ياغلاتك بقلبي يا نصيب الغير للكاتبه أم الظفاير روعه

دخلت وتين للكليه وهي تمشي بأتجاه القاعه وشايله بيدها الجوال تبي تتصل على صديقاتها تشوف وينهم وبيدها الثانيه شايله كتاب صغير.. ألتفتت على صوت عآلي يناديها من بعيد..
"ألتفتت وتين": أهلين صفاء توني بأتصل عليك إنتي والبنات..
"صفاء وهي تلتقط أنفاسها": تعالي معنا بسرعه اللفت اللي بجنب الكافتيريا قفل على بنت وكل الطالبات والموظفات والمشرفات واقفين عند اللفت..
"وتين وهي حاطه إيدها على فمها ومتفاجأه": يالطيف لايكون قفل على وحده من بنات شلتنا..؟؟
صفاء: لأ الشله كلها واقفه عند اللفت ينتظرونا.. يالله تعالي معي بسرعه نشوف وش صار عالبنت..
"حطوا رجولهم وتين وصفاء وهم يركضون للفت ولما وصلوا تفاجأوا بأشكال الموظفات والمشرفات وهم لابسات عباياتهم ومغطيات وجوههم ويبعدون الطالبات من اللفت"..
"وتين وهي حاضنه شنطتها وتقرب لصفاء من زحمة الطالبات": وش صاير ليش الموظفات لبسوا عبايات؟؟
"صفاء وهي ترفع جسمها وتحاول تشوف": ماأدري بس الظاهر إن.......
"سكتت وهي تسمع الموظفه تصرخ بصوت عالي": ياطالبات أدخلوا للقاعات بسرعه.. بيدخلون رجال الأمن ورجال الأسعاف يفتحون اللفت ..
"هديل وهي تصفق بحماس وتجي بجنب وتين": وناسه بيدخلون كليتنا رجال امن ههه..
"وتين وهي تضرب هديل على رأسها": يادبه إنتي وينك جالسه أدورك من بين البنات.. خفت يكون اللفت قفل عليك!!
"صاحت هديل": ليته قفل علي عشان يصير شوية أكشن بس قهر قاعتنا تحت مو فوق آآآآآآه..
"وتين وهي تحط جوالها بالشنطه وتحضن الكتاب الصغير": الحمدلله والشكر مجنونه.. هذا بدل ماتقولين الله يساعد البنت اللي بداخله وتكون بخير..
"هديل بلا مبالاه": مو أول مره يقفل اللفت دايم يقفل ويفتحونه الموظفات وتطلع البنت منه بخير بس أنا مستغربه ليش مافتح معهم هالمره...
"سكتت ثواني وناظرت بيد وتين وهي تسألها" وش هذا الكتاب اللي بيدك؟
"أبتسمت وتين": هذا كتاب يفسر الشخصيات صارلي يومين أقرأ فيه ومابعد أنتهيت منه مره مره حلو ..
"هديل وهي تضربها من كتفها بحماس": حركات صايره مثقفه من متى؟
"وتين وهي تعلي صوتها عشان تسمع هديل بوسط أزعاج الطالبات": أي ثقافه أنتي تدرين إني ما أحب أقرأ كتب بس الفضول ذبحني..
هديل: لقيتي شخصيتي؟
وتين: لأ مالقيت ألا شخصيات أخواني..
هديل: طاح حظك أنتي وأخوانك من حلاتهم عاد..
"صفاء وهي تلتفت عليهم": بس أنتي وياها هذا وقته خلونا نشوف وش آخرة الفوضى اللي صايره بالكليه اليوم..
"دخل مدير حركة الباصات وهو لابس بشت ويمشي وراه أثنين من رجال الأمن بلبسهم الأخضر وهم ماسكين آلالات بإيدينهم ووراهم يمشي موظف بالكليه وماسك بيده جهاز أسود يكلم فيه وكلهم رايحيين لجهة اللفت..
صرخوا الطالبات صرخه وحده والبعض يصفق والبعض يصفر بصوت عآلي والبعض يضرب الزجاج بقوه وكأنهم جماهير..
وأشكالهم فعلآ كأنهم جماهير لأنهم بالمربعات اللي داخل المباني ويفصلهم عن الرجال حاجز زجاجي.. وبعض الطالبات أنحبسوا داخل دورة المياه اللي قبال اللفت وعجزوا يطلعون من دخلوا الرجال "..
"صفاء بخوف": يماه مومعقول اللي قاعد يصير أحس إني بحلم..
"هديل وهي مسنده جسمها عالزجاج": حسافه ولا واحد شكله حلو!!
"وتين وهي تضحك": هذي حركه مقصوده ههه..
"هديل وهي تضرب يدها بيد وتين وتضحك": الظاهر كذا وإلا خلصوا رجال الأمن المزين نبي نكحل عيونا على هالصبح ههه..
صفاء: سمعت بنات يقولون إن اللفت قفل عليها من الساعه 7الصبح وإلحين الساعه 8 يعني صارلها ساعه كامله بداخله..
"دخلوا رجال أمن أثنين_واحد فيهم حاطه إيدينه بأذانه من أصوات التصفير والصراخ والتصفيق.. والثاني منزل رأسه بالأرض ويناظر بجواله يتحاشى نظرات البنات"..
هديل: ياحليلهم مؤدبين ما يناظرون بالبنات..
وتين: وإنتي الصادقه طالبات الكليه ضيعوا الحيا وصاروا الرجال يستحون أكثر منهم..
هديل: غصب عنهم يستحون وبعدين الطالبات يتصرفون كذا لأن المكان ضيق وزحمه.. والله لو توقف الطالبه قدام رجال الأمن بلحالها تنخرس ويطيح عليها الحيا..
"توزعوا المشرفات داخل المباني وهي يصرخون عالطالبات ويحاولون يفرقونهم ويبعدونهم عن اللفت"..
"وتين وهي تناظر الساعه": يالله بنات باقي عشر دقايق وتبدأ المحاضره خلونا نروح للقاعه..
صفاء: أنتظري شوي مافيها شي لو تأخرنا خمس دقايق..
هديل: مابي أدخل المحاضره أبشوف وش يصير مع البنت..
"صرخت الموظفه بوجه وتين وهديل وصفاء وهي تأشر": تحركي عالقاعه ياطالبه!!!!!
"مشوا بالممر وعيونهم معلقه بالزجاج ودهم يعرفون وش صار.. ألتفتت هديل على وتين وهي تأخذ الكتاب وتقول": دام هذولا رجال الأمن الشيف اجل هونت ماأتمنى نفسي مكان البنت..
صفاء: ياقو قلبك ياهديل حتى بوقت المشاكل مايفوتك شي تركزين على كل صغيره وكبيره..
"هديل وهي تلتفت على وتين": فسري شخصيتي من هذا الكتاب ..
وتين: قلت لك مالقيت إلا أخواني..
"هديل وهي توقف وتحط أيدها على خصرها": ترا ذبحتينا بأخوانك ماصارت عاد.. يله أشوف قولي لنا وش قرأتي عنهم؟؟
"وقفت وتين وهي تسند جسمها عالجدار": ام سطام
والطبيعة الشرقيه فيها جديه ومسؤوليه .. ودقيق مره يهتم بالتفاصيل ..
روتيني ومايحب التغيير.. ويحب المساواه بعلاقاته مع الناس وما يفضل شخص على الثاني وي......
"قاطعتها هديل": لحظه لحظه وش فيك أنطلقتي بالحكي,, طيب فهمينا وش هذا شرقي؟؟ أنت من أهل الرياض وسط المملكه وش جابكم للشرقيه؟؟
"أنفجرت وتين بالضحك وهي تجلس عالأرض وتحط شنطتها بحضنها": ههه لأ لأ لأ لأ انتي فاهمه غلط!!!
"هديل وهي تجلس": فهميني ..
وتين: فكرة الكتاب مقسمه لأربع أتجاهات (شمال/شرق/جنوب/غرب) مو على خريطة المملكه ولا على خريطة العالم.. هي على أفتراض وجود أربع تجمعات من الصفات الأنسانيه للبشر ومختلفه وراثيآ..
"هديل بإستهزاء": يعني بكذا فهمتيني صرتي تحوسين بزياده..
"صفاء جلست وهي منجذبه لحكي وتين": توته كملي تحمست أعرف أكثر..
وتين: المقصود أن فيه صفات معينه صارت مقبوله ومعروفه على أنها من ناس بمنطقه او حضاره معينه وهذا ماله علاقه بالمكان ابدآ..
هديل: ألحين بتقنعيني أن ملاين الناس بأربع شخصيات أو أتجاهات مثل ما تقولين؟؟
وتين: مثل مافيه ألوان وصبغات محدده للشعر(أصفر وأحمر وأبيض وأسود)وألوان العيون (أسود وأخضر وبني وأزرق) ولون بشره ثآآآآبت مستحيل يتغير ..
كذا الشخصيات تقسمت لأربع أنماط فيها صفات محدده إذا لقيتي كل هذي الصفات بشخص أو بعضها تقولين عنه ان شخصيته
أو
أو
.....
هديل: أبسوي نفسي فهمت عشان ماتتعبين وأنتي تشرحين لي..
"وتين وهي تفهمها":هدوله ترا سهله وما يبي لها فهم.. كل شخصيه لها وظيفه تعبر عنها وأقصدالرجل اللي أشتغل بمجال عن قناعه وحب أو أن الظروف سيرته بس بالنهايه لقى نفسه راضي ومرتاح..
"صفاء وهي مبسوطه": واو وناسه يعني نقدر نفهم اللي حولنا بسرعه..
"هديل وهي تغمز لوتين بعينها": أكيد تبي تعرف شخصية اللي بالي بالك..
صفاء: ههه كاشفتي على طول..
هديل: طيب كملي ياوتين وش عرفتي عن أخوانك بعد؟؟
وتين: سطام شخصيته الشرقيه حيل تشبهه وخصوصآ أن عمره 31سنه ويشتغل مهندس معماري بشركة انشاءات معماريه ..
أما صالح شخصيته غربيه بحته أجتماعي بالدرجه الأولى وعفوي وحيوي ودمه خفيف يحب التغيير والتجديد ويكره القيود بس مشكلته انه مايعطي أهميه لمظهره وهندامه
يعني الثوب والشماغ يلبسهم بالمناسبات بس وغيره مستحيل..
هديل: سبحان الله قمة التناقض بينهم .. طيب صالح وش يشتغل وكم عمره؟
وتين: عمره 24 سنه موظف بشركه بالمطار المدني وطبعآ وظيفته عاديه لأن ما عنده إلا شهادة الثانوي .. صالح فيه لقافه عجيبه غريبه يموت بالمشاكل وحقه وحق غيره مايضيع أندفاعي حيل ويحب المغامرات..
"هديل وهي تناظر الساعه": يعني مثل مغامرتنا ألحين طنشنا المحاضره وجلسنا نسولف والساعه صارت 8ونص!!!
"شهقوا صفاء ووتين وهم يناظرون ببعض فجأه ويوقفون"..
هديل: وين رايحين خلاص المحاضره وفاتتنا بسبة وتين واخوانها.. خلونا نروح للكافاتيريا نفطر أزين...

كان جالس فارس مع جده فهد بإستراحة الرجال بمستشفى ال##### الحكومي بالملز قسم (الأنف والإذن والحنجره) ينتظر دوره عشان يدخل عند الأستشاري ..
فارس يشتكي من ضعف شديد بالسمع من فتره طويله ويستخدم سماعات طبيه للسمع..
أبو سطام: صارلنا ساعه كامله وإحنا ننتظر ..
فارس: عادي جدي إحنا بكل موعد ننتظر ساعه وأكثر بعد..
أبو سطام: ياولدي أخاف إنك جيعان وإلا عطشان قم إنزل للبقاله تحت أشترلك فطور سنع يشبع بطنك..
"فارس ويحاول يبتسم": أنا شربت حليب قبل أجي للمستشفى..
أبوسطام: حليب مايسد الجوع.. طلعنا من البيت الساعه ثمان وماوصلنا المستشفى إلا تسع من زحمة السير وألحين الساعه عشر.. قم ياولدي ترا مو زين لصحتك..
فارس: أبشر ياجدي بس نطلع من عند الأستشاري أشتري فطور وأعتقد ماراح نطول عنده..
"نادت النيرس بإسم فارس ومشى مع جده وراها لعند الممر الخاص بقسم تخطيط السمع"..
"فارس بملل": وين ماخذيني مابغى أسوي تخطيط للسمع..!!
"صد وهو يتأفف وألتفت عليه جده ويحاول يقنعه": ماعليه هالتخطيط بينفعك بكره يتحسن سمعك وتصير تسمع عدل مثل أول وأحسن..
"تضايق فارس من تفكير جده المحدود": التخطيط يقيس درجة السمع مايحسنه..!!!
أبو سطام: مايخالف ياولدي هذا بيفيدك..
فارس: ماصارت بكل موعد تخطيط والله مليت..
"أقبل عليهم أخصائي السمع Audiologist وهو ماسك أوراق بيده ويأشر لفارس يدخل غرفة التخطيط..
دخل فارس وجلس عالكرسي ورمى السماعات اللي بأذانه وحطها بيده..
وقف الأخصائي وهي تثبت السماعات الكبيره على راسه ويعطيه الجهاز بإيده..
