ياغلاتك بقلبي يانصيب الغير

رواية...

( عندما يعشق الرجل بخجل,,, وتخجل الفتاه من المجاهره بعشقها,,,
يضيع النصيب,,, ويبقى الغلا في القلب لا يضيع )....
الكاتبه:
....¸•°أم الظفاير¸•°....
ضعيفه في مجتمعها.. قويه مع أسرتها..
ضعيفه أمام أسرتها.. قويه أمام نفسها..
هكذا هي (الفتاه) في مجتمعنا..
مجتمع مغلف بالأسرار!! كما يشاء إن يسميه البعض وأغلب الأسرار أو بمعنى أصح (جميعها) تتعلق بحياة الفتيات..
وبما أنها (أسرار) فلم يقرأ عنها آبدآ.. ولم يسمع عنها آبدآ.. ولم تشاء الفتاه أن تخبر عنها أحد..
لأنها بإختصار ( أفكار و أسرار مكبوته في داخلها),, ظاهره في تصرفاتها.. لكنها واضحه عند بنات جيلها ومبهمه عند أسرتها ومجتمعها ..
وما أجملها لو كانت واضحه إلى الأبد حتى تستمتع الفتاه عندما تجد من يفهمها..
وماأجملها لو كانت مبهمه إلى الأبد حتى لاتعاقب عندما تصل إلى أسره و مجتمع لايفهم!!
ليس فقط الأسره والمجتمع لايفهم.. بل وحتى القلوب آحيانآ .. (( لاتفهم )) ..
لاتفهم إن الشخص الذي تعلقت أمالنا وأحلامنا به,, لن يشعر بعذابنا..
لاتفهم إن الشخص الذي رسمنا حياتنا ومستقبلنا معه,, لن يكون من نصيبنا..
بل هو من نصيب ((الغير)) ..!!!!
ولو أنفجرت تنهيدة الحب..
ولو إرتسمت أبتسامة الحب..
ولو طالت لحظات الحب..
سيجمعهم طريق واحد رئيسي ولكن!!! متفرع في نهايته ,,
<هي> في يمينه و <هو> في شماله..
هي ..
و{بطبيعتها الأنثويه} .. متعلقه بتفاصيل حياته وتعشقها بجنون..
لكن!! عندما تتذكر النصيب تحاول جاهده تجاهله تمهيدآ لنسيانه ..
والمحاوله فقط كفيله بترسيخ ذكراه وتثبيتها بمجرد المحاوله..
هو ..
و{بطبيعته الرجوليه} ..
سعيد بإهتمامها وسؤالها عنه لأن هذا يرضي (الأنا) لديه..
لكن!! عندما يتذكر النصيب يحاول مداراة عواطفها وأحاسيسها ومشاعرها تمهيدآ لفراقها ..
والمداراة فقط كفيله بشعوره بالملل والضجر ..
ليس كل الرجال هكذا!!!! بل البعض منهم ..
والبعض الآخر يحزن عندما يتذكر النصيب ويحاول مداراة أهلها وأهله والمجتمع بأكمله حتى يظفر بها..
وليس كل النساء هكذا!!!! بل البعض منهن..
والبعض الآخر لايهمها أدنى تفاصيل حياته .. فقط تنتظر لتظفر بنصيبها ولايهمها إذا كانت (هي من يتمنى) أو.... لأ.....؟؟؟
كما بدأت بالبساطه في روايتي الأولى سوف أواصل.. وبرزنامه جديده أيضآ .. وواقعيه أكثر.. وتفاصيل صغيره وعفويه ترسم الأبتسامه على الشفاه لبساطتها وجمالها..
لكن هذه الروايه ستكون عباره عن فضفضه مكتومه بقلب عاجز عن النبض بحريه تامه ..
عاجز عن التنهد بإرتياح..
عاجز عن الأبتسام والضحك لإنه مقيد ب (فراغ عاطفي) يلام عليه ,, ولايستطيع أن يلوم نفسه..!!!!
قد يلوم نفسه ولكن,, بعد أن يغادر هذا العشق والجنون (قلبه) مجبرآ ومكرهآ.. ويستقر بقلب آخر بحكم وجبروت العائله..
يستقر بقلب ,, لايعرف عن تفاصيل حياة ( الشريك ) إلا أقل القليل..
بينما الكثير {عند الذي تمنى أن يكون من نصيبه..!! } ......
رواية...

....¸•°أم الظفاير°¸•....

©الج الأول زء©
{ لست ملاكآ .. ولست شيطانآ ..
بل أنا وسط بين الأثنين ..
لا اعيش في بيئه نظيفه جدآ .. ولا بيئه قذره جدآ ..
بل أنا وسط بين الأثنين ..
لا أحمل ترسبات الماضي في قلبي ولا أحمل هم الغد ..
بل أحمل ثقه بأن الدنيا لاتعطيني سوى الخير .. ويقين بأن الله لنا فوق مانريد ..
إليكم .. يامن تعيشوا وسطآ بين أثنين وتحملون مثلما أحمل .. أوصل إليكم رسالة لا تطيق التأجيل .. رساله ليست كالرسائل الأخرى .. مغلفه ب (سكوت وكتمان) أحترامآ للقدر ،، ولكن بداخلها ألم وجرح ومعناه ..
ألم كدر ( صفاء ) قلوبهم ..
وجرح بعثر ( أحلام ) حياتهم ..
ومعاناة أصبحت كالظل لل ( عمر ) ..
لم تدعهم يعيشوا ب ( هناء ) ويصافحون السعاده من جديد..
لم يقرأ الرساله غيري ولم يسمعها إلا من حولي ..
تعبت من ثقلها على نفسي / أسمحولي أن أفضفض لكم وأتمنى أن تقرأوني وتفهموني فربما تكونوا مثل أصحاب الرساله ب < أسره ومجتمع وقلب > لا يفهم ... }
** محبتكم/ وتين **
~~~~~~~~~~~~~~~~~~~~~

يوم السبت...
9 شوال....
: هآآآآآي شباب..
"رفع رأسه سطام من شاشة الاب توب وعطى وتين نظره و رجع كمل تركيزه بالشاشه وهو يقول": وعليكم السلام..
"وتين وهي منحرجه": أووه عفوآ أخوي أأأ.. ألسلام عليكم..
"صالح بحماس": يالله حيها .. أنتي بتداومين اليوم؟
"وتين بملل": إيه قطيعه تقطع هالدراسه اللي تخلي الواحد يقوم من حلاة نومه..
"صالح وهو يضحك": ههه حتى إنتي مالك نفس للدوام اليوم؟
"وتين وهي واقفه": فيه أحد غيري مايبي؟
صالح: الأخ سعد من الصبح وهو وسطام هواش وشد وجذب.. كلما قلنا كبر صغر عقله_ صار بالمتوسطه وللحين مايطيق المدرسه..
"سطام وهو مركز على شاشة الاب توب": قوم شوف وينه أخاف لسه ماصحى..
"صالح وهو يصب لوتين شاي": من شوي شفته يبدل ملابسه.. تعالي وتين أفطري جبت فطور من الفوال على كيف كيفك ..
"وتين وهي ترمي شنطتها وعباتها عالأرض وتجلس": لأ ماأشتهي_ اليوم أول يوم أداوم فيه للكليه بعد الأجازه وأحس مالي نفس لشي..
"صالح وهو يحط كوب الشاي قدامها": أقل شي أشربي شاي..
"أبتسمت وتين وهي ترفع الكوب عشان تشرب": أبشر ياخوي أبشرب عشانك..
"صالح بإهتمام": وتين أبسألك .. إنتي بأي سنه تدرسين ووش تخصصك؟؟؟
"شرقت وتين وصارت تكح.. فز صالح من مكانه وصار يضرب على ظهرها ويسمي عليها"..
"سطام بصوت عالي وهو يأشر له": عطها كأس ماي..
"عطاها صالح الماي وشربت وبعد ماهدأت أنفجرت بالضحك وهي تقول": الله يفشلك.. أختك ومعاك بنفس البيت.. ومقابلتك 24 ساعه ولاتدري بأي سنه أدرس؟ ههه..
"صالح وهو يرقع لنفسه": كلما تقولين لي أنسى والله مشاغل الدنيا تخلي الواحد ينسى..
وتين: هالمره أبطوفها لك.. أنا برابع سنه ألحين تخصص تاريخ..
صالح: يلعن أم التخصص,, طيب بأي كليه..؟؟؟
"تفاجأت وتين وفتحت فمها بتجاوبه و رد سطام قبلها": لا عاد ذي قويه ياصالح!! يعني ماقد وديتها للكليه أمداك تنسى؟
صالح: أذكر مره وحده وديتها لما سجلت فيها بس وبعدها ماأذكر ..
وتين: أووب أووب يابعدها.. عالعموم الله يخلي لي باصات الشركآت الخاصه مو مقصره بشي_لو أتكل عليكم كان داومت يوم وغبت عشر..
