متأخرات في النص الآخر من الكرة الارضية

1. Infertility is one of the hardest roads to travel for sure

العنوان يمكن يكون غريب شوي ،، بس هذا اللي يا في بالي أول ما فتحت صفحة كتابة الموضوع
كعادتي اليومية ... دخلت قسمي اللي اسميه قسم أكثر العضوات أملا باذن الله وفرفرت شوي بالمواضيع كأني مقابلة تلفزيون وافرفر في القنوات خ
وكالعادة قريت مواضيع لعضوات يحسون بأعراض الحمل ... و يتسائلون هل يا ترى انا حامل أو لأ
وفيه مواضيع تبث في نفوسنا التفاؤل من أدعية و تجارب سابقة ... ومواضيع نترقبها تعلن خبر حمل احداهن وعليه يتجدد فينا دم الأمل ...
لعل وعسى نكون من اللي يتبارك لهم الشهر القادم
و لأني من اللي يعانون ولا يحبون يشتكون ... بين فترة وفترة أحس بحزن شديد لحالي >> خلصينا ترا ما صارت... طولتيها وهي قصيرة خ
فكرت اني ادخل منتدى اجنبي لتأخر الحمل << جاسوسة خ
وكل نيتي اني اشوف كيف الوضع عندهم ... وشو هي الاختلافات وكيفية طرح مواضيعهم و ردودهم
ووالله ...... كل اللي قريته مشابه لحالنا و معاناتهم تتشابه مع معانتنا في كل شي
حتى انهم فاتحين مواضيع .... كل وحدة تطلب من اللي بعدها ان تدعي لها ...
وحدة تقول سويت عملية انابيب ... و ما نجحت .. و قالت انها بترتاح شهر و الشهر اللي بعده تسوي الانابيب مرة ثانيه ...
ا لمهم ان في الشهر اللي ارتاحت فيه زوجها كان مقرر يسافر في اسبوع التبويض حقها .. و الجماع تم بطريقة عفوية ... تقول انتظرت الدورة عشان ابتدي ادوية عملية الانابيب بس تأخرت عليها و يوم حللت طلع ايجابي
وفي آخر الموضوع تقول للعضوات ... اتركوا موضوع الحمل لله سبحانه و بيصير من نفسه ....
ووحدة كاتبه للثانيه .. ان شاء الله ما تشوفين الدورة الا عقب 9 شهور << عاد هذي اشك انهم سارقينها من منتدانا خ
ووحدة ثالثه تقول ... كل صديقاتي حملوا .. وكل ما اسمع خبر حمل وحدة احس اني بستفرغ و كأنه لاطميني كف على ويهي << مسكينه عيل لو كل يوم عندهم عزايم حريم شو بتسوي ... خ
وحدة رابعه تقول .. انها كانت في الدوام و عندها موظفه حامل .. و ياها الطلق في الدوام .. تقول في البدايه فرحت لأنها بتولد و بتفكنا من لسانها لأنها كل يوم تشتكي من الحمل وانه متعبها ... بس بعدين تمنت لو انها مكان الموظفه هذي .. و كانت بتصيح في الدوام .. بس تقول مسكت نفسي و يوم ركبت السياره راجعه للبيت صحت صياح اليهد ( هاي من عندي خ ) عشان تطلع اللي في خاطرها ....
هذي بعض من المواضيع اللي مريت عليها ... وغيرها وايد .... سكرت المنتدى .... و فكرت ان مهما اختلفت الاجناس و الديانات يبقى هاجس الامومة واحد .... على قولة وحدة هناك ...

Infertility is one of the hardest roads to travel for sure

بما معناه ... طريق تأخر الحمل واحد من اصعب الطرق اللي الانسان ممكن يمشي فيه
وفي النهايه مالي غير الدعاء .. ان الله سبحانه يرزقنا جميعا بذرية صالحة طيبه تعوضنا عن كل هالمعاناه .. والحمدلله ان لنا رب وعدنا باستجابة الدعاء .... نصلي له ونناجيه بعد كل صلاة ... و الحمدلله على كل حال
مراسلتكم من كندا .... نزاعة