ماأروع الثقة بالله عزوجل

1. السلام عليكم ورحمة الله وبركاته


2. خلينا نحسبها حسبة رياضيات


3. حلم الزواج والأمومة

السلام عليكم ورحمة الله وبركاته

الثقة بالله شي حلو اكثر البنات اغفلوا عنه وقعدت كل وحده تندب حظها وتقول انا مستحيل اتزوج لاني غير اجتماعية ولا اروح اعراس ولا انا انسانه عادية موب جميلة ولا انا خلاص كبرت من راح ياخذني الأصغر مني ماتزوجوا وانا معقولة راح اتزوج وكلام كثير اكثرنا لما يقراه يحس بالأحباط .
الثقة ثم الثقة ثم الثقة برب العالمين اني راح اتزوج غصبن عن اللي يرضى واللي مايرضى ، لو اجمل الجميلات ماتزوجوا ولو اتقى وحده في العالم ماتزوجت والله وعزة جلال الله راح اتزوج مهما الناس قالوا :وانتي صغيره مايخطبك الا اللي محد يبغيهم فشلون اللحين يوم كبرتي اكيد راح يجيك اخس وانا ارد واقول موب انتوا اللي توزعون الأرزاق الرزق بيد رب العالمين والله راح اتزوج واحد من احسن الناس واعرف انه امر المؤمن كل خير والله راح يعطيني حتى يرضيني .
ولازم الوحده تكون متفائلة موب متشائمة وتنظر إلا النص المليان من الكوب موب الفاضي يعني أشلون :
متشائمة يعني لما البنت تروح الأعراس و تشوف البنات اللي ماتزوجوا اللي ملكة جمال واللي بياضها بياض سورية واللي جسمها عارضة ازياء واللي شعرها يسحب وراها واللي ابوها غني ولاوزير ولا سفير تشوف فيهم مميزات غير عادية و ماتزوجوا فتقول ذيلن ماتزوجوا انا راح اتزوج مستحيل ؟؟؟ ولا فلانة فيها مميزات كثيرة وخذت واحد مايستاهلها اجل انا من بياخذني .
ل كن نظرة المتفائلة تقول أنا راح اتزوج لاني موب اقل من الناس اللي تزوجوا و القاعات مالية البلاد وكل يوم عرس فيها ،هاذيه غير الأعراس اللي في الخيام وغير الأعراس اللي في البيوت وغير الأعراس اللي خارج البلاد وفي ناس ماتسوي اعراس وتسافر ، والمحكمة مليانة ناس تملك كل يوم (صديقتي يوم راحت تملك تقول المحكمه مليانه )

خلينا نحسبها حسبة رياضيات

يعني لو نحسب ونقول مثلا حوالي 30 عرس يصير في اليوم نضربه في عدد ايام السنه 365 يوم(طبعا نشيل شهر رمضان والأعياد) نشيل 45 يوم _30 عرس × 320 يوم =9600 عرس في السنه يعني حوالي 10 الاف عرس في السنه انا تقريبا خذيت المتوسط (تحسون انكم في حصة رياضيات ....صح) يعني معقولة ماراح اكون بين الأف من الناس اللي قاعدة اتزوج كل يوم ، اقسم بالله العظيم راح اكون منهم، هالكلام نفسه اقوله للي لين الحين ما خلفت واقولها المستشفيات مليانه نسوان حمل ويخلفون اكيد راح تكونين منهم.

حلم الزواج والأمومة

بعد لازم انه تخيلين انك متزوجه تعيشين الحياة الزوجية من بدايتها ،يعني تخيلين يوم الملكه والشيخ قاعد يسالك وزوجك واهلك حواليك وانتي تجاوبين وتقولين موافقة وبعدين الكل يبارك لك وتخيلين اشلون راح تجهزين لزواجك ووشو راح تشترين تكتبين القائمة وتوزعين المهر .
اعرف وحده لما كانت في الثانوية كانوا من اللي يسافرون كثير وكانت كل ماسافرت تشتري قمصان نوم من ايام الثانوية لي صار عمرها تقريبا 24 تزوجت وعندها شنطة مليانة قمصان نوم لانها متاكده انها راح اتزوج ، نفس القصة اللي راحوا يصلون صلاة الأستسقاء وكان واحد بينهم شايل مظلة ليش؟ لانه عنده ثقة بالله عزوجل .
احلمي بيوم زواجك بادق تفاصيله من تقومين الصبح لين تدخلين انتي وزوجك عش الزوجية وصممي فستان العرس و جهزي الزفه اللي راح تدخلين عليها واختاري لون الطاولات وكتبي اسماء المعازيم عيشي الزواج كانه حقيقة وواقع.
وان شاء الله يعجبكم موضوعي يا عرايسنا الحلوات
محدثتكم اللي ان شاء في القريب العاجل تصير عروس