صالح: والله لو إني فاضي كان وديتك بس تخبرين دوامي حايس مره أداوم بالليل ومره بالنهار وأرجع تعبان وزهقان..
وتين: شبعت من هالأعذار.. الله يرحم حالي متعذبه مع الباصات كل ترم أغير الباص ثلاث وأربع مرات..
سطام: إنتي مايعجبك العجب تبين باص خمس نجوم ويآخذك ويرجعك بكيفك وتزعلين إذا تأخروا البنات بالخروج ومادري وش آخرتها معك..
وتين: خلاص.. نجيب (سايق) وتنحل أزمتي مع الباصات..
"تكلم صالح بإنفعال و عطى رأيه وقراره اللي ضايق وتين بس إنها متوقعه ردة فعله عشان كذا مازعلت ولاشالت بخاطرها عليه"..
صالح: معصي يدخل هالبيت سايق .. ليه البيت مافيه رجال محنا بعينك؟ مو ناقص إلا ندخل رجال غريب للبيت وش يقولون الناس عنا 'جايبين سايق عشان بنت'؟؟؟
"سطام بهدوء وهو يلتفت على صالح": أعتقد إن فيه أسلوب ثاني تعبر فيه عن رأيك بدون إنفعال.. وتين قالتهاعاديه ما فرضت عليك فرض وألزمتك تطيعها..
صالح: بس هذا الموضوع منتهين منه من زمان مافيه داعي تفتحه سيره..
سطام: خلاص (هي آسفه) وماعاد تعيدها أرتحت..!!!!
"صدت وتين عنهم وهي تضحك على أسلوبهم معها.. مره دفاع ومره هجوم وبسرعه تلين قلوبهم وينسون اللي صار..
دخل سعد وهو عاقد حواجبه_ حذف شنطته بقوه عالأرض وجلس عالسفره ويناظر بالأكل": صبو لي حليب بسرعه..
وتين: شوي شوي كسرت الأرض بشنطتك..
سعد: إنتي إنطمي لأكسر راسك ألحين..
"أبتسمت وتين وهي تقول لصالح": أوب أوب قافله معه..
"ناظر فيه صالح ودنق وهو كاتم الضحكه": أموت بالعيون المسحوبه على ورا من النعاس!!
"ألتفت عليه سعد بعصبيه": ياخي وش تبي إنت من زين عيونك ..
"صالح ويبي يستفزه": أبي سلامتك أفطر وفارق للمدرسه يالله..
"سعد بعصبيه أكثر": مالك دخل أنا أفطر بكيفي ..
"مسكه صالح من ثوبه وقربه للسفره": تعرف تحترم أخوانك اللي أكبر منك وإلا أعلمك..
"سعد وشوي ويصيح": ياخي أبعد عني وش تبي..
"سطام بصوت حاد": صالح.. سعد.. خير إنشاءالله..
"قامت وتين وهي تشيل عباتها وشنطتها": بعد أذنكم أبنتظر الباص بالحوش..
"ألتفت عليها صالح": أسمعي ياوتين.. إذا ضايقك الباص وإلا طنشك بيوم ومامر يآخذك وإلا مشى بالطلعه وتركك بس علميني والله والله لأأدبه وأخليه يكره اليوم اللي سآق فيه الباص..
وتين: إنت راكب مزاجك تتخانق مع أحد اليوم..؟؟
"سطام وهو يسكر الاب توب ويقوم": ماعليك منه أي شي يحصل لك بلغيني .. أنا ابى أبدل ملابسي وأطلع للدوام تبين أعطيك مصروف وإلا معك..؟
وتين: لأ.... مامعي..
سطام: أجل وشلون تروحين للكليه بدون مصروف يعني لو ماسألتك كان ماطلبتي..؟؟؟
"أرتبكت وتين": عآدي أصلآ بعض الأحيان ماأحتاج..
"صالح يبي يخلص وتين من سطام ودقته وحرصه.. فتح بوكه بسرعه": هاك خذي 25 والله هذا اللي معي ألحين..
سطام: أنتظري أجيب بوكي من غرفتي وأعطيك زياده عشان ماتحتاجين لأحد..
وتين: هذا يكفيني.. يالله أنا رايحه فمان الله ..
"أخذت وتين مصروفها وطلعت وجلست بالحوش دقايق تنتظر الباص وتفكر";-
×× أهلي هم نقطة ضعفي ..
أمي .. أبوي .. أخواني .. مغرقيني حنان وعطف ودلال .. ولو قسوا علي بلحظه ،، حنوا علي بباقي اللحظات؟؟؟
وكيف مايعطوني كل هالأهتمام وأنا بنتهم الوحيده من بعد وفاة (وجدان)؟؟
وجدان هي أول شمعه نورت هالبيت وأول شمعه أنطفت من ثمان سنين..
وأنشاءالله كل شموع البيت تظل منوره العمر كله لأني أحبهم وماأتصور هالبيت يخلى منهم ..<سطام / صالح / سعد / فارس > هم شموع البيت ××..
############################
دخلت وتين للكليه وهي تمشي بأتجاه القاعه وشايله بيدها الجوال تبي تتصل على صديقاتها تشوف وينهم وبيدها الثانيه شايله كتاب صغير.. ألتفتت على صوت عآلي يناديها من بعيد..
"ألتفتت وتين": أهلين صفاء توني بأتصل عليك إنتي والبنات..
"صفاء وهي تلتقط أنفاسها": تعالي معنا بسرعه اللفت اللي بجنب الكافتيريا قفل على بنت وكل الطالبات والموظفات والمشرفات واقفين عند اللفت..
"وتين وهي حاطه إيدها على فمها ومتفاجأه": يالطيف لايكون قفل على وحده من بنات شلتنا..؟؟
صفاء: لأ الشله كلها واقفه عند اللفت ينتظرونا.. يالله تعالي معي بسرعه نشوف وش صار عالبنت..
"حطوا رجولهم وتين وصفاء وهم يركضون للفت ولما وصلوا تفاجأوا بأشكال الموظفات والمشرفات وهم لابسات عباياتهم ومغطيات وجوههم ويبعدون الطالبات من اللفت"..
"وتين وهي حاضنه شنطتها وتقرب لصفاء من زحمة الطالبات": وش صاير ليش الموظفات لبسوا عبايات؟؟
"صفاء وهي ترفع جسمها وتحاول تشوف": ماأدري بس الظاهر إن.......
"سكتت وهي تسمع الموظفه تصرخ بصوت عالي": ياطالبات أدخلوا للقاعات بسرعه.. بيدخلون رجال الأمن ورجال الأسعاف يفتحون اللفت ..
"هديل وهي تصفق بحماس وتجي بجنب وتين": وناسه بيدخلون كليتنا رجال امن ههه..
"وتين وهي تضرب هديل على رأسها": يادبه إنتي وينك جالسه أدورك من بين البنات.. خفت يكون اللفت قفل عليك!!
"صاحت هديل": ليته قفل علي عشان يصير شوية أكشن بس قهر قاعتنا تحت مو فوق آآآآآآه..
"وتين وهي تحط جوالها بالشنطه وتحضن الكتاب الصغير": الحمدلله والشكر مجنونه.. هذا بدل ماتقولين الله يساعد البنت اللي بداخله وتكون بخير..
"هديل بلا مبالاه": مو أول مره يقفل اللفت دايم يقفل ويفتحونه الموظفات وتطلع البنت منه بخير بس أنا مستغربه ليش مافتح معهم هالمره...
"سكتت ثواني وناظرت بيد وتين وهي تسألها" وش هذا الكتاب اللي بيدك؟
"أبتسمت وتين": هذا كتاب يفسر الشخصيات صارلي يومين أقرأ فيه ومابعد أنتهيت منه مره مره حلو ..
"هديل وهي تضربها من كتفها بحماس": حركات صايره مثقفه من متى؟
"وتين وهي تعلي صوتها عشان تسمع هديل بوسط أزعاج الطالبات": أي ثقافه أنتي تدرين إني ما أحب أقرأ كتب بس الفضول ذبحني..
هديل: لقيتي شخصيتي؟
وتين: لأ مالقيت ألا شخصيات أخواني..
هديل: طاح حظك أنتي وأخوانك من حلاتهم عاد..
"صفاء وهي تلتفت عليهم": بس أنتي وياها هذا وقته خلونا نشوف وش آخرة الفوضى اللي صايره بالكليه اليوم..
"دخل مدير حركة الباصات وهو لابس بشت ويمشي وراه أثنين من رجال الأمن بلبسهم الأخضر وهم ماسكين آلالات بإيدينهم ووراهم يمشي موظف بالكليه وماسك بيده جهاز أسود يكلم فيه وكلهم رايحيين لجهة اللفت..
صرخوا الطالبات صرخه وحده والبعض يصفق والبعض يصفر بصوت عآلي والبعض يضرب الزجاج بقوه وكأنهم جماهير..
