لكل متزوجة عندها مشاكل مع زوجها او سعيدة

مرحباً
احب اسلم على كل المتزوجات ..واقول لكم تعالوا ابيكم بكلمة راس .....
.. ..
ماكتبت هالكلام الا لأني احب لكم الخير
اول شي // اقول لكل وحدة متهنية بزواجها ومبسوطه مع زوجها وعيالها (الله يهنيكم ويتمم عليكم يارب العالمين))
ولكن // لازم تعرفون ان النعمه زوالة ..ولازم تحافظين على هالمستوى اللي انتِ عايشة فيه
واذا مرة من المرات غلبك الروتين والالا شي جاك بخاطرك وقالك خلاص هذي حياتي وماراح تتغير ليش اتعب نفسي
تكونين غلطانه
مثلاً :: عندك بستان فيه ورود جميلة جدا ..تتركينها تذبل
من هنا اقولكم لابد ان تعتنين ببيتك وزوجك ونفسك وعيالك
=====================================
ثانيا // اقول لكل زوجة عندها مشاكل مع زوجها او تحس انها عايشة ببيت زوجها وهي زوجة بالأسم بس او كانت تحب زوجها وبدت تكره زوجها لأي سبب من الأسباب او او او
ياخواتي انتم متزوجات <<وهذي بحد ذاتها نعمة عظيمة ...بدل ماتجلسين تتذمرين من زوجك او تسبينه او تدعين عليه او بس تتصيدين له الأخطاء ومحولة بيتك وحياتك لجحيم لأسباب تافهه
ماجاب لي هدية -ماكلمني اليوم -ما ارسلي -ماطلعني -هاوشني -مادلعني -مايسوي لي مثل فلانة-ماجلس اليوم عندي وراح لربعه او لأهله
حرام يافراشات ارفقوا بحالكم وبأزواجكم ولا تهدمون بيتكم بيدينكم
احمدوا الله وانتم قايمين وقاعدين ..وراح اقولكم ليه
1/ انتِ تزوجتي وانسترتي وربي اغناك بالحلال عن الحرام
2/حسيتي انك مرغوبة وانخطبتي وتزوجتي وماجلستي ببيت اهلك عانس او مطلقة
3/ جالك عيال وصرتي ماما
4/صارت لك مملكتك الخاصة وجنتك اللي الكثير الكثير يتمنونها
والله يامتزوجات انتم في نعيم منتم حاسين فيه
في بنات وصلوا للأربعين وللحين محد تقدم لهم بالمرة
وفي بنات اهلهم عاضلينهم لايتزوجون ومحرومين من الزوج الحنون والطفل البار
والله ان طفلك بين يديك من زوجك واحساسك ساعتها يساوي الدنيا ومافيها
وتجون تتذمرون وتتحسبون على ازواجكم لأتفه الأسباب
انا ما اقول الرجال ملاك ..في رجال يطلعون عيون زوجاتهم (بس ارجع واقول زوجك على ماتعودينه وولدك على ماتربينه)
غلط عليك زوجك اليوم!
لاتزعلين وتحقدين وتخربين بيتك ...اجلسي وياه اذا هدا وتفاهموا وعلمية ان اللي سواه اليوم غلط او ما اعجبك وان هالشي ماهو مقبول عندك .<<راح يتغير للأحسن
اما تسكتين وتنقلب الدنيا على راسك ..تحملي انتِ النتايج
واللي تقول ابي اتطلق عشان سبب ممكن انه ينحل بشوية صبر او تفاهم او حتى تنازل بسيط وفي حدود الشرع اكيد
صدقوني مافي اي وحدة كانت متزوجة وتجي تحط راسها بالليل على المخدة وتلتفت جنبها وتلاقي زوجها نايم بجبها ..اتحداها تتحمل الطلاق والفراق
اذا وسوس لك ابليس بالطلاق تخيلي نفسك مطلقة وكيف حياتك بتكون وبعدين اذا اعجبك الوضع ساعتها بكيفك
لا تطلبون من رجالكم فوق طاقتهم لا بالماديات ولا بالمعنويات
ولازم لازم كل زوجة تعرف الفرق بين الرجل والمرأة عشان تقدّر الظروف
وماشاء الله هنا عندكم بالققسم هذا الكثير من المواضيع اللي اذا طبقتيها بتعيشين احلى عيشة ومتهنية ومبسوطة
والأم اللي عندها عيال ..كوني فعلا ام وربي عيالك احسن تربية اعرفي ان لك اجر بكذا ..لا تطلعينهم معقدين نفسياً وتقعدين تبردين حرة هوشاتك مع ابوهم فيهم او تتهاوشون قدامهم والا كل شي لآ وكل شي ممنوع
يقولك المثل لاتكن صلباً فتكسر ولا ليناً فتعصر
هذا مافي جعبتي ..اذا تذكرت شي جيت وكتبته لكم
وعلى فكرة انا لساتني بنوته لكن حبيت انبهكم علانعمة اللي انتم فيها والله يوفق الجميع