تكلم بصوت عالي مره عشان يسمع فارس": تسوي زي كل مره يافارس أول ماتسمع الصوت تضغط عالجهاز اللي بيدك على طول تمام إنت سامعني..؟؟
"هز فارس رأسه و بخاطره": حفظت هالحركه ثلاث سنوات وأنا أضغط بالجهاز ولا طلعت بنتيجه..
( فارس كان يعاني من ضعف بسيط بإذنه اليسرى فقط من وهو صغير بسبب أصابته بحمى "الحصبه".. لكن أهله ماتداركوا المشكله إلا من ثلاث سنوات وبدأ علاج ..
ومع الأيام تدهورت حالته وصار الضعف بأذانه كلها سواء..
وأول مابدأ علاج أعطوه المستشفى سماعات طبيه وكان مبسوط فيها وقتها بس مع الأيام صارت تزعجه كثير وتسبب له أحراجات مع الناس )..
"الأخصائي وهو يأشر لفارس بيده من ورا الزجاج بحركه يعني": أضغط عالجهاز..
"فارس كان مرتخي بجلسته وسرحان يناظر تحت ويضغط بأصبعه عالجهاز بعشوائيه حتى بدون مايسمع الصوت.. عدل جلسته وهو يتنهد ويتمتم":
والله أذني أنفجرت من الأصوات اللي اسمعها ماعاد أقدر أركز صار يتخيلي صدى الصوت,, وأنا أضغط عالجهاز ومو متأكد إذا فيه صوت وإلا لأ....
ألحين من أطلع من الغرفه توديني عند الأستشاري الغثيث اللي حافظ كلامه أكثر من دروسي ولاجديد كالعاده..
"أشر الأخصائي لفارس ينزل الجهاز من رأسه ويطلع من الغرفه.. حط سماعاته بأذانه وطلع يمشي ورا جده والأخصائي لغرفة الأستشاري"..
"الأستشاري أسماعيل وبعد ماأخذ الأوراق من الدكتوره وجلس بمكتبه": كيف حالك يافارس إنشاءالله تمام..
"ما رد عليه فارس وحط إيده على خده يناظر الأرض.. يمكن ماينلام على تصرفاته لأنه وصل لدرجة الملل واليأس ،، وأي شاب بعمره ماعنده (صبر وطولة بال)
شي طبيعي يتصرف كذا مع اللي متأمل يساعدونه وينهون مشكلته بعد رب العالمين"..
"أبو سطام وهو مبتسم ويحاول يرقع لفارس": والله يادكتور الولد جاي مواصل من أمس مانام وإنت تعرف هالطلاب من تجي الإجازه يتخربط وقت نومهم ولا جت المدارس عقب تعدل ورجع زي أول..
"ماأهتم الدكتور لكلام أبو سطام وقال وهو مندمج يناظر الأوراق": يافارس .. أنت تحس بدوخه أو تسمع طنين..؟
فارس: لأ..
د/أسماعيل: يطلع من أذانك إفرازات؟
فارس: لأ..
د/أسماعيل: تعطس دايم وتحك أنفك؟
فارس: أحيانآ..
"سكت ثواني د/أسماعيل ورفع راسه موجه كلامه لفارس": زي ماأنت عارف إن ضعف التوصيل في السمع في أذانك هي المشكله اللي إنت تعاني منها ومن التخطيط اللي قدامي بين إن نسبة الضعف زادت شوي و ما........
"قاطعه فارس بإنفعال": كل مره يضعف أكثر من المره اللي قبلها وش الحل..؟؟؟
"ماجاوبه الدكتور ولا أهتم لإنفعاله وكمل وهو يعدل نظارته": إحنا ناقشناك من قبل بخصوص إجراء عملية (قطع العظم الركابي) بس للأسف،، حالتك كرمالها وتسوء والعمليه ماراح تنفع للي بعمرك..
أستمر على أستخدام السماعات حاليآ وأعتقد إنها حل مؤقت لك و... وإنشاءالله خير...
"صد عنه فارس وأخذ نفس عميق وهو يضرب بيده على رجله بقوه..
ألتفت عليه جده وطبطب على كتفه ويحاول يهدي منه": ماعليه ياولدي أصبر لما يفرجها ربك قل الحمدلله على النعمه اللي إنت فيها ترا غيرك يتمنى ربع اللي إنت فيه..
د/أسماعيل: راح أعطيك موعد بعد شهرين وإنشاءالله تتحسن حالتك للأفضل..
"قام فارس وطلع من الغرفه حتى بدون مايستفسر عن الموعد أبدآ وبخاطره": ماتتحسن طول ماأنتم بالبرود واللامبالاه 3سنين وحالتي من سئ لأسوء ولانفعتوا بشي؟
والله لو إني واحد من قرايبكم كان حطيتوني فوق روسكم وحطيتوا أحتمالات كثيره لتحسن سمعي........
"ألتفت فارس على جده اللي مسك إيده وتعابير وجهه تدل على الحزن والضيقه لحالة حفيده": تعالي ياولدي خلنا نآخذ ورقة الموعد الجاي..
"أخذ فارس نفس عميق وهو يناظر فوق": يارب ترحمني ..
..× فارس 17 سنه .. يدرس ثاني ثانوي "أدبي"..
توفوا أمه وأبوه بحادث من كان عمره تسع سنوات وتكفل جده بتربيته وعاش في بيت جده اللي هو أبو سطام..
فراق وجدان صدمهم وحطمهم ولما تجاوزوا الصدمه كان فارس كل همهم بالبيت لأن عمامه خارج الرياض وجده وجدته لأبوه متوفين..
و برغبه من أبو سطام وأختيار من فارس أنه يعيش عندهم صاروا يعاملونه ك أخ مو ولد أخت ويلاقي نفس الحب والأهتمام والدعم وحتى القسوه والشده عشان ما يصير فيه غيره بينه وبين سعد وفارس متفهم لهالشي ..
فارس ذكي ولماح وقلبه طيب وحنون.. قلبه وعقله أكبر من عمره يمكن لأنه أكتسب صفات كثيره من سطام وصالح وتأثر فيهم لدرجه لاتوصف وصارت شخصيته مزيج من الهدوء والعفويه والإندفاع ×..
%%%%%%%%%%%%%%%%%%%%%%%%%
××((( في باص البنات )))..
يوجد ما لا يوجد في أي مكان آخر ..
ويحمل ويتحمل كل ماتعجز النفوس حمله ..
و يدخل ويستقر به ما لا يطاق ولا يجب ان يقال من (مشاعر مكبوته وأحاسيس مهمله وهموم محبوسه وخجل مقنع) شاءت الظروف إن تستر عليها ولكنها تمردت وأطلقت العنان لنفسها في باص البنات..××
"جلست وتين عالكرسي بتعب وحطت شنطتها بالأرض .. تلفتت حولها تدور عالبنات وكالعاده مافيه إلا 3 طالبات من أصل 12 طالبه "..
"وتين وهي تتحلطم": حسبي الله عليهم.. جايه من البوابه أمشي بسرعه عشان ما أتأخر عليهم وبالأخير ألاقيهم لسه ماطلعوا من الكليه أوف ..
واللي يقهر زياده إن المحاضرات تخلص الساعه 12 وربع والبوابه تفتح بوقتها يعني وش حجتهم؟؟
"قطع تفكيرها طالبتين كانوا يحكون عن اللفت اللي وقف وحال البنت بلحظتها ووتين قطت أذنها معهم لأن ودها تعرف وش صار بعد مادخلوا القاعه هي وصديقاتها..
وتين تعودت تسمع سوالف البنات وفضفضتهم لبعض مو من باب الفضول لكن البنات أصواتهم (مسموعه) وماعندهم أي مانع لنشر غسيل ظروف بيتهم وبيوت قرايبهم وجيرانهم..
وماعندهم أي حواجز أو خطوط حمراء يوقفوا عندها وخصوصآ إن سايق الباص مايقدر يمنع نفسه عن سماع كل اللي يوصله"..!!!!!!!
-: اللي وقف فيها اللفت معي بالقاعه وتقول إنها ماكانت خايفه بس لما سمعت صراخ البنات والتصفير جلست تصيح وتوقعت إن فيه مصيبه صايره تحت بالساحه..
-: وش سوت لما سمعت أصوات الرجال عند اللفت؟
-: تقول واحد من الرجال جلس يطمنها ويهدي منها وقالها إن الأمن موجودين وراح يساعدونها.. تصوري هي من سمعت أصواتهم بسرعه لبست عباتها وتحجبت عدل .. ماشاءالله عليها..
-: وش صار بعد مافتح اللفت؟
-: بكره أكملك ألحين طلعي جوالك بأخذ منك بلوتوثات..
"عصبت وتين وبخاطرها": كملي ألحين والله ميته أعرف وش صار ؟؟؟؟
"ركبوا الباص ثلاث بنات وهم يضحكون ضحك هستيري.. جلسوا بآخر الباص ورموا طرحهم وعدلوا شعورهم والضحك متواصل وبصوت أعلى من العالي"...
-: شفتيه شلون يناظرنا بغى يآكلنا بعيونه ههه..
-: والمشكله شين ويحوم الكبد بغيت أرمي جزمتي وأصقعه على وجهه ههه..
"وتين وبخاطرها وهي تسمعهم": هو لو شاف وجهك بدون غطا كان رمى جزمته وصقعك فيها ..
"تكلمت وحده فيهم بمياعه": إنتي ياللي هنا ماعليك أمر نادي السايق محرم من الشباك أبغى أكلم......ه..
"ألتفت وتين على ورى تبي تتأكد إذا البنت تكلمها أو تكلم غيرها لأن ماحد جالس قدام إلا وتين وباقي البنات ورا"..
"البنت وهي تأشر بأصبعها فوق تحت": إنتي إنتي نادي السايق بسرعه..
"ماردت عليها وتين وصدت وهي ترتخي بجلستها ومغطيه وجهها لأنها أساسآ ماترمي الغطاء بالباص"..
"البنت بمياعه أكثر": وش فيها ماترد آخاف بس مستحيه من سايق الباص.. أف ياشين البنت إذا صارت تمثل الأخلاق ..
"أنقهرت وتين وبغت تصيح بس مسكت نفسها": يعني من طلعوا من بوابة الكليه لما وصلوا للباص وهم يسولفون و يضحكون بصوت عالي .. عجزانه تفتح الشباك وتنادي السايق بصوتها العالي ..
"بعد مرور نص ساعه أكتملوا الطالبات ومشى الباص الساعه وحده ونص وكانت ثاني طالبه يوصلها الباص لبيتها هي وتين واللي تنزل قبلها وحده من البنات هذولا"..
-: محر...ا...م..
"السايق محرم عرف البنت من صوتها": عاوزه إيه يا نوف؟؟؟
نوف: أبغى أشتري من البقاله يامحرام!
محرم: مافيش بئاله بطريقنا يابنت..
نوف: تكفى محرام..
"تضايق محرم": قولتك مافيش بئاله يابنت ..مابتفهميش الكلام..
"نوف بصوت واطي": عمى بعينك ياحمار البقالات تارسه الشوارع بس إنت مو مشتهي توقف..
"أستانست وتين من موقف السايق وجذبها سوالف بنات متزوجات جالسات وراها وشبكت معهم بسمعها بس بدون ما تحكي معهم"..
-: من تزوجته ماشفت الهنا والراحه.. كل الدلال والعز اللي كنت عايشته في بيت أهلي راح وتبخر_ أبدآ ماكنت متصوره إني بشوف المهانه والذل معه..
حتى أبسط حقوقي حرمني منها .. ماحط لي بيت بلحالي أنا ألحين ساكنه مع أهله بغرفه واحده بس وتعامل أهله معي مره مزعج ومافيه إي إحترام لوجودي ..
دراستي منعني منها صارلي سنتين متخرجه من الثانويه ورفض أكمل دراستي الجامعيه.. وبالموت وافق اني أدرس بالكليه بعد ماضغطوا عليه أهلي ،، ولما وافق صار يمارس علي ضغوط عجيبه غريبه..
-: وش سوا يعني؟
-: خلاني أسجل هنا (أنتساب) مع أن نسبتي مره عاليه ورفض يآخذني للكليه كل يوم وأبوي الله يحفظه سجلني بهذا الباص وهو اللي يدفع حسابه كل شهر وحتى الكتب اللي أحتاجها أبوي أشتراها لي..
وهذا كله بصوب وشخصيته بصوب بصراحه أستحي أتكلم عن أخلاقه وتصرفاته بس اللي أقدر أقوله إنه (إنسان غريب)!!!
-: أسمحي لي أبسألك سؤال "أهلك ليش ماأشترطوا ببداية الزواج إن يكون لك بيت بلحالك وإنك تكملي دراستك"؟؟؟
-: أهلي رفضوا تعرفين ليه؟ لأن ولد عمي وكانوا واثقين إنه راح يسعدني بدون شروط..... وألحين.... أهلي ندموا أكثر مني لأنهم حسوا بغلطتهم بس بعد إيش؟
بعد سنتين من التعاسه بس تعرفين وش أحلى شي بهالسنتين؟
إن ماعندي أطفال لأن زوجي ع.....!!!!!!!!!
"تنهدت البنت بحرقه حرقت قلب وتين وحزنتها حيل لظروفها"..
