فيها شي لو جابت لك معرس تراها
خالتك و في مقام أمك .
مرام : حتى أنتي يمة ! طيب إذا أنا هم على قلبك قوليلها تدور لي على عريس !
مشاعل : مرام وشفيك أنتي من جينا و أنتي مسوية لنا سالفة من لا شيء ! بعدين ما يحتاج اقولها تدور على عريس .
يكفي آخر ناس تقدموا لك و أنتي رفضتيهم بدون سبب !
مرام : يمه لا تجننيني ! وش الي بدون سبب ! الرجال مطلق و أنا بنت ! وش ناقصني عشان آخذ واحد مطلق !
مشاعل : مو ناقصك شي بعدين و إذا صار مطلق ؟ تراه ولد عايلة و ما عليهم كلام .بس أنتي الي تتدلعين!
مرام – وعيونها تدمع - : لهالدرجة أنا رخيصة بعينك يمه ! واحد مطلق و ما ندري وش سبب طلاقه و تبغين اقبل فيه !
مشاعل : يقولون البلا من مرته !
مرام : أجل وش تبينهم يقولون ؟ تبين أهله يقولون لك طلقها لأن البلا منه ؟
مشاعل : و أنتي وش دراك أن البلا منه !
و بهاللحظة يدخل عبد المحسن- أخو مرام و يجي بعدها بالترتيب عمره 17 سنة -
عبد المحسن : أي بلا ! تراي و الله يمه مو مسوي شي !
مشاعل : الي على راسه بطحة و تغمز له .
يجي عبد المحسن و ينسدح عليها بدون كلام وما أنتبه لأخته ..
عبد المحسن : يمه تكفين كلمي أبوي يشتري لي سيارة .
مشاعل : يا ولدي خلاص أبوك وعدك و السيارة بتجيك السنة الجاية بس أنت شد حيلك و جب النسبة الي ترفع الراس !
عبد المحسن : يعني وش ذا يمه و الله صرت استحي قدام خوياي يوديني و يجيبني السواق! إلا إذا ترضون أني أتعقد
و أطيح بكبودكم و محد يزوجني !
مشاعل : بسم الله عليك وش هالحكي قم بس – و تدف راسه –
يوم أعتدل بجلسته أنتبه لأخته و شكلها متضايقة مرة .. ويقوم و هو يهز و يرقص و يقرب منها عشان يحارشها:
عبد المحسن : هيلا يا رمانة هلا هيلا يا رمانة .. الحلوة زعلانة .. مروم زعلانة .
مرام : عن إذنكم .
عبد المحسن : وش فيك مرام قاعد أكلمك ما تردين ؟ أحد مزعلك بشي !
مشاعل : ما فيها شي بس تتدلع ما تبي تروح معنا المزرعة .
عبد المحسن : طيب لا تروح وش المشكلة .
مشاعل و هي قايمة : اقول أنت بس أسكت و ما عليك منها , وتراك أنت بتروح بعد .
عبد المحسن : طيب بسم الله علي وشفيك قلبتي علي , تبيني أروح رحت كم أم عبد المحسن عندي ؟$
مشاعل : إيه على بالي بتسوي لي مناحة زي أختك !
/
/
و يقوم عبد المحسن لغرفة أخته , و يطق الباب ..
مرام : نعم !
عبد المحسن : أنعم الله عليك وفتح لك أبواب رزقه ! افتحي بكلمك شوي .
و تفتح الباب و يدخل عبد المحسن يروح يجلس على الكرسي الهزاز الي بغرفتها و هي ترجع لمكتبها و تكمل شغلها
على اللاب توب ..
عبد المحسن : مرام , لا تزعلين من أمي .. ترا و الله مو قصدها .
مرام -بدون اهتمام- : طيب .
عبد المحسن : ممكن تخلين الي بيدك تراه موب طاير !
مرام : نعم , هذا اللاب توب و تركناه !