وأشكالهم فعلآ كأنهم جماهير لأنهم بالمربعات اللي داخل المباني ويفصلهم عن الرجال حاجز زجاجي.. وبعض الطالبات أنحبسوا داخل دورة المياه اللي قبال اللفت وعجزوا يطلعون من دخلوا الرجال "..
"صفاء بخوف": يماه مومعقول اللي قاعد يصير أحس إني بحلم..
"هديل وهي مسنده جسمها عالزجاج": حسافه ولا واحد شكله حلو!!
"وتين وهي تضحك": هذي حركه مقصوده ههه..
"هديل وهي تضرب يدها بيد وتين وتضحك": الظاهر كذا وإلا خلصوا رجال الأمن المزين نبي نكحل عيونا على هالصبح ههه..
صفاء: سمعت بنات يقولون إن اللفت قفل عليها من الساعه 7الصبح وإلحين الساعه 8 يعني صارلها ساعه كامله بداخله..
"دخلوا رجال أمن أثنين_واحد فيهم حاطه إيدينه بأذانه من أصوات التصفير والصراخ والتصفيق.. والثاني منزل رأسه بالأرض ويناظر بجواله يتحاشى نظرات البنات"..
هديل: ياحليلهم مؤدبين ما يناظرون بالبنات..
وتين: وإنتي الصادقه طالبات الكليه ضيعوا الحيا وصاروا الرجال يستحون أكثر منهم..
هديل: غصب عنهم يستحون وبعدين الطالبات يتصرفون كذا لأن المكان ضيق وزحمه.. والله لو توقف الطالبه قدام رجال الأمن بلحالها تنخرس ويطيح عليها الحيا..
"توزعوا المشرفات داخل المباني وهي يصرخون عالطالبات ويحاولون يفرقونهم ويبعدونهم عن اللفت"..
"وتين وهي تناظر الساعه": يالله بنات باقي عشر دقايق وتبدأ المحاضره خلونا نروح للقاعه..
صفاء: أنتظري شوي مافيها شي لو تأخرنا خمس دقايق..
هديل: مابي أدخل المحاضره أبشوف وش يصير مع البنت..
"صرخت الموظفه بوجه وتين وهديل وصفاء وهي تأشر": تحركي عالقاعه ياطالبه!!!!!
"مشوا بالممر وعيونهم معلقه بالزجاج ودهم يعرفون وش صار.. ألتفتت هديل على وتين وهي تأخذ الكتاب وتقول": دام هذولا رجال الأمن الشيف اجل هونت ماأتمنى نفسي مكان البنت..
صفاء: ياقو قلبك ياهديل حتى بوقت المشاكل مايفوتك شي تركزين على كل صغيره وكبيره..
"هديل وهي تلتفت على وتين": فسري شخصيتي من هذا الكتاب ..
وتين: قلت لك مالقيت إلا أخواني..
"هديل وهي توقف وتحط أيدها على خصرها": ترا ذبحتينا بأخوانك ماصارت عاد.. يله أشوف قولي لنا وش قرأتي عنهم؟؟
"وقفت وتين وهي تسند جسمها عالجدار": ام سطام
والطبيعة الشرقيه فيها جديه ومسؤوليه .. ودقيق مره يهتم بالتفاصيل ..
روتيني ومايحب التغيير.. ويحب المساواه بعلاقاته مع الناس وما يفضل شخص على الثاني وي......
"قاطعتها هديل": لحظه لحظه وش فيك أنطلقتي بالحكي,, طيب فهمينا وش هذا شرقي؟؟ أنت من أهل الرياض وسط المملكه وش جابكم للشرقيه؟؟
"أنفجرت وتين بالضحك وهي تجلس عالأرض وتحط شنطتها بحضنها": ههه لأ لأ لأ لأ انتي فاهمه غلط!!!
"هديل وهي تجلس": فهميني ..
وتين: فكرة الكتاب مقسمه لأربع أتجاهات (شمال/شرق/جنوب/غرب) مو على خريطة المملكه ولا على خريطة العالم.. هي على أفتراض وجود أربع تجمعات من الصفات الأنسانيه للبشر ومختلفه وراثيآ..
"هديل بإستهزاء": يعني بكذا فهمتيني صرتي تحوسين بزياده..
"صفاء جلست وهي منجذبه لحكي وتين": توته كملي تحمست أعرف أكثر..
وتين: المقصود أن فيه صفات معينه صارت مقبوله ومعروفه على أنها من ناس بمنطقه او حضاره معينه وهذا ماله علاقه بالمكان ابدآ..
هديل: ألحين بتقنعيني أن ملاين الناس بأربع شخصيات أو أتجاهات مثل ما تقولين؟؟
وتين: مثل مافيه ألوان وصبغات محدده للشعر(أصفر وأحمر وأبيض وأسود)وألوان العيون (أسود وأخضر وبني وأزرق) ولون بشره ثآآآآبت مستحيل يتغير ..
كذا الشخصيات تقسمت لأربع أنماط فيها صفات محدده إذا لقيتي كل هذي الصفات بشخص أو بعضها تقولين عنه ان شخصيته
أو
أو
.....
هديل: أبسوي نفسي فهمت عشان ماتتعبين وأنتي تشرحين لي..
"وتين وهي تفهمها":هدوله ترا سهله وما يبي لها فهم.. كل شخصيه لها وظيفه تعبر عنها وأقصدالرجل اللي أشتغل بمجال عن قناعه وحب أو أن الظروف سيرته بس بالنهايه لقى نفسه راضي ومرتاح..
"صفاء وهي مبسوطه": واو وناسه يعني نقدر نفهم اللي حولنا بسرعه..
"هديل وهي تغمز لوتين بعينها": أكيد تبي تعرف شخصية اللي بالي بالك..
صفاء: ههه كاشفتي على طول..
هديل: طيب كملي ياوتين وش عرفتي عن أخوانك بعد؟؟
وتين: سطام شخصيته الشرقيه حيل تشبهه وخصوصآ أن عمره 31سنه ويشتغل مهندس معماري بشركة انشاءات معماريه ..
أما صالح شخصيته غربيه بحته أجتماعي بالدرجه الأولى وعفوي وحيوي ودمه خفيف يحب التغيير والتجديد ويكره القيود بس مشكلته انه مايعطي أهميه لمظهره وهندامه
يعني الثوب والشماغ يلبسهم بالمناسبات بس وغيره مستحيل..
هديل: سبحان الله قمة التناقض بينهم .. طيب صالح وش يشتغل وكم عمره؟
وتين: عمره 24 سنه موظف بشركه بالمطار المدني وطبعآ وظيفته عاديه لأن ما عنده إلا شهادة الثانوي .. صالح فيه لقافه عجيبه غريبه يموت بالمشاكل وحقه وحق غيره مايضيع أندفاعي حيل ويحب المغامرات..
"هديل وهي تناظر الساعه": يعني مثل مغامرتنا ألحين طنشنا المحاضره وجلسنا نسولف والساعه صارت 8ونص!!!
"شهقوا صفاء ووتين وهم يناظرون ببعض فجأه ويوقفون"..
هديل: وين رايحين خلاص المحاضره وفاتتنا بسبة وتين واخوانها.. خلونا نروح للكافاتيريا نفطر أزين...

كان جالس فارس مع جده فهد بإستراحة الرجال بمستشفى ال##### الحكومي بالملز قسم (الأنف والإذن والحنجره) ينتظر دوره عشان يدخل عند الأستشاري ..
فارس يشتكي من ضعف شديد بالسمع من فتره طويله ويستخدم سماعات طبيه للسمع..
أبو سطام: صارلنا ساعه كامله وإحنا ننتظر ..
فارس: عادي جدي إحنا بكل موعد ننتظر ساعه وأكثر بعد..
أبو سطام: ياولدي أخاف إنك جيعان وإلا عطشان قم إنزل للبقاله تحت أشترلك فطور سنع يشبع بطنك..
"فارس ويحاول يبتسم": أنا شربت حليب قبل أجي للمستشفى..
أبوسطام: حليب مايسد الجوع.. طلعنا من البيت الساعه ثمان وماوصلنا المستشفى إلا تسع من زحمة السير وألحين الساعه عشر.. قم ياولدي ترا مو زين لصحتك..
فارس: أبشر ياجدي بس نطلع من عند الأستشاري أشتري فطور وأعتقد ماراح نطول عنده..
"نادت النيرس بإسم فارس ومشى مع جده وراها لعند الممر الخاص بقسم تخطيط السمع"..
"فارس بملل": وين ماخذيني مابغى أسوي تخطيط للسمع..!!
"صد وهو يتأفف وألتفت عليه جده ويحاول يقنعه": ماعليه هالتخطيط بينفعك بكره يتحسن سمعك وتصير تسمع عدل مثل أول وأحسن..
"تضايق فارس من تفكير جده المحدود": التخطيط يقيس درجة السمع مايحسنه..!!!
أبو سطام: مايخالف ياولدي هذا بيفيدك..
فارس: ماصارت بكل موعد تخطيط والله مليت..
"أقبل عليهم أخصائي السمع Audiologist وهو ماسك أوراق بيده ويأشر لفارس يدخل غرفة التخطيط..