×× بنت بهالعمر مليانه حب للعلم والنجاح ،، ومليانه كره للزواج وحياة التعاسه فيه..
أهل كل همهم البنت تتزوج..
وزوج كل همه يفرض وجوده بحياتها..
وزوجه كل همها ترتاح ب خروجها من حياته..
تعيش تناقض فضيع بداخلها والسبب (أهلها)..
لأن أختيار الرجل المناسب كان بيدهم.. وأختيارهم كان (خطأ).. ورفضهم لأشتراط اللي يسعدها ويريحها كان (خطأ أكبر)..
واقع الزواج صار صعب في بعض المجتمعات وصار السكوت والأستسلام هو سيد الموقف..!!!
سكوت عن عيوب الرجل وأستسلام للموافقه..والنتيجه (ظلم للبنت)_
وسكوت عن عيوب البنت
وأستسلام للموافقه..
والنتيجه (ظلم للرجل)_
لكن..كل شي بالدنيا ((نصيب)) وهذا اللي مصبرنا على واقعنا.....××

© كنه يقول "العشق" فيكم وفيني...؟!
مع أنه "الساكت".. وأنا ماتكلمت؟!
أنت تبي "الصمت" بينك وبيني؟!
طيب "أحبك".. كيف تنقال بصمت..؟!.. ©
"خطف صالح الجريده من عمر وحطها بجنبه وهو يقول": أنت أي شي تشوفه قدامك تقعد تكتب عليه؟؟
"عمر وهو يسكر القلم ويرتخي بجلسته": أبي أرتاح..
صالح: وين التعب عشان تدور على الراحه؟
"أبتسم عمر وهو يصد عن صالح": تعب القلب ياصالح تعب..
صالح: ياخي لاتحكي بالألغاز تكلم عدل.. سبحان الله مع إنك صديق عمري بس ساعات أجهل حكيك وماأفهم وش تقصد..
عمر: أحسن لك تظل جاهل لأن مو من صالحي ولا من صالحك تفهم ..
"صالح بتعجب": خير إنشاءالله وش اللغز اللي مو من صالحي أفهمه!!!
"عمر أنحرج وحس إنه مزودها حبتين وبسرعه غير الموضوع": يارجال أمزح
معك _ أبسألك وش سوا فارس بموعده اليوم؟
صالح: ما واجهته من جاء من المستشفى حط راسه ونام ولسه ماصحى..
عمر: ماسألت عمي فهد.. على حد علمي إنه هو اللي دايم يروح معه للمستشفى..
صالح: حتى أبوي ماواجهته ..
"دخل أبو سطام الدوانيه وفز عمر بسرعه وهو يعدل ثوبه الأبيض اللي مرسم على جسمه ومبرز كتوفه العريضه": هلا عمي..
أبو سطام: هلا فيك ياولدي..
صالح: الطيب عند ذكره تونا بسيرتك..
"جلس عمر بعد ماجلس أبو سطام"..
أبو سطام: وش عندكم تحكون عني..
"أبتسم عمر وبانت خدوده بقوه لأن وجهه دائري وخدوده مليانه مع أن جسمه نحيف وطويل": كنت أسأله عن موعد فارس اليوم وش قال الأستشاري عن صحته بس صالح الله يهديه ماأهتم ولا سألك أو سأل فارس..
"صالح ومسوي نفسه مهتم": أكيد تحسن سمعه أنا واثق من الطب في السعوديه و.....
"قاطعه أبو سطام بضيق وهو يناظر بالارض": لا والله ماتحسن والدكتور يقول إن سمعه صاير ضعيف أكثر من أول.. والله مقطع قلبي هالولد نفسيته تعبت ويضيق صدره لادخلنا المستشفى ودمعته بعينه وكأنه يبي يصيح..
"عقد حواجبه صالح بعصبيه": وش يصيح حلوه ذي صار رجال طولي وللحين تدمع عينه هذا متى يكبر ويصير مثل خواله..
"تضايق أبوسطام زياده بس عمر تدارك الموقف وتكلم بنبرة صوت هادئه عشان يهدي من أنفعال صالح": فارس ماينلام ياصالح يعني لو إنت بمكانه وبعمره صدقني ماراح تكون نفسيتك أحسن منه..
فارس حساس وبسرعه يتأثر لو يسمع بأي مشكله تحصل لغيره فما بالك لو كانت المشكله فيه هو أكيد راح يتضايق ويزعل.. وحتى لو كان رجال طولك,,
هو فاقد شي غالي بحياته ويتمنى بأي لحظه يرجع له بس مو عارف كيف ومتى؟؟؟
صالح: إنشاءالله يتحسن قريب بس هو لو إنه يترك التفكير الزايد بسمعه ويعيش حياته طبيعي كان ماصار حاله كذا..
عمر: تبي تمنعه مايفكر بنفسه؟ ياصالح إذا أنت متعافي وربي معطيك الصحه وماعندك عيوب،، حس باللي عندهم عاهات وأمراض لايصير أحساسك ميت..
"صالح سكت وهو يصد عن أبوه وعمر لأن كلمة (ميت) هزت شعوره وحسسته بإنه كان قاسي بدون ماينتبه لنفسه"..
"ألتفت أبو سطام لصالح وهو يوصيه": لاتزعل فارس ولاتهاوشه قدر الظروف اللي هو فيها وتراه صغيره بس إن جسمه كبير..
صالح: أبشر ماراح أزعله..
عمر: طيب ياعمي ليه ماتحول فارس لمستشفى ثاني يمكن المستشفى اللي يتعالج عنده إمكانياتهم محدوده؟
أبو سطام: وشو؟ شلون محدوده..؟؟؟
"ألتفت صالح على عمر وهو يضرب على ظهره بقوه": لاتتفلسف تكلم عدل عشان أبوي يفهم عليك ترا هذا أبوي مو واحد من زملائك بالعمل..
"عمر وهو يقاوم الضحكه ويناظر لأبو سطام": قصدي إن المستشفى اللي يتعالج فيه فارس ماراح يساعدونه بشي ولاتتحسن حالته أبدآ..
"ألتفت على صالح وهمس" كذا مفهوم..؟
أبو سطام: والله الدكتور دايم يقول لفارس: مالك علاج عندنا مدري ليه؟؟ مع ان مافيه مرض ماله علاج إلا الامراض الكبيره اللي لاهي بسمع ولا بنظر..
"طير عيونه عمر وتفاجأه": هو قال كذا معقول؟ فيه دكتور يقول لمريض كذا؟؟؟؟؟؟؟
"صالح وهو يحذف المركا على عمر": أجل أبوي يكذب.... لأ.. قلها بعد .... قل يكذب..
"أبو سطام وهو عاقد حواجبه": صالح وش بلاك عالرجال كل شوي تضرب عيب عليك..
"عمر وهو يحط المركا بحضنه": عآدي يا عمي إحنا متعودين نمزح مع بعض..
أبو سطام: هذا مزح هذا.. كسرلك ظهرك..
"سكتوا عمر وصالح وهم يناظرون بعض ويضحكون"..
"أبو سطام وبعد لحظة صمت قال وهو يفكر بصوت مسموع": والله غامضني (قاهرني)هالدكتور أخلاقه شينه علينا من ندخل عنده وصابره مايل (مايعطي وجه)
ومحد عاجبه ودايم يقول لفارس إنت مالك علاج وأنت حالتك صعبه مدري وش قصده والله الظاهر طفش من هالمسيكين فارس ثلاث سنين ولا لقى له علاج..
"صالح وهو يوقف ضحك فجأه ويعصب من كلام الدكتور": مو مستشفى أبوه عشان يطفش ...... شف الوقح والله لأربيه هالواطي اللي ....... وين وين مكانه أبي أقابله وأتفاهم معه..
"أبو سطام بضيق": لاحول ولاقوة إلا بالله إنت همك صحة فارس وإلا الدكتور؟
صالح: فارس ماعليه خلاف بس هالدكتور هذا لي تفاهم معه ليش يقول كذا؟
"عمر وهو يهمس لصالح": خلاص قفل عالموضوع لاتزعل أبوك وتضايقه..
"أبو سطام وهو يقوم": والله أنت ياصالح ماتعقل ولاتتسنع طول عمرك بس تدور على المشاكل.. أنا رايح للمسجد ألحقني أنت وياه لصلاة العشاء ..
"وقفوا صالح وعمر وردو بصوت واحد": ألحين بنطلع وراك..
×× عمر 24سنه .. صديق صالح من الطفوله وجارهم بنفس الوقت.. يشتغل "فني أشعه" بمستشفى حكومي ..
شخصيه جنوبيه غربيه ولما أقول جنوبي يعني (السلام والهدوء)..
عمر شخص حالم كريم وشهم وصبور يقدس اصدقاءه، ويعتز فيهم، ولا يقبل أن يسيء أحد لهم، يتأثر برأيهم، ويغير حياته عشانهم ._
إنسان أجتماعي ويحب يساعد الناس _ وخجول بشكل معقول يعني خجله بحالات معينه ..؟؟؟ ××.. ..
<<<<<<<<<<<<<<<<<<<<<<<<<<<<<
يوم الأحد....
10 شوال...
وفي الكليه وتحديدآ في قاعة التاريخ..
: صباح الخير يابنات..
"البنات بصوت واحد بردود متفرقه": صباح الورد _ صباح النور والسرور_ أهلين متعب ..
متعب: لسه صاحين مانمتوا؟
"ردت صفاء بنعومه": أحد يشوف جو حلو وبنات حلوات ومخيم أحلى وأحلى وينام؟؟؟
"أبتسم متعب وهو يناظر صفاء من بين 15بنت جالسه قدامه": الظاهر صوفي تحب الهواء البارد وتحب الضحك والسوالف وتحب الكشتات موت..
"أستحت صفاء وهي تصد عنه لأنه أحرجها بنظراته وسط ضحك البنات.. وتكلمت أخت متعب واللي تصير بنت خال صفاء": أقول يامتعب ترا مو بس صفاء تحب الجو والضحك والكشته حتى باقي البنات..
"متعب وهو يفتح سحاب الجاكيت وينحني للنار اللي صايره بالوسط والبنات متجمعات حولها": بس هي اللي ردت على سؤالي ودافعت عن نفسها..
"تكلمت بنت عمة متعب": طيب إنت قلنا ليش صاحي للحين الساعه صارت 3ونص؟
"ألتفت عليها متعب وهو يمزح": تسمحين لي أسهر؟
"ضحكت بنت عمته": لأ مو مسموح يالله على خيمة الشباب بسرعه ههه..
متعب: يالعوبه هذا بدل ماتقولين حياك أسهر معنا .. "ألتفت على صفاء" صوفي دافعي عني وإلا بس شاطره تدافعين عن نفسك؟
"تكلمت بنت عمته وهي تقلده": صوفي صوفي .. وليش ماتدلعنا إحنا بعد ترا كلنا (خواتك)..
"صفاء بخاطرها": وجع ياعوبه حاسدتني وبعدين أنتم خواته بس أنا... لأ... أنا غير..
"أبتسم متعب وهو يوقف": صفاء أسمها مايشبهها أبدآ وصوفي يليق لها أكثر وأحب أناديها بالأسم.. أما إنتم أسمائكم تشبهكم وماتحتاج تغيير..
"صفاء بخاطرها": أموت عالدبلوماسيه بالأجابات ويلوموني فيك يا ميتو.......... >>>>>>>>>>>>>>
"صرخت وتين": صفاء..
"فزت صفاء وهي منخرعه": ميتو.....
"أنفجرت وتين بالضحك وهي تضرب الطاوله بيدها": ههه ههه..
"صفاء وهي تمسح على عيونها وتحس بصداع": أنا ويني؟ وش جابني هنا؟
"وتين وهي مازالت تضحك": ميتو جابك هنا وتوه طلع من الباب ويوصينا عليك ههه..
"صفاء بملل وهي تحط إيدها على راسها": متى أنتهت المحاضره..؟
وتين: من ربع ساعه ومابغيت أصحيك قلت أخليك تشبعين أحلام بميتو بس مو لدرجه إنك تهذرين بأسمه..
صفاء: ليه القاعه فاضيه وين البنات وين هديل؟
وتين: خلصت المحاضره وطلعوا.. وهديل راحت تدور على البندري وأماني عشان نجلس بالقاعه لما تبدأ المحاضره الثانيه.. المهم لاتضيعين السالفه وقولي وش جاب ميتو على بالك؟
"تنهدت صفاء وهي مبتسمه": آآآه تذكرت موقف صار العام لما كنا بالمخيم ولما نمت كملت الباقي بالحلم ..
وتين: أي موقف إنتي مواقفك معه ماتخلص...؟
صفاء: لما كان يدلعني قدام البنات ويقولي (صوفي) البنات ماأهتموا بالواقع يعني بالموقف الحقيقي بس حلمت أن بنت عمته تسأله ليه تدلعها وماتدلعنا كلنا؟ وميتو جاوبها وأحس الجواب هو اللي أبي أعرفه وعرفته من الحلم..
"وتين بحيره": والله مافهمت شي من اللي قلتيه..
"صفاء وهي تشرح لها": الموقف صار بالواقع وميتو لما قال لي: صوفي ليه ماتدافعين عني...؟
أستحيت ومارديت عليه وهو ضحك وقام وطلع من الخيمه لما سمع الشباب ينادونه برا.. بس لهنا الواقع وبالباقي كملته بالحلم ..