عبد المحسن : الله يعين رجلك عليك وش هالأسلوب؟
مرام : شف لو سمحت لا تفتح هالطاري قدامي مرة ثانية ! و إذا أنا طايحة بكبودكم لهالدرجة حطوا إعلان
بالجرايد "مطلوب عريس حالاً"
عبد المحسن: ههه و بالمرة بحط بين قوسين ترا هدية أخوها كامري 2010 !
مرام : .......
عبد المحسن : طيب تراها مزحة المفروض الناس بعد ما أحد يمزح يضحكون و يقولون هاهاهها أو إذا ما عجبتهم بالمرة
يقهقهون , ويقولون قهقهقهقهقهقه
غصب عنها مرام ابتسمت .. و الله ما يضحكني في هالدنيا إلا أنت !
و أنتبهت لصوت تسجيل دخول , ألتفتت لقته راكان و على طول دخل معها بمحادثة !
Fly Me to The Moon :
سلام
Fly Me to The Moon :
يا ساتر منك وش هالنك ؟!
* وش هالوهقة ! و على طول راحت تغير الحالة من متصل إلى مشغول .
عبد المحسن : من هذي ؟!
مرام – وهي تبلع ريقها -: وحدة من بنات الجامعة .
عبد المحسن : طيب قولي لها عندي أخ في مقتبل العمر وسيم و يرغب في التعرف على بنت من بنات الجامعة .
مرام : ضف وجهك ! قال إيش قال تعارف قال !
عبد المحسن : طيب بضف وجهي , بس أسمعي مرام أنا أدري أنك زعلتي من أمي عشان سالفة المزرعة , بس يا بنت
الحلال وسعي صدرك ترا الدنيا ما تسوى ,إذا على المزرعة ترا محد يكرهها كثري بس هذاني أنجبرت أروح مثلك ,
مع العلم أنك بنت و انا ولد بس هذاني أمي تغصبني زيي زيك – ويغمز لها - .
مرام : ليش يعني في العرف عندك ان البنت عادي تنجبر و الولد لا !
عبد المحسن و هو قايم بيطلع: يوه ألحين اشتغلت جمعية حقوق المرأة , يا بنتي خلاص آسفين و حقك علي ..
و روحي شوفي بنات الجامعة لا تبطين عليهم ..
رجعت مرام للاب توب , و فتحت المحادثة حقت راكان مرة ثانية ..
/
/
/
يتبع

Fly Me to The Moon :
شكلك مشغولة إذا فضيتي تراي هنا
اللهم أحيني ما علمت الحياة زيادة لي في كل خير,و توفني ما علمت الوفاة راحة لي من كل شر :
و عليكم السلام
Fly Me to The Moon :
وش فيك عسى ما شر ! أخبر هذا الدعاء إذا يئس المريض من حياته !
اللهم أحيني ما علمت الحياة زيادة لي في كل خير,و توفني ما علمت الوفاة راحة لي من كل شر :
طيب أنا يائسة من حياتي فيها شي لو دعيت على نفسي بالراحة !
Fly Me to The Moon :
لا ما فيها شي ؟ مرام عسى ما شر شكلك موب في المود !
اللهم أحيني ما علمت الحياة زيادة لي في كل خير,و توفني ما علمت الوفاة راحة لي من كل شر :
خليني ساكتة أحسن !
Fly Me to The Moon :
براحتك .. بس من جد إذا فيه شي مضايقك بحاول أساعدك قد ما اقدر .
اللهم أحيني ما علمت الحياة زيادة لي في كل خير,و توفني ما علمت الوفاة راحة لي من كل شر :
بصفتك مين ؟!
Fly Me to The Moon :
نعم !
اللهم أحيني ما علمت الحياة زيادة لي في كل خير,و توفني ما علمت الوفاة راحة لي من كل شر :
آسفة راكان أنا واصلة حدي عالآخر مليت من حياتي و الله العظيم مليت !
Fly Me to The Moon :
أذكري ربك و تعوذي من الشيطان .
اللهم أحيني ما علمت الحياة زيادة لي في كل خير,و توفني ما علمت الوفاة راحة لي من كل شر :
أعوذ بالله من الشيطان الرجيم .
