لعيون كل عرووسه تجاربي القيمه إللي مالك غنى عنها الجزء الثاني لعيونكم

1. نبدأ....؟


2. 5-( صبغتي شعرك وخشن وضعف وتبغيه يرجع زي قبل)


3. 11-(مزيل لرائحة العرق يبيض ويشد الإبط وطبيعي كمان):


4. 16- (ماعندك حمام سونا؟؟ تعالي عندي الحل ونفس نتايج السونا):

بسم الله الرحمن الرحيم
بعد نجاح الموضوع الأول وشفت مدى فايدتكم منه و إقبالكم عليه إللي هذا رابطه:
http://alfrasha.maktoob.com/alfrasha20/thread1584889/
يسعدني حبيباتي أقدم لكم موضوعي الثاني من تجاربي السحريه إللي أتمنى تكون من (إدخال السرور على قلب مسلم وتفريج هم يارب و مرجع طواريء لكل عروسه ولكل زوجه)
عدد المشاهدات يسعدني ويحسسني بقيمة إللي كتبته لكن..ردودكم لها طعم ثاني.
(و الأهم من هذا كله نتائجها تظهر في أقل من إسبوع إن شاء الله)

نبدأ....؟

1-(الشخير) حاجه مرره محرجه: شرب ملعقه صغيره زيت زيتون قبل النوم. * إن شاء الله النتيجه من أول إستخدام*
2-(لنفخ الشفايف طبيعياً)لفتره مؤقته بعيد الشر عن تغييرخلقة الله: أطبقي شفايفك على بعض بقوه متوسطه لمدة دقيقتين مرتين في اليوم. راح تشوفي الفرق من ثالث يوم بس أنتبهي لازم تتابعي إذا وصلتي للحد المطلوب قللي من التمرين لأنه إذا زدتي وصرتي أم برطم لا تلوميني.
3-(صبغتي شعرك وطلع اللون أفتح من المطلوب):
حطي على شعرك أوكسجين 6% عشان يغمق اللون وخليه على شعرك من 6-10 دقايق مع المتابعه إذا وصلتي للون المطلوب ولا لسا. طبعا من أول مره.
4- (صبغتي شعرك وطلع اللون أغمق من اللون إللي تبغيه):
حطي على شعرك أوكسجين 9% من6-10 دقايق مع المتابعه عشان لا يفتح اللون زياده و أنتبهي لتوزيع الأوكسجين يكون متساوي. برضو من أول مره.

5-( صبغتي شعرك وخشن وضعف وتبغيه يرجع زي قبل)

لازم تسوي الوصفه هذه لأنها تخلص الشعر من الأمونيا الموجوده في الأوكسجين إللي كانت السبب في خراب شعرك: تاخدي 1كوب عصير برتقال-1كوب عصير تفاح-1كوب عصير كيوي >>> طبعا أنا أسوي لشعري نص كوب من كل شي, تخلطيهم وتحطيهم على شعرك لمدة 3ساعات ويغسل بعدها الشعر عادي وتكرر الطريقه ل3مرات. مره حلوه وحيرجع الشعر زي ماكان.
6- (حبيتي تغير من لون شعرك بطريقه طبيعيه) : علبه زبادي+قرمز أحمر أو باذنجاني تخلط مع بعض وتحطيها على شعرك ل6 ساعات إذا شعرك فاتح و8ساعات إذا شعرك غامق.من أول مره تلاحظي الفرق على الأقل لمعه حمرا حلوه وممكن تسويها إذا شعرك مصبوغ بلون فاتح أو مخصل هايلايت تطلع واو.
7 - (رموشك تتساقط..؟): أدهنيها بزيت البنفسج. من أول إسبوع تلاحظي الفرق.
8-(عندك ماسكارا عاجبتك وخلصت تعالي نسوي بدالها وأحسن منها): بعد ماتغسلي العلبه حقت الماسكارا تحطي فيها هذه المقادير بعد ماخلطتيهم سوا,علبة صغيره كحل إثمد –ملعقه صغيره عسل-نقطتين ماء ورد –نقطتين ماء زمزم إن وجد- زيت خروع نقطتين أنتبهي لا تنزل عليكي ثلاث بدل إثنين يمكن تخرب ههه
حطوها في علبة الماسكارا بواسطة الإبره الطبيه مو الخياطه. جربوها خيال و أهم من كدا إنها طبيعيه ما تضر أبدا إن شاء الله.
9-(أظافرك تتشقق وتتقشر وضعيفه): أطحني ملعقتين حلبه و أعجنيها بزيت زيتون وحطيها زي المناكير على أصابعك أصحاكي تقولي الريحه مافيها لا ريحه ولا شي. مفعولها مره سريع ماشاء الله حطيها يوميا وخليها ربع أو نص ساعه ل6 أيام.
10-(للأرق): أشربي لبن.بالعافيه وسفي شويه حبه سوداء وممكن تجربي بنادول نايت ماراح تحسي بنفسك. حتنامي على طول.