"وتين وبحيره أكثر": صفاء أنا مافهمت شي أنتي شبكتي بين موقف وحلم_ هذي ماتصير أبدآ..
صفاء: ماشبكت شي هي جات كذا_ أنا صارلي فتره طويله أفكر بميتو (ليه يدلعني) وأستحي أسأله أو أسأل خواته وبنفس الوقت أحسه معجب فيني بس يكابر
ولا يبين لي لأن معاملته لي تختلف عن باقي البنات سواء خواته أو بنات عمه وعمته أو بنات خاله..
وتين: بس أنتي قلتي من قبل أن صارله سنتين راجع من أميركا وأخذ طبع الأجانب وطريقة تعاملهم_ واللي كملها طبيعة مجتمعكم شوي متفتحين يعني عادي تكشفون وجيهكم قدام الشباب وتتعاملون مع بعض مثل الأخوان..
صفاء: OK. أتفق معك بس هو يعاملني غير وهالشي واضح ..
وتين: طيب أبسألك هالشي واضح عند أختك هناء اللي أصغر منك؟ ولاتقولين لي هناء ماتنتبه لأن عمرها 18سنه وإذا هي أنتبهت معناته باقي البنات أنتبهوا بعد..
صفاء: هناء ماتطيق متعب!!! ودايم تطلع من المكان اللي يدخل فيه عشان كذا مو منتبهه..
"تفاجأت وتين": معقوله.. ليه؟
صفاء: تقول أحسه شايف نفسه وماخذ مقلب من جماله ومكانته بالمجتمع ومغرور واللي زاد غروره البنات المعجبات فيه (ماتدري إني وحده منهم) وتظن إنها بتصرفاتها وتطنيشها له راح تكسر خشمه..
"ضحكت وتين": ههه مسكينه هناء ماتدري إنها آآآآخر همه هي..!! يعني متعب راح يعرف إنها ماتطيقه ولو عرف ماراح يهتم..
"صفاء وهي تحط راسها على الطاوله":
((آآآه لو الظروف المقبله تكشف قدرها
لو يعرف الشخص منا وش مع الغيب بيجي له))..
من سمعتها بلسان حامد زيد وهي تردد بأذني.. ودي أعرف وش راح يجيني؟ وش نهاية تفكيري فيه سنتين؟
وتين: إنتي خايفه؟
صفاء: مو خوف لأني متفائله ومتوقعتها نهايه حلوه بس اللي ابيك تعرفينه وأنتي تجهلينه إن البنت لما تحب تصير عندها أنانيه وحب للتملك بدرجه لاتوصف..
أنا أعيش هذا الشعور وماودي أحد يشاركني بميتو ولاحتى يفكرون فيه لامن قريب ولابعيد..
"وتين بإقناع": بتمسكين قلوب البنات لايحبونه ولا يفكرون فيه؟ خليك واقعيه ياصفاء.. وبعدين فيه حكمه تقول (إذا أحببت شيئآ فدعه حرآ.. إن عاد فهو لك وإن لم يعد فتمنى له السعاده)..
"صفاء وهي تبتسم": وتين بلا حكم أنا كذا مبسوطه خليني أشبع دلع وحب وأحلام..
وتين: مو توك خايفه من النهايه..؟
صفاء: قلت لك مو خايفه من النهايه وبعدين إذا شفتيني خفت شجعيني لا تحبطيني..
وتين: ياعساني ما أجرب هالشعور(خوف_أنانيه_حب تملك) الحمدلله شبعانه أمان وحنان من أهلي..
"قامت صفاء وهي تعدل بلوزتها": صدقيني لو جاك هالشعور بترمين كل العالم ورا ظهرك وما راح تذكرين إلا (غاليك) وخوفك وأنانيتك.. أنا رايحه لدورة المياه أبعدل شكلي وأرجع..
"وتين بتردد": والنهاية؟؟؟؟؟
"أبتسمت صفاء وهي تشيل شنطتها": توقعيها حلوه ولا تخافين منها...
×× النهايه ×× ..
مجهوله أكيد بس ....!!
ليه دايم نتوقعها حلوه بدون مانخاف منها..؟؟؟؟
الخوف مفيد بحالات ومضر بحالات أكثر..
الخوف مفيد..
لأنه يعطينا أسوأ الأحتمالات عشان لما يضيع النصيب نكون متوقعين ضياعه و نلقى كلمة (خيره) أول تعبير نقوله يهون علينا طول الأنتظار ويعطينا أمل جديد يغسل أثار الصدمه...
الخوف مضر..
لأنه هو اللي يصعبها زياده ويعقدها أكثر وأكثر_ لأننا نترقب وننتظر وقلوبنا مليانه تشاؤم..
تشاؤم من نفوس اللي حولنا.. بس مو بيدنا لأن كل شي ينقلب ويتغير..
اللي أمس مو نفسه اليوم وغير عن بكره واللي بعده وأقصد (نفوسهم ,,تفكيرهم ,, تصرفاتهم ,, إنفعالاتهم).....
ممكن بلحظه ينشبك شي ويصلح .. وبعد لحظه ينفك ويتبعثر.....
فما بالك باللي ينتظر {نهايه}....؟؟؟؟

"هديل وهي تأشر بيده فوق تحت": ياهوه وين وصلتي...!!!!
"أنتبهت لها وتين لأنها كانت سرحانه": هلا هدوله وينك تأخرتي؟
"هديل وهي تجلس وتحط اكياس الفطور عالطاوله": كالعاده الكافاتيريا زحمه أقسم بالله كأنههم بمجاعه البنات..
وتين: كل بداية ترم تحصل هالزحمه صار شي طبيعي..
هديل: شفت صفاء رايحه لدورة المياه متى صحت من النوم؟؟
"وتين وهي كاتمه الضحكه": ألا قولي وش حلمت .. ميتو هذا ماترك فيها عرق صاحي صارت تهذري بأسمه..
"هديل بحماس وهي تفتح الحمضيات": هلا والله عاش الحب عاش.. وش حلمت المطفوقه اليوم ما يكفي بمحاظرة رمضان نامت ولما نادت الدكتوره الأسماء ووصلت عند اسمها صحيناها تذكرين وش سوت؟؟..
"ضحكت وتين وهي توصف شكل صفاء": ههه ظلت تفرك عيونها ساعه تستوعب المكان ولما سألتها الدكتوره/أنتي صفاء؟ قالت لأ انا مو صفاء أنا مي ....ههه بغت تنطق لو ماسكتناها..
هديل: ولا تفشلت من تهزيءالدكتوره لها ظلت مبتسمه وتلعب بخصلات شعرها وكان الدكتوره تكلم الطوفه بس احسن أعجبني ببرودها..
"وتين وتسوي نفسها معصبه": بس مو أبرد من وجهك ألحين جايبه فطور وجالسه تآكلين وماتقولين تفضلي......

رواية...

الكاتبه:
....¸•°أم الظفاير¸•....
: شخبار أم عبدالعزيز ماتدرين متى عرس ولدها عمر؟؟؟؟؟
"ضحكت أم سطام وهي تصب القهوه لجارتها أم الذيب": عرس ولدها عبدالعزيز أكبر عيالها مو عمر .. عمر بدري عليه ماتزوج ..
أم الذيب: ماأعرف غير ولدها عمر لأنه طيب الله يخليه لها دايم لاشافني أتمشى بالشارع أغير جو عن هالبيت يسلم علي ويسأل عن أحوالي_ بس عبدالعزيز مابعمري شفته أبد أسمع به سمع بس..
أم سطام: معك حق عبدالعزيز ماينشاف لأن دوامه بسكاكا مو بالرياض ومايزور أهله إلا خميس وجمعه..
أم الذيب: عرسه بالرياض وإلا عند عمامه بالشرقيه؟؟
أم سطام: عرسه بالرياض وعمامه وقرايبه اللي بالشرقيه يحضرونه هنا.. إن شاءالله أنتي ياأم الذيب تكونين أول الحاضرين..
أم الذيب: ماأظن أحضره إنتي تعرفيني ماأحب المكان الضيق تطلع روحي منه..
"أم سطام حست إنها أحرجت أم الذيب بسؤالها لأن أم الذيب معروف إنها (ساكنه بالحوش) وماتدخل أي مكان مغلق..
مع إن بيتها عباره عن قطعتين أرض وحده (فيلا) كبيره وواسعه والأرض الثانيه كلها حوش موجود فيه (بيت شعر) بس ماتدخل البيت أبدآ وإن دخلت تكون مضطره بس ثواني وتطلع لأنها تنكتم وتتوقف دقات قلبها..
ولما تزور جيرانها تجلس بالحوش وماتدخل داخل وهم بالتالي يحترمون رغبتها ويقدرون ظروفها"...
×× أم الذيب حرمه كبيره بالعمر وعايشه في بيتها اللي بجنب بيت أبو سطام بلحالها..
مايعرفون الناس شي عن حياتها ولا يعرفون حتى أسمها لدرجه إنهم ينادونها(أم الذيب).. عشانها متأثره بوفاة زوجها من 20 سنه
تعتبره سندها بالدنيا ودايم لما تتكلم عنه تقول: <الذيب> والناس إحترامآ لها يسمونها
,,,, ولأن ماعندها إلا ولد واحد بالعقد الثاني وقاطع فيها ومايسأل عنها إلا بالمناسبات البعيده وهي ماتحب تذكره ولاتذكر أسمه!!!
صاروا الناس ينادونها
.. وهي تحب هالأسم كثير وتعودت عليه وأشتهرت فيه ××..
أم الذيب: عبدالعزيز إذا تزوج يسكن بسكاكا وإلا بالرياض..
أم سطام: أكيد بسكاكا عشان دوامه..
أم الذيب: وإنتي ليش ماتزوجين ولدك سطام؟
"أم سطام بضيق": والله إني ماقصرت معه كلما شفته فتحت له سيرة الزواج بس هو رافض ومثل مانتي عارفه مطلق مرتين والعيب منه ويقول مابي أظلم بنات الناس معي ..
من طلق زوجته الثانيه العام اللي ماجلست معه إلا سنتين وأهلها طلبوا الطلاق لأنه مايضني (عقيم),, والناس الله يهديهم مالهم سالفه إلا سطام وحريمه اللي طلقهن ..
الأولى راحت بنصيبها وربي رزقها بعيال والثانيه أنشاءالله يجيها ولد الحلال اللي يسعدها ويريحها..
أم الذيب: ماعاد بقى بالناس صبر ياأم سطام.. وين الرجال اللي يصبر على زوجته لو فيها عيوب .. وين الحرمه اللي تصبر على زوجها لو فيه عيوب وتحفظ أسرار بيتها..
الذيب الله يرحمه كان يوصيني وصاه ويقول؛أحفظي أسرار بيتك عن الناس ترا السر إذا ثقل بصدرك وعلمتي فيه راح يثقل على غيرك وينشرونه بينهم والكل بيعرفه..
"تنهدت وهي تترحم عليه" الله يرحمه ويسكنه بجناته..
أم سطام: صادقه ياأم الذيب مافيه صبر .. سطام موكل أمره لله وراضي بقدره وأنشاءالله ربي يفرج همه ويفتحها بوجهه..
أم الذيب: عمامكم اللي بالقريات ليه مايجون للرياض؟
"أم سطام وهي تقرب لأم الذيب عشان تبعد عن جهة الشمس اللي حرقت ظهرها": على أساس أن العم سعد بيجي من أمس ويجيب بنته لأنها بتدرس بالجامعه بس صارت له ظروف منعته وأحتمال بكره يجي..
أم الذيب: بنته بتدرس بجامعة بنتك؟؟
أم سطام: لأ تدرس بجامعة ثانيه..
أم الذيب: ليه مادرست هناك عند أهلها ..؟؟
أم سطام: عشان نسبتها كبيره تبي تدرس بقسم ينفعها لاتخرجت ..
أم الذيب: طيب وين بتسكن؟؟
أم سطام: عندنا بالبيت لأن مالها أحد بالرياض غيرنا..
أم الذيب: أبو سطام وش كثر أخوانه وخواته..؟
"أم سطام وهي تمسح بيدها العرق اللي على وجهها من حرارة الشمس": أخوانه أثنين كلهم بالقريات وخواته أثنين وحده بالجوف ووحده بتبوك..
"دخل فارس الحوش وهو ماشي بأتجاه باب مدخل البيت ألتفت ولقى جدته جالسه مع جارتهم وطبعآ أم الذيب ماترمي البرقع عن وجهها أبدآ سواء قدام الحريم أو في بيتها عشان كذا فارس مارجع وأستحى منها
لأنه متعود على زياراتها لهم بهالوقت وجلستها بالحوش"..
-: السلام عليكم.. شلون صحتك خاله إنشاءالله تمام؟
أم الذيب: هلا وليدي الله يسلمك ويحفظك ويعطيك الصحه والعافيه..
"أم سطام وهي مستغربه": وش مرجعك هالوقت الساعه عشره الحين..
فارس: أعذريني جده أنا مارحت للمدرسه وآسف لأني ماعطيتك خبر..
أم سطام: وليه مارحت إنت تعبان وإلا صايرلك شي؟؟
"فارس وهو يحط يده فوق عيونه يحتمي من الشمس": مافيني إلا العافيه بس ضايق صدري وحبيت أغير جو. . تمشيت شوي بسيارة جدي وألحين رجعت..