Fly Me to The Moon :
طيب أنا ما اقدر اساعدك بشي غير أني أقولك مهما كان الشي الي مضايقك كبير
ترا ربك أكبر .. وهو ألحين قريب منك أدعي ربك يخفف همك و أنا بعد بدعي لك
و إلا أحسن شي قومي صلي لك كم ركعة و أنتي تدرين الحين وقت النزول الرباني.
اللهم أحيني ما علمت الحياة زيادة لي في كل خير,و توفني ما علمت الوفاة راحة لي من كل شر :
مشكور ما تقصر .. جزاك الله خير .
Fly Me to The Moon :
يالله اتركي كل الي بيدك و قومي صلي !
* يووه وش يبي ذا ؟ طيب وشلون أقوله ما علي صلاة !
اللهم أحيني ما علمت الحياة زيادة لي في كل خير,و توفني ما علمت الوفاة راحة لي من كل شر :
بخليها بآخر الليل , سمعت أنه النزول الرباني يكون بآخر ساعة قبل الفجر .
Fly Me to The Moon :
براحتك .. أهم شي وسعي صدرك يا بنت الحلال ترا الدنيا و الله ما تسوى .
اللهم أحيني ما علمت الحياة زيادة لي في كل خير,و توفني ما علمت الوفاة راحة لي من كل شر :
معك حق .. بس والله مليت !
Fly Me to The Moon :
مليتي من إيش !
اللهم أحيني ما علمت الحياة زيادة لي في كل خير,و توفني ما علمت الوفاة راحة لي من كل شر :
مليت من أسلوب حياتي ! ليش مضطرة أنه غيري يتحكم بحياتي ؟!
أنا بنت عمري 21 سنة و للحين مضطرة أن أمي و أخواني يمشوني على كيفهم !
البنات في المجتمعات الثانية تعتمد على نفسها من يصير عمرها 16 سنة !
وأنا للحين أعامل مثلي مثل ريناد أختي كأني السنة الجاية بروح للروضة !
Fly Me to The Moon :
شوفي أنتي لو تقارنين بينك و بين "بنات المجتمعات الثانية" رح تتعبين .
بس أحمدي ربك على الوضع الي أنتي عايشته .
اللهم أحيني ما علمت الحياة زيادة لي في كل خير,و توفني ما علمت الوفاة راحة لي من كل شر :
عطني سبب واحد عشان احمد ربي عليه !
Fly Me to The Moon :
بنت أستغفري ربك ! أحمدي ربك انك لاقية سقف يضمك تحته !أنك لاقية لقمة تاكلينها و أنتي مو دافعة قيمتها !
على نعمة اللبس و نعمة النوم و أنتي مرتاح بالك !
لا وراك إيجار و لا وراك ديون ! و إلا أنتي تحسبين الاستقلالية مالها ثمن !
بعدين عمرك 22 مو 21
اللهم أحيني ما علمت الحياة زيادة لي في كل خير,و توفني ما علمت الوفاة راحة لي من كل شر :
النعم الي أنت تعدهم هذي أحمد ربي و أشكره عليها .. بس مو على حساب استقلاليتي !
أنا من تخرجت ومحد لاقي سيرة غيري !وش عندها ما أعرست ! تراها موب صغيرة !
اللهم أحيني ما علمت الحياة زيادة لي في كل خير,و توفني ما علمت الوفاة راحة لي من كل شر :
لا و ما توظفت بعد ! عز الله صار يضرب فيني المثل في العايلة : وش له تكملون الدراسة ؟
هذي مرام بنت مشاعل تخرجت لا هي بالي توظفت و لا هي بالي أعرست !
و الله العظيم توني صغيرة عمري ما بعد كملت الواحد و عشرين وبدوا يسوون لي شغل العوانس!
Fly Me to The Moon :
ههه طيب ببلعها غصب و بصدق أن عمرك 21
بس من متى أنتي يهمك كلام الناس ؟ الي أعرفه أن حكمتك بالحياة : أنا ملء جفوني عن شواردها وحطي
خطين تحت النوم ههه
اللهم أحيني ما علمت الحياة زيادة لي في كل خير,و توفني ما علمت الوفاة راحة لي من كل شر :
تستخف دمك أنت الثاني بعد ! إيه عمري 21 و إذا مو مصدق اروح أجيبلك شهادة الميلاد و أسوي لها سكان !