11-(مزيل لرائحة العرق يبيض ويشد الإبط وطبيعي كمان):

المقادير:أي كريم عندك ماعدا الفازلين 4ملاعق+ فنجان قهوه شبه مطحونه+2ملعقة طعام ماء ورد+2 ملعقة طعام نشا+ مسك أو عنبر سائل إن وجد >> يعطي رائحه منعشه وجميله تخلط المقادير وتوضع في علبه مزيل فارغه . أستمري شهر وشهرين وكل ما تستمري تلاحظي فرق رهيب بياض ونعومه ومنطقه مشدوده.
12-(للتشققات والسلوليت كثير بنات سألوني عالخاص عن هذ الموضوع وحله بسيط): منتجات روك للسلوليت و للتشققات ماسك الذهب سبق و قلتلكم عنه و أستخدمي زيت جنين القمح من وادي النحل. لا تكوني كسلانه أستمري في الإستخدام لشهر أو حسب المشكله إللي عندك.
13-(لحب الشباب والبشره الدهنيه): المسحه الطبيه أستمري عليها يوميا. من أول أسبوع تلاحظي الفرق.
14-(تبغي خصر منحوت زي البنات): كل يوم أوقفي وثبتي رجولك في الأرض و سوي كأنك بتاخذي شي من وراكي مره من اليمين ومره من الشمال فهمتي كيف؟؟سويه 20 مره كل يوم أو كذا مره كل ما أتذكرتي. والله الكل راح يقولك ياي صار عندك خصر مرره حلوه وأستمروا عليها كل ما إستحميتي سويها ما تاخد وقت.
15-(واقي شمس جنان وطبيعي): أنقعي شويه رز في نص كوب مويه وحطيهم في علبه بخاخ و أحفظيهم في التلاجه و إذغ جيتي خارجه خوذيها معاكي مره حلوه وحتفتح من لونك كمان.

16- (ماعندك حمام سونا؟؟ تعالي عندي الحل ونفس نتايج السونا):

تاخذي كيس كبير (ممكن كيس الزباله الله يعز شانكم) وتفتحي فيه فتحه من تحت من النص على قد راسك وتدخلي راسك منه وتلبسي الكيس وتكوني جالسه على كرسي والكيس حوليكي مغطيكي إنت والكرسي فهمتوا عليا؟؟ الخطوه التانيه: تغلي مويه وتحطيها في وعاء بلاستيك وتحطيها تحتك جوات الكيس و أقعدي على حالك ل15-20 دقيقه وشوفي النتيجه. نفس فعالية حمام السونا وسهل جداً.
بنات حبيباتي أرجع أعيد و اقولكم هذه الوصفات تجارب لوصفات بنات من منتديات متنوعه جزاهم الله خير و أسكنهم فسيح جناته الله يحققلهم أمانيهم ويسعدهم في حياتهم ويفرج همهم وغمهم آمين يارب.
ولا تنسوني من دعواتكم بظهر الغيب......
قراءه ممتعه و أنتظروني بموضوعي القادم إن شاء الرحمن.
يعطيكم العافيه...