أم سطام: جدك يدري إنك ماداومت؟
"فارس بملل": جده الله يخليك أحرقتني الشمس تعالي نكمل حكي داخل..
"دخل بدون مايشوف ردة فعل جدته اللي إنحرجت منه وكأنه يقول لأم الذيب:روحي بيتك..
بس أم الذيب ماأنتبهت ولافكرت بكذا و قامت وهي تعدل عباتها"..
أم سطام: بدري ياأم الذيب وين رايحه..
أم الذيب: نعست وأبي أنام لي ساعه لأني أصحى من صلاة الفجر ..
^^^^^^^^^^^^^^^^^^^^^^
بعد مارجع عمر من دوامه وقف سيارته عند أقرب سوبر ماركت بالحي ونزل عشان يشتري أغراض لأهله..
أخذ عربه مشى لجهة الزيوت وطلع جواله وأتصل على أمه": يمه وش نوع الزيت اللي تبينه؟؟......... فيه أنواع كثيره بس قلت أسألك أول يمكن فيه نوع معين متعوده تستخدمينه بالطبخ؟؟
......... يعني أجيب أي شي؟؟.... طيب فمان الله....
أخذ ثلاث علب وحطها بالعربه و حس بأثنين واقفين وراه بمسافه "اكيد واقفين يشترون" كان هذا تفكير عمر وهو يمشي بدون ما يناظرهم ..
راح لجهة ثانيه وأخذ كرتون معجون طماطم وكيس ملح وألتفت وهو يدف العربه لقى الشباب يناظرونه بتفحص.. مشى وتعداهم ووقف عند السكر وأخذ كيس وراح يحاسب"..
"وقف بجنبه الشاب وقال بإستهزاء": الجامعه نستك أيام الثانوي يابو عمير..!!!!!!!!!
"تكلم صديقه بإستهزاء أكثر": أجل الوظيفه بالمستشفى تخلي الواحد حلو ونظيف لدرجة النسيان..
"ناظرهم عمر بنظرات متقطعه وصد وهو معطيهم ظهره وقال بأستهزاء": لدرجه أنكم تعرفوني وانا ماقد مرت علي اشكال حلوه مثلكم؟
"عصب الشاب من اسلوب عمر حط ايده على كتف عمر بقوه ودار جسمه لجهتهم": آآآآآفا ناسي والا تتناسى!!
"بعد عمر يده من كتفه وتكلم بملل وهو من النوع اللي يحب الهدوء ويكره المشاكل والمشاحنات": احسبها مثل ما تبي واختصر لأن ما عندي وقت أضيعه معكم..
"ألتفت الشاب لصديقه وهو يضحك":ههه للحين وقتك محسوب ياشاطر ذكرتنا بأيام المدرسه من جد وجد ومن زرع حصد..
"قرب صديقه لعمر ووقف قباله وهو يشيل الكاب من رأسه بحركه قززت عمر وقرفته من أشكالهم وقلة نظافتهم وأسلوبهم الهمجي معه": لا يضيع صوتك يالخك... وإلا بلاش اقول لأن ما نبي نزعلك شكلك حساس ورقيق..
"دفه عمر بقوه وهو يبعده عنه وقال بصوت عالي": ألزم حدودك لا تخليني أتصرف معك تصرف ثاني الظاهر أنك تكره الأحترام لأنك أساسآ مو محترم نفسك..
"تلفت الشاب يمين وشمال وشاف الأصوات هدأت والكل يناظرهم.. أنقهر من عمر وقرب وهو يقول بصوت واطي ومسموع": أنا أعلمك الأحترام بس خلني أشوفك أنت وصالح ,,
وصالح بالذات ناوي عليه لأن مابعد أخذت حقي منه.. سلم عليه وقله الوعد قريب...
راحوا الشباب وهم يتمايلون بمشيتهم وأستغرب عمر من تصرفهم معه لأنه مايعرفهم أبدآ ولايتذكرهم بس التحذير لصالح معناته هذولا الشباب من ضمن اللي لهم مشاكل قديمه مع صالح بس ليش يبون يرجعون لها؟؟ وش السبب..؟؟
##########################
وفي المساء...
دخل سطام الصاله وهو مستعجل ولقى فارس جالس يطالع الTV وسأله عن أخوه سعد..
"فارس وهو يمسك الريموت ويخفض الصوت": أيش؟؟؟؟
"سطام بصوت عالي": سعد .. سعد .. وينه؟
"دخل سعد الصاله وهو يشرب ديو": هذا أنا..
"ألتفت عليه سطام": يالله قدامي بسرعه عالحلاق..
"تفاجأ سعد": ليه؟
"سطام وهو يناظر بساعته": أنا عندي موعد ضروري بعد نص ساعه و(ليه) تأخرني عن الموعد لأن جوابها تراح تلقاه عند الحلاق مافيها شي لو صبرت دقايق..
"سعد مافهم شي من الكلام و أرتبك من وقفة سطام قباله لأنه يخاف منه أكثر من أبوه ويدري إنه هو المسؤول عن البيت كله": سطام أنا شعري مو طويل حتى شوف ..
"سطام وهو يقنعه": سعد أنا يهمني إنك تكون محافظ على قوانين المدرسه وماتتجاوزها وشعرك من ضمن القوانين وأنا منتبه لك من أمس الصباح بس ماحصلت وقت فاضي إلا ألحين ..
أسبقني للسياره بدون أي تعليق لأنك ماراح تغير رأيي..
"طلع سعد من الصاله وهو مقهور.. مشى سطام لجهة الباب وفجأه وقف وألتفت على فارس لقاه جالس قريب من الTV‏ ومقدم راسه شوي يحاول يسمع لأن لما دخل سطام خفض الصوت"..
"سطام وهو يقرب لفارس ويحاول يكون طبيعي قد مايقدر ويناقش فارس بهدوء عن سبب غيابه عن المدرسه اليوم لأن مايبي يقسى عليه": فارس ليش ماداومت اليوم..؟
"ما رد فارس وكان مندمج مع المسلسل وتوقع إن خاله وقف عشان يناظر معه"..
"سطام بصوت عالي": فارس .. فارس..
"ألتفت فارس وبسرعه أبتسم وهو يكتم الصوت بالريموت": هلا خالي..
سطام: ليش ماداومت اليوم..؟
فارس: كنت تعبان رأسي مصدع حيل لأني أمس نمت كثير وحسيت بالكسل لما صحيت و..غبت..
سطام: وليش ماعطيتني خبر من قبل عشان أخذك للمستوصف ويعطونك عذر طبي بدل ماتنقص درجات بالمواظبه..
"فارس وهو يناظر الأرض": نسيت..
"سكت سطام وهو يتأمل بتعابير وجهه فارس وحس إن تعبه نفسي مو جسدي"..
سطام: إنت متضايق من المدرسه اللي إنت فيها؟
"رفع راسه فارس وجاوب بتعجب": بالعكس مرتاح كثير.. ليه إنت شايف فيها شي مو زين؟
سطام: لأ بس أستغربت غيابك أمس واليوم وقلت أكيد إنك ماتأقلمت فيها للحين لأن نقلناك من الحكوميه للأهليه..
فارس: أمس عندي موعد واليوم تعبان وبكره إنشاءالله راح أداوم للمدرسه ومره ثانيه راح أعطيك خبر قبل أغيب ..
سطام: طيب أنا طالع توصي على شي أجيبه لك وأنا راجع؟
فارس: لأ سلامتك..
"طفش فارس من المسلسل وقام وهو يطفي الرسيفر والTV. وراح لغرفة وتين وضرب عالباب بهدوء لكن ماردت وتين_ فتح الباب ولقى الغرفه ظلام والمكيف تشتغل ..
قال بخاطره: نايمه!! متى تصحين ياوتين صاير نومك ثقيل ماتصحين إلا متأخر وتروحين للكليه مواصله ولا أشوفك أو أجلس معك..
راح فارس يتمشى بالبيت وكان فاضي مافيه غيره موجود.. دخل الدوانيه وكانت مره حايسه وفوضى لأن صالح وعمر من شوي طلعوا منها ..
جلس وهو يسحب جريدة الرياض من مجموعة الجرايد الموجوده "الحياة والجزيره والشرق الأوسط والرياضيه" ..
عقد حواجبه بتعجب وهو يشوف خط عمر مكتوب بأول الصفحه وكان كاتب:
حتى الجفا منك ولعني وحبيته..!!
"قلب الجريده وكانت الصفحه الأخيره كلها تهنئه بس عمر ممليها قصايد":
خليت قلبي معك.. والله يصبرني
مبطي وأنا أقول/ قلبي وين خليته..؟؟
صحيح اني أجوعك .. بس طبعي أكره التبذير ..
تعآآآل .. وهات لي كاسة حنين وكسرتين أنفآس..
لآ طروآ أسمك .. تآكد .. كل خير أتمنى ..
يكفي إني لاذكرتك .. هزني مليون طآري...
أحبك ..
وأستحي منك ..
ولا أدري وش أسوي بك..؟؟؟
"تعجب فارس من القصايد وتساءل بينه وبين نفسه": وش قصته عمر دايم يكتب قصايد على أي شي يشوفه قدامه؟
عاد عمر حيل خجول ولو أبي أشك إن فيه إنسانه بحياته مافيه دليل لابتصرفاته ولابأخلاقه ولا حتى تفكيره..؟
بس أكيد إنه يفتح قلبه لصديقه صالح _ وحتى لو كان خالي صالح مايهتم بالسوالف هذي لكن هذا مايمنع إنه يكلمه عن الإنسانه اللي بحياته...!!!

"صالح بإنفعال": توك تتكلم ياعمر!!!! من شوي جالس بالدوانيه وتكتب قصايد وأشعار وأنا مثل الأهبل قدامك ومافكرت تقول لي .. ماهقيتها منك ياعمر والله ماهقيتها منك..
"عمر وهو يحاول يهدي من أنفعاله": ياخي لاتعطي الموضوع أكبر من حجمه ترا مايسوى إنك تتوتر وتنزعج..
صالح: وشلون ماأعصب وإنت ماقلت لي إلا متأخر ..
عمر: ترا السالفه صارت اليوم الظهر وين التأخير بالله عليك..
صالح: طيب أوصف لي أشكالهم كيف صايره.. ما عرفتهم هذي خلصنا منها مع إني شاك بثلاث شباب بس أوصفهم أبي أشوف هم اللي ببالي وإلا لأ.. وإذا هم ياويلهم ألحين يبون يفتحون صفحات قديمه؟؟
"عمر وهو يحاول يوصفهم": واحد أطول مني وأسمر وشعره لتحت أذانه ولابس ثوب أبيض وكاب..
"صالح وهو يضرب يده براسه": ياثور لاتوصف لبسه يعني بحياته مابدل ملابسه عشان أعرفه من ثوبه!!!
عمر: عاد أنت ركزت عالثوب وتركت شكله خلاص اشطب ثوبه..
"صالح بتوتر": شطبت .. كمل..
"عمر يعرف أن صالح متهور وإندفاعي ومتمرد وإذا حط شخص برأسه مستحيل يشيله وخصوصآ إذا الشخص حاول يأذيه وموقف الشباب مع عمر بالبقاله أشاره تحذير لصالح..
رجع يوصف أشكالهم": الثاني قصير ونحيف وملامحه وجهه بارزه حيل يعني خشمه طويل وفمه كبير و أسنانه متقدمه شوي.....
"صالح وهو سرحان": لحظه لحظه عمر عرفتهم!! الثاني أتذكره عدل كان معنا بثالث ثانوي والأول يصير ولد عمه بس مو معنا بالمدرسه..
عمر: طيب أنا ماأتذكره مع إنه معنا بنفس المدرسه..
صالح: إنت ماتتذكر إلا كتبك وفصلك وأساتذتك ومدير المدرسه اللي كلما شافك قال؛ يابني لاتحتك بصالح عشان مايفسد أخلاقك .. فسد عليه أبليس حياته هالخبيث ترك المدرسه كلها وتوحد فيني..
"أنفجر عمر وهو يضحك": ههه مايدري إننا متربين سوا ومانفترق عن بعض إلا بالمدرسه لأنك أدبي وأنا علمي ..
"صالح وهو يقوم": ولو يدري إنك دخلت الجامعه كان حطك على راسه تراه يقدس الدوافير حيل..
"عمر وهو رافع رأسه ويناظر صالح بتعجب": وين رايح بدري خلنا جالسين بالمقهى شوي..
صالح: أبروح للمخيم مع صديقي أبو عطا عشان أتطمن على السلق..!!
عمر: طيب ماقلت لي وش راح تسوي مع الشباب؟
صالح: أبشوف أبو عطا وأتفق معه وأرد لك خبر أنا عندي أحساس أني بلاقي هذا أبو ضروس بمكان بس وين ومتى.. ما أدري بس لقانا بيكون حار..
عمر: ههه حلوه ذي أبو ضروس..
صالح: وش رأيك تروح معنا للمخيم؟
"عمر وهو يوقف ويحط جواله بجيب ثوبه":أبرجع للبيت لأن وراي دوام.. وصلني بطريقك وسلم لي على السلق (صدفه و رداد) ..
صالح: يوصل..