Fly Me to The Moon :
لا لا مصدق ! بس من جد اتكلم أنتي لا يهمك كلام الناس خلك واثقة من نفسك إذا أنتي تحسين نفسك صغيرة و بدري
على العرس ما عليك من الناس ؟
اللهم أحيني ما علمت الحياة زيادة لي في كل خير,و توفني ما علمت الوفاة راحة لي من كل شر :
آآآآآآه خلها على الله إذا صار البلا من اقرب الناس الي المفروض يدعموني وين بتجي الثقة بالنفس؟
* هذي أكيد خالتي ! والله مسكينة الله يعينك !
Fly Me to The Moon :
فيه أغنية لكاظم الساهر عندي بس متعيجز أجيبها لك أحسها تنفع لك : لا لا تتنهد / لا لا لا تتنهد بعد شوي الضحكة
تعود / و النار الي في صدرك تبرد لا لا لاتتنهد
اللهم أحيني ما علمت الحياة زيادة لي في كل خير,و توفني ما علمت الوفاة راحة لي من كل شر :
ههه يا شين العجَز .. بعدين وش عندك للحين تسمع كاظم ؟
Fly Me to The Moon :
للحين و إلى بعدي ن
تراي إذا حبيت أحد اخلص له إلى الأبد
اللهم أحيني ما علمت الحياة زيادة لي في كل خير,و توفني ما علمت الوفاة راحة لي من كل شر :
ههه
Fly Me to The Moon :
مع أني مدري وش سبب الضحك بس بعديها لك احتراماً لمشكلتك الي حليتها
اللهم أحيني ما علمت الحياة زيادة لي في كل خير,و توفني ما علمت الوفاة راحة لي من كل شر :
أي حل ؟
Fly Me to The Moon :
مو أتفقنا أنك بتقومين تصلين ركعتين !
اللهم أحيني ما علمت الحياة زيادة لي في كل خير,و توفني ما علمت الوفاة راحة لي من كل شر :
إيه صح بس هذا حل لنص المشكلة !
Fly Me to The Moon :
لا حول و لا قوة إلا بالله صارت مشكلتك Puzzlعطينا النص الثاني
اللهم أحيني ما علمت الحياة زيادة لي في كل خير,و توفني ما علمت الوفاة راحة لي من كل شر :
آآآآآآآآه أمي نورة تبي تطلعنا المزرعة بالويك إند , و أنا ما أبغى بس أمي غاصبتني !
Fly Me to The Moon :
حتى أنتي بعد ! تو وأنا مع مضاوي و أمي بالصالة بدو يتناقرون و بغت توصل بينهم للشيطان الرجيم !
عاد أنا قمت من عندهم لا يجيني نصيبي وما دريت إلا أمي تلتفت علي و أنا قايم و تقول لي تراك أنت الي بتودينا !
اللهم أحيني ما علمت الحياة زيادة لي في كل خير,و توفني ما علمت الوفاة راحة لي من كل شر :
ههه والله أمي نورة مستبدة ! شكل العايلة كلهم ما يواطنون المزرعة و مع ذلك
أتحدى أحد ينفس بكلمة عندها !
Fly Me to The Moon :
على قولتك شكل العايلة كلها مغصوبة !
اللهم أحيني ما علمت الحياة زيادة لي في كل خير,و توفني ما علمت الوفاة راحة لي من كل شر :
يا حظ بنات خالي عبد الله بيروحون للشرقية مع خوالهم مو إحنا !
Fly Me to The Moon :
ههه وش رايك أقنع أمي نورة نمشي لمكة بدال الخرج
اللهم أحيني ما علمت الحياة زيادة لي في كل خير,و توفني ما علمت الوفاة راحة لي من كل شر :
يا ويلك
Fly Me to The Moon :
ههه لهالدرجة السفر الجماعي معنا لا يطاق !
