متفائله بطلاقي بعد كفاح مع الصبر

1. بسم الله الرحمن الرحيم


2. انا بنت زي أي بنت حلمت انها تتزوج وتنستر وتعيش ايام حلوه مع زوجها

بسم الله الرحمن الرحيم

انا بنت زي أي بنت حلمت انها تتزوج وتنستر وتعيش ايام حلوه مع زوجها

درست وكملت تدريسي الى ان اتخرجت من الثانوي وجلست بالبيت وبعدها بسنه عمتي اخت ابويه خطبتني لولدها ووافقت واهلي طبعا وافقو وقالو مايعيبه شي واللي نعرفه احسن من اللي مانعرفه ومن ده الكلام المهم صارت الخطوبة وملكنا طبعا مرت فترة الخطوبة وكانت سنة عاديه جدا ماحسيت فيها زي ماباسمع وحبيته بعد الملكه واتزوجنا وبعد الزواج بدأت معاناتي مع ولد عمتي وزوجي وحبيبي وخسارة فيه حبي خسارة ..
بدأ ظلمه لي وظلم اهله حاولت ارضيه وارضي اهله لكن بلا جدوى سمعت اهانات وسمعت كلام وشتايم لاهلي وامام عيني وكنت اسكت واقول عمتي
وزوجي عيب ارد عيب ارفع صوتي وعيب وعيب وعيب وعيب وعيب وعيب .................
زوجي او اللي كان زوجي كان يهينني قدام اهله وكنت اسكت وماارد ولا احد فيهم كان يقولو عيب وكنت اسمع دعاوي من عمتي على ابويه وامي وكنت اسكت ماارد وشوفت اهانات كتيره منهم ومع ذلك كنت احبهم وصبرت واتحملت اللي مايتحمل عشان عشا خاطر عيالي
اتخيلو مااقدر اشتري لولدي ولا بنتي شي من ذوقي
اتخيلو مااقدر اقول ابغى ولدي ينام عندي اويروح معايا عند اهلي او أي مشوار
اتخيلو سلفتي كانت تاخده عند اهلها وانا لا ممنوع اخده
اتخيلو مالي أي حكم على عيالي ولا سميتهم ولا يمكن افكر بده الشي
اتخيلو بنتي سمتها عمتي على اسم سلفتي وانا مامنعت
اتخيلو عمري ماروحت معاه مطعم ولا حديقه
اتخيلو مره مانصفني ولا قدر يحميني
اتخيلو كان يقولي اهلي باي لحظه ممكن يطلقوكي مني ويزوجوني غيرك
اتخيلو عمره ماقالي كلام حلو او رومانسي او يريح البال او الخاطر
اتخيلو اني ماسافرت معاه ابدا الا لمن اخدونا اهله معاهم
اتخيلو ابو عيالي كان يحبسني في البيت انا وعيالي بدون سبب مقنع
اتخيلو اني اتمنعت من اهلي 4 شهور لا اشوفهم ولا اسمع صوتهم ولا يجوني
اتخيلو ابو عيالي كان مايوديني ولا يجيبني مشاويري
وغيره وغيره وغيره وغيره ولله الحمد
عيشت من حياتي 6 سنين حياة الله اللي يعلم فيهاا كنت لااشتكي ولا اتكلم كان يضربني قدام عيالنا ويجلسو يبكو وكان يحرش عيالي عليا ويشتمني ويخليهم يشتموني وكان يقولهم اضربوها هادي مو حلوه
كان اذا صار خلاف بيني وبينه يسيب البيت ويروح لاهله ويقول لامه وامه تقول للناس والناس يوصلو لاهلي . صبرت عليه كتير واحترمته بيني وبينه قدام الناس ولا كنت ارضى أي كلمه فيه ابدا حتى من اهله
ماكنت اطيق فيه حرف وازعل أي احد يقول شي عنه كنت احبه وهبت حياتي له وهبت عمري له ودفنت نفسي له وعشانه كنت اوفر له كل سبل الراحه ماكنت اضغط عليه ابدا واحاول ارضيه واذا شوفت شي من اهله انسى ولا اقوله كنت احب اشوف البسمه في وجهه وكنت اتعامل معه كانه طفل كنت احلق له واصبغ له واقص له صرت له الام والاخت والزوجه والعمه والخاله والصديقه ولاخ والاب والعم والخال والصديق والصديقه لكن هو اعطاني خدامه وبس كان يقولي انتي خدامه لي ولاطفالي وبس انتي مالك حقوق مالك مصروف مالك ومالك ومالك
