نصائحي الذهبيه بالجهاز لعرايسنا لوجه الله مابي غير الدعاء

1. شخباركم عرايس


2. عشان كذا بمسك كل وحده منكم كني اخاطبها بشكل شخصي يعني الكلام لك ولها


3. بسم الله


4. وهذا شكل الخمريه من جوا

بسم الله الرحمن الرحيم

شخباركم عرايس

انا اختكم توي عروسه تزوجت بعيد الفطر ماشاء الله والحمدلله ربي رزقني بالحمل وكرشتي تسمعكم
الحمدلله والشكر الف مره .. نجي لموضوعنا انا كنت اول مشاركه بالقسم وكنت مثلكم محتاره ولاادري من وين ابدى بالجهاز وهيك المهم ان طبقت عدة افكار بجهازي والحمدلله اشوف انها الان كانت ناجحه عشان كذا لوجه الله ومن محبتي لكم كاخوات بقولكم عده نصايح يكمن تنفع بعضكم ....

عشان كذا بمسك كل وحده منكم كني اخاطبها بشكل شخصي يعني الكلام لك ولها

بسم الله

1- عليك بلبس البيت يعني بجامات فمصان قصار هيك شي لانك تبين تكشخين عنده كل يوم بلبس يعني انا اكثر شي قشيت ملابس بيت كانو شنطتين ماشاء الله وبشهر وشوي خلصن ههه وقمت اعيد ملابسي واغير بالاستيالات عشان مايلاحظ اني اكرر يعني راح يفيدك هنا القطع المفرده يعني اللي انتي تطقمين منها يعني مدري انتي وين بس بالرياض انا جهزت فيه المحلات اللي تجي متخصصه بالملابس هذي زي بالمجد ومكه وهيك تلقين بلايز اقطان ب 30 وهيك وتطقمين عليها بنطلون لو زوجي مو نايم كان صورتلك عشان تفهمين وش قصدي بس ولاتجي وحده تقول ياسلام انا اشتري من ام 30 اقولها اي اشتري لازم جهازك يكون منوع في شي غالي وفيه شي وسط يعني اشتري بجامات من لاسنزا وغيره وماركات هذا ضروري لكن اذا كل جهازك من هنا عز الله فلستي > هذا كلامي لكل العرايس يعني هذا لبس بيت لازم تكونين نعومه واستايل وتراها حقات كرف بعد انا عندي غساله اتوماتيك يعني من النوع اللي تبهت الغسيل ومع هذا لبسي كانه جديد يعني مو عشانه رخيص ينعدم بالعكس وطبعا حسب اختيارك للخامه خوذي القطن الناعم نصيحه كثري منهم تقولين ليش لانه كذا بعد فتره تصيرين تبدلين فيهم ولابلاحظ يعني مثلا بلوزه ورديه وفيها ورد اصفر اوكي طقمت عليها بنطولن قصير قطني اصفر وكلهم اقطان وشريت بعد بلوزه رماديه ثانيه وفيها ورد اصفر كذا استعمل عليها نفس البنطلون فهمتي قصدي يعني ابدل فيهم ولايلاحظ هو انك كررتي لبسك وكله رخيص هذي اول نصيحه .
2 - لبس السهره لاتكثرين واحد مسائيه وثاني احتياط لاي مناسبه واذا من النوع مناسبات ورى بعض او مثلا عند اهل رجلك او انتي مناسبات واعراس خوذي كم واحد بس نصيحه لاتكثرين لان الملابس هذي تروح موضتها وتاخذ من فلوسك ع الفاضي يعني وش الفايده تكثرين وتقعد عندك بالدرج وتروح موضتها ؟؟ اما لبس الطلعات العاديه شكلي تيورات ماركات لانك عروس وكلن يبي يبحلق بلبسك وخوذي معهن بعد مو ماركات يعني هيك وهيك .
3- عطورك شكلي فرنسيات وشرقيات ولاتكثرين 5 فرنسي وشرقي 6 او 7 هذا غير الخمريات وافضل شي عن تجربه الماجد خمرية العروس ونكتار الخمريه اللي تجي كنها كوره لونها احمر هذي خطيره اللي تبي صورتها تقولي واصورها لها ان شاء الله هذولي احلى 2 شريتهم وطبعا عطورات المفارش خوذيها من الماجد وشكلي من حامل المسك وهذا خليه لبيتك اما لغرفة نومك لا خوذي من الماجد افضل ولاتنسين طبعا البخورات والعود اهم شي لك . وطبعا مجموعات الجسم من بودي شوب افضل شي وهذي صوره لافضل مجموعتين بنظري عندهم
هذي بالفراوله وفيه ثانيه بالتوت حلوه بعد تجيك مجموعه كامله
ومن نكتار هذي الخمريه اللي وعدت البنات فيها
هي اللي شكلها زي الكوره واللي جنبها بخاخ الجسم بعد هذا فضيع شوفيني مخلصته