اللهم أحيني ما علمت الحياة زيادة لي في كل خير,و توفني ما علمت الوفاة راحة لي من كل شر :
أنت عارف أهم سبب يخلينا يالبنات ما نبغى المزرعة ! أنتو يالتماسيح !
Fly Me to The Moon :
آفا وش دعوة ؟ الي يشوفنا يقول ماسكين العصا و رادينكم لا توسعون صدوركم !
اللهم أحيني ما علمت الحياة زيادة لي في كل خير,و توفني ما علمت الوفاة راحة لي من كل شر :
أنتو ماسكين ألعن من العصا ! المشكلة كل الأشياء الي توسع الصدر عندكم !
صالة البلياردو , المسبح , الدبابات ! عاد تمنيت جدي الله يرحمه حاط المطبخ عندكم
عشان نفتك يالبنات من همه , كل كلمة والثانية قوموا جيبوا الشاي قوموا صلحوا لنا كيك!
Fly Me to The Moon :
ههه
اللهم أحيني ما علمت الحياة زيادة لي في كل خير,و توفني ما علمت الوفاة راحة لي من كل شر :
الي قهرني آخر مرة طلعنا رحنا لخالي فيصل و قلنا له خل الشباب يطلعون للدبابات عشان يخلى لنا الجو بالمسبح !
يوم دق علينا قال أنهم طلعوا للدبابات بس بقى محمد ولد أخوي عبدالله و معه أصدقاه بالمسبح ! يعني قمة اللعانة !
لا قدرنا نلعب دبابات و لا قدرنا نسبح!
Fly Me to The Moon :
ههه
والله رحمتكم , من جد ما قد أنتبهت ها أن أبوي سعد الله يرحمه حاط كل الترفيهيات بقسمنا!
بس أنتوا ما عندكم سالفة المفروض يوم خلصوا محمد و ربعه من المسبح طبيتوا عقبهم !
اللهم أحيني ما علمت الحياة زيادة لي في كل خير,و توفني ما علمت الوفاة راحة لي من كل شر :
وع
تبغانا نقبل المسبح من عقب تماسيح
Fly Me to The Moon :
ههه قلعتكم مسوين فيها رقيقات و نظيفات !
طيب وش قعدتوا تسوون غير الكيك والشاهي ؟!
اللهم أحيني ما علمت الحياة زيادة لي في كل خير,و توفني ما علمت الوفاة راحة لي من كل شر :
قعدنا نلعب مونوبولي , تصدق بالله أول مرة في حياتي ألعب مونوبولي و تخلص !
Fly Me to The Moon :
ما فهمت ؟!
اللهم أحيني ما علمت الحياة زيادة لي في كل خير,و توفني ما علمت الوفاة راحة لي من كل شر :
يعني بالعادة لعبة المونوبولي حدنا فيها ساعة بعدين نطفش و نبطل ! ذيك المرة من الطفش
خفنا تخلص و ما نلقى شي نسويه ؟أنت عارف للحين مخلينها هناك عشان لو رحنا
على الأقل نوسع صدورنا بشي !
Fly Me to The Moon :
ههه و عندي لكم نصيحة جيبوا معكم أونو تراها توسع الصدر !
اللهم أحيني ما علمت الحياة زيادة لي في كل خير,و توفني ما علمت الوفاة راحة لي من كل شر :
لا ما أحبها بس من جد راكان ما ودي أروح المزرعة والله قرف بعدين ألحين صيف و أكيد مليانة
حشرات وع
Fly Me to The Moon :
ههه
اللهم أحيني ما علمت الحياة زيادة لي في كل خير,و توفني ما علمت الوفاة راحة لي من كل شر :
آخ أضحك وش وراك مارح تشتغل مدرس خصوصي
Fly Me to The Moon :
ليش عساك بتعطين دروس خصوصية !
اللهم أحيني ما علمت الحياة زيادة لي في كل خير,و توفني ما علمت الوفاة راحة لي من كل شر :
إيه ليلى بنت خالتي راسبة بخمس مواد و تبغاني أدرسها إنجليزي إذا رحنا المزرعة !