دخل فارس وجلس عالكرسي ورمى السماعات اللي بأذانه وحطها بيده..
وقف الأخصائي وهي تثبت السماعات الكبيره على راسه ويعطيه الجهاز بإيده..
تكلم بصوت عالي مره عشان يسمع فارس": تسوي زي كل مره يافارس أول ماتسمع الصوت تضغط عالجهاز اللي بيدك على طول تمام إنت سامعني..؟؟
"هز فارس رأسه و بخاطره": حفظت هالحركه ثلاث سنوات وأنا أضغط بالجهاز ولا طلعت بنتيجه..
( فارس كان يعاني من ضعف بسيط بإذنه اليسرى فقط من وهو صغير بسبب أصابته بحمى "الحصبه".. لكن أهله ماتداركوا المشكله إلا من ثلاث سنوات وبدأ علاج ..
ومع الأيام تدهورت حالته وصار الضعف بأذانه كلها سواء..
وأول مابدأ علاج أعطوه المستشفى سماعات طبيه وكان مبسوط فيها وقتها بس مع الأيام صارت تزعجه كثير وتسبب له أحراجات مع الناس )..
"الأخصائي وهو يأشر لفارس بيده من ورا الزجاج بحركه يعني": أضغط عالجهاز..
"فارس كان مرتخي بجلسته وسرحان يناظر تحت ويضغط بأصبعه عالجهاز بعشوائيه حتى بدون مايسمع الصوت.. عدل جلسته وهو يتنهد ويتمتم":
والله أذني أنفجرت من الأصوات اللي اسمعها ماعاد أقدر أركز صار يتخيلي صدى الصوت,, وأنا أضغط عالجهاز ومو متأكد إذا فيه صوت وإلا لأ....
ألحين من أطلع من الغرفه توديني عند الأستشاري الغثيث اللي حافظ كلامه أكثر من دروسي ولاجديد كالعاده..
"أشر الأخصائي لفارس ينزل الجهاز من رأسه ويطلع من الغرفه.. حط سماعاته بأذانه وطلع يمشي ورا جده والأخصائي لغرفة الأستشاري"..
"الأستشاري أسماعيل وبعد ماأخذ الأوراق من الدكتوره وجلس بمكتبه": كيف حالك يافارس إنشاءالله تمام..
"ما رد عليه فارس وحط إيده على خده يناظر الأرض.. يمكن ماينلام على تصرفاته لأنه وصل لدرجة الملل واليأس ،، وأي شاب بعمره ماعنده (صبر وطولة بال)
شي طبيعي يتصرف كذا مع اللي متأمل يساعدونه وينهون مشكلته بعد رب العالمين"..
"أبو سطام وهو مبتسم ويحاول يرقع لفارس": والله يادكتور الولد جاي مواصل من أمس مانام وإنت تعرف هالطلاب من تجي الإجازه يتخربط وقت نومهم ولا جت المدارس عقب تعدل ورجع زي أول..
"ماأهتم الدكتور لكلام أبو سطام وقال وهو مندمج يناظر الأوراق": يافارس .. أنت تحس بدوخه أو تسمع طنين..؟
فارس: لأ..
د/أسماعيل: يطلع من أذانك إفرازات؟
فارس: لأ..
د/أسماعيل: تعطس دايم وتحك أنفك؟
فارس: أحيانآ..
"سكت ثواني د/أسماعيل ورفع راسه موجه كلامه لفارس": زي ماأنت عارف إن ضعف التوصيل في السمع في أذانك هي المشكله اللي إنت تعاني منها ومن التخطيط اللي قدامي بين إن نسبة الضعف زادت شوي و ما........
"قاطعه فارس بإنفعال": كل مره يضعف أكثر من المره اللي قبلها وش الحل..؟؟؟
"ماجاوبه الدكتور ولا أهتم لإنفعاله وكمل وهو يعدل نظارته": إحنا ناقشناك من قبل بخصوص إجراء عملية (قطع العظم الركابي) بس للأسف،، حالتك كرمالها وتسوء والعمليه ماراح تنفع للي بعمرك..
أستمر على أستخدام السماعات حاليآ وأعتقد إنها حل مؤقت لك و... وإنشاءالله خير...
"صد عنه فارس وأخذ نفس عميق وهو يضرب بيده على رجله بقوه..
ألتفت عليه جده وطبطب على كتفه ويحاول يهدي منه": ماعليه ياولدي أصبر لما يفرجها ربك قل الحمدلله على النعمه اللي إنت فيها ترا غيرك يتمنى ربع اللي إنت فيه..
د/أسماعيل: راح أعطيك موعد بعد شهرين وإنشاءالله تتحسن حالتك للأفضل..
"قام فارس وطلع من الغرفه حتى بدون مايستفسر عن الموعد أبدآ وبخاطره": ماتتحسن طول ماأنتم بالبرود واللامبالاه 3سنين وحالتي من سئ لأسوء ولانفعتوا بشي؟
والله لو إني واحد من قرايبكم كان حطيتوني فوق روسكم وحطيتوا أحتمالات كثيره لتحسن سمعي........
"ألتفت فارس على جده اللي مسك إيده وتعابير وجهه تدل على الحزن والضيقه لحالة حفيده": تعالي ياولدي خلنا نآخذ ورقة الموعد الجاي..
"أخذ فارس نفس عميق وهو يناظر فوق": يارب ترحمني ..
..× فارس 17 سنه .. يدرس ثاني ثانوي "أدبي"..
توفوا أمه وأبوه بحادث من كان عمره تسع سنوات وتكفل جده بتربيته وعاش في بيت جده اللي هو أبو سطام..
فراق وجدان صدمهم وحطمهم ولما تجاوزوا الصدمه كان فارس كل همهم بالبيت لأن عمامه خارج الرياض وجده وجدته لأبوه متوفين..
و برغبه من أبو سطام وأختيار من فارس أنه يعيش عندهم صاروا يعاملونه ك أخ مو ولد أخت ويلاقي نفس الحب والأهتمام والدعم وحتى القسوه والشده عشان ما يصير فيه غيره بينه وبين سعد وفارس متفهم لهالشي ..
فارس ذكي ولماح وقلبه طيب وحنون.. قلبه وعقله أكبر من عمره يمكن لأنه أكتسب صفات كثيره من سطام وصالح وتأثر فيهم لدرجه لاتوصف وصارت شخصيته مزيج من الهدوء والعفويه والإندفاع ×..
%%%%%%%%%%%%%%%%%%%%%%%%%

××((( في باص البنات )))..
يوجد ما لا يوجد في أي مكان آخر ..
ويحمل ويتحمل كل ماتعجز النفوس حمله ..
و يدخل ويستقر به ما لا يطاق ولا يجب ان يقال من (مشاعر مكبوته وأحاسيس مهمله وهموم محبوسه وخجل مقنع) شاءت الظروف إن تستر عليها ولكنها تمردت وأطلقت العنان لنفسها في باص البنات..××
"جلست وتين عالكرسي بتعب وحطت شنطتها بالأرض .. تلفتت حولها تدور عالبنات وكالعاده مافيه إلا 3 طالبات من أصل 12 طالبه "..
"وتين وهي تتحلطم": حسبي الله عليهم.. جايه من البوابه أمشي بسرعه عشان ما أتأخر عليهم وبالأخير ألاقيهم لسه ماطلعوا من الكليه أوف ..
واللي يقهر زياده إن المحاضرات تخلص الساعه 12 وربع والبوابه تفتح بوقتها يعني وش حجتهم؟؟
"قطع تفكيرها طالبتين كانوا يحكون عن اللفت اللي وقف وحال البنت بلحظتها ووتين قطت أذنها معهم لأن ودها تعرف وش صار بعد مادخلوا القاعه هي وصديقاتها..
وتين تعودت تسمع سوالف البنات وفضفضتهم لبعض مو من باب الفضول لكن البنات أصواتهم (مسموعه) وماعندهم أي مانع لنشر غسيل ظروف بيتهم وبيوت قرايبهم وجيرانهم..
وماعندهم أي حواجز أو خطوط حمراء يوقفوا عندها وخصوصآ إن سايق الباص مايقدر يمنع نفسه عن سماع كل اللي يوصله"..!!!!!!!
-: اللي وقف فيها اللفت معي بالقاعه وتقول إنها ماكانت خايفه بس لما سمعت صراخ البنات والتصفير جلست تصيح وتوقعت إن فيه مصيبه صايره تحت بالساحه..
-: وش سوت لما سمعت أصوات الرجال عند اللفت؟
-: تقول واحد من الرجال جلس يطمنها ويهدي منها وقالها إن الأمن موجودين وراح يساعدونها.. تصوري هي من سمعت أصواتهم بسرعه لبست عباتها وتحجبت عدل .. ماشاءالله عليها..
-: وش صار بعد مافتح اللفت؟
-: بكره أكملك ألحين طلعي جوالك بأخذ منك بلوتوثات..