وهذا شكل الخمريه من جوا

واللي تبي باقي الاشياء اللي استفدت منها تسال وراح اجيبكم ان شاء الله وانزل صور .
4- شنطة المكياج انسيها وربي يابنات خساره ع الفاضي انا نصحنوني بس قلت لا شكلها بس ع التسريحه يكفي من دلاختي قلت كذا اخذت مني 400 ع الفاضي وربي ماستعملت منها شي اللهم ملمع ههه خوذي اللي ينفعك وشو؟؟؟؟؟؟؟؟؟؟ انا اقولك القطع المفرده هذي اللي تنفع لانه وراك شهر عسل تبين تنقلين الشنطه ذي معك طبعا لا هذا غير انها تاخذ حيز بالتسريحه ع الفاضي هذاي منزلتها تحت بدروجي احس بدونها ارتب تسريحتي يعني اللي اقصده خوذي كريم اساس 2 وطبعا هذي لاترخصين على نفسك خوذي ماركه لانه مهما حطيتي مو خساره لان الناس تبي تنتبه لمكياجك مايصير يكون مو حلو ولا ينزل و 2 بودره بعد المكياج والكحل 2 وتبي تقولون ليش معلقه على 2 ايه 2 لان المكياج يخرب تقشين واخرتها يخربون قبل مايمديك تستعملين ؟ خوذي 2 ولاخلص بعدين ان شاء الله اشتري السوق موب طاير ... وحمرة خدود الوان وانصحك بالالوان الفرايحه وردي خوخي مشمشي هذي حلوه بالبيت تعطيك انوثه طبعا بدون مبالغه وارواج كل الالوان وانا عن نفسي شريت للطلعه ماركات وللبيت اخذت ارواج رخيصه 30 و20 بس الوان هاديه فوشي خوخي وهيك .
5- الشنط والجزم خوذيها اخر شي ليش ؟ عشان تطقمين حسب لبسك مو تاخذين ع العمياني .
6- اذا بتروحين شهر عسل حطي شنطة شهر العسل على جنب وانتي تجهزين وكل اغراضك حقات السفر فيها عشان ماتجلسين اخر وقتك تعزلين وش اخذ مااخذ . وشنطة اول يوم اذا انتي بفندق زيي خليها بعد لحال من الان وحطي الاغراض فيها . وبالنسبه لشهر العسل خوذي معك 4 عبايات ع الاقل لانك منتي فاضيه تكل يوم تغلسين وراح تندمر عليك من الطلعات ماترجعين الا عبايتك رايحه فيها ونفس الشي كثري ملابس داخليه لانك ماراح تلحقين تغسلين وطبعا ابوات كشخه عشان الفرفره طبعا منتي لابسه كعب وراك مشي موب صاحي خلي الكعوب للمطاعم وهيك اما طلعات السياحه لا ابوات وطبعا وشنط يد عمليه ولاتنسين قرآنك اول شي يدخل شنطتك ونظميها يعني اشتري الاكياس الاورقنزا النعومه وحطي كل شي لحال المكياج بكيس لحال ادوات الحمام والعنايه الاستحمام يشنطة داخليه لحال ملابس الداخليه بكيس لحال الاستشوار والبكل لحال وهيك عشان يوم تفتتحين شنطتك كل شي منظم وقدامك مو تجلسين تحوسين قدامه .