Fly Me to The Moon :
ههه
خمس مواد مرة وحدة يا حبي لها هالخبلة ههه
اللهم أحيني ما علمت الحياة زيادة لي في كل خير,و توفني ما علمت الوفاة راحة لي من كل شر :
ضحكت من سرك مالت عليك ! بعدين هي هي أنت وش يا حبي لها !
Fly Me to The Moon :
إيه يا حبي لها وش عليك أنتي ؟
اللهم أحيني ما علمت الحياة زيادة لي في كل خير,و توفني ما علمت الوفاة راحة لي من كل شر :
وجع هي أنت ترا ما ارضى عليها وش الي يا حبي لها !
Fly Me to The Moon :
هي هي لا يروح بالك بعيد نسيتي أنها اختي من الرضاع !
اللهم أحيني ما علمت الحياة زيادة لي في كل خير,و توفني ما علمت الوفاة راحة لي من كل شر :
أشوى .. إلا ألحين وش زود ليلى يوم يرضعونها وأنا لا ؟!
Fly Me to The Moon :
ليه أنتي محد رضعك !
اللهم أحيني ما علمت الحياة زيادة لي في كل خير,و توفني ما علمت الوفاة راحة لي من كل شر :
لا يا حسرة
Fly Me to The Moon :
إم تعالي أنتي ما فيه أحد بعمرك ! نسيتي أن من 22 سنة محد شرف على الدنيا بالعايلة غيرك !
اللهم أحيني ما علمت الحياة زيادة لي في كل خير,و توفني ما علمت الوفاة راحة لي من كل شر :
وجع ألحين من الصبح اقولك 21 .. صدق إذا قالوا الأقارب عقارب !
Fly Me to The Moon :
عقارب بعينك ! يالله وجع بروح أنام .
اللهم أحيني ما علمت الحياة زيادة لي في كل خير,و توفني ما علمت الوفاة راحة لي من كل شر :
بون نوي .
Fly Me to The Moon :
ههه وأنتي من أهله .
* يا حبي لك يا راكان والله أنت الوحيد الي تقدرني بالعايلة كلها
يتبع

في مزرعة الخرج .. كانت الجدة نورة بسيارة ولدها فيصل و زوجته هدى أول الواصلين ..
من حماس الجدة ما خلت فيصل يفطر هو وحرمته .. الحرمة من خلصت مصلية الفجر و هي لابسة عباتها
حتى الخدامات صحتهم بدري , و رجت البيت رجة الي يشوفها يقول عزيمة مندي وهي الي بتطبخ !
طبعاً فيصل ما يقدر على أمه و يدري أنها بتمشيهم على هواها و ما وده يروحون يرتزون بالمزرعة لحالهم !
حاول يوهم أمه أن عنده مشوار ضروري للسوبر ماركت عشان يجيب مقاضي بس أمه ما خلته :
- اقولك موب لازم تجيبهم , دق على واحد من عيال أختك و هم جايين يجيبون المقاضي معهم ترانا أبطينا !
+ وش أبطينا عليه يمه والله لاحقين أصلن ما بعد تحرك أحد ترانا بنكون أول الواصلين !
- شف عاد بتوديني آلحين , وإلا بخلي عبد الحي يوديني !
+ تسوينها والله .. طيب بس ترانا بالطريق بنمر البقالة باقي أشياء ما شريناها !
-وش غرضك يوم أنك عارفن أننا بنروح للمزرعة من زمان ورا ما جبت الأغراض هاه ؟!
و عشان يصرف الموضوع :
+ هدى .. هدى يالله ترانا بنركب أنا و أمي لا تبطين علينا !
و تنزل هدى تتمخطر .. و هي تسحب العباية ..
* هذاني نزلت ..
- يالله يالله ترانا أبطينا !
+ يالله يمه .
و يمسكون خط الخرج , و مثل ما توقع فيصل وصلوا بدري و ماكانوا الهنود متوقعين وصولهم
من وصلوا راح هو و زوجته لوحدة من الغرف وشغلوا التكييف و كملوا نومتهم ..