"عصبت وتين وبخاطرها": كملي ألحين والله ميته أعرف وش صار ؟؟؟؟
"ركبوا الباص ثلاث بنات وهم يضحكون ضحك هستيري.. جلسوا بآخر الباص ورموا طرحهم وعدلوا شعورهم والضحك متواصل وبصوت أعلى من العالي"...
-: شفتيه شلون يناظرنا بغى يآكلنا بعيونه ههه..
-: والمشكله شين ويحوم الكبد بغيت أرمي جزمتي وأصقعه على وجهه ههه..
"وتين وبخاطرها وهي تسمعهم": هو لو شاف وجهك بدون غطا كان رمى جزمته وصقعك فيها ..
"تكلمت وحده فيهم بمياعه": إنتي ياللي هنا ماعليك أمر نادي السايق محرم من الشباك أبغى أكلم......ه..
"ألتفت وتين على ورى تبي تتأكد إذا البنت تكلمها أو تكلم غيرها لأن ماحد جالس قدام إلا وتين وباقي البنات ورا"..
"البنت وهي تأشر بأصبعها فوق تحت": إنتي إنتي نادي السايق بسرعه..
"ماردت عليها وتين وصدت وهي ترتخي بجلستها ومغطيه وجهها لأنها أساسآ ماترمي الغطاء بالباص"..
"البنت بمياعه أكثر": وش فيها ماترد آخاف بس مستحيه من سايق الباص.. أف ياشين البنت إذا صارت تمثل الأخلاق ..
"أنقهرت وتين وبغت تصيح بس مسكت نفسها": يعني من طلعوا من بوابة الكليه لما وصلوا للباص وهم يسولفون و يضحكون بصوت عالي .. عجزانه تفتح الشباك وتنادي السايق بصوتها العالي ..
"بعد مرور نص ساعه أكتملوا الطالبات ومشى الباص الساعه وحده ونص وكانت ثاني طالبه يوصلها الباص لبيتها هي وتين واللي تنزل قبلها وحده من البنات هذولا"..
-: محر...ا...م..
"السايق محرم عرف البنت من صوتها": عاوزه إيه يا نوف؟؟؟
نوف: أبغى أشتري من البقاله يامحرام!
محرم: مافيش بئاله بطريقنا يابنت..
نوف: تكفى محرام..
"تضايق محرم": قولتك مافيش بئاله يابنت ..مابتفهميش الكلام..
"نوف بصوت واطي": عمى بعينك ياحمار البقالات تارسه الشوارع بس إنت مو مشتهي توقف..
"أستانست وتين من موقف السايق وجذبها سوالف بنات متزوجات جالسات وراها وشبكت معهم بسمعها بس بدون ما تحكي معهم"..
-: من تزوجته ماشفت الهنا والراحه.. كل الدلال والعز اللي كنت عايشته في بيت أهلي راح وتبخر_ أبدآ ماكنت متصوره إني بشوف المهانه والذل معه..
حتى أبسط حقوقي حرمني منها .. ماحط لي بيت بلحالي أنا ألحين ساكنه مع أهله بغرفه واحده بس وتعامل أهله معي مره مزعج ومافيه إي إحترام لوجودي ..
دراستي منعني منها صارلي سنتين متخرجه من الثانويه ورفض أكمل دراستي الجامعيه.. وبالموت وافق اني أدرس بالكليه بعد ماضغطوا عليه أهلي ،، ولما وافق صار يمارس علي ضغوط عجيبه غريبه..
-: وش سوا يعني؟
-: خلاني أسجل هنا (أنتساب) مع أن نسبتي مره عاليه ورفض يآخذني للكليه كل يوم وأبوي الله يحفظه سجلني بهذا الباص وهو اللي يدفع حسابه كل شهر وحتى الكتب اللي أحتاجها أبوي أشتراها لي..
وهذا كله بصوب وشخصيته بصوب بصراحه أستحي أتكلم عن أخلاقه وتصرفاته بس اللي أقدر أقوله إنه (إنسان غريب)!!!
-: أسمحي لي أبسألك سؤال "أهلك ليش ماأشترطوا ببداية الزواج إن يكون لك بيت بلحالك وإنك تكملي دراستك"؟؟؟
-: أهلي رفضوا تعرفين ليه؟ لأن ولد عمي وكانوا واثقين إنه راح يسعدني بدون شروط..... وألحين.... أهلي ندموا أكثر مني لأنهم حسوا بغلطتهم بس بعد إيش؟
بعد سنتين من التعاسه بس تعرفين وش أحلى شي بهالسنتين؟
إن ماعندي أطفال لأن زوجي ع.....!!!!!!!!!
"تنهدت البنت بحرقه حرقت قلب وتين وحزنتها حيل لظروفها"..
×× بنت بهالعمر مليانه حب للعلم والنجاح ،، ومليانه كره للزواج وحياة التعاسه فيه..
أهل كل همهم البنت تتزوج..
وزوج كل همه يفرض وجوده بحياتها..
وزوجه كل همها ترتاح ب خروجها من حياته..
تعيش تناقض فضيع بداخلها والسبب (أهلها)..
لأن أختيار الرجل المناسب كان بيدهم.. وأختيارهم كان (خطأ).. ورفضهم لأشتراط اللي يسعدها ويريحها كان (خطأ أكبر)..
واقع الزواج صار صعب في بعض المجتمعات وصار السكوت والأستسلام هو سيد الموقف..!!!
سكوت عن عيوب الرجل وأستسلام للموافقه..والنتيجه (ظلم للبنت)_
وسكوت عن عيوب البنت
وأستسلام للموافقه..
والنتيجه (ظلم للرجل)_
لكن..كل شي بالدنيا ((نصيب)) وهذا اللي مصبرنا على واقعنا.....××
@@@@@@@@@@@@@@@@@@@@@@@
© كنه يقول "العشق" فيكم وفيني...؟!
مع أنه "الساكت".. وأنا ماتكلمت؟!
أنت تبي "الصمت" بينك وبيني؟!
طيب "أحبك".. كيف تنقال بصمت..؟!.. ©
"خطف صالح الجريده من عمر وحطها بجنبه وهو يقول": أنت أي شي تشوفه قدامك تقعد تكتب عليه؟؟
"عمر وهو يسكر القلم ويرتخي بجلسته": أبي أرتاح..
صالح: وين التعب عشان تدور على الراحه؟
"أبتسم عمر وهو يصد عن صالح": تعب القلب ياصالح تعب..
صالح: ياخي لاتحكي بالألغاز تكلم عدل.. سبحان الله مع إنك صديق عمري بس ساعات أجهل حكيك وماأفهم وش تقصد..
عمر: أحسن لك تظل جاهل لأن مو من صالحي ولا من صالحك تفهم ..
"صالح بتعجب": خير إنشاءالله وش اللغز اللي مو من صالحي أفهمه!!!
"عمر أنحرج وحس إنه مزودها حبتين وبسرعه غير الموضوع": يارجال أمزح
معك _ أبسألك وش سوا فارس بموعده اليوم؟
صالح: ما واجهته من جاء من المستشفى حط راسه ونام ولسه ماصحى..
عمر: ماسألت عمي فهد.. على حد علمي إنه هو اللي دايم يروح معه للمستشفى..
صالح: حتى أبوي ماواجهته ..
"دخل أبو سطام الدوانيه وفز عمر بسرعه وهو يعدل ثوبه الأبيض اللي مرسم على جسمه ومبرز كتوفه العريضه": هلا عمي..
أبو سطام: هلا فيك ياولدي..
صالح: الطيب عند ذكره تونا بسيرتك..
"جلس عمر بعد ماجلس أبو سطام"..
أبو سطام: وش عندكم تحكون عني..
"أبتسم عمر وبانت خدوده بقوه لأن وجهه دائري وخدوده مليانه مع أن جسمه نحيف وطويل": كنت أسأله عن موعد فارس اليوم وش قال الأستشاري عن صحته بس صالح الله يهديه ماأهتم ولا سألك أو سأل فارس..
"صالح ومسوي نفسه مهتم": أكيد تحسن سمعه أنا واثق من الطب في السعوديه و.....
"قاطعه أبو سطام بضيق وهو يناظر بالارض": لا والله ماتحسن والدكتور يقول إن سمعه صاير ضعيف أكثر من أول.. والله مقطع قلبي هالولد نفسيته تعبت ويضيق صدره لادخلنا المستشفى ودمعته بعينه وكأنه يبي يصيح..
"عقد حواجبه صالح بعصبيه": وش يصيح حلوه ذي صار رجال طولي وللحين تدمع عينه هذا متى يكبر ويصير مثل خواله..
"تضايق أبوسطام زياده بس عمر تدارك الموقف وتكلم بنبرة صوت هادئه عشان يهدي من أنفعال صالح": فارس ماينلام ياصالح يعني لو إنت بمكانه وبعمره صدقني ماراح تكون نفسيتك أحسن منه..
