نشاف حار ام مكواة الكبس ايها افضل

الدبيه العصقوله

01-02-2022 - 11:32 am

السلام عليكم ورحمة الله وبركاته
شخباركم صبايا
انا ان شاء الله بتروح شغالتي بعد كم شهر
ودي اشتري نشاف حار اتومتيك لي وللزمان
واكثر شئ ياخذ وقت الغسيل والتنشيف والتطريق والكوى
فبختصر 3 اشياء
اللي هي :
التنشيف والتطريق والكوى
بس
ودي اسأل كلن من جرب النشاف الحار الاتوماتيك
هل هو زين ؟؟؟
افضل ماركه وشي ؟؟
وهل فيه احجام صغيره تصلح للي بيتهم صغير زينا !!
او اشترى مكواة الكبس
بس مدري فيه احد جربها
وتنصحوني اشتريها بدل النشاف الحار ؟؟
محتاره
انصحوني الله يعافيكم
تقبلو دعواتي بظهر الغيب

التعليقات (9)

الدبيه العصقوله

01-02-2022 - 02:09 pm

ردو
علي بليز
كلمة ولو جبر خاطر

الدبيه العصقوله

01-02-2022 - 03:10 pm

21 مشاهده ولا احد رد :(

عجايب^_^ الدنيا

01-02-2022 - 04:11 pm

انا مثلك ودي بالنشاف الحار وحده من صديقاتي عندهم وتمدحه بالحيل تقول اختصار اطلع البلوزه والبسها على طول تكون ناشفه ومكويه بس والله مقدر افيدك اي الماركات احلى-
اما بالنسبه للموكى الكبس هذا اخوي شراه لزوجته تمدحه بعد خصوصا لملابس الاطفال بس عيبه تقول يكوي يديني اشوف في دينه اثار كوي تقول منه وكويته ماتروح يبقى الاثر
نصيحتي النشاف الحاريختصر الوقت والجهد
وانتي شوفي اللي يريحك

انين الخريف

01-02-2022 - 05:13 pm

اشتري نشاف حار بلالالالالالالا منازع اسهل واكثر عمليه واقل مجهود...وش جاب انك تقعدين تكوين كل قطعه لحالها لانك تدخلين كل ملابسك دفعه وحده وتطلع لك مكويه وجاهزه للتصفيط...

ام جنى فيء

01-02-2022 - 06:14 pm

انا شريت المكوى الكبس ولا استخدمته لانه يخرب الالوان بسرعة تشهب ويأخذ وقت اكثر من الكوي العادي
وشريت النشاف الحراري مو زي ما يقولون الناس تطلعي اللبس وتلبسينه الا القطن بس هو حلو في الشتاء ينشف الملابس بسرعة اذا مضطره اشتري النشاف افضل وانا شاريه 10 كيلو لاني اغسل مفارشي في البيت وانشفها فيه

الأثير*

01-02-2022 - 07:15 pm

والله جاء في وقته أنا مثلكم ودي فيه شغالتي رايحه بعد كم يوم لكن عندي أسئله وياليت تفيدوني من وين أشتريه يعني أحسن مورد وبكم سعره
أرجوكم محتاجه ضروري

الدبيه العصقوله

01-02-2022 - 08:16 pm

هلا بكم
ياليت اللي عندهم خبره يفيدونا
وشعارنا
لا للشغالات بعد اليوم
مصاربف وتعب نفسي

نوني وكوكو

01-02-2022 - 09:17 pm

انا عندي نشاف حار والله راحه لا مثيل لها اطلع ملابسي والبسها على طول
يعني مثل عباتي اذا توسخة بنص ساعه اغسلها وانشفها والبسها مكويه وناشفه هي والشيله والنقاب
وانا اذا عندي لبس طلعته من الكبت يبله كوي اخذه واحطه بالنشافه على طول واخليه 10 دقايق اطلعه مكوي وخالص
بس نصيحه ملابسك الكشخه والي تخافين انها تكش لا تحطينها فيها لانها تكشش الملابس مثل الجلابيات والبيجامات
نصيحه نصيحه اشتريها

مدمنه سنوات الضياع

01-02-2022 - 10:18 pm

ان انصحك انك تجربين المكواه الكبس لانها عندي والله بدله دوام زوجي ماتخذ معي دقيقتين بس خبيها عن الناس والله تراهم تنطنط عيونهم فيها وبعدين بيقولون بايخه ولكي الاختيار

غرف حلوه للمواليد←
تكفون→