لا وظيفة ولا زواج أنا مرة حزينة

أهلا حبيباتي أنا سجلت هنا لأكتب معاناتي وأفضفض بعد ما ضاق صدري
أدري بتقولو اصبري واكثري استغفار أعرف كل أنواع النصائح
والحمد لله صابرة ومحتسبة ودائما أصلي وأدعي واستغفر ومؤمنة إن كل اللي الله كاتبه هو خير مهما تضايقنا
(عسى أن تكرهوا شيئا وهو خير لكم)
الحمد لله على كل حال
بس بغيت أفضفض
كل اللي أبيه إنكن تدعون لي من قلب لأن دعوة المسلم لأخيه المسلم بظهر الغيب مستجابة
أنا جدا محتاجة دعوات
عمري 27 سنة أحس بالفراغ
لا تقولون ادخلي دورات لأني فلست
دخلت كل أنواع دورات الكمبيوتر والإنجليزي وحافظة القرآن
من يوم تخرجت وأنا أبحث عن وظيفة
قدمت أوراقي للديوان وكل الجهات الحكومية بلا فايدة
اخيرا توظفت بمدرسة خاصة قالو بعد شهرين نعطيك راتب
تحمست أحضر وأسوي وسائل وهدايا للبنات وتعلقت بطالباتي وحبيتهم
وبعد شهرين قالوا مع السلامة
ما عطوني راتب
اكتشفت إن المعلمة اللي أخذت مكانها كانت مسافرة ورجعت عشان كذا طردوني ببساطة
قلت للمديرة طيب على الأقل عطيني شهادة خبرة أو ورقة تثبت إني توظفت قالت لأ
حسبي الله عليها
رجعت صفر زي ما بدأت
بعد كذا توظفت بمدرسة بعيدة عن بيتنا
وزيادة على كذا ذلتني المديرة بالمناوبة والاحتياط وباقي المعلمات مرتاحات
وكل ما طالبت بحقي تقول اسمعي الكلام وإلا ما اعطيك شهادة خبرة
تجرعت الظلم أضعاف وأضعاف أمري لله
لحد ما جت الصدمة
وهي إن المعلمة اللي كانت قبلي كانت آخذه إجازة والحين رجعت
وطبعا قالوا لي مع السلامة مع مطرود
والمدسة اللي بعدها خلوني ادرس كمبيوتر ورسم وعلوم وتوحيد وفقه وسلوك
تخيلو ادرس كل هذي المواد لكل المدرسة ! وطبعا بعد أربع شهور مع السلامة
وعلى هالحال كل مدرسة اكون بدال أحد وهم يكذبون علي ويقنعوني إني إذا اجتهدت وأثبت وجودي
بيثبتوني بالمدرسة
ولا يعلموني إني جاية بدال أحد
كلهم يكذبون ويقولون إن المعلمة اللي قبلي استقالت
وباقي المدارس اللي درت عليها من يوم تخرجت الي الآن كلهم يرفضوني لأني سعودية
هذي معاناتي مع التدريس والمدارس
أما المعاناة الثانية مع الزواج
إلى الآن ما انخطبت مع إني أطلع وأشوف الناس وكل شيء
الكل يتحجج بغلاء المهور وهم أصلا ما يخطبون
محد أصلا يسأل كم المهر
و كل ما اشتكيت لأي وحدة تقول وش معجلك الزواج غثا ومشاكل
استمتعي بحياتك
خلاص يا ناس استمتعت لحد ما حامت كبدي
ما بقى شيء ع الثلاثين
متى يحق لي اتمنى الزواج ؟
هل إذا صار عمري خمسين ؟
العمر يركض والمتزوجات يتفلسفن الزواج نكد والزواج غثا
طيب ليش تتزوجون دامه نكد ؟
أنا ابغى هذا النكد مثلكم
دام إني برزق بأطفال يملون علي حياتي
أنا أتمنى يصير لي أطفال
لا تحسبون إني أبغى الزواج لأني أبي رومانسية مثل الأفلام لا
أنا أقدر المسؤولية وأدري ان الزواج متعب لكن كل شيء يهون عند نعمة الإنجاب صح وإلا لأ ؟
دعواتكن