فارس حساس وبسرعه يتأثر لو يسمع بأي مشكله تحصل لغيره فما بالك لو كانت المشكله فيه هو أكيد راح يتضايق ويزعل.. وحتى لو كان رجال طولك,,
هو فاقد شي غالي بحياته ويتمنى بأي لحظه يرجع له بس مو عارف كيف ومتى؟؟؟
صالح: إنشاءالله يتحسن قريب بس هو لو إنه يترك التفكير الزايد بسمعه ويعيش حياته طبيعي كان ماصار حاله كذا..
عمر: تبي تمنعه مايفكر بنفسه؟ ياصالح إذا أنت متعافي وربي معطيك الصحه وماعندك عيوب،، حس باللي عندهم عاهات وأمراض لايصير أحساسك ميت..
"صالح سكت وهو يصد عن أبوه وعمر لأن كلمة (ميت) هزت شعوره وحسسته بإنه كان قاسي بدون ماينتبه لنفسه"..
"ألتفت أبو سطام لصالح وهو يوصيه": لاتزعل فارس ولاتهاوشه قدر الظروف اللي هو فيها وتراه صغيره بس إن جسمه كبير..
صالح: أبشر ماراح أزعله..
عمر: طيب ياعمي ليه ماتحول فارس لمستشفى ثاني يمكن المستشفى اللي يتعالج عنده إمكانياتهم محدوده؟
أبو سطام: وشو؟ شلون محدوده..؟؟؟
"ألتفت صالح على عمر وهو يضرب على ظهره بقوه": لاتتفلسف تكلم عدل عشان أبوي يفهم عليك ترا هذا أبوي مو واحد من زملائك بالعمل..
"عمر وهو يقاوم الضحكه ويناظر لأبو سطام": قصدي إن المستشفى اللي يتعالج فيه فارس ماراح يساعدونه بشي ولاتتحسن حالته أبدآ..
"ألتفت على صالح وهمس" كذا مفهوم..؟
أبو سطام: والله الدكتور دايم يقول لفارس: مالك علاج عندنا مدري ليه؟؟ مع ان مافيه مرض ماله علاج إلا الامراض الكبيره اللي لاهي بسمع ولا بنظر..
"طير عيونه عمر وتفاجأه": هو قال كذا معقول؟ فيه دكتور يقول لمريض كذا؟؟؟؟؟؟؟
"صالح وهو يحذف المركا على عمر": أجل أبوي يكذب.... لأ.. قلها بعد .... قل يكذب..
"أبو سطام وهو عاقد حواجبه": صالح وش بلاك عالرجال كل شوي تضرب عيب عليك..
"عمر وهو يحط المركا بحضنه": عآدي يا عمي إحنا متعودين نمزح مع بعض..
أبو سطام: هذا مزح هذا.. كسرلك ظهرك..
"سكتوا عمر وصالح وهم يناظرون بعض ويضحكون"..
"أبو سطام وبعد لحظة صمت قال وهو يفكر بصوت مسموع": والله غامضني (قاهرني)هالدكتور أخلاقه شينه علينا من ندخل عنده وصابره مايل (مايعطي وجه)
ومحد عاجبه ودايم يقول لفارس إنت مالك علاج وأنت حالتك صعبه مدري وش قصده والله الظاهر طفش من هالمسيكين فارس ثلاث سنين ولا لقى له علاج..
"صالح وهو يوقف ضحك فجأه ويعصب من كلام الدكتور": مو مستشفى أبوه عشان يطفش ...... شف الوقح والله لأربيه هالواطي اللي ....... وين وين مكانه أبي أقابله وأتفاهم معه..
"أبو سطام بضيق": لاحول ولاقوة إلا بالله إنت همك صحة فارس وإلا الدكتور؟
صالح: فارس ماعليه خلاف بس هالدكتور هذا لي تفاهم معه ليش يقول كذا؟
"عمر وهو يهمس لصالح": خلاص قفل عالموضوع لاتزعل أبوك وتضايقه..
"أبو سطام وهو يقوم": والله أنت ياصالح ماتعقل ولاتتسنع طول عمرك بس تدور على المشاكل.. أنا رايح للمسجد ألحقني أنت وياه لصلاة العشاء ..
"وقفوا صالح وعمر وردو بصوت واحد": ألحين بنطلع وراك..
×× عمر 24سنه .. صديق صالح من الطفوله وجارهم بنفس الوقت.. يشتغل "فني أشعه" بمستشفى حكومي ..
شخصيه جنوبيه غربيه ولما أقول جنوبي يعني (السلام والهدوء)..
عمر شخص حالم كريم وشهم وصبور يقدس اصدقاءه، ويعتز فيهم، ولا يقبل أن يسيء أحد لهم، يتأثر برأيهم، ويغير حياته عشانهم ._
إنسان أجتماعي ويحب يساعد الناس _ وخجول بشكل معقول يعني خجله بحالات معينه ..؟؟؟ ××.. ..
<<<<<<<<<<<<<<<<<<<<<<<<<<<<<

يوم الأحد....
10 شوال...
وفي الكليه وتحديدآ في قاعة التاريخ..
: صباح الخير يابنات..
"البنات بصوت واحد بردود متفرقه": صباح الورد _ صباح النور والسرور_ أهلين متعب ..
متعب: لسه صاحين مانمتوا؟
"ردت صفاء بنعومه": أحد يشوف جو حلو وبنات حلوات ومخيم أحلى وأحلى وينام؟؟؟
"أبتسم متعب وهو يناظر صفاء من بين 15بنت جالسه قدامه": الظاهر صوفي تحب الهواء البارد وتحب الضحك والسوالف وتحب الكشتات موت..
"أستحت صفاء وهي تصد عنه لأنه أحرجها بنظراته وسط ضحك البنات.. وتكلمت أخت متعب واللي تصير بنت خال صفاء": أقول يامتعب ترا مو بس صفاء تحب الجو والضحك والكشته حتى باقي البنات..
"متعب وهو يفتح سحاب الجاكيت وينحني للنار اللي صايره بالوسط والبنات متجمعات حولها": بس هي اللي ردت على سؤالي ودافعت عن نفسها..
"تكلمت بنت عمة متعب": طيب إنت قلنا ليش صاحي للحين الساعه صارت 3ونص؟
"ألتفت عليها متعب وهو يمزح": تسمحين لي أسهر؟
"ضحكت بنت عمته": لأ مو مسموح يالله على خيمة الشباب بسرعه ههه..
متعب: يالعوبه هذا بدل ماتقولين حياك أسهر معنا .. "ألتفت على صفاء" صوفي دافعي عني وإلا بس شاطره تدافعين عن نفسك؟
"تكلمت بنت عمته وهي تقلده": صوفي صوفي .. وليش ماتدلعنا إحنا بعد ترا كلنا (خواتك)..
"صفاء بخاطرها": وجع ياعوبه حاسدتني وبعدين أنتم خواته بس أنا... لأ... أنا غير..
"أبتسم متعب وهو يوقف": صفاء أسمها مايشبهها أبدآ وصوفي يليق لها أكثر وأحب أناديها بالأسم.. أما إنتم أسمائكم تشبهكم وماتحتاج تغيير..
"صفاء بخاطرها": أموت عالدبلوماسيه بالأجابات ويلوموني فيك يا ميتو.......... >>>>>>>>>>>>>>
"صرخت وتين": صفاء..
"فزت صفاء وهي منخرعه": ميتو.....
"أنفجرت وتين بالضحك وهي تضرب الطاوله بيدها": ههه ههه..
"صفاء وهي تمسح على عيونها وتحس بصداع": أنا ويني؟ وش جابني هنا؟
"وتين وهي مازالت تضحك": ميتو جابك هنا وتوه طلع من الباب ويوصينا عليك ههه..
"صفاء بملل وهي تحط إيدها على راسها": متى أنتهت المحاضره..؟
وتين: من ربع ساعه ومابغيت أصحيك قلت أخليك تشبعين أحلام بميتو بس مو لدرجه إنك تهذرين بأسمه..
صفاء: ليه القاعه فاضيه وين البنات وين هديل؟
وتين: خلصت المحاضره وطلعوا.. وهديل راحت تدور على البندري وأماني عشان نجلس بالقاعه لما تبدأ المحاضره الثانيه.. المهم لاتضيعين السالفه وقولي وش جاب ميتو على بالك؟
"تنهدت صفاء وهي مبتسمه": آآآه تذكرت موقف صار العام لما كنا بالمخيم ولما نمت كملت الباقي بالحلم ..
وتين: أي موقف إنتي مواقفك معه ماتخلص...؟
صفاء: لما كان يدلعني قدام البنات ويقولي (صوفي) البنات ماأهتموا بالواقع يعني بالموقف الحقيقي بس حلمت أن بنت عمته تسأله ليه تدلعها وماتدلعنا كلنا؟ وميتو جاوبها وأحس الجواب هو اللي أبي أعرفه وعرفته من الحلم..
"وتين بحيره": والله مافهمت شي من اللي قلتيه..