7- الذهب لاتقشون الاسعار غاليه اشتري لك طقم ثقيل حق المسائيه وطقم ثاني اخف وطقمين ناعمات صغار وبس الخواتم اللي بالاطقم تكفي . وسواره او حلق وسواره طقم وبس . هذا رايي واللي اشوفه لان الذهب اخرتها تراه بشنطة الذهب مسكر للغبار بس يمكن فيه ناس تقول لا حطي قلوسك بالذهب احسن من الملابس وكل وحده ورايها واللي تشوفه .
8- فستان الزفاف انا عندي نظريه وادري كثير يبي يخالفني زي ماكنت انا معارضه اقول لا بس بعد ماجرتني اختي من شعري واجبرتني قبلت على مضض والان اقول الله يجزاها خير وربي صدقت
يعني اختي كانت تقولي ليش تشترين بدله وتجلس على قلبك بس يوم ؟؟؟؟؟؟؟؟؟ حتى لو كان يوم عمرك ترى مرده بالدرج بكيس بلاستيك عشان لايغبر !!!!!!!!!!!!!! والدليل شوفي كم ثوب معروض من العرايس للايجار لانه طايح على قلوبهم ويبي يستفيدون منه خوذي ايجار كشخه واكشخي فيه ووفري فلوسك ليش ارمي 5000 ولا اكثر على ليله واحده وانا عندي التزامات غيرها ؟؟ وفعلا كشخت باطلق توب ولمصمم بايجار واخذت اكسسوار يجنن عليه واكسسورات شعر والحمدلله الناس الى الان تسولف عني بليلة زفافي طلعت شي وبارخص الاسعار ووفرت الباقي للي اهم . ولا احد يدري الى الان انه ايجار يعني لاتعلمين احد يحسبونك شاريه ههه مو تقولين لحريم خوانك وصديقاتك كتمي تعلمي سياسة التكتيم .
9- الصدقه ثم الصدقه تصدقي من جهازك عشان ربي يباركلك فيه ويزيدك من فضله ويباركلك بزواجك وخليها بالسر بينك وبين ربك افضل .
10- اهم نصيحه وهذي اختم فيها واذا تذكرت شي بقولكم وانتم اسالوني يمكن معاكم اتذكر واعلمكم اهم شي اهم شي يابنات الاذكا ار نصيحه لوجه الله لاتنسين اذكارك لاتطيح من لسانك بعد كل صلاة مغرب وفجر وكثري من الحمد على الله والثناء عليه اللي اكرمك بهذي النعمه وخلي البربره مو سوالف عند صديقاتك انا شريت وانا جبت وخطيبي قال وخطيبي قال تكشخون قدام بعض الناس هنا ترى صنفين ياصنف تكون متزوجه الحمدلله بس ماهي سعيده او تكون ماتجهزت زين وتجلس تتحسر على نفسها او تكون لسى ماشاء ربي انها تتزوج وبكذا انتي تجرحين مشاعرها وبالحالتين العين حق ماتضمنين من يذكر الله من اللي لا خلي السوالف بالمعقول مو كل شي يصير بين خطيبك تقولينه حتى لاعز صديقاتك وياما زواجات خربت من حسن النيه هذا يعني اهم شي اذكارك اذكارك .
وبالنهايه ادعولي يابنات ان ربي يحفظلي زوجي ولايحرمني منه ويسهل ولادتي واتوظف تراي عادتكم مثل خواتي واي شي تبون تسالون عنه اسالو واقول اللي اعرفه ان شاء الله ماارح اقصر دعواتكم