كرهت طموحي اللي قبل وكرهت دراستي اللي كنت احلم اكملها عشان اجلس في بيته واخدمه كرهت اهلي عشانه
كنت انا ولدي مانخرج ابدا من البيت قبل ماياخدوه عندهم واذا طفشت مره انا وهو كنت البسه والبس العبايه واخرج اجلس جمب البقاله واشوف السيارات والناس وهو يجلس يضحك اه ياولدي
كنت اذا ابغى اطمن على اهلي اروح البقاله اتصل من عنده واعطيه ريال طبعا ماكان عندي تليفون والجوال اخده مني وجواله كان يقفله اذا جاء البيت وكانو طبعا مايقدرو يجوني ولا انا اروحلهم المهم يوم من الايام روحت بعد الفجر انا وشايله ولدي وابغى اطمن على اهلي الا قالي الباكستاني مافي تليفون قولتله ليش قال جات حرمه ورجال معاها قال لاتعطيها واذا اعطيتها نجيب الشرطه لك وهو خاف
يومها جلست ابكي وابكي وابكي وانا في الشارع
واقول ليه ياعمتي ليه كده انا ايش سويت والله احبكم واحب زوجي وماابغى اضر احد منكم
وطليقي حسبي الله ونعم الوكيل كان سلبي مره
كان اللي يقولو عليه اهله هو اللي يمشي وبس اذا بغيت شي يستاذن من امه
وهي تقول ايوه ولا لا واستمريت معاه 6 سنين وهي اللي تتحكم فيا وانا اسوي نفسي اني مادري انه زوجي اللي قالي لا وهو اللي قالي ايوه عشان ماازعلهم واحرجهم كنت اضغط على نفسي كتير عشان مازعلهم
ولدي اخدوه بعد ماولدت تاني وصرت لمن اروح عندهم اشوفه مايبغاني بعد ماكان متعلق بياا وبعد فترة صار يتفل علي وهما يضحكو
وكنت عادي لاازعل ولا شي ولااطلبه ولاشي
كل من شافني يقولي الله يعينك والله يصبرك متحمله والله انك بنت رجال واقولهم معليش هو يحبني وعمتي تحبني بس هما عصبين
أي احد يقولي سيبه خليه يطلقك اقولهم لا عيب اصبر وربنا يعوضني خير انا ماابغى اشرد عيالي ولا ازعل عمتي واجرح زوجي وانا احبه وهو يحبني وربنا كريم والحمدلله على كل حال
صبرت على ضربه
صبرت على اهانته
صبرت على تجريحه
صبرت على اهله امه واخواته واخوانه وابوه
صبرت على الفقر وغيره وغيره وغيره ........
صبرت سنين وشهور وايام وعلى اشياء كتير وفي الاخير يطلقني ومن غير سبب قوي لكن مااقول غير الحمدلله ربنا افرجها عليا وفكني منه من غير ماانا اطلب واغضب ربي العالمين
الحمدلله صبرت وصبرت ومني ندمانه ابدا خليته كله لوجه الله عزوجل وربنا يعوضني واملي بربي كبير
انا بطبعي مااشكي ولا افضفض كله بقلبي اخليه لكن انا حبيت افضفض لأخواتي اللي بالمنتدى وحابه منكم دعوة طيبه
طبعا انا دحين عند اهلي وعيالي مو عندي عندهم ومستودعتهم لله .
ومااقول فيهم غير حسبي الله ونعم الوكيل
حسبي الله ونعم الوكيل
حسبي الله ونعم الوكيل
انا طبعاا ابغى اعوض كل اللي فاتني دخلت دحين دورة وان شاءالله باحاول اكمل تعليمي وبديت بشغل بسيط الين مالاقي وظيفه
وابغى اقولكم تجربتي هادي خلتني انسانه تانيه علمتني اشياء كتيره حولتني من انسانه ضعيفه الى انسانه قويه
علمتني اني مااستسلم للضعف
وعلمتني وعلمتني وعلمتني
وفي اخر كلامي مااقول غير اللهم اجرني في مصيبتي واخلفني خيرا منها ياكريم
وحسبي الله ونعم الوكيل
اختكم
gLAMORY