"صفاء وهي تشرح لها": الموقف صار بالواقع وميتو لما قال لي: صوفي ليه ماتدافعين عني...؟
أستحيت ومارديت عليه وهو ضحك وقام وطلع من الخيمه لما سمع الشباب ينادونه برا.. بس لهنا الواقع وبالباقي كملته بالحلم ..
"وتين وبحيره أكثر": صفاء أنا مافهمت شي أنتي شبكتي بين موقف وحلم_ هذي ماتصير أبدآ..
صفاء: ماشبكت شي هي جات كذا_ أنا صارلي فتره طويله أفكر بميتو (ليه يدلعني) وأستحي أسأله أو أسأل خواته وبنفس الوقت أحسه معجب فيني بس يكابر
ولا يبين لي لأن معاملته لي تختلف عن باقي البنات سواء خواته أو بنات عمه وعمته أو بنات خاله..
وتين: بس أنتي قلتي من قبل أن صارله سنتين راجع من أميركا وأخذ طبع الأجانب وطريقة تعاملهم_ واللي كملها طبيعة مجتمعكم شوي متفتحين يعني عادي تكشفون وجيهكم قدام الشباب وتتعاملون مع بعض مثل الأخوان..
صفاء: Ok. أتفق معك بس هو يعاملني غير وهالشي واضح ..
وتين: طيب أبسألك هالشي واضح عند أختك هناء اللي أصغر منك؟ ولاتقولين لي هناء ماتنتبه لأن عمرها 18سنه وإذا هي أنتبهت معناته باقي البنات أنتبهوا بعد..
صفاء: هناء ماتطيق متعب!!! ودايم تطلع من المكان اللي يدخل فيه عشان كذا مو منتبهه..
"تفاجأت وتين": معقوله.. ليه؟
صفاء: تقول أحسه شايف نفسه وماخذ مقلب من جماله ومكانته بالمجتمع ومغرور واللي زاد غروره البنات المعجبات فيه (ماتدري إني وحده منهم) وتظن إنها بتصرفاتها وتطنيشها له راح تكسر خشمه..
"ضحكت وتين": ههه مسكينه هناء ماتدري إنها آآآآخر همه هي..!! يعني متعب راح يعرف إنها ماتطيقه ولو عرف ماراح يهتم..
"صفاء وهي تحط راسها على الطاوله":
((آآآه لو الظروف المقبله تكشف قدرها
لو يعرف الشخص منا وش مع الغيب بيجي له))..
من سمعتها بلسان حامد زيد وهي تردد بأذني.. ودي أعرف وش راح يجيني؟ وش نهاية تفكيري فيه سنتين؟
وتين: إنتي خايفه؟
صفاء: مو خوف لأني متفائله ومتوقعتها نهايه حلوه بس اللي ابيك تعرفينه وأنتي تجهلينه إن البنت لما تحب تصير عندها أنانيه وحب للتملك بدرجه لاتوصف..
أنا أعيش هذا الشعور وماودي أحد يشاركني بميتو ولاحتى يفكرون فيه لامن قريب ولابعيد..
"وتين بإقناع": بتمسكين قلوب البنات لايحبونه ولا يفكرون فيه؟ خليك واقعيه ياصفاء.. وبعدين فيه حكمه تقول (إذا أحببت شيئآ فدعه حرآ.. إن عاد فهو لك وإن لم يعد فتمنى له السعاده)..
"صفاء وهي تبتسم": وتين بلا حكم أنا كذا مبسوطه خليني أشبع دلع وحب وأحلام..
وتين: مو توك خايفه من النهايه..؟
صفاء: قلت لك مو خايفه من النهايه وبعدين إذا شفتيني خفت شجعيني لا تحبطيني..
وتين: ياعساني ما أجرب هالشعور(خوف_أنانيه_حب تملك) الحمدلله شبعانه أمان وحنان من أهلي..
"قامت صفاء وهي تعدل بلوزتها": صدقيني لو جاك هالشعور بترمين كل العالم ورا ظهرك وما راح تذكرين إلا (غاليك) وخوفك وأنانيتك.. أنا رايحه لدورة المياه أبعدل شكلي وأرجع..
"وتين بتردد": والنهاية؟؟؟؟؟
"أبتسمت صفاء وهي تشيل شنطتها": توقعيها حلوه ولا تخافين منها...
×× النهايه ×× ..
مجهوله أكيد بس ....!!
ليه دايم نتوقعها حلوه بدون مانخاف منها..؟؟؟؟
الخوف مفيد بحالات ومضر بحالات أكثر..
الخوف مفيد..
لأنه يعطينا أسوأ الأحتمالات عشان لما يضيع النصيب نكون متوقعين ضياعه و نلقى كلمة (خيره) أول تعبير نقوله يهون علينا طول الأنتظار ويعطينا أمل جديد يغسل أثار الصدمه...
الخوف مضر..
لأنه هو اللي يصعبها زياده ويعقدها أكثر وأكثر_ لأننا نترقب وننتظر وقلوبنا مليانه تشاؤم..
تشاؤم من نفوس اللي حولنا.. بس مو بيدنا لأن كل شي ينقلب ويتغير..
اللي أمس مو نفسه اليوم وغير عن بكره واللي بعده وأقصد (نفوسهم ,,تفكيرهم ,, تصرفاتهم ,, إنفعالاتهم).....
ممكن بلحظه ينشبك شي ويصلح .. وبعد لحظه ينفك ويتبعثر.....
فما بالك باللي ينتظر {نهايه}....؟؟؟؟

"هديل وهي تأشر بيده فوق تحت": ياهوه وين وصلتي...!!!!
"أنتبهت لها وتين لأنها كانت سرحانه": هلا هدوله وينك تأخرتي؟
"هديل وهي تجلس وتحط اكياس الفطور عالطاوله": كالعاده الكافاتيريا زحمه أقسم بالله كأنههم بمجاعه البنات..
وتين: كل بداية ترم تحصل هالزحمه صار شي طبيعي..
هديل: شفت صفاء رايحه لدورة المياه متى صحت من النوم؟؟
"وتين وهي كاتمه الضحكه": ألا قولي وش حلمت .. ميتو هذا ماترك فيها عرق صاحي صارت تهذري بأسمه..
"هديل بحماس وهي تفتح الحمضيات": هلا والله عاش الحب عاش.. وش حلمت المطفوقه اليوم ما يكفي بمحاظرة رمضان نامت ولما نادت الدكتوره الأسماء ووصلت عند اسمها صحيناها تذكرين وش سوت؟؟..
"ضحكت وتين وهي توصف شكل صفاء": ههه ظلت تفرك عيونها ساعه تستوعب المكان ولما سألتها الدكتوره/أنتي صفاء؟ قالت لأ انا مو صفاء أنا مي ....ههه بغت تنطق لو ماسكتناها..
هديل: ولا تفشلت من تهزيءالدكتوره لها ظلت مبتسمه وتلعب بخصلات شعرها وكان الدكتوره تكلم الطوفه بس احسن أعجبني ببرودها..
"وتين وتسوي نفسها معصبه": بس مو أبرد من وجهك ألحين جايبه فطور وجالسه تآكلين وماتقولين تفضلي......
وبس ..

رواية...

الكاتبه:
....¸•°أم الظفاير¸•....
: شخبار أم عبدالعزيز ماتدرين متى عرس ولدها عمر؟؟؟؟؟
"ضحكت أم سطام وهي تصب القهوه لجارتها أم الذيب": عرس ولدها عبدالعزيز أكبر عيالها مو عمر .. عمر بدري عليه ماتزوج ..
أم الذيب: ماأعرف غير ولدها عمر لأنه طيب الله يخليه لها دايم لاشافني أتمشى بالشارع أغير جو عن هالبيت يسلم علي ويسأل عن أحوالي_ بس عبدالعزيز مابعمري شفته أبد أسمع به سمع بس..
أم سطام: معك حق عبدالعزيز ماينشاف لأن دوامه بسكاكا مو بالرياض ومايزور أهله إلا خميس وجمعه..
أم الذيب: عرسه بالرياض وإلا عند عمامه بالشرقيه؟؟
أم سطام: عرسه بالرياض وعمامه وقرايبه اللي بالشرقيه يحضرونه هنا.. إن شاءالله أنتي ياأم الذيب تكونين أول الحاضرين..
أم الذيب: ماأظن أحضره إنتي تعرفيني ماأحب المكان الضيق تطلع روحي منه..
"أم سطام حست إنها أحرجت أم الذيب بسؤالها لأن أم الذيب معروف إنها (ساكنه بالحوش) وماتدخل أي مكان مغلق..
مع إن بيتها عباره عن قطعتين أرض وحده (فيلا) كبيره وواسعه والأرض الثانيه كلها حوش موجود فيه (بيت شعر) بس ماتدخل البيت أبدآ وإن دخلت تكون مضطره بس ثواني وتطلع لأنها تنكتم وتتوقف دقات قلبها..
ولما تزور جيرانها تجلس بالحوش وماتدخل داخل وهم بالتالي يحترمون رغبتها ويقدرون ظروفها"...