أم عبد الله راحت مع وحدة من الخدم تدور بالمزرعة , تتطمن على الغنم و الدجاج ..
و قررت تقعد بالدكة تتقهوى لحالها ..
/
/
بعد مرور ساعتين وصلت سيارة Gmc سودا كان يسوقها راكان
راكب بجنبه أخوه عبد الملك – 16 سنة – و أمهم , أخته مضاوي مع الخدامات ورا ..
كان الكل بالسيارة يغط بالنوم , بس صحوا من السيارة مرتاعين على صوت الكلكس ..
راكان : ههه خوفتكم صح النوم !
عبد الملك : عمى إن شاء الله وش عندك أنت !
أم راكان : عمى يعميك و يقطع آذانيك . لا تدعي على ولدي !
راكان : إيه يمه تعجبيني , هي أنت نسيت أني أخوك الكبير وفي مقام أبوك !
عبد الملك:آف أنا وش مقعدني معكم قدام , الحمدلله اننا و صلنا بس !
و يروح راكان لم الباركينق ويلاقي سيارة فيصل خاله ..
راكان : ههه يا حليلها أمي نورة و الله صاروا أول الواصلين .
و توه بينزل الأغراض من السيارة إلا و الخدامة جاية من داخل ..
- وين بابا فيصل ؟
= نايم .
- أجل أنا بروح لقسم الرجال و أنت – يأشر لعبد الملك أخوه – تعال معي .
و يروحون لقسم الرجال ويوم مروا من عند الدكة لقوا أمهم نورة منسدحة .. بس ما كان مبين هي نايمة و إلا لا !
عبد الملك يروح يركض و هو متشقق من الوناسة هو يحب يهبل بها .. و لما قربوا من عندها..
راكان يلحقه ركض ولما وصلوا الدكة صرخ بأعلى صوته :
عبد الملك لا ووجع !!
إلا و أم عبد الله تفزع من النوم ..
أم عبد الله :بسم الله الرحمن الرحيم ..وش فيكم وش صاير ..
عبد الملك غشى من الضحك .. يوم وصل راكان درا أنها كانت نايمة ..
راكان : ما فينا شي يمة .. بسم الله عليك عسى ما أرتعتي ..
ويحب راسها و يجلس جنبها ..
أم عبد الله : راكان .. هلا والله بوليدي - وتعدل جلستها- وينك يمه ما تجي تسلم ما تقول بروح لأمي نورة أسلم عليها .
عبد الملك – وهو يضحك - : لاهي يمة مع العرس و أم العيال ناشبتن له مسيكين أخوي هذا و إنا ساكنين معه
بنفس البيت ما نشوفه !
و عطاه راكان نظرة
أم عبد الله – مسوية فاهمة -: إيه الله يوفقه بس , وشلونها مرتك عساها طيبة !
هنا غشى راكان و عبد الملك من الضحك مررة وحدة ..
وأم عبد الله ما فهمت ليش يضحكون: ضحكوني معكم يا مال العافية والصلاح و الستر ..
و يحاول راكان يمسك نفسه :
لا يمه ما فيه شي سلامتك .. بس ما عليك من ذا الخبل .. بعدين يمه تراني ما بعد أعرست
وإلا خلاص مليتوا و تبون الفكة مني !
أم عبد الله بتحكي يوم شافت عبد الملك للحين يضحك : مليّك و وجع ! ما بعد صرت أصغر عيالكم يوم إنكم تتهزون بي !
و يقوم عبد الملك يحب راسها .. آفا يا أم عبد الله أنتي الخير و البركة ..
إلا وش رايتس يمة تزوجيني بس و ما عليتس من راكان شكله ذا مب معرس أبد !
أم عبد الله : إي والله يا راكان وش بلاك ما بعد أعرست , تراك يا ولد مب صغير!
راكان هنا يحاول يغير الموضوع :إلا وين خالي فيصل ما أشوفه ؟
عبد الملك : تراه يمه يصرفتس ههه ألحقي عليه و أنا ولدتس ..