"صالح بطبيعته يظهر إهتمامات لشي معين لفتره قصيره ويعطيها أغلب وقته_ و هواية صيد السلق هوايه غريبه شوي وصالح حبها كثير وصار عنده خبره بأنواعها وأشكالها وأماكن تواجدها
ويطلق عليها أسماء من عقله وبعد فتره قصيره يلقاها تعودت عليه وتطيعه وتنفذ أوامره"..
**********************
الساعه 12,30 بالليل..
صحت وتين من النوم وطلعت من غرفتها وراحت للمطبخ تحط لنفسها أكل .. بس مالقت شي يسد جوعها.. طلعت من المطبخ ودخلت الصاله لقت أبوها جالس يكلم بالجوال جلست عنده وانتظرته لما خلص مكالمته"..
"أبو سطام وهو مبتسم": هلا بنتي هلا.. من شوي أسأل أمك عنك..
"وتين وتحاول تبتسم": هلا فيك يبه شلون صحتك إنشاءالله تمام..
أبو سطام: بخير الحمدلله.. أنتي توك صاحيه؟
وتين: إيوه لأن نومي مخربط من أرجع من الكليه أنام وما أصحى إلا متأخر..
أبو سطام: مايصير كذا يابنتي لازم تعدلين نومك ..
وتين: أكيد..
أبو سطام: جهزتي غرفتك لبنت عمك؟
وتين: بكره راح أعزل لها الكبت حقي أبآخذ جهه وبعطيها الجهه الثانيه..
أبو سطام: والسرير؟
وتين: تنام بالأرض..
أبو سطام: لا مايصير النوم بالأرض يتعبها.. بكره العصر إنشاءالله آخذ أمك لمحلات الغرف وتختار لها سرير حلو يريحها ويعجبها..
"توهقت وتين": بس غرفتي لونها وشكلها واحد آخاف ما تلقى سرير نفس الشكل..
أبو سطام: عادي هذي غرفة نوم مو غرفة أستقبال ومحد راح يدخلها إلا أنتي وبنت عمك..
"وتين كانت جوعانه ومالها نفس تتكلم عن بنت عمها والغرفه": يبه.. أنا جوعانه أبي أطلب من المطعم..
أبوسطام: ليه تطلبين من المطعم أكلهم ما ينذاق..شوفي الثلاجه مليانه خضره وفواكه روحي سوي لنفسك طبخه تشبعك بدل أكل المطاعم المعفن!!!!
"وتين عرفت أن ما فيه مجال للنقاش مع أبوها وخصوصآ إن مايحب إلا طبخ البيت وهي ماتعرف تطبخ أبدآ..
...... (أندومي.. مافيه غيره) قالتها بإستسلام وهي رايحه للمطبخ...
بأقل من عشر دقايق صارت الأكله اللي ماتعرف تسوي غيرها جاهزه.. سحبت الجريده اللي عالطاوله وحطتها تحت الصحن وجلست بالأرض وهي تآكل بسرعه..
فجأه!! نزلت الملعقه على الصحن وهي مصدومه من اللي تقرأه,,
خط يده ومشاعره تعرفها من زمان بس ماتعرف إن الجرايد صارت متنفس جديد له,, من متى؟؟؟؟؟؟؟؟.."..
©يامن سكنت أجمل زوايا كياني..
ياما على نفسي (عشانك) تحملت..
عشان ماضيك الجميل،، و(عشاني)..
حاول تشيل من الوفا ربع ماشلت..!!©
********************************
يوم الأثنين:
11 شوال...
×× أوفياء,, لكن,, بشكل آخر..
نحمل الماضي الجميل بقلوبنا,, لكن,, بشكل آخر..
نتحمل موت الكلام بشفاهنا,, لكن,, بشكل آخر..
((بشكل ممزوج بحيره وخوف))..!!
لايقبل القول والأعتراف..!!
متمسك بالصبر والأنتظار ..!!
إلى أن يقول (القدر) كلمته ومن ثم نقول كلمتنا..
حتى ولو لم نرضى .. لأن هذا قدرنا.. وهذا أنا الآن.. وذاك هو (((غلاي))) ××
"ألتفتت لما سمعت تطبيل عالباب وصوت يناديها أبتسمت لاشعوريآ وهي تقول": ماتترك حركاتك يافارس..
"فتح الباب بقوه وكان لابس ثوب أبيض وحاط شماغه على كتفه وشايل كتبه بيده": صباح الخير...
"ضحكت وتين وهي وتقرب له": صباح الورد..و الله أشتقتلك..
فارس: واضح هالشوق والدليل يومين راحت وماسألتي عني..
وتين: متأكد إني ماسألت عنك..؟
فارس: لأ الكذب خيبه إنتي سألتي عني بس ......
وتين: لا تبسبس وبعدين أنا خالتك وأكبر منك يعني أنت تسأل..
فارس: المهم مانبي نضيع وقتنا نتشره على بعض_ قولي شخبار الكليه؟
وتين: خلنا من الكليه وقولي شخبار سمعك....؟
"فارس وهو يصر على أسنانه": خلينا من سمعي لاتعكرين مزاجي على هالصباح الحلو..
"وتين بشك": فارس لايكون سويت مثل كل مره تمسك الجهاز وتتعمد ماتضغط لما تسمع الصوت؟ ترا أعرف عنادك وتطنيشك لأن أبوي يقول إن سمعك صاير ضعيف..
"فارس بلا مبالاه": سويتها وإلا لأ.. راح يعيد الدكتور نفس الكلام ولاتنسين إني بمره من المرات سويتها وقالي الدكتور بعد ماشاف ورقة التخطيط/ برافوا سمعك متحسن كثير..
وتين: إنت تضحك علي وإلا على نفسك..
فارس: أضحك على الدكتور..
وتين: أوف منك حاط حرتك بهالدكتور مدري وش تبي منه..
"صرخ فارس بإستهبال": أبي علاج والله مابي غيره إنتي تحسبيني أكرهه؟ بالعكس أموت فيه بس خلي يعطيني حل ووعد مني ماأوريه وجهي..
"وتين وهي تسد أذانها": فجرت أذاني بصوتك يادب يالله فارق وبس أرجع من الكليه لنا تفاهم ثاني..
"فارس وهو يضرب الباب بيده بقوه ويسوي تحيه لوتين": فمان الله أشوفك بالليل وإن لقيتك نايمه أج...... وإلا لأ .. ماراح أقولك \وش أسوي بس حركه تكرهينها..
"وتين بزعل": إن طفيت المكيف والمروحه وسكرت الباب بالظلمه أزعل عليك لأني أختنق وأموت.. وإنت وضميرك عاد..
فارس: سلامة قلبك وروحك بس أصحي بدري عشان ماأتهور وأسويها..
##############
"طلعت وتين من البيت وركبت الباص وهي تحط الشنطه بحضنها .. تم واقف الباص ثواني لما تجلس وتين بمكانها
وأغلب الباصات كذا ينتظرون الطالبه لما تجلس وترتاح وبعدها يحرك.. أما البعض الآخر حدث ولاحرج من تسكر الطالبه الباب دعس بنزين بقوه ومايسمع إلا صوت الضربه بأرضية الباص
"لأن البنت تسدحت بين الكراسي وشنطتها فوق راسها"..
إلتفتت على الشباك المغيم بأسود وفتحت الستاره وبلمت لما شافته!!!!!!
"كان واقف عند سيارته وإيده على يد الباب بيفتحه بس لما شاف الباص يتحرك من بيت جيرانه تجمد بمكانه وتم معلق نظره بالباص بدون مايحس لأن النظارات الشمسيه سترت على عيونه
وتغييم الباص عطاه شعور بالأمان,, أنتبه لنفسه وفتح الباب ودخل السياره وتعابير وجهه مافسرت أي شئ لوتين"..
ناظرته وتين بضيق وهي تتنهد،، مو تنهيدة (حب) إلا تنهيدة (تعب) تعبت من تأنيب ضميرها معه,,
خمس سنين محروق بنارها وصابر على جفاها,,
وهو اللي أجتهد ودرس عشانها,,
وتوظف وأستقر عشانها,,
وأنتظر منها (أهتمام وصدق وعطف وتفهم) لكن!!!!!! مالقى إلا كلمة (أخوي) تعبر عن بالغ شكرها وتقديرها له...
ماينلام عمر إذا قرر يواصل نجاح و انجاز في حياته,,
وماينلام إذا قرر يوقف حب و غرام في قلبه،،
لأنه مصدوم من نفسه قبل ما ينصدم منها وحس بشعور الفشل بأنه عجز يكسبها ،،
وهذا أصعب شعور ممكن يعيشه الرجل ،، لما (ينجح) ويكسب كل شي.. ولما (يفشل) ويخسر شي .. ويكون اللي (خسره) أغلى من كل اللي كسبه.....
&&&&&&&&&&&&&&&&&&&&&&&&

: فتَو فتَو تعالي بسرعه شوفي وش كاتب عالورقه اللي عالمكتب؟؟؟؟؟
"قربت فاتن وهي حاطه إيدينها بجيب البالطو الابيض ومغطيه انفها وفمها بالماسك الأخضر وتقرأ بهمس":
!!!
.....مين اللي كاتب هذا..؟؟
"درر بأرتباك وهي تناظر للباب وترجع تناظر بفاتن": أكيد هو هذا مكتبه وبعدين انا كم مره أدخل غرفة الأشعه وألاقيه يكتب على ورق..
"فاتن بحيره": وش قصده..؟ بصراحه كلام غريب..
"درر وهي تجلس عالكرسي وتفكر": تهقين شئ بالقلب.. يعني أعجاب بوحده مثلآ .. أو... يحب وحده وتزوجت غيره وكره حياته من بعدها..
"ضحكت فاتن وهي تسند جسمها عالطاوله": ههه انتي تفسيراتك جاهزه .. عاد مالقيتي ألا عمر يهيم وألا يعشق مو باين عليه أبدآ ولو ابي أشك ماألاقي دليل أحسه يمشي جنب الحيط من الأدب والتأدب!!!..
درر: هذا اللي علقني فيه شخصيته جامده وغامضه مايآخذ ويعطي مع الدكتورات والمساعدات..أسلوبه كلمتين وبس إذا بغى شئ.. يناظر نص نظره حتى مايكملها ..
وأنا وأنتي مع اننا طالبات أمتياز وصارلنا شهرين يعاملنا مثلهم لو ابي أستفسر عن شئ أتعلم واستفيد من التدريب هنا مافيه نسأل صديقه الدكتور رمزي ولا نسأله ..
فاتن: أقول ياشاطره خلينا ندور على عمر نساله عن الكمبيوتر خذتنا السوالف والمريضه تنتظر..
"قامت درر وهي تتنهد وترجع تقرأ الورقه": آآآآآه خطه حلو يشبهه.. ياجعلك تكسب اللي خسرته يارب ياكريم..
"فتح عمر الباب وهو مبتسم ويسمع د/رمزي وهو يحكي بحماس.. رفعت درر رأسها من الورقه وألتفتت للباب بأرتباك ,, بعدت هي وفاتن عن الطاوله وهم يناظرون بالأرض وأنتبه لهم عمر أستغرب من وجودهم بالغرفه"..
"أبتسم د/رمزي وهو يناظرهم": كيف حالكم يابنات انشاءالله كويسين..
"ردوا بصوت واحد درر وفاتن وهم يمشون لجهة الباب": الحمدلله ..
"عمر وهو معطيهم ظهره ويقرب للمكتب": بغيتوا شي؟؟
فاتن: عمر كنا ندور عليك بنسألك عن الأشعه إذا ك .....
"سكتت وهي تناظر بعمر اللي جلس على المكتب ومسك الماوس حق الكمبيوتر ولا كأن حد يكلمه .. أنقهرت من تصرفه بس د/رمزي تدارك الموقف": أش تبغي يافاتن أسأليني أنا بالخدمه ..
"فاتن كانت تناظر عمر اللي حاط كوعه عالورقه وخده بوسط كفه .. ماأنتبهت لرمزي وهي تنبهه عمر يسمعها": لو سمحت عمر ممكن تسمعني..؟؟
"مارد عمر .. وتكلم رمزي": معليش عمر تعبان شوية وماهو مركز معاكي تبغي حاجه..؟؟
"فاتن وهي تحط أيديها بجيوب البالطو": بنسوي (أو.بي.جي) لمريضه عند الدكتور/تيم والاشعه مااشتغلت معنا..
"تكلم عمر بدون مايناظرهم": عطلان من أمس ولسه ماصلح..
"فاتن تبي تستفز عمر": طيب يعطيك العافيه د/ رمزي..
"مسكت فاتن يد درر وطلعوا من الغرفه وهم معصبين من عمر اللي بنظرهم (نرجسي)!!!.. ألتفت د/رمزي على عمر": اشبك يارجال معصب كده ياساتر لأنو دخلو المكتب وأنتا برا مش موجود.. دولا كانو يستخدموا ال.........
"قاطعه عمر ": قاعدين يتعبثون بأوراقي.. أنا طلعت مستعجل للدور الأرضي ونسيت كل شئ وراي على أساس أني ما راح أتأخر..
د/ رمزي: وتعبثوا!! أنتا مالك خصوصيه أبدآ في هادا المكتب إلا الأوراق اللي تفضفض عليها مشاعرك يوم ورا التاني.. خواطر وأشعار ما حيفهموا منها حاجه..