×× أم الذيب حرمه كبيره بالعمر وعايشه في بيتها اللي بجنب بيت أبو سطام بلحالها..
مايعرفون الناس شي عن حياتها ولا يعرفون حتى أسمها لدرجه إنهم ينادونها(أم الذيب).. عشانها متأثره بوفاة زوجها من 20 سنه
تعتبره سندها بالدنيا ودايم لما تتكلم عنه تقول: <الذيب> والناس إحترامآ لها يسمونها
,,,, ولأن ماعندها إلا ولد واحد بالعقد الثاني وقاطع فيها ومايسأل عنها إلا بالمناسبات البعيده وهي ماتحب تذكره ولاتذكر أسمه!!!
صاروا الناس ينادونها
.. وهي تحب هالأسم كثير وتعودت عليه وأشتهرت فيه ××..
أم الذيب: عبدالعزيز إذا تزوج يسكن بسكاكا وإلا بالرياض..
أم سطام: أكيد بسكاكا عشان دوامه..
أم الذيب: وإنتي ليش ماتزوجين ولدك سطام؟
"أم سطام بضيق": والله إني ماقصرت معه كلما شفته فتحت له سيرة الزواج بس هو رافض ومثل مانتي عارفه مطلق مرتين والعيب منه ويقول مابي أظلم بنات الناس معي ..
من طلق زوجته الثانيه العام اللي ماجلست معه إلا سنتين وأهلها طلبوا الطلاق لأنه مايضني (عقيم),, والناس الله يهديهم مالهم سالفه إلا سطام وحريمه اللي طلقهن ..
الأولى راحت بنصيبها وربي رزقها بعيال والثانيه أنشاءالله يجيها ولد الحلال اللي يسعدها ويريحها..
أم الذيب: ماعاد بقى بالناس صبر ياأم سطام.. وين الرجال اللي يصبر على زوجته لو فيها عيوب .. وين الحرمه اللي تصبر على زوجها لو فيه عيوب وتحفظ أسرار بيتها..
الذيب الله يرحمه كان يوصيني وصاه ويقول؛أحفظي أسرار بيتك عن الناس ترا السر إذا ثقل بصدرك وعلمتي فيه راح يثقل على غيرك وينشرونه بينهم والكل بيعرفه..
"تنهدت وهي تترحم عليه" الله يرحمه ويسكنه بجناته..
أم سطام: صادقه ياأم الذيب مافيه صبر .. سطام موكل أمره لله وراضي بقدره وأنشاءالله ربي يفرج همه ويفتحها بوجهه..
أم الذيب: عمامكم اللي بالقريات ليه مايجون للرياض؟
"أم سطام وهي تقرب لأم الذيب عشان تبعد عن جهة الشمس اللي حرقت ظهرها": على أساس أن العم سعد بيجي من أمس ويجيب بنته لأنها بتدرس بالجامعه بس صارت له ظروف منعته وأحتمال بكره يجي..
أم الذيب: بنته بتدرس بجامعة بنتك؟؟
أم سطام: لأ تدرس بجامعة ثانيه..
أم الذيب: ليه مادرست هناك عند أهلها ..؟؟
أم سطام: عشان نسبتها كبيره تبي تدرس بقسم ينفعها لاتخرجت ..
أم الذيب: طيب وين بتسكن؟؟
أم سطام: عندنا بالبيت لأن مالها أحد بالرياض غيرنا..
أم الذيب: أبو سطام وش كثر أخوانه وخواته..؟
"أم سطام وهي تمسح بيدها العرق اللي على وجهها من حرارة الشمس": أخوانه أثنين كلهم بالقريات وخواته أثنين وحده بالجوف ووحده بتبوك..
"دخل فارس الحوش وهو ماشي بأتجاه باب مدخل البيت ألتفت ولقى جدته جالسه مع جارتهم وطبعآ أم الذيب ماترمي البرقع عن وجهها أبدآ سواء قدام الحريم أو في بيتها عشان كذا فارس مارجع وأستحى منها
لأنه متعود على زياراتها لهم بهالوقت وجلستها بالحوش"..
-: السلام عليكم.. شلون صحتك خاله إنشاءالله تمام؟
أم الذيب: هلا وليدي الله يسلمك ويحفظك ويعطيك الصحه والعافيه..
"أم سطام وهي مستغربه": وش مرجعك هالوقت الساعه عشره الحين..
فارس: أعذريني جده أنا مارحت للمدرسه وآسف لأني ماعطيتك خبر..
أم سطام: وليه مارحت إنت تعبان وإلا صايرلك شي؟؟
"فارس وهو يحط يده فوق عيونه يحتمي من الشمس": مافيني إلا العافيه بس ضايق صدري وحبيت أغير جو. . تمشيت شوي بسيارة جدي وألحين رجعت..
أم سطام: جدك يدري إنك ماداومت؟
"فارس بملل": جده الله يخليك أحرقتني الشمس تعالي نكمل حكي داخل..
"دخل بدون مايشوف ردة فعل جدته اللي إنحرجت منه وكأنه يقول لأم الذيب:روحي بيتك..
بس أم الذيب ماأنتبهت ولافكرت بكذا و قامت وهي تعدل عباتها"..
أم سطام: بدري ياأم الذيب وين رايحه..
أم الذيب: نعست وأبي أنام لي ساعه لأني أصحى من صلاة الفجر ..
^^^^^^^^^^^^^^^^^^^^^^
بعد مارجع عمر من دوامه وقف سيارته عند أقرب سوبر ماركت بالحي ونزل عشان يشتري أغراض لأهله..
أخذ عربه مشى لجهة الزيوت وطلع جواله وأتصل على أمه": يمه وش نوع الزيت اللي تبينه؟؟......... فيه أنواع كثيره بس قلت أسألك أول يمكن فيه نوع معين متعوده تستخدمينه بالطبخ؟؟
......... يعني أجيب أي شي؟؟.... طيب فمان الله....
أخذ ثلاث علب وحطها بالعربه و حس بأثنين واقفين وراه بمسافه "اكيد واقفين يشترون" كان هذا تفكير عمر وهو يمشي بدون ما يناظرهم ..
راح لجهة ثانيه وأخذ كرتون معجون طماطم وكيس ملح وألتفت وهو يدف العربه لقى الشباب يناظرونه بتفحص.. مشى وتعداهم ووقف عند السكر وأخذ كيس وراح يحاسب"..
"وقف بجنبه الشاب وقال بإستهزاء": الجامعه نستك أيام الثانوي يابو عمير..!!!!!!!!!
"تكلم صديقه بإستهزاء أكثر": أجل الوظيفه بالمستشفى تخلي الواحد حلو ونظيف لدرجة النسيان..
"ناظرهم عمر بنظرات متقطعه وصد وهو معطيهم ظهره وقال بأستهزاء": لدرجه أنكم تعرفوني وانا ماقد مرت علي اشكال حلوه مثلكم؟
"عصب الشاب من اسلوب عمر حط ايده على كتف عمر بقوه ودار جسمه لجهتهم": آآآآآفا ناسي والا تتناسى!!
"بعد عمر يده من كتفه وتكلم بملل وهو من النوع اللي يحب الهدوء ويكره المشاكل والمشاحنات": احسبها مثل ما تبي واختصر لأن ما عندي وقت أضيعه معكم..
"ألتفت الشاب لصديقه وهو يضحك":ههه للحين وقتك محسوب ياشاطر ذكرتنا بأيام المدرسه من جد وجد ومن زرع حصد..
"قرب صديقه لعمر ووقف قباله وهو يشيل الكاب من رأسه بحركه قززت عمر وقرفته من أشكالهم وقلة نظافتهم وأسلوبهم الهمجي معه": لا يضيع صوتك يالخك... وإلا بلاش اقول لأن ما نبي نزعلك شكلك حساس ورقيق..
"دفه عمر بقوه وهو يبعده عنه وقال بصوت عالي": ألزم حدودك لا تخليني أتصرف معك تصرف ثاني الظاهر أنك تكره الأحترام لأنك أساسآ مو محترم نفسك..
"تلفت الشاب يمين وشمال وشاف الأصوات هدأت والكل يناظرهم.. أنقهر من عمر وقرب وهو يقول بصوت واطي ومسموع": أنا أعلمك الأحترام بس خلني أشوفك أنت وصالح ,,
وصالح بالذات ناوي عليه لأن مابعد أخذت حقي منه.. سلم عليه وقله الوعد قريب...
راحوا الشباب وهم يتمايلون بمشيتهم وأستغرب عمر من تصرفهم معه لأنه مايعرفهم أبدآ ولايتذكرهم بس التحذير لصالح معناته هذولا الشباب من ضمن اللي لهم مشاكل قديمه مع صالح بس ليش يبون يرجعون لها؟؟ وش السبب..؟؟
##########################

مكرره يالغلا سبقتك بها الاخت عز نفسك وابتعدت وقطعنا فيها شوط كبير خلاص ع وشك النهايه