أم عبد الله تشد أذن عبد الملك : ورا ما تسكت أنت هاه !
و يغشى راكان من الضحك ..
وبهاللحظة تجي أم راكان معها صينية القهوة و يفز راكان ياخذها من يد أمه الي راحت تسلم على أمها ..
و بعد السلام ..
أم راكان : وشفيكم تضحكون من شوي ؟!
أم عبد الله : أنتي ألحين ورا ما تزوجين ولدتس ؟ وش بلاتس عجزتن عنه !
أم راكان : هذا هو عندتس يمه إذا بتقوين عليه يالله أخطب له من بكرة ..
راكان متضايق : يوه يمه وش هالكلام لا تكونون مليتوا مني بس !
أم عبد الله : وش ذا الحتسي يا ولدي ! ألحين نبيك تكمل نص دينك عسى الله بس يرزقك بالمرة الصالحة .
و بهاللحظة يرن جوال راكان , لقاها فرصة يقوم يرد عشان يتغير الموضوع ..
أم راكان : أبد شفتي يمه من يجي طاري العرس يصرفنا ! وأبد هذي حياتنا !
أم عبد الله : هو قاصره شي ؟
أم راكان : لا والله يمه , ما شالله عليه له كم سنة يشتغل .. بس هو الي ما يبي يعرس !
بعدين الخير واجد و أبوه الي موب مقصر عليه بشي يقوله أنت بس قل أبعرس و أنا أتكفل بكل شي ..
أم عبد الله : أجل وش عنده تراه موب صغير ألحين هو من عمر فيصل ولدي و فيصل ولدي متعدي الثلاثين ..
و يغشى عبد الملك من الضحك ..إلا بجية راكان و هو يقفل جواله ..
أم راكان : و أنت بس ما عندك إلا هالضحك و التبطح , ما غير حاط أذنك عند سوالف الحريم !
راكان : وش عندك ضحكنا معك ..
عبد الملك : فاتك أمك و أمي نورة قاعدين يطبخون خطة عشان يزوجونك بالأخير أمي
نورة سوت إنقلاب عسكري و رمت القنبلة بوجهك تقول أنك يالشايب متعدي الثلاثين
ههه
أم عبد الله – وهي تضحك - : وش يقول ذا الهيس الأربد !
راكان يضحك مجاملة .. والله صادقة مرام يوم تقول أنهم ما يرتاحون إلا لما يتحكمون بحياتنا !
هذا وأنا ولد قعدوا يدبرون لي طريقة عشان اعرس و يفتكون مني ! أجل وهي بنت وش بيسوون فيها ؟!
أم عبد الله : هاه وش قلت ؟
راكان : عن وش ؟
أم راكان : قاعدين أنا و أمي نفكر من تصلح لك . بس عاد أنا أقولها ما نبي من بنات العايلة !
و هي تقولك من شوي أنت وش رايك ؟
راكان : ربي يقدم الي فيه الخير , بعدين يمه نورة أنا ما تعديت الثلاثين , توني عمري 27 سنة.
أم عبد الله : هي هي وأنا أمك , السبعة وعشرين أخت الثلاثين ! وش قالوا لك ما أعرف للحساب !
أم راكان : إي ولله أمي صادقة لحق عمرك يا ولدي و أنت شاور لي بالعرس تراك موب صغير ..
وألحين نقدر نختار لك ونتشرط س بكرة إذا وصلت الثلاثين مارح تتشرط !
راكان : أتشرط ؟
أم عبد الله : إيه تتشرط . نبي لك بنت النسب و الحسب و الجمال و الأخلاق .
راكان : و الله أهم شي عندي أنها تصلي و تخاف الله أما الشكل أبيها مقبولة ..
أم راكان وهي متشققة – أخيراً عرفت أجرك بالحكي :أجل خلاص تم من بكرة – يوه أستغفر الله بركة إحنا بالمزرعة – من نرجع الرياض ببدأ ادور لك .
راكان : يووه يمه ما دام السالفة فيها بحث خلاص أخطبي لي شروق بنت عمي !
يتبع