أنت ماكتبت (احبك) يا (وتين) عشان تنزعج من عبثهم؟؟
"أبتسم عمر أبتسامه عريضه لما سمع أسم (وتين) أرتخى بالجلسه وهو يحط رجل على الثانيه"..
"د/رمزي وهو يغمز بعينه": أيوه أيوه بالك مشغول فيها وتنتظر حد يجيب سيرة حبيبة القلب.. وأنا أفكر ليه عمر مزعوج كده؟؟
"عمر وبعد لحظة صمت": شفتها الصباح وهي راكبه باصها .. تصدق يارمزي حسدت الشنطه اللي شايلتها بيدها لأنها تلمس أيدها ,, حسدت الأرض اللي تمشي عليها من هيبتها ,, حسدت الباص حسدت صديقاتها .....
كلهم قريبين لها إلا أنا...!!!!!!
د/رمزي: هيا لسه تكابر فمشاعرها..؟؟
عمر: ما أفهمها يارمزي ولا أعرف وش تفكيرها بس أهم شي أن ما فيه أنسان بحياتها وهذا اللي مطمني..
د/رمزي: أصبر عليها وأنسى لأنو الحاجه إذا تبغاها تيجي لازم تنساها وهيا توصلك وأنتا ماتكون متوقع أبدآ وحتتأكد بنفسك أنو كلامي صح ..
عمر: أنا ناسي ومطنش مشاعري من فتره بس لما شفتها الصباح فز قلبي وما أدري وش صارلي..
د/رمزي: أنشاءالله الجايات أكثر المهم أنك تكون مبسوط بوجودها بحياتك.. الأنسان يكون قبل الحب شي ,,ووقت الحب شي ,,وبعد الحب ولا شي..
وأحلى حاجه فالدنيا هوا وقت الحب تخلي الأنسان العادي شاعر والشاعر يصير مجنون..
"ضحك عمر": ههه ياحليلك يارمزي والله اني أرتاح لما أشوفك بس عشان أتكلم وأطلع اللي بخاطري عنها بدون قيود وحواجز و انا ممنون لك لأنك تسمعني وتفهمني ..
د/رمزي: لا تقول كده أحنا أصحاب وحبايب ,,طيب أبغى أسألك سؤال صغير/ إيش معناة أسمها هادا (وتين) مره غريب عليا؟؟
"عمر وهو يعدل جلسته ويأشر على قلبه": معناه موجود هنا .. وتين (عرق بالقلب) إذا أنقطع يموت الأنسان..
"ضحك د/رمزي": ههه ياساتر لا تنقطع عنك وتموت علينا...
©..طاحت النجمه وأربكت ركب السحاب
وساحت يوم طاحت من حرارة كلمتين..
قلتها يوم عينك صوبت قلبي وصاب
قلتها يوم (فز قلبي).. وياعسى ربي يعين..
ياسهوم الموت قلبي طالبك فك الرقاب
أرحم اللي شاف موته من زود حبك موتتين..
بسألك يانور عيني وطالبك رد الجواب
ليه قلبك ياغناتي بإحساس قلبي مستهين..؟؟
إيه ((احبك)) .. قلتها و يا عسى خاطرك طاب
بالحيل أحبك ياعذابي من سنين يا (وتين)..
لو تغيب العمر كله بتبعك لو إنك سراب
ولا ادري في حياتي انتي وين وأنا وين..©
%%%%%%%%%%%%%%
وفي بيت أبو سطام ...
كانت وتين بغرفتها واقفه وتتأمل بضيق..
هي من النوع اللي تعشق غرفتها وتعتبرها مملكتها الخاصه.. وتهتم فيها أكثر من أي شي ثاني بحياتها ..
مملكتها الخاصه اللي من اليوم بتصير عامه وراح تضطر تآخذ حذرها على أشياءها الخاصه وأسرارها وتحرص تخفيها عن بنت عمها لأن العلاقه بينهم رسميه ولازم ماتعطيها الثقه من البدايه
لما تتعرف على شخصيتها عن قرب وتكشف الوجه الآخر لها بعيدآ عن الرسميات...
قربت لسريرها ترتبه ورفعت رأسها تناظر بالسرير اللي أشتراه أبوها لبنت عمهااليوم العصر مع أمها,, كان ملاصق لسريرها ولونه أصفر وواطي مره يعني مو نفس حقها كبير وعالي،،
والمفرش لونه بصلي ومفروش بشكل عشوائي مو مرتب لأن أمها حطتها مستعجل قبل ماتوصل بنت العم سعد..
"تنهدت وبخاطرها": صار شكل الغرفه يحوم الكبد .. ياه والله ما أتحمل أناظر فيها .. بس على قولة بابا (غرفة نوم ومحد بيدخلها غيرنا) ..
المشكله أنها بتجلس عندي أربع سنوات ملازمتني 24ساعه اللهم بالأجازات بتروح لأهلها.. أهلها..... لا..... أكيد من اليوم راح أصير كتاب مفتوح قدامهم وأنا قبل كنت أحاسب نفسي على كل كلمه وحركه تطلع مني لأنهم يخوفون!!!!
هم من اللي يمسكون عالواحد مسكه ومايرحمونه كلهم كذا..آآآآآآآه الله يصبرني!!
"قطع تفكيرها فارس وهو يفتح باب الغرفه": ههه..
"وتين أنقهرت منه وعرفت أنه يضحك على شكل الغرفه":فارس لا تضحك ترا والله أزعل؟؟
"فارس وهو مازال يضحك": أما ذوق جدي شي!! السرير أصفر والمفرش بصلي وغرفتك كله عودي صار كوكتيل.... ههه..
"وتين وهي حاطه إيدينها على خصرها وتدافع عن نفسها": إيه هذا من القهر لأن ماعندك غرفه لحالك..
فارس: يعني إنتي اللي غرفتك لحالك.. ترا بنت عمك جالسه تنتظرك بالمجلس ومجهزه شناطها وكل وحده أكبر من الثانيه..
"وتين وهي تمسح راسها بتوتر": طيب جايه بس أبدل ملابسي وأطلع..
"فارس وهو يقرب لها": ليه تبدلين ملابسك إذا هي من اليوم ورايح بتشوفك بكل حالاتك سواء كاشخه وإلا لأ....
"وتين بضيق": وأنت الصادق.. بس لازم أكشخ وأستقبلها بحراره وحماس عشان ماتروح تقول لأهلها؛ أستقبلوني ببرود وكأنهم مايبوني!!
"فارس بتعجب": لهالدرجه هي زعول وتتنقد؟؟ إذا هي كذا أجل الله يكون بعونك...
"وتين بحيره": أتوقع تسوي كذا,, تبي الصراحه أنا ماأعرف طبعهم بالضبط ~أقصد بنات عمامي~ بس اللي أعرفه أن عندهم حواجز كثيره ومافيه حريه وثقه من أهلهم وحكرين شوي..
يعني ما عندهم مثل اللي عندي ~حريه وثقه ودلال~ عشان كذا أنا خايفه.. وبعدين أنا جربتهم لما أختلطت فيهم اللي (عادي) عندي هم يعتبرونه (عيب)..
فارس: سبحان الله.. فرق كبير بين جدي وبين أخوانه..
وتين: وبين أخواني وعيال عمي!!
"فارس بذهول": تصدقين ولد عمك مشعل جالس مع الرجال بالدوانيه ومايسولف إلا عن نفسه وبثقه بعد واحس نظراته قويه يعني إذا تكلم مع أحد يشككه بنفسه..
وتين: ههه أما عليك وصف يضحك!!...
فارس: وأحس له شخصيتين .. مع أهله شي ومع الناس شي ثاني..
"سمعت وتين صوت أمها تناديها.....": هذي أمي تنادي أكيد طولت على البنت وماطلعت أسلم عليها.. أخذتنا السوالف ومابدلت ملابسي لسه والله فشيله ..
"فارس وهو يتلفت": أبي أودع غرفتك هذا آخر يوم أدخلها.. يا القهر ماعاد أقدر أطبل عالباب كل صباح وأصحيك ولا أقدر أجلس فيها وقت ماأبي.....
"وتين وهي تفتح الكبت بسرعه": فارس لاتعور قلبي ..
"فارس بإستهبال": عطيني حاجه أتذكرك فيها..
"وتين وهي تطلع البدله من الكبت وتقاوم الضحكه": والله إنك رايق روح للدوانيه ولا تعطلني..
********************

وفي الدوانيه..
"صالح وهو واقف ويصب قهوه لعمه أبو مشعل": تصدق ياعمي بخاطري أسافر للشمال يمدحون السلق هناك..
"ضحك عمه وهو يآخذ الفنجان": حياك بيعجبك الصيد بالجو الحلو البراد والعشب والخضار ..
أبو سطام: عندك أثنين ياصالح ليه تبي أكثر؟؟
"صالح وهو يمد فنجان القهوه لأبو عبدالعزيز": أبي أصيد وحده لعمر هديه مني له..
"ضحكوا كلهم ورد عمر وهو يناظر بصالح ويضحك": واصله هديتك بس لا تروح وتتعنى عشاني لأني ماأعرف أتفاهم معها ههه..
أبو زايد: عاد أنت ياعمر بالذات ماتصلح لك السلق ماأنت من أهلها ..
عمر: صادق ياعمي .. مع أني أحب السلق من حب صالح لهن بس إني أربي لي وحده لأ هذي صعبه..
أبو محمد: هاالأيام صايرين بعض الناس يهتمون بالأبل والماعز وطلعت مسابقات و قنوات خاصه تتكلم عنهن..
سطام: هي مجرد أهتمامات بسيطه بس الإعلام المرئي والمقروء ضخم الأهتمام بالإعلانات والجوائز الماليه..
"أبو مشعل وهو يمزح": مايحطون مسابقات للسلق عشان يشارك فيها صالح..
"ضحك صالح وهو يجلس بجنب عمر": والله ياليت ياعمي عشان أطلع بالتلفزيون وأوقف بجنب
والكاميرات حولنا تصورنا ههه..
سطام: لو صار هالشي كان خربت الدنيا يكفي أن حوادث نفوق الأبل كثرت والغالب فسرها بإنه عقاب من رب العالمين بسبب أهتمام الناس الزايد فيها لدرجه أنهم ضيعوا فلوسهم على مسابقات لا تقدم ولاتأخر بدل مايتصدقون فيها..
أبو زايد: صح لسانك ياسطام هذا الكلام اللي مفروض يعرفونه بعض الناس ويطبقونه يتصدقون بدل هالمسابقات..
أبو عبدالعزيز: مو بس نفوق الأبل فيه حوادث كثير محنا لاقين لها تفسير .. قبل كان الواحد لما يقرأ الجرايد تفتح نفسه للأخبار الطيبه اللي يقراها..
اما ألحين لاإله إلا الله كل خبر أردى من الثاني وكلها أخبار غريبه ودخيله على ديرتنا...
أبو محمد: الخراب كله يجي من برا الديره والأمن هم المسؤلين عن كل صغيره وكبيره تصير .. لاتنسى ان أمراء المناطق وظفوا ناس كفوا تصون وتحمي البلد وعطوهم الثقه بس للأسف البعض مو قدها..
متوظفين بالواسطه ولاهم حابين وظيفتهم ولايحسون بالمسؤليه ..
"ألتفت مشعل على أبو محمد وعطاه نظرة وقال بتأكيد": إحنا مانقصر ياعم وكلنا فدوه للوطن ..
"أبو محمد بتعجب": أنت وش علاقتك باللي اقوله؟؟
أبو مشعل: مشعل ولدي من هالأمن اللي تتكلم عنهم .. هو ضابط جمركي (بمنفذ الحديثه) بالقريات..
"أبو محمد أبتسم وهو منحرج": سامحني ياولدي والله أني ما دريت .. أنا أقصد .......
"قاطعه أبو مشعل": لاتعتذر يابو محمد ..انت ماقلت إلا الصحيح ..
مشعل: والله إحناالموظفين حريصين على امن البلد ونحافظ عليها لله بس وكل همنا اننا نبعد الشر عنها ونحافظ عليها ..
أبو محمد: عساك عالقوة والله يكثر من أمثالك..
أبو يزيد: الأمن من هنا يبدأ .. من الجمارك والمطارات والموانئ..
مشعل: اهل المطارات مرتاحين ومهمتهم شوي بسيطه لكن اللي يتعبون هم أهل الجمارك..
لأن عدد المناوبات عندنا ثلاث فترات بس ويوم الاستراحه واحد وفيه ضغط بالعمل وتمر علينا شهور نشتغل بأقوي درجات الحرارة وشهور بأقوي درجات البرودة .. وهالشغل يبي له مهارات وتضحيه وسهر وتركيز ..
سطام: ضغط العمل عندكم بكل أيام الأسبوع وإلا بالأجازات ؟؟؟
مشعل: بكل الأيام وبالذات شغلي بالصيف الله لا يوريك أنواع الضغط وأسأل الوالد عني يعني تمر أيام ماأجي للبيت مع أن المسافه خمس دقايق.. هذا من غير فترة الحج نظطر نستعين بالطلبه يساعدونا ..
"صالح وهو يهمس لعمر": ياشين سوالف الشغل أنواع النكد..
عمر: وأنت الصادق قم خلنا نجيب العشاء من المطعم أزين ..
"قاموا الأثنين وألتفت عليهم أبو سطام وعرف أنهم رايحين للمطعم": أسمع ياعمر إذا جبت العشاء مع صالح لاتنسى كرتون الماء والببسي أنا أبعتمد عليك لأني ادري أن صالح دايم ينسى وش أطلب منه ..
عمر: أبشر ياعمي.. تآمر على شي ثاني؟؟
أبو سطام: الله يحفظك ويوفقك ..
"طلعوا صالح وعمر وألتفت أبو مشعل على أبو سطام وهو مبتسم": ماشالله هذا عمر واحد من أهل البيت تطلبه قبل ماتطلب عيالك..
أبو سطام: عمر واحد من عيالي و جيرتنا مع أبوعبدالعزيز وعشرة العمر اللي بينا خلتنا ما نفرق بين عيالنا وعيالهم كلهم سوا..
^^^^^^^^^^^^^^^^^^^
: أكيد أمك وأخوانك حزنوا لما سافرتي وخصوصآ إنك ما راح تشوفينهم ألا بالأجازاه الجايه..
"أحلام وهي تنزل فنجان القهوه": الله يصبرني على فراقهم.. ما تصدقين ياوتين إذا قلت لك أني ثلاث أيام ماغمضت عيني لأني كثير أفكر بأهلي ومتضايقه لأني ببعد عنهم..
"وتين وهي مبتسمه": ماعليه هذا نصيبك ولازم تتحملين عشان تآخذين الشهاده وترفعين رأس أهلك.. بس صدقيني كلها كم يوم وتتأقلمين وتتعودين على الأجواء هنا الرياض لأنها تجنن وكلها حركه ووناسه ..
أحلام: أن شاءالله ماأكون ضيفه ثقيله عليكم..
وتين: لاتقولين كذا البيت بيتك وبعدين لو يسمعك بابا يزعل منك هو من أمس يوصينا عليك ..
"استانست أحلام":عمي فهد قلبه كبير الله يخليه ويطول بعمره..
" سرحت وتين وهي تتذكر لما زارهم عمها سعد وعائلته بالصيف كان أبوها مصر إنهم يجلسون ببيته طول فتره وجودهم بالرياض بس هم رفضوا وطلعوا بشقه بنفس الحي اللي هم فيه..
ومع إنهم ماجلسوا إلا شهر بس عاشوها وتين وأخوانها وكأنه سنه .. لأنهم قدموا تنازلات كثيره ومجاملات لانهايه لها..
وتين تعودت كل يومين وثلاث تطلع تتمشى مع أخوانها بالأسواق والمنتزهات والمطاعم وخصوصآ أنهم ماسافروا مثل ما تعودوا كل سنه,, وأغلب الأحيان تخرب عليها طلعاتها بسبب زيارات عمها
وعائلته بدون ما يعطونهم خبر من قبل بوقت..
حلوه صلة الرحم وحلوه زياراتهم اللي تكون خفيفه وتشرح الصدر لأبوها وأمها,,
بس اللي تعودوا على العلاقات الأجتماعيه البارده والذكاء الأجتماعي الضعيف .. أكيد ماراح يتقبلون هالزيارات بسهوله.. لأنهم أختاروا علاقات محدوده (أهل .. أصدقاء .. جيران)...
واللي تعودوا على العلاقات الأجتماعيه الحاره والذكاء الأجتماعي القوي.. ما راح يتقبلون هالجفاء بسهوله.. لأنهم أختاروا علاقات واسعه (مجتمع كامل بدون تحديد) "...
ام سطام: وتين.. خذي بنت عمك للغرفه عشان تبدل ملابسها وترتاح وأنا بروح للمطبخ أشتغل..
"أنتبهت وتين لنفسها": ليه يمه انتي اللي تشتغلي.. وين سيتي؟؟
أم سطام: تعبانه من المغرب وهي تشتكي وتصيح قلت لها تروح ترتاح بغرفتها..
"قامت وتين وهي تأشر لبنت عمها": تفضلي أحلام ..
"أحلام وهي تشيل شنطتها الصغيره وعباتها": دام فضلك بعد إذنك عمه..
أم سطام: ساعدي بنت عمك ياوتين..
وتين: طيب..
"سحبت وتين الشنطه الكبيره وراحت للغرفه وأحلام تسحب الشنطه الوسط وتمشي وراها"..
أحلام: بأي غرفه أحط شناطي؟
"وتين وهي تفتح باب غرفتها وتحط الشنطه بجنب الكبت": بغرفتي .. هذي الجهه من الكبت لك وهذاك سريرك..
"ناظرت أحلام وهي متفاجأه وبخاطرها": وش ذا اللون أصفر..؟ غرفه طول وعرض تنطق فخامه بذوقها الحلو جت على سريري تختاره بايخ ويحوم الكبد..؟
"وتين حست أنها ناقده عالسرير من نظراتها له.. قالت وهي تفتح الكبت": سريرك من أختيار أبوي أشتراه اليوم مخصوص لك مستانس بوجودك في بيتنا..
"ألتفتت أحلام على وتين وأرتبكت من كلامها وكأنها قرأت أفكارها": مره حلو تسلم أيده عمي..
وتين: بس أنا ماعجبني تمنيت لك الأحلى من كذا..
"أحلام بمجامله": بالعكس عجبني وذوق عمي كثير حلو..
"وتين وهي تجلس على ركبها وتفتح سحاب الشنطه الكبيره": تسمحين لي أساعدك؟
"أحلام بتردد": لأ مشكوره يابنت عمي أنا أرتب لحالي مابي أتعبك معي..
وتين: مافيه تعب هذا واجبي لأنك توك واصله من السفر ولازم أسوي اللي يريحك..
أحلام: ماتقصرين بس أسمحيلي تعودت أخدم نفسي..
"رفعت كتوفها وتين وقالت وهي توقف": براحتك..
,,,,,,,,,,,,,,,,,,,,,,,,,,,,,,,,,,,,,,,,
"طلعت وتين من الغرفه وسكرت الباب وراها وراحت للمطبخ عشان تساعد أمها بتحضير العشاء"..
"أم سطام وهي تسكر الثلاجه": ليه تركتي بنت عمك لحالها؟
"وتين وهي توقف بجنب أمها": مارضت .. خليتها على راحتها يمكن ماتبيني أشوف أغراضها..
أم سطام: بعدين تزعل إذا ماساعدتيها..
وتين: صارلنا ساعه نجامل بعض "أبي أساعدك,, ومابي أتعبك ..." ومن هالسولف ترا أذا بظل كذا على طول الأيام أتعب يايمه لأني ما أحب أجامل كثير..
"أم سطام وهي تغسل يدينها": لاتجاملينها ولا تشين اخلاقك عليها خليك مثل مانتي دايم مع أخوانك وصديقاتك..
"دخل سعد المطبخ وهو يقول بصوت عالي": العشاء وصل طريق طريق ياأهل الدار..
"دخل فارس وراه وهو مستعجل": خالي صالح يقول خذ طريق لعمر لأنه بيشيل الصياني معه ويدخلها المطبخ..
"أرتبكت وتين": لحظه لحظه لحظه أنا هنا أنتظروا أبدخل داخل..
"فارس وهو يأشر لها": بسرعه أدخلي لأنه بيجي من الباب الثاني اللي من جهة الحوش..
"ما أمداه يكمل كلامه إلا وسمع صوت صالح قريب للباب وهو يحكي مع عمر.. صرخ بقوه": لا لاتدخل لحظه يا خالي..
"مشت وتين خطوه ورجعت خطوه وهي تتلفت بتوتر وتقول": وين أروح؟؟؟؟
"دزها فارس من جسمها وهو يصر على أسنانه": ورا ورا ورا الثلاجات ماراح يشوفك بسرعه!!!!!!
(المطبخ واسع وكبير وفيه بابين واحد من جهة الحوش والثاني جهة الممر اللي قبال المجلس.. وبآخر المطبخ فيه ثلاجتين بجنب بعض ومقابلها الفرن والكبت)..
"تخبت وتين وهي تلتقط أنفاسها من الخرعه وفارس واقف قدامها ويناظر بصالح وعمر وهم داخلين وشايلين بيدينهم الصينيه ويحطونها على الطاوله"..
أم سطام: يعطيكم العافيه..
"رد عمر وهو يقرب لأم سطام ويحب على راسها": الله يعافيك .. كيف حالك خاله؟
أم سطام: بخير الله يسلمك.. وينك صاير ماتنشاف..
عمر: موجود ياخاله بس الدوام مآخذ وقتي..
"صالح بعفويه": ياكذاب دوامك دلع خمس ساعات وأقل بس قل أنك ماتبي تشوف امي عادي ترا ماأزعل..
"عمر وهو يضرب صالح من كتفه": يالنذل تبي تخرب بيني وبين خالتي بس هين حسابك معي بعدين..
أم سطام: ماعليك منه إذا صرت موجود عندنا نادني عشان أشوفك وأسولف معاك.. عند أهلك ما أشوفك وهنا ما أشوفك بعد مايصير..
"عمر وهو يعدل شماغه": أبشري ياخاله من عيوني..
"صالح باستهبال": مادريتي يمه بيسوون مهرجان مزايين السلق وراح نشارك فيه.. انا بآخذ (صدفه ورداد) معي وعمر بيشتري (نجمه) من أبو عطا ههه..
"أنفجر عمر بالضحك وهو يصد .. كانوا شبعانين تعليقات وأستهبال على أنفسهم طول ماهم بالسياره على فكرة مزايين السلق وأشكالهم بالمهرجان"..
"عمر وهو مازال يضحك": خمس ألاف من يزود ههه..
"صالح وهو يميل عليه من كثر الضحك": وإذا تبونها ببلاش خذوها ههه ..
"ألتفت فارس على وتين وهو يضحك من ضحكهم,, لقاها تناظر بالأرض ومبتسمه.. أشر لها بيده فوق تحت وهو يصفر بصوت واطي": ياهوه وين سرحتي؟؟
"رفعت راسها وهي عاقده جواجبها وتحاول تخفي الأبتسامه": وش تبي؟؟
فارس: أعجبتك الوقفه هنا؟؟
"وتين وهي تكتف ايدينها وتسند رأسها عالثلاجه بخجل": .........
"سعد أنتبه لوتين وفارس وجاء طاير ووقف قدام وتين وصار يضحك ويأشر عليها ويقول بصوت عالي": ياحرآآآآآآآآآآم أنحبست هنا ههه..
"عصبت وتين وهي تأشر بيدها": هين ياسعد أوريك..
(طلعوا صالح وعمر عشان يجيبون الصينيه الثانيه)..
فارس: خلاص راحوا أطلعي بسرعه قبل يرجعون..
"وتين كانت معصبه من سعد ولما عرفت أنهم طلعوا راحت مسكت سعد من ثوبه بقوه": أنت ماتترك ثقالة الدم هذي أفرض أن صالح أنتبه لك والله لا يمسح فيك البلاط..
"سعد وهو يبعدها عنه": تهبين تبينه يهاوشني عشانك..!!
"فتحت فمها بتتكلم بس دزها فارس بقوه لورا الثلاجه وهو حاط إيده على فمها": اص جاء عمر..
"صالح وهو يحط الصينيه عالطاوله": تعال يافارس...
فارس: هلا خالي..
صالح: روح خذ السفره للدوانيه ونادلي خالك سطام عشان يجي يودي الصياني مع عمر وأنت ياسعد خذ كرتون الماء ووزعه على السفره..
"أم سطام وهي تشيل القصدير من الصينيه": ماعليه ياولدي ياعمر تعبناك معنا..
"عمر وهو مبتسم": لاتقولين كذا ياخاله هذا واجبي..
صالح: يمه وين سلة الفواكه؟؟
أم سطام: بالثلاجه الأخيره..
"راح صالح للثلاجه وعمر واقف يناظره وهو مكتف إيدينه.. فتح الثلاجه وأنصدم لما شاف وتين واقفه بجنبها.. بسرعه ألتفت على عمر ورجع ألتفت عليها وهو متفاجأ ومعصب بنفس الوقت
يحسب وتين متعمده تتخبى وهو بطبعه مايحب الحركات هذي"..
"رفع حواجبه عمر بتعجب وهو يقول": صالح... وش فيك؟؟؟؟
"وتين خافت من نظرات صالح وحطت أيدينها على وجهها وشوي وتصيح"..
"عمر وهو يقرب خطوه": صالح.. وش شايف قدامك؟؟
"صالح وهو يطلع السله من الثلاجه ويأشر لعمر": خلك مكانك..
"سكر الثلاجه بقوه وهو يروح لعمر ويعطيه سلة الفواكه": ماعليك أمر خذها للرجال بالدوانيه..
"أخذها عمر وهو متفاجأ وطلع من الباب اللي من جهة الحوش.. سمع صالح يصرخ ويقول": روحي داخل!!!!!!!
#####################
×× نهاية البارت الأول.. ××

قسم تعبت ..... كل هذا البارت الأول بس ...!!!!!!!!!!!
انا تراي حجزت عمر وخروا عنه لي ...
إذا الاقي تفاعل نزلت بارتات وغذا مافيه خلاص أنسحب >>> تهديد برا
أمزح معكم يافراشات ..

السلام عليكم
جمعه مبااركه
الباارت ختير يجنن يجنن يجنن
بالله كمليها بوسورعه .... وه بس
يعطيك العافيه